Saturday, March 17, 2007

أمي العزيزة الاقي معاكي بريزة سلف


بالتاكيد لكل واحد فينا ام او علي الاقل كان لية و من ليس لة ام او لا يعلم عنها شيئا

و ابوة بيصبحو كل يوم الصبح و يقولة كلام من نوعية امك مسافرة و بكرة ترجع يا حبيبي

او دي ماما عيانة و في المستشفي يعرف انة لقيط و الراجل دة مش ابوة و لا الست دي امة ولا انور وجدي يبقي خالتة
وانهم لقوة علي باب جامع بيرضع من قطة بلدي
المهم يا سادة يا كرام لا يحلي الكلام الا بذكر النبي علية الصلاة و السلام
اكيد كل واحد فينا و هو في شرخ الطفولة البلهاء كان يقعد يحوش فلوس هو و اخواتة مع ابوة بحجة عيد الام و عند سؤالة علي الفلوس يقولو دول ماتو يا حبيبي البقية في حياتك و ويكتشف في الاخر ان الوالد كان بيجيب بيهم هريسة يوم الخميس
او اذا كان ناصح شوية يشيلهم مع امة و عند سؤالها تقولة مكنش ينعز يا ضنايا عملنا بيهم الصوان بتاع الفلوس بتاعتك اللي كانت عند ابوك
المهم و كنت انا من خارقي الذكاء فكنت احتفظ بثروتي في احد ادراج مكتبيو انتظر يوم الام لكي اشتري لها هدية و كنت اعتقد ان ما يفرحني بالتالي يفرح ست الحبايب و اكتشفت كم كنت اهبلا
انا داخل علي امي و انا في المرحلة الابتدائية و شايل كيس ضخم ملفوف في ورق هداياو بقي يكاد ينفشخ من الفرحة و اهجم عليها ماما ماما كل سنة و انتي طيبة .. و اقبلها في وجنتيها ملحوسا اياها بكل انواع الطين وبقايا الشيبسي و الشمعدان و اشياء اخري لا اتذكر محتواها الان
و اقولها .. غمضي عنيكي يا ماما تغمض المسكينة عيناها في انتظار هديتها
يا حبيبي يا ابني انت الوحيد اللي فاكرني ياحنين ...
فتحي يا ماما .. اقولها في سعادة ثمرة القلقاس ...
تفتح الحجة التي لا حول ولا قوة لها عينيها و تجد شوال الهدية بين يديها فتفتحة و لسانها يلهج بالدعاء لي ثم..امم..احم ..تنظر بداخل الشوال و تجد بعض الكتاكيت لونهم احمر و قرطاس في حوالي 20 دودة القز وعقد من المكرونة الملونة و كيس مليان دوم
ملحوظة:الدوم نبات ابن كلب مقرف طعمة يخلي الاعمي يفتح

انظر لها و السعادة تبظ من عيني و الترقب لمعرفة رأيها في الهدية و نظرت لي نظرة اشفاق لم افهم معناها الا في الكبر ثم قامت بالتربيت علي كتفي و هي تقول روح يا ضنايا اغسل وشك ربنا ما يحرمك من الهبل ابدا .
وتمر السنون ولا يختلف الحال كثيرا بل ربما اصعب عليها و يجي عيد الام وتديني فلوس علشان اجيب شوية دوم و اعملهم عصير
طول عمرك بتضحي يا امي .
وتمر سنين اكتر ولازم الواحد بقي يبقي عندة دم ولما نويت اقول يا هدايا يااما
بقي لازم اجيب هدية لامي وهدية لام امي وهدية لام ام بنتي وهدية لام بنتي وهدية لام احمد ابن البواب وهدية لام شوقي باتعة كشك السجاير ولام سوسن بتاعة نصبة الخضار
واي ام في محيط قطرة 10 كيلومتر مربع
ولاي ام اشك ولو شك انها قامت بالمساهمة في انشائي او اطعامي

ست الحبايب يا حبيبة و حبيبة كل ما اسمع الاغنية دي ابقي مش قادر
و يبقي نفسي في حاجة حرشة

55 comments:

  1. انا كنت بجيبلهم مصيبة ، اخرشم مناخير واحد واهله ييجوا يشتكوا .. ودي اجمد هدية ، وكانت دايماً تترد لي في نفس اليوم بعلقة متينة

