Thursday, December 14, 2006

الحَج ابو صرة

قد ان الحج و عظم الاجر و غفرت الذنوب و تاب الفاجرون و ندم الخاطئون لكن ليس كل من حج يسمي حاج فكثير من الناس يذهبون الي الحج من باب الفشخرة
الفشخرة هي الة تعذيب تعود الي القرون الوسطي كان يجلس عليها المحكوم علية بالاعدام وكانت شروطها ان تكون حادة مدببة و في مكان عال
وتمني البعض ان يسجل عدد عمراتة و حجاتة في البطاقة و الاخر يحج ليحصل علي لقب الحاج و العيال العريانة اللي في شارعهم تجري تبوس ايدة
وصناعة الشحاتة المنظمة
من مصر و غيرها من الدولة الجعانة
ناس تسافر لا لكي تحج و لكن من اجل الشحاتة
وتفنن في اختراع وسائل استدرار العطف
من اول ضياع الباسبور و الفلوس
ونايم عريان و عايز ارجع بلدي يا مؤمنين
لحد السرقة وقطع الحزام من حول خصر الحاج وسرقة الموبايل

بعض مما سوف اقولة حدث في ارض الحرم و بعضها في طريقة الي الحدوث والبعض من خيال المؤلف فاذا تشابة الواقع مع الخيال فهذا من قبيل المصادفة
فا علي السادة الركاب المتوجهين الي بلاد الحجاز ربط الحزام و الامتناع عن التدخين و اطفاء سجاير الحشيش حرصا علي سلامة طاقم الفلوكة ... اسف طاقم الطائرة
مشهد اول .ليل خارجي امام باب صالة سفر الحجيج خليط هائل من البشر عند بوابة الدخول سيدة يبدو عليها الثراء ترتدي جلباب ابيض منقوش علية صورة لميكي ماوس.. و تمسك سلسلة في اخرها كلب لولو ..تصرخ بالصوت الحياني...يعني اية مينفعش سنسن يسافر معايا انا مقدرش اسافر و اسيب سنسن موظف المطار يرد و هو يجز علي اسنانة..يا حاجة مينفعش تاخدي الكلب معاكي السعودية السيدة و هي تتشنج انا مش حاجة انا انسة و هاخد الكلب يعني هاخد الكلب ينظر الموظف خلفة مناديا اتنين من الشيالين عوض سعد ودو الولية دي الحجر الصحي هيا و البرص اللي معاها عوض قائلا ..مفيش مكان يا بية كومبلية خلاص يصمت الموظف مفكرا خلاص ارمي الكلب في الشارع و الولية دة خدوها علي الشفخانة
الشفخانة الة شبيهة بالة الفشخرة لكنها اشد ايلاما

مشهد اخر لابد و حتما يراة من يسافر الي الحج من مصر و علي طيران مصر للطيران مجموعة من ابناء القري وبينهم حاج
وزفة بلدي معتبرة بالطبل و المزمار و الناي و الصاجات خلف الحاج تزفة لحد باب صالة السفر
ولا مانع من الزغاريد و اذا كانت احدي النساء السعادة جايبة اخرها و الواجب حتم عليها فلا مانع من هزة وسط صغيرة من باب المجاملة
دة الراجل طالع يحج يا ولداة
وطبعا ينتهي الامر بفرجة الاجانب علي الاشكال دي
وتصوير فوتغرافيا و فيديو واللي يحب النبي يصلي علية الحج بتاعنا مفيش زية

