Monday, April 23, 2007

عقبال البكاري يا ابو جمال


جمال باشا مبروك يا ابن كبيرنا
طراطيش الكلام بتقول ان عقد القران يوم 28 ابريل الجاري
والزفاف 4 مايو وهو مايوافق عيد ميلاد السيد الوالد حسني مبارك التاسع والسبعين ربنا يديك طول العمر يا كبير
واهي تبقي تورتة واحدة وكلة توفير
في تكتيم شديد علي الخبر و تفاصيل الزفاف
في الدول المتقدمة و اوروبا ولي العهد لما يتجوز
يصبح هو حديث الساعة و كل صغيرة و كبيرة من تفاصيل الحدث معروضة للعامة
ما هو دة جواز اكابر مش ابن الدلالة علي بنت صاحب عربية الكشري
فالعروس وسيدة مصر القادمة ابنة محمود الجمال مقاول ورجل اعمال من اسرة عريقة بدأت في تجارة الفحم منذ حوالي القرن
ثم تحولت الي العقارات و الاراضي وتعود شركة دجلة للاستثمار العقاري في منطقة المعادي اليهم

المهم طبعا وكعادتنا كمصريين في اللت و العجن تضاربت الحكايات و النوادر عن تفاصيل الزفاف
فالبعض يؤكد ان فستان العروس تخطي النصف مليون جنية والشبكة الثلاثمائة الف جنية
وعش الزوجية مقرة فيلا بمنطقة الزمالك تخطت الستة ملايين جنية

واية يعني اما انكو شعب سماوي صحيح الراجل يا ولداة اصبح في الرابعة و الاربعين من العمر يلحق يكمل نص دينة مش كفاية النص اللي راح
وكمان سمعت ان اللي هايقيم الفرح سعد الصغير باغنية هاتجوز بمصاحبة فقرات راقصة من اعضاء مجلس الدولة
سؤال بيلح علي وش موريني النوم البوفية بتاع الفرح اوبن بوفية ولا ست منيو علي القاعد يعني
ولا الجماعة الكبارات دول هايقفو طابور قدام البوفية و اللي كرفتتو تدخل في حلة ام علي او كوعة يرشق في طاجن بامية
وكل يتصارع علي كتف الخروف كما يتصارعو علي مصر المحروسة

من 15 سنة ذهب المرحوم وجية أباظة وكيل عام شركة بيجو
الي الرئيس ليشتكي لة أن علاء و جمال مبارك يفرضان علية دفع عمولة ضخمة لهما عن كل سيارة بيجو تباع فى مصر
وكان رد الرئيس ما هو علاء و جمال زى ولادك يا وجية
ويقال ان مفتي الدولة انذاك اجاز انهم يرثو في التركة
المهم من الاسئلة اللي بسألها لنفسي هل هايروحو الوكالة يختارو الستاير و لا الوكالة هي اللي بتروح عندهم
طيب هل يحدث ما بين الحموات التلاجة والنجف علينا و الحلل عليكو
ولا تيفال بتورد حلل يومية للقصر الرئاسي

علي اي حال مبروك يا عريس وادعو كل شعب مصر لعدم النتانة و تنقيط السيد جمال بما تجود بة انفسكم
فا هانعدي ظرف علي الشعب واللي في النصيب بقي

جيمي باشا ابو عوف منزل اطقم بيجامات صيفي من اللي قلبك يحبها

82 comments:

  1. ana awl wa7daaaaaaaaaaaaaaaaaaaaaaaaaaaaaaaaaaaaaa

    ReplyDelete
  2. معلش مقدرتش امسك نفسي من الفرحههههههههه

    كنت ناويه اروح بس احترت اهدي العروسه ايه؟؟
    يعني قلت اجيب ست كوبيات جيلي فاخر من عمر افندي ولا ايه قرانيه حلوه كدا من التوحيد والنور ولا تربيزه مكوه من جمعيه السلع المعمره
    ويعني قلت اهو ريسنا برضو ومش خساره فيه تلاتين جنيه هديه وبعدين اكيد هايطمر فيه
    اهو انا كداعملت الي عليا وعداني العيب وقزح؟؟

