Sunday, January 28, 2007

مدد يا قامشلي مدد

اعزائي الانترنتاويين و البلوجراويين
اولا عذرا لغيابي الفترة الماضية ولكني كنت خارج القطر المصري لكن في حدود الوطن العربي
لذا فهذة المقالة سوف تكون عن رحلتي الاخيرة الي دولة عربية لم اتخيل انها سوف تكون بهذا الشكل و الجمال

فقد زرت العديد من دول الخليج وكثيرا ما لفت انتباهي التطور الحضاري و التكنولوجي و الاختلاف الشديد عن مصر
اما هذة المرة فلم اشعر بغربة ابدا لما اشعر اني تركت مصر
تخيلو معي مصر و بها ربع عدد سكانها وربما اقل
تخيلو مصر بلا ضوضاء بلا زبالة مالية الشوارع ناس غاية في الادب و الكرم و البشاشة الدائمة

جو نقي خضرة اينما ذهبت
الدولة التي اقصدها هي سوريا و تعريف صغير عنها


موقعها الاستراتيجي الجغرافي خطير جدا فمن الناحية التجارية فهي ملتقى القارات الثلاث (آسيا - أوربا - أفريقيا) وتتوسط المراكز الصناعية والتجارية الرئيسية في أوربا ومراكز إنتاج النفط في منطقة الخليج العربي.
وتم اعلان استقلالها عن فرنسا 17 ابريل 1946
عدد سكانها 18 مليون

