Saturday, December 30, 2006

صدام و القصاص بيد الاصدقاء





موضوع محاكمة صدام و اعدامة هاتاخد راقات من المدونات و المنتديات كعادة العرب و كل يدلدل جردلة وزي ما رحت زي ما جيت صدام كان يستحق القتل سواء محاكمة او غيرها و ليس المجال الان لذكر فضائحة و جرائمة هو و اولادة و قوادة

فلا يخدعكم مظهر الرجل العجوز ذو اللحية المنمقة و الاعتداد بالنفس فما هي الا بقايا جبروت و بطش ابي الا تهتز صورتة
الامور لا تؤخذ بسطحية الامور السياسية اكبر و اكثر تعقيدا من هذا يبدو ان البعض نسي او تناسي المصريين العائدين في صناديق من العراق لذويهم و قتل الاكراد بالاسلحة المحرمة و غالبية من قتلو اطفال و نساء ووجدو في مقابر جماعية مربوطين في بعض و بعضهم بدون رقاب و امهات اغتصبو امام ابنائهم و ازواجهم و قتلو بعد ذلك
بل ان عشيرتة و جيشة لم يسلم من جرائمة بل ان العقاب في الجيش العراقي بلا شك مقتبس من جهنم
من اول تقطيع الاطراف و كسرها و الالقاء من فوق البنايات ووضع قنابل صغيرة ملاصقة للقلب و النحر كالخراف وكل ما لم ينزل الله بة من سلطان
ومئات القصص التي يعف اللسان عن ذكرها يبدو ان البعض تناسي ان كل هذا بامر و علم صدام حسين ليس لانة عربي نتعاطف معة فلا فرق الان بيد من طبقت العدالة سواء بيد الاصدقاء او بيد الاعداء فصدام اذا كان حوكم في اي دولة عربية لكان الان متنعم و انتهي الامر بتحويلة الي اللجوء السياسي و عاش 100 فل و عشرة حتي اخر يوم في عمرة التوقيت مش مشكلة تماما لان حسبما فهمت ان التوقيت كان بسبب بداية العام الجديد وليس لة علاقة بعيد الاضحي مصادفة ليس الا
وحسب وعود بوش سوف تنتهي محاكمة صدام قبل نهاية 2006
و قد صدق
المشكلة عند الناس اعدام صدام علي يد الامريكان ليس الا و ان العرب شعوب تستحق ما يحدث بها ودلائل الهمجية تتخذ ابدع صورها اذا القيادة الليبية تعلن الحداد و عطلة واعتبار صدام اسير حرب و شهيد والكويت كشعب انار الانورا واقام الافراح و اعادة صلاة الجنازة علي البعض فرحة بالتخلص من صدام والعالم كلة يشاهد تشتت العرب كما قطيع خراف اخافها ذئب
صدام عاجلا او اجلا كان سيعدم فلا فرق في التوقيت فقد تم استئناس العرب منذ زمن بعيييييييييد فلا فرق
ان تسلخ اضحية اخري المهم الدور علي مين الاختيارات عديدة ايران سوريا السودان و القائمة
مليئة لا فرق صدقوني
فصدام قامت امريكا بتمويلة عسكريا و ماديا من اجل القضاء علي الاكراد و الشيوعيين العراقيين لما اتسخدمها حاكموة و قتلوة
اعدامة كان لحل تضارب المصالح ليس الا ودفن اسرار لا يعلمها الا الله في قبرة
و ما ان قتلهم قامو بمحاكمتة علي قتلهم و ليست هذة النهاية بل هي مجرد البداية
لرؤية احدي المجازر الكردية عام 88

بعد مشاهدة الصور تخيلو انفسكم او اهلكم مكان اصحابها
لمن يسأل عن محاكمة عادلة لصدام فليري كيف كانت تتم محاكمات جنودة و شعبة
وهذا في اخرة لقري الاكراد بعد نشر غاز الاعصاب بها
بعض جرائم النظام الصدامي اتفرجو للاخر اصحاب القلوب الضعيفة يمتنعو













صورة ارشيفية اثناء تغير ملابسة قبل المحاكمة
قمت بقطع باقي الصورة لانة يظهر بالقطعة الداخلية فقط

Friday, December 29, 2006

صمت الخرفااااان




الأضحية إحدى الشعائر الإسلامية التي أمر بها الله عز وجل القادرين من المسلمين في عيد الأضحى، والتي تعد واحدة من مظاهر البهجة والفرح للمسلمين في يوم من أحلى أيامهم ... وحتى يضمن الإسلام سلامة البشر والحفاظ على صحتهم فإن شروطا وضعتها الشريعة الإسلامية في الأضحية المختارة منعا للعبث والغش، مثل أن لا تكون الأضحية عوراء أو عوجاء أو عمياء أو بها جرب أو تولاء (أي التي تلف حول نفسها) مهبولة يعني كما يجب أن يكون سنها حوالي 6 أشهر في الضأن وسنة في الماعز وسنتين في الأبقار والجاموس و5 سنوات فأكثر في الجمال فكل المسلمين في سائر الدول يتبعون الفداء الذي امر بة الله ابراهيم و خاصة شعب مصر المحروسة تجد الرجل من الطبقة المتوسطة و هي الغالبة يحسب لهذا اليوم حسابة ويعد العدة بدأ من الجمعيات و انتهاية بالدين كل ذلك في سبيل ارضاء حرمة المصون و الفشخرة و المنظرة قدام الجيران و العائلة الكريمة فلابد من خروف بقرنين او اكثر ان وجد ذو لية مهيبة يمكن استخدامها في مرايل العيال السنة الجاية او كسجادة في البلكونة و ذو صوت مجلجل يوقظ الاموات حتي لا يشمت فيهم الاعادي ولا زم خروفنا يكون اكبر من خروف سهير اللي في الرابع و مسمسم عن خروف مديحة اللي في السابع

ففي العام الماضي قد رزقني الله ب عجل و اربعة من الخراف المعتبرة و معزة و قد وضعها جيراني الافاضل موزعين في العمارة فواحد من الخرفان استضافة البواب بين اولادة بل اكاد اجزم ان البواب رمي واحد من عيالة و ادي الخروف سريرة حالما بجزء من اللية و بعض اللحم الاحمر
في يوم سمعت زوجتة ترقع بالصوت الحياني و لا سبرانو محترفة باوبرا عايدة بعد ان قفشتة نايم علي السرير جنب الخروف و نازل بوس و احضان فية قائلا:بحبك يا روفة بموت فيك يا خرفرف عمري ما تجيب بوسة و انتهي الامر با اما الخروف يا ام احمد في البيت و كما توقعت وجدت ام احمد ساحبة عيالها و رايحة عند امها و جلس البواب محتضنا الخروف و مشغلة التلفزيون علي سبيس تون.
اذكر في احد الاعوام و كعادة جاري وضع خروفة فوق السطح منطلقا في ارض الله يبرطع كيفما شاء و اينما شاءالمهم كان يجتمع اطفال العمارة فوق السطح للعب مع المأسوف علي شبابة فيقومو بوضع مخدة فوق ظهرة كسرج و البنات تربط علي رقبتة فيونكة حمراو يتم الركوب علية بالتبادل و لا يخلو الامر من بعض اللسوعة بخرزانة خشب حبيبي معتبرة ولا بأس من السباب بدأ من الاب نهاية بالزريبة اللي جة منها و قبل موعد زبحة بساعات قام بالتخلص من حياتة المزرية بالقاء نفسة من الدور ال 12 واضعا حدا للمهانة التي ذاقها صنوفا علي يد المزغودين الصغار اما في المنور فوضع خروفان لا يحلو لهما الردح و شتيمة بعضهم الا بعد منتصف الليل فيكون الامر ما بين مأمأة وشخير و نطح ورمح يخيل للسامع كان ملكي الحساب بالداخل اما علي السطوح فالوضع كان في غاية الانسجام فهناك معزة و خروف و الشيطان شاطر فيمر الليل بين مناوشات و معاكسات من قبل الخروف و دلال من المعزة ولا عبد الحليم وشادية او قيس و ليلي او حسام و دينا ويأتي النهار وتري الخروف ممدا ولا حسين فهمي مشعلا عود برسيم اخضر ورور منفثا دخان علي شكل حلقات
اما عن العجل فقد شرف عمارتنا قبل العيد بليلة و تم ربطة كحارس امن مركزي علي مدخل العمارة و يبدو ان مزاج سيادتة مش ولابد بعد هزيمة الزمالك فكان تعيس الحظ من يمر امامة مرتديا اي لون سواء احمر او اخضر فحتما سينول من الحب جانب سواء رفسة او نطحة و علي احسن الفروض تفة علي وشة و موضوع بجانبة كمية تبن و برسيم تكفي لتسمين مزرعة مواشي كاملة و كانت من اسود ليالي العمر الاستماع الي تجعيرة طول الليل بل لقد وضعت خطة لقتل العجل و اخفائة في اي مزبلة لكنها اجهضت في مهدها بعد نظرة واحدة الي حجمة المقارب لجمعية استهلاكية صغيرة و اكتفيت بسبة في سري و عاهدت نفسي ان يوم العيد و عند التخلص من هؤلاء الاوغاد سوف اقوم بالرقص عشرة بلدي و خمسة فينو احتفالا بانقشاعهم لكن ولان العشرة متهونش الا علي ولاد الحرام فقد حزنت لفراقهم لكن مع اول سنتدوتش لحمة و مغرفة فتة بدل الترح بفرح و عقبال عندوكو و كل لية و انتو بخير حط القرون فوق المكتب يا جاااااااااااااااااااااااااااااابر

Friday, December 22, 2006

الحبيب الجفري من انت..؟؟؟

الموضوع المرة دي عبارة عن تساؤلات شغلت بالي لفترة طويلة
عن الداعية الحبيب بن علي الجفري

ولمن لا يعلم هو ابن نائب رئيس اليمن الأسبق
لا انكر علية علم او تدين لكن سرت عنة الشائعات كما تسري النار في الهشيم
فتارة هو شيعي وتارة سلفي و بعض قال وهابي
لكن برامجة التلفزيونية تنفي ما سبق
و انتهي الامر بترحيلة خارج مصر والامر لمن لا يعلم الواقعة ان رائد في أمن الدولة قام بزيارتة في منزلة وقبلها بدقائق تم قطع خط الموبايل الخاص بة
واخبرة بأنه مطلوب منة مغادرة مصر الليلة ولحد يومنا دة هو مممنوع من دخول مصر علي ما اذكر كان في زيارة لليبيا و نزل مطار القاهرة ترانزيت 8 ساعات وطلب من امن الدولة ان يذهب للحسين و يصلي ثم يعود ليلحق بالطائرة فرفض طلبة تماما
ويقال من الاسباب المؤدية لترحيلة حضور بعض الشخصيات الفنية زي علاء مرسي والفنان علاء ولي الدين ويسرا وغيرهم و اخري سياسية
وفي مقولة اخري ان ايمن نور المرشح السابق علي مقعد الرئاسة و المسجون الحالي دعاة الي منزلة لاقامة مجالس ذكر وعلم
و كرر نفس الطلب من مستشار بحضور المدعي العام و كذلك الدكتور أسامة الحوفي بحضور رئيس مجلس الشعب
وان كان هناك بعض الاشياء المثيرة للاقاويل مثل حضورة دعوة للاحتفال في منزل رجل الأعمال المصري المهندس كمال الكتاتني وتصادف وجود خالد الجندي وهو ليس فوق الشبهات خاصة بعض ظهورة علي القناة الاولي المصرية في رمضان
يوميا و لمدة ثلاثون يوما ليؤدب جموع المسلمين المصريين علنا ودعوتهم لتعامل باخوة مع النصاري من باب ولازم تتلمو يا بقر
كفاية كدة كسفتونا
ولاني مقتنع ان اللي بيطلعو علي القناة الاولي لازم تكون الحكومة منشكحة منهم علي الاخر
المهم كثير من الناس اجمعو انة صوفي وللاسف بعض الافرع المنبثقة من الصوفة تعيش في عالم و كون اخر
وسوف اتي علي ذكر بعض غرائبهم التي حضرتها شخصيا في موضوع اخر