    بعديم بقا لقيت تذاكر شرم الشيخ بميتين جنيه فهقديها مسج بقا

    لو رايح ينفع اديك كرت باسمي توصلو لخديجه؟؟؟

    ReplyDelete
  3. مها
    فرحانة انتي قوي انك اول واحدة
    وبقك مفتوح شبرين
    انتي يا بنتي مش وراكي ماجستير ومسافرة
    قاعدة بتنيلي اية في البلد دي


    علي اي حال انا سمعت انهم ماجابوش طقم الخفاش

    ReplyDelete
  4. هاهاهاهاهاهاهاهاها
    هىهىهىهىهىهىهىهىهى
    هوهوهوهوهوهوهوهوهو
    سورى جالى جنان وخبلان من الانشكاح اللى انا فيه
    وبعدين وكالة ايه اللى انت جاى تقول عليها..واللا تقصد الوكالة بتاعت الخواجه الفرنساوى واللا المستر العنجليزى..ماهو مش معقول تقصد وكالة البلح المصريه
    هما تبعنا مصريين اسما بس لكن الحاجات الحلوة والجهاز والفستان بقى هذة الاشياء متجيش من egypt خالص
    ياللا ربنا يتمم على خير وعقبال الزغاليل الصغيرة

    قاللا صحيح هو حكايه ال80 سنه دى صح!!
    دا عمّر اكتر من خوفو.. ربنا يستر ومايعملش لنفسه هرم

    ReplyDelete
  5. فقرة اعلانيه:


    اهم الانباء فى عالم التدوين:
    ــــــــــــــــــــــــ

    "مسابقه افضل موضوع"
    http://best-post.blogspot.com/

    "من أجل مدونات نظيفة"
    http://5fadfada.blogspot.com/2007/04/blog-post_20.html

    "تصميمات الشعار وأكوادها"
    http://takhareef-sorsaraa.blogspot.com/2007/04/blog-post_21.html

    ياريت تشرفونا وتشاركوا معانا فى المواضيع دى

    ReplyDelete
  6. انت يابني شكلك كدة هش جايبها البر.. واللا البحر اصل انا باموت في المخلل..
    الله يسامحك موتني من الضحك...
    هاهاهاه

    ReplyDelete
  7. كستيانو كولانوا كريستو
    كل الكلام ده خلاص حفظتوا
    يا جبنة بيضا في السندوتشوا
    قبل ما تيجوا تصوتوا
    غطوووووووووووووووووو


    يا عيني عليكي يا ما

    قطيعة

    ReplyDelete
  8. الف الف الف فبروك والله فرحتله .. لولولولولولوي .. اما شعب زبالة صحيح الواجب المية مليون مصري يكبسوا علي شرم الشيخ يهنوه ..

    ReplyDelete
  9. يارب الفرح يبوظ
    يارب ما يتهني الموكوس
    يارب ما يلحق يبوس
    يارب القاعة تولع
    والكهربا تقطع
    والمجاري تضرب.. والكل يحوس
    يارب إسمع دعاء شاب منحوس

    ReplyDelete
  10. طيب مش واجب نلمله و نجيب له هدية جماعية بلوجرية محترمة؟
    كل واحد يدفع ربع جنية و نشتري شبشب حمام من ابو وردة

    ده زي الساطور كده
    تاديب و تهذيب و اصلاح
    في ايد كل زوجة مصرية

    حتى اسالوا طهقان
    اوروفوار

    ReplyDelete
  11. SoRsaRaa
    وكالة البلح طبعا
    معلش بقي هو دة اخر علامنا
    ثم تعالي هنا
    اية الغاغة اللي انتي عملاها دي عندي
    واعلانات معا لاجل تدوين نضيف
    انتي مش شايفة المدونة عندي كلها اباحة ازاي

    ReplyDelete
  12. labido
    انا شكلي هاجبها لراس البر
    خيارة للاستاذ يا جااااابر

    ReplyDelete
  13. Sampateek
    انتي بقي حكايتك حكاية
    حقيقي انا اللي كنت فاكر ان انا بعامل الاكل في مصاف الهة الرومان
    اكتشفت ان سيادتك تخطيتي المرحلة دي كمان
    ولا يخلو جملة لكي الا و محشور فيها اي حاجة ممكن تتاخد علي البق

