Saturday, July 21, 2007

حكومتنا وهي حرة فينا تغسلنا و تكوينا

كنت هاخصص التدوينة دي لاجل سرد الفترة الماضية التي قضيتها خارج مصر
ولاني علي مدي الشهرين المنصرمين لم افتح جريدة او اتابع اي خبر محلي كان او عالمي الهم الا بعض المقتطفات مما يحدث في لبنان
و فلسطين و تهبيل عباس و هنية و الست ام فتحية
المهم بعد عودتي ورؤية ما حل في مصر في خلال شهرين فقط قررت تأجيل حكايات الشهرين اللي فاتو
لحد ما نشوف اية الاشاعات اللي عمالة تتشنع علي بلدنا دي



ثورة العطشي

إذا عطش العرب سيشربون من مصر‏!!


واذا عطشت مصر تشرب من الباكابورت

علي مدار سنوات عديدة الشعب عمال يطفح و يأربع من مياة بها من الامراض ما هو اكثر من مقلب نفايات نووية ولم يعترض علي العكس شغال كما الحمير في الساقية فشل كلوي ميقولش لا سرطان ميضرش قصور في كبد بنكرياس سلس بول عجز جنسي وحكمة الخالق دابر المصريين لا ينقطع ابدا ولا يحوق فيهم مرض او غيرة


الي الان و كلة تمام مفيش حد معترض الحكومة بتضخ مية بالباكبورت و الشعب يطفح
ثم توقفت المية واصبح الضخ باكبورتات بس وايضا لم يعترض احد وكلة تمام
لكن الباكابورت كمان يقف الناس تشرب منين بقي وكما قال الشاعر قديما رضينا بالباكابورت و الباكابورت مش راضي بينا

وانبلج و انفلق و خرج علينا محمد المغربي وزير الإسكان أن مصر من افضل دول العالم في مجال مياه الشرب لكننا نحتاج 77 مليار جنيه لمواجهة أزمة المياه والصرف الصحي وفي خلال خمس سنوات مش هايكون في مشكلة في المياة

لا مؤاخذة يعني دة احنا بقالنا يجي 4 سنين في مستشفي ال 57357 وهي كلها علي بعضها محتاجلها 800 مليون ومش عارفين نلمهم بالرغم من اعلانات الشحاتة والاستجداء ليل نهار في جميع وسائل الاعلام
بل ان من الاشاعات المغرضة ان هناك من المسؤلين من يحمي كلابة بالمية المعدنية قرفا من المية العادية وبدون ذكر اسماء حرصا علي سمعة الكلاب

ولا ننسي اللواء صلاح سلامة محافظ كفر الشيخ واصفا الاف الثائرين الغاضبين، العطشي، بأنهم قلة عميلة مأجورة لجهات أجنبية مندسة بين جماهير كفر الشيخ والبرلس الاوفياء والمخلصين

ربما يخرج كلب عميل مندس يقولي ان انقطاعات المياة دي غير موجودة و ان وجدت فهي في قري و نجوع تبعد عن العمران و محطوطة في الخطة المئوية البعد القادمة
طب حد يفهمني فيصل والهرم و المرج بل بعض المناطق في القاهرة الجديدة دول قري برضة


قمة المسخرة بقي شافعي الدكروري محافظ الغربية بيقولك ان 100 أسرة فقط في بشبيش تعانى من عدم توصيل مياه الشرب إلى منازلهم

100
بس يا راجل يا مفتري امال ال 5000 بني ادم اللي طلعو في التلفزيون عمالين يلطمو
بالجراكن دول اية

ولا يكونو جايين من مارينا يعبو مية من بشبيش علشان احلي

الناس هناك بتمشي 5 كيلومترات للحصول على "جركن" مياه نقية.