يمر الموقف ويتجة باقي الركاب الي الطائرة و يجلس كل منهم في مقعدةنجد في درجة رجال الاعمال وجوة نظيفة تلمع تفوح رائحة العطور من اجسادهم بعضهم جلس يقراء في الجرائد و البعض يستمع الي الووكمان الي اذاعة نجوم اف اخص اما في الدرجة السياحية فنجد حجاج القرعة
حجاج القرعة هم بعض المواطنين الذين وضعو امالهم علي الله ليذهبو للحج ثم اكتشفو ان الحكاية في ايد الكمبيوتر
مجموعة منهم اخذت تنادي بصوت عالي محبب لبيك اللهم لبيك و انشغل البعض في القران و البعض في الذكر كل يمني نفسة بالوصول الي الحجاز يعلو صوت المهللين .. ان الحمد لك و الملك ..... في مقاعد درجة رجال الاعمال ينادي احدهم المضيفة ..بست بست يا قطة :-"تهرول الفتاة ناحية الراكب مجيبة ..ايوة يا فندم اي خدمة ؟؟ايوة يا ريت تقولي للجماعة اللي ورا يوطو صوتهم شوية لحسن مش عارف انام و شغلي موسيقي هادية...ترد المضيفة في ارتباك يا فندم دول بيسبحوا .... و بيذكروا الله الراجل في قرف شديد: يا سلام ما يروحوا يسبحوا في اي حتة البحر تحتيهم ينطو فية و يعومو و يسبحو براحتهم ...سباحة اية في البرد دة .... عجايب تحاول المضيفة في نفاد صبر ان تقنع الراكب ابو كرش مدلدل انها لا تستطيع فعل هذا.ينادي راكب اخر من اصحاب الكروش و المعالي بس بس يا قطة ..تهرول الغلبانة قائلة ..ايوة يا فندم ,,الراجل في ابتسامة بلهاء كابتسامة انثي الجحش عند وقوف ابنها علي اربع هو انتو مش هتشغلو فيلم نتفرج علية لحد ما نوصل لسة فاضل ساعتين..و ياسلام لو عندك فيلم نبيلة عبيد الجديد تزفر المضيفة في نفاد صبر و تندب حظها العسر يا باشا الطيارة دي رايحة السعودية يعني ناس رايحة تحج وتوب اشغلهم نبيلة عبيد ازاي يطقطق الرجل رائسة مفكرا
يطقطق اي يلوي رقبتة يمين و شمال لحد ما تطقطق

