Thursday, October 25, 2007

عصر البراطيش


خبر قرأتة في جريدة خلاني انقلبت علي قفايا , الخبر يا سيدي بيقول اية ان في جمهورية الصين انتشرت موضة غريبة الا وهي قهاوي او كافيهات للبكاء او والله زي ما بقلوكو كدة الصيني من دول يدخل القهوة و يقعد يعييييط ويقوم الخدم في المكان بتوفير مناديل للاخوة المتشحتفين او فلفل للجماعة اللي مش عارفين يعيطو لمساعدتهم علي ادرار الدموع للحظة تخيلت لو نفذت مثل هذة الفكرة الجهنمية في مصرنا الحبيبية لربما كانت متنفس لقطاعات كثيرة من الشعب بدون تفرقة في الطبقات, فاذا كان هناك شعب اولي بالحزن و البكاء اليومي علي حالة و ندب حظة فهم المصريين بلا منازع بداية اعتقد ستكون تسميات المحلات دي كالاتي قهوة ابو دمعة او بورصة الشحتفة او مقهي المعددة وطبعا استقبال الحزاني و الثكالي علي مدار اربع و عشرين ساعة مع توفير فوط صفرا تحسبا لاي مبربر
وطبعا لانضمام اي مواطن لاحدي القهاوي يلزمة سحب عدد اتنين من قرايبة يكونو قرفانين و كفرانين من العيشة يشهدو لة بانة جعر و واطي قراري ونكدي و سماوي ووشة يقطع الخميرة من البيت ولا مانع من صورة شمسية و اخري بالملابس الداخلية كدليل علي نكد امة الازلي ويتم استقبال المواطنين في اقسام كل حسب درجة حزنة و همة فهناك قسم للشباب العاطلين يندبو حظهم و يتشحتفو كيفما شأو لان نظيف باشا قال كما عشر سنين مش هايكون في شاب عاطل في مصر وللاسف بعضهم عامل حساب انة هايطلع شرم الشيخ في المعاد دة ويتم تقديم الشيشة و يجلس الشباب لابسين مايوهات انتظارا لرحلة شرم
وقسم اخر لضحايا المستشفيات و مزبلة القصر العيني ويقدم لهم كوكتيل الكلوجوز باللبن وقطع قطن علشان يسقو
ومرورا باقسام لضحايا الشرطة و النقل و الاسكان و الصرف الصحي و التلفزيون و التعليم
فاذا نظرت مدققا و جدت لكل وزارة عدد ضحايا لا بأس بة ربما هم يعملون بناأ علي توجيهات عليا بخفض عدد الشعب المصري فاذا لم تؤتي هذة الخطة ثمارها فلا مانع من اخصاء مواطن من كل ثلاثة مواطنين علي ان يوضع الاتنين المتبقيين في الخطة العامة لقطع دابر الشعب وربما اذا نجحت هذة الفكرة (فكرة مقاهي البكاء و ليس الاخصاء) تعمم علي مستوي الوطن العربي مع اضافة معددات و معددين ( المعددة لمن لا يعلم هي ولية شلق وظيفتها الاساسية نفخ المتوفي في قبرة بصواتها)
مع توفير براطيش او شباشب لمن يحب ان يلطم بها علي وشة او ان يقوم احد الجرسونات بلسعة ببلغة علي قفاة لادرار الدموع او البول ايهما اقرب فنحن كعرب اول من استحدث استخدامات اخري للشباشب و البراطيش
فيا شعوب العرب هنيئا لكم فنحن في عصر البراطيش

53 comments:

  1. السلام عليكم ورحمة الله وزبركاته

    الاول كده كل سنة وانت طيب يا استاذ اسلام ولاونها متأخره شويه

    نسيت قسم الستات اللي بيشحتفوا علي المسلسل الفلاني ولا الفيلم العلاني
    واقترح انه يتوفر بالقسم تليفيزيونات 36 بوصه تعرض باستمرار مواد نكديه لتحفزهم علي العياط
    ومافيش داعي خالص للبراطيش والبلغ مرعاة لحالتهم النفسيه المتدمره اصلا.......ههههههه

