Sunday, November 04, 2007

بقالة الحج طنطاوي


قال رسول الله صلي الله علية وسلم إذا وسد الأمر إلى غير أهله فانتظر الساعة
اعتقد ان في ايامنا دي مش وسد و بس دة اتربط بسلبة في ديل الجلابية لدي البعض لما يخرج علينا الامام الاكبر شيخ الازهر سيد طنطاوي كل فترة فتوي رأي مخالف لامة محمد كلها فلابد في الامر انة يا ولاد يعني مثلا في حادثة الصور الساخرة عن الرسول الكريم في احدي الصحف الدانماركية كان رد الحج سيد ان محمد ميت لا يستطيع الدفاع عن نفسه و أن الأمم العاقلة الرشيدة
تحترم الذين انتهت آجالهم وماتوا
يعني المليار وثلاثمائة مليون مسلم كلهم ولاد ستين برطوشة و محمد صلي الله علية و سلم عايش في قلوبهم مش عاجبينة
يا اخي دة البوذيون والهندوس يدافعون عن أديانهم، بل ان عبدة البقر و الجاموس و مؤخرة القرد كمان يفور دمهم
اذا سب احد مؤخرة القرد بتاعهم
وطبعا مننساش من حوالين سنتين لما طالب مجمع البحوث الإسلامية (أعلى جهة فقهية في مصر) بإصدار فتوى رسمية تجيز تولي المرأة منصب الرئاسة في الدول الإسلامية جايز كان بيمهد لو منفعش موضوع التوريث ان سيدة مصر الاولي هي اللي تمسك
و بالقريب ايضا لما فرنسا ارادت منع الحجاب في مدارسها تماما
شلح الحج سيد وقالك حقهم يا جرابيع يقلعوهم زي ما هم عايزين و غير كدة و علي لسان الامام الاكبر وزير الداخلية الفرنسي طمئناني قائلا ان فرنسا تضمن لرعاياها المسلمين حرية تامة في ممارسة شعائرهم الدينية
احية امال هو الحجاب دة من شعائر اية..؟؟؟ شعائر عمل المسقعة
و اخيرا و ليس اخرا بالتاكيد
أفتى بجلد الصحفيين الكاذبين ولاد الغسالة ب80 جلدة
حقيقي انا مش عارف عدد التمانين دة علي اساس فقهي شرعي يعني و لا اجتهاد ولا بيطبق عليهم حكم الزناة
اصل ممكن في حالات تانية الواحد يلاقيهم 200 جلدة
واذا الصحفي ابح و طول لسانة ممكن يبقو 300 مع اجلاسة علي خازوق سيراميك مجلي او مع اضافة سيخ محمي في صراصير ودنة
وافتي سيادتة ان الصحافة التي تلجأ لنشر الإشاعات والأخبار غير الصادقة تستحق المقاطعة ، وحرم شراءها ويجب علي المسلم الصادق في حال لمسة لاي جريدة من دول الغسل سبع مرات احداهما بالتراب اصل دول عالم انجاس ولاد قديمة ويجوز كنس السيدة عليهم
بل ربما تعامل معاملة الخمر اللي شيخنا الكبير لم يفدنا باي شيء في وجودها في دولة المفروض اسلامية ويتم تداولها زي بسكوت الشمعدان
ولم يخرج علينا بفتواة سريعة الانطلاق في حوادث العبارات و غرق البشر او الاكل المسرطن او ماء الكبانيهات اللي المصريين بيطفحوة ليل نهاراو التعذيب في زرايب الدولة او تزوير الانتخابات او الفيديو كليبات الخ الخ درجن
ولما سؤل كان ردة كالتالي هل لي أن أفتي في شأن عسكري؟ هل لي أن أسأل في شأن صحي واقتصادي فأجيب؟ الجهاد موكول لولي الأمر وللقيادات العسكرية لأنها تحدد صالح البلاد
و لا انسي ردة ايام الانتخابات الرئاسية و من يؤيد فكان ردة انة يؤيد ترشيح الرئيس مبارك لفترة رئاسة جديدة ، رغم اعترافه بأنه لم يقرأ البرامج الانتخابية للمرشحين للرئاسة يعني داخل من غير ما يشوف يعني لو برنامج السيد الرئيس ريان يا فجل فهو مجنونة يا طماطم

هذا و بالله التوفيق
الا الريال يعمل كام جنية دلوقت


98 comments:

  1. احمد عزميSunday, 04 November, 2007

    والله ما عارف اقول ايه بس
    مش عارف اكتبله حتى عذر او حجة
    بس انت مشمعايا انه راجل طيب وغلبان وابن حلال؟
    انا صليت مرة وراه صلاة جمعة فى جامع الازهر وكنت فرحان اولا!!!!1
    شيخ الازهر بئى وهسمعله الخطبة لايف
    لقيته فى نص الخطبة بيزعق فى احد المصلين وبيقوله اتعدل !!!!!!!!!!اصله كان ممدد رجليه

