Sunday, December 16, 2007

عيد لحمة سعيد

خرجت و لم تعد

علي من يجدها ارسالها الي اقرب شفخانة

مكافأة مغرية من اللية


تقبل الله منكم صالح الاعمال

Monday, December 10, 2007

جماعة الاخوان الزعلانين

استغربت جدا لما شوفت دعوة من بعض شباب الاخوان المسلمين لمقاطعة جريدة المصري اليوم
مع الاحترام الشديد لهم ولجماعة الاخوان و الذي كان جدي رحمة الله من احد العناصر و الكوادر بها في فترة حكم عبد الناصر وفترة يسيرة من حكم السادات وعلي صداقة وطيدة بحسن البنا رحمة الله
ولكن عفوا رد فعل غريب فليست جماعة الاخوان تابو محرم لا يجوز الخلاف معة وليس كل من يشنع علي الاخوان سواء بالحقيقة او الكذب يجب لسعة علي قفاة وشد ودنة وانة ميعملش كدة تاني
علي حد علمي ان الامر كالتالي و عن ما نشرته الجريدة الثلاثاء 29-5-2007 م
، حول قيام شباب الإخوان من خلال مدوناتهم الخاصة بثورة تصحيح داخل الجماعة و رفض عدد منهم لمبدأ السمع والطاعة والإعتراض على كثير من الشعارات التي تستخدمها الجماعة ومنها شعار الإسلام هو الحل .
و رفض شباب الإخوان ما نشرته الجريدة مؤكدين أنه عار تمام من الصحة
واعذروني فيما سوف اقول
فمقاطعة جريدة امر طفولي والا فلننتظر اذا دعوة للمقاطعة كل ساعة لمليون حاجة في مصر
ولا بس نقاطع اللي يقرب من ما يخصنا
لمن لا يعلم نجيب ساويرس يحمل اكثر من ثلث الاسهم في جريدة المصري اليوم فابلتبعية هانقاطع ربع ما يخرج للاستهلاك في مصر
ولا اعلم لماذا المصري اليوم علي وجة الخصوص هي من قامو بدعوة علي الانترنت و في اوساطهم بمقاطعتها
فروزا اليوسف علي سبيل المثال ليل نهار تلعن سلسفيل ابو الاخوان
ولا تطلق عليهم في منشوراتها الا لقب الجماعة المحظورة
المحظورة جت المحظورة راحت
وتقوم بتجميل محاكمات الاخوان المسلمين و اظهارها انها لحماية الشعب من الاخوان الفاسدين
الذين ياكلون قوت الشعب واظهار حسن مالك صاحب توكيل استقبال التركي للاثاث كانة لينين العصر الحديث
الارض التى نهبتها الدوله من حسن مالك فى احدي القضايا في التسعينات هى الان مصنع هايدلينا بتاع اكياس الدم الملوثة ملك هانى سرور
وحاليا خيرت الشاطر والنائب الثاني للمرشد العام والذي بدأت الحرب ضدة منذ قضية سلسبيل المشهورة عام 92وغيرهم من المنشورات الصحفية زي جريدة الفجر
فاانا اوجة حديثي لشباب الاخوان المندفعين بحماسة الشباب كيف تقولو انكم تتبعو منهج السمع و الطاعة و يخرج علينا قيادات الاخوان في بعض الاحداث مثل الازهر انها حماسة شباب وغير منظم من قبل الاخوان
او لم يأتي ذكر مقاطعة المصري اليوم علي موقع الاخوان مثلا يا اعزائي ان الكثير من الكمائن تنصب للاخوان فلا تقعوا فيها
حاسس هاصحي الصبح الاقي حد بيطالب بمقاطعة مدونتي واقعد عاطل

Wednesday, December 05, 2007

سنة و شوية

منذ عدة اشهر مر عام منذ اكتشافي عالم التدوين
حقيقي لم اكن لاتخيل في يوم من الايام انا اسمع اسم مدونتي يذكر في عدة محافل و انا موجود دون ان يعلم القائل او المستمع اني صاحبها لم اتخيل ان يكتب عنها في بعض الجرائد و ان يتم الاقتباس منها
و ان يذكر اسمها في تقارير لامن الدولة او امام المحكمة للبت في اغلاقها
لم اتوقع ان توضع كوصلة في مواقع و مدونات كمفضلة لاصحابها
لم اتوقع ان تعد من المليون الاول علي الانترنت
لم اتوقع ان يتجاوز زوارها السبعون الف شخص
لم اتوقع الكم الكبير من رسائل كراهية وسب و لعن و تعليقات سمجة لشخصي الضعيف ولا ايضا رسائل التقدير و الشكر من اخرين
لا اعرفهم ولا يعرفونني الا من خلال حروفي
خليط عجيب و غريب ترك بصمة لا تقدر بثمن فانا علي يقين ان الانسان لا يتعلم بمفردة بل من تجارب الاخرين و فكرهم فكل شخص اضاف تعليق عندي قد اضاف شيئا و لو يسيرا لي لن استطيع ان اذكر اسماء بعينها حتي لا انسي احدا ولن استطيع تحمل هذا
فهناك من عرفتهم عن طريق التدوين حقيقي اناس استحقو مني كل احترام و تقدير لشخصهم و فكرهم بغض النظر عن الديانة او الجنس او الهوية
علق بعض اصدقائي سواء مدونين او غيرهم علي قلة كتاباتي
لا اعلم السبب الرئيسي فليس فقط انشغالي في العمل او سفري الدائم
ولكن بعد فترة من تركي لمصر شعرت باني لا استطيع ان اعيب فيها و انا خارجها
كما لو اني اغتابها ففي النهاية هي وطني و زي ما بنقول لحم كتافي من خيرها
و ان كرة الاخرون منسلخي الهوية ربما هي مرحلة و اعود للكتابة و ادوشكو من تاني بس اعذروني الفترة دي اخيرا اريد ان اشكر كل شخص عرفتة عن طريق التدوين فقد اضاف الي

Sunday, November 04, 2007

بقالة الحج طنطاوي


قال رسول الله صلي الله علية وسلم إذا وسد الأمر إلى غير أهله فانتظر الساعة
اعتقد ان في ايامنا دي مش وسد و بس دة اتربط بسلبة في ديل الجلابية لدي البعض لما يخرج علينا الامام الاكبر شيخ الازهر سيد طنطاوي كل فترة فتوي رأي مخالف لامة محمد كلها فلابد في الامر انة يا ولاد يعني مثلا في حادثة الصور الساخرة عن الرسول الكريم في احدي الصحف الدانماركية كان رد الحج سيد ان محمد ميت لا يستطيع الدفاع عن نفسه و أن الأمم العاقلة الرشيدة
تحترم الذين انتهت آجالهم وماتوا
يعني المليار وثلاثمائة مليون مسلم كلهم ولاد ستين برطوشة و محمد صلي الله علية و سلم عايش في قلوبهم مش عاجبينة
يا اخي دة البوذيون والهندوس يدافعون عن أديانهم، بل ان عبدة البقر و الجاموس و مؤخرة القرد كمان يفور دمهم
اذا سب احد مؤخرة القرد بتاعهم
وطبعا مننساش من حوالين سنتين لما طالب مجمع البحوث الإسلامية (أعلى جهة فقهية في مصر) بإصدار فتوى رسمية تجيز تولي المرأة منصب الرئاسة في الدول الإسلامية جايز كان بيمهد لو منفعش موضوع التوريث ان سيدة مصر الاولي هي اللي تمسك
و بالقريب ايضا لما فرنسا ارادت منع الحجاب في مدارسها تماما
شلح الحج سيد وقالك حقهم يا جرابيع يقلعوهم زي ما هم عايزين و غير كدة و علي لسان الامام الاكبر وزير الداخلية الفرنسي طمئناني قائلا ان فرنسا تضمن لرعاياها المسلمين حرية تامة في ممارسة شعائرهم الدينية
احية امال هو الحجاب دة من شعائر اية..؟؟؟ شعائر عمل المسقعة
و اخيرا و ليس اخرا بالتاكيد
أفتى بجلد الصحفيين الكاذبين ولاد الغسالة ب80 جلدة
حقيقي انا مش عارف عدد التمانين دة علي اساس فقهي شرعي يعني و لا اجتهاد ولا بيطبق عليهم حكم الزناة
اصل ممكن في حالات تانية الواحد يلاقيهم 200 جلدة
واذا الصحفي ابح و طول لسانة ممكن يبقو 300 مع اجلاسة علي خازوق سيراميك مجلي او مع اضافة سيخ محمي في صراصير ودنة
وافتي سيادتة ان الصحافة التي تلجأ لنشر الإشاعات والأخبار غير الصادقة تستحق المقاطعة ، وحرم شراءها ويجب علي المسلم الصادق في حال لمسة لاي جريدة من دول الغسل سبع مرات احداهما بالتراب اصل دول عالم انجاس ولاد قديمة ويجوز كنس السيدة عليهم
بل ربما تعامل معاملة الخمر اللي شيخنا الكبير لم يفدنا باي شيء في وجودها في دولة المفروض اسلامية ويتم تداولها زي بسكوت الشمعدان
ولم يخرج علينا بفتواة سريعة الانطلاق في حوادث العبارات و غرق البشر او الاكل المسرطن او ماء الكبانيهات اللي المصريين بيطفحوة ليل نهاراو التعذيب في زرايب الدولة او تزوير الانتخابات او الفيديو كليبات الخ الخ درجن
ولما سؤل كان ردة كالتالي هل لي أن أفتي في شأن عسكري؟ هل لي أن أسأل في شأن صحي واقتصادي فأجيب؟ الجهاد موكول لولي الأمر وللقيادات العسكرية لأنها تحدد صالح البلاد
و لا انسي ردة ايام الانتخابات الرئاسية و من يؤيد فكان ردة انة يؤيد ترشيح الرئيس مبارك لفترة رئاسة جديدة ، رغم اعترافه بأنه لم يقرأ البرامج الانتخابية للمرشحين للرئاسة يعني داخل من غير ما يشوف يعني لو برنامج السيد الرئيس ريان يا فجل فهو مجنونة يا طماطم

هذا و بالله التوفيق
الا الريال يعمل كام جنية دلوقت


Thursday, October 25, 2007

عصر البراطيش


خبر قرأتة في جريدة خلاني انقلبت علي قفايا , الخبر يا سيدي بيقول اية ان في جمهورية الصين انتشرت موضة غريبة الا وهي قهاوي او كافيهات للبكاء او والله زي ما بقلوكو كدة الصيني من دول يدخل القهوة و يقعد يعييييط ويقوم الخدم في المكان بتوفير مناديل للاخوة المتشحتفين او فلفل للجماعة اللي مش عارفين يعيطو لمساعدتهم علي ادرار الدموع للحظة تخيلت لو نفذت مثل هذة الفكرة الجهنمية في مصرنا الحبيبية لربما كانت متنفس لقطاعات كثيرة من الشعب بدون تفرقة في الطبقات, فاذا كان هناك شعب اولي بالحزن و البكاء اليومي علي حالة و ندب حظة فهم المصريين بلا منازع بداية اعتقد ستكون تسميات المحلات دي كالاتي قهوة ابو دمعة او بورصة الشحتفة او مقهي المعددة وطبعا استقبال الحزاني و الثكالي علي مدار اربع و عشرين ساعة مع توفير فوط صفرا تحسبا لاي مبربر
وطبعا لانضمام اي مواطن لاحدي القهاوي يلزمة سحب عدد اتنين من قرايبة يكونو قرفانين و كفرانين من العيشة يشهدو لة بانة جعر و واطي قراري ونكدي و سماوي ووشة يقطع الخميرة من البيت ولا مانع من صورة شمسية و اخري بالملابس الداخلية كدليل علي نكد امة الازلي ويتم استقبال المواطنين في اقسام كل حسب درجة حزنة و همة فهناك قسم للشباب العاطلين يندبو حظهم و يتشحتفو كيفما شأو لان نظيف باشا قال كما عشر سنين مش هايكون في شاب عاطل في مصر وللاسف بعضهم عامل حساب انة هايطلع شرم الشيخ في المعاد دة ويتم تقديم الشيشة و يجلس الشباب لابسين مايوهات انتظارا لرحلة شرم
وقسم اخر لضحايا المستشفيات و مزبلة القصر العيني ويقدم لهم كوكتيل الكلوجوز باللبن وقطع قطن علشان يسقو
ومرورا باقسام لضحايا الشرطة و النقل و الاسكان و الصرف الصحي و التلفزيون و التعليم
فاذا نظرت مدققا و جدت لكل وزارة عدد ضحايا لا بأس بة ربما هم يعملون بناأ علي توجيهات عليا بخفض عدد الشعب المصري فاذا لم تؤتي هذة الخطة ثمارها فلا مانع من اخصاء مواطن من كل ثلاثة مواطنين علي ان يوضع الاتنين المتبقيين في الخطة العامة لقطع دابر الشعب وربما اذا نجحت هذة الفكرة (فكرة مقاهي البكاء و ليس الاخصاء) تعمم علي مستوي الوطن العربي مع اضافة معددات و معددين ( المعددة لمن لا يعلم هي ولية شلق وظيفتها الاساسية نفخ المتوفي في قبرة بصواتها)
مع توفير براطيش او شباشب لمن يحب ان يلطم بها علي وشة او ان يقوم احد الجرسونات بلسعة ببلغة علي قفاة لادرار الدموع او البول ايهما اقرب فنحن كعرب اول من استحدث استخدامات اخري للشباشب و البراطيش
فيا شعوب العرب هنيئا لكم فنحن في عصر البراطيش

