Thursday, April 19, 2007

انا مش معاكو انا معاهم


عبد المنعم محمود
مين عبد المنعم محمود؟؟؟
حقيقي انا معرفوش
ومش عايز اعرفة و مش عايز يكون لية اي صلة بية
لانة بيوجعلي ضميري بيوجعلي صوتي بيوجعلي اي حاجة معترضة فية
بيفكرني بحلمي اللي اتوأد خوفا علي الاخرين ومن الاخرين

لا استطيع ان اري اهلي ثكالي كما رأيت اهلك
لا استطيع ان اترك سريري الدافيء يوما واحدا هاربا من وجة مطاردي
لا استطيع ان لا اتناول فنجان القهوة الصباحي
لا استطيع ان لا اجلس في الحمام مصطحبا الجريدة كيفما شئت
لا استطيع ان لا اجلس علي قهوة ممسكا بمبسم الشيشة وحجر التفاح اليومي
لا استطيع ان لا اري ابنتي يوميا والاعبها حتي تصرخ امها كفاية البنت لازم تنام

لكنك استطعت و استغنيت عن كل هذا بملء ارادتك
يوما نذرت نفسك لقضية وطن وقد تخليت عن كل ذلك
كل ما لم استطع ان اتنازل عنة

حقيقي مش عايز اعرفك مش عايز اعرف اخبارك

56 comments:

  1. انا جعان :
    انكسر جوانا شىء
    هى دى الضريبه ضريبه اى انسان بيتكلم بيتنفس بصوت عالى علشان كدة انا خفت واتوأد جوايا حلمى زيك
    خفت على اهلى خفت عليهم من بعدى زى ماكلنا خايفيين .
    هل دا صح اننا نخاف ؟
    انا بقى مع ربنا
    ولنا الله .
    محمد فوزى

    ReplyDelete
  2. حقاً انه يزيد من احساسنا بالعجز والفشل ، ولكن ان تجاهلنا حتى فلا جديد

    لقد شعرنا بالفشل والعجز بالفعل

    ReplyDelete
  3. الحريه لمنعم

    ReplyDelete
  4. انا من اهوى ومن اهوى انا
    يا محمد
    فلنسر جنب الحيط
    او داخل الحيط ان امكن

    كلنا مع الله

    ReplyDelete
  5. كلما تذكرت القبض على منعم
    زاد لدي الاحساس بتعلم العلم اكثر
    وزاد تصميمي على موقفي من اعداء الملة
    والله لن نتوقف-ان شاء الله-
    وسع يا جدع انته متمسكنيش سيبني اكمل
    لن نتوقف ان شاء الله
    والله يا اخي...هؤلاء ما نقموا منهم الا ان يؤمنوا بالله العزيز الحميد
    ليس المستهدف هو عبد المنعم-وان كنت اخالفه في امور فلا زال الناس يختلفون-
    ولكن المقصود هو الشعار الذي يحمله الاستاذ عبد المنعم
    اقصد الشعر المحظور في دولة الاسلام..........مصر

    ReplyDelete
  6. Mohamed A. Ghaffar
    تجاهلنا للاسف لن يغير من الحقيقة شيء
    هانعمل اية ادي الله و ادي حكمتة

    ReplyDelete
  7. ghost
    والله يا ابني انت بتعمل الشويتين دول مع الشخص الغلط تماما
    اللي انت بتعملة دة ولا يحوق معايا ببصلة
    اخر اليوم امشي من الشغل اقفل جهاز الكمبيوتر انسي اي حاجة خاصة بالنت اساسا
    اقعد علي القهوة اضرب حجر
    اضحك علي نكتة ابيحة جايز
    اضرب سنتدوتش من عند ابو رامي
    لكن اقعد افكر في حد شتمني ولا دمي تقيل علي قلب اللي خلفوة
    صدقني مش انا

    انا بمسح تعليقاتك علشان زفارة لسانك مش اكتر
    عارف انت لو بتشتم من غير اباحة اسيب اللي بتقولة
    ما هو مش لازم تقرف الناس بالموأخذة
    بتاعك
    ان شاء الله تكتب 100 رد في الساعة
    اهو كلة ترتيب علي جوجل ومصلحة ليا

    ReplyDelete
  8. تفتكر هنفضل خايفين لحد امتي

    تفتكر هنتنمني اننا نخش جوة جلدنا ونختفي لامتي

    صدقني مش بقت فارقة
    خفت اختفيت النتيجة واحدة
    هنتكلم ونصرخ النتيجة هتكون ايه؟؟

