Tuesday, August 21, 2007

المملكة العربية السعودية بنين

حقيقي افتقد مدونتي و افتقد المدونين وافتقدت المسقعة

تركت مصر بعد سنوات وسنوات من التمسك بها رافضا مبدأ السفر و خصوصا لدول الخليج

ربما من حين لاخر اسافر لاجل عمل لكنها فترات قصيرة و ارجع بعد كدة علي بيتنا و اتنقع في البانيو لاغسل اثار اسفر

لكن المرة دي شكلة الدش هايستني فترة طويلة

شديت الرحال لبلاد تركب الجمس و الجمال ويلبسو التوب و العقال

ربما من يعرفوني جيدا استعجبو لقراري لكن حسابات كل فرد تختلف في كل مرحلة زمنية و عمرية

لكن قناعاتي مازلت محتفظا بها


المهم وما يحلي الكلام لا بذكر النبي علية الصلاة و السلام

صلو علي النبي

مجموع ما قضيتة في السعودية حتي الان ربما حوالي شهرين و نص

والسفرية دي كانت مختلفة لاني المرة دي تعاملت اكثر مع الناس و اكلت في اماكن اكتر


لا انسي اول مرة ركبت تاكس هنا فالصديق اللي سايق طبعا هنا كل من هو من شرق اسيا يطلق علية صديق او محمد

وهابقي اقلوكو حكاية محمد دي لية بعدين

المهم الصديق سواق التاكس قالي تحب تدفع تبع البونديرة و لا نتفق

طبعا اخوكو عمل فيها ناصح وقلتلة لا صديق بنديرة انا ادفع

ركبت ومشوار مكملش 10 دقايق لهف مني 40 ريال حرق و نار في جتتة امة و كل الاصدقاء اللي زية

مع ان روحت نفس المشوار و دفعت 15 بعد كدة


من الحاجات اللي كل ما افتكرها اضحك اشوف يافطة علي محل مكتوب عليها محل للتقبيل

اقول في عقل بالي اية يا اخواتي دة اباحة عيني عينك كدة بوس و لية محلات كمان

فين و فين لما فهمت انة للتقبيل يعني للايجار

انا مش عارف الاسم دة اخترع علي اساس اية ربما اللي اخترعة كان واحد فلاتي


وكلة كوم والاكل في دول الخليج كوم تاني

فالناس هنا تاكل لكي تعيش واذا عاشت تاكل لكي تستطيع ان تستمر بالاكل

مثلوثة و مندي و مظبي و مدفون و مخنوق و محروق و مسلوخ

و اجاركم الله من المثلوثة عبارة عن 3 راقات عيش و 3 كيلو رز وفرخة مصلوبة بوسط الحلة

و اطفح يا مؤمن وصلي علي اللي هايشفع فيك


والاكل الهندي هنا موجود والصنعة بحرفنة وخلطة معلم

بهارات و شطة اذا تذوقت معلقة واحدة تشلح وترقص عشرة بلدي وتأربع جالون مية لاطفاء النار الموقدة

انا و صديق لي اكلنا في احد المطاعم الهندية اياها انا طلبت اكل الشطة بسيطة و هو من محبي الشطة ادالة 5 ريال و قالة اتوصي بي

اقسم كنت باكل و العرق عامل ينزل من راسي علي عيني من كتر حرارة الشطة

ورقدت يومين في السرير اتلوي كابن اوي مصاب بمغص عنيف

وصديقي عمل عملية البواسير من اسبوعين ويجلس علي مخدة كما الولية الحامل


وطبعا المولات هنا لا تعد و لاتحصي لو غبت عن منطقة شهر واحد ترجع تلاقي مولين علي الاقل اتبنو فيها

و العدد في الليمون البنزهير
والشيء الظريف في الامر اذا كنت هنا مع زوجتك فلا مشاكل ففي كل مكان اماكن مخصصة للعائلات بمفردها
سواء مطاعم او مولات او متنزهات
اما اذا كنت عازب فمعاملة كما الحمير البلدي الجربانة
فربما حارس الامن في المول يمنعك من الدخول بحجة انك عازب وداخل تبصبص علي الحريمات يا خلبوص