وقع في طريقي تسجيل بة الحبيب الجفري علي الارجح انة كان في احتفال يوم عاشوراء او المولد النبوي
مع العلم انة أمر مبتَدع لم يفعله الرسول صلى الله عليه وسلم، لو كان مستحبا لفعله الرسول صلى الله عليه وسلم في حياته، لأمر به الصحابة، لأمر به أبو بكر، لأمر به عمر، لأمر به عثمان، لأمر به التابعين
ملحوظة:"باحتفالات الطرق الصوفية بالمولد يتهيأ لهم أن النبي صلى الله عليه وسلم يحضر ويتركون له مكانا خاليا وبهذا ينتقلون من بدعة العمل إلى بدعة الاعتقاد
في الفيلم جماعة منسلطنين اخر سلطنة وتنطيط لا ادري اهذا ما اوصي بة الرسول
ولم ينكر الحبيب الجفري الامر عليهم الا انة امر احد باغلاق الكاميرا
تعالو نشوف

Thursday, December 14, 2006

الحَج ابو صرة

قد ان الحج و عظم الاجر و غفرت الذنوب و تاب الفاجرون و ندم الخاطئون لكن ليس كل من حج يسمي حاج فكثير من الناس يذهبون الي الحج من باب الفشخرة
الفشخرة هي الة تعذيب تعود الي القرون الوسطي كان يجلس عليها المحكوم علية بالاعدام وكانت شروطها ان تكون حادة مدببة و في مكان عال
وتمني البعض ان يسجل عدد عمراتة و حجاتة في البطاقة و الاخر يحج ليحصل علي لقب الحاج و العيال العريانة اللي في شارعهم تجري تبوس ايدة
وصناعة الشحاتة المنظمة
من مصر و غيرها من الدولة الجعانة
ناس تسافر لا لكي تحج و لكن من اجل الشحاتة
وتفنن في اختراع وسائل استدرار العطف
من اول ضياع الباسبور و الفلوس
ونايم عريان و عايز ارجع بلدي يا مؤمنين
لحد السرقة وقطع الحزام من حول خصر الحاج وسرقة الموبايل

بعض مما سوف اقولة حدث في ارض الحرم و بعضها في طريقة الي الحدوث والبعض من خيال المؤلف فاذا تشابة الواقع مع الخيال فهذا من قبيل المصادفة
فا علي السادة الركاب المتوجهين الي بلاد الحجاز ربط الحزام و الامتناع عن التدخين و اطفاء سجاير الحشيش حرصا علي سلامة طاقم الفلوكة ... اسف طاقم الطائرة
مشهد اول .ليل خارجي امام باب صالة سفر الحجيج خليط هائل من البشر عند بوابة الدخول سيدة يبدو عليها الثراء ترتدي جلباب ابيض منقوش علية صورة لميكي ماوس.. و تمسك سلسلة في اخرها كلب لولو ..تصرخ بالصوت الحياني...يعني اية مينفعش سنسن يسافر معايا انا مقدرش اسافر و اسيب سنسن موظف المطار يرد و هو يجز علي اسنانة..يا حاجة مينفعش تاخدي الكلب معاكي السعودية السيدة و هي تتشنج انا مش حاجة انا انسة و هاخد الكلب يعني هاخد الكلب ينظر الموظف خلفة مناديا اتنين من الشيالين عوض سعد ودو الولية دي الحجر الصحي هيا و البرص اللي معاها عوض قائلا ..مفيش مكان يا بية كومبلية خلاص يصمت الموظف مفكرا خلاص ارمي الكلب في الشارع و الولية دة خدوها علي الشفخانة
الشفخانة الة شبيهة بالة الفشخرة لكنها اشد ايلاما

مشهد اخر لابد و حتما يراة من يسافر الي الحج من مصر و علي طيران مصر للطيران مجموعة من ابناء القري وبينهم حاج
وزفة بلدي معتبرة بالطبل و المزمار و الناي و الصاجات خلف الحاج تزفة لحد باب صالة السفر
ولا مانع من الزغاريد و اذا كانت احدي النساء السعادة جايبة اخرها و الواجب حتم عليها فلا مانع من هزة وسط صغيرة من باب المجاملة
دة الراجل طالع يحج يا ولداة
وطبعا ينتهي الامر بفرجة الاجانب علي الاشكال دي
وتصوير فوتغرافيا و فيديو واللي يحب النبي يصلي علية الحج بتاعنا مفيش زية

يمر الموقف ويتجة باقي الركاب الي الطائرة و يجلس كل منهم في مقعدةنجد في درجة رجال الاعمال وجوة نظيفة تلمع تفوح رائحة العطور من اجسادهم بعضهم جلس يقراء في الجرائد و البعض يستمع الي الووكمان الي اذاعة نجوم اف اخص اما في الدرجة السياحية فنجد حجاج القرعة
حجاج القرعة هم بعض المواطنين الذين وضعو امالهم علي الله ليذهبو للحج ثم اكتشفو ان الحكاية في ايد الكمبيوتر
مجموعة منهم اخذت تنادي بصوت عالي محبب لبيك اللهم لبيك و انشغل البعض في القران و البعض في الذكر كل يمني نفسة بالوصول الي الحجاز يعلو صوت المهللين .. ان الحمد لك و الملك ..... في مقاعد درجة رجال الاعمال ينادي احدهم المضيفة ..بست بست يا قطة :-"تهرول الفتاة ناحية الراكب مجيبة ..ايوة يا فندم اي خدمة ؟؟ايوة يا ريت تقولي للجماعة اللي ورا يوطو صوتهم شوية لحسن مش عارف انام و شغلي موسيقي هادية...ترد المضيفة في ارتباك يا فندم دول بيسبحوا .... و بيذكروا الله الراجل في قرف شديد: يا سلام ما يروحوا يسبحوا في اي حتة البحر تحتيهم ينطو فية و يعومو و يسبحو براحتهم ...سباحة اية في البرد دة .... عجايب تحاول المضيفة في نفاد صبر ان تقنع الراكب ابو كرش مدلدل انها لا تستطيع فعل هذا.ينادي راكب اخر من اصحاب الكروش و المعالي بس بس يا قطة ..تهرول الغلبانة قائلة ..ايوة يا فندم ,,الراجل في ابتسامة بلهاء كابتسامة انثي الجحش عند وقوف ابنها علي اربع هو انتو مش هتشغلو فيلم نتفرج علية لحد ما نوصل لسة فاضل ساعتين..و ياسلام لو عندك فيلم نبيلة عبيد الجديد تزفر المضيفة في نفاد صبر و تندب حظها العسر يا باشا الطيارة دي رايحة السعودية يعني ناس رايحة تحج وتوب اشغلهم نبيلة عبيد ازاي يطقطق الرجل رائسة مفكرا
يطقطق اي يلوي رقبتة يمين و شمال لحد ما تطقطق

اة والله معاكي حق فاتتني دي..طيب شغلي حاجة للست سهير رمزي ماهي خلاص اتحجبت تدير المضيفة ضهرها للرجل وترحل مجيبا حاج اخر من اصحاب الكروش ينظر لها الرجل ملعبا حواجبة بقولك يا برنسيسة ملقيش عندكو اي عصير يرطب عالقلب؟؟تجيبة المضيفة في ابتسامة بريئة..عندنا عصاير فريش ومياة غازية و مياة مع...يقاطعها الرجل ضاحكا كاشفا عن صف اسنان نخرها حمار و ليس تسوس عصير اية و بيبس اية معندكوش حاجة جامدة كدة ويسكي فودكا ؟؟؟ تنظر لة الفتاة في بلة ...؟ قائلةلا يا فندم مفيش... و ترحل لاعنة ابوة و ابوها الذي تركها تعمل في هذة المهنة يميل الرجل علي راكب بجانبة قائلا في خبث...و لا يهمني انا عامل حسابي و جايب معايا قزازة ويسكي شيفاز ريجال انما اية تستاهل بقك بس انا شايلها لوقفة عرفات لحسن الدنيا بتبقي حر ...
عند ركاب حجيج الدرجة السياحية نجد عطوة موظف بوزارة الزراعة واضعا بين رجلية كيس لب اسمر سوبريقوم بالاكل منة بين حين و اخر ملقيا بالقشر من الشباك يميل عطوة علي جارة قائلا... عارف يا زكي يا اخويا انا ضحكت عالكومبيوتر بتاع الوزارة و خليتة طلعني في القرعة ينظر لة زكي مزبهلا و هو يقول ...
الازبهلال هو مرض يصيب الحمار الاجرب ثم ينتقل الي الانسان
يخرب عقلك ازاي؟؟؟عطوة يجيبة و هو منتفشا كذكر العنزبيل الافريقي العنزبيل الافريقي هو حيوان يوجد في افريقيا ويتميز بالعنزبة الشديدة
شوية فهلوة و حداقة و متنساش ان محسوبك واخد 3 كورسات في الدوس dos ينظر لة زكي منبهرا قائلا اذا كان كدة لما نرجع اجيب مراتي اوريها الكمبيوتر علشان الوحم في اثناء ذللك ينطلق صوت قائد الطائرة امرا الركاب بربط الاحزمة و الامتناع عن التدخين ..علي السادة الركاب ربط الاحزمة و الامتناع عن التدخين .... احم اةة و الجحش اللي بقالو ساعتين في الحمام يخرج لحسن هايجيلي تسمم تهبط الطائرة يندفع الناس منهم المشتاق لزيارة النبي و منهم المشتاق لشراء مروحة 3 ريشة و كيتشن ماشين
نهار خارجي يوم صحو مشمس يتدافع الاف الحجاج للذهاب الي جبل عرفات لتعظيم شعائر الرحمن كل يمني نفسة بمغفرة لعلها تمحو معاصية كل يريد العودة من الحج و ليس علية ذنب لكن من تقبل منة حجتة ؟؟ من يغفر لة ؟؟؟ دة مش موضوعنا نقترب اكثر من الجمع الغفيرة الكل يتشابة في الملبس و في الوجوة المرهقة لكن شتي في القلوب
اتنين من الحجاج يبدو عليهم مظاهر الثراء(محدش يسئالني ازاي) الا قولي يا اكسلانس ازاي حكومة السعودية بكل امكانياتها دي مش قادرة توفر عربيات جولف للحجاج ؟ يرد الاخر مجيبا بطريقة العالم بكل الامور يا مون بية الحكاية مش حكاية فلوس الفكرة ان الاول الارض دي تتمهد و تتزرع و تبقي خضرا يعني مثلا شايف الجبل اللي هناك اللي الناس واقفة علية ..يرد الاخر ..ايوة ايوة مالة.؟انا هاقدم مشروع للسعودية هايكسبهم دهب احنا الاول نهد الجبل دة و بعد كدة نديها نجيلة صناعي علي بحيرة صناعية و نخليها members shipيعني الحاج من دول يدفع مبلغ سنوي دائم و يجي يحج في اي وقت يلاقي الكابينة بتاعتة موجودة و الشمسية محطوطة في هذة الاثناء كان يستمع لهم رجل فقير لدرجة ان الفقر قرف منة و طفش و اخذ ينظر لهم مدلدلا لسانة شاخصا لما يقولوة ... ينظر لة احد الرجلين في قرف قائلا.بص اهي المناظر دي اللي بتبوظ اي حاجة كويسة فين الامن يجي يشيل الراجل المعفن دة و يقوم الرجل بلزق الحاج علي قفاة بالشبشب محاولا ابعادة
علي احدي المرتفعات في عرفات تجلس سيدة تشبة جبل احد في الحجم منهمكة في اشعال بوتجاز بدائي و حولها 3 اطفال في حجم حجر اسماعيل علي ما يبدو اطفالها يا تامر انت ياولا .... فين كيس سانتدوتشات الجبنة الفلمنك و حلة المحشي نصها راح فين ؟؟ ينظر تامر في خجل الي الارض ترقع امة بصوت حياني ...اكلت عجلة جبنة يا ابن الطفسة و 12 متر محشي تهرول الام خلف تامر ملوحة بفردة شبشب مطيحة بمن القاة حظة التعس في طريقها في اثناء ذلك رجل بدين ذو كرش مدلدل رافعا يدية داعيا الي الله قائلا يا رب انا سرقت و اكلت فلوس من الربا و شربت خمر و زنيت وقلعت مراتي و بنتي و سرحتهم في الشوارع يا رب سامحني ينزل شبشب ام تامر علي حين غرة علي قفا الرجل مسببا صوتا عاليا صارخة..قفشتك يا ابن المفجوعة يلتفت اليها الرجل و الدموع تكاد تنفطر من عينية ::: لية يا رب كدة انا مش وحش اوي كدة تنظر لة الولية قائلة .. معلش يا اخويا انا كنت فاكراك الواد تامر ابني اصل اسم الله عليك هو شبهك تمام من قفاة .. ترحل الست باحثا عن البغل ابنها مطيحا بكل من كان لة قفا شبة قفا المحروس ابنها.
نفس الاتنين بتوع عريات الجولف وقد اشعل كل منهما سيجار بقولك يا اكسلانس مش معقولة الزحمة دي الواحد خلاص هايتخنق المفروض الموضوع يبقي في تنظيم اكتر من كدة ...يعني مش كل الناس دي تطلع تحج مرة واحدة السنة فيها اتناشر شهر يدلعو نفسهم براحتهم شوية يطلعو في ابريل حبا في ديسمبر شوية في اغسطس علشان التان
التان هي لون البرونزي يكتسبة الجلد عند الجلوس علي شط البحر في مواجهة الشمس او اذا هب فيك وابور جاز
ينظر لة الاخر مفكرا بس انا اسمع ن المفروض الواحد بيسافر في الشهور العربية بس...؟يرد الاخر خلاص يا سيدي يطلعو في كيهك في طوبة في امشير
منظر اخر عند قبر فاطمة الزهراء ابنة الرسول صلي الله علية و سلم بالبقيع عدد من الرجال و النساء يبدو عليهم تعبيرات عجيبة ..و النبي يا فاطمة السماح بعضهم يضرب رأسة بالشبشب او يضرب من بجانبة بعضهم يمرمغ رأسة في الرمل و يرزعها في الصخر (شكلهم بيخرجو عفاريت )
نعود بجانب الجبل دخان يتصاعد وسط مجموعة من الجاج شاكلهم من شبرا يا ابني ما تجيب ولعة الفحم هايطفي صوت كركرة ماء بعض الرجال يجلسون حول شيشة يدوية الصنع برطمان و فية عود قصب فاضي او شاليموكل منهم قد شلح البشكير وجلس القرفصاء منتظرا دورة في التعميرة يقترب المغرب كل يترك ما في يدة يفوقون من غفلتهم يقفون علي الجبل يلتفون حولة يرفعون ايديهم سائلين الله المغفرة يبكون بدموع الحسرة و الندم يتأوهون من الم المعصية يبكون من عظم المغفرة يبكون لمجيب المسئلة يشهدون بوحدانية مقلب الافئدة يا رب يا رب يا رب تذهب الشمس يشدو الرحال فرحين بمغفرة الرحمن ...يميل احدهم علي الاخر قائلا ... الاقيش معاك ازازة بيبس لحسن ريقي ناشف ..ينظر لة الرجل شذرا بيبس اية متعرفش انة حرام و يبوظلك الحج خد اشرب فيروز