    حالة الفشل والعجز فعلا تملكت مننا
    وكلنا مع الله

    ReplyDelete
  9. للي باعوا القضية وقالوا آمين
    بالذمة إنت وهو مش مكسوفين
    خايفين علي قعدة القهوة وحجرين
    بعتوا البلد للعملا والفسدانين
    وسيبنا إخواتنا في إيد اللعين
    هما بيناضلوا ويكافحوا عشان مين
    ماهو عشانك وعشاني ولكل المقهورين
    طب هتقولوا إيه لرب العالمين
    كنا خايفين.....؟
    طب يوم الحساب مش هتكونوا مذعورين
    ما إنتوا كده كده ميتين
    النهاردة ولا بكرة ولا بعد حين
    إتقوا الله في وطننا الحزين
    بلاش الوطن.. طب عشان ولادناالصغيرين
    ليه عايزينهم يكبروا مطاطيين
    أنا أدفع فوق عمري عمرين
    بس إبني يكبر رافع راسه مترين

    آآه يا قلبي

    أعتذر بشدة عن لهجتي الحادة بس ده من غلبي

    ReplyDelete
  10. مش عارفه اقولك ايه
    صعب لما تحس انك مش عارف تعمل حاجه
    احساس العجز وحش اوى
    وخوفك على الي بتحبهم
    كتير بيكتف
    فيه ناس كتير بتتظلم وهيه معملتش اي حاجه
    ربنا يرجعو لباباة باسلامه

    تحياتي يافندم

    ReplyDelete
  11. آآآآآآآآآآآه من احساس العجز.

    ReplyDelete
  12. ... صديقى الجعان
    بيان رقم واحد
    نظرا للانتفاش المضطرد ل****
    قررت عمل هدنه ووقف لاطلاق النار
    لكن تاكد
    هذا التعليق لو تم الغاؤه
    اعتبر الهدنه ملغيه من تلقاء نفسها

    بمناسبه تناولك السندوتشات من عند ابو رامى
    حياتك الشخصيه لا تهمنى اصلا
    واعتقد انك كنت تتصنع المرح من اجل طرد التوتر

    والسلام عليكم انشاء الله باذن الله

    ReplyDelete
  13. استاذ خالد
    احترم احساسك و احترم موقفك
    واحسدك علي ما بة من تصميم
    لست يأس
    ابدا
    ولكن ....
    حقيقي لا اجد عذر
    نسأل الله السلامة

    ReplyDelete
  14. smraa alnil
    انجي هانم
    للأسف النتيجة واحدة كما قلتي
    ليس فشل فالفشل محلول و المحاولات مستمرة طالما هناك انفاس تتردد في الصدور
    لكن العجز يقهر الرجال

    ReplyDelete
  15. قنديل في قلبي

    صدقني مكسوف
    فانظر لابنتي و اتخيل
    ايأتي يوم يتحرش بك رجال الامن
    اذا قلتي لا عالية
    اتمدت ايديهم اليكي
    اذا اتي هذا اليوم صدقني سوف اكون غير موجود علي هذة الارض
    ليس خوفا ولكن
    الم تكن أرض الله واسعة فتهاجروا فيها؟
    حفاظا لعرضي وبقايا كرامة
    ان الاختلاف في بلدنا نتيجتة الوحيدة امتهان كرامتك
    واقرب دليل
    ما انالة من سب و لعن في مدونتي
    بسبب شخص لا يستثيغني ودمي كما الحجر علي قلبة
    لمجرد انة مختلف ومختلف علي ماذا علي طريقة تعبيري

    واعذر حدتك بلا شك

    ReplyDelete
  16. محض روح
    منعم اتظلم لما استخدم ابسط حق بشري
    وهو الاعتراض
    فما بالك بمن يظلم وهو لا يعرف حتي معني الاعتراض

    ReplyDelete
  17. علا
    ليت الاة تريح
    لصرخ الناس في الشوارع

    ReplyDelete
  18. Ghost
    ما انا قلتلك
    خلي لسانك نضيف
    وانا اسيبك تبرطع كيفما شئت في المدونة
    حقيقي مكنتش اعرف اني مهم جدا كدة
    لدرجة ان حد يشتمني
    ومتقولش انة العكس
    لان كل ما تفعلة يثبت اهميتي لك علي الاقل
    والا مش ممكن سايب كل اللي وراك واشغالك ومصالحك
    علشان تنقطع علي مدونتي تلعن خاش اللي جابوني

