Thursday, February 22, 2007

شكر و تقدير

اعزائي المدونين و المدونات الاحياء منكم و الاموات
عندي لكم بشرة وخصوصا لمشتركي شركة حودا فون لخدمات المحمول
في موضوعي السابق فلانطيني ولا تغديني طلب مني الاخ عبد الله مفتاح صاحب مدونة وورد كي اضافتة علي المزنجر لانة محتاجني في موضوع صغير
وبعد ان اضفتة ارسل لي رقم هاتفة لكي نتحدث
قلت ومالة برضة معرفة الناس كنوز
لحد هنا تمام و مفيش مشاكل
الي ان تم بينا محادثة هاتفية وملخصها كالاتي:
ان الاستاذ عبد الله يعمل في خدمة العملاء في شركة محمول وان هو بيتصل بي بشكل ودي وركزو معايا في حكاية ودي دي
علشان يعرف اية سبب وضعي لصورة تمثل علامة الشركة اللي شغال فيها من وجهة نظرة
وكتابة عبارة اكبر نصبة محمول في مصر
وانة مستاء جدا من ذلك وسبب استياءة انة ينتمي لهذة الشركة قلبا وقالبا وانة وجودة الصورة دي سبب لة ازمة نفسية اطارت النوم من عينية
وأرقت مضجعة وبقي مش عارف يشتغل مش عارف ياكل مش عارف يعمل اي حاجة
لوجود هذة الصورة في مدونتي وليعبر عن مدي انتماءة قص علي قصة ظريفة مفادها انة رفض ان يترك عملة في شركتة والانتقال لشركة المحمول التالتة بالرغم ان المرتب اربع اضعاف الحالي
وذلك لانتمائة الشديد لشركتة
وان احية علي انتمائة فعلا
و اتمني ان الناس يكون عندها ربع الانتماء دة لبلدها
المهم وطلب مني بمنتهي الجدية اني اشيل الصورة من مدونتي
و المقابل انة سوف يقوم بحل مشاكلي مهما كانت مدام العيب ليس في الشبكة
بل و انة سيقوم بتقديم اي مساعدة لكل من يهمني امرهم
ولهذا يا اخوانا كل واحد مدون من مشتركي هذة الشبكة عندة مشكلة يستطيع الاتصال بعزبزنا الاخ عبدالله
علي الايميل دة
ولو المشكلة عويصة ممكن يتواصل معايا و انا ابلغ الاخ عبدلله شخصيا بالمشكلة
و ان شاء الله هايحلها كما وعد
وانا من موقفي هذا اعد بوضع صورة اخري لشركة ام نبيل لخدمات المحلول
واناشد اي مسؤل بها الاتصال بي لحل مشاكل العملا بشكل ودي
هذا وبالله التوفيق
اكتر حاجة بسطاني ان المكالمة استمرت 42 دقيقة و علي حساب الشركة
اخيرا دفعتهم حاجة

37 comments:

  1. This comment has been removed by the author.

    ReplyDelete
  2. يا حج جعان
    الصراحة انا مش فاهم حاجة
    الموضوع دة اية بالظبط
    فودافون متضايقة من الصورة ولا الاخ عبدالله هو اللي متضايق
    ولا اية بالظبط؟؟
    طيب و اتصل بمين لما اعوز حاجة :)

    ReplyDelete
  3. رفقه عمر
    لا نبيل و لا امة يهموني
    احنا نفوت في اي شبكة و اتخن سلك

    ReplyDelete
  4. يا صديقي العزيز الامانه مطلوبه في نقل المعلومة
    اولا : انا حلفت اني بتصل بيك بشكل ودي لو انت لسه مش مصدقني مفيش في ايدي اكتر من اني حلفت

    ثانيا: انا اكدت عليك ان شركة المحمول التالته معرضتش عليا حاجة
    وقلتلك اني كنت ممكن جدا اقدم فيها ومتقبلش وقلتلك كمان اني قدمت في وظيفة اعلى يعني مقلتش الكلام اللي انت قلته

    ثالثا : انت متاكد وواثق ان اللوجو ده ليمكن ياثر في مكانه الشركة وان سبب مكالمتي اني احل مشكلتك وقلتلك بردو في وسط المكالمه لو مش عايز تشيلها سيبها

    رابعا: من حقي اني ادايق لما حد يقول او يلمح على الشركة اللي بشتغل فيها نصابه

    خامسا: اني اسعى لحل مشكله انا اقدر احلها دي شيء مش مثير ابدا للهجة السخرية اللي كتبت بيها كلامك

    سادسا: في وسط مكالمتك انت قلتلي من حقك تعبر عن رايك
    ودي احد مشاكلنا اننا مش فاهمين ايه هو التعبير عن الراي او مش فاهمين ازاي نعبر عن راينا
    الشتيمه شتيمه ليمكن تكون تعبير عن الراي
    وليمكن يكون ده رايك لانك بتتعامل معاها ومفيش حد يحب يتعامل مع نصاب