    فقلت شكراًًًًًًًًًًًًًًًًًًًًَََََََََََََ هو هنا كمان بيزعق!!
    تسلم يا غالى وتسلم ايدك وربنا ما يحرمنا منك يارب

    ReplyDelete
  2. والله انا حتى قبل مااعرف اى حاجة عن بلاويه كنت كل ما الاقيه فى قناة اقوم قلباها جرىىىىىى
    واقول لماما مش هو بيقول فى كلام ربنا؟؟ بس انا مش بطيقه خالص ياامى .. تضحك وتقولى ومين سمعك

    يا ساتر اعوذ بالله

    عايزين ديننا يبقى تفصيل باين عليهم
    حسبى الله ونعم الوكيل بجد

    ReplyDelete
  3. عارف ...مش عارفة اقول ايه ..ولا عارفة ايه اللى ممكن يتقال فى الحالات دى

    ....

    ربنا على الظالم والمفترى ...وخلوهم يعيشوا حياتهم كويس اوى دلوقتى والله اعلم اخرتهم هاتكون عاملة ازاى ..كل واحد عقله فى راسه يعرف خلاصه

    ....

    هما عايزين يمشوا البلد على مزاجهم ...خلاص مافيش مشاكل ...يمشوها ...ما هى كدة كدة خربانة
    ...

    واحسن حاجة الصبر ...الصبر ده جميل اوى على فكرة ...مع ان الشعب خلاص هايفرقع من كتر الصبر ...بس اعتقد ان دى حاجة من اللى شعبنا فالح فيها

    الصبر

    ....


    حلو موضوعك كالعادة ...مع ان محتواه يضايق بلد ...بس هانقول ايه

    حسبى الله وهو نعم الوكيل


    ....

    ReplyDelete
  4. الراجل دة
    يتحسبلة انجاز تاريخى

    انة خلى سمعة الازهر فى التراب
    عمل اللى معرفش يعملة نابليون

    ولا اى حد بيكرة الاسلام

    ربنا يستر على باقى الحاجات اللى كانت حلوة

    ReplyDelete
  5. السلام عليكم ورحمة الله وبركاته

    بالنسبة لشيخ الازهر :

    حسبنا الله ونعم الوكيل

    ربنا يجازيه علي اد نيته

    ---------------
    اما اخبار الريال:


    الريال في النازل مش عارفه ايه اللي جراله

    :-D

    ReplyDelete
  6. حسبى الله ونعم الوكيل
    على راى الاخ اللى كان فى فيلم جاءنا البيان التالى
    انا كمان والله كل ما اشوف وشه فى قناه اقلب عليها مهو اصل انا غلبانه وعندى الضغط
    امال الريال فخليك فى اليورو احسن هو اللى ملعلع دلوقتى

    ReplyDelete
  7. هو انت اهم سطر كتبته فى البوست ده هو اخر سطر
    ريال واحد له قيمة اكبر من اللى انت كاتب عنه
    وربنا يهددددددددددددددددددددددددددددده

    ReplyDelete
  8. سيد اوكية
    سيد فتاوى
    فتاوى وعجبانى
    افتى واجرى
    اسامى والقاب كثيرة قل ان يحصل عليها شيخ ازهرى تحول بقدرة قادر وبكل خسة ونذالة الى شيخ ازعرى
    ابقى خلى المواطنين الاسرائيليين ينفعوة بقى امام ربنا

    ReplyDelete
  9. عماد الدينMonday, 05 November, 2007

    السلام عليكم
    جبهة علماء الأزهر الآن تقوم بإعداد قائمة بفتاوي الشيخ طنطاوي لمراجعتها تمهيدا لمحاكمتة فقهيا ناهيك عن انهم يتهمونة بتزوير محاضر المجلس الأعلي للشؤون الإسلامية

    أضف لذلك قرار شيخ الأزهر الأخير بتعيين متحدث رسمي للمشيخة يبدو أن هذا نوع من التمهيد لإقصاء الرجل بالفعل

    ----

    نأتي لسؤالك عن قيمة الريال بالجنية
    بسم الله الرحمان الرحيم
    الإجابة رقم أربعة أفغانستان :)

    مصر من غيرك مرة يا رافت

    ReplyDelete
  10. احمد عزمي
    باااااشا
    نورت المدونة يا ريس

    بناسبة اللي انت قلتة انا سمعت
    انة مرة في خطبة لسع واحد بيصلي علي قفاة علشان مكنش واقف كويس في الصف

    ReplyDelete
  11. إنـســـانـة
    ربنا يستر علينا و علي الازهر
    بعد كدة هايخوفو بية العيال الصغيرة

    ReplyDelete
  12. oceaneyes
    معلش لو محتوي الموضوع ضايقك
    بس هانعمل اية يا عزيزتي دي بلدنا بمزاياها و عيوبها
    مع اني بدور اهو علي المزايا لسة
    الواحد تعب من النقد
    سعدت بمرورك كالعادة

    ReplyDelete
  13. واحد مش فاهم حاجة
    صدقني احسن حاجة
    انك تفضل مش فاهم حاجة

    ReplyDelete
  14. This comment has been removed by the author.