Wednesday, September 26, 2007

انا ادسترت يا جدعان

تم نشر مدونتي و التسيح و التجريس لها علي جريدة الدستور
شكرا للاستاذ شاكر فودة علي ثناءة علي المدونة و ارجو ان يكون في محلة
والله مليش واسطة و اتنشرت من غير ما اعرف

قبل ما انسي هنا وصلات لبعض تدويناتي القديمة في شهر رمضان
معلش في حالة كسل تدويني شديدة
القطايف هنا في حجم فردة كاوتش

الشيشة لا تزال في بقي

النهاردة هاتصلي سيكا و لا نهاوند

Tuesday, September 04, 2007

سلامتك يا كبيييييييييير


فئة عميلة قليلة مندسة ولاد ستين كلب

نشرو اشاعة عن لا قدر الله ولا سمح ان رئيسنا المحبوب المفدي طويل العمر يطول عمرة هاي هيق

انتقل الي الرفيق الاعلي

وطبعا دي اشاعة مغرضة و انة انتقل الي دار الفؤاد تقريبا لاصابتة باجهاد من كتر خوفة علي الشعب وعملة المضني لاجل راحتة

واوجة كلامي لكل الحقودين المأجورين الكلاب عملاء الامبريالية الشيوعية المقعرة

بأن الرئيس في اتم صحة و عافية و علي اتم استعداد يحكمنا28 سنة كمان زي اللي فاتو

ولحد ما اتخن تخين فينا يقول جااااااااااااي و حقي برقبتي

ولمن لا يقرأ كتب التاريخ يعلم ان عمرنا ما سمعنا عن وزير عيان او مات لا سمح الله او جالة بواسير او زحار او حتي كالو في بز رجلة

فاعيزين نيجي دلوقت و بعد كل دة نسمع عن رئيس بيتعب و يموت زي الناس الجرابيع

دة ما شوفنهاش في الوزرا

فيا عملاء البرجوازية الدونية موتو بحسرتكم

فرئيسنا خالد لا يموت

فان مات مبارك فكلنا مبارك


قرار جمهوري رقم واحد تاميم شركة قناة السويس البحرية شركة مساهمة مصرية

تصقيف حااااااااااااد

يح

Tuesday, August 21, 2007

المملكة العربية السعودية بنين

حقيقي افتقد مدونتي و افتقد المدونين وافتقدت المسقعة

تركت مصر بعد سنوات وسنوات من التمسك بها رافضا مبدأ السفر و خصوصا لدول الخليج

ربما من حين لاخر اسافر لاجل عمل لكنها فترات قصيرة و ارجع بعد كدة علي بيتنا و اتنقع في البانيو لاغسل اثار اسفر

لكن المرة دي شكلة الدش هايستني فترة طويلة

شديت الرحال لبلاد تركب الجمس و الجمال ويلبسو التوب و العقال

ربما من يعرفوني جيدا استعجبو لقراري لكن حسابات كل فرد تختلف في كل مرحلة زمنية و عمرية

لكن قناعاتي مازلت محتفظا بها


المهم وما يحلي الكلام لا بذكر النبي علية الصلاة و السلام

صلو علي النبي

مجموع ما قضيتة في السعودية حتي الان ربما حوالي شهرين و نص

والسفرية دي كانت مختلفة لاني المرة دي تعاملت اكثر مع الناس و اكلت في اماكن اكتر


لا انسي اول مرة ركبت تاكس هنا فالصديق اللي سايق طبعا هنا كل من هو من شرق اسيا يطلق علية صديق او محمد

وهابقي اقلوكو حكاية محمد دي لية بعدين

المهم الصديق سواق التاكس قالي تحب تدفع تبع البونديرة و لا نتفق

طبعا اخوكو عمل فيها ناصح وقلتلة لا صديق بنديرة انا ادفع

ركبت ومشوار مكملش 10 دقايق لهف مني 40 ريال حرق و نار في جتتة امة و كل الاصدقاء اللي زية

مع ان روحت نفس المشوار و دفعت 15 بعد كدة


من الحاجات اللي كل ما افتكرها اضحك اشوف يافطة علي محل مكتوب عليها محل للتقبيل

اقول في عقل بالي اية يا اخواتي دة اباحة عيني عينك كدة بوس و لية محلات كمان

فين و فين لما فهمت انة للتقبيل يعني للايجار

انا مش عارف الاسم دة اخترع علي اساس اية ربما اللي اخترعة كان واحد فلاتي


وكلة كوم والاكل في دول الخليج كوم تاني

فالناس هنا تاكل لكي تعيش واذا عاشت تاكل لكي تستطيع ان تستمر بالاكل

مثلوثة و مندي و مظبي و مدفون و مخنوق و محروق و مسلوخ

و اجاركم الله من المثلوثة عبارة عن 3 راقات عيش و 3 كيلو رز وفرخة مصلوبة بوسط الحلة

و اطفح يا مؤمن وصلي علي اللي هايشفع فيك


والاكل الهندي هنا موجود والصنعة بحرفنة وخلطة معلم

بهارات و شطة اذا تذوقت معلقة واحدة تشلح وترقص عشرة بلدي وتأربع جالون مية لاطفاء النار الموقدة

انا و صديق لي اكلنا في احد المطاعم الهندية اياها انا طلبت اكل الشطة بسيطة و هو من محبي الشطة ادالة 5 ريال و قالة اتوصي بي

اقسم كنت باكل و العرق عامل ينزل من راسي علي عيني من كتر حرارة الشطة

ورقدت يومين في السرير اتلوي كابن اوي مصاب بمغص عنيف

وصديقي عمل عملية البواسير من اسبوعين ويجلس علي مخدة كما الولية الحامل


وطبعا المولات هنا لا تعد و لاتحصي لو غبت عن منطقة شهر واحد ترجع تلاقي مولين علي الاقل اتبنو فيها

و العدد في الليمون البنزهير
والشيء الظريف في الامر اذا كنت هنا مع زوجتك فلا مشاكل ففي كل مكان اماكن مخصصة للعائلات بمفردها
سواء مطاعم او مولات او متنزهات
اما اذا كنت عازب فمعاملة كما الحمير البلدي الجربانة
فربما حارس الامن في المول يمنعك من الدخول بحجة انك عازب وداخل تبصبص علي الحريمات يا خلبوص

لكن في غالب الامر الحياة سهلة و بسيطة و مريحة للاعصاب جدا جدا

ودة احد الاسباب الرئيسية لاتخاذي قرار السفر

حقيقي تعبت من شدة الاعصاب و الضغط العصبي

ومشاكل بلدنا و الزحمة و الدوشة و السياس

جمع سايس يعني

وكل واحد عايز يحط ايدة في جيبك و يقلبك زي فردة الشراب وياخد اللي يقدر علية منك

واكل بالسرطان و مياة بالفشل الكلوي اذا وجدت اساسا

وهواء بالرصاص و عيش بالحديد وادوية بفوسفات المنجنيز


بس برضة بلدنا حلوة بقرفها وزبالتها وشعبها اللي تغير كتير وبقي عايز ضرب الصرم

حلوة بشوارعها و الحياة و الاهل والقهاوي و الشيشة

حلوة بالعسكري الغلبان اللي ممكن يخليك تاخد صلاح سالم كلة بالعكس مقابل جوز جنيهات

ولا الواد بتاع البوفية اللي يخلصلك ورقك كلة في مجمع التحرير ب 100 جنية بس

حلوة بامي واصحابي حلوة بام محمد الدادة اللي استحملت قرفي و قرف اللي خلفوني ربما ربع قرن


ربما ما يهون بعض الامر في الغربة اذا وجدت الصحبة الطيبة

صديق عرفتة عن طريق النت اسمة اسامة مر علية 5 سنين او اكتر ربما متغرب

اول ما تشوفة تشوف ابن البلد الاصيل بلكنتة الدمنهورية وشهامتة المصرية

مبتسم علي الدوام اذا فضفض معك وجدتة يحمل هموم تكفي من المحيط للخليج يشعل سيجارة خلف اخري

لا يكل ولا يمل اذا قصدتة في شيء. حقيقي انا طلعت عينة معايا مشواير لاجل فرش البيت.
واخر اردني من اصل فلسطيني اسمة رائد معرفتي بة لا تزيد عن شهرين وتعاملة معي كصديق منذ سنوات طويلة
بل اعطاني سيارتة لاجل ان اقضي بها بعض اموري
حقيقي لسة في رجالة برة
هافتقد مصر , مش عارف لكن متاكد هافتقد اصدقائي وامي وابي واخوتي
خوفي الوحيد اذا مرت علي السنين وحاولت العودة اجد نفسي غريب غير متأقلم
فمن سافر خارج مصر يستطيع ان يفهم ما اقصد
علي اي حال كلها اراضي ربنا
القاكم قريبا جدا علي صفحات مدونتي

Saturday, July 21, 2007

حكومتنا وهي حرة فينا تغسلنا و تكوينا

كنت هاخصص التدوينة دي لاجل سرد الفترة الماضية التي قضيتها خارج مصر
ولاني علي مدي الشهرين المنصرمين لم افتح جريدة او اتابع اي خبر محلي كان او عالمي الهم الا بعض المقتطفات مما يحدث في لبنان
و فلسطين و تهبيل عباس و هنية و الست ام فتحية
المهم بعد عودتي ورؤية ما حل في مصر في خلال شهرين فقط قررت تأجيل حكايات الشهرين اللي فاتو
لحد ما نشوف اية الاشاعات اللي عمالة تتشنع علي بلدنا دي



ثورة العطشي

إذا عطش العرب سيشربون من مصر‏!!


واذا عطشت مصر تشرب من الباكابورت

علي مدار سنوات عديدة الشعب عمال يطفح و يأربع من مياة بها من الامراض ما هو اكثر من مقلب نفايات نووية ولم يعترض علي العكس شغال كما الحمير في الساقية فشل كلوي ميقولش لا سرطان ميضرش قصور في كبد بنكرياس سلس بول عجز جنسي وحكمة الخالق دابر المصريين لا ينقطع ابدا ولا يحوق فيهم مرض او غيرة


الي الان و كلة تمام مفيش حد معترض الحكومة بتضخ مية بالباكبورت و الشعب يطفح
ثم توقفت المية واصبح الضخ باكبورتات بس وايضا لم يعترض احد وكلة تمام
لكن الباكابورت كمان يقف الناس تشرب منين بقي وكما قال الشاعر قديما رضينا بالباكابورت و الباكابورت مش راضي بينا

وانبلج و انفلق و خرج علينا محمد المغربي وزير الإسكان أن مصر من افضل دول العالم في مجال مياه الشرب لكننا نحتاج 77 مليار جنيه لمواجهة أزمة المياه والصرف الصحي وفي خلال خمس سنوات مش هايكون في مشكلة في المياة

لا مؤاخذة يعني دة احنا بقالنا يجي 4 سنين في مستشفي ال 57357 وهي كلها علي بعضها محتاجلها 800 مليون ومش عارفين نلمهم بالرغم من اعلانات الشحاتة والاستجداء ليل نهار في جميع وسائل الاعلام
بل ان من الاشاعات المغرضة ان هناك من المسؤلين من يحمي كلابة بالمية المعدنية قرفا من المية العادية وبدون ذكر اسماء حرصا علي سمعة الكلاب

ولا ننسي اللواء صلاح سلامة محافظ كفر الشيخ واصفا الاف الثائرين الغاضبين، العطشي، بأنهم قلة عميلة مأجورة لجهات أجنبية مندسة بين جماهير كفر الشيخ والبرلس الاوفياء والمخلصين

ربما يخرج كلب عميل مندس يقولي ان انقطاعات المياة دي غير موجودة و ان وجدت فهي في قري و نجوع تبعد عن العمران و محطوطة في الخطة المئوية البعد القادمة
طب حد يفهمني فيصل والهرم و المرج بل بعض المناطق في القاهرة الجديدة دول قري برضة


قمة المسخرة بقي شافعي الدكروري محافظ الغربية بيقولك ان 100 أسرة فقط في بشبيش تعانى من عدم توصيل مياه الشرب إلى منازلهم

100
بس يا راجل يا مفتري امال ال 5000 بني ادم اللي طلعو في التلفزيون عمالين يلطمو
بالجراكن دول اية

ولا يكونو جايين من مارينا يعبو مية من بشبيش علشان احلي

الناس هناك بتمشي 5 كيلومترات للحصول على "جركن" مياه نقية.