اة والله معاكي حق فاتتني دي..طيب شغلي حاجة للست سهير رمزي ماهي خلاص اتحجبت تدير المضيفة ضهرها للرجل وترحل مجيبا حاج اخر من اصحاب الكروش ينظر لها الرجل ملعبا حواجبة بقولك يا برنسيسة ملقيش عندكو اي عصير يرطب عالقلب؟؟تجيبة المضيفة في ابتسامة بريئة..عندنا عصاير فريش ومياة غازية و مياة مع...يقاطعها الرجل ضاحكا كاشفا عن صف اسنان نخرها حمار و ليس تسوس عصير اية و بيبس اية معندكوش حاجة جامدة كدة ويسكي فودكا ؟؟؟ تنظر لة الفتاة في بلة ...؟ قائلةلا يا فندم مفيش... و ترحل لاعنة ابوة و ابوها الذي تركها تعمل في هذة المهنة يميل الرجل علي راكب بجانبة قائلا في خبث...و لا يهمني انا عامل حسابي و جايب معايا قزازة ويسكي شيفاز ريجال انما اية تستاهل بقك بس انا شايلها لوقفة عرفات لحسن الدنيا بتبقي حر ...
عند ركاب حجيج الدرجة السياحية نجد عطوة موظف بوزارة الزراعة واضعا بين رجلية كيس لب اسمر سوبريقوم بالاكل منة بين حين و اخر ملقيا بالقشر من الشباك يميل عطوة علي جارة قائلا... عارف يا زكي يا اخويا انا ضحكت عالكومبيوتر بتاع الوزارة و خليتة طلعني في القرعة ينظر لة زكي مزبهلا و هو يقول ...
الازبهلال هو مرض يصيب الحمار الاجرب ثم ينتقل الي الانسان
يخرب عقلك ازاي؟؟؟عطوة يجيبة و هو منتفشا كذكر العنزبيل الافريقي العنزبيل الافريقي هو حيوان يوجد في افريقيا ويتميز بالعنزبة الشديدة
شوية فهلوة و حداقة و متنساش ان محسوبك واخد 3 كورسات في الدوس dos ينظر لة زكي منبهرا قائلا اذا كان كدة لما نرجع اجيب مراتي اوريها الكمبيوتر علشان الوحم في اثناء ذللك ينطلق صوت قائد الطائرة امرا الركاب بربط الاحزمة و الامتناع عن التدخين ..علي السادة الركاب ربط الاحزمة و الامتناع عن التدخين .... احم اةة و الجحش اللي بقالو ساعتين في الحمام يخرج لحسن هايجيلي تسمم تهبط الطائرة يندفع الناس منهم المشتاق لزيارة النبي و منهم المشتاق لشراء مروحة 3 ريشة و كيتشن ماشين
نهار خارجي يوم صحو مشمس يتدافع الاف الحجاج للذهاب الي جبل عرفات لتعظيم شعائر الرحمن كل يمني نفسة بمغفرة لعلها تمحو معاصية كل يريد العودة من الحج و ليس علية ذنب لكن من تقبل منة حجتة ؟؟ من يغفر لة ؟؟؟ دة مش موضوعنا نقترب اكثر من الجمع الغفيرة الكل يتشابة في الملبس و في الوجوة المرهقة لكن شتي في القلوب
اتنين من الحجاج يبدو عليهم مظاهر الثراء(محدش يسئالني ازاي) الا قولي يا اكسلانس ازاي حكومة السعودية بكل امكانياتها دي مش قادرة توفر عربيات جولف للحجاج ؟ يرد الاخر مجيبا بطريقة العالم بكل الامور يا مون بية الحكاية مش حكاية فلوس الفكرة ان الاول الارض دي تتمهد و تتزرع و تبقي خضرا يعني مثلا شايف الجبل اللي هناك اللي الناس واقفة علية ..يرد الاخر ..ايوة ايوة مالة.؟انا هاقدم مشروع للسعودية هايكسبهم دهب احنا الاول نهد الجبل دة و بعد كدة نديها نجيلة صناعي علي بحيرة صناعية و نخليها members shipيعني الحاج من دول يدفع مبلغ سنوي دائم و يجي يحج في اي وقت يلاقي الكابينة بتاعتة موجودة و الشمسية محطوطة في هذة الاثناء كان يستمع لهم رجل فقير لدرجة ان الفقر قرف منة و طفش و اخذ ينظر لهم مدلدلا لسانة شاخصا لما يقولوة ... ينظر لة احد الرجلين في قرف قائلا.بص اهي المناظر دي اللي بتبوظ اي حاجة كويسة فين الامن يجي يشيل الراجل المعفن دة و يقوم الرجل بلزق الحاج علي قفاة بالشبشب محاولا ابعادة
علي احدي المرتفعات في عرفات تجلس سيدة تشبة جبل احد في الحجم منهمكة في اشعال بوتجاز بدائي و حولها 3 اطفال في حجم حجر اسماعيل علي ما يبدو اطفالها يا تامر انت ياولا .... فين كيس سانتدوتشات الجبنة الفلمنك و حلة المحشي نصها راح فين ؟؟ ينظر تامر في خجل الي الارض ترقع امة بصوت حياني ...اكلت عجلة جبنة يا ابن الطفسة و 12 متر محشي تهرول الام خلف تامر ملوحة بفردة شبشب مطيحة بمن القاة حظة التعس في طريقها في اثناء ذلك رجل بدين ذو كرش مدلدل رافعا يدية داعيا الي الله قائلا يا رب انا سرقت و اكلت فلوس من الربا و شربت خمر و زنيت وقلعت مراتي و بنتي و سرحتهم في الشوارع يا رب سامحني ينزل شبشب ام تامر علي حين غرة علي قفا الرجل مسببا صوتا عاليا صارخة..قفشتك يا ابن المفجوعة يلتفت اليها الرجل و الدموع تكاد تنفطر من عينية ::: لية يا رب كدة انا مش وحش اوي كدة تنظر لة الولية قائلة .. معلش يا اخويا انا كنت فاكراك الواد تامر ابني اصل اسم الله عليك هو شبهك تمام من قفاة .. ترحل الست باحثا عن البغل ابنها مطيحا بكل من كان لة قفا شبة قفا المحروس ابنها.
نفس الاتنين بتوع عريات الجولف وقد اشعل كل منهما سيجار بقولك يا اكسلانس مش معقولة الزحمة دي الواحد خلاص هايتخنق المفروض الموضوع يبقي في تنظيم اكتر من كدة ...يعني مش كل الناس دي تطلع تحج مرة واحدة السنة فيها اتناشر شهر يدلعو نفسهم براحتهم شوية يطلعو في ابريل حبا في ديسمبر شوية في اغسطس علشان التان
التان هي لون البرونزي يكتسبة الجلد عند الجلوس علي شط البحر في مواجهة الشمس او اذا هب فيك وابور جاز
ينظر لة الاخر مفكرا بس انا اسمع ن المفروض الواحد بيسافر في الشهور العربية بس...؟يرد الاخر خلاص يا سيدي يطلعو في كيهك في طوبة في امشير
منظر اخر عند قبر فاطمة الزهراء ابنة الرسول صلي الله علية و سلم بالبقيع عدد من الرجال و النساء يبدو عليهم تعبيرات عجيبة ..و النبي يا فاطمة السماح بعضهم يضرب رأسة بالشبشب او يضرب من بجانبة بعضهم يمرمغ رأسة في الرمل و يرزعها في الصخر (شكلهم بيخرجو عفاريت )
نعود بجانب الجبل دخان يتصاعد وسط مجموعة من الجاج شاكلهم من شبرا يا ابني ما تجيب ولعة الفحم هايطفي صوت كركرة ماء بعض الرجال يجلسون حول شيشة يدوية الصنع برطمان و فية عود قصب فاضي او شاليموكل منهم قد شلح البشكير وجلس القرفصاء منتظرا دورة في التعميرة يقترب المغرب كل يترك ما في يدة يفوقون من غفلتهم يقفون علي الجبل يلتفون حولة يرفعون ايديهم سائلين الله المغفرة يبكون بدموع الحسرة و الندم يتأوهون من الم المعصية يبكون من عظم المغفرة يبكون لمجيب المسئلة يشهدون بوحدانية مقلب الافئدة يا رب يا رب يا رب تذهب الشمس يشدو الرحال فرحين بمغفرة الرحمن ...يميل احدهم علي الاخر قائلا ... الاقيش معاك ازازة بيبس لحسن ريقي ناشف ..ينظر لة الرجل شذرا بيبس اية متعرفش انة حرام و يبوظلك الحج خد اشرب فيروز