    ReplyDelete
  15. فكرتنى بفيلم عادل امام وهو بيقول
    ربنا لا تؤاخذنا بما فعل السفهاء منا
    الا مين السفهاء دول يا اسلام ؟؟
    انا مش عارفه ازاى سايبين الراجل ده وللاسف شيخ للازهر
    قال 80 جلده قال
    امال لا مؤاخذه لو كانوا شتموا السيده الفاضلة كان امر بكام جلده؟؟
    استر علينا يارب وعلى ولايانا

    ReplyDelete
  16. من رايي انه كفايه عليه كده
    اظاهر اننا عندنا نقص فى الكراسي التيفال
    قريت انه لغي تدريس كتب الفقهاء الاربعه و قرر تدريس كتاب من تاليفه
    ملخص للكتب ديه
    رايك عندك حق فيه و انا معاك
    بس الاستهزاء بالشخصيات مش باميل ليه
    و ربنا يخرب بيت اللى كان السبب

    ReplyDelete
  17. الله اكبر ..... من حق المسيحيين يسخروا من الأسلام و من المسلمين علي المنتديات ال....., و أنا مكنتش عارف ايه اللي بيحصل في البلد اللا من خلال تلك الجوعانيات و بارك الله في مجهودتكم الجوعانية ....
    اما الريال ... فلا تسل عن أخباره ... فجميع عملات العالم تزيد و ترتفع الا السحلول المصري و الله يرحم ايام الجنية الجبس و الخشب .... وربنا يستر علينا و علي أولادنا من أيام الجنيه الورق ؟؟؟؟؟؟؟
    مشكور خيي ما قصرت ؟؟؟

    ReplyDelete
  18. 4 sorrow , we R naw in a very deep Depression( Monkhafad ...we Ehpat kaman Yemshi) this stage we live in is one of the worest since al _Sheda Al mostanserya...and those who role us ..R exactly ( the Mamaleek) ..ones we bought 2 Protect us...or Guarding doggs..tured 2 attac us with our own mony...so they select the ones who R easy 2 Orient .....
    when we will get out of this bad Historical phase....I hope we can some how some Day..
    About ( Al-rial) if U want it 2 re rise U should return Back ...so the Saudies will pray 4 u..

    ReplyDelete
  19. الراجل ده أنا فرحان بيه جدا عشان من عشرتاشر سنة بنقول ياناس الراجل ده ما تاخدوش بفتاويه وهب طف الصاع وظهر المستخبي وبان
    والدولار في النازل ويزعمون أن هذا من قوة الجنيه الذي صرعه ولكنه اليورو ياصديقي والذهب والبتروليوم جيلي

    وعل كل السعر لايف من أر الحدث

    1 SAR= 1.46 EGP
    وفي النازل

    ReplyDelete
  20. انا مش هقول غير لا حول ولا قوة الا بالله

    انا عارفه موضوع الفتاوى وقولت عادى اصله موظف

    اما اليوم شفت موضوع انه خلاص هو الامام والامه الاربعه اتلغو من التعليم فى الازهر وهيبقا الرجوع عند الحاجه

    هههههههههه

    والله هم يضحك وهم يبكى

    بضحك عليهم وعلى الساذجه ونسينهم ان فى اخره هتلمهم كلهم وفى رب هيحاسب

    وببكى على بلادنا اللى بقا فيها التغير وتعديل حتى فى الدين

    اتكلمت عن الموضوع ده من كتر ماكنت هنفجر لما شفت الخبر

    قولت اكتب بدل مارووح فيها من كتر الكتمه

    حسبى الله ونعم الوكيل بجد

    ReplyDelete
  21. بجد مش لاقي كلام اقوله غير ربنا معانا بجد ويا دوب تلحق تكتب لانه هيحرم التدوين شرعا
    تحياتي

    ReplyDelete
  22. على الرغم من تحفظي على ان الخمر يتم تداولها في مصر كما الشمعدان لأن دا مش صحيح


    إلا أنني راض تماما عن مستويات تداولها الآن، حتى وإن لم تصل إلى مستويات التداول الشمعدانية، إلا أنها في صعود، وهذا جيد على كل حال

    ما لا يرضيني فقط هو حالة الخوف المرضي من تداولها في المناسبات وشهر رمضان، وكأن شهر رمضان يوجب بالتبعية تطهير البلد من المسيحيين، أو بشكل أكثر عموما، من غير المسلمين، أو بشكل أبسط، ممن يريدون الشرب ولا يرونه شيئا سيئا لهذه الدرجة، حتى لو كانوا مسلمين موحدين