لكن في غالب الامر الحياة سهلة و بسيطة و مريحة للاعصاب جدا جدا

ودة احد الاسباب الرئيسية لاتخاذي قرار السفر

حقيقي تعبت من شدة الاعصاب و الضغط العصبي

ومشاكل بلدنا و الزحمة و الدوشة و السياس

جمع سايس يعني

وكل واحد عايز يحط ايدة في جيبك و يقلبك زي فردة الشراب وياخد اللي يقدر علية منك

واكل بالسرطان و مياة بالفشل الكلوي اذا وجدت اساسا

وهواء بالرصاص و عيش بالحديد وادوية بفوسفات المنجنيز


بس برضة بلدنا حلوة بقرفها وزبالتها وشعبها اللي تغير كتير وبقي عايز ضرب الصرم

حلوة بشوارعها و الحياة و الاهل والقهاوي و الشيشة

حلوة بالعسكري الغلبان اللي ممكن يخليك تاخد صلاح سالم كلة بالعكس مقابل جوز جنيهات

ولا الواد بتاع البوفية اللي يخلصلك ورقك كلة في مجمع التحرير ب 100 جنية بس

حلوة بامي واصحابي حلوة بام محمد الدادة اللي استحملت قرفي و قرف اللي خلفوني ربما ربع قرن


ربما ما يهون بعض الامر في الغربة اذا وجدت الصحبة الطيبة

صديق عرفتة عن طريق النت اسمة اسامة مر علية 5 سنين او اكتر ربما متغرب

اول ما تشوفة تشوف ابن البلد الاصيل بلكنتة الدمنهورية وشهامتة المصرية

مبتسم علي الدوام اذا فضفض معك وجدتة يحمل هموم تكفي من المحيط للخليج يشعل سيجارة خلف اخري

لا يكل ولا يمل اذا قصدتة في شيء. حقيقي انا طلعت عينة معايا مشواير لاجل فرش البيت.
واخر اردني من اصل فلسطيني اسمة رائد معرفتي بة لا تزيد عن شهرين وتعاملة معي كصديق منذ سنوات طويلة
بل اعطاني سيارتة لاجل ان اقضي بها بعض اموري
حقيقي لسة في رجالة برة
هافتقد مصر , مش عارف لكن متاكد هافتقد اصدقائي وامي وابي واخوتي
خوفي الوحيد اذا مرت علي السنين وحاولت العودة اجد نفسي غريب غير متأقلم
فمن سافر خارج مصر يستطيع ان يفهم ما اقصد
علي اي حال كلها اراضي ربنا
القاكم قريبا جدا علي صفحات مدونتي

57 comments:

  1. This comment has been removed by the author.

    ReplyDelete
  2. مثلوث وعرفناها...ايه بقى المظبي والمندي!؟...عباره عن ايه يعني...شكله كدة اكل شديد برضه

    ReplyDelete
  3. شارك معنا وانضم الينا في لجنة الدفاع عن سجناء الرأي وحقوق الإنسان
    شارك معنا بارسال حدث وتفاصيله لكي نفضح الظالمين ونفضح مهازلهم
    انضم إلينا في يالا نفضحهم
    www.dahayaa.com

    ReplyDelete
  4. صديقي جعان
    أهلا بك في بلاد بره حتى ولو كانت السعودية

    اهلا بك في عالم العقلاء


    اهلا بك في عالم النضافة

    نصيحة بيني وبينك
    مافيش حاجة يتبكي عليها في اللي انت سبته

    واقتبس جملة من فيلم الناظر
    يالا
    شق طريقك
    عيش حياتك
    اطلع من القمم
    شفلك صاحب او صاحبة
    طالما خدت التأشيرة ..عيش حياتك بقا


    ولي عودة
    لان الكلام لا ينتهي

    بس دول كلمتين على السريع

    ملحوظة

    لم يرد ذكر البرياني في قائمة الطعام
    :)

    تحياتي يا اسلام

    ReplyDelete
  5. بسم الله الرحمن الرحيم
    عزيزي جعان

    دي مش اول مرة ازور المدونة بتاعك بس أول مرة أكتب تعليق
    في الحقيقي انا نصي مصري ونصي التاني سعودي وعارفة ان الغربة صعبة في بدايتها ولكن انت ماشاء الله اجتماعي وسرعان ما ستتأقلم
    المشكلة ان بعض الناس الذين اغتربوا لفترات طويلة يشعرون أنهم لا ينتمون لا لبلدهم ولا للبلد اللي هما متغربين فيها يعني بيكونوا تايهين

    وفي مسألة الأكل فالمجتمع الشرقي والعربي بشكل عام بيهتم بالاكل والطعام اللذيذ ده في هنا في السعودية أكلات لذيذة تانية كتير
    أكتر أكلة بحبها حاجة اسمها (مطازيز) هي عبارة عن عجينة وخضار ولحمة معمولة بطريقة معينة
    يا سيدي متدوشش دماغك
    اهلا بك في بلدك التاني
    ولو احتجت حاجة احنا اخواتك برضو


    تشاااو

    ReplyDelete
  6. شوف تعليقي علي البوست اللي فات
    مبين انا متغاظه قد ايه
    ومفروسه قد ايه

