Monday, October 27, 2008

عزيزي المواطن شلح وأقف مطرحك

تكملة لمواضيع التشليح وتصريحات المسؤلين ولاد الم .. محروسة وهوايتي في متابعة احوال بلدنا التي ستكون السبب في اصابتي بذبحة
واراحة الكثيرين مني اولهم الست والدتي لايمانها الراسخ اني هاكون السبب في جلب العار للاسرة بكلامي البطال وتلسيني علي اسياد البلد
فاقترح علي صديق مقرب و احد ضحايا تصريحات الحكومة السابقين و هو من حاملي السكر و الضغط والمرارة ومقدم طلب
علي انفجار شرياني في المخ ان انظر لتصريحات المسؤلين بنظرة اكثر تفتحا وانبساطا وانشكاحا وقد كان الاتي

صرح صفوت الشريف الأمين العام للحزب الوطنى الديمقراطى أنه لاصراع داخل الحزب الوطنى الذى يملك جناحان هما جناح الحكومة وجناح الهيئة البرلمانية وان كل من يراهن على خلافات داخلية أو صراع داخل الحزب فهو خاسر.

عند قرأتي للتصريح اعلاة تاكدت ان حكومتنا متخرش المية نظرا لانها تستخدم اولويز بالاجنحة والذي سيحمي الحزب من اي تسرب للسلطة مع الحماية الحكومية والبرلمانية المزدوجة

اما حبيب الكل رئيس الوزراء صاحب القرية الذكية و الطرنش الاسلكي اكد في تصريحة الاخير
ان القطاع المصرفي المصري قادر علي استيعاب الأزمة المالية العالمية
واكد كلامة وزير المالية بان القطاع المصرفي المصري لن يتأثر كثيرا من الازمة المالية العالمية
بل ازيدكم والعهدة علي الاسطي يوسف بطرس غالي ان الاقتصاد المصري يحقق نموا يفوق 7% وهو الأعلى فى منطقة اليورومتوسطى
وصدق علي كل التصريحات جريدتي المفضلة في حالات الامساك الشديدة الاهرام الوطني
يعني اقدر اقولها بالفم المليان للفشلة في كل من البورصات الاوروبية و اليابانية و الاسيوية بل و الخليجية
مصر ام الدنيا بل مصر ام اربعة اربعين بل مصر هي ام جالامبو
ودة اكبر تاكيد علي نجاح مبدأ اللمبي ان الحادثة مأثرتش فية بل هو اللي اثر في الحادثة
وان الازمة العالمية مأثرتش في مصر بل مصر هي اللي اثرت في الازمة وطول عمرنا اصحاب ريالة عفوا ريالة ,احم معلش ريادة


وقد انشرح قلبي عند قرأتي طلب الهيئة العامة للمواد البترولية بزيادة السعر الرسمي لأسطوانة البوتوجاز لــ 4 جنيهات بدلاً من 260 قرشاً

واقدر أدب صباعي في عين التخين واقول عبد الناصر مامتش فان مات عبد الناصر فكلنا عبد الناصر و بالتسعيرة القديمة
واهيب بالهيئة العامة للطرابيش بتخفيض سعر الطربوش الي عشرة مليمات رفقا بالمتطربشين
انا اخر انبوبة جبتها سنة 2001 كانت ب 12 جنية يا مؤمن


المدينة الجامعية تقوم بطرد احد الطلاب بسبب اتجاهة التدويني
كنت زمان اسمع الطرد دة بيكون لامؤاخذة طالب اتقفش بيضرب مخدرات, بيلعب كوتشينة علي السندوتشات بتاعة زمايلة,بيشخبط علي حيطة الحمام ,بيتف علي رئيس المدينة الجامعية لكن علشان بيدون جديدة دي
جايز من الباب ان الحكومة هي اللي مسكناك فلابد من تقبيل الايدي والاقدام والشكر علي نعمة البيات
فكل واحد واخد حاجة من الحكومة قبل ما يدون يسلم عهدتة الي الجهات المعنية
حتي لا نري في المستقبل طلبات باسترجاع غيارات داخلية خاصة بالمدونين ونري المدونين يجرون زلط ملط في الشوارع
وعساكر الامن المركزي خلفهم بالخراطيم وفين يوجعك

نظرية الفرخة الاول ام البيضة قد تم حلها علي يد ابن كبيرنا الشاب المعجزة ربنا يحرسة للست والدتة
ان لولا سياسات الحزب الوطنى لما أمكننا مواجهة الأزمة الاقتصادية
وان لولا الحزب الوطني لما كان هناك ازمة اقتصادية من الاساس
وان كل شيء في طريقة للاصلاح وكما قال بواب العبقري المجنون بلال فضل الاصلاح تاعبنا اوي يا باشا



البيئة تكافح السحابة السوداء وحرق قش الرز برسائل علي المحمول وبعض الفلاحين اعتقد أنها مسابقة
وهي فكرة تساعد الفلاحين علي تشغيل امخاخهم التخينة بدل ما هم مضيعين وقتهم في رحلات الغطس في شرم والشوبنج في كارفور
وبما ان الرسالة وصلت لعدد كبير من غير الزارعين اساسا
فقد اعتقد البعض انك اذا كنت صاحب اكبر سحابة سودة بتدخل سحب علي تلفون من ابو الجيل التالت
ومن لم يجد قش رز قام بحرق ملايات السرير ولبسة العيال



ليبيا تطلب شراء جثث بشرية من مصر.. والمجلس الأعلي للجامعات يرد بان لا مانع
لكليات الطب هناك لتدريب الاطباء
ودة طبعا من باب ان المصري عايش, ميت مفيش زية حاجة كدة علي عينك يا تاجر
واكيد المدونين وصحف المعارضة مش هاتسكت لغاية ما تبوظ البيعة
فا انا انصح الاخوة الليبين بالوقوف علي سواحل المتوسط واصطياد الجثث الساقطة من مراكب الهجرة لايطاليا
اهو اوفر ومفيش حد هاينخور وراكم وطالعة من المية طازة وبتلعب ومتشمش فيها زفارة
واهي فرصة للعيال السيس بتاعة ليبيا تعرف يعني اية دكر مصري



حملة كلنا ليلي حسستني ان النسوان دول كائن فضائي وان الرجالة حيوانات ديناصورية منقرضة
تسعي للقضاء علي الجنس النسائي علشان يخلالها الجو وتلعب مع بعضها عريس وعروسة
انا مش عارف الكائن دة عايز اية تاني
كل المجالات اصبحو علي قدم سواء مع الرجل مأذونة دكتورة , محامية, مهندسة , سواقة نقل ميكروباص تاكس عمال مناجم رواد فضاء رئيسة دولة ,تجار مخدرات,قطاعين طرق وهجامة
مش ناقص غير يطلعلهم شعر في صدرهم
عزيزتي ليلي امك اصطلحت غُوري رَوحي


اذا كنت لم تقم بضرب نفسك ومن بجوارك المئة صرمة من الموضوع الماضي يمكنك الاكتفاء بلسع من هو بجوارك فقط علي قفاة
اما من قام فعلا بالمئة صرمة فيستعوض ربنا بقي

Thursday, October 16, 2008

عزيزي المواطن شلح واتبعني

صلو علي رسول الله
الحركة دي في لندن ب تلاتة استرليني في امريكا ب خمسة دولار
ولاجل الست ام هاشم ام العواجز بقت بربع جنية
علي راسها تنور علي بطنها تنور علي لامؤاخذة صدرها برضة تنور
وموسي نبي وعيسي نبي ولكل من لة نبي يصلي علية

كلما قرات تصريح او بيان لحكومتنا المصونة يعود لمخيلتي نباطشي السيرك قديما وهو المسؤل عن تقديم الوصلات
و الفنانين في الموالد والافراح وليالي الطهور واشعال الجو
وفي بعض الاحيان لما تكون الغزالة رايقة
يتراي امامي سيد الملاح باغنيتة الشهيرة انا انا انا ابريق الشاي ايدي كدة بوزي كدة اصب الشاي وارجع كدة
كلنا سمعنا عن انهيار البورصة العالمية وخسارة بورصة داو جونز ل 670 مليار دولار ولطمت الاسواق العالمية الخدود وشقت الثياب
الا البورصة المصرية في كل القنوات و الاذاعات والجرائد القومية بتقول ان الحالة فل وعال العال وليس في الامكان ابدع مما كان
بتفكرني بايام النكسة الدنيا كلها بتقول اننا لامؤاخذة بقينا بلبوص واحنا في مصر خرجنا
رافعين صورة جمال المدلس الاكبر وبنبوس بعض علي الانتصار

سقط المقطم علي راس الألفات وفعص المئات كما الابراص المنوفي دة غير سقوط المباني في القاهرة والاسكندرية بصورة شبة شهرية
وتسابقت الجرائد القومية لعرض اخبار من اليابان وغيرها لحوادث سقوط عمارات وان محدش احسن من حد
واللي يمشي علي تفيدة لازم ترضي بية سنية
اللي اعرفة ان الدول دي بتطلع الضحايا من تحت الارض مش بتردم عليهم وتجيب شوية عيال يقضو حاجتهم فوقيهم ويقولو بقت مقبرة جماعية

وتزيد الحكومة في استعباطنا واستهبالنا كما لم تفعل من قبل
وتلقي بالوم علي المفعوصين تحت الجبل ما هو اللي مش مصدق ينزلهم يسألهم
وقام المقدس ساويرس بالتعاون مع الحكومة بتسليم فيلات ومنتجعات اوراسكوم الي متضرري الدويقة
الشقة 30 متر يعني الحمام عندي اكبر منها

اتوجة للسيد الرئيس باسمي ايات الشكر والعرفان لقرارة الابوي بالعفو عن ابراهيم عيسي
وكفاية اللي شافو
بيفكرني لما تدخل ايام الحضري وايام صفر المونديال وايام فوازير رمضان
ونحن في انتظار تدخلة لانقاذ تامر حسني من حلق شعر جسمة بالموس و رشة بمحلول ملحي و ارسالة للتجنيد في جيش جمهورية زائير المتحدة

لا انسي قصة انقاذ قطة سقطت في طرنش مفتوح في امريكا وتم نقلها بس حي علي الديسكوفري
وتعويض لاصحاب القطة والمحافظ ارسل برقية تهنئة بسلامة المحروسة
و عندنا عبارة بها 1400 شخص تم ضرب اهالي المتوفين بالبلغ و الشوم
علشان يوسعو الطريق امام سيارة المحافظ
و لم يهز رئيس الوزرا المنطبق علية المثل القائل انا مش قصير قزعة انا طويل و اهبل طولة ليتفقد مكان الحدث
بل ذهب هو و ال مبارك جميعا الي نهائي دورة الامم
و ظهرت السيدة الاولي سوزان مبارك ماسكة علم مصر و شغالة تشويح و زمامير
و قفش في زمارة المحروس جوزها بوس و احضان لما دخل الجون ولم تترك زمارتة الا في لما جة يسلم الكاس

واخوة عرب بيبرطعو في بلدنا كما لو انها بلد ابوهم واحنا جرابيع خراسيس
مجموعة شباب انهالو علي عربجي بالشلاليت والبونيات
ولما راحو القسم تم اخلاء سبيلهم والتحفظ علي العربجي
اما اذا الوضع مختلف وقام العربجي بالشخط فيهم
فلن يمر الامر مرور الكرام فحتما ولابد سوف يتم رقع العربجي علقة محترمة
و لسعة بمعلقة سخنة في مكان حساس علشان ميعملهاش تاني وربطة مكان الحمار

فا الظلم في بلدنا درجات والعدل درجات ايضا
فاذا قام بعض مراهقي العرب بتحويل مسكنهم الدراسي في مصر الي بيت دعارة وسهرات قمار
ونسوان تحل من علي حبل المشنقة طالعة نازلة ليل نهار
فهو طيش شباب وضغط الامتحانات ماثر عليهم ودول زي ولادنا برضة
لكن لو اتمسك عيل بريالة يا دوب بيبوس واحدة في طريق المطار
ففضيحة و جرسة و اجلاسة علي خازوق و يروح القسم و يكتب علي البت
بالرغم من ان كل جريمتة بوسة حمقاء من مراهق غلبتة هرموناتة

اما عن لولبية عصرها و اللي خاربة نص رجالة العالم العربي وتسعي جاهدة للقضاء علي النص اللي فاضل
التي تلعنها الستات صباحا ويحلم الرجال بها ليلا فحدث ولا حرج
نانسي عجرم قبضت مليون دولار في اعلان حاجة ساقعة
وياكبدي علي الشاب المصري حسب تصريح حقوق الانسان مرتبة السنوي لا يتجاوز 300 دولار سنويا
فا علي كل شاب يتوسم في نفسة صفات العجرمة او النانسنة التوجة لبيبسي كولا عسي ان ترضي باعطائة غطا مخروم لسد بلاعة بيتهم الطافحة

خبر يتكرر للمرة الالف في خلال الخمس سنوات الماضية
سوف يتم الغاء قانون الطواريء
فا الي كل من اسمة طارق ... ارجع يا طارق بلدك سامحتك وارحمنا بقي


لا ادعوك عزيزي القاريء للاكتئاب و الابتأس و ضرب نفسك 100 صرمة فقط
و لكن ادعوك ان تقوم بلسع اللي جنبك ايضا علي قفاة

Wednesday, October 08, 2008

رقبة قزازة و قلبي فيها انحشر معلش دي عالم اصلها بقر

قرأت لكثيرين و التهمت صفحات كعدد حبات شوال رز
لكن صلاح جاهين لطالما اثر في, رجل كتر الهموم اماتتة كمدا
شدة عشقة للبلد لدرجة اصبح كمن يمارس الجنس مع الارض المصرية
اطلع علي الغيب علم بحالنا قبل ان يري ما سنصبح علية
بالرغم من كل ما بة احسدة احسدة لانة ارتاح قبل ان يعيش حتي يومنا هذا

رقبه قزازة و قلبي فيها انحشر
شربت كاس و اتنين و خامس عشر
صاحبت ناس م
الخمرة ترجع وحوش
و صاحبت ناس م الخمرة ترجع بشر
عجبي !!!!

