Monday, December 10, 2007

جماعة الاخوان الزعلانين

استغربت جدا لما شوفت دعوة من بعض شباب الاخوان المسلمين لمقاطعة جريدة المصري اليوم
مع الاحترام الشديد لهم ولجماعة الاخوان و الذي كان جدي رحمة الله من احد العناصر و الكوادر بها في فترة حكم عبد الناصر وفترة يسيرة من حكم السادات وعلي صداقة وطيدة بحسن البنا رحمة الله
ولكن عفوا رد فعل غريب فليست جماعة الاخوان تابو محرم لا يجوز الخلاف معة وليس كل من يشنع علي الاخوان سواء بالحقيقة او الكذب يجب لسعة علي قفاة وشد ودنة وانة ميعملش كدة تاني
علي حد علمي ان الامر كالتالي و عن ما نشرته الجريدة الثلاثاء 29-5-2007 م
، حول قيام شباب الإخوان من خلال مدوناتهم الخاصة بثورة تصحيح داخل الجماعة و رفض عدد منهم لمبدأ السمع والطاعة والإعتراض على كثير من الشعارات التي تستخدمها الجماعة ومنها شعار الإسلام هو الحل .
و رفض شباب الإخوان ما نشرته الجريدة مؤكدين أنه عار تمام من الصحة
واعذروني فيما سوف اقول
فمقاطعة جريدة امر طفولي والا فلننتظر اذا دعوة للمقاطعة كل ساعة لمليون حاجة في مصر
ولا بس نقاطع اللي يقرب من ما يخصنا
لمن لا يعلم نجيب ساويرس يحمل اكثر من ثلث الاسهم في جريدة المصري اليوم فابلتبعية هانقاطع ربع ما يخرج للاستهلاك في مصر
ولا اعلم لماذا المصري اليوم علي وجة الخصوص هي من قامو بدعوة علي الانترنت و في اوساطهم بمقاطعتها
فروزا اليوسف علي سبيل المثال ليل نهار تلعن سلسفيل ابو الاخوان
ولا تطلق عليهم في منشوراتها الا لقب الجماعة المحظورة
المحظورة جت المحظورة راحت
وتقوم بتجميل محاكمات الاخوان المسلمين و اظهارها انها لحماية الشعب من الاخوان الفاسدين
الذين ياكلون قوت الشعب واظهار حسن مالك صاحب توكيل استقبال التركي للاثاث كانة لينين العصر الحديث
الارض التى نهبتها الدوله من حسن مالك فى احدي القضايا في التسعينات هى الان مصنع هايدلينا بتاع اكياس الدم الملوثة ملك هانى سرور
وحاليا خيرت الشاطر والنائب الثاني للمرشد العام والذي بدأت الحرب ضدة منذ قضية سلسبيل المشهورة عام 92وغيرهم من المنشورات الصحفية زي جريدة الفجر
فاانا اوجة حديثي لشباب الاخوان المندفعين بحماسة الشباب كيف تقولو انكم تتبعو منهج السمع و الطاعة و يخرج علينا قيادات الاخوان في بعض الاحداث مثل الازهر انها حماسة شباب وغير منظم من قبل الاخوان
او لم يأتي ذكر مقاطعة المصري اليوم علي موقع الاخوان مثلا يا اعزائي ان الكثير من الكمائن تنصب للاخوان فلا تقعوا فيها
حاسس هاصحي الصبح الاقي حد بيطالب بمقاطعة مدونتي واقعد عاطل

37 comments:

  1. اخيرا اول تعليق الحمد لله

    شوف انا واحدة من الناس مش عارفة احدد موقفى من الاخوان المسلمين
    الاول كنت معاهم لانى حسيت انهم عايزين يطبقو مبادئ الاسلام فى الحكم وده شئ ممتاز بما انى مسلمة وعارفة ان دين الاسلام فعلا دين عادل لكل الطوائف وتطبيقه هيعمل تغيير حلو فى المجتمع بعد ما بوظه القانون الوضعى الى كل شوية نلاقى فيه ثغرة
    بعد كده حسيت اتجاههم للسياسة اكتر منه دينى وكمان فيه سقطات كتيرة بتحصل من كوادر الاخوان...
    بقيت بحس ان خلافهم مع الحكومة بقى خلاف على السلطة فى حد ذاته يعنى مش حب لتطبيق الاسلام ولا حاجة
    وطبعا الله اعلم
    لكن دايما الحماسة الى عند الشباب موجودة فى اى حزب سواء وطنى او ناصرى او اخوانى
    ما الى بيتم استغلالهم عشان يعملو منهم كوادر جديدة
    مش عارفة ايه الصح بصراحة