    بس لسه عندي امل في البلد دي
    ولسه بحبها
    وشايفاها اجمل بلد في الدنيا
    انا طبعا زي اي بيت في مصر
    ليا قرايب بيشتغلوا في بلاد عربيه
    منهم في السعوديه
    ومنهم في الامارات
    بيشكروا في كل حاجه في البلد دي
    نضافه وقانون
    وخصوصيه

    بس يتكلموا يتكلموا
    ويقولوا مفيش احسن من مصر
    رغم انهم بقالهم فتره هناك وليهم معارف واصدقاء

    بس غربيه بلدنا دي
    فيها سحر غريب بنعشقها عشانه

    وفي الاخر العيب مش في بلدنا
    العيب في اللي ضيع بلدنا

    وحمد الله علي سلامتك في مدونتك
    وماتحرمناش من البوستات:)

    ReplyDelete
  7. rabena ywaffa2ak ya islam
    really wish i could have met u all before i left

    sallemli 3la malak w mamet malak

    ReplyDelete
  8. رفقة عمر
    عزيزتي رفقة سعيد لفرحتك وسعيد ايضا لرؤية كل اصدقائي حتي و ان كانو عبر التدوين

    شوفي مصر هاتفضل بلدي ومسقط رأسي و بطني الوحيد مهما بعدت عنها
    بالرغم ان انا اساسا مش متأقلم فيها
    لكن باتعايش
    ولا يمكن المقارنة بين اي دولة و مصر
    بالرغم من كل مساؤهافهي من صرفت علي الدول الخليج علي مدار سنين طويلة ماضية ادوية و غذاء و معونات
    مع احترامي لكل الدول
    ستظل ام الدنيا

    ReplyDelete
  9. Marvel - واحد زهقان
    شوف يا سيدي المظبي و المندي و المدفون
    هو انجر من الرز يعني 3 كيلو رز كدة فوقهم فرخة او لحم خروف
    يعني من الاخر تاكلها و تطلع علي الملاهي تركب الحلزونة

    ReplyDelete
  10. هاني جابر
    ياباشا الظلمة مفضوحين عند رب العباد بلاش تفتش في لقمتك

    ReplyDelete
  11. أُكتب بالرصاص
    اولا مبروك علي سيرين و جعلها الله لك قرة اعين
    ثانيا يا باشا انا قلبا و قالبا و انا في مصر عايش براها
    وطايح كما الخيل المسعور يمين و شمال
    جايز انا سافرت علشان استريح بقي العضمة كبرت يا اخويا
    بالنسبة لموضوع البرياني دة مفروغ منة لانة متواجد زي الماء و الهواء

    ReplyDelete
  12. NiDoOo
    عزيزتي نيدو نورتي المدونة
    واهلا بأهل السعودية كلهم
    شوفي مشكلة الانتماء عندي مفروغ منها
    فمصر مربعة في قلبي بأهلها وشوارعها مهما طالت الغربة
    غير كدة الخليج فية مصريين اكتر من مصر نفسها
    وبالنسبة للاكل انا قلت قبل كدة انا باكل اي حاجة اقصر مني
    بس المطازيز دي اللي بتقولي عليها اسمها مش مريحني
    حاسس انها حاجة ابيحة
    ولو احتجت حاجة هاقول

    ReplyDelete
  13. جنـه
    ماعلينا هانم
    كلنا مفروسين يا فندم بس دة لا يمنع الحب
    بلدنا ليها ريحة و طعم ولون زي مية الحنفية بالظبط
    واللي يشرب من نيلها
    لابد يوم يرجع يغسل كلاوية في معهد ناصر

    ReplyDelete
  14. BlueRose
    عزيزتي دكتور بلو
    سلام حاااار جدا لكي مني و من اسرتي نفر نفر
    وحقيقي اسرتي كسبت صديقة و اخت غالية
    هانفتقدك

    ReplyDelete
  15. جعان يا اخويا

    الله يبارك فيك

    المرة اللي فاتت كنت مستعجل لذلم رميت تعليق على الماشي

    بس دلوقت نسيت انا كنت هاقول ايه
    انما كل اللي فاكره انك كاتب رائع واسلوبك في السرد مالوهش حل

    دماغ عاليه قوي..