يعني حوالي تقاطعين في شبرا

فا اللي بيدخن يطفي السيجارة و اللي بيضرب مخدرات يبطل يلف الجوين وربط الاحزمة

الغرض من السفرية دي كان لاجل تنفيذ بعض الاعمال لجامعة المأمون الدولية في سوريا
و هي جمعة خاصة زي جامعة 6 اكتوبر و مصر الدولية وغيرها في مصر
الرحلة كانت تضم اتنين انا و صديقي الدكتور احمد وهو دكتور بشري بعد ان ضل طريقة 7 سنوات في كلية الطب اكتشف ان مكانة في مجال الكمبيوتر فاخدها من قاصرها و علق الشهادة علي الحيطة
وهو حاليا من القلائل الدارسين في امريكا لغات برمجة و استطاع في زمن قصير ان يصبح مدير مشاريع باحد الشركات الملتي ناشيونال الموجودة في مصر
المهم بما اني معروف عني لحسة النافوخ و الذاكرة البدنجان كنت امل ان احمد هو من يكون منبهي طوال الرحلة
يعني متنساش شنطة اللاب توب خد الباسبور بتاعك متنسهوش
انت اخدت كارت الفيزا و لا سبتة في المكنة
لكن ما حدث كان عكس كدة تماما .
كانت البداية في مطار القاهرة الطيارة الساعة 6,30 مساءا
لقيت الاستاذ داخلي 5 الا تلت قلت ما علينا بدأنا نحط الشنط علي الوزن و الباسبورتات
وااااااااااااااااااع دة صوت من احمد
خير يا ابني في اية..؟؟ انا انا نسيت تصريح السفر بتاعي
انا بكل هدوء .نسيتة فين يا احمد....... نسيتة في الدولاب
فنظرت الي الموظف المسؤل عن ادخال الحقائب للطيارة
نزل الشنط شكلنا هنتتأخر شوية
المهم الراجل بصلنا يا اخوانا الطيارة فاضل عليا اقل من ساعة ونصف اللي ورقة جاهز يسافر و التاني يحصلة بعدين مفيهاش مجاملة
بصيت لاحمد نظرة غاية في التعبير و الوطنية و الشجاعة
لا يا احمد انا هاستني يا نسافر كلنا يا منسافرش
المهم كلم اي حد يا احمد ابوك ولا اخوك يروح يجيبلك التصريح
المهم المبايل اللي معاة من نوع ال imate ضرب فجأة ومسح الذاكرة ومش راضي يشتغل
خد يا احمد تلفوني اتكلم في بيتها يعني
المهم بعد عني شوية و فضل يكلم يجي 10 دقايق و عمال يشوح بايدة
المهم رجع معلش اصل مفتاح البيت مع مراتي ومراتي عند اهلها ف بابا هايروح يعدي عليها وياخد المفتاح
ويرجع علي البيت ويجيب التصريح و يجيلي علي المطار
بصيت لاحمد وبصيت للراجل علي محطة الوزن
.. دخل الشنطة بتاعتي يا هندزة وهو يحصلني بري حتي ويركب البولمان
وقرنت القول بالفعل و دلخت الشنط لكن انتهي الامر علي خير وحضر اخوة بتصريح السفر
ودخلنا علي الجوازات ولنا هنا وقفة اخري
الظابط في الجوازات متحدثا الي زميلي
سيادتك رايح سوريا لية..؟
شغل يا باشا
شغل اية..؟
تبع جامعة هناك..؟؟
جبت تصريح امن الدولة تصريح لية يا فندم هو احنا رايحين اسرائيل دي سوريا
ايوة ما هو سوريا و لبنان و العراق دلوقتي مناطق توتر ولازم تصريح من امن الدولة علشان المجاهدين اللي بيروحو مع نفسهم
المهم يمين شمال اقنعناة اننا ملناش في السياسة و لا اي تنظيم غير النايل تي في ورايحين شغل وسبوبة ونعاكس بنات
ومر الامر علي خير واستقر بنا الامر في الطائرة
استراحة اولي
واستغرقت الرحلة حوالي اقل من ساعة ونص
المهم وصلنا مطار دمشق
وكان في انتظارنا داخل المطار استاذ عماد مدير محطة مصر الطيران في دمشق
وقام بتسهيل انهاء اجراءات الوصول في دقائق مع نظرات قاتلة من الاخرين الملطوعين في الطابور
وكان في استقبالنا في الخارج محمد و بسام من جامعة المأمون
و اقلونا الي فندق سميراميس لوضع حقائبنا و تغير ملابسنا
علشان في اجتماع مع رئيس الجامعة بعد ساعة
وسريعا تم الامر و كنا في لاء الدكتور مأمون الحلاق رئيس وصاحب الجامعة و عدة مشاريع تعليمية اخري عملاقة في سوريا
و هو رجل يشد انتباهك من الوهلة الاولي
فهو غاية في التواضع فقد فضل ان يجلس بيننا في حجرة مكتبة لا علي كرسي المدير
و كان غاية في الترحيب و البشاشة للقائنا
و هو متحدث لبق واعي ذكي جدا
وهو بدايتة كانت في مجال الحلاقة و هو لا ينكر ذلك بل معتز جدا بما استطاع تحقيقة في اكثر من 40 عاما
حتي اصبح من الرواد في مجال التعليم الخاص في سوريا
المهم انتهي لقاء العمل
واصر محمد و بسام علي الذهاب لاكل الشاورمة بالرغم من انا و احمد هانموت و نام لكن ما ان سمعنا موضوع الشاورمة السوري و ما ادراكو ما الشاورمة السوري
حتي راح اي اثر للنوم و انطلقنا الي منطقة مشهورة بعمل الشاورمة
سيخ الشاورمة في حجم مصارع سومو محترم
فهناك نوع يطلق علية الجيمار و شرح اللحم
المهم انا و احمد انطلقنا كما تنطلق الخيل المراعي
فاكل و اكلنا وشرب وشربنا و سجاير وولعنا



(دة واحنا في انتظار الشاورمة)
مفيش للاسف صورة بعد الاكل محدش كان قادر يرفع الكاميرا
تمت عملية الشاورمة بسلام واتجهنا للفندق لنحصل علي بعض النوم لان هانركب طيارة تاني يوم الصبح الساعة 8 علشان نروح محافظة القامشلي و الساعة كانت 1 و نص
اتجهنا للفندق ومن اجل تسليتي نفسي لحد ما انام روحت متصل بصديقي في الغرفة المجاورة مقلدا اللهجة السورية طالبا منة احضار باسبورة الي الاستقبال لوجود مشكلة فية
وتركت دقيقتين لكن صعب عليا لاني متاكد انة غير هدومة و بيدور علي محفظتة وينزل تحت
واكيد الراجل هايقنعة انة متصلش بية
واحمد بطل العرب السابق في التايكوندو و الخامس علي العالم

فاعتقد ان الليلة كانت هاتنتهي بترحيلنا او رمينا باحد المعتقلات السورية




فاخدتها من قصرها و اخبرتة بالمقلب و ضحكنا ثم انقلبنا و نمنا
4 ساعات بس و صحينا تاني وروحنا علي المطار لركوب الطائرة المتجهة للقامشلي الموجود بها مقر الجامعة.