Thursday, November 09, 2006

الزحار الجنسي في وسط البلد

طبعا كلنا سمعنا عن حالة الهياج الجماعي في وسط البلد
و طبعا كل دلدل دلوة
المهم نقلا عن احد القيادات ان ما حدث هو الاتي
الولية دينا الرقاصة اديتها وصلة معتبرة هي و بعض المشاركين في فيلمها الجديد لجذب الناس لدخول الفيلم
وتهجم الشبابا الخربان علي الولية الغلبانة دينا وتدخل رجال الامن الصناديد و حاشو الجرابيع عن المصونة دينا ووجهوهم علي الولايا في الشارع
المهم الشباب باظ علي الاخر وبقي يجري كالمسعور علي اي حاجة نتاية في الشارع بل ان بعض العربجية قامو بتهريب بعض الحمير البلدي النتي خارج منطقة السعار خوفا علي نسل الحمير
و اختلط الحابل بالنابل العاهرات لا يفرق بينهم و بين العفيفات
المهم ملحق فيلم صور من احدي البنايات في منطقة الزحار يتابع بعض ما حدث و تهاون الامن المعتاد
تابع فيالق الصيع لتري الضحية

و بناا علي بعض التوجيهات تم ايجاد حل ملائم للمتحرشين و هو الاتي

اللباس السوبر نوفا و دة بيلبسو كل من اتهم في قضية تحرش
يعني و كل واحد و مدة عقوبتة يعني ممكن واحد ياخد سنتين مع اللباس

او 5 سنين مع اللباس

وظيفتة اول ما الشخص تظهر علية بوادر تحرش يروح اللباس مديلة شحنة صاعقة 20 فولت لو ما اتردعش يزيد ل 80 ثم 250 ثم 1000 الي ان يصاب بعجز و في الحالة دي ممكن الست والدتة تستخدم اللباس في تحمير البطاطس و ان اهيب بالحكومة انها تعمم الاختراعات دي و عمل لجان تفتيش في اماكن التجمعات و الاتوبيسات يعني كل اتوبيس يركب فية مفتش للبسة معاة لبيسة زي بتاعة الجزم و يالا يا حضرات كل واحد ينزل البنلطون في تفتيش
ممكن واحد فلحوس يقولي طيب فلنفترض المتحرش المنفذ للعقوبة حب يقضي حاجتة يعني

طبعا احنا منسيناش الحكاية دي بيكون في فتحة مخصصة للامر دة

ولازم يقدم طلب قبليها بيوم و تحضر لجنة معها مفتاح اللباس الالكتروني
ويتم الفتح في حضور 3 ممثلين من اللجنة

و هذا و بالله التوفيق

Tuesday, October 31, 2006

ومضي رمضان يا مرسي



كالعادة مضي رمضان و اخد في وشة كعابر سبيل ضل الطريق لا اذكر علي وجة الدقة احنا صومنا 30 يوم و لا 5 ايام لسرعة انقضائة و كالعادة المتأصلة في الشعوب العربية التي هي اشد رسوخا من الجبال و قد اتفقنا علي الا نتفق امنية حياتي قبل ما اموت الاقي كل المسلمين بيصومو رمضان مع بعض اموت و اعرف لما مثلا الخليج يصوم بدري يوم عن الباقي ليلة القدر لما تيجي بتنزل مرتين و لا الباقي يشوفوها في الاعادة

التلفزيون و التلفزيون في رمضان يتحول بقدرة قادر الي بقالة و دكانة مني فاتورة من بتوع التموين ويصبح اشبة ببياع معفن واقف بهدومة المزيتة و التي تشر سمنة وزيت ويقوم بتوزيع المواد التمينية علي المواطنين و احيانا فشة و كلاوي و ممبار علي اعتبار اننا شعب همة علي بطنة المهم يتسمم الاول و بعدين ربنا يفرجها بشوية مسلسلات في بواخة الحمير البلدي لما تزرجن
نفس المناظر و الممثلين و السحنة العكرة اللي تقطع خلف الارانب و نفس الاستنطاع و الاستهبال و استخفاف الدم و لا من معترض ومسلسلات منسوخة من افلام اجنبيةو اخري منقولة من احدي البرك في حي الشرابية و كل مؤلف معتد بما كتبة و لا كانة مؤلف رواية محمد ابو سويلم في بلاد العمالقة

و ممثلات لا تقل صغراهن عن 50 عاما بل ان احداهن تبلغ ال 63 ربيعا و تصر علي ان تلعب دور طالبة بفيونكات و العيال اللبط اللي في الحارة مهبولين عليها و ليل نهار عمالين يزقلوها بالطوب و عن الكاميرا الخفية حدث ولا حرج فقد اصابت نصف الشعب بالبواسير و النصف الاخر بالتبول الا ارادي و اصبحت السمة ان لازم اللي معمول فية المقلب ينضرب علقة موت و لا مانع من اخصائة ان امكن حتي يكون المقلب ناجح وتعليقة بلبوص في شارع بيتهم
و اصبح المواطنين في حالة تحفذ فاذا دخلت محطة جزارة ووجدت لحمة سوداني فانت ضحية في الكاميرا الخفية و تكتشف في نهاية الحلقة ان دي مش لحمة و ان اللي نايم في التلاجة ابن عم المنتج و اذا دخلت الي مصلحة و اشغالك انقضت بلا معوقات فانت بلا شك في الكاميرا الخفية وسوف يتم اتهامك بالتخابر مع الاعداء في نهاية الحلقة
واذا وجدت المرور في حالة سيولة قبل الفطار بربع ساعة و مفيش كلاكسات و الناس بتضحك فخذ حذرك فانت في الكاميرا الخفية فلابد في نهاية الشارع حفرة تكفي لابتلاعك انت و سيارتك و مراتك التخينة ثم انتقل التلفزيون بقدرة قادر من جهاز ترفيهي الي واحد من شحاتين السيدة فنحن في شهر مفترج و هنيالك يا فاعل الخير و الثواب لذلك يحرص التلفزيون علي عرض اعلانات عن الايتام و العجزة و المشردين و المطلقات و اصحاب سلس البولو حاملي الاعدادية و البلهارسيا وبعض فلول الهاربين من جحيم العراق و لبنان و كل المناظر اللي تقطع القلب
وبناأ علية علي كل مواطن جبلة معدوم الضمير انة يفك الكيس و يخرج من تحت البلاطة لعل الله يرضي علية ويشيل من ذنوبة اللي هاتدخلة هو و اللي خلفوة جهنم حدف