    بأحب أقرأ لك ...انتاستاذ بصراحة

    ReplyDelete
  16. ياااااااااااااااه
    حضرتك حصلك كل ده من شهرين بس ؟؟
    امال لوقعدت فيها كتير زي حالتنا كنت هتعمل ايه ؟؟

    عود احمد

    ReplyDelete
  17. السلام عليكم ورحمة الله وبركاته

    واحشنا والله يااستاذ اسلام وواحشانا بوستاتك الجميله
    بجد والله باستمتع جدا جدا وانا بقرا لك
    وبضحك من قلبي ، مع ان احيانا بيبقي ضحك علي شر البلية

    مش عارفه بقي السفريه دي هاتبعدك عن المدونه وعن الناس اللي متابعينك ولا ان شاءالله ترجع تكتب بانتظام زي الاول

    بس اهم حاجه بقي لما تبقي تنزل اجازات ماتعدش تعمل زي الناس التانيه اللي بيبقوا مش طايقين حاجه ولا عاجبهم حاجه

    ربنا يوفقك في حياتك الجديده ويجعلك نصيب في الخير

    خالص تحياتي

    ReplyDelete
  18. الصارم الحاسمMonday, 27 August, 2007

    مع اني باكره الأخوة عرب الخليج فححححححححححححت

    وعرب شمال افريقيا على عكس المتداول افضل منهم مليوووووووووووووووون مرة-نحسبهم كذلك ولا نزكي على الله أحد



    بس فعلا

    خليك عندك

    اطلع من القمقم

    شق طريقك

    وبأمر الله ترجع مصر افضل مما غادرتها..لعلك تفيدها وقتها


    فقط هي امك وام المدام...اذا تقدروا يبقوا تحت عينكم عندكم يكون افضل..ويبارك الله لكم






    ياي .....مفيش حنيذ وفحسة عندكم
    (:

    ReplyDelete
  19. ياااااااه
    انتا هتقولي على السعودية
    يا سلام
    كلت الكبسة ام رز ولحمة ؟
    ايوة اللي بالرز البخاري
    انتا قاعد في جدة ولا فين ؟؟
    اصلك لو في جدة هقولك على شوية اماكن تبقى تروح تشم هو فيها

    وعلى فكرة يا عم
    اقل مشوار تاكس هناك بعشرة ريال
    وممكن ياخدهم وهوا بيبصلك من فوق لتحت كمان

    يااااااه لو الايام دي ترجع
    اموت واخلص جامعة
    واهج اطلع اسافر تاني
    واعيش في السعودية او قطر او الامارات
    الواحد طهق من البلد دي واللي في البلد دي

    صحيح العيشة هناك غالية
    لكن مناسبة للرواتب اللي هناك
    وهناك رغم الذل والغربة
    الواحد ممكن يكون نفسه ويعمل نسه بجد بجد
    عندك رفيق الحريري راح هناك محلتوش اللضا رجع ملياردير


    ربنا يوفقك يا اسلام
    ويوعدنا يارب

    ReplyDelete
  20. حسيت بكل كلمة في البوست

    الغربة مناخ بنخلقة احنا جوانا و الصحبة جو بنعمله لو عايزين
    تقدر تحس انك في بلدك طول ما نفسك معاك

    اوروفوار

    ReplyDelete
  21. تعرف المشكلة . اننا لو كان لنا تمن فى بلدنا مكنش حد فكر يخرج بره .. انمااللى بره البلد بيقدر يشتغل و يعيش و يفضل له وقت يشوف و يفكر فى مصلحة البلد .. اما لو جوه البلد .. فاذا لقيت وقت تشتغل بس علشان تلاقى اللى يخليك تعيش يبقى كويس قوى ...
    بص كلمة و رد غطاها مصر راحت خلاص فى داهية

    ReplyDelete
  22. أولاً اهلاً بيك ,سط اهلك ..

    وانا بقول إيه النور اللي ساطع علينا في الخليج .. أتاريه من نورك
    تانياً موضوع حلو .. وفي نفس الوقت
    يكسر الخاطر
    حاسه بيك لأني جربت الغربة

    موضوعك ذكرني بموضوع قديم للأخر أحمد البحيري

    موضوع حلو .. وخفيف .. وفيه نسبة كبييييييرة من الشوف
    جعان .. تو الناس .. هذا شهرين .. خلوك تكتب كذا .. أجل لو سنين؟
    الله يعينك

    ReplyDelete
  23. اخي وصديقي الحبيب، الاول نورت المدونة مفتقدك من زمان، مابقتش بعرف اخبارك إلا عن طريقها، انا حاسس بيك اوي وعارف اصدك ايه بالغربة، بس بلدنا الحبيبة هي اللي خلتنا نسيبها ونعرب منها ، مانت عارف انا سبقتك بكام شهر على بلد يقال انه شقيق وبيحبونا اوييييي، بلدنا بقت بالنسبة لنا فسحة وكام شهر في المصيف وخلاص، هانفتقدها اكيد على كلامك "بقرفها وزبالتها وشعبها اللي تغير كتير وبقي عايز ضرب الصرم"، وبرده زيك خايف ارجع في يوم الاقي نفسي غريب فيها، بس ما باليد حيلة، هانقعد برة شوية، قد ايه الله اعلم، وهانرجع تاني لبلدنا بكل اللي فيها، وبلدنا حلوة اوي..بس واحنا شايفنها من بره

