Monday, April 02, 2007

حدث في مثل هذا اليوم


اليوم ومثلة كل عام في الثاني من ابريل وفي شهر ابريل علي الاخص مليء بالاحداث ففي
سنة 1918 -الجيش البريطانى يدخل فلسطين
سنة 1912.غرقت السفينة تايتانك
سنة 1453-بدأ محمد الفاتح حصارة للقسطنطينية
سنة 1799 - قام نابليون بونابرت اول دعوة رسمية لليهود لتحقيق آمالهم وإقامة كيانهم على أرض فلسطين
1865-اغتيل ابراهام لينكولن احد رؤساء امريكا المطالبين بتحرير العبيد
سنة 1968-اغتيل مارتن لوثر كينج
سنة 1992-بدأت الحرب البوسنية
سنة 1996-مذبحة قانا اللبنانية

شهر ابريل بالنسبة لي مليء باحداث غالبيتها ليست بالسعيدة


ربما الحدث السعيد بالنسبة لي الكئيب علي البعض
هو انة في الثاني من ابريل ولدت انا

وكلما نظرت الي ما فعلت علي مدار هذة السنوات المنصرمة اجدني حققت الكثير و الحمدلله فمنها علي السبيل المثال و ليس الحصر
اقناع زوجتي العزيزة بالذهاب معي الي احد اعمدة الكباب و الكفتة بمصر المحروسة
مش هاقدر اقول اسمة علشان الدعاية و وزارة التموين

نجاحي في توصيل الكمبيوتر و التلاجة و البوتجاز علي شبكة عمل لاسلكية

استطعت العثور علي طريق مختصر الي عملي بة اربع عربيات للفول وكشك حاجة ساقعة

والكثير و الكثير من الانجازات :)

حقيقة ربما اجمل شيء احمد الله علية ليلا ونهارا ابنتي ملك


المهم شوفو بما ان النهاردة عيد ميلادي وانا متسلطن علي الاخر و اخر انبساط
فا لكل زائر سؤال واحد فقط يسألهولي
اي سؤال تاني ب6 جنية

63 comments:

  1. (نضدا)

    اجمل الايام واسعدها

    كل سنة وانت طيب وبألف خير وصحة وسعادة واسرتك سعيدة وربنا يباك لك فيهم ويبارك لهم فيك يارب

    انا مبسوطة جدا اني اول واحدة رديت عليك

    زملة الحصير

    ReplyDelete
  2. كل سنه وانتا طيب يا راجل يا طيب
    بالنسبه للسؤال المجانى انا متنازلك عنه
    وربنا يوفق

    ReplyDelete
  3. (نضدا)

    رجعت تاني لاني سمعت ان كل واحد ليه سؤال يسالهولي بباش وبعد كده السؤال ب 6 جنيه

    طيب ابدأ ممكن ويارب تكون مستعد للاصئلة يا (جعان)سن اسنانك انت بس

    1. ايه اول امنية ..لاء لاء بلاش امنية نقول امنيات اتمنيتها ..يعني لو في امنيات تحب تحتفظ بيها لنفسك مافيش مشاكل ..علشان القر طبعا بس قولنا على الحاجات السطحية ..هههه قصدي الحاجات العامة


    2. هل جبت للناس اللي عندك تورتات علشان الاحتفال عليك ؟

    3. ايه اول هدية وصلتك ؟ واول كارت تهنئة ؟ ومين اصحابك اللي افتكر عيد ميلادك ؟ بصراحة انا كنت ناسية بس انتهزت الفرصة بصراحة واول ما عرفت نقيت لك احسن كروت في النت يا فندم ولا يهمك هههههههه

    4.بتجيب لنفسك هدية كمكافأة في يوم عيد ميلادك ؟

    5.جبت ل كوكو هدية ايه ؟؟؟؟؟؟


    بصراحة يا (جعان) انا مش عايزة اكتب وأسألك أسئلة كتيرة انا عارفة اني لو اتسألتها مش هاحب اجاوب عليها على العام

    لكن في سؤال افتكرته

    6. اصدقائك بالنسبة لك ايه ؟ وخصوصا اني عارفة انك شخصية فعلا من الدرجة الاولى

    وبالمناسبة دي وبمناسبة السؤال ده يا جماعة ااقول على موقف ان في مرة زميلي العزيز زعل واتنرفز معايا وبعدين يعني الموقف فعلا يعتبر
    touch بايخ يعني انا الغلط مني اني قولت له كلام نرفزه وبعدين
    اعتذرت له بس هو فعلا نرفز فعلا

