Saturday, October 14, 2006

النهاردة هاتصلي سيكا و لا نهاوند

من اول رمضان و انا معتكف عن الكتابة علشان الواحد ميلبخش في حد او اتقاء لشرورو نفسي
لكن عدة مواقف تخلي العقل يشت من مكانة
اولا امامك حاجة من اتنين يا تصلي ورا امام يقعدلو بتاعة ساعة و نص ساعتين لحد ما تلعن الاخضرين و يحرمك تيجي التراويح تاني
يا اما تلاقي واحد بخلص الليلة في ربع ساعة
و الله علي ما اقول شهيد امام زاوية بيصلي العشا و التراويح و الشفع و الوتر في مالا يزيد عن 20 دقيقة
الراجل اساسا لو طال يقرا سورة الاخلاص علي ركعتين كان عملها
و الناس اية طايرة بي طير و ربنا يخليك يا عم الشيخ يا مريحنا يا مدلعنا
اقطع دراعي ان الراجل دة اللي بيصلو بياكلوة
اما اكثرالعادات انتشارا ذهاب الناس الي مساجد ليصلوا خلف شيوخ بعينهم
فتجد نشرات صغيرة تقولك الامام الفلاني في المسجد العلاني
حصريا صلاة التراويح خلف الشيخ علان الحقلك حصيرة يا مؤمن و اصبحو كما المطربين في الشهرة و الشعبية
و تجد الناس تروح بالمشوار خلف الشيوخ في المساجد و تبحث و تدقق الشيخ فلان هايصلي فين السنة دي
(عن رسول الله صلي الله علية و سلم قال:لا تشد الرحال الا الى ثلاثة مساجد المسجد الحرام والمسجد الاقصى ومسجدي هذا)
الجديد بقي و نقلا عن موقع العربية.نت" أن إماما شهيرا، يطلب هذا العام 10 آلاف دولار نظير صلاة التراويح لليلة واحدة.
و المعروف ان سنويا في رمضان ترسل بعثات من الازهر يتقاضي الفرد حوالي 6 الاف دولار في شهر رمضان
يا سيدي ربنا يبارك مش بقر و الله
مش عارف في بعض الاحيان تجد الامام يقرأ كما لو انة اغنية و بيلحن و يطرب و يتمزج في الصلاة
فتترك التفكر في ايات الله و تتفكر في صوت الامام و تطريبة
لا انكر ان الصوت الحسن واجب و لكن لا يكون سبب للتشتيت و ان يكون مطابق لاحكام التجويد و الترتيل
لان صعب الواحد يقف ساعة و نص مثلا وراء رجل صوتة كعربية عايزة شكمان
بلاش سيبوكو من كل الي فات دة
تعالو نشوف حال الامة يوم 27 او 29 من رمضان و بدعة دعاء ختم القرآن
وليس عليه دليل صحيح لا من فعل الرسول صلى الله عليه وسلم ولا من فعل أصحابه رضي الله عنهم أجمعين، في داخل الصلاة سواء في القنوت أو غيره،
بل ممكن تلاقي ناس حرصها علي هذا الدعاء اكبر من حرصها علي فريضة العشاء
مثلا دعاء معروف جدا (اللهم اهدينا فيمن هديت ...) ((اللهم اقسم لنا من خشيتك..))
ظن البعض ان دي ادعية من السنة وواجب الدعاء بها و دة غير صحيح
و اذا بداء الامام الدعاء لحن و طرب و جود و رتل ,والله صديق لي ظن مرة انة يقراء القرأن لشدة تطبيقة أحكام التجويد كالإدغام والإخفاء والمدّ فيجب الا يكون الدعاء كقراة القران
من الاخطاء التي يقع فيها العامة و الاخيار علي حد سواء الاعتداء في الدعاء
و اختراع ادعية ما انزل الله بها من سلطان
إني لا أسألك رد القضاء ولكن أسألك اللطف فيه، لو الواحد شغل عقلة شوية كيف لا نسأل الله رد القضاء
و في الحديث لا يرد القضاء الا الدعاء
و هناك ايضا البكاء و الشهيق و الشخير و الزفير
ينبغي للإمام إذا تأثر بالقرآن أو بالدعاء أن يدافع البكاء ، فلم يكن من هدي النبي صلى الله عليه وسلم أن يبكي في الصلاة بصوت عالٍ ليبكي من خلفه، كما يفعله بعض الأئمة
فيستدعون ببكائهم بكاء غيرهم،
لنا في الرسول اسوة حسنة كان – صلى الله عليه وسلم - يكتم بكاءه في صدره حتى يصبح له أزيز كأزيز المرجل- أي كغلي القدر و لم يشعر احد ببكاء النبي في صلاة
و اخيرا
{ ادْعُواْ رَبَّكُمْ تَضَرُّعًا وَخُفْيَةً إِنَّهُ لاَ يُحِبُّ الْمُعْتَدِينَ} فسمَّى الله سبحانه وتعالى رفع الصوت في الدعاء إعتداء، ويقول سبحانه: { وَلا تَجْهَرْ بِصَلاَتِكَ وَلا تُخَافِتْ بِهَا وَابْتَغِ بَيْنَ ذَلِكَ سَبِيْلاً}
ورفع الصوت بالدعاء بالإضافة إلى مخالفته للسنة، فهو مُذهبٌ للخشوع مجلبٌ للرياء غير كدة بتشوش علي اللي جنبك
كلمة اخيرة للسيدات صلاتكن في البيوت خير 1000 مرة في الزمن دة
تصلي في بيتك ولا في ساحة جامع و و انتي ساجدة اللي رايح و اللي جاي يتفرج عليكي
تصلي في بيتك في ركن و تعتبرية مسجدك ولا تصلي وحواليكي 20 ست ساحبة عيالها وراها و عمالين يجرو حواليكي و الي يشد شنطتك و اللي يبرم سجادتك و مش بعيد حد منهم يرزعك علي قفاكي
اخشوع البيت ام المسجد اذا كان الخشوع موجود فافي اي مكان صلاتك مقبولة و مثابة عليها
التراويح يمكن ان تصلي في المنزل للرجال و النساء
لكنها مستحبة في جماعة الرجل و اولادة و زوجتة و خدمة جماعة و هو وزوجتة جماعة و قال الرسول المؤمن جماعة
وقد صلى النبي صلى الله عليه وسلم مع اصحابه صلاه التراويح ليلتين او ثلاثه , ثم امتنع من الخروج , فلما سئل عن ذلك اعني امتناعه عن الخروج قال: " فلم يمنعني من الخروج اليكم الا اني خشيت ان تفرض عليكم "