    ReplyDelete
  2. كل سنه وهي طيبة
    و كل سنة و انت بتخبلها حاجات غريبة
    دوم

    ReplyDelete
  3. دوم

    بس فكرة جامدة
    اهو البدوم رخيص
    وعالعموم
    كل سنة ووالدتك طيبة
    وكل حبايبك طيبين

    ReplyDelete
  4. ههههههههه,,,والله بوست لذيذ ودمه خفييف,,,على فكرة انا لو اتجوزت اوبنى جابلى دودة قز واحدة فى عيد الام هدفنه بالحيا لانى بترعب من حاجة اسمها دود ,,,بس الدوم حلو والله بيفكرنا بايام الطفولة الضائعة والست ام عباس فراشة المدرسة,,,سلام

    ReplyDelete
  5. كالعادة .. متألق

    بس نفسي اقرالك بوست جاد

    :))

    ReplyDelete
  6. Abd El Rahman

    طب دي احلي هدية تدخل بيها علي الست الوالدة
    انا اعرف واحد كان بيحتفل بعيد الام في القسم مع علي الاصفر ومجدي خرابة

    ReplyDelete
  7. توتة توتة
    و انتي طيبة يا فندم
    الدوم دة مش غريب دة نبات شيطاني

    ReplyDelete
  8. مش فاهم حاجة
    و انت طيب يا ريس
    في ارخص من الدوم الحرنكش

    ReplyDelete
  9. shlapia هانم

    دود القز دة مفيد جدا للصحة
    انا كنت باخد اتنين علي الريق

    ReplyDelete
  10. طارق باشا الديبوز
    بجد ضحكتني
    اية مفهوم البوست الجاد من وجهة نظرك
    غير كدة انا رجل هاوي
    يعني شغال لمزاجي الخاص :)
    وانا نفسي بتغم لما بتكلم بجد علشان بفوق

    ReplyDelete
  11. ربنا يخليها لك يا رب

    ReplyDelete
  12. بوست جامد جدا
    وعلى فكره احلى هديه فعلا هى الدوم

    انا لو ابنى جابهولى حعيشه طول عمره ملك
    وربنا يخليلك مامتك

    ReplyDelete
  13. hahahahahahhahahahhahahahaaahahhahaaaaaaaaaaa :D :D :D....yekhreb 3a2alak begad...el omhat lw byakhdo balhom en el tfl el so3'yer dh tefl so3'yer mahma kan :D...msh hyfham we enha lazem tbseto bs han2ol eh :D....m3leshhh....we hagblak taba2 torshyyy

    ReplyDelete
  14. ايه يا مان صباح الخير

    اولا انا لى عندك عتاب وياريت تتقبلو

    احنا اتعودنا على كتاباتك الساخرة الجميله وبستمتع بيها الحقيقه وحاسس ان من واجبى انى لما اختلف معاك او مايعجبنيش شىء انى اقولك دا اذا سمحتلى يعنى , اولا مينفعش اننا نذكر اسم رسول الله صلى الله عليه وسلم ونستفتح بيه كلامنا وبعد كدة نذكر كلمه قبيحه شويه( نبات ابن كلب ) على الرغم من ان الدوم دا نبات مش شيطانى بل هو نبات من خلق الله وماينفعش اننا نعيب على شىء من خلق الله دا بخصوص الدوم . وحاجه حرشه مش عارف مش هاضم منك الكلام دا خالص اتعودت منك على كلام فايق وموزون اكتر من كدة

    تانى شىء ان موضوعك حاسس انه خارج عن اللى احنا متعودين عليه مش عشان عيد الام قرب يبقى نكتب عنه حتى لو كلماتنا مش موفقه مش شرط يا اخ جعان
    اهم حاجه الكلام يبقى ليه هدف

    تالت حاجه كلامك فى التعليقات انك راجل هاوى وشغال بمزاج ونفسك بتغم عليك لما بتتكلم جد عشان بتفوق ؟

    يعنى ايه تفوق ؟ هو انت بتبقى مش فايق وانت بتتكلم جد

    اخى جعان ياريت ماتزعلش منى دا مجرد عتاب من اخ لاخوة واعتبرنى اخ اصغر

    ياريت تكون دى كبوة من كبوات اى فرس عربى اصيل وماتكونش دى النهايه .

    محمد فوزى .