    انا باعترف انه بصراحة فعلا فعلا
    شخصية طيب القلب جداجدا وقلبه ابيض فعلا
    لما هدي بعت لي كارت معايدة من ضمن قائمة الاصدقاء اللي بعت لهم كارت معايدة

    وخلاني فعلا اعرف انه شخصية (جعان)
    فعلا طيب

    ربنا يكرمك يارب عام جديد عليك سعيد
    فاستبق الخيرات الى رب العباد
    في طاعة الله اقرب وادوم يارب

    وابعت لي بقى 5 كيلو جمبري وسبيط ووكباب وشاورما

    ومافيش مانع من تورتة شكولاته من اللي تورتات اللي هاتجيبوها النهارده

    ربنا يكرمك يارب

    في انتظار ردك يا باشا

    ReplyDelete
  4. This comment has been removed by the author.

    ReplyDelete
  5. كل سنة وانتا طيب وجعان يا باشا

    بس نفسي اسألك السؤال ده من زمان

    انتا عندك كام سنة ؟؟؟

    بص انا اديلك 33

    صح ؟

    ReplyDelete
  6. اولا كل سنة وانت طيب يا اسلام

    ثانيا : أحب انا لعبة الاسئلة دي :D

    انت بتروح عند صلاح الكبابجي بتاع باب الشعرية ؟

    ده سؤال مش محسوب

    السؤال التاني

    بتشيش ع الجزيرة؟

    السؤال التالت

    مين ليه الفضل في حبك للقراية والاطلاع

    كفاية كده عشان ميبقاش التاني من ابريل ذكرى أسوء باسئلة تانية

    ربنا يباركلك في ملك

    ReplyDelete
  7. كل عام و انت بخير ... انا برضه من مواليد شهر ابريل...
    بس مش باحتفل ..وخصوصا فى البيت علشان فى الاخر انا اللى بادفع تمن الهدايا و التورتات .. بيضحكوا عليا

    السؤال المجانى: ايه اكتر سنة حسيت فيها بفرق ان عمرك زاد سنة؟؟؟؟

    ReplyDelete
  8. انت اسمك ايه؟؟؟؟؟؟؟

    وسلااااااام

    ReplyDelete
  9. هاوايز ير نيم؟؟يعني عندك كام سنه يا اسلام ؟؟بالانجليذي

    ReplyDelete
  10. يالا حالا بالا هنوا ابو الفصاد
    هايكون عيد ميلاده الليلة اجمل الاعياد

    (اغنية عيد الميلاد المهداه من نضدا وتيزة وجدو وتيتة ونينة ورناواحمد وشادي وفادي ومن الاهل والاحباب )

    ماهو لازم ااقولك كلمتين فرفشة بعد الرسمي يا (جعان)

    كل ده وهانتظر منك رد على كل كلمة انا كتبتها في المعيادة بتاعتك

    ماشي يا فندم
    وهاستنى الهدايا والجاتوه والتورتات

    عيد ميلاد سعيد وعقبال مليون سنة يا ابو ملك

    ReplyDelete
  11. ست الابلة ندا هانم
    و انتي طيبة يا فندم
    سيادتك سألتي 6 اسئلة
    وانا شكلي هايبق وحش لو جاوبت كدة
    وكل واحد هايقولي اشمعني هي
    بس برضة لاجل العشرة انا مقدرش ارفضلك طلب
    السؤال الاول والله ما فاهم منة حاجة نوهائي ممن الترجمة؟؟
    السؤال التاني لا يا فندم مليش في الحلو بس روحنا اتغدينا برة في مكان اشبة لجنينة الحيوانات واسعار سلطنةبروناي اتخرب بيتي من الاخر
    السؤال التالت اول هدية قمصان وكرافتات من ست الحبايب
    اول كارت تهنئة من سماح صديقة عزيزة جدا
    اصحابي اول واحد كلمني صديق لي اسمة كريم بالرغم من اني علطول بهزئة وماسح بي الارض وقدام خطيبتة لكن الواد طلع اصيل وكان اول واحد يكلمني
    الرابع :لا مجبتش لنفسي حاجة بس فطرت بيض عيون
    الخامس لا كوكو اديتني بامبرز هدية بلوازمة
    اصدقائي بالنسبة لي
    شوفي هم الناس الوحيدين في دائرة معارفي اللي بكون علي طبيعتي تماما وسطهم
    ودول عشرة عمر طبعا واصدقاء طفولة
    اما اصدقاء اكتسبتهم قريبا او عن طريق كتكوت
    فكثير منهم اعتز جدا بمعرفتهم ودول اطلق عليهم اصدقاء من الدرجة التانية
    لان لسة محدش منهم عزمني علي الغدا
    ندا كفاية كدة عليكي
    خدي بون و استلمي الزفارة بتاعتك من ورا