استراحة ثانية

في سوريا لا يعترفو ببوابات الامن الالكترونية فالكل هناك ياخذك بالاحضان ليس حبا و لكن لتفتيشك

فلما جة دوري في التفتيش وبدا الاخ في التخبيط علي ضهري و جوانب البدلة و كل ما يخبط يسمع حاجة دة بسام رئيس قسم الكمبيوتر

شو هاذا استاذي
.دة الموبايل
.شو هاذا استاذي
.دي الولاعة
.شو هاذا استاذي
.دي علبة السجاير
.شو هاذا استاذي
دي الفلاش ميموري
.شو هاذا استاذي
.دي سماعة الموبايل البلو توث
.شو هاذا استاذي
.دة usb converter
.شو هاذا استاذي
وطبعا قلعت الساعة و النضارة و الحزام ولولا ستر ربنا كنت قلعت البنطلون
لكن اهم حاجة اثناء العملية دي الموظف بيعاملك بمنتهي الاحترام و البشاشة و عمال يحكي علي مصر معايا
علي امل اني هاكون شايل في جيبي صورة لدينا الرقاصة مثلا
وطبعا احمد نسي الموبايل بتاعة فوق جهاز الاكس راي ومشي وانا عمال الم وراة
امهم ركبنا الطيارة

و الصراحة اول مرة في عمري اتخيل ان في طيارة كدة

فالبيجو ال7 راكب بلا اشك اريح و امن

اولا في بعض مقاعد الطيارة وشها في وش بعض
ويوجد ترابيزة خشب قابلة للثني بين المقاعد
ومتقدرش تسمع اللي قاعد جنبك بسبب دوشة الموتور غير الصهد الشنيع اللي خارج من جنب الكراسي الطيارة من برة غير جوة تماما
اخدت الرحلة حوالي ساعة واراد الله لنا الهبوط و اتجهنا مباشرة الي مبني الجامعة
استراحة تالتة

المهم المطار علي الجامعة واجتماع مع رئيس الجامعة و العمداء
وبعديها الغدا وكالعادة انواع اكل مألوفة للفم مجهولة للعقل لكنا لذيذة
فابطلت اسأل بقيت اكل و انا ساكت اتبعا للمثل القائل بلاش تفتش في لقمتك
و علي الساعة 6 رجعت للفندق و هو افخر فندق في منطقة القامشلي
فندق السفراء وهو نجمة و نص او نجمتين علي اقصي تقدير
الدش علي الواقف و الحجرة بالعافية واخداني انا و الشنطة
و القامشلي محافظة زراعية صغيرة جدا
وهي تشترك مع تركيا في الحدود يعني و احنا بنتحرك في المنطقة كانت اليفط لتركيا امامنا و العراق ايضا
و في دمشق او الشام كما يطلق عليها اهلها كانت اليفط لبيروت فهي لا تبعد مسيرة ساعة بالعربية
و في اليوم التالي عدت لدمشق
لان كان في شغل المهم خلصت وطلعت علي الغدا تاني
الغدا كان بيجي يجي 3 مرات في اليوم :)
وللاسف مكنش فعلا في وقت الواحد يتفسح
ولكن كرم الناس و اخلاقهم كانو كفاية
فسوريا نموذج للدولة الاشتراكية الناجحة الي حد من وجهة نظري
فهم في حالة مقاطعة تامة لكل ما هو امريكي
فسوريا لديها مخزون من القمح احتياطي لخمس اعوام قادمة و الناس مابتاكلش لا ماك و لا كنتاكي و هارديز
وصحتهم زي الفل
دة كلة مش مهم شوفت هناك شيء اسأل الله قبل ما اموت اشوفة في بلدنا
في سوريا طوائف عديدة
مسلمين سوريين و اكراد و عراقيين و فلسطنيين و سريان و نصاري و شيعة و سنة واسماعيلين ووهابيين وبهائيين
يعني جميع الملل و جميع الطوائف
لكن كل واحد في حالة متلقيش دة يشتم دة ولا دة بيكفر دة ولا حد بيتف علي حد و الناس في تفاهم ووئام
ودة نتيجة للقانون الغيرمعلن في سوريا ان محاولة اشعال اي فتنة طائفية عقوبتها الاعدام
المعارضة شيء لا يوجد هناك
منذ عدة اعوام كان هناك الاخوان المسلمين السوريين
وهم هناك عبارة عن مليشيات مسلحة
وكانت معركة حقيقية بينهم و بين الجيش بالاسلحة الخفيفة و انتهت بكسر شوكتهم و من يومها و المعارضة احلام
علي اي حال سوريا بلد جميل و شعب مضياف
لكن اسبوع والواحد برضة مصر بتوحشة و عايز يرجع ويرمي نفسة في حضن اول بتاع فول و طعمية ويبوس القدرة اللي واقف عليها
الدوشة و العربيات و الكلاكسات و الزبالة في الشوارع و الكبد الوبائي و الدم الملوث الاكل المسرطن و المية ام فشل كلوي
و جمال و علاء دول اتنين صحابي و ابوهم
بح خلاص نرجع بقي لقلة الادب :)