44 comments:

  1. تمام جداً يا إكسلانس فيري فيري جووود بس إنت ما جبتش سيره النحر و لحم الأضاحي شكلك ناوي علي جزء تاني

    ReplyDelete
  2. سلام عليكم
    كل سنه وانتم طيبين
    الحج ده أصبح قنيله موقوته مرميه على طريق سبرسقه
    في ناس بتاخده تجاره
    وناس بتاخده عنجهيه وعنتظه
    أكيد مستر جعان قال اللي فيه الشفا
    ربنا يشفي

    ReplyDelete
  3. ايه ده بقى ايهده بقى ده بقى ده بقى بقى؟
    هو يا ابو ملك والله اعلم يبدو ان اي حج غير اللي بالقرعة هيبقى محتاج اعادة وبحسبة بسيطة سنة ورا سنة القرعة هتتشال وعلى الفين وعشرة كده بالصلاتو ع النبي هيبقى الحج مقتصر على رجال الاعمال من الجنسين فقط
    وحجوا قبل ان لاتحجوا
    توب علينا يارب
    كل سنة وانت طيب ياحاج

    ReplyDelete
  4. والله يا ابنى انت جبت من الاخر .. دنت حتى كنت متساهل فى المشاهد .. وجبت حاجات واقعية جدا .. انت عارف ، انا السنة اللى فاتت رحت عمرة ( ليس من باب الفشخرة ذات السن الحاد هههههه ) رحت عمرة مع والدى وكانت اول مرة ليا ولما دخلت مسجد الرسول ( ص) لقيت ناس بتعمل حاجات غريبة واحد عاوز يتمسح فى حديد الروضة الشريفة . والتانى مصمم يبص من الفتحات والمهم انهم مش هيشوفوا حاجة بس بيفضلوا يألفوا على بعض . واحد يقول دنا شفت كذا وكذا وكذا وفى على اليمين مش عارف ايه وعلى الشمال ايه .. يا ابن النصابة لحقت تشوف كل ده من فتحة قد كف ايدك فى فترة مكملتش 3 ثوانى لحد ما الامن السعودى طلعك بالعصاية ... لكن هتقول لمين يا عم الناس دماغها اتشقلبت ...