    سلام

    ReplyDelete
  2. be3`ad el nazar 3an el e7`wan fa ana shayef en el moqat3a fe keteer men el a7yan betkoon mogarrad rad fe3l salby ...ya3ny shabab el e7`wan dool law 2at3o el masry el yoom zay maby2olo wala 7ad hay7ess beehom aslan ..wala aslan el moqat3a deeh hatfre2 m3a el masry el yoom fe 7aga ....laken law kan fakkro masln ywasslo el 7`abar el sa7ee7 lelnas besoora tanya da elly kan hayb2a mofeed leehom we fee nafs el wa2t kanet hatb2a darba gamda le mesdakeyt el masry el yoom ......laken han2ool a...kol wa7ed mabsoot be dema3`o !

    ReplyDelete
  3. مقاطعه !!!!!!
    قطيعه
    شايف المقاطعات اللى قبل كده كانت عدله؟؟؟ و اخرها بيلقي ايه؟؟؟؟؟

    ReplyDelete
  4. السلام عليكم ورحمة الله وبركاته

    جيت بس اقولك كل سنة وانت طيب يا استاذ اسلام ويارب تكون السنه دي علي عرفه

    سلام

    ReplyDelete
  5. لا يا أستاذ رغم أني أيضا لا أنتمي للإخوان ولكني تفهمت دعوة المقاطعة أنها كانت بسبب عدم المصداقية وليس بسبب التهجم في حد ذاته
    مع تزامن ذلك مع أزمة ساويرس والحجاب

    ReplyDelete
  6. انا مبحبش المصرى اليوم اساسا ولذلك
    ايها الاخوان قاطعووووااااا براحتكم خالص
    من حق اى مواطن انه يقاطع
    احنا فى بلد ديموقراطى

    ReplyDelete
  7. معرفش والله

    انا مبحبش لاخوان ولا المصري اليوم

    و لذلك كل واحد حر

    انا مش فاهمة قصدك

    بس عامة انا ضد اي نوع من انواع المقاطعة

    سواء كانت محلية او عالمية

    لانها وسيلة الضعفاء و من لا حجة لهم

    و اشكرك

    :))))

    ReplyDelete
  8. واحد من الإخوانTuesday, 11 December, 2007

    انا الحقيقه فى البداية بقول انى مع حرية الرأى و تعلمت مع الاخوان علمونا عن طريق السنه أدب الخلاف فى الرأى و لكن عندما تجد افتراءات لا أصل لها فعليك الاعتراض و لكن دون المطالبة طبعا بإغلاق اى دار للنشر على الرغم من انى بحثت كثيراً و لم اجد خبر يؤكد كلام حضرتك و كل ما وجدته هو خبر تصحيح حقيقة على لسان العضو الاخوانى فى البرلمانبينفى ما نشره المصرى اليوم و البديل دون اى اساءه لهم و من الممكن متابعة الموقع و قد قمت بالبحث حتى فى موقع جوجل و كتبت (الاخوان يطالبون بإغلاق المصرى اليوم) و لم أجد شىء عن هذا الامر أرجو إرسال لينك من حاجه موثوق فيها تقدر تخلينى اتأكد من الخبر و انا مش بكدب حضرتك و الله انا بس عايز اتحرى الامر ---- سعدت جدا عندما علمت امر والدك و حزنت من اخر جملة لحضرتك فى البوست بإن يطالب الاخوان بإغلاق مدونتك فالامر فى الاخوان ليس بهذا السوء و حضرتك مثقف و عارف.شكراً على سعة صدر حضرتك