    في النهاية اعتقد ان الاسلام يؤكد على ان كل نفس بما كسبت رهينة مما يعني ان كل واحد متعلق من عرقوبه وما فعله لن يحاسب عليه غيره

    هو فيه زي الستيلا يا شيخ؟

    ReplyDelete
  23. خمسة فضفضة
    نورتيني يا دكترة
    ربنا يجازي بقي كل واحد
    طب اية اللي في الطالع

    ReplyDelete
  24. خمسة فضفضة
    نورتيني يا دكترة
    ربنا يجازي بقي كل واحد
    طب اية اللي في الطالع

    ReplyDelete
  25. 3ala asm masr
    ادي اخرة الفرجة علي التلفزيون بتوصل فكر هدام للشعب

    ReplyDelete
  26. utopia
    يعجبني و انتي علي الخط كدة

    ReplyDelete
  27. adhm
    شكلك بتحبة اويييييي

    ReplyDelete
  28. والله ان هذا الشخص الصعيدي الوحيد الذي احتقرته

    انه انسان جبان وفى نفس الوقت وقح

    اول مرة اشوف كده فى حياتي

    ReplyDelete
  29. عارف يا جعان انا ازهرية اما عن جدة وشايفة ان الراجل ده عار على الكرسي اللي قعد علية الامام المراغي وجاد الحق مش كفاية عليه خرب المناهج اللي كانت بتخلي طلبة و علماء الازهر متميزيين بفكرهم المعتدل لا وكمان كاسفنا وعاررنا بجهلة في كل حتة انا خلاص بطلت اسمية شيخ الازهراصلة ميسحتقهوش كفاية عليه لقب كبير موظفي الازهر

    ReplyDelete
  30. تسلم إيديك يا اسلام

    انا اللي فاقع مرارتي..
    انه عمره ما ابتسم!!!

    مستخسر فينا صدقة ،

    كل احاديثة او فتاويه مصاحبة عبوس الوجه او الوش الأبلكاش

    مش مهم يفتي زي ما هو عايز .ما هي فته
    انما

    رسالة اوجها له ..

    والله يا شيخ لتبتسم

    ReplyDelete
  31. سمعت الخبر اللى بيقول انهم عايزين يلغوا تدريس المذاهب الاربعة ويدرسوا مذهب واحد... للتوفيق ما بين جميع الاختلافات

    والنكتة بقى انه مذهب الشيخ طنطاوى
    !

    ReplyDelete
  32. يلا ربنا معانا والله من الناس دى

    "اذا رب البيت بالدف عازفا فما شيمة اهل البيت سوى الرقص"

    وكان البلد كانت نقصة واحد زى دة يفتى فيها

    ميرسى على البوست

    انا اول مرة ازور المدونة بس جااااامدة

    تقبل مرورى

    ReplyDelete
  33. الشيخ شخشوخة الحزب الوطنى

    اسود فترة مرت على الازهر وعلى مصر هى الان - لما كانت مصر بتضعف والفساد والاحتلال بيركبها كان الازهر بيبقى الحصن الاخير اللى بيقوم يدافع ويوحد الصفوف ويقاوم انما المصيبة دلوقتى ان عصابة حرامية بتحكم البلد والازهر والمفتى من تبع العصابة بتاع احمد عز ولجنة السياسات وعميلة المخابرات الانجليزية سوزان مبارك

    ReplyDelete
  34. شيخ الحكم يا عامة الشعب
    يعني عاوزين ايه من واحد معمول تفصيل
    علشان يرد بأي حاجه تمس الكرسي المحترم
    .. مش الكرسي بتاعه طبعاً..)
    (الكرسي بتاعه دائم بدوام كرسي أخر
    انه يستاهل الرجم
    ده لا يقال فيه غير حسبي الله ونعم الوكيل

    ReplyDelete
  35. كالعادة بتخلينى اضحك من اسلوبك الفريد من نوعه
    بالنسبة للراجل ده بقى بجد والله نفسى اشوفه اقوله كلمتين لمصلحته
    يعنى كفاية منظره الفضيحة قدام العالم كله بما انه رئيس الازهر ...الى كان فى يوم من الايام منارة للعلم والعلماء
    ..ده حتى مش حلو على طلبة الازهر ان حد زى ده يرأسهم ..ده المفروض يكون قدوة ..بالذمة هيتعملو منه ايه..
    الولاء لجزمة الحكومة يعنى ولا للمنصب الى رايح الى زوال
    الى يحرق الدم ان فى شيوخ فى الازهر بقو زيه فعلا ونسمع فتاوى هبلة ملهاش لازمة وطبعا اهمهم على جمعة
    ...
    لما الناس دى تكون مسئولة عن ديننا تبقى القيامة خلاص قربت...
    والى يضحك بقى انهم لما بيفتو بحاجات تبع الفساد تلاقيه بيتكلم باللغة العربية الفصحى ويبدا بالحمد والثناء على رسول الله
    مبيتكسفوش على دمهم ..جتهم نيلة رفعولى الضغط
    ==========
    سيبك انت ..المهم انت عامل واخبارك ايه
    شكل الريالات كترت وعايز تشوفلها صرفة ههههههههه ربنا يوفقك ويزيدك