موقف يحدث لغالبية المصلين اللي بيلبسو نضارة تذكرتة من مدونة عبد الرحمن
الاول الحيرة اقلع النضارة و انا بصلي و لا البسها علشان لو الشبشب اتلطش اشوف الحرامي
المهم في احدي المرات في صلاة التراويح مجوعة من الاطفال لا يزيد اكبرهم عن عشر سنوات
رايحين جايين وسط المصليين كما لو انهم في بيت الاسد في جنينة الحيوانات
و حبكت معاهم يلعبو استغماية و اللي يستخبي ورا جلبية مصلي او يشد من البطلون
المهم انا كنت حاطت نضارتي علي الارض قدامي و اذا برجل غاشمة تفعص النضارة كما الخنفسة و كرش كريك
:( و عبر فوقها علي الاقل اربع اطفال
وشعرت بدموع تتسلل من عيني و من بين عبراتي المخنوقة التي لا اعلم اهي من الخشوع ام من القهر و الحزن علي النضارة
يومها ركنت العربية وركبت تاكس و اديتة عشرة جنية بدل جنية
لا تجعلو الصلاة للتباهي و الزبيبة للفخر فركعة واحدة بصدق و اخلاص لربما تكون سبب الجنة
و الناس اللي بتنام من الفجر لحد العصر و صيام ساعتين تلفزيون و من المغرب لحد تاني يوم مسلسلات
ربنا يهديها صيامهم زي صيام العيال لحد الساعة 10 الصبح يا حبيبي و المغرب هايأذن
اسأل الله ان يهدينا و يهديكم و يتقبل منا صالح العمل
مراجع:
الدرر السنية. عقيدة السنة.فضل القيام. البدع

30 comments:

  1. سؤال واحد يا اس


    الامام الشهير اللي عاوز 10.000 دولار

    !!؟ playback ولا live هايصلي

    ReplyDelete
  2. دنتا طلعت شيخ وفاهم وواعي يا جعان
    يا نهارك اسود

    ReplyDelete
  3. بعد اذن سيادتك هانقلها على قهوة كتكوت

    ReplyDelete
  4. من أجمل ما قريت لك يا جعان :)