    ReplyDelete
  12. رفقه عمر
    وانتي طيبة
    شوفي يا ستي اكتر حاجة تنرفزني الا تحترمني في حين اني احترمك باكثر مما تستحق
    و اكثر شيء يجعلني اضايق من شخص كان ممكن يكون صديق
    ان اكتشف انة ندل ومتبع لاهوأة وذو طبع متقلب يؤثر علي علاقاتة مع الاخرين
    رقم حسابي في زيورخ مكتوب علي ضهر الموضوع

    ReplyDelete
  13. khaled
    شوف يا باشا تتنازل عن السؤال الجاني براحتك
    لكن التاني ابو ستة جنية هايندفع هايندفع
    وانت طيب

    ReplyDelete
  14. ابو علي الجامد
    و انت طيب يا حبيبي
    و عقبال يوم فرحك

    لا مش 33
    الاجابة الصحيحة ان شاء الله

    تونس


    هاة كسبت الترانزوستور؟؟؟

    ReplyDelete
  15. عيد سعيد يا أبو ملك
    وكل عام وانت في أعلي فلك
    ويرضي عليك من خلق
    وكل واحد في حبك شبك
    والي يزعلك يبقي هلك
    وتفطر زبادى وتتعشي سمك
    يارب كل أحلامك تتحقق لك

    ReplyDelete
  16. استاذ عبد الرحمن
    اولا اعذرني لاني تعرفت بمدونتك مؤخرا
    رائعة وغاية في الرقي
    مش مسح جوخ علشان حاطط لينك لمدونتي بس دي حقيقة

    المهم انا بروح ابو صلاح فرع ميدان الحجاز
    بتاع باب الشعرية فقدت 3 اصدقائي عندة قبل كدة

    انت تقصد قهوة الجزيرة في فيصل ولا بتاعة مساكن شيراتون ولا اللي في الزيتون
    الجزر كتير حدد؟

    الفضل يعود لجدي المهندس مصطفي رستم رحمة الله علية
    وللاسف لم الحق بة في مرحلة عمرية واعية فقد توفي وانا في الرابعة
    ولكن ترك خلفة مكتبة هائلة فهو كان احد اركان الاخوان المسلمين في الاسكندرية
    وتربطة علاقة صداقة بالراحل حسن البنا
    وامضيت فترة من الثانية عشر و حتي الثالثة و العشرين تقريبا اقرأ فيما خلفة وراءة من كتب
    ومذكرات
    تؤرخ الفترة ما بين عام 1930 وحتي اواخر السبعينات

    ReplyDelete
  17. ازدت شرفا بوجودي معاك في نفس الشهر يا دكتور
    انا كمان علي فكرة مبجبش تورت ولا شمع الا اذا كان حد هو اللي اتطوع و جابهم


    اكتر سنة حسيت فيها ان عمري زاد سنة عندما وربما اكثر
    عندما وجدت نفسي مسؤلا عن اسرة
    و المرة الاخري لما الزمالك كسب الاهلي عام 84

    ReplyDelete
  18. فنان جيولوجي
    بقي الناس هارية نفسها واللي رايح و اللي جاي يقولي يا اسلام يا اسلام
    اسمي كابتن ماجد

    ReplyDelete
  19. Memo
    i have 2 eyes and i can see
    يعني بروح بالاتوبيس

    ReplyDelete
  20. هو كلها ساعتين واليوم يخلص صحيح
    بس كويس انى لحقت نفسى..كنت هزعل اوى لو ماعلقتش فى المناسبه الهابى دى
    وعندى تحبيشه اسئله..يعنى كدا هيكون فى discount:)