    الا لو انت ماوركش حاجة تعملها ومستني جواب القوي العاملة

    جوجو باشا
    انتقدني كيفما شئت
    العني كيفما شئت
    بدون اباحة
    معرفش ازاي بس سلك امورك
    والله المستعان
    وقصاصي يوم القصاص
    فقد اهنت الكثيرين انا من قبل
    فلا ضير من بعض التذوق من نفس الكأس
    مع الاختلاف انا لا اخجل من مواجهة من انقد باسمي

    ReplyDelete
  19. السلام عليكم ورحمة الله وبركاته

    للاسف لا نملك الا الدعاء له ان يفك الله اسره قريبا ، ولاهله ان يصبرهم الله
    وايضا الدعاء علي اخونا البعدا ان ربنا ياخدهم ويريحنا منهم

    ReplyDelete
  20. اى واحد اختار لنفسه طريق وانه ميكنش زى اى حد فى وسط الناس متدارى ومستخبى لازم يعرف انه اختار الطريق الاصعب وان الطريق ده لازم له تضحيات كتيرة جدا والم وامل ربنا يكون فى عو عبد المنعم وييسر له امره وربنا يثبت على طريق الحق اجمعين

    ReplyDelete
  21. اسألوا الله له التثبيت ..فسؤال أمن الدولة فتنة من فتن الدنيا .. و والده المريض فتنة أخرى .. و... و...
    احيانا لا تظهر المعادن النفيسة الا بكير الحداد ... سيعود .. اقوى باذن الله
    احيانا يكون الصمت وسيلة لها هدف ايضا..
    انكار المنكر يجوز باللسان .. و يجوز بالقلب .. و فقه الاولويات يحتم أحيانا أن يفكر الانسان بان يمشى على الحيط .. او جوه الحيط ..
    فليس شجاعة .. ان تتصدى بدون فايدة .. وتضيع من تعول ..
    الاولويات تختلف من شخص الى شخص ..
    و دى عايزة تدوينة .. لوحدها ..
    معلش يا جعان قلبتها دراما عندك

    ReplyDelete
  22. الأخ العزيز
    أنا مش هعمل نفسي بطل أو فدائي ، دانا يمكن كمان بخاف أكتر منك بس فية حاجتين عاوز أقولهوملك:
    أولا:بما أن المدونة بتاعتك مرصودة كده كده ، يبقي قوول كل اللي في نفسك و فكعن نفسك و ضميرك (ماهي خربانة ، خربانة)ز
    ثانيا: عاوز تشوف اللينك ده.. و قوللي رأيك (مش الحريه تستاهل أي تضحيات)
    تحياتي
    http://files.myopera.com/eldeebs/files/free-mon3em.html

    ReplyDelete
  23. حبيبي في الله إسلام

    ممكن اقولك كلمتين
    الاولى..وهي تعليقا على كلام الاستاذ مجهول...انا مش مع ان الواحد يقول طالما هما عارفني وكده كده خربانة يبقى نتكلم وخلاص...
    لا في حاجة في الاسلام اسمها الموازنة بين المصالح والمفاسد...فاذا ادى تغيير المنكر الى منكر اكبر منه
    يحرم فعل الاول
    وهكذا
    مش معنى كده اننا نبطل نتكلم ...لا هنتكلم ان شاء الله وبما يوافق الكتاب والسنة وبفهم الصحابة والتابعين
    ولكن برضه مش هننسى قاعدة المصالح والمفاسد
    الرسول-ص- في حادثة الافك...كان عارف ان عبد الله بن أب بن سلول هو اللي عمل البلوى دي...ومع كده مجلدوش...طبعا محدش جاهل ييجي يقول اهه الرسول مطبقشي الحد...
    لأ...الرسول وازن بين المفسدة الكبيرة اللي هتنتج جراء جلد المنافق هذا...وهي ان العديد من القبائل ستصيبهم حمية الجاهلية...خاصة الحديثي عهد بالاسلام...
    وازن بين المفسدة الكبيرة دي وبين المصلحة البسيطة اللي هتتحقق وهي تطبيق حد القذف الجلد 80 جلدة
    فالمقصود...مش عايزين نخبط اي حاجة
    عايزين نتحرك بخطوات منهجية موافقة للكتاب والسنة
    طبعا انا مقصدشي شخص بعينه
    انا اقصد الاتجاه العام للمدونين المسلمين

    ثانيا: خذ العفو وأمر بالعرف وأعرض عن الجاهلين
    يا اخي ببساطة بدل ما تشغل بالك بمسح الكومنتات...اعمل زيي...وامنع الانونيمس انهم يعلقوا
    لان الانونيمس ده غالبا بيكون انسان جبان بيخاف يظهر بشخصيته الحقيقية فبيتوارى وراء ستار لا يمكن كشفه
    وده في الحقيقة مرض نفسي...يمكن جوست مصاب بيه
    ربنا يعافينا واياكم
    بعد اذنكم...المغرب اذن