    ReplyDelete
  9. انا اسف نسيت حاجه
    مفهوم بسيط امر السمع و الطاعة بيبقى فى اوقات معينه و محكومه شرعا مش فى كل وقت و مش الاخوان هى اللى بتقره بل النبى ص يقول (السمع و الطاعه و لو تأمر عليكم عبد حبشى....) و سؤال ماذا فى شعار الاسلام هو الحل اوليس هو كذلك و انا اسف كان قصدى جد حضرتك مش والدك فى تعليقى اللى فات.شكراً تانى

    ReplyDelete
  10. معك كل الحق.. فماذا تجدي المقاطعة ..؟ ثم لماذا المقاطعة اساسا ..؟
    هل ستنتهي الجرائد يوما عن سب الاخوان الا اذا كانت في يدهم سلطة فيتملقون لها ويقول بعضهم يا ليتنا كنا منهم فنفوز فوزا عظيما...

    انا لست اخوانياً لكني انزعج من تضيق الحرية على اي انسان .. وسنجنه وتعذيبه والبطش به لا شيء الا لأنه يدافع عن قضيته ... وطالما قضيته سلميه فاليدافع عنها بكل ما اوتي من قوة ... اختلافي الشديد معهم في الافكار لا يجعلني اتربص بهم ...
    لذلك ادعوهم ايضاً الا يشغلوا بالهم بما يكتب عنهم فهو لن ينتهي ابداً.....

    دمت بكل ود..
    خالص تحياتي

    ReplyDelete
  11. البنت الشلبية
    يا فندم سواء كنتي اول تعليق او الاخير
    يكفي وجودك مما يسعدني
    موضوع بقي تحديد الموقف من الاخوان
    صعب و انتي فقط من موقف المتفرج كما الحكم علي اي حزب اخر
    يجب ان تكوني في وسط المطبخ لكي تعرفي الطعام المقدم
    وليس ان تنظري من موقف الضيف اللي بياكل من غير ما يفتش في لقمتة

    ReplyDelete
  12. Captain L.J.Silver
    المقاطعة القوية المنظمة والتي يجب ان تستمر حتي
    يرضخ المقاطع لطلبات المقاطعين
    و ابسط مثال مقاطعة مؤلفي المسلسلات الامريكية و توقفهم عن كتابة اي شيء حتي تزيد اجورهم
    و استمروا 6 اسابيع و في النهاية حصلوا علي ما ارادو
    هي دي المقاطعة
    مش المقاطعة علشان اغلس علي حد

    ReplyDelete
  13. Esmeralda
    شايفين الست الكمل
    قلتش انا حاجة

    ReplyDelete
  14. خمسة فضفضة
    و عليكم السلام يا دكترة
    و انتي طيبة يا فندم
    وللاسف السنة دي صعب احج لظروف اسرية قاهرة
    او الجيزة
    وعلي المقيمين خارجها مراعاة فرق التوقيت

    ReplyDelete
  15. عصفور المدينة
    يا عزيزي المقاطعات تتم لامور محددة بعينها وتكون منظمة من كوادر
    ولها مدة زمنية ان لم تؤتي ثمارها يجب ان تكون هناك خطة بديلة
    تلميح سريع لاستراتجيات المقاطعة كما تعلمت
    ان تكون مكونة من اعضاء نقابة او كوادر او هيئات بحالها
    واذا كانوا افراد يجب ان يكون عدد كبير لا مجرد بعض مئات
    و ان تحدد مطالب المقاطعة وعرض ما يمكن ان تؤثر علية المقاطعة سواء انعكاس مادي او اجتماعي او سياسي
    تحياتي

    ReplyDelete
  16. نوسه
    اهو الكلام اللي بتقولية دة بالظبط زي ما واحد يقول
    انا مبحبش الجبنة الفلمنك
    فا الي عايز يقاطعها ما يعملش حسابي

    ReplyDelete
  17. طب وايه يعني

    طب خليهم يقاطعو

    قال يعني بتوع الاخوان همة اللي ممشيين حال الجرايد في مصر

    دلو كل عشرة بيشترو جرنان ويلفو بيه على بعض

    يا عم وسع شوية كدة خل الواحد يبص من الشباك

    ReplyDelete
  18. اولا ازيك عامل اية

    انا مروة لو فاكرنى
    بص انا مش بحب الاخوان المسلمين .. لانى ليا معاهم تجربة خاصة جدا هبقى احكيلك عليها بعدين
    انا الاول كنت معاهم بس بعد التجربة دى شكرررراااا اوى