    ReplyDelete
  5. يا عم يا عم إنت .. ميت مره قلنالك ملكش دعوه بالحريم و ما تفرضش وصايتك عليهم و تقول إنها لازم تصلى فى بيتها علشان ما تصليش فى ساحه و اللى رايح و اللى جاى يتفرج لأنك كدا بتفرض وصايتك الجعانيه عليهم خلى بالك بقى
    من أنصار المرأه إنت كدا مستهدف

    لى ملاحظه أنا قرأت من قبل أنه لا يوجد ما يسمي بالدعاء يرد القدر فجمله لا نسألك رد القضاء صحيحه

    أما دعاء ختم القرآن فمقبول إن شاء الله
    على فكره هو فعلا ليس من المستحب تكلف الدعاء و سجعه و لكن السجع و القافيه فعلا تساعد على ترقيق القلوب المهم إن القلب القاسى يحب و يصبح ناسى قصدى ما بيحوقش فيه لا سجع و لا بطيخ

    كان معكم فضيله الشيخ بن عزوز العالم العلامه الحبرُ البحرُ الفهامه

    ReplyDelete
  6. ايه ده ياعم انت ياعم دا انت شلفط الدنيا كلها هههههه.
    والله عندك حق في كل كلامك الواحد مش عارف يلاقيها منين .
    المهم
    رمضان كريم وكل سنة وانت طيب
    وعقبال رمضان القادم

    ReplyDelete
  7. عم احمد الامام طبعا هايكون لايف بس من غير الفرقة

    ReplyDelete
  8. واحد من الناس
    انت سودت نهاري لية يا شيخ
    المفروض كدة و الموضوع عجبك امال لو كان معجبكش .؟؟؟؟

    ReplyDelete
  9. islam boy
    زيع يا ريس بس متخليش الناس تنسانا من الدعاء

    ReplyDelete
  10. علي أبوطالب
    الله يكرمك يا ابو رقية
    انت مبتجيش لية ابقي تعال

    ReplyDelete
  11. دكتور عماد اديني شمرتلك و جيت
    صلي علي اللي هايشفع فيك

    الإنسان المريض هل يقول اللهم إني لا أسألك الشفاء و لكني أسألك أن تهون المرض لا بل يقول اللهم إنا نسألك الشفاء فيجزم بطلب المحبوب إليه دون أن يقول يا رب أبق ما أكره لكن الطف بي فيه خطأ هل الله عز وجل إلا أكرم الأكرمين وأجود الأجودين وهو القادر على أن يرد عنك ما كان أراده أولا بسبب دعائك
    و قال الرسول عليه الصلاة والسلام
    لا يقل أحدكم اللهم اغفر لي إن شئت اللهم ارحمني إن شئت .
    وذلك لأن الدعاء مما يرد الله به القضاء كما جاء في الحديث لا يرد القضاء إلا الدعاء
    و عن النبي صلى الله عليه وسلم ( تعوذوا بالله من جهد البلاء ، ودرك الشقاء وسوء القضاء ) البخاري

    و هناك بابا افردة البخاري في صحيحة
    باب من تعوذ بالله من درك الشقاء ، وسوء القضاء

    خلاص و لا نقول كمان..؟؟

    ReplyDelete
  12. عزيزي labido
    انا مشلفطش هي مشلفطها لوحدها
    يالا ما علينا رمضان كريم عليك و علينا

    ReplyDelete
  13. فيه حاجة معجبتنيش في اهرام الجمعة ، اعلان ان الشيخ جبريل هيصلي في منطقة سكنية جديدة تابعة لمجموعة درة .. انا بحب الشيخ جبريل وكنت بروح المشوار مخصوص قبل ما تبقى مدينة نصر مليانه مساجد الناس بتجي لها من اخر الدنيا .. بس معجبنيش الاعلان

    حاجة تانية

    موضوع البكاء ده بيكون واضح في افتعاله من عدمه ولو واحد صوته وحش وبيعيط بيبقى زي الشكمان المفوت ، بس بما انك في مدينة نصر زي ما قريت لك فعندك ناس مبتعيطش الا قليل اوي زي الشيخ رضا والشيخ ياسر .. بس استحمل بقى يابطل

    انا كنت لسه كاتب عن العيال اللي بتطلع عين اهالينا دي امبارح

    ReplyDelete
  14. نسيت اقول حاجة مهمة

    انا اللي كاتب الكلام اعلاه سيادتك :)

