Monday, February 11, 2008

مبروك علينا الحلة

وكعادة الشعب المصري الطيب يستني اي مولد علشان يركب المراجيح و الحلزونة و يتشقلب في الهوا
و المولد المرة دي هو الحصول علي كأس افريقيا
امتع اللحظات تقضيها في شوارع مصر هي اوقات المتشات سواء في النهائي او اي بطولة
فتعود مصر الي زمن عماد حمدي و اسماعيل ياسين
الشوارع فاضية و العصافير بتزقزق في الخلفية و حاجة اخر انسجام
بعد الماتش سواء كسبنا او خسرنا
تجد البلد و حالها انقلب
اتحدث هنا عن المناطق القريبة من سكني سواء مصر الجديدة شارع النزهة و الكربة و العروبة
او مدينة نصر عباس العقاد و مكرم عبيد
علي حظي الاسود من سنتين اخذت عنوة للفرجة علي الماتش في احدي القهاوي
وكان الطعم لاستدراجي هي الشيشة و المشروبات الروحية كالسحلب و القرفة و العناب

وكان برضة الكاس بتاع افريقيا
ولا اعلم كيف انتهي بي الموقف واقف في شارع النزهة لمدة 3 ساعات مش عارف اروح
و أمم بقي واقفة في الشارع نسوان ورجالة
اعداد مهولة اقطع دراعي ان اللي كانو في 73 اقل من العدد دة
وناس ماسكة علب بيرسول وتولع فيها نار
وصواريخ بتطوح وشباشب بتطير
وتم ايقاف مترو النزهة و اخذ السائق رهينة
انا فاكر اليوم دة كان معايا 9 انفار من اصحابي رجعنا 3 بس
واحد منهم شوفتة صدفة داخل بيتهم لابس فانلة داخلية بحمالة واحدة
وامس يتكرر نفس السيناريو
يخرج الشعب المصري كمجاذيب السيدة
منكوش مكفهر مترب وحالتة نيلة معهوش تمن تذكرة مترو الانفاق
يرقص في الشوارع ويقبلون بعضهم البعض و الفرحة تبظ من اعينهم
كما لو ان هايتوزع علي كل مواطن مليون جنية
و الفلسطنيين في طريقهم للانقراض و محدش هيلاقيهم غير في السوق السودا
جتنا ستين نيلة فينا و في عبطنا
شعب مش لاقي حاجة يعملها ولعيبة تسجد للة شكرا علي احراز الهدف

وقريبا سنسمع عن رحلات حج و عمرة لاجل الحصول علي كاس السوبر
احد الحجاج متعلق باستار الكعبة داعيا يا رب الدوري ياخدة الزمالك السنة دي " دي حقيقة مش نكتة"
وتكون ادعية الاستخارة الخاصة بالمدير الفني
يا رب نلعب بطريقة 4-2-4
ولا 2-4-4-

المهم هانعمل اية لا حياة لمن تنادي يا اخوانا الرياضة لعب مش فرجة
لكن العلم في الكبر كالضرب في البقر
اتمني تكون الحلة جت علي مقاسكو












من مدونة جبهة التهيس الشعبية صورة لاهل فلسطين يقبلون صورةلابو تريكة

32 comments:

  1. هو احسن حاجة بتحصل ساعة الماتشلت ماتكون شغالة بتلاقي الشوارع فاااااااااااضية وراااايقة خالص
    لكن دة الهدوء اللي بيسبق العاصفة لانها بعده بتبقى اعوذو بالله
    يا ريت البني ادميين كمان يهتموا بقضايا دينهم وبلادهم اد الاهتمام بالكورة ولكن لا انكر ان فيه برضه ناس نحسبهم على خير
    بوست رائع كالعادة
    دمت بخير

    ReplyDelete
  2. السلام عليكم ورحمة الله وبركاته

    الف الف مبروك علي الحله وكمان خدنا الغطا بونص

    يا عم اسلام سيبهم يفرحولهم شويه قبل مايفوقوا ويرجعوا تاني للهم اللي هما عايشين فيه