اتبرع يا مواطن لبناء كشك سجاير لام حمدية اتبرع يا مواطن لشراء تور لجاموسة حامل علشان نستر عليها حتي شركات المحمول أبت ان يفوتها طابور الشحاتين ودعت المواطنين اللي علي قلبهم الفلوس المتلتلة الي التحدث في التلفونات و ان كل مكالمة هانخصم منها و نتبرع لبناء مستشفي يعني يشحتو مننا و ياخدو حسنات علي قفانا طب ما تتبرعو انتو بفلوسكو ولا انتو فقرا ان ارباح احدي شركات المحمول في عام تكفي لاطعام 3 شعوب عربية لعدة اعوام و من ابو شقرة و كل يشحت بطريقتة و كان مفيش حاجة اسمها وزارة الشؤن الاجتماعية او ان دي وظيفتها المقدسة تعذيب و تربية اصحاب المعاشات و الجري و را العيال العريانة في الشوارع
و اذا حدث مصيبة و فقد فيها ارواح من المواطنين الغلابة كحادثة القطار الاخيريتشملل وزيرة التأمينات ووزارة الصحة و النقل و يقوموا شاكرين بصرف معزة جربانة لاهل المتوفي و كيس سوداني و كاجو للمصاب كل ما فات مش مهم بردة الحكاية مازالت في بيتها و احنا و الحكومة ستر و غطا علي بعض الا ما حدث و كانت الطامة الكبري فقد شاهدت علي قناة ال
mc2 و mc4
اعلان يعتبر بجميع المقايس الدولية و الشعبية فضيحة بجلالجل و لا فضيحة المطاهر جمعية خيرية (لا اعلم هل سميت كدة لان صاحبتها واحدة اسمها خيرية) المهم جمعية خيرية عاملة اعلان بتقولك ان الاطفال اليتامي في الصعيد محدش معبرهم و العيال يا ولداة هاتموت من البرد الزمهرير و تطلب بطانية لكل طفل مع صور لاطفال عمالة ترعش من البرد و متكومة جنب حيطة عليها اثار تبول قديم الفضيحة هنا لليست للجمعية هاتعمل اية يعني ولا كانت الحكومة اديتها بطاطين بالهبل بس الجمعية اعترضت علشان البطاطين صناعة محليةو اعلان اخر لطفل مشلول و معاق ذهني جالس علي كرسي متحرك و الكاميرا مركزة علية و تم الباسة اسوأ ما تتخيلو من ملابس وربما تم لزقة علي قفاة من قبل الجمعية المعلنة حتي يظهر بالمظهر الملائم للحدث و دعوة اي حد في قلبة رحمة و شفقة يلحق الواد قبل ما يتم ارسالة في بعثة تبشيرية الي اوغاندا و يخلوة فرجة للافارقة
لكن الوكسة للشؤون الاجتماعية و الحكومة فعندما لا يجد طفل يتيم بطانية بس بطانية و عندما لا يجد معاق من يمد لة يد العون فاين هي المهزلة المسماة وزارة الصحة فأي دولة تلك واي وزيرة و اي وزير
و الا دة مبداء احنا هانجبلكو منين نشحت يعني طب اهو
و هوجة البرامج الحوارية و قد اتحفنا الاخ حسين فهمي ببعض النماذج المريضة في بعض حلقاتة احداها امرأة واضح انها من محدثي النعمة لا تستريح الا لو اشترت كل ما بداخل اي محل تذهب الية و بتقول ان جوزها بخيل كدة قدام ال 80 مليون نفر
و التانية اللي قرمت صباع جوزها و التالتة اللي جوزها اتجوز الشغالة
لا انكر ان بعض الحلقات جذبت انتباهي مثل اطفال الشوارع
و اخري عندها 60 سنة و عيالها اطول من قرد البابون و شغاله عمليات نفخ و شفط و ضرب
انا مش عارف الناس دي عايزة تقعد طول عمرها في سن ال 20 اروح اموت نفسي انا يعني
وطبعا لا يمر رمضان الا لما الاختين الحلوين دينا و فيفي عبدة يطلعو في التلفزيون المصري يتفضلو علي الشعوب الجربانة بالحكمة و الموعظة
فدينا كل سنة تطلع تقولك انا عارفة ان الرقص حرام و بدلة الرقص حرام و ينزل دمعتين
و ينزل المخرج باغنية توب علي
اما الست فيفي تقولك الرقص دة فن و حلال دة انا فاتحة يجي 100 بيت من ورا وسطي
طب الواحد ياخد براي مين فيهم
الله يرحمك يا بديعة
ثم كانت الناهية في اخر ايام العيد حالة من الزحار الجنسي
ايوة زحار ليست خطاء مطبعي
زحار جنسي في وسط البلد شباب تسوقهم هرمونات التتسترون في حالة ريالة علي اي انثي حتي و ان كانت حمارة حصاوي
و اعتداء و انتهاك حرمات للعلم ما حدث ليس شي جديد
لكن كل ما هناك ان التغطية الاعلامية من قبل المدونين و محطات فضائية اظهرتها للعلن
لو حد فيكم راح ملاهي السندباد من 10 سنين يوم العيد او الوقفة كان شاف اللي انيل من كدة
و نفس الموقف الامني من شباك المتفرجين هو هو لم يتغير
و اعتقد ان دي من باب خلي الناس تفك عن نفسها
و ختاما
منكم لله يا كفرة في هذا الشهر المفترج

Saturday, October 14, 2006

النهاردة هاتصلي سيكا و لا نهاوند

من اول رمضان و انا معتكف عن الكتابة علشان الواحد ميلبخش في حد او اتقاء لشرورو نفسي
لكن عدة مواقف تخلي العقل يشت من مكانة
اولا امامك حاجة من اتنين يا تصلي ورا امام يقعدلو بتاعة ساعة و نص ساعتين لحد ما تلعن الاخضرين و يحرمك تيجي التراويح تاني
يا اما تلاقي واحد بخلص الليلة في ربع ساعة
و الله علي ما اقول شهيد امام زاوية بيصلي العشا و التراويح و الشفع و الوتر في مالا يزيد عن 20 دقيقة
الراجل اساسا لو طال يقرا سورة الاخلاص علي ركعتين كان عملها
و الناس اية طايرة بي طير و ربنا يخليك يا عم الشيخ يا مريحنا يا مدلعنا
اقطع دراعي ان الراجل دة اللي بيصلو بياكلوة
اما اكثرالعادات انتشارا ذهاب الناس الي مساجد ليصلوا خلف شيوخ بعينهم
فتجد نشرات صغيرة تقولك الامام الفلاني في المسجد العلاني
حصريا صلاة التراويح خلف الشيخ علان الحقلك حصيرة يا مؤمن و اصبحو كما المطربين في الشهرة و الشعبية
و تجد الناس تروح بالمشوار خلف الشيوخ في المساجد و تبحث و تدقق الشيخ فلان هايصلي فين السنة دي
(عن رسول الله صلي الله علية و سلم قال:لا تشد الرحال الا الى ثلاثة مساجد المسجد الحرام والمسجد الاقصى ومسجدي هذا)
الجديد بقي و نقلا عن موقع العربية.نت" أن إماما شهيرا، يطلب هذا العام 10 آلاف دولار نظير صلاة التراويح لليلة واحدة.
و المعروف ان سنويا في رمضان ترسل بعثات من الازهر يتقاضي الفرد حوالي 6 الاف دولار في شهر رمضان
يا سيدي ربنا يبارك مش بقر و الله
مش عارف في بعض الاحيان تجد الامام يقرأ كما لو انة اغنية و بيلحن و يطرب و يتمزج في الصلاة
فتترك التفكر في ايات الله و تتفكر في صوت الامام و تطريبة
لا انكر ان الصوت الحسن واجب و لكن لا يكون سبب للتشتيت و ان يكون مطابق لاحكام التجويد و الترتيل
لان صعب الواحد يقف ساعة و نص مثلا وراء رجل صوتة كعربية عايزة شكمان
بلاش سيبوكو من كل الي فات دة
تعالو نشوف حال الامة يوم 27 او 29 من رمضان و بدعة دعاء ختم القرآن
وليس عليه دليل صحيح لا من فعل الرسول صلى الله عليه وسلم ولا من فعل أصحابه رضي الله عنهم أجمعين، في داخل الصلاة سواء في القنوت أو غيره،
بل ممكن تلاقي ناس حرصها علي هذا الدعاء اكبر من حرصها علي فريضة العشاء
مثلا دعاء معروف جدا (اللهم اهدينا فيمن هديت ...) ((اللهم اقسم لنا من خشيتك..))
ظن البعض ان دي ادعية من السنة وواجب الدعاء بها و دة غير صحيح
و اذا بداء الامام الدعاء لحن و طرب و جود و رتل ,والله صديق لي ظن مرة انة يقراء القرأن لشدة تطبيقة أحكام التجويد كالإدغام والإخفاء والمدّ فيجب الا يكون الدعاء كقراة القران
من الاخطاء التي يقع فيها العامة و الاخيار علي حد سواء الاعتداء في الدعاء
و اختراع ادعية ما انزل الله بها من سلطان
إني لا أسألك رد القضاء ولكن أسألك اللطف فيه، لو الواحد شغل عقلة شوية كيف لا نسأل الله رد القضاء
و في الحديث لا يرد القضاء الا الدعاء
و هناك ايضا البكاء و الشهيق و الشخير و الزفير
ينبغي للإمام إذا تأثر بالقرآن أو بالدعاء أن يدافع البكاء ، فلم يكن من هدي النبي صلى الله عليه وسلم أن يبكي في الصلاة بصوت عالٍ ليبكي من خلفه، كما يفعله بعض الأئمة
فيستدعون ببكائهم بكاء غيرهم،
لنا في الرسول اسوة حسنة كان – صلى الله عليه وسلم - يكتم بكاءه في صدره حتى يصبح له أزيز كأزيز المرجل- أي كغلي القدر و لم يشعر احد ببكاء النبي في صلاة
و اخيرا
{ ادْعُواْ رَبَّكُمْ تَضَرُّعًا وَخُفْيَةً إِنَّهُ لاَ يُحِبُّ الْمُعْتَدِينَ} فسمَّى الله سبحانه وتعالى رفع الصوت في الدعاء إعتداء، ويقول سبحانه: { وَلا تَجْهَرْ بِصَلاَتِكَ وَلا تُخَافِتْ بِهَا وَابْتَغِ بَيْنَ ذَلِكَ سَبِيْلاً}
ورفع الصوت بالدعاء بالإضافة إلى مخالفته للسنة، فهو مُذهبٌ للخشوع مجلبٌ للرياء غير كدة بتشوش علي اللي جنبك
كلمة اخيرة للسيدات صلاتكن في البيوت خير 1000 مرة في الزمن دة
تصلي في بيتك ولا في ساحة جامع و و انتي ساجدة اللي رايح و اللي جاي يتفرج عليكي
تصلي في بيتك في ركن و تعتبرية مسجدك ولا تصلي وحواليكي 20 ست ساحبة عيالها وراها و عمالين يجرو حواليكي و الي يشد شنطتك و اللي يبرم سجادتك و مش بعيد حد منهم يرزعك علي قفاكي
اخشوع البيت ام المسجد اذا كان الخشوع موجود فافي اي مكان صلاتك مقبولة و مثابة عليها
التراويح يمكن ان تصلي في المنزل للرجال و النساء
لكنها مستحبة في جماعة الرجل و اولادة و زوجتة و خدمة جماعة و هو وزوجتة جماعة و قال الرسول المؤمن جماعة
وقد صلى النبي صلى الله عليه وسلم مع اصحابه صلاه التراويح ليلتين او ثلاثه , ثم امتنع من الخروج , فلما سئل عن ذلك اعني امتناعه عن الخروج قال: " فلم يمنعني من الخروج اليكم الا اني خشيت ان تفرض عليكم "

موقف يحدث لغالبية المصلين اللي بيلبسو نضارة تذكرتة من مدونة عبد الرحمن
الاول الحيرة اقلع النضارة و انا بصلي و لا البسها علشان لو الشبشب اتلطش اشوف الحرامي
المهم في احدي المرات في صلاة التراويح مجوعة من الاطفال لا يزيد اكبرهم عن عشر سنوات
رايحين جايين وسط المصليين كما لو انهم في بيت الاسد في جنينة الحيوانات
و حبكت معاهم يلعبو استغماية و اللي يستخبي ورا جلبية مصلي او يشد من البطلون
المهم انا كنت حاطت نضارتي علي الارض قدامي و اذا برجل غاشمة تفعص النضارة كما الخنفسة و كرش كريك
:( و عبر فوقها علي الاقل اربع اطفال
وشعرت بدموع تتسلل من عيني و من بين عبراتي المخنوقة التي لا اعلم اهي من الخشوع ام من القهر و الحزن علي النضارة
يومها ركنت العربية وركبت تاكس و اديتة عشرة جنية بدل جنية
لا تجعلو الصلاة للتباهي و الزبيبة للفخر فركعة واحدة بصدق و اخلاص لربما تكون سبب الجنة
و الناس اللي بتنام من الفجر لحد العصر و صيام ساعتين تلفزيون و من المغرب لحد تاني يوم مسلسلات
ربنا يهديها صيامهم زي صيام العيال لحد الساعة 10 الصبح يا حبيبي و المغرب هايأذن
اسأل الله ان يهدينا و يهديكم و يتقبل منا صالح العمل
مراجع:
الدرر السنية. عقيدة السنة.فضل القيام. البدع