45 comments:

  1. انت فى سوريا
    انت لم تغادر مصر
    تحياتى

    ReplyDelete
  2. و اللة ليك وحشة كبيرة...ما تبقاش تغيب علينا كدة تاني و يا ريت تفتكرنا ببوست و لا اتنين و أنت في سوريا او غيرها

    ReplyDelete
  3. ياااااااااااااااه
    سيد الجعانين ..وراعي الفقرا واليتامى والمساكين
    الجعان اللي عمره ما كان شبعان

    يا مرحبا يا مرحبا
    ايه الحلاوة دي
    ايه الطعامة دي
    فينك يا ملك الجعانين
    ايه الغيبة الطويلة دي
    من ساعة بوست صدام
    لا حس ولا خبر

    ايوااا ياااااااااعم
    سوريا بقا
    ايه الحلاوة دي

    شكلك كده اتمزجت هناك وعملت دماغ
    اومال ايه
    سوريا يا عم
    انتا هتقولي
    سوريا اجدع ناس

    الف حمد لله على السلامة يا كبير
    مسبتليش حتة من الشاورما ليه ؟؟؟

    ربنا يوعدنا يارب بسفرية حلوة من دي

    اشطة يا معلم


    مين القامشلي ده ؟؟

    ReplyDelete
  4. adhm
    نمام كدة بس مصر في الاربعينات

    ReplyDelete
  5. michea
    يا فندم متشوفش وحش
    ما انا فاكركو اهو لا تكلك
    البوستات هاتأتي تباعا :)

    ReplyDelete
  6. واحـــد مـــــن الـنـــاس
    لازم تيجي بزفة :)
    انا راجع بقالي كام يوم
    ولسة باتعالج من الشاورمة و الجيمار و الكبة النية و الصاحية و الحلو و الحادق
    سوريا دي جنة الجعانين في الارض بلا شك
    يا اخي من ساعة ما رجعت و انا مش طايق ابص لمحل سوري
    مفيش مقارنة بين الاكل هناك و الاكل اللي بيقولة علية سوري و لبناني في مصر

    ReplyDelete
  7. رحلة طويلة عريضة مينوبناش منها غير صورة واحدة؟
    وكمان قبل أكل الشاورمة؟
    يا عمي الصورة شكلها على قهوة في الحسين وانت بتشتغلنا :P
    على أي حال حمداً لله على سلامتك وورينا بقية الاثباتات قصدي الصور :)

    ReplyDelete
  8. هاها حل اوى البوست ده
    على فكره انا مرات خالى سوريه بس اكلها موووووووووووووووت حلو طبعا

    ReplyDelete
  9. (جعاااااااان) زملينا العزيز ...

    ياااااااااه روحت سوريا يا بختك

    ربنا يكرمك يارب

    انا (نضدا)
    على فكرة وحشتنا يا جعان وربنا يكرمك يارب

    ومبروك سفرك لسوريا

    ومن فضلك جيب لنا سندويتشين (شاورما) معاك وانت راجع يا فندم

    ReplyDelete
  10. This comment has been removed by the author.

    ReplyDelete
  11. يابنى الحمد لله انك بخير . انا خفت ليكونوا طمعوا فى المدونة بتاعتك و طلبوا فدية فى المدونة ..(مش انت ) .. لك وحشة كبيرة

    ReplyDelete
  12. Ali Abu-Taleb
    علي باشا انت مستعجل علي رزقك لية
    كل المستندات هاتأتي تباعا
    و الشاورمة وراها تباعا برضة
    تابعونا

    ReplyDelete
  13. أروى الطويل
    منورة يا اروي
    كفاية انك من ريحة الحبايب :)

    ReplyDelete
  14. ندا هانم
    الشاورمة موجودة وكلة هاياكل
    انا اللي هاكل الشعب
    الواحد بيفكر يعمل شركة استيراد شاورمة
    وتصدير طحينة

    ReplyDelete
  15. رفقه عمر
    انتي بتقري علي يا جوجو
    و انا اقول مالي هفتان كدة