    ReplyDelete
  2. اما الصينين دول عالم جحده صحيح
    غازيين العالم كله شغل ومنتجات
    لما الواحد بقا خايف يصحا الصبح يلاقي اخوه بقا صيني
    وعمالين يعيطوا
    جتهم خيبه
    فيشي زي المصرريين الجبال
    المصري من دول تلاقيه طالع عين " المامي بتاعته " ومستقبله متحطم واخوه في المعتقل و مش هايجوز و مش عارف يسافر ولا عارف يشتغل و بلاوي .. ومع كل ذلك تلاقي ابتسامه عريضه ماليه وشه
    بيبتسم على ايه معرفش
    مهو يارضا وايمان قوي يعني
    يا بلاهه وعته
    يله نمشيها ايمان وصبر

    ReplyDelete
  3. انا محتاجة اعقد على قهوة من دول بجد قبل ماانفجر
    ممكن تعمل مشروع وتعمل اول قهوة للعياط هتكسب دهب ممكن اشاركك

    ReplyDelete
  4. this is my 1st Time , 2 write 2 U ...
    I enjoyed Ur Sarcism...
    in fact we R different than Chinese..they work all the time , so they ned time 2 Crey and weep ..and places 4 that , while we In egypt spend all our time Complaining and weeping ..every where..at work ..homes and cafes,,,
    so we have proceded that stage...and made it Common..4 every one , every where and all the Times...as our problems...R more than ..the sum that can B expressed in one place at some of The time...
    wish 2 read more and more from U ..and 2 communicate , as I am a university Lecturer ( and I am Mafrous like u ..and it same that we have the same political and moral atttude) ..
    thx...waiting 2 read more from U ...take care

    ReplyDelete
  5. this is my 1st Time , 2 write 2 U ...
    I enjoyed Ur Sarcism...
    in fact we R different than Chinese..they work all the time , so they ned time 2 Crey and weep ..and places 4 that , while we In egypt spend all our time Complaining and weeping ..every where..at work ..homes and cafes,,,
    so we have proceded that stage...and made it Common..4 every one , every where and all the Times...as our problems...R more than ..the sum that can B expressed in one place at some of The time...
    wish 2 read more and more from U ..and 2 communicate , as I am a university Lecturer ( and I am Mafrous like u ..and it same that we have the same political and moral atttude) ..
    thx...waiting 2 read more from U ...take care

    ReplyDelete
  6. كده انا اتطمن ان مش بس الشعب المصرى هو اكتر شعب نكدى

    والله عمــــــــــار يا مصر

    طبعا بس فى الاخر احب اهنيك على المدونه الرائعه دى

    واتمنى انك تضفنى عندك وتشرفنى فى مدونتى المتواضعه

    ReplyDelete
  7. ههههههههههههههههههههه

    الشعب الصينى ده بجد طلع دمه خفيف اوى وغير كدة طلعوا عمليين جدا فى كل حاجة ...

    ...
    ده حتى العياط بيهتموا بيه ...بس عندك حق والله يا جعان شعبنا احنا (المصرى يعنى )اكتر شعب حزين فى العالم
    ...
    على الرغم من ان الكل شايفنا بتوع النكت والضحك والفرفشة ..بس ده كله مجرد غطاء او حجاب بنخفى بيه الحقيقة
    ...

