Tuesday, February 13, 2007

فالانطيني و لا تغديني



موضوع قديم اتذكرة كلما جاء يوم فالانطين


اتفق النصاري و اليهود و السنة و الشيعة و المجوس و ولاد الملحوس حتي عبدة الجاموس

علي الاحتفال و الانهبال بعيد المأسوف علي شباب امة فالانتين ابن حمدية راعي الكنيسة الانجيلية

الموضوع و ما فية ان في عهد الامبراطورية الرومانية كان يوم 14 فبراير اساسا يوم لتكريم الة روماني يدعي جونوو الاخ جونو دة هو نتاية الة نتاية تعتبر ملكة الالهة للجماعة الرومان

وساعات كانو بيعبدوها علي اساس انها الة الحب و الجواز يعني حسب التساهيل المهم جة الامبراطور المفتري كلوديوس و راح رازع الجماعة الرومان قانون و لا قانون الطواريء ان كل فحل روماني تجاوز ال 18 سنة يتسحب من قفاة علي الجيش و مفيش جواز مفيش

عيال مفيش حاجة خالص و تم تنفيذ القانون بالقوة فا اللي كان يعصلج يتهبد صندل روماني علي قفاة ما يفوقش الا و هو في ارض المعركة واحد روماني معجباني و لا خواجة فرنساوي حمش و لا جدع من مركز طما ادلق لشوشتة في حب بت رومانية من اسبرطة حركة و لونة و لا البت عزيزة بتاعة الجرايد في حكايات عمنا محمود السعدني

و الواد يا عين امة نار الحب مبهدلاة لا نافع معاة بنادول ولا حتي سافلون راح للبابا القديس فالانطينيوس و اقولة يا بابا بحبها و عايز اجوزها جابهوم العم فالانطينو قالة قلها زوجيني نفسك و قوليلة زوجتك نفسي اخبط العروسة علي دماغها بالقلة مبروك يمكنك تقبيل العروس ....و ايدك علي 200 حتة برونز قسطنطيني اجرة الكهارب و الفراشة .

اضطر في اخر الامر بابعادهم عن بعض بالقوة نظرا لتطور القبلة الي ان العريس بدا يفك الحزام

الي هنا و كلة تمام الي ان تم كشف المستور و البت حملت و الواد خلع و بعد اول قلم جة اسم فالانطين في التحقيق و تم اصدار قرار باعدامة جلوسا علي الخازوق

و في نهار تنفيذ الحكم تجمع كل الشباب الذي قام بتزويجهم يهتفون بحياتة (فالانطين وليس الخازوق) و هووووووووووب اتزفلط .

الكلام دة يجي من سنة 269 ميلادية و مازال الي يومنا هذا يكع الرجال المطحونين الشقيانين هدايا حار و نار في جتة فالانطين فمنا من تستيقظ رفيقتة فان لم تجد ورد احمر (لازم احمر اي لون تاني روح نام عند امك)فاذا لم تجد ورد احمر كانت ليلة ابوة طين و اذا زاد الطين بلة و لم يحضر دبدوب بفيونكة فاللجوء السياسي الي جزر تسونامي هو المفر الوحيد .

تلاقي الراجل من دول شنبة يقف علية كلب بلدي ووزة فيومي

وحاطط تحت باطة دبدوب وارنوب وراجع بيهم للمدام

ولم يكفنا احتفال الخواجات بالفالانطيز في فبراير ومن باب محدش احسن من حد
قرر المصريين الاحتفال بة في نوفمبر وهناك طلب احاطة في مجلس الشعب ان اليوم دة يبقي اجازة اسوة ب 7 يناير

الا لعنة الله علي الظالمين الا لعنة الله علي الظالمين الي جحيم الخلد يا فالانطين انت اللي مرمطت الرجالة

يسر محلات زكي و زكي ان تهنيء الامة الاسلامية بعيد فالانطين المجيد و تعلن انة تم توفير خوازيق حمراء و اخري صفراء لمحبي التغير يوجد لف فيونكات

46 comments:

  1. معتقدش انه بعد ماالراجل يطلعله مقشات(قصدي شنبات)طول كده(يعني اتجوز) انه هيكون لسه بيفكر يجيب هديه للمدام ولو حتى كانت فينكه الدبدوب بس او حتي هي هتكون لسه مستنيه هديه منه لانها هيكون كل همها لفه اللحمه او شويه الخضار الي داخل بيهم صح ولا لا
    واعتقد ان اخر فلنتين بيحتفل بيه الراجل او الست بيبقي الي قبل ميشرف ولي العهد الاول ولو مدت معاهم شويه بيبقي لحاد ميكمل سنه
    شكرا ع الموضوع وكتابتك تحفه
    ومستنيا زيارتك لمدونتي وهي
    ttp:\\nourinour.blogspot.com

    ReplyDelete
  2. يخرب عقلك

    !!