    سابعا : انا مش اديتك رقمي كميزة لان رقمي اقل من انه يكون ميزة لانه باختصار مع كل الناس صحابي ومعارفي وجيراني وبكون سعيد وانا بخدمهم

    ثامنا: عملاء بيتكلموا ان الشركة لازم تقدملهم الخدمات زي مبيدفعوا الفلوس
    عجبي ..... في حياتي مذكرت لحد كلمة زي دي وان كان معاهم حق بس عمري مفكرت اقول جمله زي دي وان شاء الله مش هقولها

    تاسعا : ليه تنشر حواري معاك من غير اذني وتقول وظيفتي (على فكرة الوظيفة انت قلتها غلط)وليه لهجة السخرية
    هي دي الطريقة المناسبه للتعامل مع واحد متصل بيك يحل ليك مشكله؟؟؟ظ

    عاشرا : استحلفك بالله بلاش تشيل اللوجو
    خليه وعلى كل مكنتش متخيل اد كده غريب ان واحد يحب الشركة اللي بيشتغل فيها
    اد كده انت مستغرب ومش مصدق اني بعمل ده لمجرداني بحب الشركة وحاسس ان ليها فضل عليا

    والله انا مستغرب فعلا
    ليه رد الفعل ده منك
    ساعات بتمنى اكون صاحب الشركة عشان كنت اقول لناس بلاش تتعاملوا معاها
    بس مش من حقي اقول كده

    وعلى كل انا عند وعدي لو قابلتك مشكله كلمني مستنيك

    ReplyDelete
  5. على فكرة المكالمه ال 24 دقيقة مش بتحاسب عليها الشركة ولا على غيرها

    تقبل تحياتي

    ReplyDelete
  6. يا استاذ / عبد الله

    على فكرة احب اوضح لحضرتك حاجة
    1. زميلنا العزيز (جعان) الحمد لله رب العالمين ما عندوش مشكلة فعلا والحمد لله رب العالمين ..وأأؤكد لك كده

    2. موضوع (ولاءك وحبك للشركة) فعلا بالنسبة لنا شئ مثير للدهشة وبجد ما تستغربش من كلامي ...لان كلنا بالنسبة لنا ان شركات الاتصالات والتليفونات كلها وبلا ادني استثناء كلها بتحاول عن طريق مسابقات سواء في التليفزيون او مسابقات اخرى انها تخلي كل الناس تتصل او تبعت SMS وطبعا محصلة الربح هاتروح لمين حضرتك ؟؟؟؟؟

    3. إلا اني لا انكر فعلا اني معجبة جدا بحبك لشغلك وحبك للشركة اللي انت بتعمل فيها ...بجد ومش سخرية وان دل بيدل فعلا على انسان طموح حقيقي (ربنا يكرمك يارب )...المبدأ نفسه جميل جداً

    - وصدقني اخلاصك في شغلك (جعان) لم يسخر منه بس هو بيسخر من الناس التانية وخصوصا اللي في المصالح الحكومية (بتوع الروتين) مافيش اخلاص ابدا وحرص على مصلحة العمل كده ..ايه السبب في كده فعلا الله اعلم


    4. استاذ/ عبدالله ...على فكرة جعان لما كتب الموضوع ده ومن خلال معرفتي بيه لا يقصد سوى شئ واحد فقط هو عرض لموقف حصل معاه زي بالظبط المواقف اللي بيمر بيها المختلفة ...اما السخرية مش منك او من شخصك لكن بالعكس تماماً السخرية كما وضحت لك سابقا (من ان معظم الناس حوالينا بيفتقدوا للولاء والحب للشغل / بالاضافة الى السخرية طبعا من جميع شركات الموبايل وشركات التليفونات والاتصالات )

    5. لكن خليني أسأل حضرتك يا استاذ/ عبد الله ...انت ايه المشاكل اللي ممكن تحلها لأي شخص مشترك او عنده خط من الشركة بتاعتك ؟ وخصوصا ان لو افترضنا ان في مشكلة في الشبكة ؟ او ضغط اتصالات ؟

    يعني انا شخصيا مش متخيلة ايه نوع المشاكل اللي حضرتك ممكن تحلها ؟!!!