ولا دي بتوجيهات من وزير الرياضة علشان الفيتنس بتاع الشعب

ولما راح الاهالي ديوان عام المحافظة في طنطا لعرض مشكلتهم طاردتهم الشرطة كالحمير البلدي وفين يوجعك
شربت من نيلها ؟؟ لا انضربت في إ قسامها


الناجح يرفع ديلة
مليطة كل عام الثانوية العامية و اغبي نظام تعليمي ابتكرة البشر وكل الحقوق محفوظة للنظام المصري
فاصبح الحاصل علي 95% كما مجاذيب السيدة لايصلح ان يلتحق حتي بحفلة 6 في سينما فاتن حمامة
يصل الحد الأدني للقبول الي ‏98,7%‏ لكليات الطب و‏98,4%‏ للأسنان و‏97,2%‏ للصيدلة و‏96,1%‏ للعلاج الطبيعي و‏92,9%‏ في كليات الهندسة والحاسبات والمعلومات و‏97,4%‏ في الاقتصاد والعلوم السياسية و‏96,7%‏ في الإعلام
كلة كوم وحكاية ان في حوالي الفين طالب مجاميعهم فوق ال 100%
الله يرحم ايام الملك الناس كانت بتخش طب ب 60%
المشكلة ان العديد من الملتحقي بكليات القمة واصحاب المجاميع الخزعبلية اذا فتح فاة اكتشفت انة اجهل من دابة فلا ثقافة ولا علم في اي امر اخر الا مما في المنهج المقرر الا ما رحم ربي
فيخرج من الثانوية العامة حمار و يلتحق بالجامعة و يظل حمارا غير متابع لاي شي ثم بعد التخرج يكتشف انة فاتة الكثير فيعمل مدونة و يقرفنا احنا

اطفي النور يا سعد , الوزير جاي

اعتبارا من شهر نوفمبر القادم الكهربا هاتزيد من 5 الي 8% علي جميع شرائح الاستهلاك
وكل الدلائل بتقول ان الزيادة حصلت من سنتين وب 30%
لكن مادام الكلام مطلعش من فم الحكومة محدش يصدق وبناءا علية نهيب بالسادة المواطنين انهم ينامو بدري وكفاية لعب في الضلمة وانظر حولك يا مواطن

البقلاوة للجميع
اخيرا و ليس اخرا خرجت علينا سيدة مصر الاولي بحملة القرأة للجميع يفط علي الطرق وفوق الكباري و العمائر
واعلانات في التلفزيون تظهر فيها واكاد اقسم انها اصبي من ام امي
حملة تدعو الناس انهم يبطلو كل حاجة و افتح كتاب يا جعر منك لة عايزين ننضفكو حملة تكلفت ما لا يقل عن 30 مليون جنية مصري
ولم اري مصري يوحد الله ماسك كتاب و بيقرا الا كتاب حياتي يا عين وربما البعض ممن يهون القرأة عن الراديكالية و العولمة في الحمام مثلي بل ان مصر هي من ارخص دول العالم في اسعار الكتب و بتتباع بالكيلو ولا حياة لمن تنادي
ربما ان الجدع من دول لما يكون معاة قرشين زيادة بدل ما يروح يجيب كيلو لحمة يرم بيها عضم عيالة يشتري كتاب عودة ليليت
بدل ما يدفع تمن كام حصة خصوصي للواد في الاعدادي يجيب لهيب في بونصر او صليب العار
فيا شعب مصر ارمي كل حاجة ورا ضهرك ارمي هم المرض و العلاج ارمي هم العلام ارمي هم الاكل و الشرب و السكن
ارمي كل حاجة و انزل هات سلسلة القعقاع في عمل الشاي بالنعناع
سؤال اخير يلح و يلسعني صباحا و مساأ
هو في حرب اكتوبر كنا بنحارب مين
اصل اللي الحكومة بتعملة في الفلسطنيين عند معبر رفح دة يدل ويجزم ان بلا شك ان الفلسطنيين هما اللي كانو محتلين سينا
وان اللي بيتعمل فيهم دة تار بايت بينا و بينهم
هذا و بالله التوفيق

Saturday, June 30, 2007

يوم ميلاد سعيد


اول امس

مر عام منذ مولد حبيبتي ملك

ولم اكن موجودا في مصر

حقيقة اكتشفت ان مصر بالنسبة لي هي زوجة و ام و ابنة ليس الا ربما
فاذا تواجدو بقربي فقد كفيت امري
علي اي حال هارجع الاسبوع دة مصر
وجاري اتخاذ قرار مصيري



Monday, June 18, 2007

انا علي قيد الحياة




حقيقي وحشتوووووووووووووووووووووني


معلش اعذروني لاختفائي الفترة دي
بس والله مشغول لشوشتي


من المول دة للمول دة و المطعم دة للتكية دي


يتخلل الموضوع بعض العمل
و اجمل ما في الامر ان الله قد من علي باداء عمرة
المهم ان شاء الله عودة قريبة وحكايات تفصيلة


من المملكة السعودية العربية بنين


وعقبال عندوكو



Tuesday, May 08, 2007

كل نفس ذائقة التاج



المدون لما يسعد يرد علي تاجين

فانا من انصار الحكمة القائلة اجل عمل اليوم الي الغد او الي بعد غد او السنة الجاية

بس في النهاية هاتعملو هاتعملو


المهم العزيزة رفقة عمر صاحبة مدونة العائشة في الاحلام رزعتني تاج من فترة و انا مطنش خااااالص

والمدون اللاسع صاحب مدونة واحد من الناس خبطني تاج من فترة لا اذكرها نوهائي ورديت علي الاثنين ولم اقم بنشرهم

اعتقد حان الوقت علشان الضغط يخف شوية .......




التاج الاول.

هل كنت طالب شاطر فى المدرسه؟

يعني اي مدرسة..؟؟؟؟
بكل فخر انا الطالب الوحيد علي مستوي منطقة مصر الجديدة التعليمية الي اقنعت 5 مدرسين بالتقدم بطلبات معاش مبكر
واثنان اخرون بالتحويل للتأهيل المهني



اكتر مادة حبيتها واكتر مادة كرهتها فى المدرسه وفى الجامعه؟

هي الجامعة قبل المدرسة ولا المدرسة الاول..؟؟؟


كنت عايز تتطلع اية وانت صغير؟؟

صباع موز علشان بحب الموز اوي وعندما وعيت علي الدنيا قررت اني ابقي بتاع طعمية نظرا لاعجابي بعملية تكوير الطعمية ورميها في الزيت.
الخلاصة العملية التعليمية بالنسبة لي مرحلة استقطعت من عمري بلا ناتج حقيقي الهم الا تعلمي لغتين و اجادتهم اجادة تامة بجانب العربية

نظرا لدراستي في مدارس فرنسية,فانا اعمل في مجال مختلف تماما عن دراستي لا اذكر حرفا واحدا مما تعلمتة بل تعمدت ان انساة حفاظا علي عقلي واعتمادي كان علي قراتي لجميع انواع الكتب علي اختلاف مذاهبها



الثاني.

اية اللي حيحصل لايميلك لما تموت ؟

ان شا الله انت انا لسة حلو وصغير


اديت الباس وورد لحد قبل كده؟

باسورد اية يا باشا هو احنا بينا الكلام دة , ايميلي هو ايميلك يا راجل

اسم المستخدم:anaga3aan@yahoo.com

كلمة السر:ga3an76


اســــــمك؟
إسلام ان شاء الله

اسم الدلع المشهور وسط اصحابك؟
قدري


برجك؟
الحمل بس احتمال اغير السنة دي


شخصيتك نوعها ايه؟
لا اعاشر ولا يختلف معي في الرأي عنيد صامت علي الدوام
وبوشين علشان الناس ملهاش ذنب تشوف الوش اللي فات دة


السفر بالنسبة لك؟
ياااة اجمل حاجة في الدنيا وعندما اكون خارج القطر المصري اتبع المثل القائل البلد اللي ملكش حد فيها امشي وشلح فيها


المود بتاعك؟

45 برباط لميع


وقت فراغك بتعمل فيه ايه؟
برد علي التاج فية اهو



الاكلة المفضلة؟
اي حاجة اقصر مني وافضل من يسيرو علي اربع او اثنين في حالة الاضطرار


الصفات اللي خدتها من بابا؟
الحج مكنش فاضي يديني حاجة فانا اخدت اللي عجبني
العصبية و العند والاعتداد بالرأي و اتخاذ القرارات السريعة القاطعة الاعتزاز بالنفس
هو ربنا شفاة خلاص من اول كام حاجة و انا لسة باتعالج


الصفات اللي خدتها من ماما؟
زوزو ست الكل انا هي علي الاخر
امي ب 100 راجل كفاية انها عرفت تربي واحد زي


اكتر 6 حاجات بتكرهها؟

التاج دة
الحر
السابنخ
الرغاي
الفراعنة
اسامة منير


اكتر 6 حاجات بتحبها؟
امي
مراتي
بنتي
صحابي
ركعتين بذمة
الشتا



الشغل بالنسة لك؟
اكل العيش مر مجبر اخاك لا بطل


ايه الكمبيوتر والانترنت بالنسبة لك؟
ما قلتلك اكل العيش مر


هذا وبالله التوفيق
والتاج دة مش هايتمرر لحد هايموت و يتاوي هنا
جعان مقبرة التاجات


Monday, April 30, 2007

قعدة الحزانة ولا مشوار الخزانة

في دول العالم الاول الوصول لسن المعاش معناة الراحة والاستجمام و قضاء اليوم علي ضفة بحيرة وخلفة كوخ صيفي صغير ولا مانع من اصطياد بعض
الاسماك او اصطحاب الاحفاد للتنزه و الذهاب للملاهي وشراء الفشار ورزع شوب بيرة متلج مساأ ولعب البينجو
المهم مرحلة المعاش هي الوقت الذي يحق لمن عبر الستين الراحة وقضاء وقتة فيما يحب و علي نفقة الدولة


في بلدنا العظيم ذو الزبرتاطاشر سنة حضارة واخترناك اخترناك هذة الفئة من الشعب قررت الدولة انهم اصبحو كما خيل الحكومة ولازم ينطخو تلاتين جزمة واحالتهم للتكهين وايجاد كل سبيل التعذيب وطلعان الدين الي ان يقولو حقي برقبتي

ويا اما يقضي الله امرا كان مفعولا او ياخدها من قاصرها وينط في اي بلاعة مفتوحة ويريح و يستريح.
وكل يوم يتفتق زهن زبانية الدولة من موظفين حكومة ومسؤلين ورؤساء مجالس عن افكار لوزعية للقضاء عن من لازال بة رمق فمنذ عدة اشهر احد جهابزة القرارات العشوائية قرر ان 18 الف شخص ممن يصرفو معاشاتهم من من 13 مكتب بريد بجوار منازلهم عليهم ان يتوجهو بعد
ذلك الي مصلحة الخزانة العامة في لاظوغلي القاهرة فتخيل ان ال 18 الف دول كل اول الشهر بيتجهو لمقر الخزانة علشان يقبضو المعاش الذي هو
اساسا لا يسد حاجة قطة بلدي , 318 الف رجل و امرأة ممن تخطو الستين بكثير وكلهم بهم من الامراض ما تكفي لفتح مركز طبي .