    خليتني اسخسخ
    !!


    وربنا يهدي شباب الامة لحسن اتباع النبي الكريم .. وترك طرق الملاعين التانيين

    اوعي تكون اشتريت دبدوب !

    ReplyDelete
  3. رفقه عمر
    نورتي يا فندم
    يا فندم مفيش حاجة اسمها حد بيضحك علي حد
    الناس هي اللي بتحب تستعبط روحها
    نموت في تقليد الغرب و اقطع دراعي من لغلوغة ان غالبية اللي بيحتفلو بالفلانطين ميعرفوش الفرق بين الارنب وسيد قشطة

    .. تم تسمية مجموعة الزلازل التي اصابت الجزر باسم تسونامي وهو اسم الجزر الاصلي

    ReplyDelete
  4. Anonymous

    يا فندم بيكون شنباتة طالعة وواقف عليها عيالهم كمان
    ونازل يجيب هدية الفلانطين
    والا اعتبر زنديق و مرتد ويقام علية الحد ومش بعيد يكون بيجيب لحماتة كمان اتقاء لشرها
    و اهلا بيكي في عالم المدونات

    ReplyDelete
  5. طارق باشا الديب
    يا فندم سخسخ براحتك محدش واخد منها حاجة
    حاسب بس لتسخسخ علي روحك

    انا بتاع دباديب برضة يا طروقة
    احنا بنجيب حلل تيفال

    ReplyDelete
  6. يسر محلات زكي و زكي ان تهنيء الامة الاسلامية بعيد فالانطين المجيد و تعلن انة تم توفير خوازيق حمراء و اخري صفراء لمحبي التغير يوجد لف فيونكات

    هههههههههههههههههههههههههه


    وسلااااااااااااام

    ReplyDelete
  7. بجد ... انا مت علي روحي من الضحك
    اسلوب سلسل سهل ساخر جميل
    معاك ادوات لغة شعبية رائعة

    ReplyDelete
  8. ميه ميه يا برنس

    بقه عشان كده الناس بتهدي بعض خوازيق في عيد الحب

    أفادكم الله و سدد خطاكم

    روح يابني ربنا يبعدك عن الخوازيق و صحابها

    ReplyDelete
  9. يا هلا جعان افندي

    ممكن ايميلك

    انا ايميلي wantedkey2@yahoo.com
    ضفني عشان اكلمك في موضوع كده صغير:)
    تحياتي

    ReplyDelete
  10. fnan_geology
    جبك انت الاعلان اللي في الاخر
    لو عايز اديك عنوان المكتبة :)

    ReplyDelete
  11. Anonymous
    الزائر المجهول
    اللي دايما منورني
    الله يكرمك علي البقين الجامدين دول
    انت مبجيش لية ابقي تعالي

    ReplyDelete
  12. soosa el-mafroosa
    شوفتي الموضوع طلع قديم ازاي وضارب في عمق التاريخ
    علي اي حال نسأل الله الشفاء لأمة الاسلام من الخوازيق
    و خصوصا ام فيونكات

    ReplyDelete
  13. عبدالله مفتاح
    هو انا استلفت منك فلوس قبل كدة ولا حاجة..؟؟؟؟ :(
    علي اي حال انا ايميلي معروف
    celini2000@yahoo.com
    anaga3aan@yahoo.com

    ReplyDelete
  14. امير النهارThursday, 15 February, 2007

    استاذ جعان
    بجد احييك علي اسلوبك الراقي في السخرية بدون ابتذال
    ورسم البسمة بلا فظاظة
    و انتقاد الاوضاع بلا تجريح
    تحياتي
    امير النهار

    ReplyDelete
  15. لو اتعملت فكرة الخوازيق دي وكل واحده تشتري لحبيبها خازوق في اليوم ده
    مش هتلاقي حد يحتفل باليوم ده تاني

    ReplyDelete
  16. لا فض فوك يا جعان
    انا مش عارف الناس لحد امتي هايفضلو عايشين في الخيالات دي

    بس مفيش الوان تانية عندك؟؟

    ReplyDelete
  17. لا يا سيدي
    انا مش عايزة احتفل
    و لا احمر و لا اصفر

    مالها مراجيح السبتية؟
    فلة و رخيصة
    و اهو كله تسالي

    بوست جامد
    كله ضرب ضرب
    مفيش
    قراقيش؟

    ReplyDelete
  18. امير النهار
    يا باشا الله يكرمك
    سعيد لمرورك

    ReplyDelete
  19. واحد من الناس
    علي العكس تماما
    في ناس كيفة خوازيق يا ابو علي