    بالنسبة للمقاطة انا ضدها برضة
    لانى شايفة ان مقاطعى اى حاجة بتضرنا كمصرين قبل اى حد
    شوف كام واحد هيقعد عاطل من ابناء الوطن
    ولا اية رأيك

    تحييااااااتى

    ReplyDelete
  19. MerMaid
    يا اخوانا مع احترامي الشديد الناس اللي بتقول ما بحبش الاخوان او غيرهم
    هل هو ناتج عن تجربة شخصية
    ولا مجرد راي سمعة من اخرين
    بالتاكيد كل واحد حر لكرة او حب اي شيء
    لكن مع التبرير حتي يؤخذ كلامة بجدية

    ReplyDelete
  20. واحد من الإخوان
    عزيزي انا كلامي كان واضح
    ان شباب من الاخوان
    وكان تساؤلي هلي هي حركة فردية غير منظمة
    لاني لم اجد ما يدل علي موقع الاخوان او اي تصريحات لهم عن مقاطعة المصري اليوم
    يعني شوية شباب هم اللي قرروا المقاطعة بلا تخطيط او قرار من الجماعة
    يعني انا بأكد ان الاخوان كجماعة لم يصدرو اي تصريحات
    ويا عزيزي لما قلت خايف مدونتي تتقاطع
    دة كان مجرد ان القافية حبكت
    ويسعدني وجودك في مدونتي و النقاش في اي وقت حقيقي

    ReplyDelete
  21. ههههههههههههههههههه

    مقاطعة مرة واحدة وكمان لجريدة اخبارية ..وغير كدة مالقوش الا المصرى اليوم !!!!

    والله الاخوان دول عليهم شوية حاجات واقاويل ..!!

    بس اشمعنا المصرى اليوم يعنى ..؟؟

    وغير كدة هو خلاص اى حد ولا اى حاجة تتكلم عن اى حاجة تخصهم لازم يعارضوها ويحاربوها ...

    لا وغير كدة كمان ..كنت سمعت قبل كدة ان اللى بيحاول يخرج من جماعتهم ومن تحت ايدهم ..ممكن اوى اوى يقتلوه ..

    طيب بالذمة جماعة ايه دى (اللى المفروض بتنادى بضرورة تحقيق المبادىء والاخلاق الاسلامية واتباع كتاب الله وسنة رسوله ) ؟؟؟؟



    اهى دنـــــــــــيا ...واللى يعيش ياما يشوف ..

    بصراحة انا فى الاول كنت معاهم ..لانى كنت هابلة باين وحسيت انهم صاديقين فعلا فى كلامهم ...لكن من اللى بشوفه وبسمعه ..فبجد مش عارفة !!!

    مش عارفة احددلى موقف معين منهم...

    بس سواء هما او غيرهم ..فكلهم العن من بعض..



    تحياتى


    :)

    ReplyDelete
  22. السلام عليكم استاذ اسلام
    والله انا يمكن معرفش ومفهمتش كتيير من البوست ده
    انا معرفش كتيير فى الاحزاب والجماعات دى
    بس اللى عرفته انهم بيقاطعوا الجريده دى علشان عدم مصداقيتها
    وبصراحه بقى
    مفيش اساسا مصداقيه
    والله مابشترى جرايد ولا بتفرج ع التلفزيون
    ههههههههههههههههههههههههههه

    اقولك مانقاطع براحتنا اهو ع الاقل نوفر

    ربنا يرحمنا برحمته

    ReplyDelete
  23. اولا انا ما نا سمعتش عن حركة المقاطعه دي

    لو هي زب ما حضرتك بتقول

    يبقي مش علشن بيهاجموا الاخوان

    لان كتيييييييييير جدا بيهاجم الاخوان

    وهم بيرحبوا باي نقد بناء


    لكن المقاطعه اكيد علشان الاخ ساويرس

    وعداءة الشديد للاسلام

    وثانيا عدم المصداقيه في كلامها

    اللي زدوت فيه اوي في الفترة الاخيرة



    اخيرا شباب الخوان لا يزالوا يؤمنون بمدا السمع والطاعه

    وكل اللي انتوا بتسمعوه ده مهاترات

    وكلام تم تضهيمه بمضخمة الصحف المصريه

    وشكرا يا استاذ اسلام علي البوست ده

    ReplyDelete
  24. واحد من الإخوانThursday, 13 December, 2007

    متشكر لحضرتك توضيحك و انا اللى كنت فاهم غلط

    ReplyDelete
  25. هي ايه حكايه المقاطعه اليومين دول...مش كانت بطلت من بعد الانتفاضه
    :)
    ع العموم يا باشا...سيبقي أن من أكبر عيوب الاخوان الرعونه في رد الفعل
    تحياتي