    ReplyDelete
  36. عماد الدين
    دكترة خلي بالك مش معني ان فية متحدث رسمي ان دة تمهيد لاقصاء طنطاوي
    اعتقد انة موجود علشان ياكل الضرب و الشتيمة بدالة

    و بالنسبة لمرار مصر حط عليها مربي

    ReplyDelete
  37. رفقة عمر
    المية اللي بالباكابورت دي حقيقة معلومة للجميع
    الماء بة برص قاتل
    خلي بالك بقي

    ReplyDelete
  38. لماضة
    السفهاء دول يا عزيزتي
    هم اللي ربنا قال في كتابة
    {ألا إنهم هم السفهاء ولكن لا يعلمون }

    ReplyDelete
  39. Esmeralda
    بالظبط زي ما قلتي
    هايتم تدريس كتاب «الفقه الميسر» للإمام طنطاوي، بدلاً من كتب المذاهب الفقهية الأربعة
    في مختلف معاهد الأزهر للمرحلتين الإعدادية والثانوية
    يعني هايبقي عندنا طنطاوية مند الصغر

    ReplyDelete
  40. علمك علمك علمك
    الراجل ده سكره وكتاب الله
    بقى بذمتك ياشيخ
    بذمتك
    مابتحسش انك وانت بتتفرج عليه في التلفزيون انه يستاهل اوسكار احسن منوم
    ده كلامه وطريقته في الكلام وهيئته ونظرة عيونه وكل حاجه بتؤكدلي بما لا يدع مجالا للشكشكه .. انه مصرصر
    او ضارب مشط براندي اربعه وتمانين محلي الصنع


    وبالنسبه للريال بكام دلوقتي .. شوف انت معاك كام وعايز تبيعه بكام .. ومش هنختلف
    صحيح انا مش هشتري ولا اعرف حد هيشتري .. بس برضه والله مش هنختلف
    واعتبر اللي في جيبي .. في جيبي برضه



    سلاموووووووووز

    ReplyDelete
  41. والله على قد ما قعدت اضحك على قد ما اتغميت وقرفت من الراجل ده اكتر منا قرفان

    ده سيد بيه اوكيه ترزى الفتاوى الأول

    ربنا يرحمنا برحمته

    ربنا يصبرك ويهدى مرارتك اللى اكيد اتفقعت

    ReplyDelete
  42. كل اما اتذكر مرة و هو مع مذيع و وواثق قوى من نفسه و هو بيقول ان فوائد البنوك حلال و انه هييجى يومالقايمة و هنشو فمين اللى صح و مش عارف ايه ببقى عايزة اضحك من الاسلوب و الطفولى فى احقاق الحق زى ما بيقول و ببقى عايزة ابكى من الحال اللى وصلنا ليه

    اما بالنسبة للخمور فمببره كان غريب جدا قال السائح ياتى الى مصرنا ومتعود انه يشرب الخمور و ايه المانع

    وللااااا اكن فيها تشريع

    الريال بقى بيقولك بقى ب 1.48
    نزل يعنى

    وربنا يستر علينا و على ولايانا
    ومن هذا المنطلق يحضرنى قول الشاعر

    سلم لى على جوزك يا اسماعيل بيه

    Regards:
    lojain :)

    ReplyDelete
  43. والله يا أخي اضحكتني بارك الله فيك

    الحمد لله ان علم الناس ان دعوي هذا شيخ الازهر وهذا المفتي فلا تاخذوا من غيرها أصبحت موضة بالية

    وابشرك أن هناك في الازهر جبهة من العلماء الشرفاء تسمي جبهة علماء الازهر اعدت قائمة بكل فتاوي الشيخ منذ توليه مشيخة الازهر والتي خارجة عن شرع الله لمحاسبته عليها وكي يرجع عنها

    وحتي وإن لم يرجع . لكن يكفي ان هناك من يقول له ذلك .. وشهد شاهد من اهلها


    جزاك الله خيرا اخي . شرفت بمروري عندك

    ReplyDelete
  44. اخونا ابو ملك
    ليه بتوجع دماغك؟؟؟ ..
    لما تتكلم... تتكلم عن بنى أدمين .. لان البنى ادم ممكن يأثر فيه الكلام .. اما اللى ما ينفعش فيه حاجة .. فخسارة الكلام فيه ...
    سؤال فنى .. هل طلعت فتوى عن المدونات انها رجس .. والعياذ بالله؟

