Tuesday, October 31, 2006

ومضي رمضان يا مرسي



كالعادة مضي رمضان و اخد في وشة كعابر سبيل ضل الطريق لا اذكر علي وجة الدقة احنا صومنا 30 يوم و لا 5 ايام لسرعة انقضائة و كالعادة المتأصلة في الشعوب العربية التي هي اشد رسوخا من الجبال و قد اتفقنا علي الا نتفق امنية حياتي قبل ما اموت الاقي كل المسلمين بيصومو رمضان مع بعض اموت و اعرف لما مثلا الخليج يصوم بدري يوم عن الباقي ليلة القدر لما تيجي بتنزل مرتين و لا الباقي يشوفوها في الاعادة

التلفزيون و التلفزيون في رمضان يتحول بقدرة قادر الي بقالة و دكانة مني فاتورة من بتوع التموين ويصبح اشبة ببياع معفن واقف بهدومة المزيتة و التي تشر سمنة وزيت ويقوم بتوزيع المواد التمينية علي المواطنين و احيانا فشة و كلاوي و ممبار علي اعتبار اننا شعب همة علي بطنة المهم يتسمم الاول و بعدين ربنا يفرجها بشوية مسلسلات في بواخة الحمير البلدي لما تزرجن
نفس المناظر و الممثلين و السحنة العكرة اللي تقطع خلف الارانب و نفس الاستنطاع و الاستهبال و استخفاف الدم و لا من معترض ومسلسلات منسوخة من افلام اجنبيةو اخري منقولة من احدي البرك في حي الشرابية و كل مؤلف معتد بما كتبة و لا كانة مؤلف رواية محمد ابو سويلم في بلاد العمالقة

و ممثلات لا تقل صغراهن عن 50 عاما بل ان احداهن تبلغ ال 63 ربيعا و تصر علي ان تلعب دور طالبة بفيونكات و العيال اللبط اللي في الحارة مهبولين عليها و ليل نهار عمالين يزقلوها بالطوب و عن الكاميرا الخفية حدث ولا حرج فقد اصابت نصف الشعب بالبواسير و النصف الاخر بالتبول الا ارادي و اصبحت السمة ان لازم اللي معمول فية المقلب ينضرب علقة موت و لا مانع من اخصائة ان امكن حتي يكون المقلب ناجح وتعليقة بلبوص في شارع بيتهم
و اصبح المواطنين في حالة تحفذ فاذا دخلت محطة جزارة ووجدت لحمة سوداني فانت ضحية في الكاميرا الخفية و تكتشف في نهاية الحلقة ان دي مش لحمة و ان اللي نايم في التلاجة ابن عم المنتج و اذا دخلت الي مصلحة و اشغالك انقضت بلا معوقات فانت بلا شك في الكاميرا الخفية وسوف يتم اتهامك بالتخابر مع الاعداء في نهاية الحلقة
واذا وجدت المرور في حالة سيولة قبل الفطار بربع ساعة و مفيش كلاكسات و الناس بتضحك فخذ حذرك فانت في الكاميرا الخفية فلابد في نهاية الشارع حفرة تكفي لابتلاعك انت و سيارتك و مراتك التخينة ثم انتقل التلفزيون بقدرة قادر من جهاز ترفيهي الي واحد من شحاتين السيدة فنحن في شهر مفترج و هنيالك يا فاعل الخير و الثواب لذلك يحرص التلفزيون علي عرض اعلانات عن الايتام و العجزة و المشردين و المطلقات و اصحاب سلس البولو حاملي الاعدادية و البلهارسيا وبعض فلول الهاربين من جحيم العراق و لبنان و كل المناظر اللي تقطع القلب
وبناأ علية علي كل مواطن جبلة معدوم الضمير انة يفك الكيس و يخرج من تحت البلاطة لعل الله يرضي علية ويشيل من ذنوبة اللي هاتدخلة هو و اللي خلفوة جهنم حدف