    كالعادة بوست يجنن
    ...
    تسلم ايدك

    :)

    ReplyDelete
  8. انا ممكن اساعدك يا استاذ اسلام ونعمل مشروع قهوة من دول
    عندى محل كبير ايجارة 300 سحتوت فقط فى الشهر
    ايه رأيك
    ههههههههههههه

    ReplyDelete
  9. خمسة فضفضة
    و انتي طيبة يا دكترة
    يا فندم القهاوي دي للرجالة بس
    حتي العياط عايزين في مساواة مش كفاية العياط اللي في البيت

    ReplyDelete
  10. Mask
    المصري هايفضل مصري
    لا بلهارسيا و لاكوليرا تحوق فية و ان اجتمع شعوب العالم علية
    احنا شعب تلم

    ReplyDelete
  11. yasmine
    يا فندم تنوري القهوة طبعا
    بس شراكة صعب كل حقوق الانتفاع و العياط محفوظة دة
    عصير افكاري

    ReplyDelete
  12. yasmine
    يا فندم تنوري القهوة طبعا
    بس شراكة صعب كل حقوق الانتفاع و العياط محفوظة دة
    عصير افكاري

    ReplyDelete
  13. a Dreamer with feet on the Floor

    و ان شاء الله متكونش اخر مرة تنورني
    و زي ما قلت الصينين بيشتغلو طول الوقت فبيحتاجو للعياط
    و احنا نفس الشيء ما علشان الغالبية مش شغالة اساسا محتاجة تنعي حالها
    و مرحبا بك مفروس في ارض الجعانين

    ReplyDelete
  14. This comment has been removed by the author.

    ReplyDelete
  15. هههههههههههههههههههههههههههههههههههههههههههههه
    يا خبر ابييييييض
    طيب انا موافقه على المشروع ده وداخله معاك شريكه فيه
    انا براس المال قصدى المناديل والبراطيش
    وانت عليك الناس

    فكرتنى مره نفذت الفكره دى
    بس كان فيلم سينما
    واحده صحبتى عزمتنى عليه وقالتلى ده فيلم اسطورى وواخد جوايز وفيلم وثائقى واخد بالك انت
    وكله عن فلسطين
    قلت بس حلو الواحد يجهز قبل ما يروح
    وقمت معبيه جيوبى الاتنين وشنطتى كل انواع المناديل
    ده غير اللى مسكته فى ايدى
    استعدادا للمنحبه

    ReplyDelete
  16. ايه ده ده ده....؟
    فكرتى اتسرقت يارجاله وكده مش لطيف
    احنا نفذنا الفكره دى تقريبا من سنه انا واصحابى بالصلاه على النبى ولازم يكون لينا براءه اختراع وحقوق ادبيه وكلام فاضى من اللى بيقولوا عليه ده
    مش كفايه على الصينين الفوانيس وسجاجيد الصلاه كمان هاياخدوا نكدنا ويستغلوه
    احنا بقالنا كتير عاملينا لينا محل مختار بنروح نعيط فيه زمان كنا بنعيط وقت رابطه (عانسات للابد )ودلوقتى بنعيط علشان رابطه (متجوزين للاسف) انا من مكانى هذا بالنيابه عن اصحابى وبالاصاله عن نفسى(او العكس ) احب اشجب واندد واستنكر
    مع السلام عليكم

    ReplyDelete
  17. انت لو فتحت القهوة دي اوعدك هتكون فتحت التانيه من فلوسي بعد شهر اصل اكيد حبقى لاجئه في القهوة دي

    ReplyDelete
  18. و ربنا أنا طول عمري بقول أن الجماعه الصينين دول عاملين أحلي دماغ
    صباح الفل يا جعان
    تحياتي

    ReplyDelete
  19. عايزة اقوبك انى كل ما ادخل مدونتك ببقى عارفة انى هضحك من قلبى ههههههههه
    احييك على اسلوبك الرائع
    بس هما الصينين كده مسابوش حاجة معملوهاش وعلى كل الازواق
    من اول شكل المطاعم الى على شكل تواليتات
    لمقاهى العياط والندب العام
    واعمة اهى برده فكرة نتلهى بيها لحد ما يتحسن الحال او نكسر بيها حدة الملل
    بوست تحفة وتسلم ايديك

    ReplyDelete
  20. ههههههههههههههههه

    والله الشعب الصينى ده مسخرة

    ينهار ابيض بجد فكرة جامدة جدااا ولو اتطبقت هنا اصحاب القهاوى دى هيعبو فلوسهم ف شولة رز :)