    جعلكي الله زخرا للوطن
    لازم محدش يعزمك علي الفرح

    ReplyDelete
  14. نملاوي
    عارف الواجب يكون ازاي
    سيجارتين حشيش وتروح تصبح علي جيمي ليلة دخلتة

    ReplyDelete
  15. قنديل في قلبي
    ما هو اللي مبتعرفوش تعملو في مدوناتكم بتيجة تقولوة عندي انا
    انا عارف انا اخرتي بسببكم

    ReplyDelete
  16. bastokka طهقانة
    اخبار طهقان اية سمعت ان يوم الميريلاند باظ
    ما هو انتي برضة غلطانة حد ياخد راجل ميريلاند
    كنتي خدية عند ابو طرية حاجة يرم بيها عضمة

    بالنسبة بقي للهدية فاحنا مستنين نشوف معانا كام والله المستعان

    ReplyDelete
  17. فرح اسود عليه وعلى أبوه

    ReplyDelete
  18. السلام عليكم ورحمة الله وبركاته

    عامة مييييين دول اللي ها يعرضوا عليهم التفاصيل
    انت عاوز الناس يجلها شلل رباعي وزهايمر من الفرحه

    بس هما ليه عاملين الفرح بعيد ، مش عاوزين الشعب يحضر ولا ايه
    داحنا كنا هانروح ونعمل احلي واجب ، يلا هما الخسرانين

    ReplyDelete
  19. هوه انت ليه مصر تتعبني وتخليني أسافرلك من ليبيا لحد مصر عشان أزورك في السجن وأجيبلك عيش وحلاوه؟؟وهما عيش وحلاوه مافيش غيرهم ده لو سمحولك بالزياره اساساً

    ReplyDelete
  20. بالصلاة على حضرة النبى كدة كلة يوسع خشى يا ولية واقلعى جزمتك البلاستيك احسن توسخى االموكيت انا جاى من كفر ابو بهانة ابارك واهنى للعروسين بسرعة وخايف احسن المرور ياخد الجحشة بتاعتى من اول الشارع على ناصية الفنا الناس حدانا فى الكفر بتتكلم عن الصبحية يابية وبتقول انها عبارة عن 5 قلل سنية وممضية شخصيا من مستر جناوى بذات نفسيتة وطشت غسيل لزوم حماية العيد الكبير وحلة وشبشب من ابو نجمة لانة بيعمل شغل من اول يوم ولان ابو وردة راحت علية امال اية يابا دوا علية الجوم ولباس ابو دكة صعيدى من ابو ورداحمر هههههه وطقم المونيا مصدية وعلى فكرة على الرغم ان الناس دى ايحة وجلدة الا احنا عرفنا ان الدعوة عامة وكمان اوبن بوفية علشان كدة جينا نهنى ونبارك

    ReplyDelete
  21. يلا كويس ان المناسبتين بقوا في يوم واحد...كله توفير زي ما انت قلت...يا سلام بقه لو جيمي يشد حيله ويظبط مواعيده ويجيب ولي العهد كمان في 4مايو...ساعتها ممكن مجلس الشعب يعلن 4مايو اجازة رسمية...واهو يبقى كسبنا يوم اجازة بدل مانطلع من المولد بلا حمص

    وياااا رب كتر اعيادنا

    ReplyDelete
  22. ابسط يا عم الجعان
    اهو يا سلم بقه
    هتروح البوفيه يا حبيبي
    هتاكل وهتربرب
    مع الكبار اوي اوي
    ومعدناش هنعرف نكلمك يا جميل
    وهتغير اسمك بعد كده
    وتقول انا شبعان
    والكمبوخة مليانة (ملاحظو..الكمبوخة يعني المعدة)
    بس افتكر اخوك بورك فرخة ولا حتى رجل ديك رومي...
    ولا ابقى جيب لنا فروة الخروف اللي هيدبح..نحط عليه شوية ملح وزغب ونعمله مشاية قدام الشقة...بدل ما بندخل بالجزم والشقة تتوسخ م التراب

    يا خوفي عليك
    ...احذر انت كده بدات تخش في الغويط
    وممكن يبقى اكلك عيش وحلاوة :(
    ربنا يستر على ولايانا :)