    ReplyDelete
  3. يا استاذ اسلام
    انت زعلان انهم فرحانين
    طب احسب معايا احنا فرحنا كام مره من 2006
    مرتين
    مره لما المنتخب خد الكاس
    ومره لما الاهلى خد 3 العالم
    يعنى الفرح عاد كل عشرتاشر شهر
    ما انا فرحان انا كمان
    ونزلت اتفرج على الناس فى الشوارع
    والناس كانت مترصصه فى البلكونات بتتفرج عليهم وبيصوروا ويسقفوا
    كله عايز يفرح
    عارف الاعلان بتاع كوكاكولا
    "اللى مالهومش فيها بيشجعوا المنتخب واحنا معاهم"
    أهو كده بالظبط
    انا مارقصتش ومارجعتش بفلنه حماله واحده
    وده لأنى انسحبت بدرى من الحمله دى
    بس لو اتاخد منى قميص ولا تشيرت مقابل انى افرح
    يا سلام ده كده الفرح ببلاش
    الشعب عايز يتنطط ويفرح بأى حاجه
    ده شعب غلبان

    بس بعد ده كله لما يسمع الرقم اللى خدوه اللاعبين من التبرعات
    وهو بالمناسبه 10 مليون ورحلة حج
    هينتحروا لأن المبلغ ده مش بيتجمع من فلوس زكاة مصر كلها
    فخليهم يفرحوا قبل الانتحار
    والعاقبه عندكم فى المسرات

    ReplyDelete
  4. الشعب الفلسطينى هينقرض و احنا ماما و بابا الى المفرض يشيلوا همهم العمر كله؟؟ طب ما يحترموا نفسهم و يبطلوا قتل فى بعض الاول .. و هو الشعب المصرى لقى حاجة تانية تفرح و مفرحش و مازقططش؟؟ اهى حاجه و فلحنا فيها عقبال الباقى

    ايه ده هو انا بزق ليه كده .. لا موآخذه يا جعان باشا اصل عندى حساسيه من موضوع فلسطين الى بلازمة و من غيلا لازمة حاشر نفسه فى وسط كلامنا

    ReplyDelete
  5. باحاول افهم انت ليه مش قادر تحس بالفرح ونشوة الانتصار
    يعني هل أنت تحتقر الرياضة في حد ذاتها
    وللا تحتقرها بالمقارنة بغيرها من مجالات الحياة كالعلم والبتنجان
    وللا انت شايف سلوك همجي أثناء الفرح رغم اني ماسمعتش تحرشات ولا حاجة
    كل العوانس رجعوا بيؤكدوا دة
    وللا انت مانع الفرحة تدخل المدونة
    وللا يمكن علشان انت جعان
    وزي ما قال مصطفي حسين الجوعان لا يمكنه إدراك الحب
    بس ما قالش الفرح
    المهم حاول تفرح قبل ما يبقي الفرح بفلوس
    خدها نصيحة

    ReplyDelete
  6. This comment has been removed by the author.

    ReplyDelete
  7. الفرحة غاليه يا استاذ اسلام
    وكلنا نفسنا فى فرحه ولو بسيطه من كتر الكبت اللى عند الناس
    ولو تلاحظ ان الشعب اتجمع بدون اى تطرف او فرق بين ولد وبنت كبير وصغير مسلم او مسيحى كل الطوائف اتجمعت وبنعيب عليهم عدم تجمعهم فى حاجه اهم زى ما حضرتك قلت عارف ليه
    عشان حاجه واحده بس
    الخوف
    ايوه الكوره الحاجه الوحيده اللى هيتجمهروا فيها ويعبروا عن ارائهم بدون خوف او كرابيج او معتقلات وراهم
    عشان كده من حقنا نفرح ونفرح اووووووى كمان
    قبل ما الفرحه تغلى
    انا عملت محشى فى الحلة يستاهل بوقك تعالى خد طبق :))

    ReplyDelete
  8. فى الحقيقه دى اول مرة ابعتلك لكن بستقبل رسايل من المدونه بتاعتك على الايميل بتاعى من اكتر من 6 شهور بالنسبه لموضوع وصلنى بيتكلم على انك تبيع البلوجر بتاعتك ممكن اعرف ليه ومين اللى هيشترى بلوجر يعنى؟اما بالنسبه لموضوع الكورة دة فأنا شايفه اننا مخترعناش قمر صناعى يعنى امال ايران تعمل ايه والا حتى اسرائيل؟والا هى قله عقل وخلاص بصراحه انا زهقت جدا من الموضوع دة وبتمنى ان يخف الكلام عنه شويه بقى على فكرة تنسيق المدونه بتاعتك رائع وكل بطوله وانت طيب