    وجزاكم الله خيرا

    ReplyDelete
  24. أستاذ اسلام ،
    أنا الأنونيموس :) صاحبك خالد ده واضح أنه من النوع الحنجوري حبتين ..ياريت تشكره أنه عرفنا أنه بيصلي .. أنا حبيت أقول حاجه في نفسي و بس ... لكن الله يسامحك يا شيخ:)علي العموم أنا بحترم صراحتك و اعترافك بالتقصير ، و ده اللي خلاني أبعت التعليق ، لأن الواحد بقي يلاقي كتير أوي من الأبطال الورق.. و دول هيفضلو علي طول عايشين في الوهم اللي عاملينه لنفسهم ، و يفضلوا يأيفو لنفسهم أي مبررات سواء بالدين أو غيره ... أما الصرحاء فالأمل فيهم موجود علي طول..
    سلام
    أحمد ... قصدي.. أنونيموس :)

    ReplyDelete
  25. تصدق مش عارفة ارد

    .

    ReplyDelete
  26. بص يا اسلام ، سيبك من كتاباتك الساخرة اللي بتابعها وبتعجبني جدا

    الكلمتين اللي كتبتهم دول خلاصة

    ReplyDelete
  27. عزيزى جعان

    لن يكون عبد المنعم الاخير

    ولكن السؤال هو

    لماذا يجب ان يطارد الانسان و يفقد امنه او امانه فى هذه البلد اذا قال كلمة الحق مشهرا عن و جهه؟

    لماذا ثمن قول الحق غالى الى هذا الحد؟

    كلنا لا نريد ان نرى اهلنا ثكالى

    كلنا نريد سريرنا الدافىء

    كلنا نريد فنجان القهوة فى الصباح


    و لكن لماذا يؤخذ كل هذا من عبد المنعم

    و من كل من يجهر بكلمة الحق

    ReplyDelete
  28. خمسة فضفضة
    يا دكتور
    اخاف ان يأتي اليوم لا نملك حتي فية الدعاء

    ReplyDelete
  29. امام الجيل
    اكيد من علي شاكلة عبد المنعم
    يعلمو تمام العلم بالنهاية المحتومة
    وكسب عداوات الدولة
    لا نملك سوي الدعاء بفك كربة

    ReplyDelete
  30. لا أملك إلا أن أقول حسبى الله و نعم الوكيل

    ReplyDelete
  31. ربنا يفك أسره ويشفي والده

    ReplyDelete
  32. This comment has been removed by the author.

    ReplyDelete
  33. This comment has been removed by the author.

    ReplyDelete
  34. وقع بيان المدونين للتضامن مع عبدالمنعم محمود
    شارك بتوقيعك
    أنشر البيان في كل مدونة تعرفها
    ساهم في حرية المدونين .. وحرية منعم
    http://free4monem.blogspot.com/

    ReplyDelete
  35. eldoctor
    دكتور
    علي العكس انت فعلا قلت ما اريد ان اقول
    ان اختلاف الاولويات من فرد لاخر
    لا يقلل من اهتمامة بالقضية
    فالامر هنا ليس التضحية بالنفس فقط بل بانفس الاخرين
    وهو ما لست مستعد ابدا لفعلة

    ReplyDelete
  36. مجهول
    شوفت اللينك و عارفها من عند ديبو المدون
    غير كدة ما انا قايل كل اللي في نفسي اهو
    انت شايفني محروم من حاجة ربنا يخلي سيادة الريس

    ReplyDelete
  37. خالد باشا اللي مش خالد
    ليس المجال الان لبيان فضل المصالح علي المفاسد
    او درء المفسدة يجوز علي مصلحة الفرد او هلاكة

    الخلاصة اللي تقدر تاخدها من وجهة نظري الشخصية والاخرين مطلق الحرية
    الحرية بالنسبة الي هي وجود اسرتي حولي
    وابي و امي
    في تمام حال
    اذا تعارضت المصالح فسترجح كفة اسرتي بلا تفكير

    اما كوني سايب التعليق لاي حد
    دة لاني مقتنعمن حق اي شخص التعليق سواء اظهر شخصيتة او لا بدون تجريح
    ما هو مش ممكن اللي احنا بنلعنة في الحكومة نعملة بينا

    ReplyDelete
  38. what a deplorable state we reached!