    ReplyDelete
  23. نهاركم مش فاااااااايت
    كل ده قررررر
    علشان خدت جيمي منكم
    النصيب بقى يا بنااات هتقولوا إيه
    كل واحدة بتتولد ومكتوبلها عريسها
    مفيش حتى حد قالي مبرووووووووك
    أي حد يا جماعة عايز يبعت هدايا أنا موجودة
    نسترزق على حس تشابه الأسماء
    :)
    وأنا بقى مش مجهزة خاااالص
    يعني كل اللي ييجي منكم خير

    ReplyDelete
  24. اهلا
    انا سمعت عنك مؤخرا من صديق لي وقرات مقلاتك جامده اوي ربنا يقويك ويشبعك لكن انا ليا عندك طلب
    انا عندي مدونه علي جيران asfourman2010.jeeran.com التعامل صعب جدا في التصاميم والتعليقات ارجو دعمي الفني علي asfour20052010@hotmail.com
    وشكر
    اما جيمي فانا فرحان له فرحه الاعمي لان سيده مصر القادمه سوف تكون مزه وتظبط الشعب

    ReplyDelete
  25. اتهيئلي يا مستر جعان .. وفي رأي ان سجارتين الحشيش خوسارة فيه .. انت عارف الدبوث وسعر العروث وثل لكام علي ما ازن .. وكفاية زن لحسن نتمسك ..

    ReplyDelete
  26. نورا
    اية يا حجة خفي علي الجدع
    هي الناس لقت لقية وداخلة تدعي علي في مدونتي ما هو انا اللي هاتنيل اروح في داهية

    ReplyDelete
  27. خمسة فضفضة
    يا دكترة انا بكلم علي الدول المتقدمة و اوروبا
    من نفسي يا امي الواحد ميعرفش يتفش معاكو بكلمتين

    ReplyDelete
  28. tota
    يا فندم اهو نشوف طلتك برضة
    كفاية الزعيم المفدي الوالد ذة الكتاب الاخضر و الحمر و اللي عاملة فيكو
    بس لو جيتي امانة عليكي بدل الحلاوة طبق بازين

    ReplyDelete
  29. semsemawy
    شكلك تعرفهم او في صلة قرابة
    يا عم دي اهل في بعضها وخلينا في حالنا
    شرفت يا كبير
    خدوةةةة

    ReplyDelete
  30. واحد زهقان
    زهقان باشا
    انا احييك علي الفكرة اللوزعية دي
    وحقيقي تبقي لفتة جميلة من الاسرة المالكة لو ادونا اليوم دة اجازة

    ReplyDelete
  31. يا ألف مبروك و يا ريت يجيبولنا ولي العهد...السيد مبارك التالت و لو أن ولي العهد غالبا حيكون محمد علاء مبارك اللي شرف ماتشس برشلونه امبارح و لا أنت راييك ايه
    تحياتي لك

    ReplyDelete
  32. يا ألف مبروك و يا ريت يجيبولنا ولي العهد...السيد مبارك التالت و لو أن ولي العهد غالبا حيكون محمد علاء مبارك اللي شرف ماتشس برشلونه امبارح و لا أنت راييك ايه
    تحياتي لك

    ReplyDelete
  33. حلوة نص دينه الى راح دى

    ReplyDelete
  34. هههههههههههههههههه

    وانا هتبرع بالفازة اللي عندنا هدية للعروسين

    ماحنا مش ينفع نخشلهم بادينا فاضية
    وعليا اعملهم حلة محشي من اللي قلبك يحبها واجيب لجيمي جوزين حمام يرم عضمه بيهم

    اهو انا كدة عداني العيب

    اللهي ما يلحق يتهني وتجيله ازمة قلبية من كتر الدوشة

    ويولع بيته بحريقة يوم فرحه
    اللهم امين

    ReplyDelete
  35. يا أخي سبحان الله ظلمنا الراجل ... كنت فاكر الناس بتمشي حالها زي القطط في صفايح الزباله .. طلع عارف ربنا إبــن ال.... الريس

    بس موووز سيدة مصر الاولي مستقبلا .. مووووووز

    ReplyDelete
  36. (نضدا)