    اولا من امتى وانت هاوى الكتابه
    وبالذات بالاسلوب الجميل دا؟

    ثانيا لما بتكون متضايق ايه اللى بتحب تعمله وقتها؟

    ثالثا ايه اكتر مشهد من مسرحيه بتموت مالضحك لما بتشوفه؟

    رابعا اشمعنى اخترت لمدونتك اسم انا جعان؟

    خامسا لو فى حاجه بمرور الزمن بدأت تختفى او ضاعت اساسا منك ونفسك ترجع تانى تبقى ايه ياترى؟

    سادسا لااااازم عاتجول عنديك كام سنه لانى بحس من كتاباتك ان عندك حاجه وألفين:)
    وحركة تونس دى قديمه.. شوف بلد غيرها:)

    سابعا عاوزاك تختار بلد وتديلها رمز.. اى رمز ييجى على بالك وتقوللنا ليه اخترته.

    ثامنا لما ملك بتكون زحلانه واللا بتعيط بتعمل ايه عشان تضحكها؟

    تاسعا ايه الاكله اللى اول ماتشوفها تنزل عليها لحد ماقفصك الصدرى يستغيث؟

    عاشرا هلى انا رغيت كتير وصدعت دماغك واللا عصرت لمونه واستحملتنى:)

    كفايه كدا واتمنى تكون استمتعت بالتورته وماتكنش جبت حلاوه مولد بدالها زى ماخويا عمل:)

    وكل سنه وانت بألف خييييييير

    ReplyDelete
  21. السلام عليكم ورحمة الله وبركاته

    كل سنة وانت الي الله اقرب وعلي طاعته ادوم

    كل سنة وانت طيب يا استاذ اسلام

    سؤالي بقي عن اكبر فرحه في حياتك ؟

    ReplyDelete
  22. جع جع
    ازيك و اخبار مازنجر و جرندايزر و كل العمالقه ايه
    حلوين


    كل ما ادخل المدونه ابقي عاوز اعيط ..
    مش من الضحك طبعا .. ولا من جمالها اوي

    بس عشان ملحقتش ايامك في القهوة

    ايام الردود المتهشكه و ضرب الدنيا 25 صرمة قديمة
    كل رد ليك قريته و كل موضوع دخلته كان ممتع ولا زال


    كل سنة و انت طيب يا عمنا
    بس مش حاف كدا


    سؤال ..

    هل ممكن في يوم ترجع كتكوت تاني قصدي
    ترجع القهوه تاني يعني اصل انت لقب كتكوت دا ميكلش عيش معاك خالص


    كل سنة و انت طيب علي فكره مدونتك في ال
    favorites
    من زمان جدا
    و زبون دائم
    بس بخاف اكتب تعليق لتاكلني

    اعووووعا

    ReplyDelete
  23. كل سنة وانت طيب يا باشا أبريل ده شهري برضه وله عندي معزة خاصة...عموما انت عملت انجازات كتيرة بس اكبر انجاز انا بحسدك عليه هو انك اقنعت زوجتك انها تاكل في المحل بتاع الكباب ده...لأن انا لسه الموفاوضات جارية مع زوجتي لحد ماسيبنا البلد ومشينا...بس لن أيئس

    ReplyDelete
  24. قنديل في قلبي
    يا ريت فعلا كل احلامي تتحقق وخصوصا حلم العشا سمك دة جامد

    ReplyDelete
  25. انسة صرصارة
    يا فندم اسألي براحتك انتي متوصي عليكي جامد من ابو قردان

    صعب افتكر بالظبط من امتي بكتب لكن ربما بدأت النشر علي النت من 5 سنوات يمكن

    لما اكون متضايق بكلم جدتي فهي سيدة اقسم انها تصلح لادارة امة

    اكتر مشهد في مسرحية في العيال كبرت لما لبسو جلاليب ويونس شلبي غني جاموسة راحت تقابل جاموسة

    اسم انا جعان هو اسمي الحركي منذ ان كنت في منتدي هريدي وقهوة كتكوت
    وهو يرمز لجوع المصريين علي جميع الاصعدة سواء مادي اجتماعي ثقافي طبي الخ الخ

    الشيء اللي فقدتة واتمني رجوعة بشدة هو الامبالاة

    مفيش اختيارات؟؟

    مصر رمز الممبار
    ولية اخترتة
    لانة اقرب شيء لشكل المصريين


    لما ملك بتكون زعلانة بلبس البنطلون بتاعها في راسي و هاتك يا ضحك


    بالنسبة للسؤال الخاص بالاكل
    انا يا فندم باكل اي حاجة اقصرمني بلا تميز او تحيز