    ReplyDelete
  39. مجهول
    شوف يا عم احمد
    ليس الموضوع بطولة ورقية او وهم مضرمخين فية
    اكثر من في اوقات ليس قدامك غير بطولة خيالية حتي لا تموت كمدا

    يا سيدي الراجل قالك رايح يصلي المغرب
    فيها اية دي
    :)

    ReplyDelete
  40. Sampateek
    وتردي لية خلينا نتفرج كفاية علينا

    ReplyDelete
  41. Abd El Rahman
    الله يكرمك

    hesham
    سؤال تم الاجابة عنة منذ زمن
    ان رفضت الانسياق في القطيع فتحمل ضرب الراعي

    ReplyDelete
  42. أحباء فى الله
    وهذا ما يملكة الاغلبية

    ReplyDelete
  43. bino

    ربنا يفك اسر جميع ضحايا كلمة لا

    ReplyDelete
  44. رفقة
    وحشتينا يا فندم اية اخبارك
    شوفتي تغيبي شوية الدنيا حالها انقلب ازاي

    ReplyDelete
  45. Epitaph said...
    what a deplorable state we reached
    الترجمة
    يالها من حالة مزرية اصبحنا فيها
    انيس عبيد

    ***********
    يالها من حياة لعينة يا اولاد السفلة
    جعانيا للترجمة

    ReplyDelete
  46. جعان انا دخلت مدونات كتير وفيها لوجوهات(الحريه لفلان وفلان)
    انا بصراحه مش عارفه مين الناس دى
    مش عارفه يمكن علشان ماشيه جوه الحيط مش جنبه بس
    واللا يمكن علشان من كتر الهموم والنكد اللى الواحد بقى عايش فيه مابقتش عاوزة اعرف ايه اللى بيحصل للناس
    وكل اللى اقدر اقوله وهو اضعف الايمان
    ربنا ينصر كل مظلوم وربنا ناصر الحق ولو بعد حين
    ومشكور استاذى على اللفته الطيبه دى

    ReplyDelete
  47. SoRsaRaa
    غالبية الناس دي تعود لمنتمين لحزب الاخوان المسلمين
    ومعظمهم معتقل بلا سبب بلا قضية الي ان يتم تأيف القضية علي مقاسة
    لا يملك معظمنا سوي اضعف الايمان حاليا

    ReplyDelete
  48. احمد مؤمنWednesday, 25 April, 2007

    هوا كده كل شويه ناس يعتقلوا وناس يتسجنوا ونعد نولول عليهم زي النسوان ونقول حسبنا الله ونعم الوكيل
    طيب وبعدين وبعديييييييييييييييييين
    ماهو النظام مش هايبطل ابدا طول مافيه ناس بتطالب بالحريه للبلد دي والشعب المنفوخ ده

    احنا برضه كل دورنا هايكون اننا نعد نبكي ونقهر في نفسنا على الناس الشرفاء اللي بيترموا كل يوم وكل ساعه في سجون الكلاب
    انا مش عارف ايه اللي ممكن يحصل
    لاني فاقد الامل ان الشعب اللي عبد حاكمه الفرعون ممكن يثور في يوم ويطالب بحقوقه ويرفض الخضوع والاذلال
    انا ياااااااااااائس

    ReplyDelete
  49. هنفضل كده لحد امتى

    ReplyDelete
  50. اول مره اسمع عن عبد المنعم كان من المدونات كل شويه الاقى صورته ولما قريت عنه الحجات المكتوبه عنه بجد بقى عامل زى ضميرى
    لو الواحد يدخل جوه الحيط بدل ما يمشى جمبها اهون من منظره جمب واحد زى عبد المنعم وغيره كتير

    ReplyDelete
  51. جعان


    ادعوك للمشاركة في استفتاء اكثر 10 مدونات تاثيرا في قرائها

    عل مدونتك تكون واحدة منهم

    اليك الرابط

    http://www.6ef.blogspot.com/

    ReplyDelete
  52. السلام عليكم
    سألت سؤال فى المدونه عندى ويهمنى جدا اعرف رأى المدونين و ازاى هيجوبوه
    عسى ان تعم الافاده
    .
    .
    .
    الدعوه عامه

    ReplyDelete
  53. السلام عليكم
    ربنا يعزك يا اخى وان شاء الله بالعزيمه تقدر تبقى زى الاخ عبد المنعم
    الجهاد هو ذوروة سبام الاسلام
    اللهم اجعلنا من المجاهدين
    اللهم استخدمنا فى نصرة دينك
    اللهم ارزقنا الاستشهاد فى سبيلك

    ReplyDelete
  54. عبد المنعم وقف نشاطه صح ولا غلط اتوجعت للى حصل له

    ReplyDelete

بعبع وقول اللي في نفسك يا خويا