Friday, April 06, 2007

انا و الفسيخ و هواك

تعريف الفسيخ لمن لا يعلم هي اسماك وافتها المنية منذ ما يقرب من عام علي الاقل و استطاع الانسان بمعجزة الحفاظ علي تماسكها
ويطلق علي صانع هذا النوع من المعجزات الفسخاني
بمناسبة حلول يوم شم النسيم المبارك اعادة الله علينا باليمن و البركات تعالو اصدعكو كالعادة معايا شوية
تولد لدي شعور غريب بالتسامح في الايام المفترجة دي من يومين كنت ضارب البواب علقة و ماسح بية الارض و لعنت لة الاخضرين روحت رايحلة امبارح و قلتلة يا جمعة اقتص مني يا جمعة
و قام فعلا برفع ايدة محاولا الاقتصاص لكن للاسف لم يمهلة القدر فقد اصابتة سيارة طائشة يقودها شيخ طائش بالرغم من ان جمعة كان واقف في مدخل العمارة جنبي قدرة يا اخوانا و محدش في ايدة حاجة ..
.فاقتربت منة و قد افترش الارض ممدا يبدو و كانة بيطلع في الروح حاولت القنة الشهادة ...
يا جمعة لا اله الا الله محمد رسول الله ...ينظر لي نظرة غريبة بها استرجاء و استعطاف قائلا ... الفسيخ .. صفيحة الفسيخ يا بية .....-فسيخ اية يا جمعة ؟؟؟
اقولها مندهشا ..جمعة و هو في النزع الاخير.... في صفيحة فسيخ دافنها في الجنينة يا بية علشان يوم زي دة . و النبي يا بية طلعها ووزعها علي روحي في الحديقة الدولية اجيبة و الدمع يكاد ينفطر من عيني .
متقولش كدة يا راجل بكرة تقوم و تبرطع و تسمم الناس بنفسك ...يتحشرج صوت جمعة ...و يطلق صرخة مدوية .... فسيخييييييييييييييييييييييييييييييييييييييييييييي ااااااااااةةةةةةةةةع وتهمد حركتة ...
.بعد ابحاث مكثفة علي الفسيخ و مشتقاتة ثبت الاتي ان 90 في المائة من المجرمين شديدي الاجرام يتعاطون الفسيخ
ان الاطفال في الاسر التي تتناول الفسيخ يولدون بعتة منغولي من النوع الذي لا شفاء منة المجتمعات المتقدمة التي لا تعرف الفسيخ لم يسجل بها اي حالات للسرطان
70 في المائة من جرائم العنف ترتكب في حلال 24 ساعة من تناول الفسيخ
و الفسيخ مسبب للادمان فلا احد استطاع التوقف عن تعاطية بعد اول مرة ..
ان العلماء الذين يتعاطون الفسيخ يفقدون القدرة علي التميز بين الحقائق العلمية و تقلية الملوخية فعلي السادة متعاطي لفسيخ ابلاغ الجهات المعنية وطلب العلاج المتوافر بالمجان في جميع الشفخانات
وطبعا لا يمر اليوم دة الا ويتحفنا التفزيون المصري بكل انواع زبالة البرامجة التي تفتق عنها عقول المعدين المرضي بحالات عتة و تبول لا ارادي
الهي يقطع خلفهم زي ما قطعو خلف البلد
نهار ربيعي جو معتدل الناس خارجة في الجناين لا بيها ولا عليها ومد>يعة نصف قبيحة نصف غبية
تنتعل ميكرفون في ايدها وتحاول دفسة في وجة اقرب شخص ليها قائلة:

سيداتي انساتي النهاردة و في يوم شم النسيم
و بين المواطنين في احد الحدائك بمدينة نصر هانكابل الجماهير و نشوف هما بيقضو ازاي يوم شم النسيم

تقترب من احد الاطفال و تسألة في حنان مرعب
اسمك اية يا شاطر ؟
شريف...
اسمك شريف اية؟
الطفل في خوف
معرفش
يعني اية ما تعرفش.. ابوك اسمة اية ؟
الطفل بعد ان بلل سروالة
و الله العظيم يا ابلة معرفش
يعني اية ما تعرفش...
ابوك اسمة اية يا ابن القديمة
الطفل بعد ان بلل سروال المخرج
يا ابلة انا يتيم انا جاي في رحلة مع الملجاء