    ReplyDelete
  15. anima
    نورتي يا فندم

    ehahe
    دة الدوم كلة فوايد ويجلي الصدر

    ارتعاشات
    انت عيان ولا اية الحكاية

    ReplyDelete
  16. انا من اهوى ومن اهوى انا

    شوف يا سيدي
    مع احترامي الشديد جد جدا لك والله ولاي فرد اخر يزور مدونتي
    لكن عذرا ما اقولة او اكتبة هو امر شخصي يخصني انا فقط وليس لاحد مراجعتي في طريقة عرضة يمكنك مناقشة افكار او موضوع
    لكن موضوع انك تقول اتعودت علي كلام فايق و موزون مش فاهم و اكلام المكتوب دة مالة طالع بيرقص.؟؟؟
    دة موقف حصل في الحقيقة فعلا و اعرضة كيفما اشاء
    لا استشعر حسن النية في تعليقك
    اذا نصحت اخاك سر فقد نصحته واذا نصحته علانيه فقد فضحته

    ReplyDelete
  17. يا اخى انا ما اقصدش اى اهانه او نيه سيئه والله اعلم بعبيدة الموضوع مش شخصى والله انا ارحب بيك لما توجهنى

    وانا ما وجهتكش انا حطيت تعليق وقولت اللى انا شايفه لكن دا عمرة مايقلل من احترامى وحبى ليك كأخ عشان كدة بنصح وانص نفسى اولا- زمان قالو
    ( يابخت من بكانى وبكى الناس على ولا ضحكنى وضحك الناس على ) احنا هنا فى المدونات قررنا او اخدنا على نفسنا عقد بدون عقد مكتوب اننا نتكلم بوضوح هنا المكان الوحيد اللى مش عاوزين يدخله المنافقين ولا الهتيفه انا ممكن ادخل واقولك الله الله واسقفلك للصبح تحبنى اعمل كدة ولا اقولك على حاجه ماعجبتنيش ؟
    اخ جعان انا زى ماكتبت التعليق اللى فات وقولت على انا حاسه برضو دخلت وقولت على انا حاسه تانى وانا اسف لو خاننى التعبير وزعلت منى . وحتى لو زعلت انا برضو هادخل واقرا كل كتاباتك :( غتاته سلام يا صاحبى
    محمد فوزى

    ReplyDelete
  18. يا استاذ محمد
    الموضوع بالنسبة بعيد كل البعد عن الهتيفة او غيرة
    انا لا اكتب لكي الاقي استحسان الناس
    لا انكر اني بسعد اذا اعجب البعض بما اكتب
    لكن هدفي الرئيسي ليس ارضاء اي ذوق
    بل ارضاء نفسي
    غير كدة بصراحة
    عارف انت لو كنت قلتلي الكلام في اي موضوع تاني كنا هانتحاور للصبح
    ملقتش غير بتاع يوم الام الغلبانة و توقفلي فية يا راجل يا طيب
    خليها للموضوع اللي جاي لانة والله اعلم هايكون سبب خراب بيت ناس كتير :)

    ReplyDelete
  19. ابو ملك
    كل سنة وانت وستو ملك طيبين:)
    بس صبرك عليها
    بكرة هتوريك الويل وكل اللي عملته ف عيد الام قز قز هطلعه على جتتك وزوز ...دول جيل الانترنت يابه

    ReplyDelete
  20. انا جعان

    كلنا بنكتب للمتعه واللذة الذاتيه

    ومنتظر موضوعك الجاى بفارغ الصبر وربنا مايجيب خراب لاى حد

    وياريت كدة تشرف مدونتى بالحضور عارف انك مش بتتمزج من الشعر بس برضو تعليقك يسعدنى .

    محمد فوزى

    ReplyDelete
  21. هههههههههه
    حلو قوي البوست ده
    تصدق كلنا عملنا كده و احنا صغيرين
    بس انا مرة جبت معايا قصب اشتريته من واحد على باب المدرسة
    و ماما مرضتش تدخلني بيه من باب البيت
    :(
    فكرتني بالدوم ايام ما كان عندي اسنان
    هههههههههه
    ربنا يخليلك مامتك و مامة شوقي بتاعة الكشري
    و كل الماماهات في محيط 10 كيلو من بتكم

    :))
    تحياتي

    ReplyDelete
  22. (نضدا)

    تحييك وتسلم عليك يا فندم وبأقولك

    عايزين هدية ساندويتشين شاورما ولاب توب وكارت شحن موبينيل

    وعاوزة كمان ...ايه ....ايه ...ايه ...