    ReplyDelete
  24. ازيك يا حااج اسلام .. والله واحشنى
    ايه يا بنى الكلام الجامد اللى انت كاتبه ده .كل ده من شهرين ده انت لسه بتقول يا هادى يا كريم ..نصيحه منى متحولش تقارن مصر بأى دوله خليجيه لان مينفعش اصلا انك تحط مصر بمقارنه مع اى دوله منهم ..كلهم دول تمتلك الماده ولا تمتلك الحياه ..
    زى كده ماتقارن اغنيه رومانسيه لعبد الحليم بأغنيه العنب لسعد الصغير ..

    خلاصه القول تسلم على المجامله الرقيقه والكلام اللى قولته فى حقى مع ان كل اللى قولته دا شيء طبيعى انى اعمله رغم انى اساسا معملتش انا اى حاجه معاك مكنش مشوارين رحتهم معاك يا حاج اسلام .

    وكل سنه وانت طيب ياباشا

    ReplyDelete
  25. عارف يا استاذ جعان مادام زوجتك وبنتك معاك يبقى كل بلاد الله بلدك مادام بلد بيترفع فيها الاذان وتقيم فيها الصلاة من غير ما تخاف يبقى بلدك وبيتك كمان

    الغربة وحشة اوى كنت هاقول لك كده لو كنت سيبت عليلتك فى مصر واسال اللى يعرف طعمها بس ماداموا معاك يبقى مفيش غربة هاتبقى راحة من القرف اللى هنا

    انا عمرى ما خرجت بره مصر بس تصدق مش عايزة اسيبها وانا عارفه بلاويها وحاسه انى هاسيبها فى يوم من الايام بس بحبها اوى

    مش عارفه ليه من كلامك حسيت كان انا اللى متغربه :)

    ربنا يعينك والسعودية حلوة ناس كتير حبوها وناس كتير لعنوا اسلاف الكفلاء جمع كفيل طبعا

    ربنا معاك وربنا يهنيك يا رب غير كده احمد ربنا دى البلد الوحيدة اللى مش بيدخلها الدجال لو كنت فى مكة او المدينة لو مش فيهم بقى خلاص :)

    ربنا معاك يا استاذ جعان

    ReplyDelete
  26. (ندا)

    ازيك يا عزيزي وزميلي واستاذي العزيز جدا جعان

    ربنا يكرمك يارب واتمنى انك ما تكونش زعلان مني

    ولو زعلان انا اسفة
    بس قولي انا زعلتك في ايه بردو

    لانك تعز عليا جدا يا جعان


    بس انا فعلا مستغربة
    هو في عدوى ولا ايه منتشرة ؟

    انت ربنا كرمك بالسفر وانا بردو ربنا كرمني بالسفر للكويت

    تخيل !!!!

    ربنا يكرمك يارب

    وحقيقي فعلا معطيات الحياة اختلفت كتير اوي
    والحياة عندنا في مصر لازم تخليك تحسبها حسابات اخرى

    عارف يا جعان انا حساه ومدركه معنى كل كلمة انت كتبتها في مدونتك
    عارف ليه ؟

    لان فعلا السفر وانك تاخد على اسلوب معيشي معين واسلوب في الحياة

    وترجع تلاقي الامور مختلفة تماما بيخليك فعلا تستغرب كل حاجة حواليك

    بس في الاول والاخر هي مصر حبيبتنا فعلا بزبالتها وزحمتها وقرفها

    والاهم ان مصر بمصريينها


    على فكرة انا هاقول لاخ اسامة اللي كتبت عنه هنا في المدونة انك كتبت عنه


    ان شاء الله انتظر مني اني اكتب انا كمان

    (مذكرات نائب في الارياف ....قصدي في بلاد الشمس العمودية والرطوبة والسيارات الاخر موديل ولو عاوز تدخل المطبخ ولا حمام بيتك ان شاء الله بعد كده بالسيارة )

    هههههههههههههههههههههه


    بس المعاملة الراقية هنا فعلا والاحترام اللي بيعاملوا بيه المدرسين فعلا ما شاء الله عليهم والله

    عارف يا جعان

    اكتر حاجة استغربت لها

    ان ما شاء الله معظم المصريين والحمد لله
    (انا قولت معظم مش كل ) زباااااااااااله في الغربة فعلا