تجد طفل اخر و بعد ان تاكدت انة جاي مع ابوة و امة

اسمك اية يا حبيبي
الطفل ينظر اليها و قد بدت علية حركات عصبية من هز رقبتة و حول طفيف من عينية يتبع حركة انفة
و يقوم بلسع نفسة علي قفاة من حين لاخر ...
اة اسمي .. اسمي
يجذب الطفل ابوة من بنطلونة بابا انا اسمي اية
ينظر لة الاب في حنان ابوي
اسمك عمرو يا حبيبي
ينظر الطفل لمذيعة
اسمي مروة يا طنط
في سرها ..
يا مثبت العقل في الراس
طيب يا مروة يا حبيبي
انت بتحب مصر ؟
الطفل في سعادة
انا بحب الفراخ البانية



مواطن اخر

تقترب من احد المواطنين و قد بدا علية البلة مع خروج سواءل من فمة
و تدب المكرفون في بقة
نتعرف بحضرتك
محمد احمد محمد احمد 3 علوم انشاء الله
يا تري يا محمد بتقضي شم النسم فين ؟؟
(مع العلم انهم فعلا في المكان اللي الراجل بيتفسح فية)
بقضي يومي وسط الخضرة و الفسيخ انشاء الله
تدب المكرفون في بقة مرة اخري و تسألة ..
عندك ولاد .؟
اة عندي 2 ان شاء الله محمود و ...
تقاطعة
و متجوز علي كدة .؟؟
طبعا يا ستي ...
و مراتك ست ....
الرجل في سعار
امال راجل ...
و هي تضحك
انا قصدي ست بيت
المواطن في نفاد صبر
ايوة انشاء الله
طيب يا محمد تحب تقول اية لشعب مصر؟
ينظر المواطن الي الكاميرا و يقول
يا شعب مصر بعد كل سنة و انتو طيبين شيلو الولية دي من فوقي لاموتها

52 comments:

  1. بقى روحت للبواب وقولتله : اقتص مني ؟

    هو في حد يقدر يعملها ؟

    عالعموم .. انا من الناس اللي بتكره ريحة الفسيخ ..وباشمه من بعد كبير .. اكمني ديب يعني !

    ReplyDelete
  2. انا بحب الفسيخ اوي ان شاء الله
    الدلع ان شاء الله

    ReplyDelete
  3. كويس انى عملت احتياطاتى وكممت قرونى قبل ماقرا المكتووووب.

    انا هعمل مذكرة احتجاج بالنيابه عن اخويا الربيع ولو الفسيخ دا ماسابش الاراضى المصريه بالذوق انا هجيبله البعبع ابو بندجه كلاشانكوف.

    والله يكون فى عونك ياأسامه يامنير من بعد اللى جعان قاله.

    ReplyDelete
  4. السلام عليكم ورحمة الله وبركاته

    ههههههههههههههههه
    نسيت كمان اغنية الدنيا ربيع والجو بديع قفلي علي كل المواضيع
    اللي التليفيزيون بيفضل يذيع فيها طول النهار ، والاعلانات اللي بتنادي بعدم اكل الفسيخ مع ان المخرج بيبقي قاعد ورا الكاميرا و قدامه اد 3 ،4 كيلو فسيخ وبصل اخضر لزوم المزاج
    حاجات كتير بتسبب انفجار المراره بيذيعوها في اليوم ده
    فعلي كل واحد خايف علي مرارته يبعد عن التليفيزيون والحدائق العامه
    ويلزم بيته هو والفسيخ بتاعه


    في الآخر احب اهدي فسيخه لبابا وماما وتيته بالقاهره وطنط بالاسكندريه وعمو باسيوط ، والاهل والاقارب بطنطا
    واشكر الساده المسؤولين ورجال الاستاد
    والامن المركزي وعم جمعه البواب الله يرحمه

    ReplyDelete
  5. انا رأيى نبعت صفيحة فسيخ متفجرة .. للسادة اعضاء مجلس الشورى و مجلس الشعب .. والمجلس المحلى .. واى مجلس .. و أطلب بتعديل الدستور .. ويكون الفسيخ من اساسيات المواطنة ..

