Friday, December 29, 2006

صمت الخرفااااان




الأضحية إحدى الشعائر الإسلامية التي أمر بها الله عز وجل القادرين من المسلمين في عيد الأضحى، والتي تعد واحدة من مظاهر البهجة والفرح للمسلمين في يوم من أحلى أيامهم ... وحتى يضمن الإسلام سلامة البشر والحفاظ على صحتهم فإن شروطا وضعتها الشريعة الإسلامية في الأضحية المختارة منعا للعبث والغش، مثل أن لا تكون الأضحية عوراء أو عوجاء أو عمياء أو بها جرب أو تولاء (أي التي تلف حول نفسها) مهبولة يعني كما يجب أن يكون سنها حوالي 6 أشهر في الضأن وسنة في الماعز وسنتين في الأبقار والجاموس و5 سنوات فأكثر في الجمال فكل المسلمين في سائر الدول يتبعون الفداء الذي امر بة الله ابراهيم و خاصة شعب مصر المحروسة تجد الرجل من الطبقة المتوسطة و هي الغالبة يحسب لهذا اليوم حسابة ويعد العدة بدأ من الجمعيات و انتهاية بالدين كل ذلك في سبيل ارضاء حرمة المصون و الفشخرة و المنظرة قدام الجيران و العائلة الكريمة فلابد من خروف بقرنين او اكثر ان وجد ذو لية مهيبة يمكن استخدامها في مرايل العيال السنة الجاية او كسجادة في البلكونة و ذو صوت مجلجل يوقظ الاموات حتي لا يشمت فيهم الاعادي ولا زم خروفنا يكون اكبر من خروف سهير اللي في الرابع و مسمسم عن خروف مديحة اللي في السابع

ففي العام الماضي قد رزقني الله ب عجل و اربعة من الخراف المعتبرة و معزة و قد وضعها جيراني الافاضل موزعين في العمارة فواحد من الخرفان استضافة البواب بين اولادة بل اكاد اجزم ان البواب رمي واحد من عيالة و ادي الخروف سريرة حالما بجزء من اللية و بعض اللحم الاحمر
في يوم سمعت زوجتة ترقع بالصوت الحياني و لا سبرانو محترفة باوبرا عايدة بعد ان قفشتة نايم علي السرير جنب الخروف و نازل بوس و احضان فية قائلا:بحبك يا روفة بموت فيك يا خرفرف عمري ما تجيب بوسة و انتهي الامر با اما الخروف يا ام احمد في البيت و كما توقعت وجدت ام احمد ساحبة عيالها و رايحة عند امها و جلس البواب محتضنا الخروف و مشغلة التلفزيون علي سبيس تون.
اذكر في احد الاعوام و كعادة جاري وضع خروفة فوق السطح منطلقا في ارض الله يبرطع كيفما شاء و اينما شاءالمهم كان يجتمع اطفال العمارة فوق السطح للعب مع المأسوف علي شبابة فيقومو بوضع مخدة فوق ظهرة كسرج و البنات تربط علي رقبتة فيونكة حمراو يتم الركوب علية بالتبادل و لا يخلو الامر من بعض اللسوعة بخرزانة خشب حبيبي معتبرة ولا بأس من السباب بدأ من الاب نهاية بالزريبة اللي جة منها و قبل موعد زبحة بساعات قام بالتخلص من حياتة المزرية بالقاء نفسة من الدور ال 12 واضعا حدا للمهانة التي ذاقها صنوفا علي يد المزغودين الصغار اما في المنور فوضع خروفان لا يحلو لهما الردح و شتيمة بعضهم الا بعد منتصف الليل فيكون الامر ما بين مأمأة وشخير و نطح ورمح يخيل للسامع كان ملكي الحساب بالداخل اما علي السطوح فالوضع كان في غاية الانسجام فهناك معزة و خروف و الشيطان شاطر فيمر الليل بين مناوشات و معاكسات من قبل الخروف و دلال من المعزة ولا عبد الحليم وشادية او قيس و ليلي او حسام و دينا ويأتي النهار وتري الخروف ممدا ولا حسين فهمي مشعلا عود برسيم اخضر ورور منفثا دخان علي شكل حلقات
اما عن العجل فقد شرف عمارتنا قبل العيد بليلة و تم ربطة كحارس امن مركزي علي مدخل العمارة و يبدو ان مزاج سيادتة مش ولابد بعد هزيمة الزمالك فكان تعيس الحظ من يمر امامة مرتديا اي لون سواء احمر او اخضر فحتما سينول من الحب جانب سواء رفسة او نطحة و علي احسن الفروض تفة علي وشة و موضوع بجانبة كمية تبن و برسيم تكفي لتسمين مزرعة مواشي كاملة و كانت من اسود ليالي العمر الاستماع الي تجعيرة طول الليل بل لقد وضعت خطة لقتل العجل و اخفائة في اي مزبلة لكنها اجهضت في مهدها بعد نظرة واحدة الي حجمة المقارب لجمعية استهلاكية صغيرة و اكتفيت بسبة في سري و عاهدت نفسي ان يوم العيد و عند التخلص من هؤلاء الاوغاد سوف اقوم بالرقص عشرة بلدي و خمسة فينو احتفالا بانقشاعهم لكن ولان العشرة متهونش الا علي ولاد الحرام فقد حزنت لفراقهم لكن مع اول سنتدوتش لحمة و مغرفة فتة بدل الترح بفرح و عقبال عندوكو و كل لية و انتو بخير حط القرون فوق المكتب يا جاااااااااااااااااااااااااااااابر