    وقول زي ما تقول وكل اللي يخطر ببالك من قرف قوله من هنا لتاني يوم الصبح


    لكن ماعلينا

    ربنا يكرمك يارب

    وممكن تبعت لي طبق كبسة من عندك يا فندم ولا مدفون ولا حاجة ؟؟

    ربنا يكرمك يارب وربنا يبارك فيك

    انت صحيح في الدمام يا جعان ولا انت فين ؟


    انا كده كتبت لك ايميل في المدونة مش رد في مدونة

    ههههههههههههههههههههههههههه


    ربنا يبارك لك يارب وربنا يكرمك وان شاء الله يكون معاك كوكو وماماتها في اقرب فرصة علشان تدخل المولات زي ما انت ما عاوز

    ربنا يكرمك يارب

    واتمني انك ترد على ايميلي اللي كتبته لك

    ReplyDelete
  27. (ندا)


    رجعت تاني بس لانه لفت نظري

    ده


    http://hewar.khayma.com/showthread.php?p=503642


    ده واحد معجب جدا بكتاباتك يا جعان ولا انت ؟

    ReplyDelete
  28. حمدلله بسه يا جميل
    وادي جزات اللي يبعد عن المحروووووووووسة
    صلي ع اللي يشفع فيك

    ReplyDelete
  29. حمدلله على سلامتك ورجوعك البلوج ومتغيبش عنا كتير
    بالنسبة لموضوع السفر فده شئ بقى مطلوب بال>ات بسبب الظروف الغريبة المستفزة الموجودة فى مصر
    اه بنحبها لكن يا ميييييييين يدينى فرصة هجرة لاى دولة انشالله حتى موزمبيق
    حاول تستمتع بوقتك وتعيش حياتك وربنا يوفقك يااااارب
    سلام

    ReplyDelete
  30. تعرف ياسمسم؟
    انت من يوم ماسافرت وانا مش قادر ادخلك مدونة؟
    بجدوربنا
    جبتلي اكتئاب يااخي
    هو الواحد ليه يعرف اصحاب ويبقو زي الاخوات وف الاخر يفارقهم:(
    نرمين لسه بتقولي علي موضوعك قلت ادخل عشانك واحشني
    اشوفك علي خير قريب يارب ياجميل
    جهاد

    ReplyDelete
  31. ملحوظة صحيح:
    تم التعامل بعصاية البيزبول بتاعتك من بتاع اسبوع مع عدد 1 امين شرطة
    الصراحة هو العصاية ملمستوش..بس هو شافها يابني جاله هلع كاني طلعت له الي مثلا:)
    انت متأكد ان البتاعه دي محدش مات بيها قبل كده؟
    :P

    ReplyDelete
  32. أُكتب بالرصاص
    كفاية ان انت منورني
    واخجلتني باطرائك

    ReplyDelete
  33. radwa
    وفي انتي بقي
    متهيألي كمان سنة هايمسكوني وزارة هنا

    ReplyDelete
  34. خمسة فضفضة
    وعليكم السلام يا دكتور
    والله و انتو كلكو وحشتوني جدا
    وان شاءالله انتظم في التدوين تاني
    بس الواحد فعلا مش ضامن ظروف الشغل
    وللعلم انا من غير ما اسافر ولا حاجة مش طايق اساسا

    ReplyDelete
  35. الصارم الحاسم
    انا عارف انت تقصد المغاربة و الجزائر و التوانسة
    لكن صدقني كل حتة فيها الخير و المنيل
    وياباشا انا لو جبت امي و حماتي
    اعتقد انا هارجع ساعتها مصر
    اسعدني مرورك حقيقي

    ReplyDelete
  36. هتفضل الغربة معضلة أزلية في النفس المصرية ..

    بالنسبة لي انا لا اتمناها لأني جربتها صغيرا . ولد حيث انت الآن وبقيت حتى دخلت الجامعة وجيت اشوف مصر على كبر ..

    جيتها و واستكشفتها وانا في الجامعة . يمكن علشان معشتش همها فشفتها أحلى بكتير . وأكثر عمقا في الحياة ..
    دلوقتي بعد ما اتخرجت لسة الدنيا ملونة لكن بادية تبهت .. لكن الحياة هنا تظل حياة


    ربما آخذ نفس قرارك في ظروف ما .. لكني على يقين أنه لن يكون قراري الأصوب ..

    كل الود

    ReplyDelete
  37. حلوة قوي المدونة على فكرة ..