    رغيتي جااااااااااااااااااااااااااااااااااااامد
    وعصرت 12 كيلو لمون اضاليا وحطيت زتونة كالاطاطا

    وانتي طيبة يا فندم

    ReplyDelete
  26. خمسة فضفضة
    وعليكم السلام
    وانتي طيبة يا دكتور
    حقيقي اكبر فرحة في حياتي كانت لما اصبح لي القرار في اختيار الوان هدومي ودة كان في عمر الخمس سنوات
    انا مبحبش الالوان و خصوصا الازرق وكانو هاريني هدوم زارقة و انا طفل

    ReplyDelete
  27. ketchup
    باشا
    مزنجر بيسلم عليك وبيقولك افروديت بطنها قدامها كيلو ولازم تصلح غلطتك والانسان الالي ابو مناخير كبيرة شبهك


    ويسعدني جدا جدا ان وجودك في مدونتي دة انت صاحب بيت
    بالنسبة لسؤالك هلي ممكن ارجع منتدي هريدي
    حقيقي محدش عارف بكرة ممكن اية اللي يحصل
    لكن حاليا معتقدش اني هارجع

    ويا فندم ليا كل الشرف انك متابع لما اكتب
    وشوف طول ما التعليقات كلها نعم ويعيش جعان تبقي حبيبي وصاحبي وكفأة
    تقول لا تعترض تشجب
    اعصرك انزل منك مدونين صغيرين

    ReplyDelete
  28. استاذ يعقــــوب
    طب كل سنة و انت طيب بقي
    ابريل ماليان ناس وانا اللي كنت فاكر نفسي فية بطولي

    ولا تيأس الصبر ثم الصبر
    حاول تحطلها قطع صغيرة وسط المكياج

    ReplyDelete
  29. تصدق فكرة جامدة يا إما تقتنع و تحبه يا إما هيجلها قرفه من المكياج و توفر

    ReplyDelete
  30. كل سنة وانت شبعان ويطعمك مايحرمك

    ReplyDelete
  31. بجد انت جميل فى كتاباتك بعد ابن بهية انت رقم اتنين يا ابو مللك سؤال على الماشى من غير زعل انت اسمك اية يا اسلام؟

    ReplyDelete
  32. الجزيرة اللي ورا السراج ، وشكراً على كلامك الجميل يا باشا

    ReplyDelete
  33. استاذى بمناسبه عيد ميلادك بعتالك تاج هديه ممكن من فضلك تقبله هو موجود عندى فى المدونه

    ReplyDelete
  34. مجهول
    يا عم المجهول
    انا قلت 100 مرة اسمي كابتن ماجد

    ReplyDelete
  35. استاذ عبد الرحمن
    عارف طبعا القهوة اللي بتكلم عليها وان كنت عارفها شكل مش اسم
    بص انا ساعات بكون قاعد في فرح اللي ورا السراج برضة
    هو مكاني بيتوقف علي عامل الشيشة

    ReplyDelete
  36. يا رفقه
    خلاص اتدبست في التاج و علم وسيتم اجراء اللازم يا فندم

    ReplyDelete
  37. جعان باشا كل سنه وانت طيب وبخير وبصحه وسعادة يا كبير

    وربنا ينولك كل اللى بتتمناة وخصوصا اكلات السمك شكلك حريف سمك زيى

    بالمناسبه دى احب اعزمك على حجرين معسل من بتوع زمان بما انك عارف الزيتون يبقى اكيد عارف المطريه
    ولو عارفها يبقى عارف ( وادى الملوك ) اتمنى تقبل دعوتى المتواضعه
    دى لو موافق مش عارف اسيب تليفونى ازاى عشان نتفق ؟
    ممكن اسيب التليفون فى الكنترول ولا ايه ؟

    عموما هاستنى ردك و متنساش تسلملى على ملك عقبال ماتشوفها عروسه كدة يارب .

    ReplyDelete
  38. Kol sana wenta tayeb ya basha we 3o2bal matefra7 be malok :D,
    so2ale: yaret wenabe ya basha teb2a teb3atle 3enawn 3amod elkabab dah 3ashan lama arga3 ab2a a7'od elmadam 3ando
    :D.