اتبرع يا مواطن لبناء كشك سجاير لام حمدية اتبرع يا مواطن لشراء تور لجاموسة حامل علشان نستر عليها حتي شركات المحمول أبت ان يفوتها طابور الشحاتين ودعت المواطنين اللي علي قلبهم الفلوس المتلتلة الي التحدث في التلفونات و ان كل مكالمة هانخصم منها و نتبرع لبناء مستشفي يعني يشحتو مننا و ياخدو حسنات علي قفانا طب ما تتبرعو انتو بفلوسكو ولا انتو فقرا ان ارباح احدي شركات المحمول في عام تكفي لاطعام 3 شعوب عربية لعدة اعوام و من ابو شقرة و كل يشحت بطريقتة و كان مفيش حاجة اسمها وزارة الشؤن الاجتماعية او ان دي وظيفتها المقدسة تعذيب و تربية اصحاب المعاشات و الجري و را العيال العريانة في الشوارع
و اذا حدث مصيبة و فقد فيها ارواح من المواطنين الغلابة كحادثة القطار الاخيريتشملل وزيرة التأمينات ووزارة الصحة و النقل و يقوموا شاكرين بصرف معزة جربانة لاهل المتوفي و كيس سوداني و كاجو للمصاب كل ما فات مش مهم بردة الحكاية مازالت في بيتها و احنا و الحكومة ستر و غطا علي بعض الا ما حدث و كانت الطامة الكبري فقد شاهدت علي قناة ال
mc2 و mc4
اعلان يعتبر بجميع المقايس الدولية و الشعبية فضيحة بجلالجل و لا فضيحة المطاهر جمعية خيرية (لا اعلم هل سميت كدة لان صاحبتها واحدة اسمها خيرية) المهم جمعية خيرية عاملة اعلان بتقولك ان الاطفال اليتامي في الصعيد محدش معبرهم و العيال يا ولداة هاتموت من البرد الزمهرير و تطلب بطانية لكل طفل مع صور لاطفال عمالة ترعش من البرد و متكومة جنب حيطة عليها اثار تبول قديم الفضيحة هنا لليست للجمعية هاتعمل اية يعني ولا كانت الحكومة اديتها بطاطين بالهبل بس الجمعية اعترضت علشان البطاطين صناعة محليةو اعلان اخر لطفل مشلول و معاق ذهني جالس علي كرسي متحرك و الكاميرا مركزة علية و تم الباسة اسوأ ما تتخيلو من ملابس وربما تم لزقة علي قفاة من قبل الجمعية المعلنة حتي يظهر بالمظهر الملائم للحدث و دعوة اي حد في قلبة رحمة و شفقة يلحق الواد قبل ما يتم ارسالة في بعثة تبشيرية الي اوغاندا و يخلوة فرجة للافارقة
لكن الوكسة للشؤون الاجتماعية و الحكومة فعندما لا يجد طفل يتيم بطانية بس بطانية و عندما لا يجد معاق من يمد لة يد العون فاين هي المهزلة المسماة وزارة الصحة فأي دولة تلك واي وزيرة و اي وزير
و الا دة مبداء احنا هانجبلكو منين نشحت يعني طب اهو
و هوجة البرامج الحوارية و قد اتحفنا الاخ حسين فهمي ببعض النماذج المريضة في بعض حلقاتة احداها امرأة واضح انها من محدثي النعمة لا تستريح الا لو اشترت كل ما بداخل اي محل تذهب الية و بتقول ان جوزها بخيل كدة قدام ال 80 مليون نفر
و التانية اللي قرمت صباع جوزها و التالتة اللي جوزها اتجوز الشغالة
لا انكر ان بعض الحلقات جذبت انتباهي مثل اطفال الشوارع
و اخري عندها 60 سنة و عيالها اطول من قرد البابون و شغاله عمليات نفخ و شفط و ضرب
انا مش عارف الناس دي عايزة تقعد طول عمرها في سن ال 20 اروح اموت نفسي انا يعني
وطبعا لا يمر رمضان الا لما الاختين الحلوين دينا و فيفي عبدة يطلعو في التلفزيون المصري يتفضلو علي الشعوب الجربانة بالحكمة و الموعظة
فدينا كل سنة تطلع تقولك انا عارفة ان الرقص حرام و بدلة الرقص حرام و ينزل دمعتين
و ينزل المخرج باغنية توب علي
اما الست فيفي تقولك الرقص دة فن و حلال دة انا فاتحة يجي 100 بيت من ورا وسطي
طب الواحد ياخد براي مين فيهم
الله يرحمك يا بديعة
ثم كانت الناهية في اخر ايام العيد حالة من الزحار الجنسي
ايوة زحار ليست خطاء مطبعي
زحار جنسي في وسط البلد شباب تسوقهم هرمونات التتسترون في حالة ريالة علي اي انثي حتي و ان كانت حمارة حصاوي
و اعتداء و انتهاك حرمات للعلم ما حدث ليس شي جديد
لكن كل ما هناك ان التغطية الاعلامية من قبل المدونين و محطات فضائية اظهرتها للعلن
لو حد فيكم راح ملاهي السندباد من 10 سنين يوم العيد او الوقفة كان شاف اللي انيل من كدة
و نفس الموقف الامني من شباك المتفرجين هو هو لم يتغير
و اعتقد ان دي من باب خلي الناس تفك عن نفسها
و ختاما
منكم لله يا كفرة في هذا الشهر المفترج