    على فكرة الفسيخ ده من اصعب الحاجات اللى فى الدنيا .. الفسيخ المالح .. مش الحلو .. البكتريا ماتت فيه اصلا .. مقدرتش تعيش فيه

    ReplyDelete
  6. انا بس عايز اعرف هما بجد بيطيقوا يكلوه ازاي .كمان انا عايز اعرف انت بتجيب الكلام الحلو ده منين

    ReplyDelete
  7. يا باشا خالي بالك الفسيخ ده مش بس في مصر لا ده كمان موجود في طول من انضف دول العلم زاي الدول الاسكندنافية السويد والنرويج والدنمارك و فنلندا و كمان موجود في بلجيكا و محبوب جدا طبعا مع اختلاف المسمى بس هو هو...واديك شايف اهي الدول ده من ارقى الدول و اعلاها مستوى و دخل كمان...فالمشكلة مش في الفسيخ نفسة المشكلة في طريقة طعاتيه وتعاملنا معاه

    ReplyDelete
  8. هههههههههه

    كل سنة و انت طيب ان شاء الله

    مافيش قصة عن الرنجا ان شاء الله؟

    :)))))

    ReplyDelete
  9. استاذ جعان
    الفسيخ بيشبع
    بس بيعطش
    ودي مشكلته
    اتفضلل الصفحة دي ..للاهمية

    http://www.islamway.com/?Islamway&iw_s=Article&iw_a=view&article_id=702

    ت ح ي ا ت ي

    ReplyDelete
  10. كل سنه وانت طيب ياجعان ..اوعى بقى تاكل الكلام ده مش ناقصين تسمم

    ReplyDelete
  11. نور العظماءSaturday, 07 April, 2007

    ÷ههههههههههههههههههههههههههههههههههههههههههههه

    الفسيخ بجد سم يا جماعه بجد شغل عظيم جداااا ادعوك لزيارة موقعي

    www.nourhetler2006.jeeran.com
    وشكرا

    ReplyDelete
  12. فسيخ ايه بس ربنا يجعله بعيد عني

    مش عارفه الناس بتاكله ازاى
    حد ياكل سمك بايظ

    :(

    ReplyDelete
  13. موش عارفه ليه افتكرت اغنيه بتاعه هانى شاكر تقريبا بتاعه
    اول مصابيح العلم انتى علمتى يامصر ونورتى
    اول زرع انتى اللى زرعتى اول خط انتى اللى رسمتى بس نسى يقول اول فسيخ انتى اللى اكلتى
    انا كل ماشم ريحت الهباب ده اعوذ بالله
    عمرى مافكرت اخرج من بيتنا فى شم الفسيخ قصدى شم النسيم ده عشان الروائح الهايله والمتنزهات العظيمه اللى مليانه زبا... أقصدى خضره
    وبعدين قولى ياجعان هو انت عسل اوى كده ليه
    مش ده موسم فسيخ برضه؟
    تحياتى ولو شبعت ابقى سيبلى الباقى

    ReplyDelete
  14. الديب
    ايوة يا ديبو قلتة اقتص
    فيها حاجة دي؟؟

    توتة توتة
    ان شاء الله تلبك معوي ان شاء الله


    SoRsaRaa
    شوفي انا متاكد ان في دول من التحاد السوفيتي بتستخدم الفسيخ كاداة قتل كيماوية

    ReplyDelete
  15. خمسة فضفضة
    يا فندم الاشاعات بتقول ان في اليوم دة
    كل العاملين في التفزيون بيقبضو مترباتهم كراتين فسيخ
    و الحوافز بصل


    ابعت صندوق فسيخ للجماعة دول يا جاااااابر

    ReplyDelete
  16. يا دكتور
    الناس دي محتاجة ما هو اقوي تأثيرا من الفسيخ
    متهيألي سندوتشات كلاب ميتة تكون اوقع

    ReplyDelete
  17. ههههههههههههه
    :D حلوه اوي التدوينة دي
    بس انا مش ناوي على فكرة اكل فسيخ
    رنجه ممكن
    ايه يا عم ده
    يللا بلا قرف
    شكلي هصوم بكره
    سلام

    ReplyDelete
  18. لو علي العتة المغولي فأنا أحلفلك أن أكتر من تسعين في المية من الشعب عند الحالة دة ودي بيسموها في كتب الطب الفسيخوما أو الفسيخومانيا وتزداد بكثرة وقت الأنتخابات والأستفتاءات.وهي من الأمراض المستعصية الي ملهاش أي علاج عندنا .ربنا يكفينا شرها.علي فكرة أنا عامل مدونة جديدة ياريت تشرفني.تحياتي

    ReplyDelete
  19. مجهول
    انا بجيب الكلام الحلو دة من الفسخاني

    يعقوب باشا
    يا عمنا انا معترضش علي وجود الفسيخ
    بس لامؤاخذة لما بت بيضة وزي لهطة القشطة تاكل فسيخ ويجيلها تسمم
    طيارة هليكوبتر مرسيدس ودكاترة علي اعلي مستوي
    و الدنيا تقوم متقعدش ومش بعيد يتشال فيها ملكة انجلترا شخصيا
    اما في مصر العشرة من الشعب بقرش