    كل الود

    ReplyDelete
  38. واحـــد مـــــن الـنـــاس
    علي باشا
    انا اكلت اي حاجة اقصر مني
    انا مش في جدة لا
    شوف مهما كان الهوا برضة هوا بلدنا مفيش زية بدخانة و قرفة
    وصدقني حسب موقعك و طريقة عملك بتحدد ازاي الناس تتعامل معاك

    وربنا يكرمك ان شاء الله بكل ما تتمناة

    ReplyDelete
  39. طهقانة
    حكم والله حكم
    اومال الراجل طهقان بيشنع عليكي و يقول انك مورياة البدنجان في عز الصيف

    ReplyDelete
  40. eldoctor
    حكيم المدونات
    يا استاذنا
    للاسف معاك حق في جزء كبير
    لكن صدقني انا بكلم علي حالتي انا سافرت مش لاني مليش تمن واللي يعرفوني عارفين كدة
    لكن سافرت لاجل مناخ عصبي افضل
    واعتقد مبقتش تفرق اية سبب تركك لمصر
    لان مفيش حاجة يتقعد عشانها

    ReplyDelete
  41. sarona
    اية الترحيب الجامد دة
    انا برضة بقول اية النور الساطع دة
    هي مش دي كانت عملية في الصحرا اسمها النور الساطع ولا دي كانت النجم الساطع
    شوفتي كل دة في شهرين متهيألي كمان سنة هتلاقيني قالب كزرولة علي دماغي

    ReplyDelete
  42. hhhhhhhhhhhhhhhhhh:)
    i was abroad in saudi arabia exactly ,and i know all what u have wrote..it is funny world but u must get used of it..to live..in saudi arabia SADEEQ and the nurse SISTER ,HENDY MAFY MO*7, AND MASRY YAKOL FOOL,ENTA MASRY *7OD BEL GAZMA WE ROO7 FE DAHYA SEEB BALADNA ELY ENTA BETAKOL MEN*7ERHA,YAMASRY YA BETA3 EL FOOL.....I DO NOT KNOW WHY THEY HATE US???
    IF U WANT TO BE SOME ONE SPECIAL THERE U MUST WORK HARD AND DO SERVICES TO ALL THE PEOPLE ESPICIALLY SAUDIANS...U WILL LIVE IN HEAVEN..BUT U MUST KNOW THE RULES AND KEEP ON THEM...GOOD LUCK

    ReplyDelete
  43. هنا وهناك غربه
    هى البلد بقت بلادنا ولا بقى لينا حاجه فيها
    احنا عايشين فيها اغراب ملناش حقوق ولا كرامه ولا حد يعمل لمصلحتنا
    خليك هناك احسن انا ليا اقرايب هناك بقالهم سنين ومش ناوين يرجعوا
    ربنا يوفقك يارب ان شاء الله

    ReplyDelete
  44. السلام عليكم.. ازي حضرتك/ يارب تكون كويس ومبسوط..

    ربنا يوفقك في الغربة وتحقق أهدافك بس نصيحة إنسانية ليك أوعى تطول لغاية مااولادك يدخلو مدارس هنا.. حاول باستماتة تخلص هدفك في اقل عدد من السنين وامشي علطول لو عايز تحافظ على نفسك وعلى اولادك.

    دي نصيحة بجد.. ولادك مش هيستحملوا الي هيشوفوه وهيفضلوا ناقمين عليك طول عمرهم. وانت كمان هتتحول لمسخ,, انا آسفة بس ممكن تفتح اي موقع من مواقع المغتربين (الكبار) وتشوف مستوى تفكيرهم البدائي.. (لما سافروا مكنوش كدة) بس هنا كل حاجة واقفة، والابناء بيجيلهم عته..

    هو الموضوع كبير عشان كدة / عشان خاطر ربنا أوعى تعمل كدة في نفسك واولادك وربنا يوفقك

    ReplyDelete
  45. Egypt Designers
    ابو كامل حبيبي
    انت جبت من الاخر
    حقيقي وحشتني ووحشتني قعدتك اللي تقرف

    ReplyDelete
  46. Osama
    انت اكتر واحد عارف ان دي مش مجاملة
    ثانيا اساسا اغنية العنب هي اللي رقعت من مستوي الفاكهة في مصر

    ReplyDelete
  47. ftataljanna
    للاسف مش في مكة او المدينة بس قريبين برضة
    شوفي الانسان قادر علي خلق غربة في داخلة في اي مكان حتي و ان كان في عقر دارة
    اما الاسواء عندما تجبرك بلدك علي خلق غربة

    ReplyDelete
  48. ابلة ندا
    واقرب المهاجرين لدول الخليج
    نصيحتي ليكي اجتنبي المصريين
    في الغربة عايزين ضرب الجزم
    الا من رحم ربي
    ونورتي المدونة بقالك كتير