عرفت ناس كتير عدد فدادين درة وجرجير
وراجل زبيبة مهيبة في وسط خلقتة
تديلة ضهرك يلعن ابو اليوم اللي في شاف خلقتك
وباشا نضارة وعصاية وعربية شيفرولية
وحتي القرش بيتشحتف علية


إنسان أيا إنسان ما أجهلك
ما أتفهك في الكون و ما أضألك
شمس وقمر و
سدوم و ملايين نجوم
و فاكرها يا موهوم مخلوقه لك
عجبي !!



اصبح البني أدم رخيص, ارخص من التراب في بلاد االعجايب الكلاب اسعد من العربي الغلبان
جمعيات رفق للحيوان, متلقيش هناك كلب صايع و لا ماشي في الشارع جربان
ولا كلب ديوث مستحوذ علي عشرة من الكلبات
و لا كلب هبر هبرة و فكيك طيران
و لا كلب ريس و حوالية عشرة من الخدام خمسة يهوهو و خمسة يفسحوا المدام
الكلب هناك اذا مرض او كان علي مرض فكيلو لحمة علي الريق و حتة كبدة علي الغدا
و العشا سوتية لاجل خاطر البية
وناس علي باب الله علي ضهر مركب وسط ضلمة بحر لحد ماشاء الله
الف ماتو و شوية عاشو متعرفش مين صاحب البخت اللي عاش ولا اللي السمك لقاة
يا دي الغم لو عليا ارمي نص البلد في اليم




ياللي نصحت الناس بشــــــــــــــرب النبيت
مع بنت حلوه ..
وعود , وضحك , وحديت
مش كنت تنصحهم منين يكســــــــــــــــبوا
تمن ده كله ؟
... و الا يمكن نســـــــــــيت
عجبي !!



اعلانات مسابقات و نمر تلفونات و بنات صبايا زي الشربات
الواحدة منهم لو تضحك نص الكون يبات ولهان
و احلام دولارات, ناس غلابة عايشين علي الاحسان
و شباب شرقان لعروسة بيضة وشقة تداريهم عن عينين الحساد
مش عارف اطبطب علية و اقولة بكرة تفرج يا غلبان
و لا ازقة و كفاية قاعدة علي حجر امك يا ابن شفاعات



إخطفني ياللي تحبني ع الحصان
الدنيا قالت يوم في ماضي
الزمان
إخطفني ياللي تحبني ع الـــــفرس
الدنيا قالت .. قام خطفها
الشيطان
عجبي !!!!


و بنات حيارا زي البداري مستنين فارس علي حصان حديد
جمال ودلال وبضاعة علي عينك يا تاجر وشيل
فارس عندة مطرح فية الفرس يمرح كما رهوان سبق شديد
و ابوها راجل جد عايز تلفزيون الف بوصة الجديد
وماما ست اميرة مش عايز غيرة بوتجازعشرين شعلة زي اللي عند سميرة



حدوته عن جعران و عن خنفســــــــــه
اتقابلوا حبوا بعض ساعة
مســـــــــــــــا
و لا قال لهم حد اختشوا عيب حـــــرام
و لا حد قال دي
علاقة متدنســــــــــــــة
عجبي !!!!


يا عالم لا الحب كان حرام و لا معصية
دي قلوب بشر بين ايدين الرحمن متقلبة
قلوب زي الفجر لما يشقشق ريحة خضرة علي شط مية
دة الحيوانات بتعشق, مستكترين علي ابن ادم يحب انسية


ياللي انت بيتك قش مفروش بريش
تقوي عليه الريح .. يصبح ما
فيش
عجبي عليك حواليك مخالب كـــــبار
و ما لكش غير منقار و قادر تعيش
عجبي !!!!


اسمة مصري و ابوة مصري وجدة مصري
حتي نانسي شهدت انة مصري
يا ابني عايش من ايام الفراعنة لحد عصر كفاية و لية
لا يوم اشتكي و ضهرة اتحني و اخرة الحكاية بيوت ورق
وصخر دبش فوق دماغة صبح وليل


إيديا في جيوبي وقلبي طــــــــرب
سارح في غربة بس مش
مغترب
و حدي لكين ونسان و ماشي كده
وبابتعد ما اعرف .. أو
باقـــــترب
عجبي !!



اصرخ يا ملك و غني و احكيلي علي ابني
ملقاش في بلدة حضن راح للغريب وهجرني
شباب زي الورد اسمر زي الرغيف
عايز يعيش عفيف لكن يا ويلة ان عارض
و قال انا عايز اعيش نضيف


كيف شفت قلبي و النبي يا طبيــــــــــــب
همد و مات و الا سامع له
دبيـــــــــــــب
قاللي لقيته مختنق بالدمـــــــــــــــــــــوع
و ما لوش
دوا غير لمسه من إيد حبيب
عجبي !!!!


بكيت ندمان علي قلبي اللي بين ضلوعي لسة بيدق
امتي الغمة تزاح والشمس في الضلمة تشق
تور مربوط في ساقية ولازم افك
سامحني وبايدك اسقيني لما اجي ساعة الطابور
و متقوليش ارجع منك انا محسور



حقرا و فوق كوكب حقير محتقـــــــر
في الكون تكون دنياكو إيه يا
بــــــقر
رملايه من صحرا ؟ لكين إيش تقول
و الكون بحاله جوه عقل
البشــــــر
عجبي !!


كورة لحست نافوخ البشر عيال رجالة, ستات فلقة القمر
وبيت بيضة علي راسها طرحة زي الغجر راسمة علم علي خد حرير معتبر
شافتهم امي قالت قيامة قامت و الدم هايصبح للركب



الدنيا صندوق دنيا .. دور بعــــد دور
الدكة هي .. و هي كل
الديكـــــــــور
يمشي اللي شاف ويسيب لغيره مكان
كان عربجي أو كان
امبراطــــــــور
عجبي

مخنوق يا عالم
ناس اكلها السمك و ناس تاكلها الفلوس
ناس تجري ورا الكورة بالسبق و ناس حتي الرزق لن تحوش



محاولة قديمة غاية في الفشل في التعبير العامي الرجاء الحفاظ علي مشاعري المرفهة في التعليق
دة اذا حد نفسة جابتة يعلق

Tuesday, September 30, 2008

استحمو يرحمكم الله

منظمة انا جعان المحدودة
تهنأكم بالعيد و تذكركم بموعد استحمامكم السنوي


نلقاكم بعد الكحك والغريبة والبيتي فور

Thursday, September 11, 2008

اركبوها بسلام امنين


انا من هواة متابعة التدوين العربي بشكل عام و المغربي و التونسي والمدون بالفرنسية في كثير من الاحيان نظرا لتعليمي بمدارس لغات وهروبي من اشتغالة التعليم المجاني
ربنا يخليكي لينا يا اما يا معلمانا في مدارس الخواجات وماكلانا ومجوزانا انا واخواتي
غير ان المدونات العربية كوم والتدوين المصري كوم تاني
فا مدونات المغرب العربي اغلبها هادي منظم راقي الحوار ولا يدون الا من يجد عندة ملكة الكتابة مش كل عبيط باتنين جنية في سايبر قارف اللي خلفونا
المهم تطايرت اخبار عن اختفاء محمد الراجي
محمد الراجي مدون مغربي صاحب مدونة هادئة منظمة منطقية محترمة لن تجد بها تعدي في اللفظ
والقول او الفعل
مما يجعلة بالنسبة للمدونين المصريين حمامة وديعة راقدة علي بيضها
ويبدو كثرة الرقود قد اثرت سلبا علي عقل ابن الراجي
فا في احدي تدويناتة سأل الملك بان يوقف عادة تقبيل الايدي
التي لا تزال عادة متـأصلة في البروتوكول المغربي
وهو مطلب الصراحة غير منطقي بالمرة فامحمد السادس راجل مبروك والناس دي بتبوس ايدة طلبا للبركة
وان ربنا يفك كربها قادر يا كريم
يجي يشوف المصريين وهم بيبوسوا جزم اللي يسوي واللي ميسواش املا في قزازة زيت وكيس سكر

لا انسي الملك عبد الله ملك السعودية عندما امر بالغاء عادة تقبيل يد الملك من البروتوكول منذ 3 اعوام وفي نفس هذا الشهر
ولانها عادة محرجة خصوصا عندما يقبل المسؤولون يد الملك في حضور الضيوف الأجانب
بل نهي حاشيتة عن مخاطبتة بلفظ مولاي


ثم زاد الراجي الطين بلة
فكتب تدوينة ينتقد فيها اغداق الملك محمد السادس الهدايا العينية علي رعاياة من الشعب المغربي الحبيب اللطيف المهاود
وكيف انة محمد السادس بافعالة يعود الشعب علي الاتكال وانتظار الهبات والعطايا الملكية لانة اعطي عسكري مرور جوز دراهم
بل ويتمني علي الملك ان لا يجامل ابناء الشعب
دة وان دل دل علي انة فقري ومش وش نعمة مما ادي الي الحكم بسجنة عامين وتغريمة خمس الاف درهم مغربي بتهمة انة فاكر نفسة بيفهم احسن من الملك
ونال من السباب والتقريع علي مدونتة ما فية الكفاية اذا كنا نعتبر الكلام اللي تحت دة سباب
يجي يشوف مدوني مصر وهم بيلعنو خاش اللي بيختلف معاهم في الراي وان اتاحت الكنولوجيا مستقبلا الشبشب الالكتروني
لوجدنا الصرم و البلغ طايحة في الفضاء الامتناهي
طب يا ريت الملك عندنا بينزل و يوزع صرر الشلينات علي الشعب ولا حتي صرر عيش بلدي وربطة لمون بنزهير
ياريت بيركب عربيتة ويلف وسط الناس هو والمحروس حفيدة ويشاور علي الغلابة ويحط جوز جنيهات في ايد عسكري
واحنا كنا نعملة تمثال مش نطلع نقبح ونطول لسانا علية في مدونة

لطالما قلت اننا كمصريين شعب رمة ويتبطر علي النعمة وميعجبوش العجب ولا الصيام في رجب
فمصر الدولة العربية الوحيدة التي يخرج مواطنيها يهتفون بسقوط رئيسها وحكومتة
وتلعن جرائد المعارضة سلسفيل ابو الوزراء ليل نهار
وترفض امة بحالها توريث الحكم مع ان دة التطور الطبيعي للتقلية
ورسوم كاريكاتير بنرسم تريقة علي الاب و الزوجة والعيال بنتريق
مظاهرات وبنطلع اعتصامات وبنعتصم اضرابات وبننضرب
عايزين اية تاني يقلع ملط يعني ويقعد وسط نافورة المطار
شكلنا كدة يجب ان يحكمنا ملك مثل محمد السادس او مثل ابوة الطاغية الراحل الحسن الثاني ووزير داخليتة ادريس البصري
الذي يجعل حبيب العادلي مقارنة بة تلميذ فاشل في مدرسة الطغاة
و الذي كان اصغر مخبر فيكي يا مغرب كف ايدة كفيل بشق رأس اعضاء حزب معارض باكمله
علي مدار 4 رؤساء جمهورية وملك لم ينجح احد في تسييس المصريين ولا اسكات اصواتهم المزعجة لكل جبار
ضرب وانضربو معتقلات واترمو نفخ واتنفخو وكل الميتات المؤدية للجنة من غرق وحريق وهدد و امراض بطن
لم تحوق في جتت المصريين المنحسة
انا اؤمن اشد الايمان بان الحل لاسكات المصريين تماما هو ملء بطونهم واشباع فروجهم
فاذا امنت للمصري قوت يومة بشكل مستمر و مرا اخر الليل يجري وراها وقبر محترم يلمة في اخر عمرة امنت شرة
واضمن للحكومة ان لن تسمع حس معارض واحد في البلد تاني
بل ان من تسول لة نفسة المعارضة سيقوم المصريين نفسهم بنفخة خوفا من زوال النعمة تاني
فيا حكومتنا الرشيدة اكلوهم وجوزهم وادفنوهم تركبوهم بسلام امنين

Sunday, August 31, 2008

انت جيت --- يا رمضان

رمضان بكرة يا ولاد واسأل الله ان يكون مباركا وكلة عز و جمال و اخر انسجام
ومليء باعلانات السمن والزيت وصابون دوف اللي نص الصابونة لبن والنص التاني كريم
مش عارف انا صابونة دي ولا سنتدوتش سكلانس
واسألكم الدعاء لمهند ان ربنا يوقفة علي رجلة بعد العملية ويرجع يزنق نور في الجنينة
ويحي يستر علي البت لميس ويجوزها واحنا في شهر مفترج وربنا امر بستر الولايا
واعلانات الشحاتة والاستجداء الرمضانية التي يتحفنا بيها وزير الاعلام انص الفقي
الذي كان في الاصل كاتب روايات اطفال جايز دة السبب ان الاعلام بتاعنا مبيخاطبش غير عقول العيال
و طوابير الشحاتين التي تنتشر في ربوع المحروسة بلا تمييز شحاتين امام محلات مساكن مستشفيات ملاهي محلات عصير مساجد وكنايس سنجد شحاتين بالموبايل حولي رصيد تباركلك العدرا والمسيح
واخيرا كعادة العرب اتفقو الا يتفقو ليبيا قررت ان اول سبتمبر هو اول رمضان كدهو من غير هلال ولا اي حاجة دونا عن العرب كلهم لأنها لا تشترط رؤية الهلال، وإنما تكتفي بحدوث الاقتران قبل الفجر و السعودية السنة اللي فاتت صامت يوم زيادة
اللة يمسية بالخير الكاتب الرائع جلال عامر في جملتة الفذة
نحن لم نتفق علي الهلال يوما ومع ذلك نريد ان يتفق الهلال مع الصليب

ووجب علي الواحد انة يتوب وينوب الي رب العباد و لكل شخص متضايق مني او شايل في نفسة وحازز او قلتلة كلمة ضايقتة او حركة زعلتة او شتيمة في نفسيتة
ان اللي فات لا يقارن باللي جاي واللي جاي العن
وايامكم اسود من قرن الخروب معايا هذا وبالله التوفيق