    ReplyDelete
  9. دي ظاهرة عالمية على فكرة يا استاذ جعان. يعني كل بلاد العالم عندهم جنان بالرياضة اذا كان الامريكان فوتبول او الكريكت او الباسكت او او فدة لا يعني ان الشعب المصري متخلف لكن دي ظاهرة انسانية
    بس كدة

    ReplyDelete
  10. زى ما الكل قال
    ياعمونا احنا بنفرح كل عشترتاشر شهر
    ان بحق وان بباطل
    سبيونا نفرح
    بيب بيب حضرى بيب يب بيب حضرى

    ReplyDelete
  11. أعتقد إن فرحة الشعب المصرى بالكرة مش معناها إن الشعب هايف و لا إن قضاياه خلصت معناه بمنتهى البساطة إن الشعب معندوش حاجة تفرحه غير الكرة . إن مافيش حاجة تخليهم يحبوا مصر غير كأس أفريقيا .
    براحة شوية على الشعب المصرى . ده غلبان . و المصريين مش بيفتكروا إنهم بيحبوا البلد دى غير لما يلاقوا حاجة لها طعم .
    واحدة واحدة

    ReplyDelete
  12. سيعلم القوم حين تنهار البلد اقتصاديا بعد قليل وتنفجر أزمة الأسعار ويجوعون ولا يجدون البيروسول لقتل الذباب والناموس
    سيعلمون ما أهدروا
    وسيعلمون حينها كيف يعيش هؤلاء اللاعبون في رغد العيش بينما ينطحن العاملون اللاهثن خلف لقمة العيش
    وسيعلمون أن من بكى أمس حزنا على شعبه وطني أكثر ممن حمل العلم وهتف باسم مصر

    شكرا لك أخي على كلماتك

    ReplyDelete
  13. يا جعان باشا الكوره هي المتنفس الويحد في مصر و الدليل إنها هي اللي خرجتني من أحزاني و الالامي و رجعتني من تاني للتدويم و للاندماج في الحياهو أرجوك لا تندهش من ذلك لان كلامي ده مش حيحس بيه غير زاحد ممكن يكون محروم من الفرحه
    تحياتي

    ReplyDelete
  14. Enta akid sa7, but as all commented here said, e7na me7tagin nefra7, we 3andena kabt gamed gedan..men zaman ma benfr7sh..f zell el3'ala we el7ala eldank elly elbalad fiha...a7'iran la2ena 7aga negtem3 3aliha ma3a ba3d.
    Amma law fih qella 3'abya we 3'er mo7tarama heya elsabab f elfawda elly bet7sal aw elta7'rib ba3d kol match...fdah mawdo3 kebir yetol shar7o...le2en mogtam3na classes...fo2ra, a3'nya, educated, gahala, ansaf mot3lmin, 3ial hayafa...shabab mesh metraby.. nas day3a...dah 3'er elly dareb sogara keda walla keda...law kol dol nezlo elshare3 f wa2t wa7ed...akid 7atshof el3agb...walla ehhh ??
    Ehda bas enta keda we rawa2..we efra7 lak showya 2abl ma ye7'las.

    Salamat...
    Toblerone007

    sorry for writing arabic in english my keyboard is not arabic.

    ReplyDelete
  15. الف مبروك على الحلة ياجعان باشا
    انا اول مرة اجى المدونة واول مرة الاقى حد زعلان ان الشعب فرحان عشان خدنا كاس افريقيا انت اكيد فى كلام كتير صح من كلامك وان احنا يمكن بنهتم بالكورة زيادة عن اللزوم بس ماهى دى الحاجة الوحيدة اللى فالحين فيها ده احنا حتى مش فالحين اوى يعنى
    سيب الشعب يعيش ويفرح كاس افريقيا مش كاس افريقيا المهم بينزلو فى الشارع يخرجوا الكبت اللى جواهم
    اما اخوانا فى فلسطين فربنا معاهم دول محتاجين معجزة الهية من عند ربنا وبعدين برضه ابو تريكة مانسهمش يعنى هما لو كانوا مكاننا مش كانوا هيفرحوا برضه
    اللى غايظنى بجد التبرعات اللى خدوها ملايييين والشعب الفرحان معهوش فى جيبه اللى يكمل لاخر الشهر
    تحياتى ليك ياجعان باشا وزقطط كده ولا يهمك