-----------------------------------------------------------------------------------

عم سيد 74 عاما حضر مع حفيدتة ليقبض معاشة لم يستطع احتمال الزحام وهو ذو المرض الصدري المزمن سقط و اخرجة ولاد الحلال في الهوا وجابولة عصير






----------------------------------------------------------------------------



ست رزقة 82 عاما حضرت مع ابنتها من مصر القديمة وبعد وقفة في الطابور


منذ السابعة صباحا احالها الموظف لشباك اخر وسقطت ايضا تبكي من قهر المرض







----------------------------------------------------------------------------


ست عزيزة و عم محمود حضرو يومين متتالين و في كل مرة يفشلو في صرف معاشهم




لعدم وجود اسمائهم في الكشف وفي اليوم التالت لقو اساميهم بس كان المعاش اتحول أمانات



----------------------------------------------------------------------------
الحجة سيدة عاشور 84 عاما : النضارة فين يا ولاد
هكذا كانت تبكي وهي تبحث عن نظارتها



----------------------------------------------------------------------------



----------------------------------------------------------------------------



والقائمة طويلة لا تنتهي,قائمة قوامها 3 مليون و 200 الف مواطن ممن بلغو سن المعاش لا رحمة ولا رأفة



تجعلهم يلعنون كل نهار خرج عليهم وفي خانة الجنسية مصري




Monday, April 23, 2007

عقبال البكاري يا ابو جمال


جمال باشا مبروك يا ابن كبيرنا
طراطيش الكلام بتقول ان عقد القران يوم 28 ابريل الجاري
والزفاف 4 مايو وهو مايوافق عيد ميلاد السيد الوالد حسني مبارك التاسع والسبعين ربنا يديك طول العمر يا كبير
واهي تبقي تورتة واحدة وكلة توفير
في تكتيم شديد علي الخبر و تفاصيل الزفاف
في الدول المتقدمة و اوروبا ولي العهد لما يتجوز
يصبح هو حديث الساعة و كل صغيرة و كبيرة من تفاصيل الحدث معروضة للعامة
ما هو دة جواز اكابر مش ابن الدلالة علي بنت صاحب عربية الكشري
فالعروس وسيدة مصر القادمة ابنة محمود الجمال مقاول ورجل اعمال من اسرة عريقة بدأت في تجارة الفحم منذ حوالي القرن
ثم تحولت الي العقارات و الاراضي وتعود شركة دجلة للاستثمار العقاري في منطقة المعادي اليهم

المهم طبعا وكعادتنا كمصريين في اللت و العجن تضاربت الحكايات و النوادر عن تفاصيل الزفاف
فالبعض يؤكد ان فستان العروس تخطي النصف مليون جنية والشبكة الثلاثمائة الف جنية
وعش الزوجية مقرة فيلا بمنطقة الزمالك تخطت الستة ملايين جنية

واية يعني اما انكو شعب سماوي صحيح الراجل يا ولداة اصبح في الرابعة و الاربعين من العمر يلحق يكمل نص دينة مش كفاية النص اللي راح
وكمان سمعت ان اللي هايقيم الفرح سعد الصغير باغنية هاتجوز بمصاحبة فقرات راقصة من اعضاء مجلس الدولة
سؤال بيلح علي وش موريني النوم البوفية بتاع الفرح اوبن بوفية ولا ست منيو علي القاعد يعني
ولا الجماعة الكبارات دول هايقفو طابور قدام البوفية و اللي كرفتتو تدخل في حلة ام علي او كوعة يرشق في طاجن بامية
وكل يتصارع علي كتف الخروف كما يتصارعو علي مصر المحروسة

من 15 سنة ذهب المرحوم وجية أباظة وكيل عام شركة بيجو
الي الرئيس ليشتكي لة أن علاء و جمال مبارك يفرضان علية دفع عمولة ضخمة لهما عن كل سيارة بيجو تباع فى مصر
وكان رد الرئيس ما هو علاء و جمال زى ولادك يا وجية
ويقال ان مفتي الدولة انذاك اجاز انهم يرثو في التركة
المهم من الاسئلة اللي بسألها لنفسي هل هايروحو الوكالة يختارو الستاير و لا الوكالة هي اللي بتروح عندهم
طيب هل يحدث ما بين الحموات التلاجة والنجف علينا و الحلل عليكو
ولا تيفال بتورد حلل يومية للقصر الرئاسي

علي اي حال مبروك يا عريس وادعو كل شعب مصر لعدم النتانة و تنقيط السيد جمال بما تجود بة انفسكم
فا هانعدي ظرف علي الشعب واللي في النصيب بقي

جيمي باشا ابو عوف منزل اطقم بيجامات صيفي من اللي قلبك يحبها

Thursday, April 19, 2007

انا مش معاكو انا معاهم


عبد المنعم محمود
مين عبد المنعم محمود؟؟؟
حقيقي انا معرفوش
ومش عايز اعرفة و مش عايز يكون لية اي صلة بية
لانة بيوجعلي ضميري بيوجعلي صوتي بيوجعلي اي حاجة معترضة فية
بيفكرني بحلمي اللي اتوأد خوفا علي الاخرين ومن الاخرين

لا استطيع ان اري اهلي ثكالي كما رأيت اهلك
لا استطيع ان اترك سريري الدافيء يوما واحدا هاربا من وجة مطاردي
لا استطيع ان لا اتناول فنجان القهوة الصباحي
لا استطيع ان لا اجلس في الحمام مصطحبا الجريدة كيفما شئت
لا استطيع ان لا اجلس علي قهوة ممسكا بمبسم الشيشة وحجر التفاح اليومي
لا استطيع ان لا اري ابنتي يوميا والاعبها حتي تصرخ امها كفاية البنت لازم تنام

لكنك استطعت و استغنيت عن كل هذا بملء ارادتك
يوما نذرت نفسك لقضية وطن وقد تخليت عن كل ذلك
كل ما لم استطع ان اتنازل عنة

حقيقي مش عايز اعرفك مش عايز اعرف اخبارك

Friday, April 06, 2007

انا و الفسيخ و هواك

تعريف الفسيخ لمن لا يعلم هي اسماك وافتها المنية منذ ما يقرب من عام علي الاقل و استطاع الانسان بمعجزة الحفاظ علي تماسكها
ويطلق علي صانع هذا النوع من المعجزات الفسخاني
بمناسبة حلول يوم شم النسيم المبارك اعادة الله علينا باليمن و البركات تعالو اصدعكو كالعادة معايا شوية
تولد لدي شعور غريب بالتسامح في الايام المفترجة دي من يومين كنت ضارب البواب علقة و ماسح بية الارض و لعنت لة الاخضرين روحت رايحلة امبارح و قلتلة يا جمعة اقتص مني يا جمعة
و قام فعلا برفع ايدة محاولا الاقتصاص لكن للاسف لم يمهلة القدر فقد اصابتة سيارة طائشة يقودها شيخ طائش بالرغم من ان جمعة كان واقف في مدخل العمارة جنبي قدرة يا اخوانا و محدش في ايدة حاجة ..
.فاقتربت منة و قد افترش الارض ممدا يبدو و كانة بيطلع في الروح حاولت القنة الشهادة ...
يا جمعة لا اله الا الله محمد رسول الله ...ينظر لي نظرة غريبة بها استرجاء و استعطاف قائلا ... الفسيخ .. صفيحة الفسيخ يا بية .....-فسيخ اية يا جمعة ؟؟؟
اقولها مندهشا ..جمعة و هو في النزع الاخير.... في صفيحة فسيخ دافنها في الجنينة يا بية علشان يوم زي دة . و النبي يا بية طلعها ووزعها علي روحي في الحديقة الدولية اجيبة و الدمع يكاد ينفطر من عيني .
متقولش كدة يا راجل بكرة تقوم و تبرطع و تسمم الناس بنفسك ...يتحشرج صوت جمعة ...و يطلق صرخة مدوية .... فسيخييييييييييييييييييييييييييييييييييييييييييييي ااااااااااةةةةةةةةةع وتهمد حركتة ...
.بعد ابحاث مكثفة علي الفسيخ و مشتقاتة ثبت الاتي ان 90 في المائة من المجرمين شديدي الاجرام يتعاطون الفسيخ
ان الاطفال في الاسر التي تتناول الفسيخ يولدون بعتة منغولي من النوع الذي لا شفاء منة المجتمعات المتقدمة التي لا تعرف الفسيخ لم يسجل بها اي حالات للسرطان
70 في المائة من جرائم العنف ترتكب في حلال 24 ساعة من تناول الفسيخ
و الفسيخ مسبب للادمان فلا احد استطاع التوقف عن تعاطية بعد اول مرة ..
ان العلماء الذين يتعاطون الفسيخ يفقدون القدرة علي التميز بين الحقائق العلمية و تقلية الملوخية فعلي السادة متعاطي لفسيخ ابلاغ الجهات المعنية وطلب العلاج المتوافر بالمجان في جميع الشفخانات
وطبعا لا يمر اليوم دة الا ويتحفنا التفزيون المصري بكل انواع زبالة البرامجة التي تفتق عنها عقول المعدين المرضي بحالات عتة و تبول لا ارادي
الهي يقطع خلفهم زي ما قطعو خلف البلد
نهار ربيعي جو معتدل الناس خارجة في الجناين لا بيها ولا عليها ومد>يعة نصف قبيحة نصف غبية
تنتعل ميكرفون في ايدها وتحاول دفسة في وجة اقرب شخص ليها قائلة:

سيداتي انساتي النهاردة و في يوم شم النسيم
و بين المواطنين في احد الحدائك بمدينة نصر هانكابل الجماهير و نشوف هما بيقضو ازاي يوم شم النسيم

تقترب من احد الاطفال و تسألة في حنان مرعب
اسمك اية يا شاطر ؟
شريف...
اسمك شريف اية؟
الطفل في خوف
معرفش
يعني اية ما تعرفش.. ابوك اسمة اية ؟
الطفل بعد ان بلل سروالة
و الله العظيم يا ابلة معرفش
يعني اية ما تعرفش...
ابوك اسمة اية يا ابن القديمة
الطفل بعد ان بلل سروال المخرج
يا ابلة انا يتيم انا جاي في رحلة مع الملجاء


تجد طفل اخر و بعد ان تاكدت انة جاي مع ابوة و امة

اسمك اية يا حبيبي
الطفل ينظر اليها و قد بدت علية حركات عصبية من هز رقبتة و حول طفيف من عينية يتبع حركة انفة
و يقوم بلسع نفسة علي قفاة من حين لاخر ...
اة اسمي .. اسمي
يجذب الطفل ابوة من بنطلونة بابا انا اسمي اية
ينظر لة الاب في حنان ابوي
اسمك عمرو يا حبيبي
ينظر الطفل لمذيعة
اسمي مروة يا طنط
في سرها ..
يا مثبت العقل في الراس
طيب يا مروة يا حبيبي
انت بتحب مصر ؟
الطفل في سعادة
انا بحب الفراخ البانية



مواطن اخر

تقترب من احد المواطنين و قد بدا علية البلة مع خروج سواءل من فمة
و تدب المكرفون في بقة
نتعرف بحضرتك
محمد احمد محمد احمد 3 علوم انشاء الله
يا تري يا محمد بتقضي شم النسم فين ؟؟
(مع العلم انهم فعلا في المكان اللي الراجل بيتفسح فية)
بقضي يومي وسط الخضرة و الفسيخ انشاء الله
تدب المكرفون في بقة مرة اخري و تسألة ..
عندك ولاد .؟
اة عندي 2 ان شاء الله محمود و ...
تقاطعة
و متجوز علي كدة .؟؟
طبعا يا ستي ...
و مراتك ست ....
الرجل في سعار
امال راجل ...
و هي تضحك
انا قصدي ست بيت
المواطن في نفاد صبر
ايوة انشاء الله
طيب يا محمد تحب تقول اية لشعب مصر؟
ينظر المواطن الي الكاميرا و يقول
يا شعب مصر بعد كل سنة و انتو طيبين شيلو الولية دي من فوقي لاموتها

Monday, April 02, 2007

حدث في مثل هذا اليوم


اليوم ومثلة كل عام في الثاني من ابريل وفي شهر ابريل علي الاخص مليء بالاحداث ففي
سنة 1918 -الجيش البريطانى يدخل فلسطين
سنة 1912.غرقت السفينة تايتانك
سنة 1453-بدأ محمد الفاتح حصارة للقسطنطينية
سنة 1799 - قام نابليون بونابرت اول دعوة رسمية لليهود لتحقيق آمالهم وإقامة كيانهم على أرض فلسطين
1865-اغتيل ابراهام لينكولن احد رؤساء امريكا المطالبين بتحرير العبيد
سنة 1968-اغتيل مارتن لوثر كينج
سنة 1992-بدأت الحرب البوسنية
سنة 1996-مذبحة قانا اللبنانية