    ReplyDelete
  20. مصر الوجة الاخر

    لا فض فوك دي اللي انت قلتها
    شكلها كلمة ابيحة
    علي اي حال في كل الالوان
    وفي حاجات ميتاليك

    ReplyDelete
  21. سمباتيك هانم

    طب ما تقوليلنا عملتي اية في الفلانطين
    ولا حكم قراقوش و الاستاذ دخل بهدية برضة

    ReplyDelete
  22. جامد الاعلان اللى في الاخر ده ؟

    في توصيل للمنازل ؟

    ReplyDelete
  23. طب يعني انت عايز اية
    عايز الناس متحتفلش باليوم دة ولا متجبش هدايا لبعض
    ولا اية بالظبط
    لاني اعتقد غالبية اللي قرو الموضوع مقدروش يفهمو انت عايز اية؟

    ReplyDelete
  24. الله حلوه اوى انا بطنى وجعتنى من الضحك

    لا اسكت الله لك كيبوردا

    ReplyDelete
  25. السلام عليكم ...بجد اول مره اجي المدونه و كنت هبات فيها..اسلوب زي العسل..ربنا يحفظك..تحياتي

    ReplyDelete
  26. Sharm
    في توصيل للمنازل و المستشفيات و القري السياحية ولجميع انحاء الجمهورية
    بس الموتوسيكل عليك

    ReplyDelete
  27. masri
    انت مفهمتش الموضوع دي مشكلتك انت
    واضح ان الناس فاهمة
    المشكلة عندك انت
    اعتقد انت محتاج جرعات مكسفة من ال
    fall in tin
    لمدة اسبوع
    الله المستعان

    ReplyDelete
  28. أروى الطويل
    يا فندم نورتي
    وخدي انتينال او انتوسيد

    ReplyDelete
  29. يا قلبي يا غريب
    نورتي المدونة يا فندم وياريت متكونش اخر زيارة
    في هدايا و اكل ولبس وسحب شهري
    اول كل شهر بنسحب عضو و مابنرجعوش

    ReplyDelete
  30. ليست مجاملة
    سواء عندما كنت تكتب في منتدي قهوة كتكوت
    او في المدونات حاليا
    فانت ملك السخرية علي النت باللهجة المصرية

    في انتظار المزيد

    ReplyDelete
  31. بتفطس من الضحك
    انا بايتة في مدونتك من امبارح

    ReplyDelete
  32. بس بقى مش قاااادر امسك نفسي
    اظرف تدوينة انت كتبتها على الاطلاق

    انا متابعك من زمااااان اوي
    اوي
    اوي

    بالتحديد كدة اللى عرفنى عليكة تدوينة " يوم مشينا بالسليب في صحراء الهايكستب" من ساعتها عرفت انى هايجيلي فتاء من كتر الضحك اللى في مدونتك

    بس متبقاش تغيب علينا اوي كدة ماشي ؟؟

    ReplyDelete
  33. misr 4 all
    يا باشا اطراء لا استحقة
    لكن لو فاضل حاجة من غدا امبارح مفيش مانع

    ReplyDelete
  34. ورود الياسمين
    بايتة و من امبارح
    دة انتي كدة هاتكلبشي
    فين يا ابني ونش البيات

    ReplyDelete
  35. allah-slave
    و تمسك نفسك لية
    سيب نفسك و انا ابعتلك اتنين يمسكوك وركز انت في اللي بتعملة
    اسعدني مرورك وشكرا لك متابعتك

    ReplyDelete
  36. بجد تحفه جزاك الله خيرا وبعدين اسلوبك ممتاز فعلا فى السخرية وده مش إطراء ولا حاجة يعنى اللى قال لك ملك السخرية ماكدبش

    والمدونة بتاعتك جميلة انا مش عارفاها من زمان هو من كام شهر بس حاجة بسيطة يعنى

    بس تحفه ومن اول كلمه لآخر كلمة مش ببطل ضحك

    جزاك الله خيرا

    ReplyDelete
  37. طبعا ..كالعادة وبكل سعادة ..
    it's me

    (نضدااااااااااا) زملة الحصير

    ازيك يا (جعان) واخبار الاسرة عندك ؟ وكوكو ؟

    المهم يا سيدي مع اني طبعا كنت قرأت الموضوع من قبل كده
    لكن موضوعاتك انت بالذات احب اقرأها مرة واتنين وتلاتة و ...مليون
    كل ما بيعدي عليها الوقت كل ما باحب اقرأها اكتر واكتر