    سعدت بمرورك وروقي كدة :)
    واعانك الله هذة الايام

    ReplyDelete
  16. يا دكتور
    لا تكلك اخوك ورا مدونتة رجالة ياكلو الزلط
    وانا لن اكبل اقل من 50 كيلو كباب و كفتة و مشكلين كمان
    فدية لكل موضوع في المدونة

    ReplyDelete
  17. يا اسلام باشا لما تيجي تكلم ابتدي تدوينة جديدة ماتدوحنيش ادور على آخر جزء وصلت له و تكمل بعده
    هي ناقصة ذل هاتبقى انت و الدكاترة
    مستنية الباقي يافندم

    ReplyDelete
  18. لأ بقي دا إنت بتديني كدا علي قفايا إنت يا عم مش قلت إن آخر صورة دي بتاعتك و إنت في كوم لومبو لما كنتم رايحين تهربوا بانجو

    كده بانجو يا أبو ملك تشتغلني

    ReplyDelete
  19. اللي داك يدينا يا سيدي

    بس قولي بقه انتي مين في الاتنين :)) اصل لا يمكن تكون جعاااان و بكرش :) مش كده

    مفيش شويه صور لسوريا خالي الواحد يغير مناظر شويه هههه

    ReplyDelete
  20. This comment has been removed by the author.

    ReplyDelete
  21. كابتن كابتن هات حتة

    ReplyDelete
  22. دكتور نرمين
    يا مرحب يا مرحب
    و الله يا فندم الواحد بيتحسب علية التدوينة دلوقت
    فا انا بحاول اقتصد علي قد ما اقدر
    علي اي حال
    الجزء اللي جاي يكون الفينالا

    ReplyDelete
  23. انت كدة دايما يا عمدة مشردلي في كل حتة
    بالرغم اني ياما سترتك
    ولا ناسي المورفين اللي كنت بتقلبة من الصيدلية و تضربة انت و الدكاترة تحت كوبري فيصل

    ReplyDelete
  24. انت كدة دايما يا عمدة مشردلي في كل حتة
    بالرغم اني ياما سترتك
    ولا ناسي المورفين اللي كنت بتقلبة من الصيدلية و تضربة انت و الدكاترة تحت كوبري فيصل

    ReplyDelete
  25. الف حمدالله عالسلامه و بالمناسبه استاذى انا مررت لك تاج يا ريت ترد عليه فى مدونتك
    تحياتى

    ReplyDelete
  26. بص ياعم الحاج ..انا شايف انك راجل من الناس اللي عندهم لاب توب وموبايل بكاميرا و فلاشه كمان ..انا تعبت والله من التفكير انا هاطلع ايه هاطلع ايه ..ارجوك انصحني ابدأ منين؟ اخد لغات برمجه ولا برمجه لغات ولا ايه ..انا ضليت طريقي برضه 5 سنين في كلية تجاره يعني الضلال كله ..رد عليا الله يهديك

    ReplyDelete
  27. انا نفسي البس بدله رساسي زي بتاعت جورج قرداحي و كل يوم اسافر دوله "خليها محافظه مبدئيا"..و مش عارف اعمل ايه ..رسمت طلع الرسم حرام ..لعبت جيتار برضه طلع حرام..الكؤهل الحرام كله "بكالريوس تجاره"..ارجو نصيحتي لاكون مثلك ومثل صديقك المبرمج ..ابدأمنين؟؟

    ReplyDelete
  28. ايميلي الاكتروني اهو لو عايز تحسسني ان لسه في حد مع محدودي الدخل " فاهمني طبعا"...walid.ramadan@yahoo.com

    ReplyDelete
  29. Dr. Tantawy
    يا دكتور لا يعيب المرء ان كبر حجم كرشة
    ولكن يعيبة
    يعيبة

    يعيبة...

    هو اكيد في حاجة بتعيبة بس انا مش عارفها

    وياريت تحدد انهو صور لسوريا بالظبط

    ReplyDelete
  30. رفقه عمر
    التاج علينا حق
    و ان جالك التاج حط ابنك تحت رجليك

    ReplyDelete
  31. طيب كويس انها جت على الساعة والحزام وحتى لو جت على البنطلون متخافش دى سوريا مش مصر

    وبعدين مهما وصفت فى الطيارة مش هتكون أسوا من طيران الجزيرة أقصد طيران ميكروباصات الجزيرة