شهر ابريل بالنسبة لي مليء باحداث غالبيتها ليست بالسعيدة


ربما الحدث السعيد بالنسبة لي الكئيب علي البعض
هو انة في الثاني من ابريل ولدت انا

وكلما نظرت الي ما فعلت علي مدار هذة السنوات المنصرمة اجدني حققت الكثير و الحمدلله فمنها علي السبيل المثال و ليس الحصر
اقناع زوجتي العزيزة بالذهاب معي الي احد اعمدة الكباب و الكفتة بمصر المحروسة
مش هاقدر اقول اسمة علشان الدعاية و وزارة التموين

نجاحي في توصيل الكمبيوتر و التلاجة و البوتجاز علي شبكة عمل لاسلكية

استطعت العثور علي طريق مختصر الي عملي بة اربع عربيات للفول وكشك حاجة ساقعة

والكثير و الكثير من الانجازات :)

حقيقة ربما اجمل شيء احمد الله علية ليلا ونهارا ابنتي ملك


المهم شوفو بما ان النهاردة عيد ميلادي وانا متسلطن علي الاخر و اخر انبساط
فا لكل زائر سؤال واحد فقط يسألهولي
اي سؤال تاني ب6 جنية

Monday, March 26, 2007

دستور ياحكومة

لأ


يا شعب

سوف يتم التصديق علي التعديلات الدستورية و الموافقة وسوف تكون حيز التنفيذ في خلال اشهر
لمن امنوا بالسراب و ان قول لا سوف يؤثر الحداية مبتحدفش كتاكيت
و الاستفتاء ما هو الا اجراء صوري يحتمة الدستور اللي هايتغير ويتلف بية طعمية
عربيات القطاع العام محملة علي مستوي الجمهورية بما لا يقل عن اتنين مليون من العمال و الموظفين للذهاب الي مراكز الاستفتاء و الادلاء برأيهم المعروف مسبقا

من عجائب التعديل
المادة (54)
يبيح للأفراد حق التظاهر والاجتماع: "للمواطنين حق الاجتماع الخاص في هدوء، غير حاملين سلاحًا، ودون حاجة إلى إخطار سابق، ولا يجوز لرجال الأمن حضور اجتماعاتهم الخاصة والاجتماعات العامة والمواكب،

طيب هي اجتماعات اي حزب او مظاهرات الطلبة خرجت عن المادة دي؟؟
اما التعديل هايظفلط كل الكلام دة بصابونة نابولسي

المادة (44)
التي تنص على أنه "للمساكن حرمة فلا يجوز دخولها ولا تفتيشها"، والمادة (45) "لحياة المواطنين الخاصة حرمة يحميها القانون"..!!
المادة دي كمان هاتاخد سكة بالصلاة علي النبي و يبقي من حق اي جربوع لابس ميري وعلية نسر حتي لو كان شغال في مصلحة البريد
انة يزقلك علي اطري حتة في جتة سيادتك وكلة بالدستور

شوفو بقي المادة دي الي تم تعديلها وتأيفها علي مقاس الكبير

الغاء الاشراف القضائي الكامل على الانتخابات العامة وتسمح لرئيس الدولة بإحالة المدنيين الى القضاء العسكري كما تسمح له بحل مجلس الشعب دون الرجوع للناخبين.

يعني من الاخر طوووووووووووووووز في القضاء طوز في الشعب طوز في اللي خلفونا
طب بعد ما القضاء مش هايقدر يحكم مين اللي هايراقب في ستار اكاديمي


ونصيحتي ان كل من لة جار ظابط او امين شرطة او حتي ساعي علي باب ظابط يتودد الية ولا يحاول عمل اي مشاكل و ائتمان جانبة
حتي لا يفاجئة في يوم مقتحما منزلة وسحلة من قفاة ورمية بجواب اعتقال لمدة تتجاوز عدة اعوام بلا تهمة سوي انة ممكن يمثل تهديد للامن القومي

مرفق وصلة لتحميل الدستور المصري المعدل
غاز طبيعي و اوكتين 92
حمل قبل ما يحملوك هنا

والله الموفق غطيني وصوتي بس بشويش

Saturday, March 17, 2007

أمي العزيزة الاقي معاكي بريزة سلف


بالتاكيد لكل واحد فينا ام او علي الاقل كان لية و من ليس لة ام او لا يعلم عنها شيئا

و ابوة بيصبحو كل يوم الصبح و يقولة كلام من نوعية امك مسافرة و بكرة ترجع يا حبيبي

او دي ماما عيانة و في المستشفي يعرف انة لقيط و الراجل دة مش ابوة و لا الست دي امة ولا انور وجدي يبقي خالتة
وانهم لقوة علي باب جامع بيرضع من قطة بلدي
المهم يا سادة يا كرام لا يحلي الكلام الا بذكر النبي علية الصلاة و السلام
اكيد كل واحد فينا و هو في شرخ الطفولة البلهاء كان يقعد يحوش فلوس هو و اخواتة مع ابوة بحجة عيد الام و عند سؤالة علي الفلوس يقولو دول ماتو يا حبيبي البقية في حياتك و ويكتشف في الاخر ان الوالد كان بيجيب بيهم هريسة يوم الخميس
او اذا كان ناصح شوية يشيلهم مع امة و عند سؤالها تقولة مكنش ينعز يا ضنايا عملنا بيهم الصوان بتاع الفلوس بتاعتك اللي كانت عند ابوك
المهم و كنت انا من خارقي الذكاء فكنت احتفظ بثروتي في احد ادراج مكتبيو انتظر يوم الام لكي اشتري لها هدية و كنت اعتقد ان ما يفرحني بالتالي يفرح ست الحبايب و اكتشفت كم كنت اهبلا
انا داخل علي امي و انا في المرحلة الابتدائية و شايل كيس ضخم ملفوف في ورق هداياو بقي يكاد ينفشخ من الفرحة و اهجم عليها ماما ماما كل سنة و انتي طيبة .. و اقبلها في وجنتيها ملحوسا اياها بكل انواع الطين وبقايا الشيبسي و الشمعدان و اشياء اخري لا اتذكر محتواها الان
و اقولها .. غمضي عنيكي يا ماما تغمض المسكينة عيناها في انتظار هديتها
يا حبيبي يا ابني انت الوحيد اللي فاكرني ياحنين ...
فتحي يا ماما .. اقولها في سعادة ثمرة القلقاس ...
تفتح الحجة التي لا حول ولا قوة لها عينيها و تجد شوال الهدية بين يديها فتفتحة و لسانها يلهج بالدعاء لي ثم..امم..احم ..تنظر بداخل الشوال و تجد بعض الكتاكيت لونهم احمر و قرطاس في حوالي 20 دودة القز وعقد من المكرونة الملونة و كيس مليان دوم
ملحوظة:الدوم نبات ابن كلب مقرف طعمة يخلي الاعمي يفتح

انظر لها و السعادة تبظ من عيني و الترقب لمعرفة رأيها في الهدية و نظرت لي نظرة اشفاق لم افهم معناها الا في الكبر ثم قامت بالتربيت علي كتفي و هي تقول روح يا ضنايا اغسل وشك ربنا ما يحرمك من الهبل ابدا .
وتمر السنون ولا يختلف الحال كثيرا بل ربما اصعب عليها و يجي عيد الام وتديني فلوس علشان اجيب شوية دوم و اعملهم عصير
طول عمرك بتضحي يا امي .
وتمر سنين اكتر ولازم الواحد بقي يبقي عندة دم ولما نويت اقول يا هدايا يااما
بقي لازم اجيب هدية لامي وهدية لام امي وهدية لام ام بنتي وهدية لام بنتي وهدية لام احمد ابن البواب وهدية لام شوقي باتعة كشك السجاير ولام سوسن بتاعة نصبة الخضار
واي ام في محيط قطرة 10 كيلومتر مربع
ولاي ام اشك ولو شك انها قامت بالمساهمة في انشائي او اطعامي

ست الحبايب يا حبيبة و حبيبة كل ما اسمع الاغنية دي ابقي مش قادر
و يبقي نفسي في حاجة حرشة

Monday, March 12, 2007

جعان ابن المعلم جعان هايتحِجب يا مينز


انا هاتحِجب يا رجالة
دي جاية من الحجب مش الحجاب :)
انا مش عارف هم يقصدوني انا ولا خلول تاني غيري
الخبر دة من جرنال روزا اليوسف العدد الصادر 2 مارس

من مصدر موثوق بة
المقصود بة هو مدونتي وقد اطلع علي حيثيات الطلب صديق شخصي وان العنوان المرفق هو عنوان مدونتي وليست مدونة صاحب الله الوطن فاطمة و الذي لا يشرفني ان يذكر اسمي بجانبة ولمن لا يعلم هو صاحب تدونية تقليد القرأن .
المهم تقريبا القاضي محبش يكتب باقي اسم المدونة لاعتقادة ان كلمة ام الخلول ليها بعد سياسي
علي اي حال انا علي قلبكم لطالون
الا لو طالون شخصيا طلب مني اقوم

Wednesday, March 07, 2007

إحترس الوطن بيرجع لورا

اعزائي المقطقطين لوحظ في الفترة الاخيرة كثرة الاخبار الكئيبة مما ادي الي حدوث حالة من التبلد الفكري لكثير من المواطنين و ادي الاكثار من الفول عالصبح لظهور بعض حالات البارانويا و عقدة الاضهاد و علي الاخص بين السيدات و الفتيات وبتوع حقوق النسوان.
علي اي حال مش دة موضوعنا النهاردة انا جايبلكم شوية اخبار مفرحة علشان تخرجكم من الاكتئاب اللي انتو فية دة جتكو نيلة سديتو نفس الواحد مش عارف افطر

خبر مفرح رقم 1
..الست الفاضلة علي واحدة ونص الفاضلة في التلفزيون لحد دلوقت هالة سرحان, سرحانة بالناس علي البحري منذ ان كانت في الاي ار تي لحد مع اصبحت مع ابو قصة السكرة الوليد ابن طلال في روتانا ولمن لا يعرف مين هالة سرحان فهي اكبر هجاصة علي المستوي الدولي بعد ام سنية بتاعة الجبنة القريش اللي كان كوفي عنان مابيكلش الجبنة القريش غير من عندها ...!
بدات العمل في كتابة مقال دائم في مجلة كلام الناس بتاعة جوزها السابق عماد الدين أديب، يعني الولية مرات صاحب المحل.وبعد طلاقها انشأت مجلة سيداتي سادتي وهكذا الي ان هبطت علي قنوات الشيخ صالح كامل بتاع هز يا وز تم طردها من الاي ار تي من قبل الشيخة صفاء ابو السعود علي سن ورمح الاشاعات بتقول بسبب ان هالة رقصت في العشر الاواخر من رمضان اثناء
تقديمها لبرنامج (الخيمة) ودة كان بيتذاع علي الهوا واشاعات تانية بتقول انها كانت متجوزة صالح كامل مالك القناة عرفي المهم يعني اهي زبالة في بعضها.
الولية دي عندها ولد انا اقولة يابابا.
مزاج عندها اقحام الامور الجنسية في اي من برامجها حتي و ان كان اللقاء مع فرارجي واقف في الشفخانة ويكون من نوعية هل يتعاطي ديوكك الفياجرا .
الديك الحلو اللي هناك دة سرعة كام فرخة في الساعة واي كلام
كلة كوم و شوية المقاطيع المتأجرين بجوز جنيهات من علي قهوة بعرة واجلاسهم كما الناس المحترمة علي اساس انهم جمهور عارف الفرق بين الكاميرا والمانجة العيسوي
وكانت الطامة الكبري لما عمل برنامج و الدعاية لها قبليها بشهر الخلاصة بتاعتة مصر بلد العاهرات و احنا هانطلعهم في التلفزيون ومش هاتقدر تغمض عينيك ولا رجليك, وحدث ما لم يكن في حسبانها معرفتش تجيب العاهرات جايز ميزانية الحلقة مكنتش مكفية او قالت مش فارقة ما احمد زي الحاج احمد وراح البية المعد جايب شوية من الصيع اللي بيطلعو في مقاعد الجمهور وفبركة الحكاية و تلقينهم كلمتين
ومتخافيش يا اختي محدش هايشوف وشك وفيها سبوبة حلوة وطقم خشاف لجهازك و انتي مروحة لابوكي وصدقو الغلابة واذيعت الحلقة وكل اللي يعرفهم اكتشفهم وبقت فضيحتهم بجلاجل واللي اهلها عايزين يطوخوها و اللي خطيبها سابها يعني خطيب اية الحصاوي دة اللي مسبهاش لما بتطلع تتقصع بس من مقاعد المتفرجين.علي اي حال العجل وقع وكتر جزارينة وفي انتظار اكتمال القطعة الناقصة


خبر مفرح رقم 2
..السفاح الكخة اللي معور نص نسوان المعادي ورازع رئيس المباحث علي قفاة بشبشب زنوبة معتبرلم يتم القبض علية الي يومنا هذا ومازال اللغز واللسع علي القفا شغال الله ينور النتيجة المتوقعة ان الشرطة هاتمسك اي واحد مجنون ماشي في الشارع او يخطفو واحد من العباسية او من مرتادي الحسين وتلبسة القضية وتتأيف علي مقاس العبيط دة ونجد الظباط و امناء الشرطة بيجرو ورا اي واحد لابس جلابية مقطعة وديلها في سنانة وقالب كسرولة علي نافوخة
املين في حل القضية وتريح قفا الباشا المدير فانا و من مكاني هذا اوجة نداء لكل المتخلفين السارحين في شوارع المحروسة اجري يالا منك لة الحكومة جاية.