    والسلام ختااام

    :]

    ReplyDelete
  5. gamed awi ya 3am elmaudu3 da! akid el7agat di bet7sal fe3lan bas hat3mel eah fi dema3' elnas ba2a, e7na 3ayzin netraba men elawel we ne3raf ya3ni eah islam

    ReplyDelete
  6. يا عمدة انا مكنتش اعرف انك خريج مدارس سان جوزيف
    العفو العتب علي النظر

    الخرفان ليها موقعة تانية ان شاء الله :)

    ReplyDelete
  7. elbostagy2
    و انت طيب
    سؤال عالماشي
    مين مستر جعان دة...؟؟؟

    ReplyDelete
  8. الشيماء منورة يا فندم مفتقدينك
    يا دكتورة
    يا فندم انا عندي اخبار و من مصدر موثوق
    ان الحج هايبقي ديجيتال بعد كدة
    والفتوي هاتكون جاهزة علي السنة اللي جاية
    بصحة الحج الديجيتال
    اهم حاجة النية احنا ربنا رب قلوب

    ReplyDelete
  9. islamz
    المصريين اكتر ناس عاملين فضايح في الحج و معروفين
    احنا في دول الخليج معروف عننا حاجتين و أسف اني بعترف بيها
    ان نساء المصريين كلهم زي يسرا و نبيلة وناهد شريف وكل صائعات السينما المصرية حديثا و قديما

    والرجال حرامية و نصابين و الباقي شحاتين

    ReplyDelete
  10. عزيزي Anonymous
    انت بتخش كتير عندي و مبعرفش انت مين
    اوع تطلع المدام :()

    ReplyDelete
  11. أه زحيح

    فين الخروف يا اس ؟؟

    تحياتي للسيد ابو فروه

    ReplyDelete
  12. يبدو ان الموضوع كبير .. حسب اللى وصلنى .. ان تسهيلا على المواطنين و معدومى الدخل .. الحج حيبقى لميدان الحجاز . فى مصر الجديدة .. واهو كله حجاز ..
    و قد تكون هناك اقاويل بعدم جواز استخدام الكميوتر فى القرعة .. حيث انه لسه ما حجش ...

    ReplyDelete
  13. فى نكتة بتقول :

    مرة الريس نده نظيف وقاله يا نظيف انا عاوز اغير دولارات .. نظيف قاله يا باشا السوق مفهوش انت عارف اننا فى موسم حج والدولار اتسحب .. الريس اتنرفز قوى وقاله انت يا زفت انت من السنة الجاية الحج يبقي هنا فى مصر .. نظيف وقف مبحلق وقله ازاى بس يا ريس .. قاله مليش فيه من السنة اللى جاية الحجاج ييجوا مصر يحجوا ومشي وسابه .. السنه اللى بعديها جه نظيف يقول للريس كله تمام يا باشا والحج بقي فى مصر .. قاله يا نظيف انت اتهبلت ولا ايه .. قاله يا ريس بكلمك بجد خلاص رتبنا كل حاجة والحج هيبقي فى مصر .. الريس قاله طب والطواف يا نظيف هيبقي فين .. نظيف قاله فى ميدان الحجاز .. الريس ساله قاله طب والسعى ده عاوز مسافة طويله قاله ياباشا يسعوا من اول طريق الشيراتون لحد المطار رايح جاى .. الريس قاله طب يا نبيه انت ورجم الشيطان .. قاله يا ريس مهو لازم تتعاون معانا شوية بقي ...

    حد فاهم حاجة ... هههههههههههههه

    :] ... والسلام ختااام

    ReplyDelete
  14. كام يوم عقبال ما الخروف يجي من الكويت يا احمد
    متخفش هاحوشلك اللية

    ReplyDelete
  15. يا دكتور واضح انك مش متابع التطور العلمي وصل لفين
    الحج بعد كدة هايكون علي النت
    والدفع بالفيزا
    و الطواف بالفيديو كونفرنس
    وكل حاجة علي الواي فاي

    ReplyDelete
  16. رائعه بجد ماشاء الله
    بس انا بابا وعدنى بحج حلاوه نجاحى...وطبعا مش هلحق السنه دى خالص
    ياريت حضرتك تكلملنا حد من المسئولين يستنوا على الحج للسنه الجايه لحد مااروح
    بالمناسبه علشان الحسد والنفوس الضعيفه بابا وعدنى بالحج لما انجح علشان كان عامل حسابه انى هابلط فى الكليه ومفيش فى وشى نجاح بس كسفت انا الراجل ونجحت
    بس والنبى يعنى لو هايلغوه ابقى قولى اخلى بابا يطلعنى شرم بقى