Monday, September 25, 2006

الشيشة لا تزال في بقي

ها قد اتي رمضان و مستني ينزل المحطة الجاية و لكم من العجائب مرت عليا السنة الماضية في رمضان برضة وكنت قد نويت و النية لله الا اقترب من الشيشة طوال رمضان حتي يعينني الله و اطلقها بعد رمضان فكلما خرجت للشارع مساءا اتحاشي اماكن توجدها لكنها ابت الا ان اشم عبقها و هو يخترق خياشيمي نافذا الي تلافيف عقلي الرمادية التي تحولت الي خرطوم وزير من كثرة تعاطيها
الجديد بقي السنة دي الطاولة الحريمي فاذا انعم الله عليك بقرشين و الدنيا بحبحت معاك يمكنك ان تسهر حتي مطلع الفجر في احد المواخير المسماة بالكافية فاذا كنت من سعداء الحظ لوجدت في الترابيزة اللي جنبك فتاتين تلعبان الطاولة و ان كن لا يفقهان من قوانينها الا رمي الزهر او النرد للاخوة المتفلحسين لكن و الحق يقال لديهم من قواميس السباب ما لا اذن سمعت و لا خطر علي قلب بشر فينهال السباب علي الزهر المسكين لاعنين اباة و امة و جدة و عماتة الي ان يصلو الي الفيل المستخدم نابة في صنع الزهر و هذا هين ان قورن بصلاة التراويح في مسجد تصلي فية النساء فياويلك وسواد ليلك فلن يقبل منك صيام ولا قيام بسبب لعنك لخاش اللي جابوهم فتجد صراخ اطفال و صراخ امهاتهم لاسكاتهم يجعلك تعتقد انة يوم الحشر و قد اذهلو عما ارضعوا ووقعة ابوك طين ان فلت احد هؤلاء الشياطين الصغار من امة و انطلق الي مصلي الرجال طائحا بيمينة و شمالة في الراكعين و الساجدين و يا سلام ان كان من اللي لسة بيلبسو بمبرز و امة مديالة معلقة من طبيخ الفطار لتسبب في نجاسة الساحة حتي رمضان القادم و بمناسبة النجاسة كلة كوم و دة كوم في احد الجوامع المعروفة في منطقة مساكن شيراتون تصلي النساء في الفسحة وجدت بعض النساء تصلي و اخريات جالسات علي كراسي يسبحن قليلا و ينصتن قليلا لما يتلي و يضحكن كثيرا و بق كل واحدة مفشوخ علي وسعة فمنهن من هي عانس تبحث عن عريس لها او لابنتها او لخالتها التي فاتها القطر و داس و كلهن يفضفضن عن اوجاعهن فلما استفسارت عن سبب جلوسهن كدة بلا صلاة بين المصليات اجابوني معلش يا استاذ عندهم العادة بس جايين يسمعوا ( اللي ميعرفش اية هي العادة يروح يسأل حد كبير) سيدة قفشوها معاها كيس بة سنتدوتشات لحمة و 3 متر ممبارو قطايف عصافيرو كنافة شعرو لما سألوها اجابت ....اصلي بجوع بين الركعات فابضربلي سنتدوتش انا و العيال.

اما عن التلفزين في رمضان فحدث ولا حرج فيا ميت حلاوة علي الاخوات النسوان المذيعات و يا ميت فل علي برامج الخوازيق و المقالب اللي خلت الابن يعلق ابوة من رجلية في البكونة و ويقولة هارميك من البلكونة لو مجبتليش لامبرجيني ...و التي لا يعرف الاب معناها فيخبر ابنة بمنتهي البرائة طيب يا ابني الفلوس عندك في الكومودينو لو مكفتش بيعة شبكة امك بس و حياة النبي نزلني و بعد ان يدخلة يفاجئة بقولة اية رايك حلو المقلب دة تحب نزيع
اما عن المسلسلات فياسلام فتجد شيخ بلغ من العمر التسعين خريفا يجر فتاة واعية علي فحت البحر بيضة و زي لهطة القشطة و عمال يحب فيها و تحب فيةالتي ان ضغطت علي يدة لاصابتة بانفجار شرياني لشدة اندفاع الدم في عروق الغلبان و العيد و الصواريخ و البومب و حط البمب تحت سرير امك يالا علشان نخضها و نقطع خلف ابوك لاحسن البيت بقي زحمة اوي الي مسابقات عمل الكحك و ماراثون الافران و اللي يحرقلي صاج احرقلة عيلين و الشباب اللي ليل نهار واقف ادام يسرا و نادية يكاد ينهبل من البياض الصناعي و تلويحات الحكومة بالتجديدلازم الشباب يعتمد علي نفسة كفاية اعتماد علي الحكومةهي الحكومة هاتفك زنقة مين و لا مين جبتك يا مزنوق تعني لقيتك يا مزنوق عايز الي يزنقك كمان و كمان...
و اصبح مسلسل لكل مواطن ايشي سياسي من نوعية الطرابيش و اكتلني يا سليم
علي اجتماعي خلل علي عاطفي طرشي
و اهو كلة اكل عيش و عن اعلانات السمنة حدث ولا حرج
تخلي الواحد يعتقد ان مصر عايمة علي وش المورتة و الشعب يبلبط في السمنة
الواحد بعد كلة ساعة اعلانات بيتخن يجي كيلو
المخطط ان بعد 3 ايام اعلانات المتفرج يجيلة حالة تياسة مزمنة
رمضان فرصة للغرف من العمل الصالح و ليست علشان تقلب حلة المحشي علي بقك ما تنزلش غير و هي علي عروشها
ملحوظة:مش انا اللي في الصورة اللي فوق

Monday, September 18, 2006

عزيزي الشاعر... اتلهي علي عينك



ااذا كان احدكم من هواة الشعر سواء جاهلي ,حداثي او حلواني او حتي فيومي وللاسف قريحتة جافة كحلق صائم
ففي سبع خطوات سوف تكون شاعر يشار الية بالبنان و بالحذاء ان اراد
اما اذا كنت تعتقد نفسك شاعرا عالم بامور الشعر و بتتنطتت علي اقرانك الغلابة معدومي الشعر
فاتلهي علي عينك و اقرا الموضوع لاخرة
طريقة الاستعمال
يفضل ان يكون معاك حد كبير و انت بتكتب الشعر ثانيا يحبذ انك تكون لابس جلبية علشان تكون واخد راحتك علي الاخر
بجانبك منديل محلاوي-قزازة سبرتو-كبريت-5 بيضات-بيكنج بودر ..
اية دة..؟؟!!
معلش دي حلقة طبق اليوم
نرجع لموضوعنا صلي علي النبي
اولا
اختر فِكرة عبثية لا تهُمُ أي شَخص "حَبَذا لو كَانَت الفِكرَة من عَالم المَخْلوقات غير البَشرية"
مثال: غزل بين جحش و انثاة؛ موت نملة وهي تحمل قطعة سكر؛ خرتيت يتثاءب؛ كلب يهوهو.. إلى آخره
ثانيا
في البداية.. وجه طاقاتك لوصف المشهد الماثل أمامك بطريقة واضحة.
مثال:كانت بغلة بيضاء جميلة تسير أمامي وهي تحمل حزمة فجل لذيذة
؛ فاجأتها سيارة سوداء قبيحة وقامت بقتلها سقطت الفجلة..إني حزين..
ثالثا
احذف الأسماء الدالة على الشخصيات.مثال:كانت بيضاء جميلة تسير أمامي حاملة قطعة لذيذة وهاجمتها قبيحة وقتلتها سقطت الحزمة..إني حزين..
رابعا
احذف كل ما يُمكن أن يَجعل القارئ يفهم القصة لعبكلة الدنيا و خليها سودة في خلقتة
مثال:كانت تسير أمامي.. هاجمها القبح وخطف الحياة من بين يديها.إني حزين..
خامسا
الجملة المبنية للمجهول أمر أساسي في الشعر الحداثي.. استخدمه بكثرة.مثال:سُيِرَت نَحو المَوْت.. اغتِيلَت بيدِ الغَدْر وسُلِبَتِ الحَيَاةُ مِن بَيْن يَدَيْها.حُزنٌ يَسْكُننِي..
سادسا
قم بإضافة إيحاءات جنسية.مثال:سَارَتْ عَارِيَةً نَحو المَوْت.. نَهَشَ المَوتُ أثْدَائِها قَبْلَ أَنْ تَسْكُبَ جَمَالَ عَبيرها بَيْن
يَدَيْه..حُزْنٌ يَنْهَشُنِي..
سابعا
اقرأ ما كتبت..إذا فهمت حاجة يبقي انت فاشل فأعد الخطوات أعلاه كَرّة أُخرى..إذا لم تفهمه..فلا تبتأس يا عزيزي فقد بداء عصرك كشاعر يشار الية بالفجل و الرمان
و استعد لنيل جائزة البوليتزر في الشعر بس هات معاك حاجة تاخد فيها و يفضل كيس علشان متنقطش
اسأل الله بدلا من ان يكون في الوطن العربي 10 مليون شاعر ان نكون 312 مليون شاعر
و الله الموفق
ملحوظة
لا اضمن لك الحصول علي نتائج اكيدة لكن يفضل ان يكون قرائك من مرتادي المصحات النفسية و مصابي الفصام
وسلس البول والعشي الليلي ويفضل ان تكون علاقتة باللغة العربية محصورة في كلمتي بابا و ماماو انجغغ
في حالة فشلك الذريع بالرغم من سهولة توضيح الامرارجع للمكونات المذكورة اعلاة و قم بفقش الخمس بيضات علي ام راسك و رشة بكينج بودر و ادلق نص قزازة السبرتو علي نافوخ السيادة و اشرب النص الاخر وولع في نفسك ثم انتظر 20 دقيقة و تقدم ساخنا مع الشاي
المنديل المحلاوي علشان تحطة تحت فنجال الشاي
ملحوظة تانية
اذا البلية لعبت معاك ووجد شخص اكثر تخلفا منك وعملك الكلام الفاضي دة اغنية و فيديو كليب و دة وارد في الزمن الاغبر دة
يجب ان تصر اصرارا شديدا انك تطلع في الكليب لابس المنديل المحلاوي وواقف علي طشت مقلوب و اللي رايح و اللي جاي في الكليب يناولك علي قفاك
منقول من منتدي الساخر بتصرف مني

Tuesday, September 12, 2006

التاج علينا حق

علي يد محضر من قبل الانسة الحاجة المبجلة اسلامي تم ارسال التاج دة واخطاري ان حتما ولابد اجاوب
والصراحة انتو الي جيبتوة لنفسكم
سين سؤال.
هل أنت عقلاني أكثر أم عاطفي؟
جيم جواب
بلا ادني شك انا بدنجاني اميل لورق العنب اتبع نداء القلب
صف شخصيتك فى خمس كلمات؟
صداع مزمن-محروق الدم غالب الوقت-بتاع جرايد-واسع الابتسامة كما المرضي النفسيين-كرامتي بتنقح علي دايما
اذا كان لكل انسان شبيه من الحيوانات, أى حيوان يشبهك؟
اعتقد العرنهخف الافريقي
ما هو لونك المفضل؟
السؤسؤي المائل للحمرة وطبعا الاسود الفاتح --------العرنهخف لونة سؤسؤي علي فكرة
هل أنت أجتماعى اكثر ام منعزل؟
منعزل؟؟؟؟ انا راضع علي مدينة نصر كلها
ماذا يشكل أصدقائك بالنسبه لك؟
والله الواحد بعد الجواز اصدقاؤة انحصرو في السوبرماركت و اللبان و الصيدلي و بيتزا و كنتاكي و كوك دور
و ابو احمد البواب اذا كان مزاجة رايق وضارب ام احمد و احمد علقة معتبرة
هل أنت مرتبط بعائلتك؟
انا مرتبط بمكان الغدا فا سواء المدام عندي طابخة او امي او حماتي طابخة فهناك توجد العائلة
هل أنت عصبى أكثر أم هادئ؟
انا اهلاوي وباكل اي حاجة اقصر مني و بتمشي علي اربع و في ظروف الاضطرار اللي بيمشو علي اتنين كمان
هل تفضل فصل الشتاء أم الصيف؟
هو في حد لسة بيشجع الصيف دة زية زي الزمالك بالظبط
متى أخر مره بكيت فيها؟ولماذا؟
من 3 ايام بعد دفع اخر فاتورة للموبايل
و من كتر ماصعبت علي خدمة العملا ادوني كاب هدية و 4 دقايق