خبر مفرح رقم 3.
.التوربيني باشا اللي كاسر عين العيال الغلابة ومؤخرا كسر عين مديرية امن بحالهااتضح انة مجنون برضة ومختل عقليا وفي اوامر عليا بتلبيسة قضية المعادي كمان لو معرفوش يمسكو واحد مجنون علية القيمة و اهو يبقي عصفورين بحلة واحدة وكلنا وراك يا توربيني
free tourbini

خبر مفرح رقم 4..
اعلن الاسطي نظيف قائد الوزرا الرائد في مشروع القرية الذكية
و الحمار ابو بصمة الصوت و العجل البلو توث
تعيين 71 الف خريج و يتم تعينهم بعد استلام خطاب التعيين مباشرة
. الحد الادني لمرتبات الجامعيين 65 ملطوش مصري
.الحد الادني لمرتبات الجامعيين الدرجة السادسة 45 ملطوش مصري
الحد الادني لمرتبات الجامعيين الدرجة الرابعة 52 ملطوش مصري
اما بقية الموظفين علي درجات مختلفة يقلع ملط و يقف في ميدان رمسيس يعمل عجين الفلاحة ( و بما ان الموضوع فية عجين فاصبح الموظف يتبع وزارة
التموين و هو يعمل بالفعل في احد الوزارارت الاخري فيتم تطبيق قانون جمع بين وظيفتين و عقوبة ما بين 10000 جنية غرامة وحبس الموظف و ابوة و امة سنتين.
خبر بس قريتة في الجمهورية و من ساعتها و انا مش عارف امسك حاجة الخبر بيقول:القرية الذكية توفر 50 الف فرصة عمل

ويتراوح راتب الفرد السنوي و الذي يعمل في ال
call center
من
30
الي
40
الف دولار اخضر
اموت و اعرف ابن الكلب دة بيعمل اية و انا اتعلمة


خبر مفرح رقم 5..
سمالتوفيتش ثري روسي تقدر ثروتة بالزليار شركاتة تعمل في صناعة المطاط و الخمور و البلاستك و منذ فترة قريبة قام بشراء احدي شركات صناعة
السيجار الكوبي الذي يقال انة يتم لف ورق السيجار يدويا علي اوراك الفتيات العذاري الكوبيات ارخص سعر للسيجار 45 دولار مع نكهة العنب و البرقوق المفرح في الامر ان في مباحثات لتصدير هذا النوع من السيجار الي مصر
احمدك يا رب قبل ما اموت هاشرب
سجاير بريحة الرجلين انا هاعيط من الفرحة حد يناولني شراب بني يا اخوانا .

خبر مفرح رقم 6.
عارفين الميكروباصات الفولكس المنتشرة في شارع الهرم و فيصل البيضة دياكتشفت بالصدفة انها تعود لايام هتلر يعني من التلاتينات وتقريبا دي كانت مخصصة لنقل كتائب الجيش الالماني من و الي العلمين.
بلدنا يا اخوانا متحف حربي وفية بني ادمين
بعد كدة الواحد يلبس خوذة فوق دماغة ومسدس مية تحت باطة وهو ماشي في الشارع

خبر مفرح رقم 7
علي برنامج العاشرة مساأ بيقولك اية جامعة الاسكندرية العريقة الموجودة بالشاطبي هاتتهد وتتعمل جراج لمكتبة الاسكندرية
حتي يستطيع الزوار الاجانب ركن عربياتهم و كلابهم بجوار المكتبة
والجامعة بالطلبة هايروحو مقر جديد في اول الطريق الزراعي وسط البرسيم و الشمس و الوجة الحسن

خبر مفرح رقم 8
بيقولك اية يا سيدي راجل اسمة ابراهيم بغدادي دة واحد من رجال الثورة الاوفياء بعد ما فاروق اتنفي برة مصر لايطاليا الراجل دة سافر وراة و قعد يجي 13 سنة بيشتغل جرسون في عدة مطاعم ومقاهي حتي التحق بالعمل بالمقهي المفضل لملك مصر السابق وقام بوضع سم لة في عصير البرتقال وقام بالتصال بصلاح نصر الغني عن التعريف وكانت بجانبة اعتماد خورشيد زوجة صلاح نصر وكان بالنص : الملك مات و انا راجع وعايز استريح
.ورجع بغداداي وبقي محافظ القاهرة .الكلام دة نقلا عن الاستاذ محمود فوزي وهو صحفي مخضرم من ايام الثورة والكلام لة ان عبد الحكيم عامر مات مسموم بنفس نوعية السم و ليس منتحرا مطلقا علي نفسة الرصاص.

خبر مفرح رقم 9
عبد الكريم بتاع حملة فري كريم اتهف حكم 4 سنين 3 بسبب ازدراء الدين الاسلامي و سنة لسب الرئيس
يعني بحسبة بسيطة سب الريئيس يوازي تلت العقيدة اذن من امن باللة ورسولة علية ان يؤمن بالرئيس

خبر مفرح رقم 10.
تحديث و تطوير مصيف جمصة مع عمل حفر علي الشاطي لتسقيع البطيخ فتم اضافة عدد اتنين حفرة لكل عائلة و يمكن استخدام حفرة
منهم كمرحاض عام حفاظا علي المنظر العام لمدينة جمصة المكرمة

اخيرا و ليس اخرا سوف يتم الغاء قانون الطواريء فا الي كل من اسمة طارق ... ارجع يا طارق بلدك سامحتك وهات معاك علبة كوفرتينا

Saturday, February 24, 2007

شجرة حبنا









في منكم سمع عن شجرة العاشر في طريق مصر الاسماعيلية
التي ظهر عليها اسم الله وطة
وبدأت اعداد الحجاج في التوافد لرؤية الشجرة المباركة
وهم علي تمام اقتناع من الامر و الادهي ان المقتنعين غالبيتهم متعلمين ودكاترة ومهندسين كمبيوتر وغيرة
المهم قررت اني اروح اشوف اية الحكاية دي وفجئت عند وصلي بالقرب من السندباد ان المنطقة مقفولة تماما
ولا امل للعبور قبل ساعة علي الاقل الكلام دة 2 فجرا
المهم لفيت ورجعت وقعدت علي اقرب قهوة ورزعت حجر معسل تفاح






تعالو بقي نشوف التقرير دة مع بعض








امرت نيابة النزهة بالقاهرة والتي تقع الشجرة في المنطقة التابعة
لها بطريق الإسماعيلية الصحراوي بانتداب أحد المتخصصين من كلية الزراعة بجامعة عين
شمس لتحديد ما إذا كانت كلمات ‏"الله ـ محمد ـ طه‏" التي ظهرت علي جذع شجرة كافور
بطريق القاهرة الإسماعيلية الصحراوي من فعل الطبيعة أم من تدخل بشري‏.‏وبعد فحصها
أكد بيان اللجنة العلمية برئاسة د. عبدالعزيز حسني أستاذ النباتات بزراعة عين شمس
أنها ليست مباركة والكتابات التي ظهرت عليها مفبركة وتم حفرها بفعل فاعل وليست من
مظاهر الإعجاز الإلهي. وأضاف البيان أن العلامة الموجودة عليها جاءت نتيجة لجرح
بالجذع وبمرور الوقت تحول لون الجرح إلي البني، ولا يتجاوز عمر هذه العلامة 6 شهور
ولا تشكل ظاهرة طبيعية.وقام عادل البكباشي مدير نيابة النزهة برفع تقرير إلي د.
عبدالعظيم وزير المحافظات لاتخاذ ما يلزم بشأن الشجرة. ومع أن الأجهزة المعنية في
مصر حرصت عبر محطات التليفزيون والصحف على اذاعة بيان اللجنة العلمية، إلا أن تدافع
الناس نحو المكان الذي توجد فيه الشجرة بالقرب من معسكر قوات الأمن المركزي وموقف
للحافلات، يزداد كثافة يوما إثر يوم مما أدى إلى تعطل المرور في الطريق الصحراوي
المؤدي من القاهرة إلى الاسماعيلية، ووجد رجال الشرطة الذين هرعوا إلى هناك بكثافة
صعوبة بالغة في فض هذه الجموع وتسهيل حركة السير.






الي هنا و انتهي التقرير ربما يكون صحيح وربما يكون متفبرك من قبل الحكومة لتلافي حدوث فتن طائفية من وجهة نظر الحكومة علي اي حال دي مش مشكلتنا لكن علي المسلمين ممن لديهم بقايا عقل انهم يشغلوة شوية دي غسالة بيتهم بتشتغل اكتر منة
الشجرة التي كانت موجودة أيام الرسول صلى الله عليه وسلم وتمت تحتها بيعة الشجرة، وأمر عمر بن الخطاب بقطعها حتى لا يفتن الناس بها
هل الاسلام مازال في حاجة لمعجزات تدعمة؟؟
هل في حاجة لشجر وطمام وقشر بطيخ وديل سمكة للتاكيد علي وجود الخالق النقطة التانية هل تعتقدو ان مثل هذة الاشياء ستدفع غير المسلمين الي اعتناق الاسلام؟؟
يا عزيزي فالنصاري هم كمان لديهم معجزات التجلي و الظهور للعذراء فوق احدي الكنائس و الناس بقت تروح مسيحين و مسلمين واخدين عيالهم الجربانة علي امل شفائهم واللي واخدة غيار داخلي لجوزها علي امل فك عقدتة و ايامهم تبقي كلها سعادة وخميس
والواقعة دي حقيقي
ة الناس بقت بتحاول تتشعبط في اي حاجة ترمي عليها حلول مشاكلها
فاذا ظهر زعزوع قصب علية كلمات اقرب للشخبطة اتجة الناس الية افواجا حاملين كوبايات املين في الحصول علي بعض العصير المقدس واذا ظهرت شجرة بتنور بلليل حج الناس اليها كل امل يحك جتتة في جذع الشجرة جايز ربنا يشفية من الجرب والتانية عايز حب الشباب اللي في وش بنتها يروح وتجوزها والتالت عايز يبقي صاحب شركة وهو خريج حضانة تجريبي والامثلة لا تنتهي .
وجايز يكون الكتابة من فعل بعض اصحاب الاكشاك وبتوع الشاي والحلاقين اللي منتشرين علي الرصيف في المنطقة دي
محاولا جذب السياح للمنطقة المباركة والرزق يحب الخفية
نسأل الله الهداية والرشاد وكفاية كدة علشان عرتونا جتكو نيلة مليتو البلد

الا بالحق هي دي شجرة لارنج علشان لو كدة المدام عايزة بطرمان
كان معكم جعان بو العافية من امام حجر معسل تفاح مساكن شيراتون القاهرة