    قبل ما انسى

    انا (ندا) يا (جعان)
    اكيد انت حمنت اني (ندا) من اسلوبي طبعا في الكلام يا (جعان)

    *. كلمة على جمب ليك يا (جعان) ممكن تعمل لشركة (ام نبيل) اي كاريكاتير او اي حاجة لاني فعلا فعلا هايجي لي الضغط من الشبكة بتاعتها يا (جعان) وربنا يكرمك ويبارك في المدونة اللذيذة بتاعتك اللي شبه اكلة (حمام محشي فريك)

    ReplyDelete
  7. الشبكة هنا فى الكويت واقعة .. مفيش حل عنده

    ReplyDelete
  8. يا استاذ عبدلله
    انا مقلتش اني مش مصدقك
    علي العكس انا مقتنع تماما انك بتتكلم بشكل ودي تماما
    ودة يدل علي طيبة شديدة جدا منك
    لانك وزي ما قلتلك لو شخص غيري انت بتكلم معاة
    ابسط حاجة سجل الحوار واتصل بشركتك
    ومسح بيهم الارض ان في واحد بيتكلم معاة في امور قانونية لا يحق لة مرزة التحدث فيها
    وانك بتتكلم باسم الشركة بغير صفة
    ودة كفيل بالاطاحة بمستقبل اي شخص سواء في شركتة او في اي شركة تانية
    الحوار اللي اتنشر انا طرف في ومن حقي
    كتابتة
    ثانيا انت قلت ان اي حد يهمني امرة
    وعندة مشكلة اتصل بيكي
    وانا كل من اعرفهم علي النت او غيرها و المدونات يهمني امرة
    انا كمان منتمي لبلدي زي ما انت منتمي لشركتك
    وحاسس بفضلها عليك
    انا كمان حاسس بفضل بلدي علي
    وعلشان كدة انا يهمني اي حد فيها

    وللعلم لهجة السخرية في كلامي دة طبع
    مش قلة احترام للاخرين

    انا كنت فاكر ان الشركة بتدي للموظفين ساعات اتصال علي حسابها و كل حسب مركزة
    لا انت لازم تروح شركة تانية يا راجل :)

    ReplyDelete
  9. عارفك يا ندا من اول سطر

    بالنسبة للمشاكل اللي الاخ عبدللة ممكن يحلها و علي حد قولة
    اي حاجة
    ما عدا انة يكون مشكلة في الشبكة
    ونرجو منة يوضحلنا هو في اية مشاكل غير الشبكة

    بالنسبة لام نبيل شوفيلي راعي رسمي يا ندا
    والمكسب بالنص

    ReplyDelete
  10. اهو يا حج عبدلله الدكتور عندة مشكلة

    ReplyDelete
  11. كبير الرحيمية
    معلش نسيتك في الزحمة
    الخلاصة لو انت عندك مشكلة الاخ عبدالله هايساعدك
    لو الموضوع ضروري اتصل 122 النجدة

    ReplyDelete
  12. بصرف النظر عن شخصية محدثك مع كامل احترامي لعبدالله

    لما عمرو عزت ردأ حملة نريد خدمة نظيفة و بدأنا بلينك , جاله ايميل منهم يطلبوا منه نمرته عشان يحلوا له مشكلته

    رعم كم المشاكل اللي اتنشرت وقتها , الشرطة ماهتمتش غير انها تحل مشكلة شخصية لناشر الكلام

    الشركات الخدمية كلها مش مهتمة أصلا بجودة الخدمة , المهم ماحدش ينشر عن سوء الخدمة

    فودافون و موبينيل محتاجين حملة كمان من قبيل نريد خدمة نظيفة

    ReplyDelete
  13. اعتذاراتي عن الأخطاء الاملائية في الرد السابق
    و أنا اقصد الشركة مش الشرطة

    ReplyDelete
  14. ههههههههههههههه

    طب والله انا كمان عندي مشكلة في ام نبيل دي
    بس المشكلة برضه اني بحبها جدا ورافض اني اغير لفول فون
    بس انا حبيت اجي اسال بس علي الست الوالدة
    ايه الاخبار دلوقتي

    ReplyDelete
  15. دكتور نرمين جابت الخلاصة

    وانا من موقفي هذا مستعد اعمل حملة ضد اي حاجة
    من اجل خدمة افضل
    واللي يطلع بالنص

    ReplyDelete
  16. smraa alnil
    يا فندم الوالدة بخير
    وبتسلم عليكي
    وبتقوليك حوليلها بخمسة جنية رصيد

    ReplyDelete
  17. انا عايزة افهم اذا كان وجود الصورة دي لن يؤثر في كيان مثل هذة الشركة
    لية الاخ عبدالله طلب منك حذفها

    ReplyDelete
  18. ردك لم يرضني

    اما بلوروز فبقلها مش فودافون اللي تخاف من لوجو ملوش لازمة

    وهكرر كلامي انا عملت كده مش لاني خايف على الشركة

    يا جماعه انتوا بتهرجوا حملة ايه وبتاع ايه اللي هتاثر في فودافون

    على فكرة بقا في خدمة جديده نازلة اسمها فودافون كاش هتخلي الواحد يقدر يجري تعاملات بنكيه من موبايله
    يعني شركة سابقة الشركات التانيه بسنين