Sunday, August 24, 2008

بتاخد فيزا شكلك هتاخد فيزا

من باب الغلاسة عليكو و علي نفسي الموضوع دة
من عاداتي الصباحية تصفح حوالي 30 او 40 موقع علي النت ما بين اخبار سياسية اجتماعية اقتصادية فنية
مدونات دة غير متابعة ال rss feed حاجة بتاعة 50 مدونة وموقع اخباري وجرائد تنشر علي النت علي الريق
فا حابب اشارككم بعض الاشياء اللي بتقع في طريقي من باب تفريج الهموم واضفاء البسمة علي خلق سيادتكم


خبر طريف لطيف رقم واحد
بيقولك اية يا سيدي وماسيدك الا انا قناة للمنتقبات فقط اسمها «ماريا»
صاحبها واحد اسمة الشيخ ابو اسلام ( لا ابويا ولا اعرفة)
كل اللي شغالين فيها منقبات مديرة القناة وصولا إلى أصغر العاملات فيها، كلهن منتقبات
صاحب القناة هو ايضا صاحب قناة الامة وهي قناة انشئت خصيصا للرد علي افتراءات قناة الحياة القبطية علي الاسلام
وهلفطة ابو قصة السكرة زكريا بطرس
وللاسف جمد نشطاها موقتا لعدم وجود تمويل ما هو فلوس الناس رايحة علي ميلودي ومزيكا يسرقو يعني
المهم مع كامل احترامي للمنتقبات اثابهم الله
قناة تلفزيونية ومنقبات ازاي يعني حد يفهمني اذا كان المتحدث عبيط ما يبقاش المستمع اهبل
طيب ما يعملوها اذاعة وخلاص المنطق بيقول كدة مادام محدش شايف حاجة
المتنبي الله يكحمة بقي مطرح ما راح قالك
أغاية الدين أن تحفوا شواربكم ...يا أمة ضحكت من جهلها الأمم


خبر طريف ظريف رقم اتنين
تعتزم مسلمة منقبة مبادلة زوجها لمدة اسبوعين مع امرأة بريطانية لديها ابنة سحاقية في السادسة عشرة من عمرها، وذلك في اطار برنامج "وايف سواب" الذي تبثه القناة الخامسة في التلفزيون البريطاني.
wife swap
الخبر هنا في جريدة
the sun
ولجهابزة اللغة الانجليزية وخريجي مدارس علمني الانجليزي والنبي يا احمد الخبر هنا بالعربي
موقع البوابة
انا مش قادر الاقي حكمة في الموضوع دة من الحلقة يعني هل المفروض ان الست المسلمة المنقبة هاتتعرف علي عادات الانجليز
في شرب الخمور ولعب البلاك جاك وشذوذ الابنة مع بنت الجيران وعمل مسقعة لحم الخنزير بالباشاميل
وهاينتهي انها تقنعهم بالتنازل عن الخنزير في المسقعة والاكتفاء بالحواوشي وفي المقابل هاتقتنع انها تقلع النقاب
علشان العيال بيخافو منها في عيد الهالوين
الهالوين دة زي طلعة المحمل عندنا



خبر اطرف واظرف من اللي فاتو رقم تلاتة
اولمبكيات بكين والبعثة المصرية وانا وانت
بتاع مية وسبعين فرد عدد البعثة المصرية منهم 99 لاعب ولاعبة
رجعنا بحتة حديد درجة تالتة
لا شوفنا دهب ولا حتي قشرتة واللي اتكسرلة ضلع واللي اغمي عليها وكسة ما بعدها وكسة
وكرم جابر اية اللي بيتصدر وماسك العلم المصري مش دة برضة اللي اتحكم علية ب 3 سنين غيابي علشان ضرب سواق تاكس
بيقولك الدول العربية كلها ملمتش غير سبع ميداليات ذهبيتين وثلاث فضيات وثلاث برونز و رغيف بلدي هدية من لجنة التحكيم
270 مليون عربي و سبع ميداليات لية شعوب مكسحة معندناش ابطال معندناش فلوس معندناش اية بالظبط حد يفهمني
الحاجة الوحيدة العدلة في الموضوع دة كلة العداءة البحرينية رقية الغسرة المحجبة التي اثبتت ان الحجاب ليس بعائق امام اي نشاط
كما يدعي بعض الحمير من مدعي التفتح والتفشخ العقلي



خبر طريف تييت تيت رقم اربعة
كادر المعلمين وكلوت المدرسين ولباس التعليم
كادر اية يا ابو كادر انت عارف قبلا معني الكادر اية
المختصر دة اشتغالة جديدة لاسكات الغلابة من المعلمين لن يدخل الكادر سوي 10 في المية من المتقدمين لامتحانات الكادر



مش عارف خبر دة ولا اشتغالة
سنترال جرجا باسيوط الموظفين تقريبا يوميا في حالات اغماء وطراش
وديوان المحافظة بذات تفسة اتحرك ولجان طبية وفرق تفتيش ومفيش سبب واضح
في اللي بيقولك يا اخويا السنترال دة مربوط ومعمولة عمل
واللي يقولك راكبة جني كان طالب نمرة ومتحولتش بقالها سبع سنين
واللي يقولك دة محسود عندة عدد وكباين مش موجودة في بر الصعيد كلة



خبر بطراطير رقم خمسة
ايمن نور يرسل خطاب مفتوح يستعطف المعلم اوباما بتربة امة انة يشوفلة حل ويخرجة من الباكابورت اللي هو مسجون فية
وانة كبر وصحتة معادتش مستحملة مرمطة في كبانيهات امن الدولة وقام المعلم اوباما مشكورا بنشر نص الرسالة علي موقع حملتة الانتخابية
يحتوي الخطاب علي مسح جوخ للااسطي اوباما مع اشادة نور بفكر وعقلية اوباما الديموقراطي الفذ ابو عيون جريئة
واحتوي الخطاب علي شوية كلام عن العراق
والحوار السوري الايراني وتاكيد نور ان احمدي نجادي سوف يطيح علي ايدكم الكريمة باذن واحد احد
واننا في انتظاركم لتصحيح اوضاع الشرق الاوسط
اللي عايز يعرف بالتفصيل اللينك فوق اهي واضح ان الحج نور استوي علي الجنبين بدل ما ينادي علي شعب مصر الحقوني يا اخوانا مرسي ابن المعلم زناتي انضرب يا مينز
للعلم خطاب نور موضعة في موقع اوباما تحت عنوان ماذا يقول الاخرين



خبر بترتر رقم استغفر الله العظيم " سيكس "
الفاضلة ايناس الدغيدي AKA ايناس صديقة الطلبة
ظهرت في برنامج ضد التيار تطالب باعادة ترخيص الدعارة في مصر وان من وجهة نظر سيادتها ان هو دة الحل للقضاء علي الدعارة
فكل ممنوع مرغوب فاذا جعلناها مباحة الناس هاتقرف وتطلع تجري بعيد ياااي دعارة
ولا ناخد التجرب الايرانية حدوة لينا بتاعة بيوت العفاف وجواز الستين دقيقة واقلب
وطبعا ترخيص الدعارة هايرجع مهن انقرضت يا اخوانا برضة الست بتبص لبعيد ومستقبل الشباب الصايع اللي متخرج من علوم وهندسة وطب ومش لاقي شغلانة فستعود مهنة القواد للرجال و العايقة والمقطورة للنساء والعايقة هي القوادة والمقطورة هي التي تمارس النشاط
وترجع اسماء النجوم تلمع في عالم اللحم الرخيص كما ايام الملك
حسنية الانجليزية , سنية الطرية, شفيقة صرة ,زينب الفطاطرية وبهية الزايطة
فتحي طرطور, زينهم ديل الكلب وسكسكة بتاع العيال وكثير من نجوم عالم الدعارة


كفاية كدة ولا تاخدو كمان
الشوري اتحرق 150 مليون جنية خسائر دة غير اوراق يا عالم في نسخ ليها ولا لا
وجاري البحث عن الجناة
فاكرين الواد المجنون اللي قتل عيلة في الصعيد تقريبا هايطلع هو اللي حرق المجلس
وان لم يتم العثور علية في اوامر عليا بتلبيس عبيط المعادي او توربيني العيال القضية


ابحث مع الشرطة
طفلة خرجت لطابور العيش منذ اربع اشهر ولم تعد
ترتدي مريلة ومعاها 4 جنية بتلاتة جنية عيش وبجنية فلافل
الرجاء من يعثر علي الاربعة جنية او العيش والفلافل ابلاغنا ولة جايزة مغرية لحسة طحينة
اذا حد لقي البت من غير الفلوس ولا الغموس يخليها عندة
ابوها هايطخها

Monday, August 18, 2008

كرباج ورا يا اسطي

يعرف المصريون تمام المعرفة من هو العربجي
التعريف القادم للاخوة العرب
ينشأ العربجي وتظهر علامات العربجة علية منذ نعومة اظافرة
بدأ من زحفة علي بطنة الي رفسة للمقربين
نظرا لانها مهنة متوارثة فيشب يري اباة واخوتة واعمامة واخوالة في السلك دة
فيشب بريئا لا يري في الدنيا الا ديل الحمار المربوط امامة
فيكون مداد لمهنة عريقة
ادواتة:
شوية خشب تشكل علي هيئة مربعة او مستطيلة حسب فكر المهندس
اربع عجلات من اشكال مختلفة لكي تسمح للمربع الخشبي السالف الذكر بالدحرجة
كرباج سوداني اصيل
شركائة في العمل:
حمار بلدي اصيل لا يقل عن عامين
يفضل ان يكون من اسرة ذات خبرة في البيزنس دة من عدة اجيال
حمول ذكي لماح سريع الحركة في المنعطفات
يونيفورم الشغل:
في الماضي كان جلباب ذو لون هبابي يلف حول الوسط ويرفع طرفة بيدة معبرا عن سيطرتة علي الاوضاع
الان اي حاجة من فوق واي حاجة من تحت
شبشب بصباع ولا يتنازل ابدا عن لبسة ويعتبر لبس الجزم نوع من ضعف الشخصية

مهارات العمل:
انتقاء الزبالة المناسبة من الشوارع وترك الغير ملائم لشركات الزبالة الاجنبية
قادر علي التطويح بالكرباج يمنة ويسارا مع قدرتة علي التصويب علي المراد الاطاحة بة
وضربات الكرباج متنوعة ما بين اللسوعة الخفيفة و الطرح ارضا

اذا اجتمعت كل الصفات والمهارات السابقة في شخص فهو مرشح مثالي لان يتولي مهنة العربجي
والحذر كل الحذر اذا التقيت باحدهم في مشكلة او اختلاف في وجهات النظر
فكرباج واحد كفيل باعادة الصواب لقيس ابن الملوح
ولسعة من الطرف قادرة علي اعادة الكافر لرشدة

ولكن في النهاية هو بشر ربما اقول ربما يقتنع بما تقول مدافعا عن نفسك
لكن الطامة الكبري في الاختلاف مع شريكة
فاذا زرجن الحمار و حرن ورفض التحرك امام سيارتك
فلن تفلح شفاعات الدنيا والاخرة في تحريكة عن موقفة
فالصبر خير معين الي ان يلين ويقرر التحرك
فرفسة الحمار بقدرة قادر تطيح بعجل صغير متربي علي العز او الاطاحة بعز نفسة
كل ماسبق كان لايضاح وضع العربجي وحمارة ومدي سطوتهم وخصوصا عربجية وحمير نزلة السمان بالهرم
ولكي يحذر كل نفسة قبل ان تسول لة التفكير ولو مجرد التفكير في الاختلاف مع عربجي مصري
فابن البلد يعلم عواقب الاختلاف مع العربجي فالمصري ممكن يمسك في خناق حرامي ظابط عضو في مجلس الشعب
لكن نادرا نادرا جدا لما نسمع ان حد اتخانق مع عربجي
لان اذا انتهت الخناقة بانتقالك لترب الغفير ودخولة السجن فقد انتقل من السعير لجنة رضوان
اكل وشرب ونومة حاجة اخر منجهة
الخوف علي الاخوة العرب اللي يجب عليهم ان يعلمو ان احترام العربجي المصري لهو اهم من احترام القانون
نشوف بقي اية لازمة المقدمة الطويلة

Wednesday, August 06, 2008

هات الصابونة واقعد لاعبني

لا اوعدكم بمسك لساني في الكلام الي جاي , بس اوعدكم ان الحكومة هاتخلي رجالة مصر تمسك حاجة تانية

فبعد اتاوة مثلث المرور وشنطة الاسعاف والضرائب العقارية وضريبة الموتي و الملاهي

تهل علينا حكومتنا المبجلة بفرض اتاوة قانون الجواز الجديد الذي قتلتة بحثا و نخورة محاولا معرفة انهو جزمة في الدولة اللي اخترعة
ومين الصرم اللي مرروة في المجلس
باختصار ينص علي ان كل راغبي الزواج التقدم لعمل فحوصات طبية لتاكد من خلو الطرفين من اي امراض
توكد خلوهما من الأمراض المعدية كذلك سلامتهما من الأمراض المزمنة أو الأمراض الوراثية
كل دة كلام جميل وانا معاة بقلبي وروحي و عمري
مع عمل تحليل لسائل الرجل المنوي واشعة للمبايض و الرحم في المرأة
هوووب لينا هنا وقفة
احنا اللي نقف مش حاجة تانية


تحليل السائل المنوي للرجل لقياس مدي الخصوبة لة ثلاثة طرق علي حد علمي
واذا كان في دكتور يصححلي معلوماتي
وطبعا لا حياء في الدين او العلم او في سلطنة الجعانين

الطريقة الاولي: الاستمناء باختصار شديد الطريقة هي كوباية وحجرة مغلقة واضاءة هادية ويفضل اي مثير جنسي
افلام مجلات احلام يقظة لو كان خيالك واسع
في بعض المعامل يسمح بدخول الزوجة مع زوجها لمد يد العون
وفي النهاية بتدي الكوباية اللي فيها العينة للممرضة اللي واقفة مستنياك برة مش عارف اية الحكمة انها تكون دايما واحدة ست وبتبصلك باستخفاف وهي بتهز كوباية العينة