27 comments:

  1. ألاحظ في كل عام استغلال الأطفال في الشحاتة تماما كما يحدث في الشوارع , لكن كنت باقول انه استغلال بشياكة , يعني مؤسسة رعاية ايتام تعمل اعلان عبارة عن مجموعة بنات صغيرين زي الملائكة يطلبون زيارتك , دلوقتي حتى الشياكة اختفت و الجمعيات الخيرية غالبا استعانت بمتسولين من الشوارع يشرحوا لهم خبرتهم في الشحاتة بالرضع و المعاقين

    التدوينة كبيرة قوي يا اسلام , لي عودة للتعقيب على بقيتها

    ReplyDelete
  2. عزيزي اس

    ابتسم ... انت في مصر

    اهم حاجه ان مدام فيفي مبتغنيش لأن صوت المرأه عوره

    الله يصبحك بالخير يابوالليل

    كان عنده حق

    تحياتي يا زعيم

    ReplyDelete
  3. تدوينة قوية اوي فعلا

    على فكرة انت كل كلمة كتبتها فعلا حقيقة

    واللي لفت انتباهي فعلا
    الشحاتة بأسلوب يقطع القلب على الاطفال اليتامى او اليتامى المعاقين ذهنيا

    وفعلا انت عندك حق على شركات التليفون لما لفت نظري ان المفروض ان الشركات دي تتبرع منها لنفسها واللي عايز يتبرع يروح لأي بنك ويتبرع بنفسه هو لازم يعني يتصل بالتليفون

    وموضوع الحادثة حقيقي فعلا انا لم اسمع على الحادثة دي

    حقيقي انا مستغربة لان في ناس كتيرة اوي زيي فاقدين الاحساس بالوقت ومنعزلين عن العالم ولا ايه بالظبط ؟

    لكن انت وصفك وتحليلك لموضوع الحادثة اكيد صحيح ودقيق فعلا

    انت مش وصفت لكن انت حللت كمان

    ربنا يغفر لنا ويرحم الشباب الضايع ده

    ReplyDelete
  4. يا دكتور بلو
    اذا كان الحكومة بتشحت مش عايزة الجمعيات الخيرية تشحت

    مش بعيد بكرة نلاقي سيدة مصر الاولي
    طالعة في التلفزيون و علي حجرها عيل جربان بيريل علي التايور الفرنسي الاستيراد و عمال يلعب في السلسسلة ذات الحجر الكريم في اخرها
    و عمالة تناشد اهل الخير بالتبرع لايواء هذا المسكين

    المدونة مش كبيرة ولا حاجة
    دي اقل حاجة عندي في الدولاب :)

    ReplyDelete
  5. بداية.. أنا كمان جعاااان..

    ثانيا: صباح الخير يا مرسي (واضح إنه صاحبك:))

    ثالثا: هتعمل لكم ايه تاني الحكومة؟
    تقطع نفسها يعني؟
    تطلع منهدومها؟

    هي فاضية لايه و للا لايه؟


    مش في معتقلات، و تعذيب، و إرهاب!!!
    مش في مشاكل في منطكة الشرك الأوسط القبير و مصر هي اللي بتحلها..