    طقم الخفاش يا جعان
    طقم الخفاش

    هههههههههههههههههههههههههههههههههههه
    بس بجد وبصراحة يعني

    وبغض النظر عن اي كلام

    (جمال) وسيم وده رأيي من زمان
    والعروسة امورة فعلا

    على كل حال

    عقبالي اما ربنا يكرمني بشاب وسيم

    وعقبال كل الشباب

    طبعا انا هلاقي اعتراضات وضرب وشتيمة للصبح فيا
    وانت يا (جعان) مش هاتعرفني بعد رأيي ده
    بس مش مشكلة

    ده رأي شخصي بحت وبما اننا في مدونات (جعانيا) العظمى فانا اكتب ما يعجبني

    ReplyDelete
  37. طيب ما تشوفلنا موضوع البوفية دا اصله فعلا حاجة مؤرقه عشان نعرف برده قبل ما نروح نبأى عاملين حسابنا

    ReplyDelete
  38. موضوع جامد جدا وبالذات طقم الخفاش ده
    بس انا كنت عايزة أسأل
    المدونه اللي هي المفروض بتاعته اللي اسمها اسم علي مسمي واسمها الوريث
    مجبتش سيره لييييييييييييييييييه
    تكونش بتعمل تعتيم إعلامي؟

    ReplyDelete
  39. بس تفتكروا شعور جميل إن الواحدة تجوز واحد اصغر من أمها بسنه
    اهو عشان هو وأمها يلعبوا سوى؛مش بعيد يكونوا كانوا زمايل ووعدته ببنتها هههههههههه

    ReplyDelete
  40. مبروك يا جيمى

    والله فرحتلك يا معلم

    يا نهار ابيض دا يوم المنى يومك

    يا رب يقرب يومك يا رب

    محدش يفهمنى صح اصدى يوم ما يخش دنيا

    و مبروك للعروسة و بقولها انتى اخدتى هدية

    انتى امك داعيالك والله

    و انتى طيبة و بنت حلال و تستهالى بردة

    مبروك يا جيمىىىىىىىىىى

    ReplyDelete
  41. جااااااااااااااااامد

    ReplyDelete
  42. البوست ده شديد جدااااااااا
    هاهاهاهاهاهاهوهوهوهعهعهعهعهع
    بجد نكتة جامدة جدا

    ReplyDelete
  43. مش هاروح
    اصل ضفطر الشيكاط مش معايا
    اقلك معايا علبة كبريت اكتبله عليها؟

    ReplyDelete
  44. عم خالد اللي مش خالد

    انا معرفش اكل مع الناس دي بتبقي طفسة زي المحرومين اللي مشافوش اكل
    ومعلش اعذرني انا لما باكل مبفتكرش حد

    ReplyDelete
  45. khadiga

    ست الكل ومرات ابن كبيرنا وسيدة مصر الجاية
    قوليلنا انتي ناقص اية في الجهاز والناس هنا رقبتها سدادة
    واللي رقبتة ما تسدش ندخلة بدماغة

    ReplyDelete
  46. mr.asfour

    يا فندم الله يكرمك
    للاسف انا لا افقة شيء في التعامل مع مدونات جيران نوهائي خليك في البلوج
    سهل وناس كتير شارحينة

    ReplyDelete
  47. نملاوي

    هل الاخبار دي من تاجر معتمد ثقة؟
    ولا بتعتمد علي قرأاتك للسوق

    ReplyDelete
  48. micheal
    محمد .مروان مش هاتفرق مع الناس
    المهم الناس تنبسط

    ReplyDelete
  49. خطاب

    عجبتك قوي اقولهالك تاني

    ReplyDelete
  50. smraa alnil

    انجي هانم

    مبلاش الحاجات التقيلة دي بتوجع لما تتحدف علي النافوخ
    بالنسبة للحمام و المحشي اديهملي وانا اوصلها
    غير كدة انا مش فاهم انتي محروقة لية
    متخلي الراجل يجوز وينبسط