    كيلو كباب و 5 كيلو جمبري

    وهاعتبر ان دي هدية في عيد الام بما ان حضرتك يا فندم بتوزع هدايا لكل الناس اللي انت تعرفهم

    وبما اني زملة الحصير في قهوة كتكوت سابقا

    فا طبعا لازم تحطني في لستة الهدايا ولو حتى تخليني اخر واحدة مش مشكلة المهم احجز في طابور كرمك يا جعان

    حقيقي موضوع تحفة زي كل كتاباتك الجميلة

    بس الصورة اللي انت حكيتها في الموضوع فظيعة فعلا تصميم سيرالي منبع يعبر عن فعلا الانبعاج في الاحتفال بعيد الام

    ReplyDelete
  23. يظهر ان السبب الرئيسى فى مرض الضغط و السكر عند الامهات .. هو الدوم اللى عيالهم بيجيبوه ..
    يا خوفى الجيل الجديد يجيب دوم للاباء كمان .. هما مش لغوا عيد الاب ؟؟؟؟

    ReplyDelete
  24. الاخ العزيز استاذ جعان
    بعد السلام والتحية
    انا كمان وانا صغيرة كنت بجيب لماما حاجات غريبة

    بس بطلت اجيب لها اى حاجة اصلا من يوم ما قالت لى يا حبيبتى وفرى الفلوس واديهانى وانا هاشترى حاجة تنفع

    ههههههههههههههههه

    معلش بكرة نتعلم نجيب حاجة تنفع

    ReplyDelete
  25. الست الباشحكيمة الشيماء
    يا فندم صدقيني طلع علي جتتي خلاص قز وبامبرز لبن و مغات

    ReplyDelete
  26. سمباتيك هانم
    عنوان الرشاقة في المدونات :)
    قصب ودة عديتي بية من اباب بالطول ولا انحشر بالعرض
    والله الامهات دول غلابة فعلا
    ويستاهلو يروحو دريم بارك


    انا من اهوى ومن اهوى انا
    ان شاء الله

    ReplyDelete
  27. ابلة ندا
    انتي مالك داخلة علي طفاسة لية الموضوع دة
    وكنتي طول عمرك قنوعة سنتدوتش مربي وبتبوسي ايدك وش وقفا
    علي اي حال يا فندم
    انتي شرفي وهاتي معاكي حاجة تاخدي فيها وربنا المستعان

    ReplyDelete
  28. دكتور المنتديات واللي معالج قلوب الغلابة اللي زينا
    شوف يا سيدي عيد الاب متلغاش ولا حاجة
    بس العيال ولاد الكلب بتطنش
    وبيقولك ماما هي اللي بتطبخ فلازن نماين امورنا معاها
    لاحسن تحطلنا سم في لاكل
    اما الاب مفيش خوف منة

    ReplyDelete
  29. عزيزتي فتاة الجنة
    شوفي دي احسن حاجة فعلا انها تاخد حقها ناشف
    وتجيب اللي علي كيفها
    و اعتقد في النهاية بتصرفهم برضة علي العيال

    ReplyDelete
  30. دا تالت تعليق ميبانشيي
    دي مؤامره

    ReplyDelete
  31. كل سنه و هي و كل أم مصريه بخير
    تحياتي لك

    ReplyDelete
  32. كل سنة وماما طيبة بمناسبة عيد الفطر المبارك

    اعاده الله علينا باليمن والبركات

    وبهذه المناسبة باهدي سلامي ليك يا جعان
    وللاهل والاحباب في السنبلاوين وكفر البطيخ وميت غراب

    وبقولهم
    هابي فالانطاين ضاي فور يو

    باي

    ReplyDelete
  33. يخرب بيت التهييس
    أنا هاجبلك البوليس
    هاقوله إلحق ابن رمسيس
    ده قلعنا بلابيص
    وهرانا سبت وخميس
    وبيضحك علي الأمهات المتاعيس
    وأكلهم عيش وسريس
    حب علي إيد ماما يا عتريس
    دي هي البركة وإحنا الملاحيس
    مع خالص حبي يا عزيز

    ReplyDelete
  34. انا عمي ما جبتلها هدية
    ويوم ما جبتلها جبت كارت صغير واتقطع من بابا
    يلا مش موضوعنا