    ياريت تغير اسم المدونة من
    أنا جعان إلى
    أنا واكل شاورمة
    لووووول

    تحياتى

    ReplyDelete
  32. Ferekico
    معلش الموضوع للفرجة فقط

    ReplyDelete
  33. Moody
    الله يسلمك يا فندم
    و ان شاء الله ارد علي التاج
    انا عارف ان انا اللي جبتة لنفسي
    و علي راي المثل تاجين في الراس توجع

    ReplyDelete
  34. walid
    و الله يا اخي الحيرة اللي انت واقع فيها
    بيمر فيها الجميع و خصوصا جيلنا انا و انت و غيرنا
    ليس المجال لذكر اخر 7 سنوات في حياتي
    لكن والله ان الله لا يضيع اجر من احسن عملا
    اي حد يحسن عملا مسلم نصراني يهودي كافر حتي
    اعرف انت الاول بتفهم في اية او عندك قابلية لتعلم اية
    صعب اقولك ادخل مجال البرمجة او الجرافيك الاتنين مجالاتهم واسعة
    لكن احنا بلد شهادات
    ركز في الحتة دي ثم الخبرة العملية
    و توفيق الله
    ودعا الوالدين

    ReplyDelete
  35. اباصيري باشا
    انا لسة الحمدلله مشفتش طيران الجزيرة
    لكن شفت طيران الشروق
    حمام بلدي وراكبلة جناحين

    ReplyDelete
  36. This comment has been removed by the author.

    ReplyDelete
  37. This comment has been removed by the author.

    ReplyDelete
  38. This comment has been removed by the author.

    ReplyDelete
  39. الحمد لله ع السلامة ابو ملك
    انا اما رحت هناك لفت نظري حاجتين الاولى انك تمشي ف الشارع كده نفسك تلاقي واحدة ....واحدة بس مش حلوة
    عجوزة ..بنت...طفلة...مفيش
    كله حلو حلو حلو لدرجة تغيض
    والتانيه
    ركبت تكس اول ماعرف اني مصه قالي انتي من جماعة هريدي؟!!!
    اه وربنا
    نورت العلم التدويني ياجعجع الف سلامة يا امير يابن الامرا

    ReplyDelete
  40. السلااااام على اهل السلااام

    بجد بجد بجد راااائع .... حمدا لله على السلاااامة

    و بعدييييييين لا تقول سوريا و لا لبنااان ... هيا مصر و بس ... مصر ام الدنيا .... تحيا مصر و نمووت احنا هههههه

    انا بس ليا رجاء علشااان كان نفسى ادوق اكل اى اكل من البلاااد الشقيقة .... مافيش حد تعرفه بيعمل شاورمة من اللى كلتها زى شاورمة سوريا .... يا ريييييت العنوان

    تحياااتــــــــــى لكــ .....
    واحدة متابعة مواضيعك

    ReplyDelete
  41. رفقه عمر
    يا ستي قل لن يصيبنا الا ما كتب الله لنا
    علي رأي المثل
    دي قصة كفاح مش جاية علي المرتاح والله
    بس الواحد بيحب يتواضع :)

    ReplyDelete
  42. الشيماء
    ست الداكتورة يعني اية انتي من جماعة هريدي
    لايكون كان معانا في المصطبة
    وهريدي ممشية وراكي :)
    بس الصراحة معاكي حق
    النسوان هناك كما القشطة الصابحة

    ReplyDelete
  43. شوفي يا واحدة متابعة مواضيعي
    الشاورمة السوري صعب اوي تلاقي زيها في اي حتة لانها مش صناعة مصري
    لكن
    وعند لكن دي لينا وقفة
    في شاورمه z في ميدان التحرير
    دة من الرواد في الشاورمة

    في كمان واحة فرعون في شارع الهرم

    و في ملك السندوتش قدام مترو مصر الجديدة عند سينما نورماندي

    اي واحد من دول هايوفي بالغرض
    لو مشيتي قدام شوية في قهوة باكون قاعد عليها باحبس بحجر تفاح

    ReplyDelete
  44. لااااا انت عندك ذاكره انك تفكر صحبك بتهزر طبعا اشك

    ReplyDelete
  45. 情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣,情趣

    情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

    情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

    情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

    情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣用品,情趣用品,情趣用品.情趣,情趣,情趣,情趣,視訊聊天室

    麻將,台灣彩卷,六合彩開獎號碼,運動彩卷,六合彩,遊戲,線上遊戲,cs online,搓麻將,矽谷麻將,明星三缺一, 橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,電玩快打

    麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online

    ReplyDelete

بعبع وقول اللي في نفسك يا خويا