الطريقة التانية: يقوم الطبيب بواسطة حقنة بسحب عينة مباشرة من كيس الصفن وطبعا الالم هنا لا يوصف
لان الرجال في المعتاد المناطق دي محظور عندهم الضرب فيها فافكرة ان ابرة تدخل فيها دة امر لو تعلمون عظيم
وعيب الطريقة دي انك لو كنت بتخلف منظر دخول الحقنة لوحدة يقطع خلف التخين


الطريقة التالتة: ودي يقوم الطبيب بوضع مزفلط علي اصبعين ثم ادخالهم في مؤخرة المريض ثم الضغط علي البروستاتا
مما يؤدي الي حدوث قذف ومن ثم الحصول علي العينة
وعدد الاصابع يتوقف علي امكانياتك وجودة المزفلط (يفضل كية-واي جيل- او زيت البرافين)
عيبها الوحيد كسرة العين


فيا عزيزي المقبل علي الزواج فانت اصبحت مثل المستجير من النار بالرمضاء
فخياراتك محدودة فاطبعا التحاليل دي هاتكون في مستشفيات حكومية معتمدة من قبل وزارة الصحة
ونعلم جميعا حال هذة المستشفيات من ناحية النضافة والتعامل مع المواطنين لا يسر عدو ولا حتي حمار بلدي
واكيد الرائحة لن توصف فهي مزيج من المعقمات والامونيا وحاجات تانية احنا فاهمينها

وكما قالو في المثل
ابوك البصل و أمك التوم منين تجيك الريحة الحلوة يا مشئوم

فالصورة ستصبح كالتالي
فلنفترض ان اللي رايح يعمل التحاليل شاب ملتزم ملتحي ودقنة لحد صرتة ومش واخد خوانة
او شاب ازهري ممن يعتبرو الاستمناء بجميع اشكالة واهدافة حرام
وان انصاع ووقف صاغرا في طابور المستمنين منتظرا دورة ليدخل ليقدم العينة
حتما ولابد هايسمع من المستظرفين وخفيفي الدم و العقل تعليقات سمجة
زي بركاتك يا مولانا ادعيلنا ربنا يفك زنقتنا
يا اللي بيطلع موطي راسة بسبب عدم تمكنة من ارتكاب عملية الاستمناء وخارج الحجرة خمسين نفر عمالين يستعجلو الجدع
ويشغلولو اغنية منير خايف اوعدك موفيش اقولك في تلاقي مفيش
واحنا شعبنا مايتوصاش في التريقة علي نفسة قبل الاخريين

اذا فالحلول محدوة
يا تشلح وتخلص نفسك بنفسك وتديهم العينة
يا تقرفص وتاخد الحنقة وانت ونصيبك وتدعي ان ايد الدكتور تكون سابتة وميرشقش في حاجة تانية
يا تفلقس و الدكتور يحط صباعة وبرضة هاياخدو العينة
يا اما تمتنع عن عمل التحليل لاحساسك الشديد بالمهانة وتقعد جنب امك
وهاتستمني برضة من قلة جنس الحريم

واحد فلحوس يسألني مفيش حل غير دول ابوس ايدك

ارد علية واقولة

متقلقش لانك في بلد ديموقراطي فمن حق الحكومة تطلب اوراق معتمدة ان لامؤاخذة سيادتك دكر وبتعرف
مخالفا مقولة خالدة الذكر مروة اما نعيمة وانت مبتعرفش
فمن حقك انك تختار الجهة اللي تجيب منها الورق دة

فا كما اتوقع سيتم ضرب الشهادات دي وبتسعيرة معقولة بدأ من تلاتين الي خمسين جنية
بس دي هتكون مرحلة متأخرة جايز بعد شهر
لامؤاخذة يعني دة انا معرفش حد عمل كشف الباطنة او النظر بتاع رخصة السواقة كلة بيطلع بالفلوس
فاالناس هاتروح تشلح وتدلدل بكيفها في كوباية يا اخي
اية سفن اية

لكن في الاول هايتم مساعدة الاخوة المستمنيين بتوفير افلام ومقاطع قصيرة علي الموبايلات
وهايكون سعر المكالمة بتاعة العينة بدأ من 5 جنية
مع توفير مجلات لبنانية او امريكية وانت وفلوسك يا برنس
واحتمال يدخل الكمبيوتر المحمول لجودة الصورة وحجمها المناسب اكثر من الهاتف
ووجود لسماسرة السوق السودا لبيع عينات سابقة التجهيز
دة غير بقي الشحاتين والسريحة والجماعة اللي بيمشو بيبخرو العربيات و المحلات
سيتراصو اما المستشفيات دي لتبخير راس سيادتك مع استحداث ادعية لتناسب الموقف من نوعية
روح يا شيخ ربنا يوقفلك ولاد الحلال
الهي و انت جاهي ما ينيملك جتة ابدا
مع وجود باعة سريحة لبيع خلطات سريعة
علي غرار الصاروخ بتاع عبد المنعم ابراهيم
او الرهوان وحتي مطلع الفجر بتاع عادل امام
وربما يصطحب كل شاب صديق او اثنين من باب التشجيع

واقفين من خلف الباب تعلو اصواتهم بعبارات التشجيع والهاب الحماسة
عاش يا وحش, اديلة مترحموش و الامثلة كثيرة

كنت دايما اسمع الجواز نعمة الجواز نعمة اتجوز يا ابني
دلوقت عرفت فايدة الجواز بدري
اني نفدت من المسخرة دي
فاانا وزوجتي علاقتنا تمتد لعشر سنوات مضت
لربما اذا كان القانون دة موجود لكنت مازلت مقرفص في حجر امي

بعض الاسئلة تطرح نفسها حاولت استنتج اجاباتها وفشلت
ما هو مصير العينات المسحوبة من خيرة شباب مصر اللي قادرين انهم يجوزو
الذهاب لعمل العينة للنساء اية هو كيفيتة ما هو المفترض اللي رايحة لسة عذراء
فاقصي ما يمكن عملة اشعة علي الرحم و المبايض لكن لا يوجد مسحة لعنق الرحم وقناة فالوب اشياء اخري يمكن للمختصين افادتنا اكتر
فهناك اشياء كثيرة جدا قد تكون مانع للحمل لدي المرأة لا يمكن اكتشافها عن طريق الاشعة
هل من سبق لة الجواز وهايجوز تاني يحلل برضة ولا كفاية انة ياخدة المرة الاولانية
تحلف ميت يمين انة دكر وبيعرف و عندة من العيال اتنين
هل يتقدم السيد رئيس الوزراء بافتتاح حجرة الاستمناء ليحس الناس علي التقجم لتقديم العينة
هل يتم تسليم نتائج العينات للناجحين في اطار لوضعها فوق سرير غرفة النوم او في صدر الصالة
وهل ستتم اذاعة اسماء الناجحين والراسبين في الراديو اسوة بالثانوية العامة
فتح الباب مرسي 362 مليون حيوان منوي ناجح
وممكن نلاقي محافظة بحالها لم ينجح احد
هل يحصل المتفوقين علي منح من الدولة لاستكمال مصاريف الجواز
هل يتم ارسال اوائل المستمنين للخارج لاثبات تفوق الجنس المصري علي غيرة
هل يتصل وزير الصحة شخصيا باوائل المستمنين لتهنئتهم بنفسة علي انجازهم المشرف

للاسف الواقع اصبح مدعاة للسخرية اكثر من الخيال
ربما مستقبلا تقر حكومتنا الرشيدة دمج قانون المرور مع قانون الجواز في قانون واحد
واللي يروح يحلل لازم يبقي لابس المثلث في رقبتة علشان محدش يخبط فية وهو واقف
لكي الله يا مصر و احنا لينا صباع الدكتور



شكرا للعزيز اشرف حمدي علي اعارتي الصورة
لجودة اعلي اضغط الصورة

Thursday, July 31, 2008

ليس في الامكان اوسخ مما كان

بعد مسلسل مهند ثم مسلسل يحي شاهدنا الحلقة الاخير من مسلسل ممدوح ابو اسماعيل
الفرق بس بينهم ان السالف ذكرهم مليانة حريم تحل من علي حبل المشنقة ورجالة قمرات ولا يوسف الصديق
اما مسلسلنا فمليء بالقتلي و الغرقي وامهات ثكالي ونساء ارامل و اطفال يتامي
لم اندهش لبرأة اسماعيل و حيثيات الحكم فهو تطور طبيعي للحاجة للوسخة
بداء من عام 2006 لما الامن المركزي كان بيجري خلف اهالي الضحايا بالعصي لتفريقهم من امام المستشفي علشان البية الشملول الوزير جاي, الناس دي ماتت يوم صدور حكم البرأة
احنا بقينا بلد بديل قاضيها ومواطنيها وحكامها
وتحياتي لمخرج المسلسل علي فكرة العبقري لاختيار موعد اذاعة الحلقة الاخيرة
فتوازت مع ماتش الاهلي و الزمالك اللي خرج في الناس في الشوارع وريالتهم شبر علي صدرهم يهللو للاهلي
طب ينعل ابوكو علي ابو الاهلي علي ابو الزمالك
وتقريبا كان حلقة مسلسل نور اللي مهند بيصالح نور في بيتهم اللي بيطل علي مضيق البوسفور
فاالاغلبية كانت قاعدة مبحلقة في الشاشة مستنية البوسة
الجدع ابن اسماعيل دة مغرق عبارتين لحد دلوقت يااخوانا
(السلام 95) و(السلام 98)
طيب يعني نتوقع السلام 2009
الجدع دة دلوقت في لندن .... حلو مش دي اللي نص المصريين اللي راحوها وقعو من البلكونات
هل نأمل سقوط ابو اسماعيل قريبا من التراسينة علي جدور رقبتة قادر يا كريم

العيب مش في القضاء ولا الحكومة ولا اي مسؤل
العيب علينا احنا بقي عندنا جيل مشوة من المصريين اغبي من السلحفة و احمر من الجحش
لا علم ولا ثقافة ولا نخوة ولا بقايا مخ حتي
اقصي احلامة بت يقفش فيها في الاتوبيس المكيف

طول ما الاجانب بيجو من اخر الدنيا علشان يشوفو راس نفرتيتي
والعربي بيجي علشان يشوف صدر دينا يبقي مفيش فايدة
لهواة السكر و الضغط والجلطات وكل امراض حرق الدم يشوف التالي
http://www.youtube.com/watch?v=KC6MrC1D03A

http://www.youtube.com/watch?v=Tc6RKZxG5jY&feature=related

Monday, July 21, 2008

بلد مزلقانات صحيح


اغلبنا سمع عن حادثة قطار مطروح واصطدامة باتوبيس سياحي

وللطرش اللي مسمعوش باختصار شديد

اثناء مرور القطارمطروح -الضبعة المكون من 4 عربات بمزلقان “فوكا” او فواكه محدش عارف اية الاسم الحقيقي

المهم المزلقان كان مغلق وفجأة اصطدمت سيارة نقل مسرعه بأتوبيس رحلات وسيارتين ملاكى و ميكروباص من الخلف مما أدى إلى اندفاعهم وتخطيهم للمزلقان واصطدامهم بالقطار وانقلاب 3 عربات منه.

وحسب اخر تقرير هناك 40 قتيل و 35 مصاب وطبعا انطلقت تصريحات المسؤلين المعتادة
ان تم انتقال كل القيادات الي موقع الحادث و 40 عربية اسعاف وان رئيس الجمهورية بيتابع الموقف بنفسة

(تقريبا بيشوفة من علي قناة الجزيرة)
ولجان لتاكيد سلامة المزلقان ولجان منبثقة من اللجان لتاكيد نتيجة اللجان وان العيب كان في الجزرة او في احزمة الامان
واسم مزلقان في حد زاتة دلالة علي الانزلاق
فاطبيعي انك تحاسب لتنزلق قدامة

الباشا بقي محمد منصور وزير النقل ‏قالك اية يا واد انت و هو‏ إن حادث مطروح كان حادثا قدريا‏,‏ مؤكدا أن انحدار طريق مزلقان الفوكه مطابق تماما للمواصفات والمعايير الفنية العالمية‏.‏
من وجهة نظري اعتقد انة مطابق لمعايير القرع العسلي الدولية

الي الان و الموضوع عادي جدا بلدنا مبختة بحوادث القطارات و النقل و العبارات و الطيارات و كل وسائل المواصلات علشان احنا شعب رمة وربنا غضبان علينا علشان مبنربطش الحزام

طب يا واد يا جعان اية الجديد بقي
الجديد النهاردة الساعة 6 الصبح فاتح التلفزيون وعمال اقلب واثناء مروري علي قناة المحور كان عدو الشاشة الاول معتز الدمرداش يعاد برنامجة
في المواقف العادية اقوم بتغير المحطة مباشرة ولكن لفت انتباهي انة ساكت ومش فاشخ بقة شبرين
وعمال يستمع لرجل في حوار تلفوني و الذي كان بة القادم:


فقدت زوجتى وبنتى وشقيقة زوجتى فى الحادث ،كنت معهم فى الاتوبيس ولم اكن فى
وعيى وشفت بنتى ورايا بحالة جيدة داخل الاتوبيس وماقدرتش اشيلها وكنت حاسس انها
ميتة ، رحت مستشفى مطروح قعدت يومين ، لقيتهم خدوا الجثة ليبيا بطريق الخطأ ،وانا
معايا دلوقتى جثة بنتهم ورفضت استلمها وقلت دى مش بنتى.، ويكمل الرجل حكايته
الغريبة بدموعه : بدلوا بنتى بضحية تانية وبيغطوا على الموضوع وضغطوا عليا علشان
أوافق وأستلم حد غير بنتى وأسكت ، قالولى بنتك علشان ترجع عايزة 8 شهور