    ReplyDelete
  45. شوف اهو كله كوم وحكايه انه يلغى المذاهب الاربعه ويعمل لنفسه واحد كووووم تانى خااااالص
    ده ايه الحلاوة دى ..والله مش عارفه احنا هيحصلنا ايه اكتر من كده
    حسبنا الله ونعم الوكيل

    ReplyDelete
  46. السلام عليكم
    استاذ جعان انا قريت البوست
    انا معاكوا فى كل اللى تقولوه
    بس بجد الراجل ده بيصعب عليه
    والله
    للاسف هو مش عارف اللى بيعمله ده
    مش عارف اخرته ايه
    ده واحد غرته الامانى والامال والمناصب والمدح من اللى ربنا يهديهم هما كمان
    بجد الناااااااااااااااااار وماادراك من الناااااااااااااااار
    اعاذنا الله جميعا منها
    ربنا يرده للحق ردا جميلا
    هو وكل الطغاه والضالين المضلين

    ReplyDelete
  47. Viva La Tata
    سعدت اني اضفت الي معرفتك ولو قدر يسير
    وسعدت بزيارتك لمدونتي حقيقي

    وربنا يخليلنا السحلول المصري

    ReplyDelete
  48. a Dreamer with feet on the Floor
    انت نظرتك متشأمة اوي
    يا راجل روق كدة
    مماليك اية وهكسوس اية
    بكرة نتعلق علي باب زويلة

    ReplyDelete
  49. عصفور المدينة
    يهمني سعادتك يا باشا
    وواضح انك واصل في البورصة

    ReplyDelete
  50. noraamahdy
    يا فندم روقي كدة
    واضح اني دوست علي الجرح عند الناس كلها

    ReplyDelete
  51. hekaytna
    دة بيقولو ان المودن هايتعامل معاملة المرتد

    ReplyDelete
  52. nael
    ايا عزيزي واضح انك محتاج تلف شوية في القاهرة علشان تعرف مدي انتشار بيع الخمور بها
    واماكن تواجدها سواء في مطاعم بارات كافيهات
    الا لو كنت مش معتبر البيرة خمور مثلا

    وحقيقي مش فاهم يعني اية انك راضي عن مستوي تداولها ؟؟؟
    سيادتك من التعداد ولا اية

    وفي اللي احسن من الستيلا باد ويزر

    ReplyDelete
  53. فارس عبدالفتاح
    اهو قدرنا بقي نعترض علي حكمة ربنا

    ReplyDelete
  54. MAI
    يا اهلا باستاذتنا
    يكفي شهادة شاهد من اهلها

    ReplyDelete
  55. ماهي باظت خلاص ياعم جعان
    هاتيجي على "المؤسسة الدينية" ويفضل حالها معدول .. دا بفرض انها مؤسسة دينية.
    نقول ايه بس حسبنا الله ونعم الوكيل..
    الناس دي راحت من قلوبها الرحمه وبقت بطونها كلها لحمه.
    من طرف اخوك ماسك

    ReplyDelete
  56. والله خليت لساني اتخرس ومش عارفة ارد اقولك ايه

    فاكرة زمااااااان ايام التاريخ اللي كنت باخده ومش طايقاه
    ان في حد من اللي احتلونا
    وتقريبا والله اعلم الفرنسين
    لما حبوا يدخلوا الازهر بجزمهم
    الشعب كله وقف
    مش عارفة دة صح ولا لا
    والله اعلم برضه ان النتيجة ان الفرنسين فشلوا
    اهو الراجل دة بقي

    عمل اللي مش عملوه الفرنسين

    بالنسبة لسؤالك

    يعني ايه جنيه؟

    ReplyDelete
  57. اين انت ؟

    بقالك فترة مش ظاهر يعنى ؟

    اتمنى يكون المانع خير

    ....

    تحياتى ليك واتمنى نشوفك قريبا على خير ان شاء الله

    ...

    ReplyDelete
  58. حسبنا الله ونعم الوكيل اللى هيجننى انه كبير فى السن..وكل ما نكبر ندرك اننا شارفنا على النهايه
    ونحاول ان نتقى الله ونسارع فى الخيرات
    الراجل ده كلما يكبر يزداد أمل فى الدنيا
    ويزداد خيبه
    هاتجنن مصر ممتلئه بمنهو افضل ليكون شيخ ازهر
    وهذا الرجل المسيحى الافكار المسلم الهيئه يكون شيخ ازهرنا الآيل للسقوط
    يارب انت اللى عهدك الخلاص

    ReplyDelete
  59. ايه يا جدع الفقر ده
    فعلا ده شيخ علي ما تفرج
    وبعدين ده كلب الحكومه
    مش فارقها معاه حاجه
    ما دام بيبقبض
    ياله حسبي الله ونعم الوكيل
    فين يا شيخ يا شعراوي
    كان ممشيهم زي الكلاب
    ولا حد كان يقدر يقولهم حاجه