    ReplyDelete
  16. اااااااااااااااااه
    اااااهههه دا الواحد عيش وسط حبه........... ايه ده هو ده بقي اللي هيرفع اسم مصر المخروبة مثلكوا الاعلي
    ابو تريكة
    يا دي الوكسة امة لا اله الا الله بترقص في الشارع
    طب مطلعتوش ليه بنفس اللمة علي كوبري القبة ومصر الجديدة وهرستوا اهل كفر المصيلحة المنايفة الكرام فين
    والله ماليكوا غير محمد سعد يبقي ريس

    ReplyDelete
  17. اقول حاجة كمان انتهي عصر الاقلام وابتدا عصر الاقدام بللللللللللا وكسسسسسسة

    ReplyDelete
  18. اقول و انا كلى خجل انا فرحت بالحله بصراحه
    تفتكر ليه

    ReplyDelete
  19. ههههههههه
    والله صحيح..ماحدش يعترض على الفرحة وبالذات اننا محرومين فرحة بقالنا سنين..والناس مابتصدق اي حاجة تفرحها حتى لو ماتش
    لكن فعلا الاعتراض على العجايب الى بتحصل
    عندنا الناس نامت في الشوارع الرئيسية بعرض الشارع علشان تمنع مرور اي عربية
    طيب ليه كدا ياجدعان هي العربيات دي من الكاميرون ولا كوتديفوار؟

    ReplyDelete
  20. الموضوع له وجهتان
    الوجه الاول الناس هنا مكبوته وطالع عينها وكل يوم من عكننه لعكننه
    تفتح اخبار و لا تقرا جرايد ولا تمشي في الشارع ولا تنزل تشتري حاجه تلاقي كل حاجه مقرفه وغاليه وصعبه
    الزراعه باظت و التجاره باظت و السياسه باظت
    فكله بايظ
    ودي الحاجه الوحيده اللي لقوا فيها نسمة حريه وامل
    الحكومه عاطيه الشعب الحريه انه يكلم في الكوره
    ويناقش في الكوره
    ويتظاهر في الكوره
    ويعمل احزاب في الكوره
    ويشيل مسؤلين في الكوره
    ويسجن مسؤولين في الكوره
    يعني من الاخر الشعب المصري يمارس السياسيه كاكمل ما تكون بس في الكوره
    اكتر من كده بالجزمه
    عشان كده فيه تفريغ لمظاهر كتير قوي في الكوره
    الوجه الاخر ميختلفش كتير عن الوجه الاولاني
    على قد ما كنت فرحان على قد ما كان شكل الناس مثير جدا
    مثير جدا للشفقه
    ان شعب عنده القوه و الاتحاد دا و حاله نيله كده

    ReplyDelete
  21. لااااااااااااا لااااااااااا بجد زعلانه منك خلاص
    هو اه انا اتزنقت فى عباس العقاد ساعه المرة دى علشان اتحرك بس من اوله لغايه كشرى التحرير بس والله انا كنت مبسوطه وبعدين ايه الناس اللى بتستكر الفرحه دى دا انت طلعت قلبك اسود اوى يا راجل حرام عليك
    اما بقى بخصوص غزة فبصراحه انا ليه واحد صديق هو واسرته فلسطينى وكان امبارح بيكلمنى يبارك ليه على النت وسالته الحال عامل ايه وهو على فكرة فى غزة وعنده فندق هناك قالى ان كل حاجه زى الفل ده بيقولى لما تتجوزى تعالى اعملى فرحك عندنا شوفت التفاؤل بس فى النهايه ربنا معاهم

    ReplyDelete
  22. لا حول ولا قوه الا بالله حتي في ده جعان

    عموما مبروك علي الحله وعقبال الطاسه قريب ان شاء الله وهتكون متعبيه كوسه كمان

    الناس تعبت من الضغط اللي عليهم وكانوا مستنين فرحه بجد تلمهم كلهم ينسوا بيها همهم .... الفرحه اللي شفنها ده عدوي بس جميله فيرس اصاب الناس وياريتهم مش يخفوا منه

    والله شعبنا اغلب من الغلب سيبهم يفرحوا مره وينسوا

    وانا فعلا اول الفرحانين مع اني عمري ماحبيت الكوره

    لكن لعبتهم حببتني فيها

    كفايه السمت الاسلامي والعربي والاخلاقي اللي لعبوا بيه

    الف مبروك علي الكاس ...... قصدي الحله :)