    بلوروز : في حاجة اسمها شركات الخدمات مش مهمتمه بالخدمة؟؟؟
    امال مهتمه بايه؟؟؟؟
    للاسف بعض العملاء بيظنوا ان الاشتراك اللي بيدفعوه اشتروا بيه الشركة مش من حق الخدمة تهتز لو لساعات

    لما كل واحد عميل يفضل يقول انا دافع انا بدخل الشركة فلوس انا عايز خدمة احسن من كده .....حقه طبعا
    بس بشكل انساني الكلام ده يصح؟؟؟؟

    العزيزة مارو: انا طلبت حذفها لانها دايقتي وهكرر تاني من حقي ادايق ان حد يقول على الشركة اللي بشتغل فيها نصابه
    وللمرة الالف انا كلمته بدافع تقديم المساعده
    واظن ان لو اي حد سيء النيه فكر في اي دوافع اخرى مش هيلاقى
    يا ريت السيرة تتقفل
    بس اظن اني مش هكرر الموضوع ده
    لاني حاسس بجزاء سنمار
    تحياتي

    ReplyDelete
  19. جعان

    انت راجل متعاون اوي والله ، يعني ماسينجر وموبايل واتنين واربعين دقيقة بحالهم ! عشان لوجو !؟ طب بكره اعملهم بوستر واضيفهم ع السكاي بي ومعنديش مانع البس تي شيرت فودافون والف ع المدونات ابيع كارت الشحن اللي بعشرة باتناشر ونص بس مش بخمستاشر زي الكشك ما بيبيعه ، بس نفسي افهم حاجة بجد يا اخ عبد الله وصدقني مش بسخر ، هو الانتماء ده بكارت ولا خط مدى الحياة؟ يعني لو اتعرضت لمشكلة في الشركة هتسب لهم واللي جابوا ابوهم ولا هتطلع تحلف براس الافعى اللي في لوجو فودافون الجديد ؟

    ReplyDelete
  20. maro
    ا هو دة يا مارو اللي مستني توضيحة
    وللاسف مش قادر اقتنع بالتبرير اللي ذكرة سابقا

    ReplyDelete
  21. اخ عبدلله
    انا لا ارد لكي ارضيك :)
    ثانيا هو انا كل واحد يزعل عندي في المدونة اشيلها ولا اغيرها
    دة كلام برضة
    طب ما افتح جرنال و اسمية الاهرام
    لو في فودافون 8 مليون ونص مشترك
    في علي الاقل 10 مليون عندهم مشاكل
    ودة راجع ان بعض امشتركين في الشركة الاخري
    لما يجو يتصلو بحد مش عارفين يوصلولو

    مادام انا دافع خدمة لابد اجد احسن مستوي من الاداء
    وكما تعمل دول اوروبا
    وشبكات ذات تقنية حديثة وليس قديمة جدا
    كما قلت في حوارنا الهاتفي
    واتحاسب علي كسور الدقيقة فقط
    واذا شحن احد بكرا يتم خصم 10 ولا 15 جنية
    بدون وجة حق رسوم
    وزي ما الاخ عبد الرحمن سألك
    تفتكر اذا الشركة في يوم قالتلك
    مع السلامة مستغنين عن خدماتك
    او خليك قاعد بس في تخفيض في المرتب
    لضغط النفقات
    موقفك اية

    ReplyDelete
  22. Abd El Rahman
    انا راجل في قمة التعاون
    وبستخدم بنزين اوكتين 92
    ومستعد اتعاون مع اي حاجة لاجل لقمة العيش :)
    انا ورايا عيال اربيها
    وانت وضحت نقطة
    اذا استغنو عن خدمات اي شخص اية مصير الانتماء؟؟
    في حاجة مع حواري مع الاخ عبدلله
    قالي انة بعت السيرة الشخصية بتاعتة لشركة المحمول التالتة بس علي منصب اكبر
    يعني لو تم طلبة لعمل معهم هايروح
    فين بقي الانتماء يا راجل

    ReplyDelete
  23. عبدالله
    مادام يافندم اللوجو و الحملة مش هايأثروا في الشركة سيبنا نضيع وقتنا فيهم , انت خسران ايه ؟؟:))))

    ""بلوروز : في حاجة اسمها شركات الخدمات مش مهمتمه بالخدمة؟؟؟
    امال مهتمه بايه؟؟؟؟""

    بجمع الفلوس في الغالب , الأكيد انه مش بجودة الخدمة


    ""للاسف بعض العملاء بيظنوا ان الاشتراك اللي بيدفعوه اشتروا بيه الشركة مش من حق الخدمة تهتز لو لساعات