    ReplyDelete
  51. ketchup

    عقبال ما اشوفك و انت في الكوشة و قاعد جنبك سباطة بحالها

    ReplyDelete
  52. loooooooooooool

    اللهي يتفضحوا البعدة كلهم

    ReplyDelete
  53. ههههههههه
    وحيات ربنا الاغنية كده انا مجبتش حاجة من المطبخ

    شوفت بقى السطرين اللي فوق مفيهومش اكل ازاي؟
    يا ظالمني

    ReplyDelete
  54. تعرف ياجعان الموضع الي كان شغلني اوى ياتر هو اتاخر ليه لحد دلوقتى علشان يتجوز ده حتى يوم ماخطب طول فى الخطوبه
    فحسيت اننا ظلمينه وهو يحرام شغال كفاح علشان يكون نفسه ويجيب الشقه ويفرشها
    ويخلص الاقسات الي عليه

    ده حتى سمعت اوشاعه بتقول انه اصر يجيب الجهاز من عمر افندي علشان كده خصخصوه
    ديما فطين مشاء الله عليه
    بيحب يبعد عن مواطن الشبهات
    :)


    بس تعرف بقى انته فتحت علينا فتحه بموضع الهديه ديه
    انا جتلي فكره مش هو هيتجوز يوم عيد ميلاد بابا حسني
    فبفكر نعمل وقفه بالشموع
    ونبدهئا من عند ابو رامى
    وبعدين نكسر يمين عن ابو طارق
    ونوقف المسيره عند القصر الجمهوري
    لزم الشعب يشارك
    ولا ايه

    تحياتي يا فندم

    ReplyDelete
  55. ابلة نضا
    ومالة طقم الخفاش دة في حروب قامت علشان اختلفو طقم الخشاف علي مين

    شوفو سهوكة الحريم لامؤاخذة
    تقولك وسيم
    تقولش الاخت كانت معاة في السينما امبارح
    انا مش معترض علي اعجابك بجيمي علي العكس
    انا تعجبي من ذوق سيادتك

    ReplyDelete
  56. توتة توتة
    شوفي رأي انك تاكلي نص بطن في بيتكو برضة الاحتياط واجب

    ReplyDelete
  57. مسـتنـية الفـرج

    انا مش عارف الناس كلها معلقة في طقم الخفاش دة لية
    بكرة تاكلو فية فتة
    مدونة جمال دي مش مسكو الواد اللي عاملها و منتحل شخصيتة و اترن علقة موت و اعترف انة ولية وعامل راجل

    ReplyDelete
  58. مسـتنـية الفـرج
    انتي تاني
    شكلك عينك من الواد و مستخسراة فيها
    يا خرابي علي الستات لما يغلو

    ReplyDelete
  59. ShAb 3AdY
    دة انت شاكلك بتحبهم اوي

    ReplyDelete
  60. الفرح فى شرم الشيخ

    بعيد عن النق والحسد والناس اللى عنيها صفراء ثم الناس بتوعنا ريحتهم وحشة والشعب كلة زبالة وجرابيع

    الفرح هناك جنب اونكل اولمرت وشارون وتيتة جولدا مائير والاهم ان تحت حماية الطيران الاسرائيلى
    عايزين تحضروا الفرح يا رعاع
    يابتوع الحارات وخان الخليلى
    مسطول

    ReplyDelete
  61. bRoKeN HeArT
    شوف يا ريس مادام انت مبسوط دة عندي بالدنيا

    ReplyDelete
  62. khaled
    دفتر شيكات اية بس
    انت مش معاك بطاقة انتخابية اكتبلو علي ضهرها

    ReplyDelete
  63. Epitaph
    يتفضحو اكتر ما هم مفضوحين
    ولا انتي تقصدي فضيحة معينة
    زي فضيحة فيلم النوم في العسل

    ReplyDelete
  64. سمباتيكو هانم
    لو حلفتي علي المية تجمد ماصدقكيش
    جبنة اية اللي في اغنية دي

    وحتي لو السطرين الاخاري مفيهومش اكلة بس ريحة الاكل باينة فيهم
    انتي كنتي طابخة اية للغلابة اللي عندك؟

    ReplyDelete
  65. نهاية كل راجل


    انا فرحان فيه

    ReplyDelete
  66. محض روح
    شوفي هو اللي شاغلك كان شاغل ناس كتير
    بل قد شطح الخيال بالبعض
    وان سبب تأخر جمال للزواج حتي الان هو انة مستني دورة في الحصول علي شقة في اسكان مبارك
    مع ان بابا مقدملة عليها من ساعة ما جيمي اتخرج و اخد الشهادة الكبيرة