    انا شخصياً اشبهها بصينية البطاطس كل اما تقعد اكتر تحلو اكتر وطعمها يبقى ألذ ألذ

    لكن خد هنا يا جعان...اشمعنى (البط الفيومي اللي يقف على شنب الراجل هههههههههههههههههههههههه ولا اشمعنى (كلب) ههههههههههههه يقف على كلب الراجل ؟؟؟؟

    ليك شوية تشبيهات هههههههههههههههههه

    الموضوع مميز جدا جدا جدا
    لمناسبة اكتر تميزاً

    ومش عايزة ااقولك اني شفت الوصف اللي وصفته عن راجل يقف على شنبه (كلب او بط فيومي ) هههههههههه بيشتري من محل شوية دباديب ودفع فيها 150 او 120 جنيه تقريباً باللف الاحمر المميز سواء بالكوريشة او بالتل الاحمر

    موضوع لذيذ يا جعان ...دايما متميز

    ReplyDelete
  38. ftataljanna
    يا فندم الله يكرمك ويبسطك كمان وكمان
    انا مدونتي مش قديمة اوي
    انا بقالي 6 شهور تقريبا
    وسعدت بمرورك وان شاء الله تبقي زائرة دائما لمدونتي
    وزي ما قلت قبل كدة
    في سحب و جوايز و هدايا :)

    ReplyDelete
  39. ندا هانم
    منورة
    و التكرار يعلم الشطار
    شوفي البط الفيومي
    معروف بمركزة و سلطتة بين بط الجمهورية كلة
    يا ريت تبعتلنا صندوق تصدير بس يكون ساقع

    ReplyDelete
  40. عارف انا في عيد الحب دا مجاليش لا خازوق احمر ولا اصفر ولا حتي اسود
    هي محلات زكي وزكي خلصت بدري اوي كدة؟؟

    ReplyDelete
  41. shirry
    ما جايز مكانش فاضل غير البرتقاني
    جربي في وسط البلد

    ReplyDelete
  42. هوا فعلا بدعه وحرام اساسا الاحتفال بيه
    بس احنا ماشيين في الهيصه
    بالدبدوب والورد الاحمر
    الله يحرقك يافلانطين
    جميل اوي البوست ده

    ReplyDelete
  43. حاضر يا زميلي العزيز
    هابعت لك التصدير اللي انت عاوزه بس اما انت تبعت لي الاول

    كتف الديك الرومي اللي كنت بتاكله وقلت لي انه باقي منه كتف

    ابعت الاول سلم واستلم
    هههههههههههههههههههههههه

    يا سيدي نبعت لكم اللي انتوا عاوزينه كله يا فندم

    واي خدمة بس حاسب من انفلونزا الطيور

    (نضدا) زملة الحصير

    ReplyDelete
  44. ههههههههههههههههه
    هههههههههههههههههه
    هههههههههههههههههههههههههه
    استنى هضحك شوية وبعدين هعلق
    لا حول ولا قوة الا بالله
    كل ده عشان متغاظ من اونكل فلانطين
    طيب ما انت كمان يا عم اسلام بيجيلك هديه حمرا برضه
    يعني حته لحمه
    طبق طبيخ
    يعني اي حاجه من اللون ده

    ReplyDelete
  45. هاى
    يا ترى فى بلد غيرنا عندها فالنتين محلى ؟
    م نحتفل ما بقية العالم و خلاص , أنا حاسه ما بنصدق فالانتين و اتنين .
    و الصراحة حوار الدباديب فاكس أوى

    أعرف واحدة فركشت قبل الفالنتين عشان ماتشتريش للولد هدية

    ما علينا , ابقى تابعنى يا باشا

    ReplyDelete
  46. ايه ياعم ده؟
    انت عايز حتى الهدية اليتيمة تروح كدة في شربة مياه؟
    وبعدين لعلمك انا منبهة عليه كويس قوي لا دباديب ولا ورد اليوم ده عشان مابحبش اتكروت في الهدايا ولامؤاخذة!
    اهو اللي حصل حصل فالانطينوس بقى رومان ولا صعايدة فيه يوم حلو بيبقى فيه خروجة وهدية هتقطع علينا ليييييييييييييييييه؟
    ثم مانا بعمل برضو يوميها المحمر والمشمر وبلبس اللي ع الحبل وببقى ارق من النيييسمة عشان يعني محسسهوش بنقح تمن الهدية على جيبه برضو
    وهذا لا يعني اطلاقا مطلقا اني مش بعمل المحمر والمشمر على طول واني مش ببقى زي النسمة على طول عشان انا نسمة بطبيعتي طبعا واني مش بلبس اللي ع الحبل برضو على طول عشان انا وحدة بحب ابقى حلوة كدة ومتأنتكة :)

    كفاك الله شر القتال بس سيبنا احنا نجاهد براحتنا!

    ReplyDelete

بعبع وقول اللي في نفسك يا خويا