    ReplyDelete
  15. عبد الرحمن الشيخ جبريل بيطلب بطيارة خاصة كل سنة مرة السعودية و مرة الكويت و قطر و البحرين عقبال باقي الشيوخ
    علي اي حال يصلي في الدرة يلبد في الدرة
    كل واحد حر
    انا بعتب علي الناس الاهتمام الشديد بمن يصلو خلفة
    و لا يتذكروا ان الانسان لو خشع
    ما استطاع الصلاة الا و هو باكي علي الدوام

    ReplyDelete
  16. لووووووووووووووووول
    بجد بجد
    كل الي قلته ده مالوش حل

    تسلم يارب

    بص هو رمضان بقى منظر جديد كدة تغيير من روتين السنة ونروح أماكن غريبة وكدة

    بس كان عندي سؤال؟؟
    هو مفيش جامع كدة ستات في ستات أصلي بيهم أحسن بيقولوا البورصة مش مضمونة الأيام دي/ يبقى نشوف حاجة تانية للكسب السريييع :>

    ربنا يغفرلنا جميعا
    رمضان كريم

    ReplyDelete
  17. نسيت حاجة معلش..
    بالنسبة للناس الي بتفتعل العياط في الصلاة
    عندنا واحد كدة ربنا بيستر عليه والناس عليه بالضرب
    صليت عنده يوم واحد مستحملتش وكنت هطلع من الصلاة
    والرجالة وراه صوت عياطهم عااااااالي/ إي والله عياط عياط كدة بصوت ونهنهة والإمام يمسك في الكلمة ويعيد ويزيد فيها منساش يومها كان بيقرا آخر المائدة في قوله تعالى "إن تعذبهم فإنهم عبادك" عادها ولا عشرين مرة وكل مرة بطريقة عياط مختلفة

    أستغفر الله هو الواحد لازم يخشع وعين بكت من خشية الله وكدة/ بس انا بنتقد الافتعاااااااااااااال/ لأنه كان واضح أوي لدرجة انه افقدني الخشوع
    وبعدين بسأل اخواتي بتروحو تصلو عنده ليه؟؟
    الجواب: بيخلص بسرعة

    ولاحول ولا قوة إلا بالله
    رمضان كريم

    ReplyDelete
  18. جعان
    انا هابقى آجي متقلقش :)
    الموضوع اللي على اللينك دي باقترح نضمها لموضوعك