    لما كل واحد عميل يفضل يقول انا دافع انا بدخل الشركة فلوس انا عايز خدمة احسن من كده .....حقه طبعا
    بس بشكل انساني الكلام ده يصح؟؟؟؟""

    دا أكبر دليل على عدم الاهتمام بجودة الخدمة , حضرتك و انت موظف في الشركة مبدأ ان العميل من حقه خدمة نظيفة مش موجود عندك

    و دا مش عندك لوحدك
    احدى مريضاتي في منصب مهم في الشركة و عندها نفس المبدأ

    الشركة شايفة من حقها تاخد من العميل فلوس و مش من واجبها تقدم خدمة نظيفة في المقابل

    عشان تصدق ان جودة الخدمة مش من أولويات الشركة

    و أيوة يافندم
    المفترض أن العقد بين الشركة و العميل يعني أن يقدم العميل للشركة ماله في مقابل أن تقدم له خدماتها

    يعني مادام قدم الفلوس اللي طلبتها الشرطة كاملة مش من حق الخدمة تهتز لحظة و المفترض أن تقدم له الخدمة كذلك كاملة
    لكن طبعا واضح ام المفهود دا مش موجود عند الشركة بدليل كلماتك
    الواضح ان الشركة شايفة ان العميل ملزم يديها فلوسه و هي تتفضل بتقديم الخدمة أو لأ بمزاجها , جيدة سيئة بمزاجها أهو كله فضل منها

    ReplyDelete
  24. ""حقي ادايق ان حد يقول على الشركة اللي بشتغل فيها نصابه""

    بص يا عبدالله , لو أي عميل أخد الخدمة و مادفعش المقابل لها أو دفعه منقوص أنا هاقول عليه نصاب

    و الشركة بالمثل لو أخدت مقابل الخدمة و ماقدمتهاش أو قدمتها منقوصة فهي بردو نصابة

    المشكلة انك شايف تقديم خدمة منقوصة حق للشركة الاعتراض عليه عيب , عشان كدا مش شايف النصب

    ReplyDelete
  25. يا سلام يا دكترة
    بجد والله وفرتي علي مناهدة جامدة
    انا كل ما خلقي يضيق هاديكي رينج

    ReplyDelete
  26. طيب يا سيدي عبدالرحمن
    لعلمك بقا انامش واخد خط وبشحن ب10 جنيه في الشهر لان خطي سوبر دردشه عادي جدا
    لو اتعرضت لمشكله هفضل فاكر ان الشركة دي هي اللي لمتني من البطاله ومش هذكرها بسيء
    انا مستغرب والله
    انتو ليه مش مقتنعين ليه فارضين فيا السوء بالشكل ده

    ان جعان: هحلف كمان مرة يمكن تصدق
    والله العظيم اني كلمتك عشان اساعدك ولو عندك مشكله كنت عايز احلهالك
    ووالله ان محدش في الشركة يعرف اني هكلمك
    قولي اقنعك ازاي وانا اقنعك ده فعلا المبرر مفيش مبرر تاني

    انا جعان : انا مضطر اقلك على اللي فيهالانك مصمم تفرض السوء فيا
    انا مرتبي 650 جنيه يعنيمتفتكرش ان الفلوس هي اللي مخلياني حابب الشركة متفتكرش ان يا ما هنا يا هناك
    ومش واخد خط من الشركة كمان
    تحب تعرف ايه تاني وانا اقلك؟؟
    يا ريت تكون اقتنعت
    بس انا مذهول فعلا انتوا بجد مش متخيلين ان حد يعمل كده لوجه الله وعشان بيحب الشركة؟؟؟؟؟؟
    وهقلك تاني لو الشركة استغنت عني هفضل حافظلها جميل انها شغلتني لما مكنتش لاقي شغل

    انا مستغرب فعلا

    وبعدين يا جعان اديك قلت الكلام الحقيقي اللي انا قلته يعني انا مقلتش ان اتصالات عرضوا عليا وظيفة باربع اضعاف وانا رفضت
    ومش معنى حبي لشركة اني افضل فيها طول عمري
    وبلاش نضيع الموضوع
    انا بحب الشركة وبشتغل فيها وطبيعي اني ادايق لما حد يقول عليها نصابة

    بلو روز: انا مقصدش ان الواحد ميعترضش
    بس لما واحد يشحن كارت بعشرة على الساحر ياخد 2 جنيه
    من حقة يشتم موظف خدمة العملاء بافظع الشتايم؟؟؟؟
    هي دي العينه اللي انا قصدتها بانها افتكرت انها اشترت الشركة انتي لو غلطتي في شغلك ترضى مدريك يشتمك ولو شتيمه هينه؟؟؟
    مش شتيمه يقشعر البدن من سماعها