    شعار كل مسئول في مصر:
    "و لي عزم يشق الماء شقا.. ويكسر بيضتين على التوالي"

    سيبك من كل ده،

    بجد مدونتك تحفة وأنا حاططلها لينك حدايا يا مرسي

    ReplyDelete
  6. حق الحكومة تشحت طالما دافعي الضرائب لا يؤدوا واجبهم تجاه دولتهم

    جملة ممكن تقراها لممتاز القط تعليقاً على البوست بتاعك


    اثناء تجولي بالانترنت لاقيت واحد جعان مش عاجبه حال الدولة والعجيب ان هذا الجعان يتهكم على راس الدولة مباشرة وهو متخفي خلف شاشة حمقاء .. انه لمن كرم سيادة الرئيس انه يتغاضى عن مثل هذا الجعان وكل الجوعى في المحروسة

    كرم حبر في افتتاحية روزا اليوسف تعليقاً على البوست بتاعك برضه


    ملف كامل عن تحريم صلاة التراويح لانها تثير الشغب ... عدد خاص من روزا اليوسف

    وتحقيق جامد يجيبوا فيه بوقين حلوين من جمال البنا يقول : التراويح لم ترد اصلا في صحيح البخاري ولو وردت فما الذي يجعلنا نصدق ان صحيح البخاري اصلا صحيح؟


    حمدي رزق بقى هيكتب في عموده بالمصري اليوم تعليق على البوست بتاعك كالتالي

    لسنوات يظنها احد الجعانين انها سنوات عجاف قضت على الاخضر والاحمر برضه واليابس كتب احد الجعانين يستغيث بدولة رئيس الوزراء دون ان يلتفت اليه الدكتور نظيف ، ومما جاء بمضمون كلام الجعان كلاماً يزيدنا اصراراً ان تيار الاخوان المسلمين يسيطر كاملاً على التراويح ليروج لافكاره ويستغل دعاء القنوت لتمرير ايديولوجيته التي تتخذ من الدين ستاراً .. ارفعوا ايديكم عن المساجد وسلموها لأهل الدعوة وكفانا تراويحاً والايمان في القلب وليس في مساجد الاخوان

    شوف بقى رفعت السعيد هيقول ايه تعليق على البوست بتاعك

    قلنا قبل ذلك ان المتأسلمين لن ينجحوا في السيطرة على هذا المجتمع ، هم يحاربون التبرعات الخيرية في حين انهم يجمعون تبرعات لفلسطين .. ايهما اولى يا سادة


    كفاية كده ياعم .. لبستلك كام تهمة ع الفاضي اهو

    ReplyDelete
  7. السلام عليكم يا إسلام

    ما عنديش تعليق على أى كلام من اللى قلته لأن ربنا رحمنى من الفرجه على التلافزيون آخر مره شفت تلافزيون من كام شهر كدا و كان ريحته وحشه قوى اللهم إلا تعليق واحد على الخلاف الفقهى الدائر بين العالمتين (هداهن الله ) فيفى بنت عبده و دينا بنت الفتوح فالأولى ترى أن الرقص حلال حلال حلال .. و أن باب جلب المنافع و هو فتح 100 بيت مُقدم على باب درء المنكرات و هو تطفيش 100 زوج من زوجته و قفل 100 بيت آخرين و لها فى ذلك أسانيد مهلبيه كثير .. مثل المبدأ الفالوذجى القائل ((هز يا وز)) و هنا قد ورد أن الوز قد هز و لم ينكر عليه أحد إذن فالهز حلال و بما أن الرقص ما هو إلا هز إذن فالرقص مباح و هى هنا أى العالمة فيفى تأخذ بالتأويل للنصوص الكاباريهيه البكبورتيه

    نأتى بعد ذلك للعالمة دينا .. فهى قد أخذت بالنص دون تأويل أو إعمال للوسط فهى نظرت إلى حرمة إظهار اللحم فى نهار رمضان أو فى هلال شعبان أو فى باق شهور العام و تستد كذلك إلى المبدأ الشهير .. هتوب أتوب من كل الذنوب .. و ربنا رب قلوب .. إديها دمعة تديك طراوة و هى هنا قد أخذت بباب .. الدين أفيون الشعوب و إستدرار عطف الشعب علشان يتفرج عليها بدل العالمة فيفى بنت عبدة