ويستعطف الرجل اي شخص بان يسترجع جثة ابنتة وشهادة وفاة لكي يدفنها لكي يجد شاهد قبر يترحم عليها امامة
ويبكي كما النساء راجيا رئيس الجمهورية بان يتدخل لارجاع جثة ابنتة من ليبيا
وصوت الرجل يدل انة علي استعداد تام لتقبيل جزمة اي كلب حتي و ان كان عسكري امن مركزي اذا لمح بارقة امل في انة يستطيع ارجاع جثة ابنتة
للاسف حكومتنا اساسا مش قادرة ترجع مواطنين مصريين صاحيين و بيلعبو اتقدر ان تعود بجثة
حكومتنا غير قاردة علي حماية مراكب الصيد التي ييطلق عليها النار واغراقها و التي تخطت 16 مركب صيد من قبل خفر السواحل الليبي اتقدر ان تعود بجثة
ليبيا التي لعبت دورًا في جبهة الصمود والتحدي ضد مصر والتي انتهت بطرد مصر من جامعة الدول العربية بعد رحلة السادات للقدس،
اقادرة علي اعادة جثة
ليبيا التي في سجونها مصريين الذين قبض عليهم اثناء مرورهم إلى طرابلس ومنها إلى أوروبا اكثر من الليبيين انفسهم ولا تعلم حكومتنا عنهم شيئا او مطرمخة عليهم ما في 90 مليون غيرهم اتقدر ان تعود بجثة
نصيحتي لهذا الغلبان نط من فوق نفس المزلقان علي امل ان يلقو بجثتك في ليبيا فيلتئم شمل اسرتك اعتقد هايكون اسهل كتير

Thursday, July 17, 2008

اجدادك بنو الاهرامات و احفادهم بيلعبو في الطينة

واضح ان الحكاية متوارثة في عيلتنا
ام عن جدة
فافي الفيديو التالي
حوار تليفوني في برنامج القاهرة اليوم مع العزيز عمرو اديب
تقوم فية امي المصون
بتعديد مهازل حال السياحة في بلدنا
و التي نتفشخر في جميع المحافل الدولية اننا نملك تلتين اثار العالم
اتركم مع الدكتورة عزة رستم
سليلة اتاتورك وحفيدة الفراعنة وربيبة الاخوان المسلمين
والتي يكفيها فخرا ان انا ابنها وابو احفادها :)

الجزء الاول


الجزء التاني

Saturday, July 12, 2008

مصر يامة يا بهية وشك في الحيط وقفاكي ليا

تلاتين يوم كما ضربة علي الدماغ قضيتهم اجازة في بلدنا المحروسة هربا من نار الخليج الموقدة

املا في طراوة بلدنا وحلاوة نسوانا لا استطيع البقاء خارج مصر لفترات طويلة متصلة فقد كنت بها من منذ 6 اشهر تقريبا

فاطول مدة قضيتها خارج بنت الفاطمي لا تتعدي 7 اشهر

تلاتين يوم رمح في بلادنا كما المجنون عايز اشوف كل حاجة واقابل كل الناس لكن سعادتي الحقيقية عند رؤيتي سليلة اسرة الجعانين الجديدة فرح هانم علي سن ورمح فقد اصريت ان تلدها امها في مصر لعدم ثقتي في اطباء الخليج بوجة عام

واحمد الله انها نسخ طبق الاصل من اختها القطعية القديمة

فالبنات فضل من الله شبة امهم ولا يمتو الي بصلة فالشعر كستنائي و العيون الوان والبياض كما الجبنة القريش

نيجي للمهم بقي مصر بقت كخة يا عبلة

زحمة كما يوم الحشر

حر كدار سقر

تلوث كما لو اننا في مفاعل نووي

رطوبة كما لو انك قاعد تحت باط عامل معمار

الخلاصة بلدنا عايزة تروح الحرفيين تعمل عمرة

انا وزوجتي من هواة السينما ولنا طقوس في يوم الجمعة الا وهي الانطلاق الي السينما صباحا في سيتي ستارز نظرا لحكم الكراسي المريح بالنسبة لي وطبعا ملك ابنتنا المصون لابد وحتما تجلس في كرسي خاص بها ولا مانع من كوب فشار وبعض الماء او العصير وحاليا انضم فرح وحتما ولابد تقعد هي كمان يعني هي ملهاش نفس تتفرج

ثم بعد ذلك ملك تدخل الملاهي وتقطع نفس امها جري وراها وطبعا انا واقف متفرج فلا صحتي ولا ضهري بقو يستحملو جري ورا عيال صغيرة المهم ثم الغدا في اي مطعم في الفوود كورت وينتهي الامر بكع مرتب طبيب امتياز في شهرين في عدة ساعات المشكلة هنا فين بالرغم انك بتكع مبلغ محترم مبتعرفش تنبسط داخل القاهرة لان الزحمة غير طبيعية و المناظر اللي بتشوفها تسد النفس وسوء الخدمة يكرهك في العيشة ولاني راجل طبقي و اموت في الرفاهية ولا اطيق الزحمة و الحر

سحبت المايوة و العيال و امهم و رأسا الي جنة عامر وجنة عامر هي مارينا الساحل الشمالي وبورتو مارينا حيث الماء ازرق رقراق والرمل اصفر زهزاه وانتهي الامر بي جالس وفوقي شمسية فودافون مرتديا شورت المصايف وشبشب الرحلات المفضل وبجانبي قزازة بيبس مشبرة نافخا حلقات دخان من سجارتي

والسعادة تغمرني اعبث في الرمل باصابعي وكرشي ينام قرير العين

وملك تبني قصور الرمال حولي وانا عايم في الفريسكا

مارينا ايام عزها من عدة سنوات كان يدخلها نوعين من البشر لا ثالث لهما

يا قاطني كوكب المريخ القادرين علي دفع الزليار جنية ثمن الشالية بها او من علي اتصال باحد قاطني المريخ و يستطيع استضافتة او اعطاءة تصريح للدخول واحمد الله علاقتي مع قاطني الكواكب الاخري لا بأس بها

وعن اهل مارينا احدثكم فالنسوان زلط ملط وكلما اشتدت الحرارة كلما انحسرت الملابس

حاسس المرة الجاية هلاقيهم عملو شاطيء للعراة هي الحكاية اصلها فاضل فيها 10 سم

والشباب طالع من صالة الحديد ورازع الحقنة التمام بتاعة الحصنة

وماشي يبرطع زي الحمير البلدي
في واد هناك عامل مشروع اتوبيس مكيف و في شاشات تلفزيون الاتوبيس داخل داخل القرية نفسها لتوصيل
المارينجاوية زي الفسيخاوية كدة
الواد دة قريتلة خبر في روزا اليوسف بيقول ان سعيد بالمشروع القومي اللي عملة
وانة رحم المارينجاوية من حر المشي او قرف عربياتهم و موتسيكلاتهم
وانة اخد جايزة المارينجاوي المثالي ويا ريت نعمم التجربة دي في بلطيم, جمصة وبركة السبع

المهم قضيت عدة ايام في حضن بلد العم عامر

وطبعا لم يفوتني زيارة الاسكندرية الحبيبة

وارجو من اهل الاسكندرية افادتي في امر ما

هي المية مقطوعة عن البلد ولا اية؟؟

اصل طول ما انا ماشي علي الكورنيش شايف ناس طالعة من البحر المية بتشر منها وينطلقو يتمشو في الشارع عادي كدة
يعني عيلة اب و ام و عيالهم طالعين من البحر يركبو تاكس او ينطو في ميكروباص او يقعدو ياكلو كل دة و المية بتهر منهم
كما لو اننا في غابة استوائية
دة غير الشوارع كلها تقريبا بقت اتجاة واحد
يعني تروح مترجعش

ثم عودة الي القاهرة وزيارة اضرحة كل اصحاب محلات الاكل و الدعاء عندهم و التبرك بهم

وزيارات ميدانية لعدة مقاهي و تفحص احوال المعسل
وقرأة عدة اطنان من الجرائد و المجلات ومتابعة حال بلدنا اللي لا يسر عدو ولا حبيب
فالمصري اثبت بالدليل القاطع انة مواطن صاعقة قادر علي التكيف في جميع انواع البيئات و ظروف المعيشة

حمير ياكل
كلاب يمصمص
مية بالباكابورت يأربع

ولهذا حديث اخر

Monday, June 02, 2008

يا نخلتين في العلالي

انا عارف انها غيبة طويلة المرة دي
بس اعذروني في حالة جفاف تدويني و انشغال شديد كما الشيالين في محطة مصر
دة غير سدة النفس عن الكتابة بصراحة فحال بلدنا لا يسر عدو ولا حبيب و لا اي ابن كلب تاني
بالرغم من غيابي لحوالي العام عن مصر الا من اجازات قصيرة انهل من الاحبا و الاصدقاء
الا اخبار بلدنا لا تغيب عنها الشمس ففضايحنا كما المطاهر الجديد تنتشر في ارجاء المعمورة و المنتزة
كانتشار الجاز في شعر بنت البواب
لم يخرجني من عزوفي عن التعليق عن الاحداث الجارية الا خبر علي موقع مصراوي نقلا من جريدة الاخبار
و الخبر يا اخوانا بيقول:

ذكرت صحيفة أخبار اليوم في عددها الصادر السبت ان الدكتور يوسف بطرس غالي وزير
المالية فوجئ بمدير مكتبه يخبره ان مدير الجمارك يريده في امر هام.
واتصل غالي
بمدير مصلحة الجمارك قائلا: خير ان شاء الله ادخل في الموضوع على طول.
قال له:
يا فندم عندنا كرتونة بلح صغيرة قادمة من الامير فهد بن سلطان امير منطقة تبوك باسم
الرئيس حسني مبارك وحضر موظف من رئاسة الجمهورية لاستلامها، لكنه يصر على دفع
الرسوم.
قال الدكتور غالي لمدير الجمارك: ازاي ما كنتش عايز تاخد منه رسوم، على
طول خد رسم الوارد.
رد مدير الجمارك: حاضر يا فندم.
وبعد دقائق اتصل الدكتور
غالي مرة أخرى بمدير الجمارك: ماتنساش تاخد ضريبة المبيعات على
الكرتونة.
وبالفعل تسلم احد موظفى الرئاسة الكرتونة بعدما سدد الرسوم المستحقة
عليها وهي 30 جنيه رسم وارد و35 جنيه ضريبة مبيعات.
وصدر ايصال سداد بقيمة 65
جنيه باسم الرئيس محمد حسني مبارك واسم موظف الخزينة عبدالله
احمد.


يتحايل المصري ولا يدفع جمرك او ضريبة علي اي حاجة
يقضي عمرة كلة في الخليج ونازل بالمروحة و البطانية لاففة حوالين كرشة هربا من رجال الجمارك البواسل
ومش عايز يدفع ويضيع علي الدولة حقها في شقاة و عرقة في بلاد الذهب الاسود
اذا كان كبيرنا دفع ال خمسة و ستين جنية و لم يهتز لة جفن ولم يرتعش لة حاجب
يعني يا شعب جعان وعريان خدو الريس قدوة و حزوة في افعالة
الراجل دافع ضرايبة زية زي اي مواطن جعر
بالرغم ان مدير الجمارك كان رافض اساسا انة ياخد الضرايب القانونية علي الطرد
--راجل ذمتة واسعة صحيح----
بس بصراحة الجدع بتاع تبوك دة ملوش حق برضة
يعني طرود رايحة وجاية علي كرتونة صغيرة و انت مقامك كرتونة برضة يا كبير اقل من نخلة مكنتش تقبل
اخيرا
سيدي الرئيس اشكر سيادتكم من اباطين قلبي علي احترامكم للقانون
وربنا ييسرلك دفع الباقي
سيدي الرئيس هي الكارتونة لامؤاخذة كان البلح اللي فيها رطب ولا طبرجل ولا تمر
سيدي رئيس الجمارك انا في كيس صوابع زينب واحد حبيبي بعتهولي ضرايبة تعمل كام يا باشا

Thursday, May 08, 2008

فرح


الحمدلله رزقنا الله بمولودة
اسميناها فرح
هي وزنها خفيف شوية علي غير عادة ال جعان
نسألكم الدعاء عسي ربنا يفخ في صورتها

------------------------------------------------------

Wednesday, April 02, 2008

ابريل

اولا اعذروني علي فترة الغياب الطويلة دي
واسف علي عدم قدرتي لمتابعة الردود
بس الفترة الماضية كنت في حالة تأهب و انشغال للركب
سواء علي المستوي العملي او المستوي الاسري
الحمدلله فضل من الله تم ترقيتي لاصبح مدير احدي الادارات في عملي
و ليس هذا هو الخبر الاهم فا الموضوع كان تحصيل حاصل كان محتاج شوية خوازيق علي زنب
يعني هو البني ادم اية غير خازوق يطلع من دماغة
اما الخبر الاهم  مولود جديد يضاف الي الامبراطورية الجعانية
بعد ان ظلت حبيبتي ملك متوجة علي عرش الامبراطورية منفردة بلا منازع
فها قد اقترب وصول من سيؤرق مضجعها و مضجعنا

فبين العمل و المنزل اصبحت كما مجاذيب الحسين
اما اليوم فهو يوم سعيد للبعض كئيب علي الاخرين كل حسب منظورة
فاليوم مر عام اخر علي وجودي علي وجة البسيطة
اتمني ان يكون لي لا علي
و ان كنت احسنت التصرف ادعوكم لانتخابي لعام اخر
هذا و بالله التوفيق

Wednesday, March 12, 2008

احترس بلدنا بترجع لورا

إذا الدنيا أقبلت باض الحمام على الوتد وإذا أدبرت الدنيا بال الحمار على الأسد
حقيقي لا اعرف قائل هذة الحكمة لكن في كل الاحوال اعتقد ان مصر في مرحلة
تبول الحمير علي الاسود فقد ولي زمن الخيل التي في نواصيها الخير
واصبحنا في زمن الحمير المصابة بالحصر

ابن البطيخ
الحضري باشا ابن كفر البطيخ اللي معرفش الفرق بين الشراب الاديداس و الكالسون الا لما جة القاهرة
قامت الدنيا و مقعدتش لهروب المحروس لسويسرا للاحتراف مع نادي درجة تانية وطالب البعض برقبة الخائن و احلت بعض الجماعات دمة و خرج العيال ملط في الحواري يهتفو بسقوط الحضري و اصبح النداء بعد ارقص يا حضري
الطم يا حضري و عند عودتة و ذهب لحضور التدريبات هجم جماهير الاهلي علي النادي محاولين الفتك بة و ان دل علي شيء دل علي تخلف شعبنا الحبيب و ان ريالتة شبر علي صدرة و الله اللي عملوة لو اتعمل نصة علشان غزة و العراق و لبنان
او لاجل الاساءة لرسول الله لكان حالنا غير كدة ونهش و لعن و سب في الحضري كما لو انة قتل عيل من عيالهم
ومحامي من ابو بيضة و كباية شاي يطالب باسقاط الجنسية عن الحضري
كفو ايديكم عن رجل كان اقصي احلامة طرمبة مية نضيفة جنب بيتة