    ReplyDelete
  20. Epitaph
    الرنجا دي غلبانة تيجي اية دي في الفسيخ


    عم خالد اللي مش خالد ومتوهنا معاة
    انا عارف جميع الفتاوي الخاصة باي احتفالات غير العيدين
    يا باشا بس اكل الرنجة حلال
    اعتقد الفسيخ في كراهة

    ReplyDelete
  21. زهرة هانم
    انا لا اقترب من اي حاجة ميتة
    لا تكلكي

    نور العظماء
    الله يخليكي
    وزورت مدونتك ظريفة جدا

    ReplyDelete
  22. متفكرنيش يا جعان احسن ليله امبارح ماجانيش نوم
    مع انى ما اكلتش فسيخ انا واكل رنجه بس

    وطبعا ضربت 3 ارغفه..... وفجأة حصل اللى حصل

    اضطريت اشرب 3 كانز دا غير صفيحتين ميه وختمت باتنين سبازمو كانيولاز
    ( دا مطهر معوى )
    والحمد لله ربنا سترها

    ReplyDelete
  23. ههههههههههههههههههههههه
    احلي حوار تلفزيوني بمناسبة الربيع


    بجد انا نفسي اعرف الناس بتتعاطي الفسيخ ده ازاي


    انا باؤيد الدكتور في فكرة اهداء كام فسيخاية لاعضاء مجلس الشعب والشوري
    همنا يستاهلوا كده وزيادة

    ReplyDelete
  24. ههههههههههه
    عسل يا استاذ جعان

    ربنا يقويك
    و ل ا ت ن س ى ش ر ب اللبن ق ب ل ا ل ن و م

    ReplyDelete
  25. أواااااااااااه يا جعان باشا

    وحشني والله الفسيخ .. بعفنه .. بريحته اللي تودي في غيبوبة .. بس مش عارف بيوحشني

    بقالنا مدة كبيييييرة ماجبناش فسيخ .. بنقضيها رنجة .. أهو حاجة من ريحة الحبايب


    بالنسبة يا معلمي على التناول الأكثر من سخيف في التلافازيون المصري .. فمعروف أصلا أنه أي كلام في كل حاجة .. هاتيجي على يوم شم النسيم ويتعدل حاله ؟!!!! ..صلي ع النبي في قلبك يابا


    وفي نهاية البرنامج .. أحب اسمع اغنية هاناكل الفسيخ ...... ونتفسّخ !!!!!

    سلامات يا كبير ..... بالمناسبة ليك وحشة عملاقة في كتكوت

    ReplyDelete
  26. من لم يمت بالفسيخ مات بغيره
    تعددت الموتات ومبارك قائدو

    ReplyDelete
  27. صراحة عنده حق انا كمان بحب الفراخ البانية
    انا بكرة الفسيخ
    و اقولها لو اتسئل
    و احب الرنجة و لو اخش المعتقل
    اييييييه


    كل شم و انت طيب

    ReplyDelete
  28. عسسسسسسسسسسل يا جعان
    بس اوعي تكون بتاكل القرف دة
    ازعل منك حقيقي

    ReplyDelete
  29. (نضدا)

    انت اكيد يا جعان بتاكل رنجة مش فسيخ

    على كل حال يوم شم نسيم وانت سعيد كل سنة

    لكن قولي يا جعان انت عامة قضيت اليوم ده فين ؟

    اوعى تقول في القناطر


    لكن معذرة كده
    الاخت (نوران ) حضرتك بتقولي (قرف) مع انها نعمة ربنا في الاول والاخر وشوية سمك مالهمش ذنب

    وفي ناس كتيرة بتحب الفسيخ والسردين والرنجة

    انا شخصيا من ضمن الحاجات المخللة دي باحب الرنجة

    ReplyDelete
  30. mesh ma32ool ana mot mn el de7k ,shokran :D:D

    ReplyDelete
  31. محض روح
    مين اللي قال ان دة سمك بايظ
    دة ميت يعني اكلة جناية

    ReplyDelete
  32. شجرة الدر هانم
    ينفرد الشعب المصري
    بقدرة علي التعايش في اي بيئة و اي اجواء وظروف حياة غير ادمية
    و اكبر دليل فعلا عل دة يوم شم النسيم
    و اكل الفسيخ
    و طول ما ندي ضهرنا للترعة
    هايجي واحد ويلزقك علي قفاك

    ReplyDelete
  33. AbdElRaHmaN Ayyash
    مش ممكن علي الاشمئناط بتاعك دة يا اخي
    بلاش تفتش في لقمتك و خلي البساط احمدي