    ReplyDelete
  49. ندا مش عارف افتح الوصلة محجوبة هنا
    يا ريت لو تبعتيلي نسخة منها مثلا علي الايميل او ملخص

    ReplyDelete
  50. ادم المصري
    علية افضل الصلاة و السلام

    ReplyDelete
  51. البنت الشلبية
    الله يسلمك
    وعلي رأيك الواحد بعد فترة بيكتشف ان المكان بقي خنقة ومحتاج يغير

    ReplyDelete
  52. SnipER

    جوجو حبيبي
    حقيقي فعلا مفتقدك يا ندل
    ربنا يقرب المسافات مش بعيد تعمل لجوء سياسي عندنا ولا حاجة
    سململي علي عبدة اوي

    عصايتي يا تامر امانة في رقبتك و اي حد ينضرب بيها لازم تصورة و تصور مكان الاصابة
    علشان التاريخ يسجل الانجازات

    ReplyDelete
  53. محمد العدوي
    نورت المدونة حقيقي
    وربنا ييسرلك الخير في حياتك


    butterfly
    واضح انك استويتي علي الاخر هناك ربنا يستر

    3ala asm masr
    قلتش انا حاجة
    ادينا قاعدين لغاية ما نشوف اخرتها

    ReplyDelete
  54. سحابة
    شوفي واضح انك بتكلمي نتيجة عن رؤية لحالة فعلا
    لكن اللي انتي بتقولية دة في عوامل تتوقف عليها
    بمعني اولادي يدعو علي لما ادخلهم مدارس اهلية
    ودي ازبل انواع المدارس هناك
    لما اكون مش معيشهم في رفاهية
    لما اكون غير متواجد
    لما اكون بربي بغير شرع الله
    وتدني مستوي التفكير راجع لكل شخص
    وليس راجع لمكان تواجد المرء
    اذا تم توافر كل دة
    صدقيني اي مكان هيكون جنة مقارنة بمصر

    ReplyDelete
  55. قريت البوست.. و قعدت اقرا و أعيط و أضحك و أعيط و أضحك و مفقتش غير لما خلص... كان نفسي تفضل مكمل...و كأني أنا اللي بتكلم.
    المهم، فضلت اقرا في التعليقات و وقفت كتير عند . Butterfly كلامك كله صح، بس ينطبق بس على اللى مبيعملش لنفسه قيمة. لكن اللي بيعرف يقول لأ وقت اللزوم، عمره ما بيداس عليه..هتلاقي ناس بهدلت نفسها عشان "لقمة العيش" بس هتلاقي ناس بقيمتها و برضه بتاكل "لقمة عيش" و الفرق واضح ...و يبقى لكل إنسان الاختيار...بهية

    ReplyDelete
  56. كل سنه وانت طيب .. ده اولا يعني
    ثانيا .. انا كنت في السعوديه برضه .. وده السبب اللي خلاني ارد على الموضوع ده تحديدا بالرغم من اني بقالي بتاع ساعتين عمال اتفسح في مدونتك وجبت باتنين جنيه لب سوبروبجنيه سوداني ومقضيها بهدله في البوستات بتاعتك وباعتذرلك لو لقيت قشره هنا ولا هنا
    سبب اني اعلق على الموضوع ده بالتحديد حاجتين .. اولهم اني زي ماسبق وقلتلك كنت في السعوديه .. بس وانا صغير
    سافرت هناك وانا عندي شهر تقريبا ورجعت بعد سادس ابتدائي .. وحشتني والله كلمة سادس دي
    المهم .. هتصدقني لما اقولك اني فرحت وندمت اننا جينا في نفس الوقت .. مش هتكلم على اختلاف اي حاجه عن هناك والحياه النضيفه لاني والحمدلله هنا عايش كويس .. بس هتكلم على ان المرحلة دي كانت اسوأ مرحلة في تكويني كطفل
    مجتمع منغلق بطريقه عجيبه .. وفي نفس الوقت مجتمع مقلق بالنسبه لرب اسره لو مخلف وولاده في سن صغيره .. واعتقد انك مستوعب وجهة نظري
    بس في المجمل .. الحمدلله اننا خرجنا منها سالمين وغانمين .. وربنا يرجع كل المتغربين لبلادهم يارب سالمين غانمين
    نصيحه .. كل عيش تميس بجبنه شعور او بفول قلابه .. او فول جلابه
    وياحبذا لو ضربت بعدها معصوب بالعسل .. وادعيلي


    سلام ياباشا ..
    وكل سنه وانت طيب

    ReplyDelete
  57. هي دي مصر علشان كده بحبها اوي بكل قرفها واكترها مدينه نصر

    ReplyDelete

بعبع وقول اللي في نفسك يا خويا