    حلوة البوست يا مواطن

    ReplyDelete
  21. يالهووووووووووووووووووووووووى
    يا بغلى
    يا فكرى
    ياحنفى
    فين بقا المناديل
    مش دى قهوة المضايقين

    ReplyDelete
  22. عيونى دمعت من الضحك
    وعايزين نعمل قسم لضحاياك
    اللى بيفضلوا يستنوا بوستاتك عشان يضحكوا شوية وانت بتتأخر عليهم
    سايقة عليك النبى ما تتأخر

    ReplyDelete
  23. حبة حاجات (ايمان
    لا اتطمني علي الاخر
    غير كدة النكد في مصر ازلي مش مضروب بخيرة لسة
    سعدت بوجودك

    ReplyDelete
  24. oceaneyes
    اكتر حاجة عاجباني فيهم
    ان كل حاجة بيدوها حقها
    حتي الشحتفة
    يا ريت نبقي ربعهم
    دة احنا شعب يسد النفس

    ReplyDelete
  25. غير معرف
    معاك يا ريس انت عليك الديكور و انا اجيبلك المعددين

    ReplyDelete
  26. هههههههه
    باين عليا هبقى ضيفه لازقه عند هنا
    ده تعليق ملوش دعوه بالبوست خالص
    انا لفت نظرى حاجه بتتحركك فى البنر فوق
    الاقيك كاتب كل التعويذات الخاصه بعربيات النقل
    يا نهارى بقالى ربع ساعه بقراها هموت من الضحك

    ReplyDelete
  27. لاء لاء لاء
    المصريين ميعيطوش
    المصرى طول عمره معروف بقوته وبجبروته
    والصين حلوه

    ReplyDelete
  28. طيب انت نسيت حاجه هو الشعب المصرى محتاج القهاوى دى يا غالى الشعب المصرى بسم الله ما شاء الله غاوى نكد
    لو ضحكنا كتير يقولك خير يارب
    اول ميصحى من النوم قلبى مقبوض
    عينى الشمال بترف
    صباع رجلى اليمين بينقح عليه
    يا غالى نص الشعب المصرى بكى على ماما نونو وتقولى نعمل قهاوى للبكاء
    احنا اساسا شعب مبيعرفش غير يبكى بس

    ReplyDelete
  29. قهوة ايه بس
    اسكت بس ووطى صوتك احسن تطلع فى دماغ مستر كلين ويصحى من الصبح يعمل مؤسسة النواح المصرية ويقولك دى شركة مساهمة وينزلها اسهم فى البورصة
    ويدخل عز بقى يحتكر كل قهاوى الغم اياها
    ويقولك صغار المستثمرين فى الهم
    ويبقى الاخ مستثمر مغموم والباشا رجل اعمال تخصص دموع

    المصيبة بقى ليدخلوا نظام الريسيكلينج على القهاوى دى
    ويعيدوا تنقية الدموع وتبقى صالحة للشرب

    ReplyDelete
  30. ههههههههههههههههههههههههه
    المشروع ده لو اتعمل فعلا هيكون من انجح المشاريع...

    اخيرا حضرتك كتبت تدوينه جديده ..(:

    ReplyDelete
  31. رفقة عمر
    يا هلا بالحبايب
    الموضوع بتاع الجواز و القطارات و الميكروباسات دة لة تدوينة لوحدة
    ولا تكلكي مش هاحرمك تاني خالص

    ReplyDelete
  32. لماضة
    موضوع الشراكة دة صعب شوية
    و دة لمصلحتك
    علشان ميجيش جمال بعد كدة و ياخد توكيل البراطيش لحسابة

    ReplyDelete
  33. لماضة
    موضوع الشراكة دة صعب شوية
    و دة لمصلحتك
    علشان ميجيش جمال بعد كدة و ياخد توكيل البراطيش لحسابة