    هذا و الطبال أكثر علماً

    المراجع :
    الباب الذهبى للرقص البلدى

    القول النازى فى وسط الغوازى

    إصلاح الحال بضرب الطبال

    و السلام .. ختان

    ReplyDelete
  8. هيلا هيلا هيلا

    حيلك حيلك يا عم ابو ملك .. إذا كان رب الموقع بالدف ضارب فشيمه أهل التلفاز الهلس ... بقى مش عاجبك إعلانات التبرع يا حج إنت و عاملى لينك تبرع و لو بكليك و حاططلى صورة 100 أهيف مره واحده ... إخص و ضاع زمن الفرسان

    ReplyDelete
  9. يا عم عينى باظت كبر الخط يا حاج وانا هاجى تانى واجيب نضاره مكبره من عند الحاج ابو العنين وهاجى بسرعه والله عيب بوستات متهيالى انها جميله على قد ما اقدرت اقرا تبقى بالخط ده حسن خطك يا حاج وهجيلك اكيد لانك متميز

    ReplyDelete
  10. عزيزي احمد انا مبتسم علي الاخر اهو
    وتخفيفا علي السادة المواطنين انا سمعت ان فيفي عبدة هاتطلع في برنامج المسلون يتسألون

    ReplyDelete
  11. يا عم الحج
    انتا زعلان اوي من الشحاتة
    مش فاهم انتا متضايق من الشحاتة ليه
    ايه كمية الحقد والغل والحسد اللي في قلبك دي يا شيخ
    اعوذ بالله

    انا متأكد انك من ضعاف النفوس اللي مهيمهمش غير النقد الهدام والنيل من رموز مصر الخالدة الشامخة الشاخخة

    اتلاقيك هتموت وعايز تشتغل شحات بعد الضهر .. بس البرستيج بتاعك ميسمحش ...

    يا اخي سيب اللي يشحت يشحت ..واللي عايز يسترزق يسترزق
    منكو لله ...مليتو البلد

    ReplyDelete
  12. ياااااة ندا
    فينك يا ابلة

    طبعا الحادثة حقيقية
    و سوف اقوم بنشر موضوع قريبا جدا
    عن ما احدث و عن حقيقة الامر
    ماخوذة من اناس في مناصب عسكرية و قضائية
    و علي فكرة دي مش شبابا ضايعة دي صايعة

    ReplyDelete
  13. الابلة ندا موجودة ان شاء الله
    بس النت هو السبب
    كان سئ للغاية

    ندعو الله انه يتحسن في الفترة اللي جاية
    يارب
    واتابع معاكم كل الاخبار اللي حواليا

    حقيقي باشكر كل الناس اللي بتثري فكرنا

    بدال الموقت الثقافي والادراكي للواقع من حولنا هروبا منه

    لكن هو مين ال Anonymous

    ReplyDelete
  14. الاننيموس دة انا انا جعان بس رديت من غير ما اسجل دخول
    منورانا دايما يا ابلة

    عزيزي مصـ( الخير )ـعب
    انا مش بشتكي من الحكومة نوهائي
    انا كل اللي بطلبة ان اغاني نانسي عجرم تبقي 24 ساعة

    ReplyDelete
  15. عذرا لتاخري في الرد بس زي ما الناس عارفةالبلوج سبوت كان في الدراي كلين المغسلة يعني
    المهم عزيزي عبد الرحمن
    الكلام الجامد دة خلاني اشطح بخيالي
    و تخيلت الرئيس الراحل السادات
    و هو بيعلق علي الكلام دة
    تخيلتة جالس شالح الجلابية و في بقة الغليون المحشي برسيم
    و ترتعش شفية و يجز علي اسنانة
    يا ولا يا جعان انت قليل الادب
    و متعرفش العيب يا ولا
    هي دي اخلاق القرية اللي ربتكو عليها
    ثم ينادي علي كبير الياوران
    انت يا ولا خدو الولا دة و عرفوة العيب
    و هاتو اللي جنبو كمان
    اللي هو انت يعني ؛)

    ReplyDelete
  16. طنشني كمان يا جعان
    ونفض لردودي
    مهو اصل انا ابن البطة السودة بقا
    :(