    من حق اي عميل يزعل من اهتزاز الخدمه بس مش من حقه يشتم
    فهمتي الفرق

    وعلى كل انا هقلك ايام مكنت في تدريب الشغل كان التيم ليدر يقولنا كلم العميل زي اخوك اياك تقول انا دحكت عليه خليته ياخد نظام كذا
    او تقول انا دخلت الشركة فلوس
    اياك تفكر بالطريقة دي

    بلوروز انا مهما قلتلك عن الضغوط اللي بنتعرضلها في call centre مش هتقدريها لانك مش عايشاها وهتصممي ان الجودة مش من اهتمامات الشركة
    مع ان الكلام ده مش حقيقي وانا مش عايز استرسل في الكلام اكتر من كده

    لاني بجد ادايقت لاني معملتش حاجة غلط بل بالعكس حاولت اساعد لقيت هجوم غريب غير مبرر

    انا جعان : انا بجد حاسس اني غلطت لما كلمتك
    انا مسمحتش ليك تقول مكان شغلي ومسمحتش ليك تنشر كلامي لاني لو عايز اقول مكان شغلي او اتكلم ادام الناس كنت قلت على المدونة
    بس انت محترمتش رغبتي في سرية الموضوع
    انا فعلا مكنتش عايز حد يعرف مكان شغلي وانت قلته
    يا ريتك كنت احترمت رغبتي ومقلتش المكان وطبقت احدى قواعد التحضر اللي عايز فودافون تطبقها باعتذارها لما تحصل مشكله شبكه
    ولا الحاجات دي لغيرنا مش لينا؟؟؟؟؟

    ReplyDelete
  27. ""بلو روز: انا مقصدش ان الواحد ميعترضش
    بس لما واحد يشحن كارت بعشرة على الساحر ياخد 2 جنيه
    من حقة يشتم موظف خدمة العملاء بافظع الشتايم؟؟؟؟
    هي دي العينه اللي انا قصدتها بانها افتكرت انها اشترت الشركة انتي لو غلطتي في شغلك ترضى مدريك يشتمك ولو شتيمه هينه؟؟؟
    مش شتيمه يقشعر البدن من سماعها""

    هو مش بيشتم الموظف , الموظف عنده رمز للشركة , يعني هو بيشتم الشركة

    يعني العميل دا غالبا كانت أول مرة يشحن للساحر و شاف الاعلان اللي بيقول له الدقيقة ب 50 قرش بس , و فوجئ لما شحن ان الكارت اللي اشتراه ب 13 جنيه هايكفي 4 دقائق , يعني الدقيقة فعليا ب3.25 و التصرف الوحيد اللي لقاه قدامه و ان كان تصرف سلبي هو انه يشتم الشركة ممثلة في موظفي خدمة العملاء

    هو للأسف لم يقم بمقاطعة الشركة لأن الشركتين أكثر نصبا من بعض , و ان كان الأمر حدث فعلا من 3 سنين حين قررت الشركتين في يوم واحد تقليل فترات الصلاحية للكروت و تراجعتا أمام رد الفعل الشعبي

    و أيوة يافندم اتشتمت كتير في امتياز و كنت هاتضرب مع بقية الأطباء الموجودين في استقبال القصر العيني من أهالي مرضى ماتوا و لم تقدم لهم خدمة طبية جيدة , و لم يكن ذنبي أن القصر العيني لا يوفر خدمة جيدة , لكن تفهمت أنهم فعلا مساكين , يموتون دون علاج و كل ما في وسعهم عمله هو كلمتين يوجهوا للموجود الذي في الغالب ليس مسئولا عن مأساتهم

    لم أنظر اليهم باستعلاء مدعية أنهم لم يشتروا القصر و ليس من حقهم الغضب من سوء الخدمة , رغم ان هؤلاء على عكس عملاء حضرتك لم يدفعوا أموالا بشكل مباشر للمستشفى

    و ماتكلمنيش عن الضغوط في أي مكان عمل باعتبار انها مبرر لسوء الخدمة , روح اقعد يوم في مستشفى حكومي و بعدها كلمني يعني ايه ضغط عمل

    ReplyDelete
  28. اولا :صحة الانسان لا تقارن ببضعه جنيهات

    ثانيا: ابدا لم انظر لعميل باستعلاء
    بل كل ما اطلبه المعامله الحسنة
    ثالثا : الخدمة ليست سيئه كما تزعمين والا لما سمعت المئات من مكالمات الاطراء على الشركة