23 comments:

  1. ههههههههه اعتقد ان مشكلة الخرفان دى انها فى مصر .. يعنى حاسة ان لو اى خروف فى مكان تانى هيتعامل بإسلوب أحسن من كدة شوية .. يلا هى جت على الخرفان يعنى ماهو كله فى الكلتش ... وعجبى

    ReplyDelete
  2. الحمد لله
    السنة اللي فاتت دبحنا عجل بحاله
    والحمد لله
    طلع عبيط ومكعملش هيصة وهوا بيدبح
    اي نعم هوا كان هينط من فوق السطح على عربية الحج والدي
    بس الحمد لله رجع في كلامه
    بكرة بقا ربنا يستر
    هندبح عجل برضه
    ربنا يستر وتمر على خير
    يالا
    على بركة الله
    جهز السكينة يا جاااااابر
    بسم الله الله اكبااااااااار

    ReplyDelete
  3. هي حكاية دبح اللبائن لسه ماشيه ف البلد ؟
    اصل انا فاكراها انقرضت خلاص
    الناس في الاعم الاغلب تطورت لذبح الطيور( فراخ حمام ..عصافير) ياعم جعان
    لا وكمان مش لبائن صغيرة يعني ؟ لا ارانب ولا معيز ! عجول مرة واحدة ياباشا ؟
    لاءه انتم اين عليكم من طبقة رجال الاعمال والله اعلم ...
    معملوكم عمل يعني

    كل سنة وانت طيب يا ابو ملك ..متأكلهاش لحمة
    لحسن تتعود :)

    ReplyDelete
  4. Human
    هو لو علي التعامل مع البهايم في الدول الاوروبية مثلا
    طريقة التخزين و العلف طبعا اكثر ادمية
    لكن طريقة الدبح غير ادمية بالمرة
    و بيتم قتل الحيوان حتي يكون جاهز للاكل عن طريق عدة طرق
    الصعق بالكهربا او الخنق او الضرب علي الرأس و في بعض الدول بيضربو بالنار في دماغة

    ReplyDelete
  5. واحـــد مـــــن الـنـــاس
    ابو علي يا جامد
    كل عجل و انت طيب

    ReplyDelete
  6. الشيماء
    ست الحكيمة اخبار دماغك اية :)
    البائن و اللدائن
    وكل حاجة عندها بتمشي علي اربع بتندبح
    ابن البواب كان عيل بيزحف لسة كان هايتاخد علي الشفخانة

    وكل راس و انتي بخير
    ملك باديها فتة بس لا تكلكي

    ReplyDelete
  7. للاسف السنة دى دبحوا صدام
    عقبال بووووووووووووووووش

    ReplyDelete
  8. شوفت بقى امريكا شايفنا خرفان وبضحى بينا فى عيدنا واحنا المفروض اللى يتقال علينا صمت الخرفان