Sunday, September 10, 2006

ده حلمنا نرقص كلنا

من 10 سنوات كنت علي قناعة ان الوحدة العربية ستتحقق قريبا و بالفعل تحققت و علي اكمل وجة فممكن سيادتك تتفضل في شارع الهرم بمصر المحروسة لتري ابناء الخليج و الاردنين و البنانيين و الفلسطنين اخر انسجام و حلاوة اجتمعو علي مائدة واحدة فوقها راقصة مصرية اشبة بانثي جحش عشرو اغداقها بالتبرعات العينية و المادية لاجل خاطر الكفاح المحزم وربما يلسع احدهم الحس الوطني و يقوم بتقبيل الرقاصة

اما اذا كان ربنا فاتحها عليك و قاعد في دبي و في بحبوحة من العيش فتكتشف ان العرب مش مكفيهم الوحدة مع نفس جنسهم بل توسعو حتي دول الاتحاد السوفيتي ففي دبي وحدها اكثر من 500 فندق تعمل فيها الاف الروسيات في مهنة الوحدة و تقريب الثقافات بين العرب و بما اننا ذكرنا شارع الهرم فلابد ان نذكر شارع الرقة الفاخر ومنطقة
نايف ومنطقة المطينة و ليس المجال الان لذكر اماكن الوحدة في جميع الدول العربية
الرئيس المفدي حامي حمي العرب و الافارقة و المنايفة مبارك وعد اسرائيل بانة يرجعلهم الجنديين اذا خرجو من لبنان و خفو ايديهم علي الفلسطنيين .تصريح ينقط محتاج واحدة معددة تلطم علي وشها ببرطوشة و انا بانادي اسرائيل ارجعي يا عبلة متسمعيش كلام الهبلة يعني ما هو وعد بعدم حبس الصحفيين في قضايا نشر و نص الصحفيين اللي اعرفهم مرمين في المعتقل و النص التاني جالة سلس بول من خضة وش الفجر
أعرب رئيس الوزراء الياباني جونيشيرو كويزومي عن تفهمه "غضب" تل أبيب لخطف "حزب الله" جنديين اسرائيليين، ودعا الاسرائيليين والفلسطينيين إلى العيش معاً لتحقيق الازدهارالراجل دة علي الارجح أمة من مصر وكالة البلح علي وجة التحديد الفلسطنين قربو يخلصو و دة يقولك عيشو مع بعض و التعايش مع الاخر و المهاجر و حاحا و تفاحة انا حاسس هاقوم الصبح الاقي الفلسطنين مش موجودين غير في السوق السودة و تعرف تشترية بطلوع الروح و تلفة في ورق جرايد و تطلع بية علي بيتكو تفرجو للولية و العيال و يقعدو يفعصو فية لحد متطلع روحة
إن السيدة العظيمة المنصفة العادلة مادلين أولبرايت علي سن ورمح فعلت نفس الشيء, وقفت أمام عدسات أجهزة الاعلام عقب القصف الاسرائيلي لمناطق السلطة الفلسطينية, قصف من الجو ومن البحر ومن البر, قصف بالصواريخ والبوارج والدبابات, مقابل قصف فلسطين بأحجار يقذفها أطفال في عمر الزهور, وقفت السيدة الفاضلة أولبرايت ودعت الاسرائيليين والفلسطينيين الى ضبط النفس. أي نفس ياولية يا عظيمة يا عادلة يا محايدة يا حلوة؟ ندر علي لما اشوفك متعلقة من لغاليغك في جهنم هادعوكي لضبط النفس
المقدر الجديد رئيس الوزراء الاسرائيلي ايهود اولمرت قال لاهل جنوب لبنان روحوا علي الشمال احنا هانضرب الجنوب يا جدعان كل لبناني سحب الولية و الانجال و جري علي الشمال و هوب راح ضارب الشمال غالب الظن ان الحمار
اللي ترجم الانذار ترجم غلط و الجدع كان قصدة هايضرب الشمال
فاصل و مش هاواصل
:هزيها براحة براحة .. تفضلي على طول مرتاحة
هزيها بشويش بشويش ..... خلي الشعب يعيش

Tuesday, September 05, 2006

الله ..الرئيس...المدام

سألني صديق ذات مرة من هم الذين تاخذ بارأهم في امورك او تستشيرهم بعد تفكير و تمحيص و تفعيص اكتشفت flag
في الامور المصيرية و القدرية فاستخارة الله هي الملاذ
ثم بعد ذلك الاشخاص المؤثرين في حياتي كالاتي
في الامور الاجتماعية اليومية باخد رأي المدام
في السياسة جمعة البواب
في الادب عبد الرحيم المكوجي
في العلوم و الكيميا ابو سميحة صاحب كشك سجاير و اقدم موزع مخدرات في مدينة نصر و صاحب الخلطة الشهيرماركة( سلم علي امك علشان مش هاتشوفها تاني)
و هناك ايضا الحج صلاح الطازة اكبر تاجر ضاني و من اعظم مصنعي الكباب و الطرب في مصر و الشرق الاوسط الذي قالها صريحة ان اقل العجول شأنا لدية يصلح لان يكون رئيس جمهوريتنا
و في اي حاجة تاني مباخدش رأي حد انا صوتي من دماغي لما دماغي تنجلي صوتي ينجلي

Sunday, September 03, 2006

السيدات الاوائل ..دول غير قناة الاوائل



إتصل أحدهم بقناة إنفينيتي الإماراتية المملوكة للشيخ هزاع بن زايد آل نهيان والتي تقدم برامج منوعات منها برامج لما يطلبه المشاهدون تقدمه مذيعات لبنانيات اجهل من جاموسة عشروعندما طلبت منه المذيعة إهداء الأغنية القادمة قال
وأريد أن أُهدي تلك الأُغنيه الى زميلاتي في الجامعه من الدول العربيه أولاً أُهديها الى زميلتي سوزان في مصر والى زميلتي سبيكه في البحرين والى فاطمه في الإمارات والى رانيا في الأُردن والى الجوهره في السعوديه والى لطيفه في الكويت والى موزه في قطر
ولم تفطن المذيعة إلى الأسماء أو إلى المقلب الذي شربته محطتها ومالكها وحكامها على الهواء مباشرة
انا مش عارف عايزين ديموقراطية اكتر من كدة اية

Tuesday, August 29, 2006

بلوج ولا ورد برس يا جدعااااان



دلوقت انا في حيرة يا اخوانا بلوج ولا وورد برس الحج محمد حبيب قالك برس يا واد يا جعان و اقب بقي علي وش جوجل والطوابير هاتبقي بالزوفة بس انا مستكنيص هناك في البلوج وموستريح للشكل العام للمدونة و الحاجات دي اصلها بتبقي قرف و اعتاب بس الصراحة محمد طلع عينو معايا علشان اوافق يعملي هنا في ايجي بلوج و حط دي يا حمادة و الصورة مش ظاهرة يا ديدي لحد ما الراجل طلع من هدومة و بقي ملص بس برضة مش عارف مايل ناحية البت بلوج بس مش عايز ارزح في جهل الانترنت عايز ابقي راكب توربيني التكنولوبيا فا اللي عندة فكرة و بيعرف يفرق بين البلوج و الوورد برس يدلني علي افضلهم اما اخوانا اللي ميعرفوش الفرق بين الايميل و سباخ الطين يقعدو جنبي لما نشوف اخرها

وراء كل عظيم امرأة ماسكة ورك فرخة



مبروك يا بروفيسور الاختراع نجح و عملنا اول ست صناعية في العالم و تستطيع هذة النسخة نطق الكاف قاف و تستطيع النظر لسيدة اجمل منها دون ان تمسك في زمارة رقبتها و في نفس الوقت تستطيع شراء 6 فساتين فقط في الشهرمع مراعاة تناسق اللون الاصفر مع البدنجاني المحمرو من الاعجاز ان هذة النسخة تستطيع ان تتحكم في غضبها لمدة 30 دقيقة متواصلة و الاهم اننا قمنا بحذف بعض الكلمات من قاموسها زي يا دلعدي و يا ابن القديمة و امك تخينة اوييرد البروفيسور في تواضع...الحمدللة كلة بفضل ربنااحنا بالاختراع دة هنقدر نحل مشاكل ملايين الرجالة في العالم..الذين اصبحوا مكسحين و مقهورين يقولها البروفيسور و يغرق في بحر الذكريات ....يعود الموضوع الي 5 اعوام مضت عندما توحشت النسوان (النسوان لغة عربية فصحي)و اصبح لهم انياب و لا احد يعلم سبب هذا التحول الرهيب في الطباع النسوانية ربما هي الحرب الكيماوية ربما من كثرة استعمال ادوات الماكياج المضروبةلا احد يعرف السبب الحقيقي و اصبح من الطبيعي ان تجد بعضهن جالسات فوق شجرة المانجة اما جنينة الحيوانات بالجيزةمعها طفلها تقوم بتفليتة التفلية هي عملية بدائية اخترعها الانسان بدلا من الاستحمام و اقتبستها منة القرودو تقوم الام بمحاولة البحث عن القمل في رأس المحروس الصغير و تجدها تصرخ في سعادة اذا عثرت علي قملة في صحة جيدة حتي تطعمها لصغيرها الذي يصرخ محتجا يا ماما انا عايز قمل بالفراخ زي شريف صاحبي انا زهقت من القمل ابو ملح... واذا كنت سعيد الحظ قد تري عدة رجال اشداء من الخانكة يسحبون واحدة من اياهم علي بوزها محاولين وضع كمامة السعار علي وجهها و بين اسنانها قفا زوجها و يحاولون تخليصة منها و الزبد الابيض يتطاير من فمها محاولة عض هذا و البصق في وجهة هذا و ضرب احدهم بالشلوت وتسمعها تصرخ كالمنهوشة...- سيبوني انا مش مجنونة انا فلة و تقوم برقص رقصة المجنونة يابا يابا عالمجنونة... وتنتهي عملية القبض علي الزوجة بوضع قفا الزوج مكان وجهة و اصابة احد التمرجية بالشلل الرعاش و الاخر بالبواسير بسبب الشلاليت التي استقبلها و يتم وضع السيدة في احد الاقفاص مع مثيلاتها من المنهوشين حاول العلماء جاهدين ايجاد حل لهذة الكارثة و هو سعار النسوان حاول البعض علاجها بالكهربا فكانو يضعون سيدة منهوشة في طشت صفيح مع ايصال سلك كهربا عريان الي فم السيدة لمدة تتراوح الي 3 ايام مع رش الماء علي الطشت ولكن فشلت هذة الطريقة و ادت الي انقطاع الكهربا عن نصف الجمهورية و لم تؤدي هذة الطريقة سوي ان اكتشفت السيدات مدي حبهم للكهربا فاذا مررت في الشارع تجد مجموعة منهم حوالين عمود نور و كل واحدة حاطة سلك كهربا في بقها.اما عن مستوي الذكاء فقد حدث انخفاض شديد فا في عام 1900 نجد الطفل في الاعدادية جالسا بجوار الام يذاكر مادة الجغرافيا - ماما ماما -عايز اية يا حبيب امك- هي جبال الالب فين ياماما.؟؟؟تنظر الام نظرة العالمة بكل الالغاز..- اسأل ابوك هو اللي مابيحطش حاجة في مكانهاو في عام 2000و بعد تقدم التكنولوجيا و حصول النسوان علي جميع حقوقهم و شهادة نحو الامية و حق الجلوس في الحديقة الدولية نجد نفس الطفل و قد اصبح كهلا جالسا بجوار امة و قد اوشكت علي الاحتضار و خروج السر الالهي..فاكرة يا ماما لما قلتلك من 100 سنة هي جبال الالب فين؟؟؟ايوة فاكرة يا حبيبي و قلتلك روح اسأل ابوك هو اللي بيضيع كل حاجة...-مظبوط ياماما بس دلوقتي الزمن اتغير و انتي واخدة 16 شهادة نحو الامية تقدريتقوليلي هي جبال الالب فين؟؟تنظر الام نظرة متواضعة. انا ظلمت ابوك يا ضنايا روح بص عليها في الكومودينو اللي في الحمام ..و بالرغم من كل دلائل التخلف المتمثلة يصرون علي انهم اكثر تحمل من الرجل فنجد في احد المحاكم رجل يشتكي ان زوجتة تحب الفراخ بجنونو يريد ان يطلقها. و يقف اما القاضي و نجد الزوجة تقف بجانبة و بعض الريش يظهر من شعرهاو تقول الزوجة...- يا سيادة القاضي جوزي مقتنع ان انا مجنونة علشان بحب الفراخ..ينظر لها القاضي قائلا ..-ياسلام طيب ما انا كمان بحب الفراخ اوي... شااكوشتنظر السيدة في فرحة متخلفة و النبي يا بية انت اكيد هاتنبسط اوي تشوف المجموعة بتاعتي انا عندي 84 جوز فراخ في الدولاب لكل هذة الاسباب اصبح وراء كل عظيم امرأة ماسكة ورك فرخة