ولا دي بتوجيهات من وزير الرياضة علشان الفيتنس بتاع الشعب

ولما راح الاهالي ديوان عام المحافظة في طنطا لعرض مشكلتهم طاردتهم الشرطة كالحمير البلدي وفين يوجعك
شربت من نيلها ؟؟ لا انضربت في إ قسامها


الناجح يرفع ديلة
مليطة كل عام الثانوية العامية و اغبي نظام تعليمي ابتكرة البشر وكل الحقوق محفوظة للنظام المصري
فاصبح الحاصل علي 95% كما مجاذيب السيدة لايصلح ان يلتحق حتي بحفلة 6 في سينما فاتن حمامة
يصل الحد الأدني للقبول الي ‏98,7%‏ لكليات الطب و‏98,4%‏ للأسنان و‏97,2%‏ للصيدلة و‏96,1%‏ للعلاج الطبيعي و‏92,9%‏ في كليات الهندسة والحاسبات والمعلومات و‏97,4%‏ في الاقتصاد والعلوم السياسية و‏96,7%‏ في الإعلام
كلة كوم وحكاية ان في حوالي الفين طالب مجاميعهم فوق ال 100%
الله يرحم ايام الملك الناس كانت بتخش طب ب 60%
المشكلة ان العديد من الملتحقي بكليات القمة واصحاب المجاميع الخزعبلية اذا فتح فاة اكتشفت انة اجهل من دابة فلا ثقافة ولا علم في اي امر اخر الا مما في المنهج المقرر الا ما رحم ربي
فيخرج من الثانوية العامة حمار و يلتحق بالجامعة و يظل حمارا غير متابع لاي شي ثم بعد التخرج يكتشف انة فاتة الكثير فيعمل مدونة و يقرفنا احنا

اطفي النور يا سعد , الوزير جاي

اعتبارا من شهر نوفمبر القادم الكهربا هاتزيد من 5 الي 8% علي جميع شرائح الاستهلاك
وكل الدلائل بتقول ان الزيادة حصلت من سنتين وب 30%
لكن مادام الكلام مطلعش من فم الحكومة محدش يصدق وبناءا علية نهيب بالسادة المواطنين انهم ينامو بدري وكفاية لعب في الضلمة وانظر حولك يا مواطن

البقلاوة للجميع
اخيرا و ليس اخرا خرجت علينا سيدة مصر الاولي بحملة القرأة للجميع يفط علي الطرق وفوق الكباري و العمائر
واعلانات في التلفزيون تظهر فيها واكاد اقسم انها اصبي من ام امي
حملة تدعو الناس انهم يبطلو كل حاجة و افتح كتاب يا جعر منك لة عايزين ننضفكو حملة تكلفت ما لا يقل عن 30 مليون جنية مصري
ولم اري مصري يوحد الله ماسك كتاب و بيقرا الا كتاب حياتي يا عين وربما البعض ممن يهون القرأة عن الراديكالية و العولمة في الحمام مثلي بل ان مصر هي من ارخص دول العالم في اسعار الكتب و بتتباع بالكيلو ولا حياة لمن تنادي
ربما ان الجدع من دول لما يكون معاة قرشين زيادة بدل ما يروح يجيب كيلو لحمة يرم بيها عضم عيالة يشتري كتاب عودة ليليت
بدل ما يدفع تمن كام حصة خصوصي للواد في الاعدادي يجيب لهيب في بونصر او صليب العار
فيا شعب مصر ارمي كل حاجة ورا ضهرك ارمي هم المرض و العلاج ارمي هم العلام ارمي هم الاكل و الشرب و السكن
ارمي كل حاجة و انزل هات سلسلة القعقاع في عمل الشاي بالنعناع
سؤال اخير يلح و يلسعني صباحا و مساأ
هو في حرب اكتوبر كنا بنحارب مين
اصل اللي الحكومة بتعملة في الفلسطنيين عند معبر رفح دة يدل ويجزم ان بلا شك ان الفلسطنيين هما اللي كانو محتلين سينا
وان اللي بيتعمل فيهم دة تار بايت بينا و بينهم
هذا و بالله التوفيق

68 comments:

  1. كلامك بيفكرنى بمقالة قراتها فى مجلة اسبانية اسمها عملنى العوم منى يااحمد
    هيهيهيييي

    بس نسيت تعلق على باقى فوم الاغسيل بتاع الدى اس ال
    :D
    واللى بعد الفاصل اكييييد افحم

    ReplyDelete
  2. This comment has been removed by the author.