    رابعا: دائما ما اشعر انك تتحدثين الي وكاني يهودي او شارون ولا اجد سببا لذلك

    قد تسالين عن السبب لعل السبب الاكثر وضوحا هي تصيدك لكلامي وتحميله اكثر مما يحتمل
    فجمله اشتروا الشركة لم اقصد بها الا الاتي( لو افترضنا ان موظف خدمة العملاء اجير عند عميل الشركة
    فهل يحق للعميل ان يسب والدة الاجير لانه اخطا؟؟؟؟؟
    قصدي واضح جدا لم اقصد الاستعلاء بل قصدت معامله ادميه ممكن اقصدهم لا اكثر

    ReplyDelete
  29. بأسجل اعجابي بكل كلمة في ردك يا دكتر /بلو روز

    (نضدا)

    ومازلت باكرر السؤال

    انا مثلا مع اني شركة موبايل تانية ومنافسة طبعا

    لكن المشكلة الوحيدة في الشبكة

    يبقى حضرتك هاتحل ايه يا استاذ /عبد الله ؟

    ReplyDelete
  30. العُمــدهTuesday, 06 March, 2007

    السلام عليكم

    جعان خفة دمك مش ممكن و سخريتك ملهاش حل -- طبعا أنا فاهم طبيعتك و غن الضحك بيجر في دمك زي مجري النيل كدا

    و لكن

    الحقيقه لم يعجبني موقفك مع الأستاذ عبد الله - لا أجد غضاضة في كونه اتصل بك أيا كان دافعه و لكن أتعجب من كونك نشرت ما دار بينكم هكذا علي الملأ

    تعرف كنت ممكن فعلا اشك في عبد الله إن كان شخص جديد و لكن لما دخلت علي مدونتة وجدت أنا هناك بالفعل شخص يمارس نشاط إنترنتي مثلنا أجمعين يعني هو مش مزقوق عليك - ثم إن فعلا كلامه صحيح هل يا تري الصورة دي هي اللي هتعز عرش فودافون -- أشك

    ثم ما المانع من كونه يدافع عن شركته بدافع حب الإنتماء - ثم دعونا من السؤال السفسطي المعتاد الذي يتحدث عن الغيبييات ما هو موقفه الإنتمائي إذا فصلته الشركة - سؤال لا جدوي من ورائة إن كان الرجل أصيل فالطبيعي أن موقفه سيكون ثابتا و أعتقد أنه إن كان صادقا و اتصل بك بدافع شخصي فعلا إذن موقفه الإنتمائي من الشركة لن يتغير

    الأمر الآخر - هو ايه مضايق الجميع من فودافون ؟ يعني يا ريت زي ما الراجل قال و الكل عاوز يعبر عن رأيه يقلنا هو ايه النقاط السلبيه اللي عاوز يغيرها في الشركة !!

    أخيرا - دكتورة بلو تحدثت عن خط الساحرو خلافه - يا سيدتي إن كانت الشركة تغرر بالعملاء فالعملاء يملكون شئ من العقل يتيح لهم التمييز و القياس دون أن ينساقوا وراء السراب - هو مش القانون لا يحمي المغفلين ؟! بالإضافة إلي موضوع الرسائل القصيرة - أنا لم أضغط عليك و لم أجبرك كي ترسل رسائل أنت حر و أنت من يضغط الأزرار ليتم ارسال رساله و خصم مبلغ من رصيدك .. أليس كذلك ؟

    لا شك أن فودافون رابحة و لمت فلوس بالهبل و لكن العيب مش علي فودافون - العيب علي اللي مضيعين فلوسهم في كماليات نستطيع العيش بدونها - الشركة تقدم خدمة ما و لم تجبرك أن تشترك فيها صح و لا ايه

    ختاما
    أرجو إن حبيبي أبو ملك لا يأخذ الأمر بمحمل شخصي إن هو إلا مجرد تعبير عن رأيي مع الإحتفاظ الكامل بحبي و إعتزازي لأخي الكبير إسلام الرائع

    اه نسيت

    أخ عبد الله يا ريت تنقل البقين الحلوين اللي أنا قلتهم دول لمحمد بك نصير لعل و عسي مين عارف يمكن أشتغل معاكم في خدمة لبوسة فون

    ReplyDelete
  31. عمدة
    ابو الدكاترة
    طبعا دخلت اديت بقين مسح جوخ في الاول
    شوف يا سيدي
    اولا الراجل قالي ان الخدمة دي ليك وللي يهمك امرهم يبقي الموضوع خرج من حيز شخصين بس
    فا من حقي اكتب الكلام ثم انا طرف تاني
    فا انا حر يا اخي بنشر مذكراتي

    ثانيا محدش ممانع انة ينتمي لشركتة بتاتا بل العكس دة احنا نشجعة
    يا ريت نبقي كلنا متميين ان شالله انتماء لصينينة بطاطس

    ثالثا عيوب الشركة ليست فقط في سرقة الغلابة وحساب كسر الدقيقة كدقيقة كاملة
    انت عارف دة بيدخلهم مكسب كام شهريا
    6 مليون جنية ودة من كسر الدقيقة فقط
    ويستطيع الاخ عبدلله تصحيحي