Thursday, February 22, 2007

شكر و تقدير

اعزائي المدونين و المدونات الاحياء منكم و الاموات
عندي لكم بشرة وخصوصا لمشتركي شركة حودا فون لخدمات المحمول
في موضوعي السابق فلانطيني ولا تغديني طلب مني الاخ عبد الله مفتاح صاحب مدونة وورد كي اضافتة علي المزنجر لانة محتاجني في موضوع صغير
وبعد ان اضفتة ارسل لي رقم هاتفة لكي نتحدث
قلت ومالة برضة معرفة الناس كنوز
لحد هنا تمام و مفيش مشاكل
الي ان تم بينا محادثة هاتفية وملخصها كالاتي:
ان الاستاذ عبد الله يعمل في خدمة العملاء في شركة محمول وان هو بيتصل بي بشكل ودي وركزو معايا في حكاية ودي دي
علشان يعرف اية سبب وضعي لصورة تمثل علامة الشركة اللي شغال فيها من وجهة نظرة
وكتابة عبارة اكبر نصبة محمول في مصر
وانة مستاء جدا من ذلك وسبب استياءة انة ينتمي لهذة الشركة قلبا وقالبا وانة وجودة الصورة دي سبب لة ازمة نفسية اطارت النوم من عينية
وأرقت مضجعة وبقي مش عارف يشتغل مش عارف ياكل مش عارف يعمل اي حاجة
لوجود هذة الصورة في مدونتي وليعبر عن مدي انتماءة قص علي قصة ظريفة مفادها انة رفض ان يترك عملة في شركتة والانتقال لشركة المحمول التالتة بالرغم ان المرتب اربع اضعاف الحالي
وذلك لانتمائة الشديد لشركتة
وان احية علي انتمائة فعلا
و اتمني ان الناس يكون عندها ربع الانتماء دة لبلدها
المهم وطلب مني بمنتهي الجدية اني اشيل الصورة من مدونتي
و المقابل انة سوف يقوم بحل مشاكلي مهما كانت مدام العيب ليس في الشبكة
بل و انة سيقوم بتقديم اي مساعدة لكل من يهمني امرهم
ولهذا يا اخوانا كل واحد مدون من مشتركي هذة الشبكة عندة مشكلة يستطيع الاتصال بعزبزنا الاخ عبدالله
علي الايميل دة
ولو المشكلة عويصة ممكن يتواصل معايا و انا ابلغ الاخ عبدلله شخصيا بالمشكلة
و ان شاء الله هايحلها كما وعد
وانا من موقفي هذا اعد بوضع صورة اخري لشركة ام نبيل لخدمات المحلول
واناشد اي مسؤل بها الاتصال بي لحل مشاكل العملا بشكل ودي
هذا وبالله التوفيق
اكتر حاجة بسطاني ان المكالمة استمرت 42 دقيقة و علي حساب الشركة
اخيرا دفعتهم حاجة

Tuesday, February 13, 2007

فالانطيني و لا تغديني



موضوع قديم اتذكرة كلما جاء يوم فالانطين


اتفق النصاري و اليهود و السنة و الشيعة و المجوس و ولاد الملحوس حتي عبدة الجاموس

علي الاحتفال و الانهبال بعيد المأسوف علي شباب امة فالانتين ابن حمدية راعي الكنيسة الانجيلية

الموضوع و ما فية ان في عهد الامبراطورية الرومانية كان يوم 14 فبراير اساسا يوم لتكريم الة روماني يدعي جونوو الاخ جونو دة هو نتاية الة نتاية تعتبر ملكة الالهة للجماعة الرومان

وساعات كانو بيعبدوها علي اساس انها الة الحب و الجواز يعني حسب التساهيل المهم جة الامبراطور المفتري كلوديوس و راح رازع الجماعة الرومان قانون و لا قانون الطواريء ان كل فحل روماني تجاوز ال 18 سنة يتسحب من قفاة علي الجيش و مفيش جواز مفيش

عيال مفيش حاجة خالص و تم تنفيذ القانون بالقوة فا اللي كان يعصلج يتهبد صندل روماني علي قفاة ما يفوقش الا و هو في ارض المعركة واحد روماني معجباني و لا خواجة فرنساوي حمش و لا جدع من مركز طما ادلق لشوشتة في حب بت رومانية من اسبرطة حركة و لونة و لا البت عزيزة بتاعة الجرايد في حكايات عمنا محمود السعدني

و الواد يا عين امة نار الحب مبهدلاة لا نافع معاة بنادول ولا حتي سافلون راح للبابا القديس فالانطينيوس و اقولة يا بابا بحبها و عايز اجوزها جابهوم العم فالانطينو قالة قلها زوجيني نفسك و قوليلة زوجتك نفسي اخبط العروسة علي دماغها بالقلة مبروك يمكنك تقبيل العروس ....و ايدك علي 200 حتة برونز قسطنطيني اجرة الكهارب و الفراشة .

اضطر في اخر الامر بابعادهم عن بعض بالقوة نظرا لتطور القبلة الي ان العريس بدا يفك الحزام

الي هنا و كلة تمام الي ان تم كشف المستور و البت حملت و الواد خلع و بعد اول قلم جة اسم فالانطين في التحقيق و تم اصدار قرار باعدامة جلوسا علي الخازوق

و في نهار تنفيذ الحكم تجمع كل الشباب الذي قام بتزويجهم يهتفون بحياتة (فالانطين وليس الخازوق) و هووووووووووب اتزفلط .

الكلام دة يجي من سنة 269 ميلادية و مازال الي يومنا هذا يكع الرجال المطحونين الشقيانين هدايا حار و نار في جتة فالانطين فمنا من تستيقظ رفيقتة فان لم تجد ورد احمر (لازم احمر اي لون تاني روح نام عند امك)فاذا لم تجد ورد احمر كانت ليلة ابوة طين و اذا زاد الطين بلة و لم يحضر دبدوب بفيونكة فاللجوء السياسي الي جزر تسونامي هو المفر الوحيد .

تلاقي الراجل من دول شنبة يقف علية كلب بلدي ووزة فيومي

وحاطط تحت باطة دبدوب وارنوب وراجع بيهم للمدام

ولم يكفنا احتفال الخواجات بالفالانطيز في فبراير ومن باب محدش احسن من حد
قرر المصريين الاحتفال بة في نوفمبر وهناك طلب احاطة في مجلس الشعب ان اليوم دة يبقي اجازة اسوة ب 7 يناير

الا لعنة الله علي الظالمين الا لعنة الله علي الظالمين الي جحيم الخلد يا فالانطين انت اللي مرمطت الرجالة

يسر محلات زكي و زكي ان تهنيء الامة الاسلامية بعيد فالانطين المجيد و تعلن انة تم توفير خوازيق حمراء و اخري صفراء لمحبي التغير يوجد لف فيونكات

Wednesday, February 07, 2007

استراحة

اجازة قصيرة واعود
حتي يكتب الله الشفاء للست الوالدة
اسألكم الدعاء لها
لقد اجرت اليوم جراحة في الغدة النخامية
و الحمدلله افاقت وتحدثت معنا بشكل طبيعي
ولم تحدث اي مضاعفات التي كان من المتوقع حدوثها في مثل هذة الجراحات
استريحتو مني فترة مش بطالة طبعا
خمسة وراجعلكو علي الفلانطين :)
وشكرا لكل من دعا لامي وكل من سأل عليها هنا او عن طريق الايميل

Friday, February 02, 2007

إن جالك التاج حط مدونتك تحت رجليك

نزولا علي ضغط الجماهير اللي
رزعوني تاج معتبر
دة انا فوجئت ان عدد كبير من  الاعزاء  ممرنلي التاجات دي
انا فعلا شكلي بيشجع اني انضرب بالتاج
وهو ذكر خمس اشياء لا يعرفها احد عني.
الاول:
انا بكرة السبانخ عماااااااااا
ادبحني ولا تاكلنيش سبانخ ودايما اتظاهر اني مليش مزاج ليها او معلش اصل لسة متغدي في البيت اذا كنت في زيارة لحد
واكثر المواقف ارتباطا بالسبانخ سنة 99 كنت في المانيا المهم و بعد لف طول اليوم و كان مضيفنا الاستاذ احمد بركات و هو صحفي
عزمنا علي الغدا و قالنا ملكوش دعوة انا النهاردة هاكلكو اكل مصري اصيل
ودخلنا مطعم و فضل يرطن بالالماني مع الواد الجرسون يجي نص ساعة
ولما سألتة انت قلتلة اية كان ردو ملكش دعوة اصبر لما الاكل يجي
وفترة و لقيت طبق وضع امامي بة نبات شيطاني وحولة بقايا طائر
اية دة يا ابو حميد ...؟ دي سبانخ بالبط يا ريس كل و ادعيلي
طبعا اسمعتة من المنقي يا سبانخ و قلتلة اكلة مصرية صميمة و نيلة اية يا شيخ
هو في حاجة اسمها سبانخ بالبط يا ضلالي و شعبية في مصر كمان
هي الناس لاقية تاكل برسيم لما تاكل السبانخ بالبط.
جايز دي اخر مرة كنت بهذا القرب من طبق سبانخ
التاني:
انا مبحبش العيال الصغيرة نهاااااااااائي
مهما كانو لذاذ و دمهم خفيف ولا اطيق سماع صراخهم ولا التواجد بالقرب منهم ولا عندي خلق العب معاهم نوهائي
لكن سبحان الله طفلتي فقط التي من صلبي هي الكائن الوحيد في العالم الذي استطيح احتمالة الي الابد
و اللعب و التغير لها البمبرز واشيلها و افضل رايح جاي بيها لحد ما تسكت .
بل في بعض الاوقات اسمح لها بالجلوس في حجرة مكتبي و اللعب فيها
و هو امر لو تعلمون عظيم
الثالث:
كنت في مقتبل شبابي مغتر بصحتي و طول و عرضي كنت اذا اخدت دش خرجت لافف الفوطة حول نصفي السفلي فقط و منطلقا في البيت
و اخرج و اقف في البلكونة مستعرضا الباي و التراي و المجانص و اولع سجارة و اعاكس بنت الجيران
وكان حتما ولا بد اصاب بالبرد ما لا يقل عن 3 او 4 مرات في الشتا و يقلب بنزلة شعبية.
كنت اذا مشيت في الشارع وشفت خناقة تطوعت بالضرب و التطويح يمين وشمال
في احدي المرات و في شارع بيتنا لقيت واحد نازل من عربية بها فتاة و نزل ضرب في واحد تاني
ضرب افترا يعني و التاني مش حاطط منطق عمال يضرب و يرجع لورا
خدتني انا الشجاعة و كرم العرب و روحت ماسك الواد ورازعة علقة موالد و اكتشفت في النهاية ان المضروب الاول كان بعاكس البنت في العربية اللي هي اخت الواد اللي انا ضربتة.
دة ايام الشباب دلوقتي كوباية ينسون بالعسل الصبح و دوا القولولن و فيتامين سي فوار سندوتش جبنة بالقوطة وبعديها كباية شاي بلبن
وقميص و جاكيت و تحتيهم فانلة
وكفي الله المؤمنين شر القتال
رابعا :
احب البياض في الستات يعني عند الجواز لازم تكون بيضة قشطة
السمر ممكن يكونو زمايل في عمل اصدقاء او اي حاجة لكن ارتباط عاطفي حتما ولابد تكون كما اللبن الحليب
مع العلم ان انا اسمر جايز عقدة مركب نقص تعويض سمها كما تريد لكن القلب و ما يريد.
خامسا:
خامسا دي بقي صعب اقولها في شباب صغير هنا :)
احب اهدي التاج دة
والعمة و الخالة وولادهم في الاسكندرية وطنط وتيزة و ابلة بالعصافرة

Sunday, January 28, 2007

مدد يا قامشلي مدد

اعزائي الانترنتاويين و البلوجراويين
اولا عذرا لغيابي الفترة الماضية ولكني كنت خارج القطر المصري لكن في حدود الوطن العربي
لذا فهذة المقالة سوف تكون عن رحلتي الاخيرة الي دولة عربية لم اتخيل انها سوف تكون بهذا الشكل و الجمال

فقد زرت العديد من دول الخليج وكثيرا ما لفت انتباهي التطور الحضاري و التكنولوجي و الاختلاف الشديد عن مصر
اما هذة المرة فلم اشعر بغربة ابدا لما اشعر اني تركت مصر
تخيلو معي مصر و بها ربع عدد سكانها وربما اقل
تخيلو مصر بلا ضوضاء بلا زبالة مالية الشوارع ناس غاية في الادب و الكرم و البشاشة الدائمة