    ReplyDelete
  3. ااااااااااااه
    والله وقعت ومحدش سمى عليك يا جعان
    اخيرا وقعت برجليك
    وكشفت عن نواياك الدنيئة

    التي تتخبى ورائها
    وبان حقدك على حكومتنا الرشيدة وانك من القلة المندسة اعداء الامة من الذين يسعون للخراب والدمار
    نعم يا سادة
    ذاك الجعان
    ذهب الى بلاد برة وقبض من امريكا والكونجرس و اسرائيل وعاد الينا لكي يبث سمومه المعاراضاتية بين الشباب الطيب البرئ من ابناء امتنا المباركة

    بقا انتا طلعت معارضة يا جعان
    اخص عليك

    قولي بقا نتا بتتعاون مع مركز ابن خلدون ولا انتا تبع انهو مركز ؟؟

    ReplyDelete
  4. جميل ولكنك نسيت موضوع الانترنت
    وماكانش له لازمة تذم في هنية
    وحمدا لله على السلامة
    انت حضرت معانا مهزلة القطارات ولا ما كنتش هنا

    ReplyDelete
  5. عودا احمدا يا استاذ جعان

    لا فض الله فاك يا سيدي

    بس ايه العودة الجريئة دى يا سلام جبت كل اللى حصل فى بوست متمكن

    بس قل لى يا استاذ جعان

    نعمل ايه ؟

    هل فى ايدينا حاجة نعملها؟

    ReplyDelete
  6. Lasto-adri *Blue

    يا هلا انا فاكر اني قريت نفس المقالة
    بس كانت اكلني الفول و النبي يا احمد

    بالنسبة لموضوع النت النظام دة موجود في عدة دول من فترة
    خلي بالك نظريا مصر من ارخص الدول في اسعار النت حولي ال 45 جنية لدولار و انتي تعرفي

    ReplyDelete
  7. رفقه عمر
    الله يسلمك و الله افتقدوكو جدا
    و ان شاء الله علي قلبوكو
    ايوة اللي بيعملو مدونات غالبيتهم مخاليل
    وانا عايز اعرف هل معني انكو مش في البيت لمدة شهر دة عذر لعدم دفع فاتورة الكهربا
    عجايب و الله

    ReplyDelete
  8. واحـــد مـــــن الـنـــاس
    علي لسعان
    شوف يا ابني انا مش محتاج حد يجي يقولي عن نوايايا
    انا مندس و مندفس
    حتي اخر لحظة في عمري
    المهم الاقي حتة اندفس فيها براحتي
    و احنا بنتعاون مع مركز ابو رامي لتوريد اللحوم الضاني

    ReplyDelete
  9. عصفور المدينة
    معلش مكنتش اعرف انك قريب هنية رضي الله عنة
    امسحها في دي
    وبالنسبة لموضوع النت معلش مش متابعة لاني شغال لايزد لاين وسعات ستالايت
    وانا معاكو من قبل القطرة كمان من ايام المترو ابو دورين

    ReplyDelete
  10. ftataljanna
    منوراني
    ولا جريئة ولا حاجة دة انا زهلت من كام حاجة حصلت الفترة اللي فاتت دي
    دة كدة ما اتكلمتش عن كل حاجة
    بالنسبة للعمل نعمل عيشة ونسكت

    ReplyDelete
  11. السلام عليكم ورحمة الله وبركاته

    حمد الله علي السلامه يا استاذ اسلام

    والله مش عارفه اعلق علي وايه ولا ايه


    يلا لينا ربنا

    ReplyDelete
  12. السلام عليكم يا أبو ملك..
    بص يا فندم.. هو كدة النظام اعترض بقى
    العالم واسع.. مش عارفة احنا زانقين نفسنا في حتة اد كدة على ضفاف نهر الباكابورت العظيم ليه..

    فعلاً.. المحاولات لإبادة الشعب المصري شغالة.. واحنا يا اخي ولا محوق فينا.. شعب غريب صحيح..
    احنا لو شعب عندنا كرامة صحيح..
    كنا رتكسفنا على دمنا من زمان..
    يعني سرطان في الاكل ومش نافع..
    مية باكابورت ومش مأثر..
    ثانوية عامية والعيال متسوحة وبرضه نو افيكت..
    كهربا هتولع ولسة ماسكين فيها..
    adsl وهيربونا بيه عشان الناس الوحشين اللي بتستخدم النت استخدام خاطئ وبرضه ادينا قاعدين على قلبهم..
    احنا نستاهل..
    ...
    ....
    .....
    ......
    ........
    ..........