السيد الكبير المبجل
كبيرنا و عمنا و تاج راسنا رئيس جمهورية مصرادخل بذات نفسة شخصيا وطلب من زاهر حل مشكلة الحضري وكفاية الواد نفسيتة مش ناقصة و جمال مبارك برضة واحد من اللي اقنعو الحضري بالعودة و يابو عصام عيب انت مش بتلعب في حارة بعجر مينفعش
تكت كدة ارجع و متخافش
و انا و من موقفي هذا ادعو كل الجرابيع اللي بيقفو في طوابير العيش
او ورثتهم اذا حد فيهم فاضي وادعو اهالي موتي العبارات وشهداء العمارات وضحايا البلاعات و قتلي المستشفيات ومرضي المسرطنات
و العاطلين عن العمل و اللي مش لاقيين جواز واللي مش لاقين غيار
التوجة لسويسرا و محاولة الاحتراف هناك عسي ان تنظر اليهم الدولة بعين العطف و يتدخل الرئيس شخصيا لحل مشكلاتهم
اخوان
من حوالي عشرة ايام فتح باب الترشيح لانتخابات المحليات وحسب احصائية أصدرها مكتب الارشاد للجماعة ان هناك 720 عضو بالجماعة تم اعتقالهم و ان معظم هؤلاء من المرشحين في 20 محافظة غير طبعا عمليات غلق اي نشاطات اقتصادية و تجارية للاخوان و نقل مدرسين معروفون بتوجههم الاخواني الي اماكن اخري
الانتخابات المحلية من وجهة نظري هي اجرائات حكومية روتينية تهدف لترقية بعض الموظفين
في مثل بيعجبني اوي بيقول
طول ما انت زمار وانا طبال ياما حتجمعنا ليالي طوال
فليزمر هؤلاء و يطبل هؤلاء و المصريين يرقصو علي فحم مشتعل

نظيف
كلما قرأت او شاهدت تصريح لمسؤل حكومي شعرت انة يعيش في دولة غير التي نعرفها فمرة يخرج نظيف الرائد في مشروع القرية الذكيةو الحمار ابو بصمة الصوت و العجل البلو توث
و يؤكد ان إضرابات الموظفين الحكوميين محظورة هي اية حكاية محظورة دي اللي كل ما حد ميعجبهمش يتقال علية محظورة
علي كدة الولية ام فكري اللي فارشة في سوق الخضار اللي بتلعن سلسفيل الحكومة ليل نهار هايبقي اسمها ام فكري المحظورة
وكما شعرت من تصريحة انة محروق قوي من موظفي الضرائب العقارية و علي حد قولة الحكومة مبيتلويش دراعها و ان اي صاحب حق يستطيع أن يأخذه عن طريق قنوات التعبير القانونية
و النبي يا باشا قولنا القنوات دي فين و هل لازم نروح بالمايوهات لا يكون قناة منهم مبلولة ولا حاجة
و ايضا تكرم السيد الوزير بقولة ان الحكومة تسامحت معهم لإدراكها الظلم الواقع عليهم لعدم مساواتهم بموظفي الضرائب العامة
كما لو ان الحكومة دي امنا و احنا شوية عيال صيع محتاجين نظرة عطف
ا و ليس كل موظفي الدولة من اصغرهم الي رئيس الجمهورية يقبضو مرتباتهم للاهتمام بامور الشعب
واضح ان نظيف مقراش الدستور اللي يكفل حق الافراد فى الاضراب والاعتصام للتعبير والمطالبه بحقوقهم

حاتم الجبالي
جديد وزارة الصحة بقي سيكون لزاما على آلالاف من الممرضات المصريات المنتقبات، أن يكشفن عن وجوههن وأيديهن أثناء عملهن في المستشفيات، بموجب قرار لوزارة الصحة يقضي بتوحيد زي الممرضات بغض النظر عن شرعية النقاب من عدمة مش دة موضوعي الموضوع بقي جدية الموضوع و القرارات التعسفية اللي هاتتخذ لمن تخالف القرار يعني لو كان الوزير اتشملل زي ما تشملل علي الزي كان اقر قوانين للنظافة و حسن المعاملة و توفير البنج و اساسيات الاسعاف بدل ما الغلابة بيخلعو ضرسهم من غير بنج لانة رفاهية في نظر الجبالي باشا الكوميديا بقي
ان خلعهم النقاب مش هايحل استهبال بعض المنقبات من الممرضات بانها ترفض علاج الرجال
بحجة انة لا يجوز
خلاص يا ستنا اقعدي في بيتك و خلي اللي هاتشوف شغلها تسترزق

جمال البنا
حبيب الكل اللي مفرج هم الشباب و مرجع الصبا للشيوخ و الرجال
وصاحب فتوى إباحة التدخين للصائم
بعد ان اتحفنا باخر فتوي لسيادتة بإباحة القبلات بين الشباب والفتيات في الأماكن العامة معتبرا أن القبلات بين غير المتزوجين من الشباب والفتيات من الضعف البشري وتدخل ضمن اللمم في الإسلام
، أي الذنوب الصغيرة التي تمحوها الحسنات
جايز علشان سيادتة عندة 80 سنة فموضوع البوس مش هايجيب نتيجة مع من هو في نفس العمروهو في سن جدها لا حرج يعني
يا اخوانا الشاب من دول لو تخيل واحدة بس و هو نايم يفوت في قطر نسوان ميوقفوش الا لما حد يشد جزرة الفرامل
نروح نقولة البوس حلال وربك بيلطف بعبيدة بوسها و توكل
يحضرني المثل القائل جاتنا بنت خالتنا زادتنا هباله على هبالتنا

سيد رشوان
راجل مرتبة 400 جنية زفت مصري
لبس زي امرأة منقبة علشان يقف في طابور العيش النسائي لانة اخف في الزحمة
طبعا اتقفش و اكل علقة موالد و عند حضور الشرطة بكي الرجل كما الولايا و انة اضطر لهذا الفعل
من قسوة المأساة التي يعيشها كل يوم، هو ومعظم المصريين من أجل الحصول على رغيف الخبز
ولكي يتجنب المعارك و اذكركم بعجوز الدقهلية الذي سقط في طابور العيش مغشيا علية ثم وفاتة
غير وفاة مواطن بالاقصر بعد ضربة علي ايد بلطجي في طابور العيش
غير الخناقات بالسنج والمطاوي في وسط القاهرة في طوابير العيش
غير قتيلين في حلوان و 17 جريح
انا متوقع كمان 30 سنة هايبقي في بانوراما حرب الرغيف اسوة ببانوراما حرب اكتوبر

و كفاية كدة علشان انا دمي اتحرق

Monday, March 03, 2008

اوبريت البربور العربي

منذ عدة اعوام اتحفونا بالاغنية الشهيرة الحلم العربي بتاعة اجيال ورا اجيال
وسحسح الوطن العربي من المحيط للخليج وشق الصدور و هال الرمال علي راسة
وبربرت الشعوب كما لم تبربر من قبل
الظريف بقي ان في اغنية الضمير العربي واضح ان المنتج و المخرج للجزء الاول
أحمد العريان وجد ان مفيش فايدة
فقامو في الضمير العربي بغناء الاتي
"ماتت قلوب الناس ماتت فينا النخوة، يمكن نسينا في يوم إن العرب أخوة، مات الإحساس جوانا ولا قلوبنا مليانة بالحقد والإحساس"
يعني من الاخر سبو الاخضريين للشعوب
حقيقي دائما ما شغلني الهدف من الاغاني الوطنية ذات الانتاج الضخم و المكلف
ساعات بحس انها سبوبة او المنتج مزنوق في جمعية او العيال علي وش المدارس
فا يقوم لامم مغنيين مصريين علي خلايجة علي مغاربة و توانسة و يبقي انتاج مشترك
و اهو المليان يكب علي الفاضي
و شيللي كليب اشيلك اوبريت
وطبعا الاوبريت دة هايلف علي الدول العربية كالغجر في الموالد و الترحال علي النجوع و الكفور
وغازية تزن نص طن ترقص بانشكاح امام الفرقة علي امل ان يجود عليها احدهم بجنية احمر سخن كالرغيف او يديها رغيف
فلا مانع من ان يرعاة الملك الفلاني و يجود علي الفرقة بما يخرج من ذمتة
او الرئيس العلاني يصطحب المدام و الانجال في مسرح الرئاسة للفرجة علي فرقة المولد العربي
و لا مانع من اهداء الفرقة و الغازية درع الدولة ومفتاح العاصمة ودورة مية ان امكن
و الملفت الدعاية للاوبريت علي القنوات الغنائية و كل يعلن ان الاوبريت سيعرض حصريا لدية
وتسابقت المنتديات و المواقع علي وضع وصلات لتحميل الاوبريت
كما لو انه دواء لشفاء الجرب و البرص و سلس البول
و الكل يتسابق للحصول علي بركات الاوبريت

الجميل بقي ايمان البعض بان الدول ستحرر بالاوبريتات و المسلوب سوف يعود بالكليبات
واقترح في حالة نجاح التجربة و تحرير القدس و لبنان و العراق
تعميمها وتحرير السنبلاوين و مغاغة و دوران شبرا و محطة مترو روض الفرج
فبربرو يا عرب كما شئتم فلن تحرر الاراضي بالريالة و النواح و اغاني الموالد

الله يرحمك يا بيرم لما قلت
و حمار يغني, وجايب من يقول له آه
حالاً تقول الخلايق كلها ويّاه

Wednesday, February 20, 2008

نجاد و ال 300 اسبارطي


طبعا كعادة العرب اي حاجة في الظيطة احمدي نجاد محرر العرب هو اللي هايرفع راية الاسلام
هو اللي مخوف امريكا و اسرائيل
ياتيني في الفترة الماضية عدد من الايميلات تمجد في نجاد و تصورة علي انه قائد العرب و خليفة المسلمين الجديد
وهم كل انطباعاتهم تأتي عن طريق ايميلات من قبل الدعاية الايرانية لتلميع صورة رئيسهم
و الغالبية حمقي اخر كتاب قراة كان تان تان في بلاد كوسكوس تان
كل اللي بيعرف يعملة يعمل فورورد للايميل و هو زي سطل المية الساقعة
احمدي نجاد لمن لا يعرف شيعي لا يعرف سوي الخميني ولي الله في الارض و المتحدث الرسمي علي لسان الله كما يعتقدوا
أحمدي نجاد في الثمانينات كان وراء قضية " مفاتيح الجنة" حيث أنه في الحرب مع العراق اشترت ايران الخميني نصف مليون مفتاح بلاستيكي من تايوان ليعلقها أطفال لا يزيد سنهم عن 12 سنة ليقوموا بدور "كاسحات ألغام بشرية" لحقول الألغام على الجبهة مع العراق بعد أن تم عمل غسيل دماغ لهؤلاء الاطفال بأن تلك المفاتيح البلاستيكية ستفتح لهم أبواب الجنةالخميني "الزاهد المتقشف" اصر على ان تستمر الحرب ثمانية سنوات مع العراق رافضاً كل مبادرات السلام وكان يصر على أن حدود ايران الغربية هي نهر الفرات ، فكم مليوناً من البشر قتل في هذه الحرب وكم ملياراً من الدولارات "صب" على أتونها هذا الزاهد
و في كتابه تحرير الوسيلة للخميني
لا بأس بالتمتع بالرضيعة ضَماً وتفخيذاً
بل و اتاح اتيان الزوجة من الدبر
نحن أمة مسحورة "بالكلمات" كما يقولون "كلمة بتودينا وكلمة بتجيبنا"
لماذا ايران "احمدي نجاد" ترتكب المذابح من قبل حرس ثورتها ومن قبل عملائها في العراق ضد عموم الشعب العراق وسنتهم على الخصوص ؟لماذا ايران "احمدي نجاد" تريد تطوير السلاح النووي أصلاً وضد من وقد أفتى "حاخامتها" بأن قتال اليهود لا يجوز ؟
نشوف الصور الحقيقية مع بعض و فيديو في احد ذكري مقتل الحسين و يظهر بها احمدي نجاد