    ReplyDelete
  39. (نضدا )

    يا كاتبن ماااااااااااااجد يا ابني

    ههههههههههههههه

    انا قصدي ايه امنياتك اللي اتمنيتها في اليوم ده اللي هو كان امبارح

    ولو مش عاوز تقول امنيات على العام مافيش مشاكل

    ربنا يكرمك يا اسلام
    وشكراً انك بتعتبرني صديقة عزيزة جدا


    جيب بقى شوية الجمبري اللي اتفقنا عليهم
    مش تديني شوية زفارة
    يععععععععع

    ReplyDelete
  40. كل سنه و أنت طيب و عقبال المئويه
    تحياتي لك و حطنش السؤال المجاني

    ReplyDelete
  41. كل سنة و انت طيب يا جعان
    عقبال مليون سنة

    ReplyDelete
  42. كل سنه وانت طيب يا جعان
    ويا رب تاكل لاحسن انت صعبان عليا اوى والله
    ربنا يفك جوعك

    ReplyDelete
  43. سنة حلوة يا جعاان
    سنة حلوة يا جعااان
    سنة حلوة يا جعاااان
    سنة حلوة يا جعااااان
    سنة حلوة يا جعاااااان
    سنة حلوة يا جعااااااان
    سنة حلوة يا جعاااااااان
    سنة حلوة يا جعااااااان
    سنة حلوة يا جعاااااان
    سنة حلوة يا جعااااان
    سنة حلوة يا جعاااان
    سنة حلوة يا جعااان
    سنة حلوة يا جعااان
    ---
    فين التورتة بقى؟

    ReplyDelete
  44. تعليقا على الصورة
    كميلة بوتي بوتي يا سكر
    اندغ

    ReplyDelete
  45. الله يرحم اموات المسلمين
    مبروك
    قصدى
    احم
    كل سنة و انت طيب و انجازات تعبر عن مدى ما تتمتع به من قوة عزيمة
    و احب اهديلك اغنية عيد الميلاد بمناسبة اسمك
    :)
    اريد فرخةاااا
    رائحتها فايحةاااا

    جطر محمل فطير
    حمل يا بوى سليج

    و السؤال
    انت ليه جعان؟
    ربنا يخليلك ملك

    ReplyDelete
  46. احنا بنحمرق في الاجابه بقا؟؟؟

    ReplyDelete
  47. انا من اهوى ومن اهوى انا

    اللي يسأل مايتوهش يا ريس
    الفكرة بس اني مبخرجش برة كردون مدينة نصر مسأا علشان علي مراقبة
    بص دة ايميلي
    و ان شاء الله اول ما اكون قريب من المنطقة عندك هاديك الو
    anaga3aan@yahoo.com

    ReplyDelete
  48. السلام عليكم
    بجد بجد اسلوبك جميل وعرضك لذيذ للموضوع

    واللي عجبني في الامر اكتشافك للطريق المختصر الذي به 4 عربات فول وكشك حاجة ساقعة

    ربنا يكرمك في ملك ويرزقك الزرية الصالحة

    والف سلامة عليك وربنا يجعل شهر ابريل وكل الشهور خير عليك وعلي امة المسلمين

    انا معنديش اي اسلئلة...عشان السؤال لغير الله مذلة يا بيه....

    دمت في خير

    ReplyDelete
  49. كل ينه و انت طيب
    واخبار المستشار الخرفان اللي كان بيطالب بقفل المدونه بتاعتك ايه
    تحياتي
    الدبور

    ReplyDelete
  50. الف الف الف مليون مبروك عقبال مليار وربع سنه بص هنتقابل تحت كوبري 6 اكتوبر اديك هديتك ولو سمحت بقي اطلع جدع معانا واشرحالنا ازاي عملت الاسلكي ده شكله اخترع هيكسر الدنيا

    ReplyDelete
  51. Hello!
    Very, very nice. thank you
    have a good day

    ReplyDelete
  52. حقيقي انجازاتك كويسة

    لكنك نسيت حاجتين مهمين جدا في شهر أبريل نسيت تقولهم

    الحاجة الأولى..انه في أبريل سنة 1928
    كانت الحاجة-الله يرحمها- ام السيد الريس حامل في الشهر التامن في الريس
    -الله يطول في عمره- ماشي يا امن الدولة..انا بعلي صوتي اهه وبدعي للريس

    الحاجة التانية:
    انو في شهر ابريل من السنة دي انت كتبت الموضوع ده

    و د م ت م ب ع ا ف ي ة

    ReplyDelete
  53. كل سنه وانه طيب يافندم
    وعقبال مليون سنه

    وانا مش شريرة علشان كده مش هسئل عندك كااااااااااااام سنه

    انا هسئل ملك عندها كام سنه؟

    :)