    سلم لي على موكا (صحيح تفتكر الثانوية على ايامها هتكون كام مرحلة وكليات الرمة هتاخد من كام؟؟)

    ReplyDelete
  13. حسبي الله و نعم الوكيل علي بلد النيل

    ReplyDelete
  14. أولاً حمدلله على سلامتك

    وانا بجد مبسوط جداً انك رجعت للتدوين
    لأنى من أول ما انا دخلت التدوين وانته كنت بطلت

    بس انا كنت متابع مدونتك قبل ما ابدأ تدوين

    ReplyDelete
  15. حمدالله على السلامة...وموضوع جميل

    ولو ان دي مش كل حاجة حصلت وانت مسافر...في بنك القاهرة اللي هيتباع و الانترنت اللي هيغلى عشان محدش يدخل على النت بعد كدة

    في انظار تدوينتك القادمة

    :)

    ReplyDelete
  16. هي دي ميزة مصر يا جعان
    التغيير عشان الشعب مايزهقش كل يوم
    مصيبة جديدة لكسر الملل مش اكتر
    تقريبا ناويين بغيروا اسم حملة الترويج السياحي بتاعو مصر من"نورت مصر " الى "مصر تتحديى الملل"

    ReplyDelete
  17. خمسة فضفضة
    يا دكتور الله يسلمك
    متعلقيش علي الحاجة الشماعة مبقتش مستحملة

    ReplyDelete
  18. auroramoslema
    وعليكم السلام
    يا فندم انا مش معترض انا ممتعض بس
    وبكيلو كباب ابيع القضية من اساسها
    ومتهيألي الثانوية العامة علي ايام ملك هاتكون علي 8 مراحل و 13 تحسين و اتنين فراخ بانية

    ReplyDelete
  19. الحمد لله على السلامة

    نورت مصر


    والقراءة للجميع

    وعمار يا مصر

    موت على روحي من الضحك على حكاية كل خريج يطلع يعمل مدونة

    قصدك ايه يعني يا أسلللاااام ؟

    ReplyDelete
  20. القراءة للجميع
    ثورة العطشي
    الثانوية العامة
    زياده اسعار الكهرباء

    مع بعض العبارات التي تدل علي الاعتراض وهي اختصار الحروف الاولي من جمله ارفض حدوث هذا
    ترددها مجموعات من الشابات و الشباب في اداء كورالي متناغم
    تتخلله اصوات متحشرجة من الانف والفم علي الطريقة الاسكندرانيه في مقام البياتي مع اصوات ايقاعية في الخلفيه

    ReplyDelete
  21. هو انا من اللي بيطلعوا مش عارفين حاجة ويكتشفوا ان فاتهم كتير وفي الاخر عملت مدونة بس مش عشان اقرف سيادتك لا سمح الله
    انا قلت كلهم عاملين مدونات
    اشمعنى انا يعني
    وبعدين المدونات دي معمولة اساسا عشان نطلع الكلمتين اللي محشورين في زورنا كلنا
    يعني لا مؤاخذة كده ما حدش احسن من حد
    وفي الاخر كلنا بنعمل عيشة ونسكت زي ما حضرتك قلت
    حمدالله على السلامة
    :D

    ReplyDelete
  22. لثقتنا الكاملة فى وطنيتكم وحرصكم على سلامة شباب الامة
    ندعوكم للانضمام الى حملة

    ( افضحوا تجار الكيف )

    وهي تهدف إلى تقديم كل ما تعرفه من معلومات عن من يقومون ببيع هذه السموم سواء كانوا فى منطقة إقامتك أوعملك أودراستك أو ناديك

    والتفاصيل والبانارات على هذا الرابط

    http://tw3ya.blogspot.com/

    انتظر تفاعلكم

    ReplyDelete
  23. ahmed
    شوفت يا عم احمد اللي بيحصل بيقولك الامارات رجل اعمال هناك اتبرع ب خمس و عشرين الف كرتونة مية للقرية دي

    ReplyDelete
  24. ياسر سليم
    الله يسلمك و انا كمان مبسوط اني رجعت للتدوين بعد الاستراحة الطويلة دي
    واهلا بيك في عالم التدوين

    ReplyDelete
  25. Marvel
    الله يسلمك
    انا عارف ان في حاجات كتير حصلت طبعا
    لكن دي اهم الحاجات من وجهة نظري

    ReplyDelete
  26. Fatema
    طبعا و دي احلي حاجة في حكومتنا مش محسسانة بالزهق كل يوم في جديد
    مع مجلس الوزرا مش هاتقدر تغمض عنيك