Thursday, February 14, 2008

معايا الفلانتين السخن

كلمة الحب، من أعظم الكلمات التي تسمعها الأذن، ويشعر بها القلب. ويرجع ذلك إلى التركيب النفسي والعاطفي الذي خلقه الله في الإنسان، فكل إنسان بحاجة لأن يكون محبوباً وبنفس الصورة هو بحاجة أن يحب.
وحينما يشعر الإنسان أنه محبوب فإنه يشعر بالقيمة الذاتية، والأهمية الشخصية، والقبول من الآخر، وجميعها قيم داخلية يحتاج كل إنسان أن يشعر بها.
ودائماً ما يبحث الإنسان عن الحب وسط أهله وأصدقائه و أقاربه وزملائه. ومن المعروف أنه كلما حصل الطفل الصغير على مزيداً من الحب - بطريقة سليمة خالية من التدليل الزائد - داخل نطاق الأسرة فإنه يكون أكثر اتزاناً في حياته التالية، فسيكولوجية الإنسان تقول أن أكثر الناس بحثاً عن الحب هم من لم يحصلوا عليه. وقد يتسبب هذا في الكثير من المشكلات النفسية والعاطفية التي تؤدي إلى القلق والتوتر، والسعي الخاطئ نحو ما يظنه الشخص حباً، ومحاولة جذب الانتباه التي تصل في بعض الحالات الخطيرة إلى محاولة الانتحار.
ولذا فإنه من المهم جداً أن يشعر الشاب داخل أسرته وكنيسته بالحب من الجميع، وأن لا يكون هذا الحب مكافأة على السلوك الطيب للشاب، فالشاب يحتاج أن يكون محبوباً في أوقات الضعف والسقوط أكثر من أوقات القوة والانتصار. ســواء كنت قائماً أو ساقطاً فالرب يحبك ويريد أن يشددك و يقيمك. يريد أن يقدم لك جميع حاجاتك الجسدية والنفسية والفكرية والروحية ، وفي محبته لك لن تشعر بأنك محروماً من الحب.
لقد أعطانا السيد المسيح هذه المحبة كما يقول الرسول بولس في رسالته إلى رومية:" لان المسيح إذ كنا بعد ضعفاء مات في الوقت المعيّن لأجل الفجار. فانه بالجهد يموت أحد لأجل بار. ربما لأجل الصالح يجسر أحد أيضاً أن يموت. ولكن الله بيّن محبته لنا لأنه ونحن بعد خطاة مات المسيح لأجلنا. فبالأولى كثيرا ونحن متبرّرون الآن بدمه نخلص به من الغضب. لأنه إن كنا ونحن أعداء قد صولحنا مع الله بموت ابنه فبالأولى كثيرا ونحن مصالحون نخلص بحياته." (رومية 5 : 6-10).
ويقول القديس يوحنا:" لأنه هكذا أحب الله العالم حتى بذل ابنه الوحيد لكي لا يهلك كل من يؤمن به بل تكون له الحياة الأبدية (يوحنا 3 :16) ،
"لأنه ليس لأحد حب أعظم من هذا أن يضع أحد نفسه لأجل أحبائه" (يو 15 : 13).
ثق أيها الشاب أن الله يخاطبك في كل لحظة كما خاطب دانيال النبي في القديم قائلاً ً: "لأنك أنت محبوب" (دانيال 9 : 23).
و الآن وقد علمت أنك محبوب جداً من الله فإنك تستطيع أن تقدم بعضاً من هذا الحب للمحيطين بك كما يخبرنا القديس يوحنا: "أيها الأحباء لنحب بعضنا بعضا لان المحبة هي من الله وكل من يحب فقد ولد من الله ويعرف الله" (1 يو 4 : 7).
والآن هل اكتشفت بنفسك أن الحب الذي نراه على شاشات التليفزيون أو السينما في أغلب الأحوال ليس حباً حقيقياً، وأن كل حب لا يهتم بالآخر ولا يهدف إلى مصلحة الآخر، ولا يراعي شعور الآخر أو سمعة الآخر أو نجاح الآخر هو في الحقيقة ليس حباً.
ونعود لنجيب عن السؤال: كيف اقدم الحب للآخرين؟
وللإجابة على هذا السؤال أقول لك أنه ينبغي أن تكون فالانتينو Valentine (وهو الاسم الذي يطلقه البعض دون وعي على المحبين).
ولكن، هل تعرف من هو فالانتينو الذي تسمع عنه كثيراً، ويتردد اسمه مرتبطاً بالحب وعيد الحب؟
فالانتينو هو الأسقف فالانتين Bishop Valentine (ويوجد قديس آخر من الأتقياء يدعى بنفس الاسم وينسب إليه البعض العيد أيضاً) من أساقفة روما وقد استشهد من أجل الإيمان بالمسيح في عهد الإمبراطور كلوديوس الثاني يوم 14 فبراير سنة 270 ميلادية. وقد اشتهر هذا الأسقف بمحبته لجميع الناس، كما اشتهر بما قدمه من أعمال الشفقة والرحمة حتى أصبح رمزاً نابضاً للحب ، في حبه لإلهه الذي استشهد من أجل الإيمان به، وفي حبه لشعبه وأخوته بما قدم من أجلهم . وحينما أراد جيلاسيس
Gelasius بابا روما سنة 496م
أن يصنع عيداً للحب وجد أن هذا الأسقف يمثل الحب المسيحي الصادق فحدد يوم استشهاده ليكون عيدا للحب.
وما زال معمولاً بهذا العيد حتى الآن، ولكنه تحول كثيراً عن الهدف المرجو منه ، وأصبح اسم فالانتينو - للأسف - مرتبطاً كثيراً بالمعنى الاستهلاكي للحب.
والآن هل نتعرف معاً على بعض المجالات التي نستطيع من خلالها أن نقدم الحب للآخرين متمثلين بذلك الشهيد الذي شهد بحياته من أجل محبته في الملك المسيح.
1. كن فالانتين، وقدم حبك في خدمة إلهك الذي مات من أجلك على عود الصليب وقام من أجلك. وفي هذا لا تحسب حساب للنفقة ، ولا تنتظر مقابل لحبك. ولكن لا تخف فهو يعطيك مائة ضعف في هذا الدهر ، وفي الدهر الآتي الحياة الأبدية (مرقس 10 : 30).
2. كن فالانتين، وقدم حبك لكنيستك بكل عقائدها وطقوسها وخدماتها و آبائها وشعبها. احرص على خدمتها دون انتظار مقابل لهذا الحب.
3. كن فالانتين، وقدم حبك لأسرتك ، الكبير والصغير، قدم الحب لكل من هو بحاجة إليه، احرص على عمل كل ما يفرح قلوبهم دون انتظار مقابل لهذا الحب.
4. كن فالانتين، وقدم حبك لمجتمعك الذي تعيش فيه ، احرص على دراستك ، تفوق ، كن عضوا صالحاً في مجتمعك، قدم الحب للجميع حتى الذين يسيئون إليك، ولا تنتظر شيئاً في مقابـل هذا الحب.
5. كن فالانتين، وقدم حبك لكل محتاج للحب ، حباً نقياً صادقاً يصل بك ومن تحب إلى قلب الله الذي أحب الجميع ، قدم حبك في خدمة المحتاجين ، المعوزين، المرضى. قدم حبك للحزانى والمتألمين والمتضايقين. ولا تنتظر شيئاً في مقابل هذا الحب.
ويبقى العديد من المجالات التي يستطيع الإنسان أن يقدم الحب من خلالها ، ولعل أحد أهم هذه المجالات هو تقديم الحب للزوجة أو الزوج من خلال سر الزواج المسيحي المقدس وذلك في الوقت المناسب الذي يحدده الله لك، فلا تنشغل بذلك كثيراً الآن ، واعلم أن لكل شئ تحت السماء وقت، فاهتم اليوم بحياتك، وحقق أهدافك، وعش حياة الحب والعطاء من الآن لتتمكن في المستقبل من إشباع بيتك وأولادك بهذا الحب المستمد من محبة الله لك.
(نقلا عن احد المحاضرات في ابراشية سانت ماري)
ولمدعي الثقافة انصاف المتعلمين هو دة مبدأ يوم الفلانتين في دول اوروبا و الامريكتين
حاجة كمان اول رسالة ارسلت للتهنئة باليوم دة كانت من ايثر هولاند سيدة امريكية في اواخر القرن ال 18
ثم اندثر الاحتفال بة ثم اعيد في القرن العشرين لا اعلم امتي علي وجة الدقة لكن هناك اشاعة قوية ان عدة شركات امريكية ضخمة
تسوق منتحات ترفيهية و اطعمة وشركة مثل
hallmark
هم من احيو اليوم دة لترويج منتجاتهم
لا اتحدث عن وقف الاحتفال دة من منطلق ديني او شريعي فانا لست من اهل الفتوي
ولكن من باب العقل يا بني ادمين

فا علي السادة الفلانتيين التوجة الي النوافذ المخصصة للحصول علي فالانتينهم السخن
ملاحظة: لما تكون راجل بريالة و مبتحبش مراتك غير يوم واحد في السنة وتعملها جو رومانسي
او بتحتفل بالفلانتين دة علشان الناس متقولش ازاي مجبتش هدية لمراتك في اليوم دة يا بخيل
او خايف من المدام تخلي ايامك كلها تلات و اربع و متشمش ريحة الخميس
تبقي حاجة من الاتنين يا قفة يا عندك عجز جنسي

يا مدعي الحضارة و الدفاع عن الحب يا محدثي الحب
اذا كنتم تنتظرو يوم كل عام لتقول لامرأتك انا احبك
فا جتك وكسة فانت مازلت مراهق في دنيا المرأة
وانا هنا لا اتحدث عن الشباب الصغار في المدارس او الكليات
دول ربنا معاهم الواد من دول عبارة عن مجموعة هرمونات في كيس
ولكن عن الناضجين المتزوج منهم او المرافق حتي
اذا كانت امرأتك تنتظر الفلانتين من السنة للسنة علشان بسلامتك تفتكرها بصحبة تين شوكي حتي
وهي تعلم ان اليوم دة هو ملجأها لان تسمع منك كلمة او اشارة او نظرة لبقايا حب
فيا عزيزي الرجل امك اصطلحت قوم روح


Monday, February 11, 2008

مبروك علينا الحلة

وكعادة الشعب المصري الطيب يستني اي مولد علشان يركب المراجيح و الحلزونة و يتشقلب في الهوا
و المولد المرة دي هو الحصول علي كأس افريقيا
امتع اللحظات تقضيها في شوارع مصر هي اوقات المتشات سواء في النهائي او اي بطولة
فتعود مصر الي زمن عماد حمدي و اسماعيل ياسين
الشوارع فاضية و العصافير بتزقزق في الخلفية و حاجة اخر انسجام
بعد الماتش سواء كسبنا او خسرنا
تجد البلد و حالها انقلب
اتحدث هنا عن المناطق القريبة من سكني سواء مصر الجديدة شارع النزهة و الكربة و العروبة
او مدينة نصر عباس العقاد و مكرم عبيد
علي حظي الاسود من سنتين اخذت عنوة للفرجة علي الماتش في احدي القهاوي
وكان الطعم لاستدراجي هي الشيشة و المشروبات الروحية كالسحلب و القرفة و العناب

وكان برضة الكاس بتاع افريقيا
ولا اعلم كيف انتهي بي الموقف واقف في شارع النزهة لمدة 3 ساعات مش عارف اروح
و أمم بقي واقفة في الشارع نسوان ورجالة
اعداد مهولة اقطع دراعي ان اللي كانو في 73 اقل من العدد دة
وناس ماسكة علب بيرسول وتولع فيها نار
وصواريخ بتطوح وشباشب بتطير
وتم ايقاف مترو النزهة و اخذ السائق رهينة
انا فاكر اليوم دة كان معايا 9 انفار من اصحابي رجعنا 3 بس
واحد منهم شوفتة صدفة داخل بيتهم لابس فانلة داخلية بحمالة واحدة
وامس يتكرر نفس السيناريو
يخرج الشعب المصري كمجاذيب السيدة
منكوش مكفهر مترب وحالتة نيلة معهوش تمن تذكرة مترو الانفاق
يرقص في الشوارع ويقبلون بعضهم البعض و الفرحة تبظ من اعينهم
كما لو ان هايتوزع علي كل مواطن مليون جنية
و الفلسطنيين في طريقهم للانقراض و محدش هيلاقيهم غير في السوق السودا
جتنا ستين نيلة فينا و في عبطنا
شعب مش لاقي حاجة يعملها ولعيبة تسجد للة شكرا علي احراز الهدف

وقريبا سنسمع عن رحلات حج و عمرة لاجل الحصول علي كاس السوبر
احد الحجاج متعلق باستار الكعبة داعيا يا رب الدوري ياخدة الزمالك السنة دي " دي حقيقة مش نكتة"
وتكون ادعية الاستخارة الخاصة بالمدير الفني
يا رب نلعب بطريقة 4-2-4
ولا 2-4-4-

المهم هانعمل اية لا حياة لمن تنادي يا اخوانا الرياضة لعب مش فرجة
لكن العلم في الكبر كالضرب في البقر
اتمني تكون الحلة جت علي مقاسكو












من مدونة جبهة التهيس الشعبية صورة لاهل فلسطين يقبلون صورةلابو تريكة

Thursday, February 07, 2008

عايزين يخصخصوني

معلش هاتعبكو و ادوشكو شوية
في شخصية ضافتني علي الايميل عندها ودة الحوار اللي تم بينا