    ReplyDelete
  9. ااااااااااااههههههه امبارح ونا عند خالتوا احتجت مسكنات عشان استحمل الصوت...
    و اعدت احمد ربنا ان احنا فى دور عالى و مفيش خرفان بتطلع السطوح
    لما رجعت البيت كانت اصوات الخرفان و البقر و لا اجدع زريبة مع ان حتتنا عادتآ مبيتسمعش فيها سريخ ابن يومين... طبعآ صحيت النهاردة على سيمفونية البمب العظيمة!!
    اموت و اعرف ايه متعة اى انسان انه يمسك صاروخ و يفرقعه؟ انا صحيح كنت من مفرقعى البمب بس بطلت من زمن
    ولا احنا ناس مبنعرفش نفرح غير فى الدوشة؟
    حتى يا ربى اختى لئتها الصبح بتقولى احنا فى عيد مش عيزانا نفرح عللى صوت الأغانى... زى مايكون الفرح لازم يتقرن بصمم مؤقت!

    ReplyDelete
  10. كل سنة و انت و اسرتك و كمان جابر طيبين يا رب

    ReplyDelete
  11. ههههههههههههههه
    لا حول ولا قوة الا بالله ادي اخرة اللي يشوف خرفان ومعيز
    احنا بقي ريحنا نفسنا
    ومش بنجيب الحاجات المزعجة دي
    بس الجيران اللي فوقينا كانوا جايبين عجل
    بعيد عنك
    بس بصراحة انا خرجتول شخط فيه الشخطة اتلم من ساعتها
    اصلهم كانوا حاطينوا في بير السلم
    هههههه
    اول جزء في البوست قلت بقي الواد هيتكلم في الجد وانا مش واخدة عليك كدة بس اكتشفت الحقيقة المرة بعد كدة
    انك غيران من الخرفان والمعيز
    يا سيدي خليهم يمأمأو مش بذمتك احسن مننا واحنا حتي مش قادرين نقول هش

    يلا كل سنة وانت طيب

    ReplyDelete
  12. هةهةهةهةهةهةةهة
    مسخرة يا جعجع
    انا منساش من 3 سنين خروف الجيران عملها و نط من بلكونتهم
    و العيال الصغرة فضلو يعيطو كان ناص يعملو صوان

    ReplyDelete
  13. ههههههههههه

    كل سنة وأنت طيب يا جعان..

    أنا مفجووووووووووع

    ReplyDelete
  14. eldoctor
    منور يا دكتور خف في الضاني
    و عقبال اللي في بالنا كلنا

    ReplyDelete
  15. رفقه عمر
    اهي كلها اضاحي
    في بواقي من الفخدة ابعتلك..؟؟

    ReplyDelete
  16. spellz
    حكاية الصواريخ دي حكاية غريبة فعلا
    انا عن نفسي زمان مكنتش اقتنع ان العيد جة
    الا لما افرقع علي الاقل 7 كيلو مفرقعات
    ولا تكتمل البهجة الا بوجود اصابات بين اولاد الجيران
    الحمدلله الواحد كبر و تاب و رنا هداة

    ReplyDelete
  17. منة الله
    منورة و الله
    سلميلي علي الجميع

    ReplyDelete
  18. smraa alnil
    انتي تعرفي ان ليا في الجد
    و بالذات في الاعياد
    يا بنتي انا اشوف اللحمة البتلو من هنا
    و عينك ما تشوف الا النور
    و كل حاجة تتقلب صواني في عيني

    ReplyDelete
  19. smraa alnil
    انتي تعرفي ان ليا في الجد
    و بالذات في الاعياد
    يا بنتي انا اشوف اللحمة البتلو من هنا
    و عينك ما تشوف الا النور
    و كل حاجة تتقلب صواني في عيني

    ReplyDelete
  20. انا زعلانه ليه الخرفان بتعملوا فيها كده مش حرام انت حد وحش بجد
    على كفره انت مبتعرفش ترقص فمش تكدب ههههههههههههه

    ReplyDelete

بعبع وقول اللي في نفسك يا خويا