    ReplyDelete
  27. يا باشا شوف مصيبة تحديد طاقة التحميل بـ 2 جيجا في الشهر
    دي كارثة
    أرجوك لازم تكتب تدوينة عن الموضوع ده لأني خلاص قرفت من أمها بلد

    ReplyDelete
  28. ههههههههههههههه

    بجد اسلوبك تحفة

    ReplyDelete
  29. ههههههههههههه...فطسني من الضحك و أنا بقرأ و في نفس الوقت رفعتلي ضغطي
    :)
    نش عارف يا جعان اقول ايه بسزززالظاهر أن الواحد أدمن هذه الاوضاع خلاص
    تحياتي لك

    ReplyDelete
  30. عشت يا جعان
    وعاشت جعانياتك
    وتدوم لنا

    ReplyDelete
  31. سمعت سمع خير .. و ربنا يستر انه حفاظا على صحة المدونين .. حيعملوا مدونات جاهزة .. يدوب تحط اسمك بس عليها .. و الدولة مشكورة حتجيبلك القراء .. و اللى يعلقوا .. واللى يمدحوا و اللى يشتموا كمان لو عايز.. و حتى اعتقالات امن الدولة عليهم .. علشان ما تضيعش وقتك فى الكلام عن الميه و الكهربا و الحاجات الكمالية دى .. دور على الحاجات الاساسية .. حقك فى الحياة .. والسجن .. والموت

    ReplyDelete
  32. هههههههههههههههه

    انت خسارة في البلد

    الاول حمدالله علي السلامة يا سداحمد

    نورت مدونتك وكطرحك

    بس انا اعرف شوية عيال في طب انما ايه والله دماغ

    عادي هي جت علي فاتورة الهربا
    احنا عندنا تلفون بيت مخلينه استقبال
    وشوية لغينا العقد بتاع التلفون

    وشوية لاقيتهم عايزين مننا 340 جنيه

    بصراحة خفنا يشيلوا العدة

    المهم سمد ع الحلامة

    ReplyDelete
  33. طهقان
    الله يسلمك يا باشا
    انا قلت هارجع الاقي طهقانة خلصت عليك و ريحت البشرية من شروروك
    ماعلينا ملحوقة

    ReplyDelete
  34. الدبور
    الاغنية اللي انت بتكلم عنها دي انا عارفها

    ReplyDelete
  35. لحظة
    يا فندم لو كل اللي بيعملو مدونات بيكتبو زيك
    والله ماحد كان اعترض
    مدونتك جميلة
    وخلي الشعب يعيش

    ReplyDelete
  36. صاحب البوابــة
    طب ولما تجار الكيف يتفضحو نعمل احنا اية بقي
    و الناس الغلابة اللي بتتسطل علشان تنسي تموت يعني
    اتقي الله

    ReplyDelete
  37. ندعوكم لزيارة العدد الثالث من مجلة نفسنا
    ولمن لدية هواية الكتابة ويريد المشاركة معنا نرجو منه مراسلتنا
    nafsena@gmail.com

    ReplyDelete
  38. تعيش الحكومة ..........

    يعيش احمد عرابى ..........

    يعيش نصير الغلابة والجعانين......

    ReplyDelete
  39. أولا حمدا لله على سلامتك يا عمو الجعان وعقبالى أنا كمان كده لما ربنا يرجعنى بالسلامه
    و بعدين بقه إنت مالك بأم الخلول دى طيبه و بنت حلال وانا بحبها أوى
    أسلوبك أضحكنى وأبكانى فى نفس اللحظه ضحكت لخفة دمك وأسلوبك الساخر الذى لا يملك أحد أمامه إلا الوقوع عالأرض من كتر الضحك وبكيت على أحوال مصر الحبيبه أدعى معايا إن ربنا يصلح الحال
    وابقى تعالى اقعد عالقهوه شويه بقالى كتير مش بشوفك هناك ومتقوليش قهوة أيه لحسن أروح أسيحلك هناك
    يلا سلام

    ReplyDelete
  40. المية مقطوعة من مصر كلها
    انا من اسكندرية والمية كل يوم بتقطع فترة طويلة