11:51] nadan12: صباح الخير[11:51]
anaga3aan: saba7 el nour
[11:52] nadan12: كيفك [11:52]
anaga3aan: كويس[11:52] a
naga3aan: مين؟[11:52]
nadan12: انا نور ممثلة شركة ومعايا لك عرض انشاء الله راح يعجبك [11:52]
nadan12: مهتم نحكي بالموضوع [11:52] nadan12: ؟[11:52]
anaga3aan: ؟؟[11:52]
anaga3aan: شركة اية و عرض اية[11:52]
nadan12: احنا شركة جديده [11:53]
nadan12: انت عندك موقع على الانترنت مسجل باسمك ؟[11:53]
nadan12: شو رايك نعطيك موقع مسجل باسمك [11:53]
nadan12: ومساحة استضافة 5 جيجا بايت [11:53]
nadan12: وكمان 100 ايميل مسجل على العنوان الجديد[11:54]
nadan12: ايه رايك مهتم ؟[11:54] nadan12: طبعا بدون مقابل مادي
[11:55] anaga3aan: مقابل اية طيب[11:55]
nadan12: المقابل هو حسابك في البلوجر [11:55]
nadan12: بعد ما تعطيني عنوان مدونتك نتأكد منها[11:55]
nadan12: وكمان انت ما راح تعطينا اي شي قبل ما تتأكد انو الموقع تسجل باسمك[11:56]
nadan12: شو رايك نكمل ؟[11:56]
anaga3aan: يعني اية حسابي في البلوجر[11:56]
anaga3aan: نكمل اية مش افهم الاول [11:56]
anaga3aan: انتي عايزة اية من البلوجر بتاعتي[11:56]
nadan12: اوكي [11:56]
nadan12: تمام[11:56] nadan12: اعطيني عنوان مدونتك
[11:57] anaga3aan: انتي مش عارفاها؟؟[11:57]
anaga3aan: امال جبتي ايميلي منين ؟؟[11:58]
nadan12: انا عارفها بس اتحملني في عندي حوالي 300 عنوان مش متأكده اي واحده منهم [11:58]
nadan12: اتحملني [11:58]
anaga3aan: اقري اسمي و انتي تفتكري[12:00]
nadan12: تمام [12:00] nadan12: اوكي
[12:01] nadan12: احنا راح نساعدك توصل كلمتك بطريقه أقوى وبطريقه اسرع [12:01]
nadan12: احنا راح نعطيك موقع مسجل باسمك[12:01]
nadan12: .com[12:01] nadan12: ونساعدك بالتصميم والبرمجه
[12:02] nadan12: وكمان راح نساعدك تعمل مدونه أو اكثر على عنوانك الجديد [12:02]
nadan12: مقابل حسابك في البلوجر بعد ما تتأكد انو الموقع تسجل باسمك [12:02]
nadan12: ايه رأيك مهتم [12:02]
nadan12: ؟[12:02] nadan12: نكمل[12:02]
nadan12: اذا كنت مهتم احنا ممكن نخلص في ربع ساعة [12:02] nadan12:
[12:02] anaga3aan: انتي عايزاني اتنازلكو علي حسابي في البلوجر
[12:02] anaga3aan: مقابل 5 جيجا؟[12:03] anaga3aan: و 100 ايميل
[12:03] anaga3aan: وموقع باسمي[12:03]
nadan12: بعد ما تتأكد انو الموقع تسجل باسمك
[12:03] anaga3aan: هي مدونتي مهمة اوي للدرجة دي [12:03]
nadan12: ما شاء الله عليك [12:03] nadan12: بس احنا مهتمين بالمدونات القديمة
[12:03] nadan12: اذا كنت مهتم خلينا نبدأ ؟[12:03]
nadan12: ايه رأيك ؟[12:04]
anaga3aan: ما هو اكيد استفادتكو من وراها اكبر من الارقام اللي انتي بتقوليها
و اعذريني[12:04] anaga3aan: اصل انا من متبعي مبدأ[12:04]
anaga3aan: الحداية مبتحدفش كتاكيت [12:04]
anaga3aan: ثانيا [12:04]
anaga3aan: انا يا عزيزتي[12:04]
nadan12: ما فهمت :-/[12:04]
anaga3aan: مش في حاجة للمساحات دي اساسا[12:05]
nadan12: يعني انت مش مهتم ؟[12:05]
anaga3aan: مش مهتم و مستغرب العرض الغريب دة[12:06]
nadan12: اوكي شكرا لك وشكرا على وقتك[12:06]
nadan12: [12:06] nadan12: باي [12:06]
anaga3aan: لا استني [12:06]
anaga3aan: انا عايز افهم حاجة[12:06]
anaga3aan: اية الغرض من حصولكم علي المدونات[12:07]
nadan12: اسفه ما بقدر اجاوبك على السؤال ما دام انت مش واحد من زبائنا [12:07]
nadan12: شكرا على وقتك[12:07] nadan12: باي
والي هنا و انتهي الحوار
حد يقدر يفهمني اية دة
ومين الشخصية دي هل حد اتعرض علية حاجة زي كدة
هي كل مشكلتي ان العرض اللي اتعرض مكنش قد كدة فا لوحد يعرف شركة تشيل
بالعملة الصعبة حتي لو بالجنية الفيومي يدلهم عليا

Wednesday, January 23, 2008

كاس الحلل الافريقة


لم اكن يوما من محبي كرة القدم لعبا او تشجيعا
بل علي النقيض تماما ربما لعقدة مترسبة من الطفولة ايام لعب الكرة الشراب داخل المنزل وتحطيم عدد لا بأس بة ابدا من الفازات و التحف

تكفي لافتتاح متحف صغير و كان ينتهي الامر بعلقة محترمة
للعلم الكرة الشراب هي عبارة عن كرة مصنوعة من مجموعة شرابات و يشترط ان تكون قديمة و ذات رائحة مميزة حتي لا تختلط مع باقي الفرق
او لاني دائما كنت العب كحارس للمرمي و ينتهي الماتش بخناقة اشبة بالحروب الصليبية و كلنا يظن نفسة صلاح الدين محرر القدس
و كانت امي دايما ربنا يديها الصحة تقوم باخفاء الحذاء حتي لا اذهب للعب , ولكن كنت دائما انصح منها فكنت اروح بالشبشب فالامر سيان فانا حارس مرمي .....حتي كانت الطامة الكبر اذ اكتشفت الا مر ذات يوم كانت تظن اني في درس الفرنساوي و كانت هي في طريقها للمنزل و اذ فاجأتا امي في سيارتها وجها لوجة معي و انا حافي مرتديا فانلة حمرا عليها رقم عشرة اتصبب عرقا و طابق في زور احد اللاعبين و انتهي الامر بعلقة ما اخدهاش عبد اسود نط في قصر الحريم في العصر العثماني ...... و منذ ذاك اليوم و قد طلقت الكرة تلاتة ,علي اي حال كنت افضل الباتيناج ابو عجل و الفرجة علي البالية المائي
مرت سنوات عديدة وعام عن عام ازداد نفورا من الكرة المصرية دة احنا شعب من ايام الفراعنة و هو بيلعب كورة


ولم نحرز اي حاجة في اي حتة ويتكون المنتخب من مجموعة مرضي السل و الكساح لا يكاد احدهم يقطع الملعب الا ويقع مقلوب علي قفاة كما البط المستكوفي بعد تزغيطة و مش عارف ياخد نفسة الا ما رحم ربي وواحد ضارب شعرة اربع فرش دوكو انا مش عارف دة مش خايف علي راسة من البارومة ويوم نسمع عن لاعب بيضرب مخدرات و اخريين بيشيشوا وقريبا لاعبين بيضربو كلة


و نعيش حتي الان علي جون احرزة المنتخب من تمنتاشر سنة في كاس العالم ضد هولندا و انتهي الماتش بالتعادل
واصبح اهم من عبور اكتوبر
المهم نهار يوم اصر مجموعة من اصدقائي انهم ياخدوني الاستاد لان النهاردة الماتش النهائي و اللي هايكسب هياخد كام الف جنية و شقة و عروسة لكل لعيب و طقم شرابات اديداس و صاحب هدف الفوز هياخد طقم مشجر من جيل.


مش فاكر ازاي بالظبط تم اقناعي بالذهاب لكن فضولي الشديد في رؤية اللعيبة الذين يلهفون الالفات مقابل بعض الحركات و السباب المتبادل و التنطيطات بكرة جلد كان العامل الدافع لقيامي من قيلولتي اليومية و الذهاب للاستاد

لمن لا يعلم حال الاستاد يوم ماتش نهائي فهو اشبة بحلقات الاسود الرومانية اذا الكل يتصارع علشان يقعد جنب الاسد
كم هائل من البشر و لا يوم الحشر,فاذا كان الاستاد علي سبيل المثال يسع تلاتين الف متفرج فبلا شك الخلق دي لا تقل عن نصف مليون ,شوفت عشر انفار علي كرسي واحد و قد قارب احدهم علي السعار و بداء بعض اثنين من زملائة
و رجل واقف علي دماغ مراتة يحاول خنقها متحججا انة مش شايف .
فاذا كنت حسن الحظ و نالك من الحب جانب عدت الي بيتك بنصف شعرك محلوق و النصف الاقرع مكتوب علية عبارات تشجيع اما اذا كانت امك داعية عليك و كنت بجوار جماعة من هواة حرق الاعلام الاسرائيلية و الامريكية علي سبيل التشجيع و اللهاب الحماسة فانصحك ان تحاول تجنب رجال الامن المركزي المجندين فانهم ينقضوا كانثي الخرتيت المسعورة ناحية المتظاهرين ويفرقوهم بالضرب علي القفا تارة و الشلاليت تارة اخري مع قليل من اللسوعة بالخرزانات علي مناطق اخري ....
فلا فرق لديهم بين انسان و جماد الكل سواء و اياك و الخيالة فالخوف ليس من الراكب بل من المركوب فرفسة الحصان كفيلة بالقضاء علي ثور في اوج نشاطة فمابالك بالغلابة امثالنا
اذكر صديق ذهبنا لزيارتة في المستشفي كان السبب سنتدوتش جبنة بالخس كان في جيبة الخلفي و علي حظة الاسود لمحة الحصان و فضل يجري خلفة مسافة توازي ما بين ماليزياو القاهرة و لم يتركة الا بعد ان قضم الخس و بعض من صديقي.

علي اي حال بداء الماتش و ان كنت لا افهم الحكمة من ان يطارد 22 و عشرين شاب في صحة بغال استراليا قطعة جلد منفوخة
ورجل تبدو علية علامات الاحترام يرتدي شورت و فانلة سوداء و يقوم باخراج اوراق صفراء و حمراء من حين لاخر محاولا اقناع البغال ....عفوا محاولا اقناع اللعيبة باحترامة و ينتهي الامر غالبا بنزع الشورت عنة و زرعة في ارض الملعب كفحل بصل
كلة كوم و تعليقات الناس اللي قاعدين حواليك كوم فاذا اضاع اللاعب هدف فلانة حمار و جدودة بهايم و انة لو كان مكانة كان لازم هايجيب جون , و اذا اضاع تمريرة فذلك يعود لاصابتة بشلل الاطفال و العتة المنغولي الواضح
و انة لو مكانة كان حتما ولابد هايجيب جون فتشعر ان الجالس بجانبك جوزيف بلاتر او عبيدي بيلية علي اقل تقدير وتكاد تنكب علي يدية تقبيلا و بكاءا من الانبهار . انتهي الماتش و كاد الامر يمر علي خير
لولا امر واحد فانا من هواة خلع الاحذية عند الجلوس في مكان لفترات طويلة فاذا انا اتحسس بقدمي اسفل المقعد فلا اجد حذائي المصون.
انا اتنشلت الجزمة اتسرقت صارخا باعلي صوتي و يحاول اصدقائي تهدئتي و ارضائي بكافة الطرق بل ان احدهم عرض علي حذائة لكن للاسف مقاسي اكبر منة و انخرطت في نوبة بكاء علي حذائي الفقيد و ظن البعض اني عيل تائة فرق قلب احد المارة و قام باعطائي شبشب من ماركة ابو وردة علي سبيل القرض وعدت الي بيتي لاعنا الكورة و لاعنا ابو خاش اصدقائي حالما بالجلوس امام التلفزيون لمشاهدة تصفيات البالية المائي ...
لا اراكم الله مكروة في عزيز.

Saturday, January 12, 2008

انا جيت

السلام علي من اتبع الهدي و البلغة لكل من سار خلف الهوي
جايز و حشتكو و جايز كسرتو ورايا عربية قلل قناوي
لكن الاكيد اني افتقدكم كثيرا يارفقاء التدوين
و كنت كل شوية اشقر عليكو و اتفرج الحال وصل بيكو لاية
يعني كنت مراقب كل نفس داخل و اي غازات خارجة من االمدونات ... انتو بتتعاملو مع اذكي جهاز مخابرات في شرق التفريعة

الفترة المنصرمة بما فيها اجازة العيد كنت مقضيها في مصر

وبدأ من محلات الاكل بجميع انواعها و اشكالها مرورا بالسينمات و القهاوي البلدي و العجمي

وكل ما يخطر علي بال احدكم في مصر زرتة و اخدت جرعة لا بأس بها تكفيني لعدة اشهر
وخصوصا من الفول و الطعمية المصري التي لا تقارن في اي دولة اخري بدأ من زيت العربيات ونهاية بعجينة السوس و الدود

فقد نزلت ضيفا علي احد المطاعم الشهير بالفول و الطعمية بالقاهرة ( مش هاقدر اقول اسم المحل علشان الدعاية و الضرايب و التموين و حقوق الانسان)
و كان شكل الاطباق الفاضية ان في علي الاقل قدرتين فول و عشرين كيلو عجينة طعمية تم استهلاكهم من قبلي انا و اصدقائي
اعتقد ان صاحب المحل اضطر انة يرمي بعض اقراص الطعمية خارج المحل لكي يستدرجنا بالخروج و ترك المكان

لاحظت حاجة غريبة المرة دي في الاجازة
انتشار الشحاتين في مصر بدرجة خيالية لم اعهدها من قبل في المحروسة
وفي جميع الاماكن بلا تمييز راقية او شعبية حسب التمييز العنصري
فاذا دخلت بسيارتك في طريق القطامية المتجة للقاهرة الجديدة و التجمع الخامس و مرتفعات القطامية
اللي مبيسكنش فيها غير الكائنات الفضائية القادرة علي دفع زليار جنية في الفيلا
تجد الشحاتين و بعض الاطفال العرايا و السعادة تطل من اعينهم ظنا منهم ان القيامة قامت و ربنا باعتلهم ما يعوضهم عن ما عانوة من فقر و يتعلق الشحاتين بالسيارات و يقفز الاطفال العرايا فوق الاسقف كل ماسكا عورتة و هو في غاية السعادة و البعض يقوم بالتبول في فتحات السقف الموجودة في السيارات ظنا منهم انها لا مؤاخذة تواليت افرنجي
ربنا يرحم عبيدة

ثانيا دلوقت لما تدخل اي مول او هايبر ماركت انت بتمشي بقوة الدفع
يعني تلاقي طابور وراك عمال يزق في اللي خلفوك بلا اي مبرر الا من باب التسلية
و ان اي حد يكلمك بدون سابق معرفة تاكد ان الحديث هاينتهي بدفعك عدة جنيهات
في المطار و انا بعدي الشنط في الاكس راي الامين اللي واقف عند الجهاز عمال يقولي كل سنة و انت طيب يا استاذ
اقولة و انت طيب يا اخويا

يروح عايد نفس الجملة كل سنة و انت طيب
واستمر الامر عدة مرات لحد ما زغرتلة وقولتلة هو النهاردة عيد ميلادي و انا معرفش و لا اية
طبعا اول حاجة عملتها لما روحت البيت قريت اكتر من 30 جرنال و 20 مجلة مرة واحدة
محاولا اللحاق بما فاتني في ام الدنيا
اكتشفت ان المواضيع هي هي كل اللي بيفرق ان اللي بيقولوها ناس مختلفة كل مرة
وطبعا غلاء الاسعار اللي استفحش
والاكل و المية اللي طعمهم زي عصير السردين الحامض
وسحابة الدخان بتاعة كل سنة بجد وحشتني اوي
و انتهت اجازتي بنزلة برد حادة خلتني الف حوالين نفسي واربعت كم من الادوية و المضادات الحيوية
اعتقد يعاقب عليها القانون

علي اي حال انا رجعت اهو و قريبا ادون و اصدعكو معايا من تاني
وسمعني السلام الجمهوري
اقف ياض منك لة