    ReplyDelete
  26. استاذنا جعان

    ماهذا الذى يحدث.. الحمدلله مليش فى البتنجان اساسا وولا عارفه ايه دا
    الجهل وحش اوى

    انا قلت اسلم واسأل ازى الصحة وازى الحال

    يارب تكون تمام وعال العال

    وبقول لاخوانا الزعلانين
    ان العيد جاى وعاوزين النفوس تتصافى لان العيد فرحة وبلالين وايس كريم وهيصة

    وسلام عليكم

    ReplyDelete
  27. osama
    المقاطعة ليس الغرض منها انها تأثر علي الجريدة اقتصاديا
    ولكن لاظهار موقف ضدها ليس الا
    وواضح ان حضرتك متعرفش حاجة عن المشكلة اللي قايمة بين الجريدة و بعض شباب الاخوان

    ReplyDelete
  28. أبوشنب
    طب و الدور جة عليك و لسة
    ممسكينك صفحة الوظائف الخالية

    ReplyDelete
  29. مروة الزارع
    ازيك يا فندم فاكرك طبعا
    وياريت تقولينا الموقف اللي حصل

    ReplyDelete
  30. oceaneyes
    انا شايف ان كلامك فية مبالغة شوية
    بس ربما كانت جماعة الاخوان احسن الوحشين حاليا
    كفاية ان في منهم بيصلي

    ReplyDelete
  31. عاشقه الفردوس
    وعليكم السلام ازيك حضرتك
    ودة فعلا السبب الحقيقي لموضوع المقاطعة
    علشان عدم وجود مصداقية من وجهة نظرهم

    ReplyDelete
  32. shahed 7ak
    المقاطعة ليست لاجل هجوم علي الاخوان
    ولكن لعدم كشف الحقيقة كاملة عن بعض الامور من وجهة نظر الاخوان
    وانا مش مع الاخوان في الموقف دة تماما
    لانة قام بة مجموعة شباب و ليس للجماعة اي صلة مباشرة بالامر

    ReplyDelete
  33. micheal
    ميخااااا حبيب الملايين
    موضوع الاخوان يطووووووووول شرحة ربما نبقي نتكلم فية علي رواقة

    ReplyDelete
  34. ŞoŖśậŖấầ
    صاحبة اكبر بلاعة تدوينية وحشتينا والله
    ازيك و ازاي صراصيرك عسي يكونو بخير
    متغيبيش عننا تاني كدة حقيقي افتقدناكي

    ReplyDelete
  35. ايه الجمال ده يا اخي

    ما شاء الله

    يمكن تكون اجمل مارأيت من المدونات

    جزاك الله خيرا أما عن موضوع الاخوان المسلمين فلن أعلق سوي ببعض الكلمات

    هم أصحاب الكلمة التي لها دوي المدافع ولكنها كلمة!
    هم أصحاب الكلمة التي لها هدير الطائرات، ولكنها كلمة!
    هم أصحاب الكلمة التي لها أزيز الرصاص ولكنها كلمة!

    هم الأقل شأنا رغم ضخامة الجثة!
    هم الأقل تأثيرا رغم اتساع النفوذ!
    هم الأسرع توليا رغم كثرة العدد!


    فماذا تنتظر منهم.....؟؟

    في انتظار زيارتك لمدونتي ان شاء الله قريبا وتعليقااااااااتك

    خطــ المصري ــاب

    ReplyDelete
  36. انت جدك كان اخوانى ومن ايام عبد الناصر كمان تبقى محظوووور

    ReplyDelete
  37. على فكره فيه شباب فيهم بس الحماس واخدهم

    ReplyDelete

بعبع وقول اللي في نفسك يا خويا