    يعنى نروح فين بعد كدة : نهج ونسيبلهم البلد؟؟
    وحتى لو الشعب كله هج .... عارفين عيعملوا ايه ؟؟
    اقروا بقى البوست ده وانتوا هتعرفوا هيعملوا ايه
    اللينك اهو
    http://shawetsha3b.blogspot.com/2007/06/blog-post_1891.html

    ReplyDelete
  41. حمد الله ع السلامه
    ومصر نورت
    ولا بلاش لفاتوره الكهربا تزيد اكتر
    حكومتنا بصراحه ما حرمتناش من اي حاجه
    ناس تشنق نفسها عشان مش لاقيه قوت يومها موجود

    ناس مش لاقيه تشرب في بلد النيل موجود

    طفله في عمر 11 عام تغتصب فتصبح ام في هذه السن ومش عارفين نثبت حاجه موجود

    انفاق ملايين وملايين علي حاجات لا تسمن ولا تشفي من جوع وفيه ناس مش لاقيه العيش الحاف كله موجود

    حريق قطار غرق عباره سقوط طياره كله موجود

    يعني كل اللي مش عايزه تلاقيه
    وحسبي الله ونعم الوكيل

    ReplyDelete
  42. صديقي العزيز اسلام

    مدونتك كانت سبب دخولي التدوين و كانت اول مدونة اقراها على النت

    ما زلت متابعك رغم توقفك فترة كبيرة لسفرك حرمتنا منك

    بس مبسوط جدااااااااااااا برجوعك بقوة

    حمدالله على سلامتك

    و تسلم على البوست الهايل

    و سلام مؤقت

    ReplyDelete
  43. السلام عليكم
    جعان؟ طيب أنا عازمك على الغدا في أي يوم يعجبك.
    بس أولي وحياتك هو فيه حد جعان بيسافر بره والا انت جعان تضامناً مع اخوانا الفلسطينيين اللي مش لاقيين ياكلوا ولا جعان علشان خايف تاكل ليجيلك الحاجات الغريبة اللي بقت بتيجي اليومين دول.
    على العموم نورت مصر.
    مشربتش من نيلها؟ ممكن
    لكن أكيد شربت من نيلتها

    ReplyDelete
  44. حمدالله على السلامه يا اخ جعان
    مستوى التعليم الثانوى فى مصر اصبح متدنى للغاية ...وايه يعنى ؟؟ عشان يطلع جيل متخلف وعنده عفن فكرى وثقافى وتعليمى
    الميه ملوثه وايه المشكله ؟؟ مابيحوقش فى المصريين
    .......
    لنا الله

    ReplyDelete
  45. السلام عليكم انا اول مرة ادخل عندك..بس انا مش عارفة انت متشائم لية كدة...لا لا لايا راجل انت بتتكلم فى حاجا ت صغيرة جدا..ومركز ع السلبيات وناسى خاااالص الايجابيات المهولة اللى الحكومة حققتها...انت ما شفتش مدينتى..والقطامية هايتس..وبورتو مارينا..اوووه انت مش من مستوايا...يا عم انت اية اللى رحعك من برة ابعت خد ملك وام ملك وتوكل على الله وابعت لنل كوووووووووووووووووولنادعوة واحنا نيجى لك جرى..على فكرة انا لسة متكلمة عن المياة وانا كمان عندى ملوكة

    ReplyDelete
  46. استاذى
    اخبارك ايه
    الغيبه طالت
    طمنا عليك ياريت

    ReplyDelete
  47. عزيزى الفاضل
    احنا نعرف نعمل مدينه انتاج اعلامى متكلفه ملاين
    نعرف نعمل قمر صناعى
    لكن نعمل مستشفى لاء طبعا لان المستشفى هتكون ببلاش لكن المينه بتجيب فلوس

    ReplyDelete
  48. أنا متغرب عن مصرى بقالى 7 شهور بس غصب عنى بتابع أخبارها فى القنوات الفضائية ، مشكلة المية أنا حاسس إن الإعلام والقنوات الفضائية بالذات ضخمتها شويتين، وفى نفس الوقت حاسس فى حاجة تانية بتجرى فى البلد مش عارف واخدين بالكم منها ولا لأه ، في ثورة جنسية رهيبه ابتدت تظهر باستدل عليها من إعلانات قنوات مولدي (مولدي تتحدي الملل وإعلانات مولتى تونز) بالإضافة لبعض الأغاني الغير محترمةزى أدلع وأجرى يا رمان ، وأحمد يا عمر وأغنية لوسي والمللحن عصام اسماعيل
    ده شيء مش عادي ، إلا أنا مستغربله ان لسه مفيش حد اعترض على الكلام ده كله ، حد يقولي
    الموضوع ده حيعدي كده بالساهل
    ولا أنا شايف طشاش