    ReplyDelete
  17. على فكرة الموقع مهنج اوي يا اسلام
    انا حاطط ييجي خمس كومنتات
    وكل ما ابعتهم الموقع يقع
    انا رادد بعد الدكتور عماد علطول والله
    ومش عارف الرد ده هوصل ولا لأ ؟

    ReplyDelete
  18. ممكن أعرف طيارة ايه اللى شباكها بيتفتح ويترمى منه قشر لب؟

    ReplyDelete
  19. rony
    عايزة رأي واضح ان الوالد نظرة بعيد
    بس للاسف مكنش بعيد اوي
    اولا مبروك النجاح
    ويؤسفني اني اقولك
    ان الحكاية هاتنتهي
    بورقة ب 20 جنية اخرك
    ويقولك روحي اتغدي برة مع صحابك

    ReplyDelete
  20. واحـــد مـــــن الـنـــاس باشا
    مفيش حاجة وصلت
    وبطل تتبلي علي الموقع
    واية يعني لما تكتب الكومنت 5 مرات ولا 100 حتي
    سعد زغلول كتب ميثاق الوفد 7 مرات وفي كل مرة بيكتب اليوزر نيم و الباسورد غلط

    اكتب اكتب حتي تحصل علي استقلالك
    والله اكبر و النصر لنا

    ReplyDelete
  21. مدام كلبوزة لكن سمباتيك
    انا علي صواب
    صدقيني
    الموضوع دة بالذات واخد الايزو من منظمة الصحة

    ReplyDelete
  22. m4m
    الطيارة المذكورة سالفا
    هي طيارة M504 هيكل بيجو موتور دوجان تقفيل مالطا

    ReplyDelete
  23. awalan, &amdan lelllah 3ala Salamet elwosol,we thaneyan Bemonasbet el7eg eldegetal, elmafrood ye3melo 3ala DVD we yewaza3oh 3ala elnas badal elmeshwar we ta3ab el2alb waho elnas te7eg fee beyotha we tenzel tetof fee beer elselem lama yetzen2o 2awy

    ReplyDelete
  24. ba2olak ya basha bemonasbet el7eg degetal bardo en sadaret elfatwa men dar SONY lel2efta2 begawazoh shar3an we 7aynazeloh elsana elly gaya ma3a Elgeel eltalel lel play-station

    we kol 7eg wento tayebeen

    ReplyDelete
  25. Little Caesar ابو كامل
    اللي رافع راسنا في الكويت
    سوني اجازت الحج علي البلاي ستيشن 3 خلاص
    بص عقبال ما ينزل مصر وسعرة يرخص
    علشان الناس تقدر تشترية
    وتحج براحتها

    بس المشكلة للي معندوش ديفيدي في البيت
    مضطر يروح يحج في سيبر كافية

    ReplyDelete
  26. momken ye7ego dailup bas 7ayeb2a batee2 showaya, yebda2o men ramadan ba2a 3ashan yel7a2o ye7'alaso ab el3eed elkebeer

    ReplyDelete
  27. انا بقالي في جدة اكتر من 15 سنة و شفت ناس كتير قوي جاية علشان اغراض مختلفة من ضمنهم الحج و العمرة و الاقامة و الشوبنج
    و من الظلم اننا نبالغ و نذكر امثلة نادرة لناس جاية تشتغل او تعمل شوبنج و نقول انهم جايين يحجوا
    كنت اتمنى تذكر في البوست بتاعك الست اللي مش قادرة تمشي و مع ذلك جاية تحج و هيا بتقول انا صحيح عيانة بس مش مهم حتى لو احج و اموت بعدها
    و الولد اللي حوش خمس الاف جنية و فضل انه يديهم لامه تحج بيهم بدل ما يكمل بيهم جهاز عروسته
    و الراجل اللي قعد سبع سنين يحوش علشان يطلع يحج
    --
    ميثال الراجل اللي طلب فودكا ده مثال غير موجود مطلقا بين الحجاج
    و كمان الست اللي جايبة الكلب
    مبالغات تسئ للحجاج
    --
    ملكش حق يا جعان يا خويا
    خليك حقاني
    و موضوعي
    و اذكر الايجابيات و السلبيات
    ---
    خالص تحياتي