Monday, August 28, 2006

مواطن ايزو تناحة




بعد ان اجتمعت الجمعية العمومية في حيينا السعيد قد استقرت علي منح شهادة الايزو 111
وهي تدل علي صلاحية المواطن و تؤهلة لبلوغ العالمية او مقابر الغفير
فعلي من يستوفي الشروط القادم ذكرها التقدم
و علي كل متقدم احضار اصل وصورة من شهادة قرف و نكد وان تكون جعر و ان امكن شهادة استبحس
(الاستبحس عافاكم الله مرض يصيب انثي الخنفسة في حالة طلاقها )
و علي كل متقدم سحب عدد اتنين من قرايبة يكونو قرقانين و كفرانين من العيشة
يشهدو لة بانةجعر و واطي قراري ونكدي و سماوي
ولا مانع من صورة شمسية و اخري بالملابس الداخلية
الافضلية لذوي العاهات العقلية

الشروط للحصول علي الايزو

- ان تكون ممن يستطيعو الانتظار في طابور العيش 3 ساعات ثم سك من امامك علي قفاة علشان يخلص

- ان تتميز بمهارات في الجري خلف اتوبيس نقل عام والشعبطة فية دون ان تنقلب علي بوزك و تبقي فرجة في الشارع

- ان يكون مر عليك اكثر من 10 سنوات من تعاطي الفول من دون ان تشتكي من اي مرض نفسي او تلبس بردعة و تنزل تبرطع في شارع بيتكو

- ان تكون من المداومين علي تقليب سجاير ابوك و اتهام الحجة والدتك بتدخينها بجانب شفاط الحمام
- ان تكون ممن يضع فوق سريرة صورة مرسومة باليد لطفل يقضي حاجتة في قصرية و ينظر في بلاهة للرسام
معتقدا ان هو دة قمة الابداع البشري

- ان تكون ممن يقوم بعمل 42 ميسد كول في الدقيقة حتي وان كانت الميسد لسنترال بركة السبع بحجة ان دة مش عذر علشان ميردوش في حين انهم خط مش كرت

- ان تكون ممن يقوم بترية بعض الحشرات المنزلية بشعرك علي سبيل الترفية مع اطلاق اسماء علي بعضها

- ان تكون من معتادي التعطر بريحة الخنفري لانها بركة و لا مانع من مسحة من بواقي صابون بريحة

- ان تكون صاحب معدة وشهية تتقبل اي حاجة و ان كانت قفا حمار بالباشاميل
- ان تكون صاحب ارادة حديدية للوقف امام زوجتك و اخبارها انها شبة ريتا هيوارت بالرغم انها اقرب لاسماعيل ياسين
- ان تكون مقتنعا ايما اقتناع ان جميع الرؤساء العرب يحصلون علي 99,9% في نتائج الانتخابات بالرغم من ان 60% من الشعب قام بالتصويت و عشرين في المائة انتقلو الي الرفيق الاعلي و العشرة في المائة الباقية اطفال

ان تقول نعم في حين ان في امكانك ان تقول لا ولن يتم تعليقك من رجليك و تشريد عيالك و ترميل زوجتك


فياعزيزي المواطن اذا كنت تستوفي جميع الشروط و المهارات
فانصحك ان تتقدم لشغل وظيفة رئيس مراجيح مولد النبي مع الاحتفاظ بحق اللجوء السياسي لأي نجع او كفر في حالة عدم تكيفك مع الوظيفة
والله ولي التوفيق

يوم مشينا بالسليب في صحراء الهايكستب






الموت علينا حق و الجيش علينا حق فا الي كل اسرة لا يعرف ابنها الحق فلترسلة الي حيث لا يعرف الحق