    ReplyDelete
  34. سكتم بكتم
    يا فندم ان العتة ليفر من وجة شعبنا العظيم كفرار الفرنجة يوم الطاعون الاسود

    ReplyDelete
  35. انا من اهوى ومن اهوى انا

    طيب يا براجل و هو اللي انت عملتة دة شوية برضة

    ReplyDelete
  36. واحدة من الاخوان بتحب البلد دي
    في ناس بتتعاطي الفسيخ من الفم و اخري من الانف و البعض من اماكن اخري

    ReplyDelete
  37. ابو خالد اللي مش عارف هو مين
    اللة يكرمك يا فندم اعملك معايا كوباية

    ReplyDelete
  38. سيدوفسكي

    اية التأوة دة كلة
    باين انك مفتقد الفسيخ جدا
    علي فكرة بيتباع منة اقراص وشرب في الاجزخانات

    و انا موجود يا باشا في المودنة الله لا يسامحة اللي كان السبب اني سبت كتكوت

    ReplyDelete
  39. الحاج أبو جمال
    احم اة
    ابو جمال ربنا يخليك لجمال يا ريس

    ReplyDelete
  40. سيادة اللواء القائد سمباتيك هانم
    في المعتقل مفيش رنجة بس بيعملوكي فسيخة

    ReplyDelete
  41. noran
    سيادتك انا لا اقترب من القرف المهم هو يفضل بعيد عني
    و احنا ميرضناش زعلك

    ReplyDelete
  42. نضا هانم
    انا لا باكل دة ولا دة انا باكل كرواسان بالمربي النسواز
    و اليوم دة قضيتة تحت الحوض


    مداخلة يا ابلة الفسيخ ليس نعمة صدقيني
    بل هو عذاب ابن ادم لنفسة و للاخرين

    ReplyDelete
  43. انا اول مرة ادخل عندك
    بس نقدك الساخر عجبني
    وحلو كلامك

    ReplyDelete
  44. هههههههههههههههه
    انا مش بحب الفسيخ

    وبنام في بيتنا

    ReplyDelete
  45. ههههههههههه...]خرب عقلك يا جعان ..أنت يا ابني 90% من مواضيعك بتفطسني من الضحك...لديك أسلوب ساخر أكثر من رائع..لإي انتظار بوست عن الرنجه و التونه
    تحياتي لك و سيبك من كلام جوست

    ReplyDelete
  46. هههههه....جامدة جدا...كل سنة وانت طيب وكل الفسيخ بخير

    يلا سلام لما...الحق ادفنلي صفيحتين عشان السنة الجاية..ههههه

    ReplyDelete
  47. yasmina
    يا فندم نورتي
    ان شاء الله لما تيجي المرة الجاية نكون طابخين ونقوم بالواجب

    ReplyDelete
  48. micheal

    يا فندم انا بتاع الشعب
    و يهمني ان الشعب ينبسط
    علي الله يتمر فيكو وحد يخلي عندة شوية حساسة ويبعت حاجة من طبيخ النهاردة

    جوست مين ما راح في الوبا

    ReplyDelete
  49. واحد زهقان
    يا باشا وانت طيب
    وتدفن صفيح لية ما في 80 مليون صفيحة ماشيين في الشوارع

    ReplyDelete
  50. لعلمك .. امى فتحت عليا الباب وانا بضحك بصوت عالى .. لقيت معاها اتنين لابسين ابيض × ابيض وبيقولولى دخل ايدك هنا يا حبيبي

    بس مش عارف كانوا ماسكين قميص بالمقلوب ليه

    متخلينيش اضحك كدة تانى ... انت فاهم ؟؟

    بالنسبة للفسيخ ده بقى انا بفتخر انى عمرى ما كلته ولا عمرى شفت شكله اساسا

    انا لحد وقت قريب كنت بحسب ان الفسيخ والرنجة واحد
    يلا سلام :)

    ReplyDelete
  51. على فكرة انت بتتريق على الفسيخ

    لمعلوماتك

    الفسيخ دة اكلة مش معترف بيها عالميا
    وصحيا و بدنجانيا


    انما البلد بتاعتنا بتحبة

    سعر كيلو الفسيخ من 15 الى 60جنية مصرى مش استرلينى

    بص

    هات عنوانك
    وانا ابعتلك احلى 2 كيلو فسيخ

    و بلاش جوع..........

    ReplyDelete
  52. هههههههههه انا بحب الفسيخ ومعلوماتك غلط ماما بتعمله قبلها بشهر واحد اجيب لك ولملك

    ReplyDelete

بعبع وقول اللي في نفسك يا خويا