    ReplyDelete
  49. يعنى ايه كلمة وطن
    سؤال محتاج من كل واحد مننا اجابة
    شاركونى برايكم
    قلب أبيض

    ReplyDelete
  50. أشرف حمدي
    ياباشا دة كان شيء متوقع انا حتي كنت مستغرب ازاي الحكومة سايبة حاجة مفتوحة بدون حد ادني و اقصي

    ReplyDelete
  51. البنت الشلبية
    الله يحظك و يكرمك

    ReplyDelete
  52. micheal
    ياباشا احنا يهمنا فطسان الزبون من الضحك
    اهو ارحم من فطسان الحر
    و المشكلة مش في ادمان الاوضاع المشكلة لو الوضع اتغير منعرفش

    ReplyDelete
  53. asdasd
    الله يخليك
    انا نازل انتخابات محلية همتك معانا بقي

    ReplyDelete
  54. eldoctor
    كبير الحكما
    انا برضة سمعت نفس الاوشاعة
    لا و بيقولو ان الاعتقالات هاتبقي بالايميل
    تلاقي ايميل وصورة واحد ماسك خابور سوداني معتبر
    وبيحدد معاد جلوس الفرد

    ReplyDelete
  55. smraa alnil
    من ساعة ما قلتي ان انا خسارة في البلد و انا خلاص سبتها يا ضنايا
    حتي كمان اخدت العدة معايا

    ReplyDelete
  56. نفسنا
    هو الاعلان دة مدفوع الاجر و لا لاجل وجة الله

    ReplyDelete
  57. kafrawy
    انا شفتك في مسلسل في رمضان قبل كدة

    ReplyDelete
  58. داليا
    الله يسلمك
    واخجلتيني و الله
    وسعدت بوجودك في مدونتي
    وبالنسبة للقعدة علي القهوة انا المشاريب اللي هناك مبتعجبنيش معلش بقي الناس مزاجات

    ReplyDelete
  59. شقاوة شعب
    من اسكندرية ومفيش مية امال البحر اللي عندوكو دة لازمتة اية

    ReplyDelete
  60. شقاوة شعب
    من اسكندرية ومفيش مية امال البحر اللي عندوكو دة لازمتة اية

    ReplyDelete
  61. جنـه
    ماعلينا هانم
    واضح انك شايلة و معبية
    و النوعية اللي زيك مش بتعمر كتير
    اشربي كركدية

    ReplyDelete
  62. الراجل عمل كل اللي يقدر عليه علشان الناس تقوم عليه و تخلعه و برده مفيش فايدة
    شغل... و مفيش شغل
    جواز... و مفيش جواز
    اكل... و اسعاره بقت نار و مع ذلك مسرطن
    اخر لما غلب منع الميه...احتجاجات يوم ولا اتنين و هديت الحكاية
    الراجل يعملكو ايه اكتر من كده
    يمنع عنكو الهوا
    الشعب المصري بيعيش مع الريس قصة حب فظيعة مخليانا مش هنقدر نستغنى عنه مهما عمل

    ReplyDelete
  63. انت فين يا اسلام؟؟ شهر مفيش جديد؟؟

    ايه التكاسل ده؟

    وحشني و الله

    حبيت اسلم عليك

    وبوسة للبرينسيس ملك الجميلة

    ReplyDelete
  64. اول مره افوت على مدونتك بس بجد جامده
    على فكره تعليق ايام ونعيشها جااامد

    ReplyDelete
  65. HHHHHHHHHHHHH ONLY ,THIS IS OUR COUNTRY,BAKABORT,ELECTRICITY,MONEY,FOOD,U MAY BE LIVE IN THE DESERT HHHHHHHHH
    BUTTERFLY

    ReplyDelete
  66. هما مالهم ومال مارينا مش قولنا منجبش فى سيره حد انا لسه مزهقتش وبطلع من موضوع لموضوع عيب كده صح

    ReplyDelete
  67. 情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品

    情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品

    ReplyDelete

بعبع وقول اللي في نفسك يا خويا