Tuesday, August 21, 2007

المملكة العربية السعودية بنين

حقيقي افتقد مدونتي و افتقد المدونين وافتقدت المسقعة

تركت مصر بعد سنوات وسنوات من التمسك بها رافضا مبدأ السفر و خصوصا لدول الخليج

ربما من حين لاخر اسافر لاجل عمل لكنها فترات قصيرة و ارجع بعد كدة علي بيتنا و اتنقع في البانيو لاغسل اثار اسفر

لكن المرة دي شكلة الدش هايستني فترة طويلة

شديت الرحال لبلاد تركب الجمس و الجمال ويلبسو التوب و العقال

ربما من يعرفوني جيدا استعجبو لقراري لكن حسابات كل فرد تختلف في كل مرحلة زمنية و عمرية

لكن قناعاتي مازلت محتفظا بها


المهم وما يحلي الكلام لا بذكر النبي علية الصلاة و السلام

صلو علي النبي

مجموع ما قضيتة في السعودية حتي الان ربما حوالي شهرين و نص

والسفرية دي كانت مختلفة لاني المرة دي تعاملت اكثر مع الناس و اكلت في اماكن اكتر


لا انسي اول مرة ركبت تاكس هنا فالصديق اللي سايق طبعا هنا كل من هو من شرق اسيا يطلق علية صديق او محمد

وهابقي اقلوكو حكاية محمد دي لية بعدين

المهم الصديق سواق التاكس قالي تحب تدفع تبع البونديرة و لا نتفق

طبعا اخوكو عمل فيها ناصح وقلتلة لا صديق بنديرة انا ادفع

ركبت ومشوار مكملش 10 دقايق لهف مني 40 ريال حرق و نار في جتتة امة و كل الاصدقاء اللي زية

مع ان روحت نفس المشوار و دفعت 15 بعد كدة


من الحاجات اللي كل ما افتكرها اضحك اشوف يافطة علي محل مكتوب عليها محل للتقبيل

اقول في عقل بالي اية يا اخواتي دة اباحة عيني عينك كدة بوس و لية محلات كمان

فين و فين لما فهمت انة للتقبيل يعني للايجار

انا مش عارف الاسم دة اخترع علي اساس اية ربما اللي اخترعة كان واحد فلاتي


وكلة كوم والاكل في دول الخليج كوم تاني

فالناس هنا تاكل لكي تعيش واذا عاشت تاكل لكي تستطيع ان تستمر بالاكل

مثلوثة و مندي و مظبي و مدفون و مخنوق و محروق و مسلوخ

و اجاركم الله من المثلوثة عبارة عن 3 راقات عيش و 3 كيلو رز وفرخة مصلوبة بوسط الحلة

و اطفح يا مؤمن وصلي علي اللي هايشفع فيك


والاكل الهندي هنا موجود والصنعة بحرفنة وخلطة معلم

بهارات و شطة اذا تذوقت معلقة واحدة تشلح وترقص عشرة بلدي وتأربع جالون مية لاطفاء النار الموقدة

انا و صديق لي اكلنا في احد المطاعم الهندية اياها انا طلبت اكل الشطة بسيطة و هو من محبي الشطة ادالة 5 ريال و قالة اتوصي بي

اقسم كنت باكل و العرق عامل ينزل من راسي علي عيني من كتر حرارة الشطة

ورقدت يومين في السرير اتلوي كابن اوي مصاب بمغص عنيف

وصديقي عمل عملية البواسير من اسبوعين ويجلس علي مخدة كما الولية الحامل


وطبعا المولات هنا لا تعد و لاتحصي لو غبت عن منطقة شهر واحد ترجع تلاقي مولين علي الاقل اتبنو فيها

و العدد في الليمون البنزهير
والشيء الظريف في الامر اذا كنت هنا مع زوجتك فلا مشاكل ففي كل مكان اماكن مخصصة للعائلات بمفردها
سواء مطاعم او مولات او متنزهات
اما اذا كنت عازب فمعاملة كما الحمير البلدي الجربانة
فربما حارس الامن في المول يمنعك من الدخول بحجة انك عازب وداخل تبصبص علي الحريمات يا خلبوص

لكن في غالب الامر الحياة سهلة و بسيطة و مريحة للاعصاب جدا جدا

ودة احد الاسباب الرئيسية لاتخاذي قرار السفر

حقيقي تعبت من شدة الاعصاب و الضغط العصبي

ومشاكل بلدنا و الزحمة و الدوشة و السياس

جمع سايس يعني

وكل واحد عايز يحط ايدة في جيبك و يقلبك زي فردة الشراب وياخد اللي يقدر علية منك

واكل بالسرطان و مياة بالفشل الكلوي اذا وجدت اساسا

وهواء بالرصاص و عيش بالحديد وادوية بفوسفات المنجنيز


بس برضة بلدنا حلوة بقرفها وزبالتها وشعبها اللي تغير كتير وبقي عايز ضرب الصرم

حلوة بشوارعها و الحياة و الاهل والقهاوي و الشيشة

حلوة بالعسكري الغلبان اللي ممكن يخليك تاخد صلاح سالم كلة بالعكس مقابل جوز جنيهات

ولا الواد بتاع البوفية اللي يخلصلك ورقك كلة في مجمع التحرير ب 100 جنية بس

حلوة بامي واصحابي حلوة بام محمد الدادة اللي استحملت قرفي و قرف اللي خلفوني ربما ربع قرن


ربما ما يهون بعض الامر في الغربة اذا وجدت الصحبة الطيبة

صديق عرفتة عن طريق النت اسمة اسامة مر علية 5 سنين او اكتر ربما متغرب

اول ما تشوفة تشوف ابن البلد الاصيل بلكنتة الدمنهورية وشهامتة المصرية

مبتسم علي الدوام اذا فضفض معك وجدتة يحمل هموم تكفي من المحيط للخليج يشعل سيجارة خلف اخري

لا يكل ولا يمل اذا قصدتة في شيء. حقيقي انا طلعت عينة معايا مشواير لاجل فرش البيت.
واخر اردني من اصل فلسطيني اسمة رائد معرفتي بة لا تزيد عن شهرين وتعاملة معي كصديق منذ سنوات طويلة
بل اعطاني سيارتة لاجل ان اقضي بها بعض اموري
حقيقي لسة في رجالة برة
هافتقد مصر , مش عارف لكن متاكد هافتقد اصدقائي وامي وابي واخوتي
خوفي الوحيد اذا مرت علي السنين وحاولت العودة اجد نفسي غريب غير متأقلم
فمن سافر خارج مصر يستطيع ان يفهم ما اقصد
علي اي حال كلها اراضي ربنا
القاكم قريبا جدا علي صفحات مدونتي