    ReplyDelete
  54. لالالالالالالالالالالالالالا
    دة انا جايه متاخرة اوي كدة
    كل سنة وانت طيب
    طب فين التورت ولا هتاكلوها علينا كمان مش كفاية كلتوا علينا المسطردة
    اكممنا شعب فقير

    انا بقي مش هسالك لا علي اسمك ولا علي سنك
    انا عارفة هجيبهم ازاي
    ليا طرقي الخاصة
    بس هسالك انت علي طول جعان كدة؟؟
    وكل سنة وانت طيب تاني مرة

    هابي بيزي يويو ماجتش
    هابي بيزي يويو ماجتش

    ReplyDelete
  55. كل سنة وأنت طيب وعقبال ما يجى شهر أبريل فى يوم من الأيام وتشوف فيه ملك عروسة

    ReplyDelete
  56. Egypt Designers
    كامل باشا منورنا يا عمنا
    ولما ترجع مصر يا ريس اخدك بنفسي شخصيا انت و المدام عند اكبر اصرح الكباب و الكفتة في مصر


    نضا هانم
    اتمنيت اتغدي مسقعة وقلقاس لكن ليس كل ما يتمناة المرء يدركة


    micheal
    و انت طيب
    ونقفلك في يومك


    دكتور نرمين
    و انتي طيبة يا دكترة


    iman
    الله يخليك
    وياريت تكتري من الدعوات دي

    ReplyDelete
  57. مدام سمباتيك
    مش معني انك لغمطي الصفحة اغاني
    انكي هاتشوفي حاجة من التورتة
    انت شكلك السكر عندك وراثي في العيلة اونا قلبي عليكي
    حتي باين في كلامك نص الحروف واقعة


    khaled
    انت داخل تفول في وشي
    انا جعان لية؟؟
    معلش سؤال مش منطقي
    زي ما اسألك انت عطشان لية؟


    ميمو
    محدش بيحمرق ولا حاجة
    انتي بس اللي مخديش بالك

    ReplyDelete
  58. الراقص مع الذئاب
    وعليكم السلام
    الاكتشافات دي مكنتش بالياهل دي نتيجة علم ودراسة وسهر ليالي

    الدبور
    وانت طيب ياريس
    بالنسبة للمستشار معنديش فكرة
    انا اللي عايزني يجيني انا مبروحش لحد

    copa
    الاختراع دة انا واحد علية براة اختراع من هيئة ام محمد العلمية
    فا مش بالسهولة دي افرط فية

    ReplyDelete
  59. david santos
    thank u man
    وطلعنا العالمية يا عيال



    خالد اللي مش خالد
    اية دة انت مذاكر تاريخ كويس ماشاء الله
    نسيت تقول انها كانت بتتوحم علي ورق دستور بالفريك


    محض روح
    يافندم الله يكرمك
    ملك الان تبلغ من العمر عام الا نيف
    وبرضة مش مقياس يقاس علية

    smraa alnil
    انسة انوووج
    ولا متأخرة ولا حاجة خشي علي الكنترول وسلمي الصنية اللي معاكي
    واينعم انا معظم الوقت جعان
    وقولي لطرقك تحترس نفسها

    وجع دماغ
    وانت طيب يا ريس ويرزقك الذرية الصالحة

    ReplyDelete
  60. كل سنة و انت و اسرتك يا رب بخير
    و يديم عليكم الصحة و السعادة و يبارك لكم فى ملك

    متنازله عن سؤالي لغيري
    كفاية عليك اسئلتهم ههههههه
    ربنا يصبرك على ما بلاك

    ReplyDelete
  61. ام منة
    ازيك انتي و ازي منة
    ليكي وحشة يا فندم
    بعدي علي مدونتك كتير بلقيها مضلمة لعل المانع خير

    ReplyDelete
  62. ههههههههه وانا النهارده عيد ميلادي وقاعده هنا تعرف ليه هو ده السؤال ابعت الاجابه على كوكب الخرفان

    ReplyDelete
  63. كل سنه وانت طيب يا اسلام باشا وياريت لما تيجي الرياض نتقابل لو تحب ونتعرف بيك سخصيا

    عربي سخصيه

    ReplyDelete

بعبع وقول اللي في نفسك يا خويا