    ReplyDelete
  67. خيخيخيخيخخخخ
    و وكاله ايه اللى يروحوها
    فيه دليفرى
    و ايه الشبكه اللى بتولتوميت الف
    هما دوا يجيبوا كيلو سيمون فيسيه ؟؟؟؟؟؟؟؟
    انا ناويه انقط بفلوس و هما يجيبوا اللى عايزينه

    ReplyDelete
  68. ربنا يخرب بيتهم ويموتهم مقهورين ,اشوف فيهم يوم

    ReplyDelete
  69. اووووبس

    اسفين والله يافندم بالنسبه للاعلان

    انا قلت اكيد حضرتك من مشجعى الديموقراطية والمساحات الحرة

    خلااااااص يابيه مش هتتكرر تاااانى

    وغلاوة ابله ظاظا عندى

    ReplyDelete
  70. و الله يا خوييا
    و ما لك عليا يمين
    الواحد مش عارف يقول إيه ؟
    جيمى معزور برده يا إخوانا
    الراجل ما صدق كوّن نفسه

    و بعدين بيقوللك النهارده فى ليلة ف ميدان طلعت حرب
    " المصدر الوعى المصرى "
    علشان ح ينقطوا العرسان
    و فى حفلة رقص مع الأمن المركزى
    ربنا يستر
    أشوفكم هناك

    ReplyDelete
  71. طهقان
    يا ريت دايما نشوفك فرحان كدة

    ReplyDelete
  72. Esmeralda
    اقرع و نزهي

    ReplyDelete
  73. احمد
    دة انت شاكلك محروق حقيقي

    ReplyDelete
  74. صرصارة هانم
    لا مش مشجعين للديموقراطية انتي مش شايفة اليافطة في اول المدونة
    ديكتوقراطية

    ReplyDelete
  75. جمعاوى روش طحن
    انا شمعت بردة عن الليلة دي
    يعني اجيب معايا فرشة سنان و فوطة و انا جاي

    ReplyDelete
  76. ربنا يخدة هو و الكبير في يوم واحد

    ReplyDelete
  77. السلام عليكم يا جماعه أنا عندي تعليق بس مش على موضوع الزواج السعيد ه وعلى أول كلمه مكتوبه في المدونه
    الله والوطن أم الخللول
    أنا شايف إن إسم ربنا مينفعش يبقى جزء من تعليق ساخر أوتعليق الناس تضحك عليه الرجاء مراعاة مثل هذه الأمور وجزاكم الله خير

    ReplyDelete
  78. This comment has been removed by the author.

    ReplyDelete
  79. مبروك لجيمي بس ده يا تري هيلبس بيجامه حرير و لا كستور ... و نبي حد يفكره يجيب بورنوس علشان مهم اوي .

    انا سمعت ان الفيلا بتاعته في صلاح سالم ناحيه شارع الثوره تقريبا بقالهم 4 سنين بيبنو فيها أصل من قبل م اأسيب وطني الحبيب المبارك من سنتيين كانت تحت الانشاء ده حتي عملو عبور مشاه .. و قفلو الميدان !! معلش علشان جيمي ياخد راحتو أكيد الدوشه بتأثر برده ..

    الي معزبني اني و انا في مصر قالولي سيب مصر لو عاييز تجيب شقه "أحوش يعني" سيبتها
    و مش عارف برده اجيب عشه قصدي شقه شويه حديد عز و شويه العراقيين ,,وأدي الاتفاقيه الكبري بين مبارك و صاحب أكبر ممول للشقق في مصر و بعديين !! ايه الحل ..؟

    ReplyDelete
  80. ahmed
    انت احمد جميل؟؟؟؟

    ReplyDelete
  81. الله ينور المقالة جنان
    وربنا يفرجها والديمقراطية تحل على كل البلاد العربية وكل دول العالم والظلم يختفى للابد

    ReplyDelete
  82. وحشه هي مش حلوه هو احلى منها بمناخيره دي ههههههههه ربنا يهنى عبد السلام ببديعه

    ReplyDelete

بعبع وقول اللي في نفسك يا خويا