مقدمة الموضوع مهداة من الروائي الكبير سعيد الملط
و الحاصل علي جائزة نادي الباكابورت للقصة القصيرةوعضو اتحاد البلابيص بالسيدة ورئيس جمعية عنكب شد واركب لأدب الاطفال و الحائز علي نيشان هز يا وز من جمعية ام بطة للشعر العشوائي
وصدرت لة مجموعة قصصية للكبار بعنوان:...ام رحاب وعالم ما وراء السحاب.مصرع صرصار في وضح النهار.شد السيفون يا محروس احسن المية بتخر.
وبعض المؤلفات العلمية بعنوان:..... تعلم قانون الجاذبية وانت قاعد عالطبلية.نظرية النسبية مع طنط بهية.هل الارض كروية وشك في الحيط و قفاك ليا
وهذة كانت نبذة قصيرة لحياة طويلة مليئة بالعطاء لكاتب اثري حياة الكثيرين فلتدعو لة عزيز القاريء بالرفاء و البنين و ان ربنا يفك سجنة.......وهنيالك يا فاعل الخير
اقسم بالله العظيم وقائع هذة المهزلة حقيقية تحدث كل عام علي ارض مصر المخروبة...واذا وجد تشابة في الاشخاص او الوقائع فهو ليس من قبيل الصدفة ربما توجد بعض الشطحات العنترية والاضافات السحلبية لكنها من قبيل ترطيب الجو الخانق للحقيقة....
بعض الملاحظات:الهايكستب هو مكان تجمع اكثر من مليون شاب سنويا من جميع انحاة مصر المعمورة(المعمورة دي مصيف زي العجمي كدة) لتقديم انفسهم للتجنيد الاجباري
السلب:بكسر السين و اللام هو قطعة من ملابس الرجال( زي السروال بس اصغر شوية )
مرت علي وقائع القصة عدة اعوام لا اريد ان اتذكر عددها حتي لا اموت كمدا بعد ما حصلت علي بكالوريوس السياحة و الفنادق وقامت امي العزيزة بوضع الشهادة في صدر حجرة المسافرين و بجانبها صورة مرسومة باليد لطفل يقضي حاجتة في قصرية و ينظر في بلاهة للرسام(اغلب الظن انة اخويا الصغير في مرحلة مبكرة من عمرة)ولمت عليا الناس ووزعت المغات والبلح الامهات قعدت جنبي و باست وشي وخدي وقالت في سعادة شديدة مازلت مندهشا لسسبها الي الان.....مبروك يا ضنايا حجتك خلصت خلاص و اخدت البكالوريوس فاضل العروسة بقي و اشوف احفادي يا ابني...نظرت اليها وقلت في هيام المتخلفين...يا حاجة العروسة موجودة بس الواحد يشتغل وبعد كدة ربنا يفرجها..واذا بصوت من ورائي اتضح بعد ان فوقت من اغمائتي انة خالي يقول....وناوي تعمل اية في الجيش يا جعجع يا حبيبي؟؟؟التفت الية و قلت...جيش اية يا خالو.. اشم نفسي الاول..!اجابني في استهزاء نفس اية يا ابو نفس دة انت قدامك شهر بالكتير تخلص ورقك و تروح الهايكستب تسلم نفسك...وتعرف يعني اية الرجولة علي حق...نظرت الي امي في غيظ قائلا في سري...كان يوم مدوحس يوم ما اخوكي جة زارنا (مدوحس يعني لما يكون عندك دمل في صباعك و بعد كدة يبقي خراج و يدوحس)المهم ذهبت السكرة وجائت الفكرة و بدات في مساعي قاتلة لتخليص ورقي بدءا من شهادة الي الميلاد الي صحيفة الحالة الجنائية مرورا بشهادات التخرج من حضانة و اعدادي و ثانوي واذا امكن شهادة نحو الامية...(صحيفة الحالة الجنائية شهادة من الحكومة تثبت انك راجل مسايس ولسانك حلو و مش بتاع لبط)وفي رحلتي هذة قابلت اصناف من البشر الواحد كان يشوفهم في التلفزيون في مسلسل الساعة 8 مثلا و انا بجيب صحيفة الحالة الجنائية وبما اني من ساكني مدينة نصر فكان اغلب رواد القسم من ساكنيها و المناطق المحيطة من مصر الجديدة و نادي هليوبليس و الشمس و الزهور قلة من رواد النادي الاهلي
و كما جرت العادة لازم الموظف المسؤول يقوم بوضع الزفت و الشحم علشان ياخد بصمة ايديكو بعد كدة تمسح ايديك في اي حيطة دة لو لقيت حيطة نضيفة...المهم واد جنبي يوشك علي البكاء و يقول للموظف...هو يا عمو لازم احط ايدي في الكاكا دي؟؟؟ يرد الموظف في سعار متماسك ويجز علي اسنانة ايوة ياخويا لازم تحط ايدك في الكاكا علشان الحكومة عايزة كدةو باذن واحد احد لما تدخل الجيش عيشتك هتبقي كاكا في كاكا يمسك الموظف يد الشاب و يضعها في الشحم و يأخذ بصماتة علي الصحيفة... ويسقط الشاب ارضا عند رؤية منظر اصابعة....وينظر الي باقي الطابور في هيستريا قائلا....اللي بعدددددة...ويضع كل الشباب يدهم في الكاكا لوحدهم...المهم مرت الايام سريعة كالعادة عند انتظار وقوع البلاء وجاء اليوم المشهود للذهاب الي صحراء الهايكستبولحسن الحظ ان ربنا اكرمني و عندي عربية ولا كان زماني محشور مع امثالي من المجرورين من قفاهم الي الجيش في الميكروباظات ولكني كنت متفائلا فما ان وصلت و لقيت احد المجندين يقترب مني قائلا...الفسحة ورا يا استاذ حط العربية هناك.....حطيت العربية و انحشرت بين قوافل مجندين المستقبل....واتجهنا الي مصيرنا المجهول ..واكتشفنا ان موقع التقديم يبعد 3 كيلومتر في عمق الصحراو من رفق الحكومة بنا خصصت لنا اتوبيس ليقلنا واذا بي اجد نفسي امام اتوبيس يبدو انة كان يخص واحد من كفار قريش المهم اتشاهدت و نطيت وسط المطحنة مش هقدر احكي الاحداث داخل الاتوبيس حتي لا نخدش حياء البعض لكني اكاد اقسم شوفت البعض ينزل من الاتوبيس و تكاد الدموع تسقط من عينية اة بالمناسبة حتي لا يظن البعض الظنون...انا طولي حوالي ال 188 واتمتع ببواقي جسد رياضي بسبب ممارستي للرياضات العنيفة من اول رفع كوزين الاسمنت وضرب ولاد الجيران و في بعض الاحيان ضرب الجيران نفسهم فكان الكثير منهم يفكر 1000 مرة قبل الاحتكاك بي المهم لقيت كمسري اي والله كمسري و بيقول تذاكر يا اساتذة ..... تذاكر .... تذاكر فقولتلو ...دي تذاكر اية؟؟؟اجابني في قرف شديد...امال انت عايز تركب ببلاش؟؟؟هممت بدق نافوخة لكني تراجعت و اخدت التذكرة بقي اقطع تذكرة علشان ادخل الجيش..؟؟؟؟؟؟ المهم المشهد كالاتي و الله علي ما اقول شهيد...نزلت الافواج من الاتوبيس و تجد البعض معاة كيس زبالة كبير مليان سنتدوتشات جبنة و فول يقوم ببيعها.... و ينادي و يقول...فول و جبنة ......الحق يا مجند اخر وجبة يا مجند.....المهم تجاوزت بتوع الفول و بياعين السجاير الفرط و الكيلوباترا البوكس ووصلنا الي قدس الاقداس و علي الجانبين علي الحيطان تلاقي كلمات مائثورة و حكم علي سبيل المثال لا الحصر....الموت او الشهادة.......مت شهيدا و لا تعش جبانا النصر او الشهادة .....الشجاع يموت مرة واحدة و الجبان يموت 1000 مرة... الجندية شرف و رجولة يا ولاد الكلب...(دي من عندي)طبعا بعض من الذين شافوا العبارات دي في اللي وقع من طولة و في اللي عملها علي روحة اما البعض و يعتقد انهم من صعيد مصر المبارك قلعو الجلابية و البلغة وصرخوا باعلي صوتهم :...لبيك اللهم لبيك....حي عالجهاد...واشتد الحماس بالبعض و اخذ الناقة وشرخ محاولا العبور الي العراق....المهم بعد ان هداء الجميع ...ظهر لنا ظابط شاب يبدو علية الاحترام و الادب وقال لنا في مودة...صباح الخير طبعا انتو كلكو ولاد ناس و جامعيين فياريت تساعدونا علشان تخلصو بسرعة وتروحو بالسلامة...يا صول فتحي لم الورق منهم انا سمعت الكلمتين دول و قلبي انفتح و قلت ما ضاقت الا لما فرجت وقلت يا رب يسر...اقف طابور يا متعلم انت وهو احنا مش فاضينلوكو خلص يالاااااااااااااااااااااااااااااااااا منك لة...كان دة صوت الصول فتحي و اغلب الظن ان احد جدودة كان من قوم عاد او ثمود ووقفنا طابور اجدع من طابور العيش...وتم لم الورق منا وجرجرونا الي مكان يطلق علية الاستراحة علشان ما طولش عليكو انا وصلت منطقة التجنيد الساعة 7 الصبح دخلنا الاستراحة الساعة 11 و جلسنا في انتظار الكشف الطبي و النفسي ويشتمل علي1.النظر2.الوزن3.الطول4.العظم واي تشوهات جسدية5.اختبار قدرات ذهنية و نفسية
المهم يقوم احد المجندين القدامي بمناداة الاسماء حسب ترتيب سنة الميلاد و يدخلو عالكشف الطبي وتتكون المجموعة من حوالي 100 شاب في شرخ الشباب يتم ادخالهم في حجرة مساحتها 6 في 5 متر او اكثر قليلا كل اللي فات كوم واللي حصل في الاودة دي كوم....نظر العسكري المسئول عنا الينا وقال في هدؤ شديد....يلا يا استاذ انت وهو كل واحد يقلع هدومة ويحطها في الكيس اللي استلمة فيتقدم واحد من الشباب الفرافير شوية و يسئال في خجل الانثي.؟ينفع اقعد بالبنطلون لو سمحتم؟؟؟ينظر لة العسكري في برود و يرد في هدوء غريب..لا يا استاذ مينفعش لازم تقلع و تفضل بالسلب...المهم طبعا احنا لا استلمنا كياس و لا نيلة بقي منظرنا شر البلية مايضحك شباب زي الورد قالعين ملط الا ما يستر عوراتهم وشايلين الجزم في ايد و الهدوم في ايد ودخلنا حجرة اوسع ووجدنا زملاءنا في الكفاح العاري المهم عملنا الكشف الطبي و النظر و السمع و العظم طبعا الحاجات دي بتكون عبارة عن تمرجي برتبة لواء في الجيش يمر مرور الكرام علينا يعني بيكشف بالنظر كدة ....و طبعا بيتم اختيار ضخام الجثة لترشيحهم سواء صاعقة او مظلات او ضفادع بشرية و انتهي الكشف الطبي و تلاة النفسي و هو عبارة عن ورقة فيها 3 اسئلة
1.اذكر اسمك بالكامل2.اذكر تاريخ ميلادك 3.ما هي هواياتك
و بعد الاجابة الصحيحة تكون صحيح نفسيا بشهادة الدولة بالرغم ان كان في واحد جنبي كان حاطط صباعة في مناخيرة و بيلعب فيها محاولا تذكر اسم امة...
الحاجات التي لا تازال علقة بنافوخي... في كشف النظر كان في واحد جنبي نظرة ناقص 5 او والله ناقص 5 و العين التانية ناقص 4 يا دوب شايف بطنة وكان حاطط أمل ياخد اعفا وعلي حظ امة الاسود الجيش بياخد لغاية ناقص 9في كشف العظام كان معانا واحد تخين اوي لا يقل عن 140 كيلو باي حالو واضح زي الشمس ان مصاب بالتصاق الفخذين المهم الدكتور عدي علينا و بص للواد شوية و بعد كدة مشي و كمل كشف المهم الواد جري عالدكتور و يكاد يبوس ايدة و يقولة..يا دكتور انا عندي التصاق في الفخذين يا فندم...ينظر لة في اشمئذاذ و يكاد يهشة من امامة...لا انا شايف انك سليم..و الله يا فندم انا ملتصق حتي شوف سيادتك و يقترب منة علشان يفرجة الالتصاق ويبتعد الدكتور في قرف صارخا في بعض العساكر ..شيلو الواد العبيط دة من قدامي يصرخ الملتصق في شبة جنون مختلط بالضحك انا ملتصق يا عالم انا ملتصق يا ناس حتي شوفو اهوة الالتصاق انا حتي مش عارف امش يو يقوم العساكر بسحبة و يلصقوة باقرب شجرة....ينتهي الكشف و نلبس هدومنا و كل واحد فينا يتحاشي النظر في وجة زميلة.....ونخرج الي الخلاء في انتظار معرفة مصيرنا وهل سندخل الجيش ام سنعفي او سيؤجل ويسود الصمت المكان اذ يخرج العسكري المسؤل عن التبليغ بوضعك من التجنيد...في صوت جهوري
جندي مجند زكي زكي زكي ظابط احتياط جندي مجند خلف الله خلف خلاف مجندجندي مجند محمد محمد محمد محمدين سلاح المدفعية جندي مجند جعان احمد جعان سلاح الصاعقة ضفدع بشري يأخذني الذهول بضع لحظات و...لااااااااااااااااااااااا ضفدع لاااااااااااااااااااااااااااا ضفدع لاااااااااااا لااااااااااااااااااجعان جعان يا ضنايا فوق يا حبيبي خير الهم اجعلة خير دة كابوس ولا اية يا ضنايا؟؟؟؟انظر حولي مندهشا .؟...
انا فين ؟ انتي مين؟ مين دة ..؟. اية لية؟؟؟لا حولا ولا قوة الا بالله الواد عقلة خف بقي بيحلم بالجيش ليل نهارقوم يا ابني اغسل وشك وروح شغلك الساعة بقت 9قولتلك قبل كدة مفيش بني ادم ياكل صنية مكرونة بالبشمل فرخة قبل ما ينام

جعان افندي في السجل المدني

السلام علي من اتبع الهدي و البلغة لمن هوي

من كام يوم كدة قلت اروح السجل المدني اغير اسمي المهم و بعد طابور استمر 14 ساعة لمسافة 7 كيلومتر مربع :( وصلت الي الموظف المسئول وبعد ان نطقت بالشهادتين و المعوزتين قلتلة في ادب الملائكة.. لو سمحت يا باشا انا عايز اغير اسمي... :ang:بصلي الموظف من فوق لتحت و هو يغتصب سانتدوتش طعمية .. نعم يا افندي ما هي ناقصاك عايز تغير اسمك لية؟؟ اسمك الجحش و لا ابوك اسمة المفش..؟؟ابتلعت الاهانة واحسست بطعم الحموضة وقلتلة في هدوء مسعور... لا يا استاذ بس انا عايز اغير اسمي و اخلية انا جعان.. -نعم يا خويا جعان اية يالا غور من وشي بدل ما افتحلك نافوخك

وقرن القول بالفعل و اتجة نحوي بمفك انجليزي معتبرواطلقت ساقي للريح و فتحت علي الزراعي في اثناء هروبي من الموظف المخبول ابن المجنونة اخذت افكر بصوت عالي مين اللي قال ان اسم انا جعان ملوش معني؟؟؟؟؟ انا لما اقول انا جعان مش قصدي الاكل و الشرب ولكني قاصد الجوع المعنويالذي يعاني منة اغلب الشعوب العربية........بالبلدي كدة فين المستشفيات و المهزلة اللي اسمها التــأمين الصحي ;) اذن انا جعان علاج فين التعليم السليم القادر علي خلق جيل سوي مثقف؟؟؟ ;) اذن انا جعان ثقافةفين الهوا النضيف و الاوزون اللي انخرم؟؟ اذن انا جعان اوزونفين الشوارع الاءدمية و عبور المشاة؟؟ ;) اذن انا جعان مطبات قصدي شوارعفين استاد نضيف اتظاهر فية بمزاج؟؟ اذن انا جعان استاد

فين ام محمد علشان تغسل الغيارين فين .... وفين.... فين حاجات كتير اوي.............. بييييييييب بيب بيب بييييييييييييييييييب بيب بييييييييييييبسيارة مسرعة وصاحبها صارخا.وسع يا حمار من وسط الشارع.....امشي علي جنب با خروف جتكو نيلة مليتو البلد

مسح جوخ


اشكر كل من ساهم باخراج هذا العمل الي النور و خاصة وزارتي الاوقاف و المواصالات
وعمدة جمهورية كاتنجا المتحدة
و سوبر ماركت الايمان لصاحبة فتحي لانشون وولدة
الذي كان خير معين لنا و لم يبخل علينا و امدنا بجميع انواع الدخان
وفرن رحاب لصاحبة ابو نسمة الذي لم يبخل علينا بجميع وسائل الاشعال
و مطعم الكونت عبد الصمد وخالتة والذي لم يبخل علينا بخالتة
التي توفاها الله قبل ان يري هذا العمل النور
(غير انها كانت عامية فمعتقدش انها كانت هاتشوف حاجة )
اذا وجد اي تشابة بين الشخصيات المذكورة و اي شخصية حقيقية
او تشابة في الاحداث فهي بالتاكيد ليست من خيال المؤلف
لأن المؤلف باع خيالة في سوق الجمعة علشان يكمل قسط الموبايل:
و علي رأي الشاعر : بلدي و ان جارت علي عزيزة و اهلي و ان ضنوا علي كرام...
مش فاكر دة شاعر و لا جزار لأن الموضوع في ضان فا اغلب الظن انة جزار :

فا الي كل من ساهم في هذا العمل حسبي الله ونعم الوكيل