    ReplyDelete
  28. مدام كلبوظة الناس اللي طالعة تحج
    مش منتظرة اني اقول قصائد مدح من اجلهم
    فهو في غني عني
    دول طالعين علشان فرض ربنا
    انا باظهر السلبيات في المجتمع
    وليس من اجل قصائد مدح عصماء
    لان الجميع عارف قد اية الناس بتعاني علشان تلم مصاريف الحج
    وطريقة كتابتي ساعات بتضخم الموضوع
    وانا قلت ان بعض ما اكتبة ليس لة وجود الان

    دي حاجة
    نيجي بقي لموضوع الناس اللي طالعة تحج واحدة بكلب و التاني بقزازة
    شوفي يا ستي
    اولا الفنانات من اول الرقاصات لحد الممثلات
    اللي بتوصي علي الكلب بتاعها في حال راحجت مرجعتش
    و اللي بيسافر من باب الفشخرة و منظر
    واللي بيكون اخر كاس شربة من 4 ايام في مشهد في فيلم
    وطلع يحج

    دي نقطة لو فضلت اتكلم علي الايجابيات مش هانتطور ابدا
    شوفتي مثلا الافارقة بيعملو اية في الحج
    و الست بتكون جالسة مضبعة زي الرجل
    يعني كاشفة شقها الايمن او الايسر
    ملط يعني :)
    والشرطة في الحرم حدث ولا حرج
    الراجل من دول طايح في السيدات كما لو انهم ملكة ايمانة
    ولما واحدة قالتلة اتقي الله انت متعرفش ربنا
    قالها لا معرفوش

    عزيزتي كلبوظة ارجو ان تتفهمي اني اكتب لاظهار السلبيات حتي نكون علي وعي
    ان الحياة مش لونها بمبي
    الايجابيات معروفة للجميع لانها محدودة

    ReplyDelete
  29. والله عندك حق فى كل اللى قلته..
    احنا عندنا ناس بتطلع الحج من نيويورك علشان يروحوا يجيبوا بضاعه..

    وان شاء الله على ايام اولادنا الحح هيكون على شرايط فيديو..يعنى اللى يشوف الشريط يبقى حاج..

    ما السعوديه كل سنه بتقلل الفيز

    تحياتى يامان
    والله بوست تمام

    ReplyDelete
  30. ما شاء الله ايه الشعبية دي كلها يا جعان دي ولا شعبية الفول والطعمية

    بجد وحشتني المدونة بتاعتك جدا ووحشني النت اوي

    ادعي لي ان النت يرجع بيتنا
    وحلو التجديد اللي انت عامله في البلوج
    مبروك ودايما نشوف كل حاجة حلوة عندك

    ReplyDelete
  31. يوووووووووه نسيت ااقولك انا نضدددددددددا يا جعان

    بس النت فاااااصل من عندي بس عقبال امالتك باكتب لك من ال center
    اللي بادرب فيه على ال ICDL

    ادعي لي اني اخد الشهادة دي يا جعان
    وعقبال ملوكة اما تشوفها واخدة ال ICDL

    فكرتني صحيح
    هو انت واخد شهادة ال ICDL
    ولا لاء يا جعان ؟

    ReplyDelete
  32. المهــــاجر المصـــــــرى
    كانت علي لساني اهية
    في اجانب و خصوصا فعلا الامريكان
    معتقدين ان الحج
    هو
    shopping in ksa

    ReplyDelete
  33. ابلة نداااا
    اية النور دة
    انتي جاي تقري علي الغلابة زوار المدونة
    قال علي رأي المثل عد زوارك يا جعان
    قلت ادي واحد قايم و التاني نايم
    اتقو الله بقي

    بالنسبة لل
    icdl
    او
    International Computer Driving Licence

    معلش دي للمبتدئين اوي في مجال ال
    IT
    وبتكون
    Basic concepts of IT

    Using the computer and managing files
    وحاجات زي دي

    فا للاسف انا لسة ربنا مكرمنيش
    وخد الشهادة الكبيرة :)
    حاليا انا مكتفي بال
    BBA
    .
    .
    .
    .
    .
    .
    .
    .
    .