    ReplyDelete
  17. عزيزي العمدة الالي
    انت داخل وحاطط ردين
    يعني واخد اكتر من المقرر بتاعك
    و كمان مش عاجبك اعلانات الشحاتة بتاعتي
    اعملكو اية يعني اسرق

    ReplyDelete
  18. يا باشمهندس yasser shams aldien
    يعني علي الارجح العيب في الخط مش من عندي من عندك
    فوق كدة في شريط الادوات هتلاقي
    view.text size.largeer

    ادفع تمن الكشف و انت خارج

    ReplyDelete
  19. تصدق بقي ان انت ظالم الحكومة
    صحيح هي هتعملك ايه اكتر من اللي هي بتعملوا
    مش كفاية عليها تعد فلوسنا اللي بنتهبنا مننا
    يا عزييز يا عزيز كوبة تاخد المفاعيص
    بص بجد انتري رائع جدا
    ربك يكون في العون
    ويفرج سجنك يا عم فرج
    ويشفيكي يا ست فكرية
    ويارب تلاقوا بيت يا عم فتحي تلم في ولادك
    ويهدك يا امير يا ابن عم مصطفي من الحشيش اللي انت فيه

    ثواني هما مين الناس دي اللي انا بتكلم عليها
    تقريبا دي نماذج شفتها وفي منها كتيييييييييييييييييير
    بس والله اا ما اعرفهم يا بيه

    ReplyDelete
  20. مش بذمتكم أحنا شعب محتاج يترى من أول وجديد
    أو محتاجين شوية غاز(مش نضيق) عشان نولع فى نفسنا
    يمكن نحس على دمنا
    http://for-egypt.spaces.live.com/

    ReplyDelete
  21. باختصار يا عزيزي جعان
    نحن في بلد الواطي فيها عالي و العالي فيها واطي

    --
    شوفت مش حذفوا البوست بتاعي من مجتمع المدونين المصريين!!!!!!؟

    ده تسميه اية؟

    ReplyDelete
  22. تصدق فكرة حلوة الشحاتة ؟
    ربنا يعافينا ويعفو عنا يارب وربنا يغنينا بالحلال يارب

    الفكرة ان الشحات ممكن يعمل اللي بيكسبه المدرس في شهر هو يعمله في يوم

    واحسن كمان من الكادر الخاص اللي مجرد وعود بيصبرونا بيها وخلاص

    والمدرس تعبان والطلبة تعبانين

    والمدارس شكلها يرثى له بدرجة غريبة

    ولاااااا كأن مصر دي طلع منها علماء عرب مشهورين

    ولااااااااا اي حاجة خالص

    الللي عملوه اجدادنا السلف
    اتلفوه الاجيال الجديدة التلف

    حسبنا الله ونعم الوكيل

    ReplyDelete
  23. يا عم واحد خد الناس بتوعك و اتكل علي الله
    مش ممكن القلبان اللي بتعملة كل ماتنزل دة

    ReplyDelete
  24. حتي انتي يا سمرا النيل
    هي لية الناس كلها ظالماني وواقفة في صف الحكومة
    يا خونة يا عملاء الفاشيست يا كومونولسنينن يا اخوان يا ماركسين
    يا كولومبيين

    سؤال اخير
    هو امير ابن عم مصطفي بيجيب الحشيش بتاعة منين؟؟

    ReplyDelete
  25. أنا جعان !! .. مش ممكن.

    فاكرني ؟!! بالطبع لأ.

    أنا أخوك باب البحر . العضو السابق في منتديات هريدي.

    فوجئت باسم مدونتك فقلت ارحب بيك بس


    و السلام عليكم و رحمة الله و بركاته

    ReplyDelete
  26. عارف فيه حاجات كويسه وبتساعد الناس بس فيه حاجات مبتذله اوي وبضايق منها وانت عارف قلبى رقيق اوي ومش بتحمل

    ReplyDelete
  27. 情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣,情趣

    情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

    情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

    情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

    情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣用品,情趣用品,情趣用品.情趣,情趣,情趣,情趣,視訊聊天室

    麻將,台灣彩卷,六合彩開獎號碼,運動彩卷,六合彩,遊戲,線上遊戲,cs online,搓麻將,矽谷麻將,明星三缺一, 橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,電玩快打

    麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online

    ReplyDelete

بعبع وقول اللي في نفسك يا خويا