    ReplyDelete
  60. اسلام انته نمت؟؟؟؟

    فين مقالاتك؟؟؟
    ولا انت انت اتجلدت؟؟؟

    :)

    ReplyDelete
  61. احلى حاجة اني لما احبيت اشغل البلوج بتاعي تاني ما لقيتش غير البلوج بتاعك

    امال زملاة ايه بس
    وبتاع


    مش هالاقي اعز من البلوج بتاعك يا باشا علشان اجرب فيه


    ما نستغناش عنك ابدا يا ابني

    ReplyDelete
  62. بركات مقالك المرة دي

    ما شاء الله ولا قوة الا بالله

    اشتغل الايميل تاني واشتغل البلوج

    شكرا يا فندم

    ReplyDelete
  63. أُكتب بالرصاص
    الله يخليك يا استاذنا
    تقريبا التكشيرة دي من شكليات المنصب

    ReplyDelete
  64. Lasto-adri *Blue
    و احتمال كمان يبقي الجواز علي مذهب الامام ابي طنطاوي

    ReplyDelete
  65. WhatEver?!!!
    سعدت بمرورك حقيقي
    و ان شاء الله متكونش الاخيرة
    وربنا مع الجميع

    ReplyDelete
  66. غير معرف
    اية يا ريس التخبيط في الحلل دة
    بلاش القاء الاتهامات جزافا كدة
    وحد الله و اشرب الليمون

    ReplyDelete
  67. cinderella
    واضح انة خلاص مش بيحوق فية حاجة بتاتا

    ReplyDelete
  68. البنت الشلبية
    سعدت جدا باضفاء بسمة علي وجهك
    بصراحة لو عايزين رأيي
    الراجل اكاديمي بحت الله اعلم مدي تطبيقة لتعاليم الاسلام في حياة او عملة
    فهو ذو نشأة بسيطة جدا
    وفأجاة
    ربنا فتحها علية فلوس و منصب و سفريات للخارج
    يعني الراجل معزور بعد السميط و السريس
    بقي يشوف المربي و بينة و بينها سنتيمترات

    انا كويس و الحمدلله الريالات مغرقاني وبلبس مايوة و انا بعدها
    ربنا هو العالم بالحال و الله
    الله يخرب بيت ابو الفيزا

    ReplyDelete
  69. يا ساتر انا بشوفه في خطبة الجمعه بتخنق و اقلب و انشالله ما سمعت لأن مش هتفرق لو سمعت او لأ هي هي

    ReplyDelete
  70. لا حول ولا قوه الا بالله

    وده من ايه

    يعنى هو نام وصحى لقى نفسه كده

    ولا ده مرض منتشر ولا ايه بالظبط

    ReplyDelete
  71. سلام عليكم يا بو موكا
    يعني الراجل كتر خيره اهوه فاتح بقالة فيها كل جاجة احسن من كرفور
    مش ناقص الا ديلفري فتاوي بس و يبقا كدا فل الفل

    ReplyDelete
  72. والله ما عدا طنطاوى ما تقول "بقال" وربنا يكون فى عون البقالين اللى معاه
    ولكم عندى رحلة لرفح
    http://yalaya3mlak.blogspot.com/2007/12/blog-post.html

    ReplyDelete
  73. ههههههههههه
    والله اسلوب ساخر رائع
    هو الراجل ده
    بيطلع منه فتاوى نكت
    مرة فى قناة الجزيرة مذيعه بتقله بيهدو فى المسجد الاقصى
    راح بيقلها
    انتى بتتكلمى جد
    قالتله ايوة طب ايه العمل
    راح قاللها طبعا الناس اللى حوالين المسجد يدافعو عنه
    اهلا وسهلا
    المدنيين يقفو قصاد الدبابات
    طبعا انا مش هحصرلك اللى حصل منه
    بس انا نفسى بجد لانى حزين على قلعة الازهر الشامخة يمسكها واحد زى ده
    لانى بعتقد انى المفروض يكون فى سلطة رابعه فى دولتنا وهى السلطة الازهرية وتكون منفصلة تمام الانفصال عن السلطات
    القضائية والتنفيذية والتشريعية
    ويكون اختيار الامام بالانتخاب
    مش تعيين من رئيس الجمهورية
    اضغاث احلام
    تحياتى

    ReplyDelete
  74. فينك؟
    مفتقدة كتاباتك
    ولا انت مش فاضى ريالات ومايوه
    مبشبشة معاك
    =======
    انا عارفة موال الفيزا المؤلم ربنا يوفقك يارب ويحققلك كل المقاصد

    ReplyDelete
  75. قديمة التدوينة دى حبتين يا عم اسلام بس لذيذه موت ...
    مستنيين الجديد بقى :)