    المهم ان ربنا يخليلك الست والدتك يارب

    المهم صحيح مش قلتلي عملتوا ايه في الكتاكيت

    ودود القز

    ههههههههههههه
    كنت بربيهم برضه وانا صغيرة بس كانوا بيموتوا مني علي طول

    ReplyDelete
  35. ميمو هانم
    تعليقك و زياجة يا فندم
    احنا مقدرين مشاغل سيادتك
    جايز يكون الكومبيوتر عايز حجارة؟؟

    ReplyDelete
  36. micheal باشا
    وانت طيب يا فندم واتمنالك عيد ام سعيد:)

    ReplyDelete
  37. تصدق بإيه يا جعان
    لما قريتلك وشفت صورك في الديوان
    حسيت إني عارفك من زمان
    إنك ابن بلدي وأنا وإنت مصريان
    ويا ريت تقرفني من آن لآن
    دي حاجة تبسطني كمان وكمان
    مع خالص مودتي من انسان لأخيه الانسان

    ReplyDelete
  38. loooooooool

    kol sana w heya tayba

    w te3eesh w tegeblaha katakeet w dom! :D

    ReplyDelete
  39. ربنا يخليهالك و يخلي كل أم لولادها

    و يرحم أمي و كل الأمهات الي ربنا إختارهم

    ReplyDelete
  40. علي باشا حمدلله علي السلامة يا ريس
    و عقبال ما نشوف عيالك و هما بيحتفلو بيك

    ReplyDelete
  41. قنديل في قلبي
    يا عزيز يا عزيز كبة تاخد الانجليزة
    يا فتحية يا فتحية هايعملو تعديلات دستورية

    ReplyDelete
  42. This comment has been removed by the author.

    ReplyDelete
  43. كل سنه وهي طيبه علي فكره انا اول هدية جبتها لولدتي كانت لوحة من تصميمي انا و انا صغير عملتهالها و اشطه يا جعااااان هههههه اسم زي العسل هات عش و نغمز

    ReplyDelete
  44. يا راجل
    ان عشقت اعشق قمر
    وان استلفت استلف باكو
    مش بريزة
    وبعدين في ايه بينك وبين الدوم يعني ؟

    ReplyDelete
  45. كل سنة و حضرتها طيبة و مامتى كمان طيبة ربنا يخليهالى و يباركلى فيهاو يخللى مامة حضرتك كمان بس فيه حد يجيب دووود ده حضرتك كنت بتجيبه أزاى ؟ و كتاكيت كمان الحمدلله أن انفلونزا الطيور جت علشان حضرتك متجبش لحماتك كتاكيت و شوف حضرتها كانت ردة فعلها هتبقى أزاى و أستفسار أخير ليه يعنى أى أم فى محيط 10 كيلو متر ليه ما يكونش 11 مثلا و أسم بنت حضرتك أيييه ؟

    ReplyDelete
  46. Epitaph
    يا فندم وانتي طيبة احنا في الخدمة لو احتاجتي دوم

    ReplyDelete
  47. smraa alnil
    اهي يا اخوانا واحدة كانت بتربي دود القز زي الحيوانات الاليفة
    ويا تري طعمهم عجبك؟؟

    ReplyDelete
  48. soosa el-mafroosa
    الله يرحم كل موتي المسلمين
    وان شاء الله تكوني ولد صالح و تدعو لامك

    ReplyDelete
  49. عزيزيتي رفقه عمر
    اشكرها علي اية؟؟
    شكلها بعتتلك حاجة من ورايا
    طب كان فيها اكل ولا نواشف؟؟

    ReplyDelete
  50. copa
    اشطة. عسل. عيش؟؟؟
    انت بلدكو منين؟؟
    في فطير؟

    ReplyDelete
  51. احمد سلامة
    يا فندم علاقتي مع الدوم ضاربة في القدم
    ربما كان اول تجربة تغير مفهومي للثمار عامة

    ReplyDelete
  52. Tasneem
    و انتي طيبة يا فندم
    بالنسبة للدود كنت باخدة في قرطاس معقم من ماركة كراريس سطر و سطر
    بالنسبة لتحديد المسافة الا تزيد علي 10 كيلومتر مربع دة راجع لعوامل طبوغرافية جيوجرافية معقدة

    بنت حضرتي اسمها ملك

    ReplyDelete
  53. This comment has been removed by the author.

    ReplyDelete
  54. This comment has been removed by the author.

    ReplyDelete
  55. ههههههههه طيب السنه دي هسكن فى المربع بتاعكم وورينى هتعمل ايه انا بحب الدوم بقى

    ReplyDelete

بعبع وقول اللي في نفسك يا خويا