    رابعا لما الشبكة تقع 4 او 5 ايام في منطقة معينة لاجراء اصلاحات
    ومحدش يقول
    ولا حد يعتذر بعديها
    لو احنا في دولة محترمة كنت رفعت قضية وخدت تعويض
    اعيش من ورا ولا سلطان بروناي

    خامسا هو معني مثلا اني دخلت موقع ولقيت واحد حاطط صورة زبالة لمصر اروح مكلمة واقولة شيل الصورة اصلي منتمي ودي مضايقاني
    ولا حد كاتب كلام معجبنيش


    اخيرا عماد انا هاخد الموضوع علي محمل شخصي وجملي
    ونهارك اسود من البدنجان العرايس
    وحرمت عليك مدينة نصر للابد
    ولو شفتك فيها هاقعدك في كشك في اول عباس العقاد تبيع لبوس فرط للمواطنين

    هذا وقد ازعر من انذر

    ReplyDelete
  32. من عيوبنا التي لا أفهمها أننا تقبلنا السياسات الاحتكارية بحجة : اللي ماعهوش مايلزموش , أو مادام ممكن نعيش من غيرها يبقى نستاهل

    لا يافندم , خدمات الاتصالات لا غنى عنها و أنا أول واحدة ماقدرش أستغنى عنه للأسف الشديد , و نفسي يبقى عندي ترف اغلاقه في أجازة نهاية الأسبوع كما يفعل الأطباء الكبار , لكن الصبر جميل

    ماحدش ضربني على ايدي ازاي بقى ؟؟ لما السياسة الاحتكارية فرضت علي أن أتعامل مع احدى شركتين اتفقتا عليّ , و ساعدتهما الدولة

    المشكلة اننا فعلا مع الوقت بقينا بنتعامل على أننا بلا حقوق , المحتكرون أقنعونا فعلا أن من حقهم فعلا ما يشاءون
    لا أنسى جملة تامر أمين شرطة التليفزيون في البيت بيتك عن احنتكار الحديد أن من لا يملك ثمن الحديد لا يجب أن يدخل مشروع بناء

    بالنسبة للساحر
    الشركة أعلنت كذبا أن تكلفة الدقيقة 50 قرش (حاليا هي فعلا 40 قرش تقريبا) بينما وقتها اتضح غير ما أفعلتنه الشركة , هي ما ضربتش العميل على ايده , هي كدبت عليه بس

    ReplyDelete
  33. نسيت أكتب شعار حملتنا
    نريد خدمة نظيفة

    ReplyDelete
  34. اتفق مع بلو روز جداً ..
    وبعدين هو لازم نشتم فيهم عشان ناخد حقنا ؟
    في انتظار الشركة التالته اللي حجزت فيها رقم بالفعل ويا رب متنضمش للمافيا ..

    ReplyDelete
  35. السلااام عليكم
    لا يا عم من حقه يضايق زي انا منا مضايق من فودافون وكاره اليوم الي شوفتها فيه واتعاملت معا بس برضه هيا احين من غيرها
    علي فكره انا ناوي ارفع قضيه علي فودافون واتهمها بالاهمال الجسيم في حق العملاء واتهمها بخراب بيتي واكيد ده علي ايد احد من الموضفين في فودافون لو مش مصدق كلمني
    يا راجل ده لدرجه اني اتصلت بالشركه علي رقم 25292888
    في يوم 16_11_2007
    واديتهم رقم كارت يشحنوا علي تليفوني الا انهم عملوا معايا الي يوقعهم في الغلط مشحنوهوش وكده عده عليه حوالي 48 ساعه مش لحظه
    احنا منفوت لحظه وهما يقطعوا الخدمه بدون وجه حق 15 يوم ماشي
    واللي مش عاجبه يرزع دماغه في رجل الي جنبه
    ساعدني يا عم الجعان
    منا زيك جعان بس انا جعان حنيه وحنان امل وشقاء
    تحياتي ليك ياسر
    الي عايز يكلمني انا عندي شغلات كتيره ممكن اشغله اد كام سنه كده مهو حرام اموت ناقص عمر
    استغفر الله العظيم ولكل اجل كتاب

    ReplyDelete
  36. للاتصال بي واثبتلكم ان فودافون نصابه كمان 0163400792
    ياسر

    ReplyDelete
  37. ههههههه وايه الجديد فى النصب بما انى دلوقتى معايا تلات خطوط وارضي يعنى تلات بنات وولد او العكس اقولك لكمهم نصب مظطر اخاك لا بصل ايووووون لا بصل

    ReplyDelete

بعبع وقول اللي في نفسك يا خويا