    http://www.alarabiya.net/Articles/2006/10/15/28291.htm

    ReplyDelete
  19. الموضوع هايل و صحيح جدا. بس ليا عتاب على العنوان

    ReplyDelete
  20. السلام عليكم
    كل سنة وانت طيب
    يا رب يبلغنا ويبلغك وامة الاسلام ليلة القدر
    عندي كام تعليق هغلس على مدونتك الجمييييييييلة بجد وموضوعك القيم بجد واكتبهم
    بالنسبة لرأيك في النقيضين من الأئمة ففي مجمله _ من وجهة نظري _ معاك حق فيه ... بس في رأيي يجب مراعاة شيء واحنا بنحكم ... الزمن يا اسلام !! يعني ايه ؟ يعني أعاننا الله على زماننا ... عارف يا اسلام احنا في زمن القابض فيه على دينه كالقابض على جمرة من نار ... التجهييل بقا زي السوس اللي نخور كل شيء ... حتى الدين ... عارف ... فيه صحوة ... فيه بجد صحوة ... بس صحوة طالعة من أرض بين الفساد والبوار ... يعني يحسب للزمان ده لهفة الناس رجال ونساء عموما على الصلاة ... ... احنا عندنا لا فيه تربية دينية صح ولا فيه أصلا حرية دينية حقيقية، فيه ناس كتير جدا من اللي بيبكو ويجتهدوا بجد عايزين ربنا ... عارفين جواهم ان معدش فيه حل غير الحل اللي هو عايزه لينا ... الرجوع ليه .. ولما بيحاولوا بيرجعوا في رمضان _ اوقصر الامر على رمضان في حد ذاته جهل _ بيرجعوا كيفما اتفق كله على طريقته عشان مفيش طريقه صح اتعلمها أصلا ،الامر مناط به لغير أهله من باب الاجتهاد ... فاهمني ؟ زي الحجاب تمام .. انا بعتبر كلمة ظاهرة الحجاب ...كلمة انتصار حتى لو نص المحجبات _ وهم أقل من النص ان شاء الله _ حجابهم ناقص أو مش صحيح في أساسه .. لكن يبقا في النهاية ان بقا فيه زمن فيه حجاب بعد ازمنة كانت نست الفرض ده ... .....
    نقطة صلاتنا نحن _ البنات والسيدات _ في المساجد ... نعم الحديث عنه صلى الله عليه وسلم واضح وصريح ... بس بردو أنا رأيي ان اللي بيحصل ده شيء صحي ... يا اسلام قلوبنا مليانه هموم _ الصالحات في الزمن ده ( نسأل الله ان نكون منهم ) فعلا همومهم زي الشباب الصالح بقت صعبة وكتيييييييييييييرة جدا _ ... وصدقني استحضار الخشوع بقا صعب دلوقتي وسط زحمة البيوت المكانية والوجدانية ومغريات التلفزيون والدوشه بل والتفكير اللي بقا بيستحضر الهم ... انت متعرفش يعني ايه قلب عايز ومش قادر ... ده غير ان في زمن التسويق لكل شيء في الأرض بأجساد النساء فما اجمل مظهرهن وهن يملان الشوارع فارين أيضا الى الله ... لكن من المفترض ان السيدة لو عندها زوج وأولاد او التزمات من النوعية دي ، يبقا هم اولى بوجودها معاهم لكن اللي معندهاش يبقا ما المانع تنتقي مسجد فيه مصلى سيدات غير مكشوف للعامة وللمصلين ، وتصلي فيه عسى ان تخشع وعسى ان تتعرف بصحبة صالحة تعينها في زمن التحديات وعسى ان تشعر انها ليست وحدها بين قناة ميلودي وهاله سرحان !!!! ...!!
    طولت عليك
    كل سنة وانت طيب :)

    ReplyDelete
  21. المقالة دة حلوة اوى يا جعان

    ReplyDelete
  22. ( لا تشد الرحال ) لا يسافر بقصد العبادة والصلاة فيها والرحال جمع رحل وهو للبعير كالسرج للفرس وشده كناية عن السفر

    يبقى النهي عن السفر ..
    لكن لما اكون انا ساكن في المهندسين .. و رايح لمسجد في مدينة نصر مثلا علشان صوته كويس .. مايبقاش فيها حاجة ..

    و في الغالب اللي بيروحوا اماكن بعيدة بيبقى عشان الشيخ مش عشان المكان ..
    و الحديث بينهي عن السفر لاماكن غير ال 3 مساجد

    ولم ينهى عن السفر بقصد الالتحاق بعالم او مقرئ

    والله اعلم

    كل سنة وانت طيب ..

    ReplyDelete
  23. حمد الله علي السلامة وحشتنا بجد ماتغيبش تاني بقي

    ReplyDelete
  24. انا اول مرة آجي هنا بس مدونتك جميلة ماشاء الله كل سنة وانت طيب

    ReplyDelete
  25. سحابة ضللت المدونة :)
    ازيك يا فندم
    الحديث بيقول و رجل ذكر الله خاليا فدمعت عيناة
    خااااااااااااليا مش وسط 10 الاف واحد

    بالنشبة لبورصة الصلاة متقلقيش اتوكلي علي الله الوضع مستقر

    ReplyDelete
  26. مش ممكن يا ابو رقية
    الحكاية اللي في الينك مسخرة
    ربنا يهدي الناس يا رب


    اخ بلية نورت المدونة يا ريس

    ReplyDelete
  27. عزيزتي رشا
    صدقيني لو قريتي كلامي كويس هاتفهمي اني متفق تماما معكي في رأيك :)

    اسعد دائما بتواجدك في مدونتي

    ReplyDelete
  28. بجد الموضوع مهم وجامد جدا بس يا ريت تكون متاكد من مصادرك خاصة الدينية لان العبد ممكن يتكلم بالكلمة فتلقى به فى النار سبعين خريفا ارجو ان تترك الفتوى لاهل الذكر ده طبعا بعد احترامى لرايك وشدة اعجابى بالموضوع

    ReplyDelete
  29. هموت على موضوع نظارتك ده بجد متخيله منظرك وانت مقهور
    انا بصلى فى البيت يا عم مش ناقصه شلل يعنى

    ReplyDelete

بعبع وقول اللي في نفسك يا خويا