    Beeb Beeb Ahly

    ReplyDelete
  34. عاوز/ة كل الناس تعرف مدونتك
    اشترك في مشروع الغريب لارشيف المدونات
    http://elgharep.blogspot.com/2006/12/blog-post_15.html
    ............
    المدونات العربية
    http://arabblogs.blogspot.com/
    ........
    بدل لما تحط لستة طويلة باسماء المدونات
    عندك في مدونتك
    حط اسم مدونة واحدة تحتوي على اسماء كل المدونات
    ........
    عاوز اسمك يضاف الى قائمة المدونات
    ارسل لنا اسم مدونتك وعنوانها و اسمك
    على
    za_shady@yahoo.com
    ...........
    لو عجبك المشروع أخبر به كل اصدقائك لكي ينجح


    امضاء
    أعضاء مشروع الغريب لارشيف المدونات

    ReplyDelete
  35. ليس الموضوع مدوني درجة اولي و سبنسة
    اولا ما يكتب بالمدونة هو العامل الاساسي لعدد القراءات
    ثانيا ربما تجد مدونة بلا مضمون و لكن الردود كثيرة
    ودة بيرجع لان صاحب المدونة اصدقاءة و معارفة ربما كانو من منتديات مثلا
    ولا تنسي ان المنتديات هي ام المدونات الشرعي
    فبيردو مجاملة لصاحب المدونة ليس الا
    اما مشاهير التدوين

    فلم يلقوا هذة الشهرة في مصر بالذات الا لانهم
    بيخرجو في مظاهرات
    وبيتم اعتقالهم
    ومن هنا تاتي شهرتهم
    او بيكونو ضد النظام الحاكم علي طول الخط
    وهو ما يؤدي للشهرة
    يمكنك متابعة راي في هؤلاء في هذا الموضوع
    في مدونتي السابقة
    http://anaga3an.blogspot.com/2006/11/blog-post_29.html

    مع احترامي الشديد لك ولفكرتك
    لكن محاولة عمل تكتلات بلوجية
    سوف تحد المشاركين فيها
    للمحافظة علي مستوي معين و فكر معين
    يبقي كدة احنا معملناش حاجة
    فالمدونة في الاساس
    هي جريدة شخصية لصاحبها
    يقول بها ما يشاء
    حتي و ان كان ريان يا فجل

    ReplyDelete
  36. عندك حق فى كل اللى أنت قلته الحج للأسف مبقاش رحلة روحانية خالصة لوجه الله لكنها بقت منظرة وكمان تبضيع و تسول أحيانا
    الغريب

    ReplyDelete
  37. لاااااااااااااااااا
    انا اعترض
    انا كان ليا كومنت هنا
    مين خدوا
    يعني اروح اغيب يومين الاقيه اتسرق
    انا اعترض
    ماليش دعوي انا عايزة الكومنت بتاعي
    دة انا هروح ادعي عليكم
    انا مش فاكرة انا قلت ايه في التعليق اللي فات
    بس قلت كلام كتير اوي
    الي فاكراه ان البوست دة عجبني اوي
    دورلي علي كومنتي بقي

    ReplyDelete
  38. elgharep
    هاتنعمل اية بقي ما هو اي حاجة ادارتها عربية بتبوظ
    شوف انت الحج دة لو اتخصصخص هايبقي عامل ازاي

    ReplyDelete
  39. smraa alnil
    قلبت الدنيا علية
    ومسرح اتنين مقاطيع بمطاوي
    يدورو علي كومنت تاية
    علي اي حال
    يكفي مرورك والله
    ولو طمعانة في حاجة خدي اي زرار يعجبك و انت خارجة

    ReplyDelete
  40. هاهاها
    عسل اوى بس يبنى خف شويه مش للدرجه دى

    ReplyDelete
  41. هحاول اروح واشوف ولو ملقتش الكلب مش عارفه هعمل فيك ايه هههههههههه

    ReplyDelete
  42. نسيت اقولك انت كتبت البوست ده بعد عيد ميلادي بتلات ايام يعنى فى السنه اللى كتبت فيها البوست

    ReplyDelete

بعبع وقول اللي في نفسك يا خويا