    ReplyDelete
  34. rony
    يا فندم هل قمت بتوثيق الفكرة في الشهر العقاري
    هل عندك سجل تجاري
    معلش اللي يلحق بقي

    ReplyDelete
  35. rony
    يا فندم هل قمت بتوثيق الفكرة في الشهر العقاري
    هل عندك سجل تجاري
    معلش اللي يلحق بقي

    ReplyDelete
  36. الحمقاء المضلله innominate x
    ولو تحبي تديني فلوسها مقدم يبقي كتر خيرك

    ReplyDelete
  37. micheal
    باشا صباح الجمال يا معلم

    ReplyDelete
  38. البنت الشلبية
    الله يخليك والله
    يسعدني اني عارف اخلي حد يضحك لاني في مرحلة مش عارف اضحك نفسي حتي

    ReplyDelete
  39. يا أستاذي إسلام .. الصنين متقدمين فى كل حاجة .. والتقدم دا مش من فراغ وقبل ما تفكر ان مصر تقلد الصين فى موضوع العياط فا ياريت نوصل لـربع اللى وصلت ليه الصين وبعد كدا ياعم مش هنعيط احنا عندنا استعداد نلطم لاء اللطم قليل لو .. وبعدين الشعب المصري غلبان ياعم لا بتاع عياط ولا وجع دماغ .. لو شوفت فيلم الفنان عادل امام بتاع الإرهاب والكباب هيوضح ليك مدي طيبة الشعب المصري ..

    أحبسه وعزبه وبهدله وأرفعه لو عايز بس تعالي فى الأخر هاتله أكله كباب وإزازة حاجة ساقعة هتلاقيه بيقولك انت بعد ربنا وسيدنا محمد . أستغفر الله العظيم يارب

    على فكرة انا كتير اوي بحاول ارد على موضوعاتك الهايلة بس أنا مشكلتي أنى مش بعرف اعبر عن اللي جوايا بكلمات بس الموضوع دا لقيت نفسي برد فيه كدا بالبركة :d
    بس كدا ياعم هابي فلانتين بقي

    ReplyDelete
  40. Foxology
    الله يخليك يا مواطن

    ReplyDelete
  41. الأميره أوسه
    دة انتي ممتازة انا هاخليكي كبيرة معددين القهوة

    ReplyDelete
  42. utopia
    الله يكرمك حقيقي
    الناس الذوق ذوق حقيقي

    ReplyDelete
  43. لماضة
    يا فندم مادام عجبك البانر اللي تجودي بية
    يبقي كتر خيرك

    ReplyDelete
  44. 3ala asm masr
    دة الصين كميلة خالص مصر كخة كخة

    ReplyDelete
  45. رئيس جمهوريه نفسى
    علي رايك احنا شعب فقري يموت في النكد زي عينية

    ReplyDelete
  46. utopia
    دة انتي مجهزة الخطة بقي بتاعة الحكومة
    شكلك شغالة في الحزب البقري الديموقراطي

    ReplyDelete
  47. radwa
    ليكي سهمين في حالة طرح الموضوع للتداول
    و اخيرا نورتيني

    ReplyDelete
  48. الله يجازيك يا أخي
    لم أضحك مثلما ضحكت الآن منذ فترة كبيرة

    ربنا يوفقك في شغلك وتنقضي غربتك على خير

    ReplyDelete
  49. Dr.Ahmed
    الله يكرمك
    وسعدت اني اضفت ابتسامة عليك ولو لفترة قصيرة
    اسعدني مرورك حقيقي

    ReplyDelete
  50. اه انا قريت الموضوع ده في الجرنال و كان نفسي اروح اعيط شويه

    ReplyDelete
  51. طيب انا بعيط من غير حاجه ده دليل على ايه بقى عاااااااااا
    دا انت خلصت كل الاقسام زي خلصت فيك كل الكلام كده

    ReplyDelete

بعبع وقول اللي في نفسك يا خويا