    * على فكرة الحج عاوز يطبق على الصحفييف حد قذف " المحصنات الغافلات المؤمنات " واخد بالك انت ؟؟؟
    :)


    http://7adeth-elro7.iblogger.org

    ReplyDelete
  76. Soooo
    يا فندم انا بطلت فرجة علي التلفزيون المصري من فترة لا بأس بها
    رحمة بنفسي و اهل بيتي
    بس تعال هنا انت عرفت مشط البراندي دة منين يا خلبوص؟؟؟؟

    ReplyDelete
  77. Foxology
    فوكس باشا
    ربنا يصبر الكل دة امتحان اصبرو يا مؤمنين

    ReplyDelete
  78. LOJAIN
    اكاد اجزم ان لو الحكومة فكرت انها تحلل الجواز العرفي لخرج علينا غدا
    بفتوي علي مقاس القرار

    ReplyDelete
  79. المهـ إلي الله ـاجر
    عارف ان بالازهر هناك رجال لا يرضون الا الحق
    وجايز دة اللي مصبر ناس كتير
    اسعدني مرورك

    ReplyDelete
  80. eldoctor
    يا دكترة انا مش بوجع دماغي عن عمد
    انا مولود كدة
    وفي فتوي بتقول ان المدونات تبطل الوضوء
    نورتني

    ReplyDelete
  81. shayma
    يا فندم ازهرة و هو حر فية يغسلة او يكوية

    ReplyDelete
  82. عاشقه الفردوس
    هو صعبان علي الكل
    حتي من كتر ما صعب علي نفسة عمل فقة مذهبي باسمة

    ReplyDelete
  83. Mask
    انا عارف يا شيخ علي رأيك
    نورت المحكمة يا برنس

    ReplyDelete
  84. smraa alnil

    يا فندم الراجل دة عمل اللي معملوش الاحتلا كلة من ايام الهكسوس في مصر
    اما بالنسبة لاستفسارك عن معني و مدلول الجنية
    هو عبارة عن قطعة من الورق لا تنفع حتي في الاستخدام في دورات المياة العامة

    ReplyDelete
  85. oceaneyes
    معلش اعذروني و الله مشغول جدا
    جاي قريباااااااااااااا

    ReplyDelete
  86. ام البنات
    ياااة دة انتي شايلة وساكتة في قلبك بلاوي
    ربنا يعينك والله

    ReplyDelete
  87. حواديت وحكاوي
    للاسف لن يوجد شعراوي اخر ويجود الاف طنطاوي

    ReplyDelete
  88. ض/خالد
    معلش يا ضكترة كنت مئايل شوية

    ReplyDelete
  89. nada_adly
    الست الابلة مبروك افتتاح مدونتك تاني
    انا مش عارف هاتعملو اية من غيري

    ReplyDelete
  90. koukawy
    احسن حاجة بيكون في برنامج اطفال علي القناة التانية

    ReplyDelete
  91. شاب مصري مفروس
    مفيش لسة تفسير علمي محدد لحالتة

    ReplyDelete
  92. عمر محمود
    معندكش رحلة لدريم لاند؟؟


    doha
    نورت يا فندم وان شاء الله متكونش اخر زيارة

    البنت الشلبية

    انا اهو غرقان في الريالات و الشلنات و الربع جنية المخروم


    dr.shadow
    تدفع كام و انزل الجديد؟

    ReplyDelete
  93. مروة الزارعWednesday, 05 December, 2007

    انا محتاجة مساعدتك

    انا مدونة صغنطوطة على ادى

    ومحدش لسة بيقراها غيرى

    عاوزاك بس تساعدنى انك تحط اللينك بتاعى عند حضرتك

    وقولى رأيك برضوا

    ممكن

    ReplyDelete
  94. اللينك بتاعى

    www.salataa.blogspot.com

    واسم مدونتى سلطة

    ReplyDelete
  95. أوافق الأخ فارس على أن هذا الشخص وقح.. بل هو أوقح خلق الله لأنه "يتوقح" على الله نفسه.. ضال مضل منافق أفاق وخد عندك من هنا لحد بكرة الصبح.. عشان كدة ربنا شال الهيبة من وشه وأول مل يطل علينا تحس انك بتتفرج على برنامج ماما نجوى بتاع صباح الخير وإن الشو بتاع "بقلظ" هيبتدى

    ReplyDelete
  96. حدث ولا حرج عن الحاج طنطاوي
    انت جيت على جرح بينزف فعلا
    مدونتك رااااااائعة فعلا
    اللهم اجعلها في ميزان حسناتك
    ممكن تشرفني في مدونتي لان ارائك فعلا مهمة ودي كمان رابط مدونة تانية ليhttp://nonoymm.maktoobblog.com/
    هستناك

    ReplyDelete
  97. طنطاوي سلم على بيريز وبيقول مكنتش اعرف هما اللى قالوا ليه عااااااا

    ReplyDelete

بعبع وقول اللي في نفسك يا خويا