جو نقي خضرة اينما ذهبت
الدولة التي اقصدها هي سوريا و تعريف صغير عنها


موقعها الاستراتيجي الجغرافي خطير جدا فمن الناحية التجارية فهي ملتقى القارات الثلاث (آسيا - أوربا - أفريقيا) وتتوسط المراكز الصناعية والتجارية الرئيسية في أوربا ومراكز إنتاج النفط في منطقة الخليج العربي.
وتم اعلان استقلالها عن فرنسا 17 ابريل 1946
عدد سكانها 18 مليون

يعني حوالي تقاطعين في شبرا

فا اللي بيدخن يطفي السيجارة و اللي بيضرب مخدرات يبطل يلف الجوين وربط الاحزمة

الغرض من السفرية دي كان لاجل تنفيذ بعض الاعمال لجامعة المأمون الدولية في سوريا
و هي جمعة خاصة زي جامعة 6 اكتوبر و مصر الدولية وغيرها في مصر
الرحلة كانت تضم اتنين انا و صديقي الدكتور احمد وهو دكتور بشري بعد ان ضل طريقة 7 سنوات في كلية الطب اكتشف ان مكانة في مجال الكمبيوتر فاخدها من قاصرها و علق الشهادة علي الحيطة
وهو حاليا من القلائل الدارسين في امريكا لغات برمجة و استطاع في زمن قصير ان يصبح مدير مشاريع باحد الشركات الملتي ناشيونال الموجودة في مصر
المهم بما اني معروف عني لحسة النافوخ و الذاكرة البدنجان كنت امل ان احمد هو من يكون منبهي طوال الرحلة
يعني متنساش شنطة اللاب توب خد الباسبور بتاعك متنسهوش
انت اخدت كارت الفيزا و لا سبتة في المكنة
لكن ما حدث كان عكس كدة تماما .
كانت البداية في مطار القاهرة الطيارة الساعة 6,30 مساءا
لقيت الاستاذ داخلي 5 الا تلت قلت ما علينا بدأنا نحط الشنط علي الوزن و الباسبورتات
وااااااااااااااااااع دة صوت من احمد
خير يا ابني في اية..؟؟ انا انا نسيت تصريح السفر بتاعي
انا بكل هدوء .نسيتة فين يا احمد....... نسيتة في الدولاب
فنظرت الي الموظف المسؤل عن ادخال الحقائب للطيارة
نزل الشنط شكلنا هنتتأخر شوية
المهم الراجل بصلنا يا اخوانا الطيارة فاضل عليا اقل من ساعة ونصف اللي ورقة جاهز يسافر و التاني يحصلة بعدين مفيهاش مجاملة
بصيت لاحمد نظرة غاية في التعبير و الوطنية و الشجاعة
لا يا احمد انا هاستني يا نسافر كلنا يا منسافرش
المهم كلم اي حد يا احمد ابوك ولا اخوك يروح يجيبلك التصريح
المهم المبايل اللي معاة من نوع ال imate ضرب فجأة ومسح الذاكرة ومش راضي يشتغل
خد يا احمد تلفوني اتكلم في بيتها يعني
المهم بعد عني شوية و فضل يكلم يجي 10 دقايق و عمال يشوح بايدة
المهم رجع معلش اصل مفتاح البيت مع مراتي ومراتي عند اهلها ف بابا هايروح يعدي عليها وياخد المفتاح
ويرجع علي البيت ويجيب التصريح و يجيلي علي المطار
بصيت لاحمد وبصيت للراجل علي محطة الوزن
.. دخل الشنطة بتاعتي يا هندزة وهو يحصلني بري حتي ويركب البولمان
وقرنت القول بالفعل و دلخت الشنط لكن انتهي الامر علي خير وحضر اخوة بتصريح السفر
ودخلنا علي الجوازات ولنا هنا وقفة اخري
الظابط في الجوازات متحدثا الي زميلي
سيادتك رايح سوريا لية..؟
شغل يا باشا
شغل اية..؟
تبع جامعة هناك..؟؟
جبت تصريح امن الدولة تصريح لية يا فندم هو احنا رايحين اسرائيل دي سوريا
ايوة ما هو سوريا و لبنان و العراق دلوقتي مناطق توتر ولازم تصريح من امن الدولة علشان المجاهدين اللي بيروحو مع نفسهم
المهم يمين شمال اقنعناة اننا ملناش في السياسة و لا اي تنظيم غير النايل تي في ورايحين شغل وسبوبة ونعاكس بنات
ومر الامر علي خير واستقر بنا الامر في الطائرة
استراحة اولي
واستغرقت الرحلة حوالي اقل من ساعة ونص
المهم وصلنا مطار دمشق
وكان في انتظارنا داخل المطار استاذ عماد مدير محطة مصر الطيران في دمشق
وقام بتسهيل انهاء اجراءات الوصول في دقائق مع نظرات قاتلة من الاخرين الملطوعين في الطابور
وكان في استقبالنا في الخارج محمد و بسام من جامعة المأمون
و اقلونا الي فندق سميراميس لوضع حقائبنا و تغير ملابسنا
علشان في اجتماع مع رئيس الجامعة بعد ساعة
وسريعا تم الامر و كنا في لاء الدكتور مأمون الحلاق رئيس وصاحب الجامعة و عدة مشاريع تعليمية اخري عملاقة في سوريا
و هو رجل يشد انتباهك من الوهلة الاولي
فهو غاية في التواضع فقد فضل ان يجلس بيننا في حجرة مكتبة لا علي كرسي المدير
و كان غاية في الترحيب و البشاشة للقائنا
و هو متحدث لبق واعي ذكي جدا
وهو بدايتة كانت في مجال الحلاقة و هو لا ينكر ذلك بل معتز جدا بما استطاع تحقيقة في اكثر من 40 عاما
حتي اصبح من الرواد في مجال التعليم الخاص في سوريا
المهم انتهي لقاء العمل
واصر محمد و بسام علي الذهاب لاكل الشاورمة بالرغم من انا و احمد هانموت و نام لكن ما ان سمعنا موضوع الشاورمة السوري و ما ادراكو ما الشاورمة السوري
حتي راح اي اثر للنوم و انطلقنا الي منطقة مشهورة بعمل الشاورمة
سيخ الشاورمة في حجم مصارع سومو محترم
فهناك نوع يطلق علية الجيمار و شرح اللحم
المهم انا و احمد انطلقنا كما تنطلق الخيل المراعي
فاكل و اكلنا وشرب وشربنا و سجاير وولعنا



(دة واحنا في انتظار الشاورمة)
مفيش للاسف صورة بعد الاكل محدش كان قادر يرفع الكاميرا
تمت عملية الشاورمة بسلام واتجهنا للفندق لنحصل علي بعض النوم لان هانركب طيارة تاني يوم الصبح الساعة 8 علشان نروح محافظة القامشلي و الساعة كانت 1 و نص
اتجهنا للفندق ومن اجل تسليتي نفسي لحد ما انام روحت متصل بصديقي في الغرفة المجاورة مقلدا اللهجة السورية طالبا منة احضار باسبورة الي الاستقبال لوجود مشكلة فية
وتركت دقيقتين لكن صعب عليا لاني متاكد انة غير هدومة و بيدور علي محفظتة وينزل تحت
واكيد الراجل هايقنعة انة متصلش بية
واحمد بطل العرب السابق في التايكوندو و الخامس علي العالم

فاعتقد ان الليلة كانت هاتنتهي بترحيلنا او رمينا باحد المعتقلات السورية




فاخدتها من قصرها و اخبرتة بالمقلب و ضحكنا ثم انقلبنا و نمنا
4 ساعات بس و صحينا تاني وروحنا علي المطار لركوب الطائرة المتجهة للقامشلي الموجود بها مقر الجامعة.


استراحة ثانية

في سوريا لا يعترفو ببوابات الامن الالكترونية فالكل هناك ياخذك بالاحضان ليس حبا و لكن لتفتيشك

فلما جة دوري في التفتيش وبدا الاخ في التخبيط علي ضهري و جوانب البدلة و كل ما يخبط يسمع حاجة دة بسام رئيس قسم الكمبيوتر

شو هاذا استاذي
.دة الموبايل
.شو هاذا استاذي
.دي الولاعة
.شو هاذا استاذي
.دي علبة السجاير
.شو هاذا استاذي
دي الفلاش ميموري
.شو هاذا استاذي
.دي سماعة الموبايل البلو توث
.شو هاذا استاذي
.دة usb converter
.شو هاذا استاذي
وطبعا قلعت الساعة و النضارة و الحزام ولولا ستر ربنا كنت قلعت البنطلون
لكن اهم حاجة اثناء العملية دي الموظف بيعاملك بمنتهي الاحترام و البشاشة و عمال يحكي علي مصر معايا
علي امل اني هاكون شايل في جيبي صورة لدينا الرقاصة مثلا
وطبعا احمد نسي الموبايل بتاعة فوق جهاز الاكس راي ومشي وانا عمال الم وراة
امهم ركبنا الطيارة

و الصراحة اول مرة في عمري اتخيل ان في طيارة كدة

فالبيجو ال7 راكب بلا اشك اريح و امن

اولا في بعض مقاعد الطيارة وشها في وش بعض
ويوجد ترابيزة خشب قابلة للثني بين المقاعد
ومتقدرش تسمع اللي قاعد جنبك بسبب دوشة الموتور غير الصهد الشنيع اللي خارج من جنب الكراسي الطيارة من برة غير جوة تماما
اخدت الرحلة حوالي ساعة واراد الله لنا الهبوط و اتجهنا مباشرة الي مبني الجامعة
استراحة تالتة

المهم المطار علي الجامعة واجتماع مع رئيس الجامعة و العمداء
وبعديها الغدا وكالعادة انواع اكل مألوفة للفم مجهولة للعقل لكنا لذيذة
فابطلت اسأل بقيت اكل و انا ساكت اتبعا للمثل القائل بلاش تفتش في لقمتك
و علي الساعة 6 رجعت للفندق و هو افخر فندق في منطقة القامشلي
فندق السفراء وهو نجمة و نص او نجمتين علي اقصي تقدير
الدش علي الواقف و الحجرة بالعافية واخداني انا و الشنطة
و القامشلي محافظة زراعية صغيرة جدا
وهي تشترك مع تركيا في الحدود يعني و احنا بنتحرك في المنطقة كانت اليفط لتركيا امامنا و العراق ايضا
و في دمشق او الشام كما يطلق عليها اهلها كانت اليفط لبيروت فهي لا تبعد مسيرة ساعة بالعربية
و في اليوم التالي عدت لدمشق
لان كان في شغل المهم خلصت وطلعت علي الغدا تاني
الغدا كان بيجي يجي 3 مرات في اليوم :)
وللاسف مكنش فعلا في وقت الواحد يتفسح
ولكن كرم الناس و اخلاقهم كانو كفاية
فسوريا نموذج للدولة الاشتراكية الناجحة الي حد من وجهة نظري
فهم في حالة مقاطعة تامة لكل ما هو امريكي
فسوريا لديها مخزون من القمح احتياطي لخمس اعوام قادمة و الناس مابتاكلش لا ماك و لا كنتاكي و هارديز
وصحتهم زي الفل
دة كلة مش مهم شوفت هناك شيء اسأل الله قبل ما اموت اشوفة في بلدنا
في سوريا طوائف عديدة
مسلمين سوريين و اكراد و عراقيين و فلسطنيين و سريان و نصاري و شيعة و سنة واسماعيلين ووهابيين وبهائيين
يعني جميع الملل و جميع الطوائف
لكن كل واحد في حالة متلقيش دة يشتم دة ولا دة بيكفر دة ولا حد بيتف علي حد و الناس في تفاهم ووئام
ودة نتيجة للقانون الغيرمعلن في سوريا ان محاولة اشعال اي فتنة طائفية عقوبتها الاعدام
المعارضة شيء لا يوجد هناك
منذ عدة اعوام كان هناك الاخوان المسلمين السوريين
وهم هناك عبارة عن مليشيات مسلحة
وكانت معركة حقيقية بينهم و بين الجيش بالاسلحة الخفيفة و انتهت بكسر شوكتهم و من يومها و المعارضة احلام
علي اي حال سوريا بلد جميل و شعب مضياف
لكن اسبوع والواحد برضة مصر بتوحشة و عايز يرجع ويرمي نفسة في حضن اول بتاع فول و طعمية ويبوس القدرة اللي واقف عليها
الدوشة و العربيات و الكلاكسات و الزبالة في الشوارع و الكبد الوبائي و الدم الملوث الاكل المسرطن و المية ام فشل كلوي
و جمال و علاء دول اتنين صحابي و ابوهم
بح خلاص نرجع بقي لقلة الادب :)