    ReplyDelete
  23. السلام عليكم

    الشعب تعبان، وعايز يحس انه مبسوط
    الشعب منهزم، وعايز يحس انه منتصر
    الشعب لا منتمي، وعايز يحس انه منتمي لحاجة
    الشعب متفرق، وعايز يحس انه متحد

    فمبروك لمصر

    ReplyDelete
  24. اعذروني انا مش هاقدر ارد علي كل الناس
    لان ردي هايكون واحد في حالة الناس المتهماني اني عديم الفرحة
    وعندي تخلف كروي

    عارفين تخيلو كدة ان عندك ابن صغير
    و استلم شهادة اخر السنة
    ساقط في كل المواد عربي انجليزي تاريخ دين
    كلة كلة
    لكن واخد بطولة فرق المدارس لكرة القدم
    هل يا تري موقفك كاب او ام
    هاتنزل زغاريط وفرحة بالعيل الاهبل
    اللي فاشل في كل حاجة ومش نافع غير في لعب الكورة
    وياريت علي المستوي العالمي
    هو اخرة كام فرقة من بتوع افريقيا

    لما يكون بلدنا كل حاجة فيها بايظة
    وليس المجال لذكرها الان

    وعلشان ماتش كورة ملايين عمالة تتنطط وفرحانة كفرحة المطاهر

    يبقي اسمحولي احنا شعب بريالة

    ReplyDelete
  25. بص
    انا غيرت الكومنت ده مرتين
    المره الاولانيه كنت هاهاجمك علشان تسيب الناس تفرح
    المره التانيه كنت هاقولك سيب الناس تفرح علشان ينشطوا فى باقى المجالات

    بس ده الكومنت اللى انا استقريت عليه
    عارف ليه لأنى افتكرت موضوع حصل ليا
    وكنت كتبته عندى
    وده مش دعايه للبلوج بتاعتى لأنها اصلاً مش بلوج دى تنفيسه
    المقال أهو
    http://5alekwake3y.blogspot.com/2007/06/blog-post_04.html
    كبيره وخدوه اقراه

    وفى النهايه هتثبت على نظريتك اننا شعب فاضى

    ReplyDelete
  26. حلو اوي رأيك يا جعان

    بس على فكرة انا كنت هاختلف معاك اذا كانت الحلة اللي كسبناها (حلة سبانخ)

    لاني باحب السبانخ
    ههههههههههههههههههههههه

    خلاص يا فندم ...سوري نسيت انك بتكره السبانخ ومش عاوز تشوف اسمها في المدونة عندك

    حبيت اشاكس معاك شوية


    مش هاتكتب لنا حاجة تانية جديدة عن الاخ (فالنتين) بس غير موضوعك الاولاني

    ما تكررش يا فندم موضوع

    هاتابع في وقت الفرااخ ...قصدي الفراغ البوست الجاي ...

    take care and have a nice time

    ReplyDelete
  27. لا تفرق حلة مدهبة

    وبعدين اهي حاجة اتلكننا بيها عشان نفرح شوية يلا مصر مصر اتصور انا لولا الكورة كنت هاانسى الكلمة دي

    الا صحيح انت معرفتش انهم لمو 10مليون لحد دلوقتي
    والعروض نازله عليهم ترف الحضري بتاع البطيخ جالوه عرض 15 مليون بالعملة الصعبة ؟؟
    عشان تعرف لو كنت كملت لعب كورة مكنتش هتبقى جعان

    ReplyDelete
  28. يا عم صلى على النبى
    احنا عملنا اللى علينا و جيبنا الكاس من عندهم
    سافرنا بيه و رجع معانا
    كويس ان احنا قدرنا على حاجه
    صلى على النبى يا راجل
    اهو احسن من مايبقى مفيش خالص

    ReplyDelete
  29. يا سيدى خلى الشعب يعيش
    اما بنصدق نفرح...بس الى يضحك انك تلاقى حد مش لاقى ياكل ورايح يشترى علب بيرسول او صورايخ عشان يفرقعها احتفالا بالمناسبة هههههه
    والله احنا شعب عاطفى اوى اوى جتنا خيبة فى طيبة قلوبنا
    عارف الى غاظنى اوى هوا ان دبى احتفلت بالمنتخب قبل مصر ده اذا كانت مصر بتفكر تعملهم احتفال ولا حاجة
    احنا كده فضايح فى اى مناسبة ...
    =======
    امووووووووت واعرف العلب الى خدوها اعضاء المنتخب من احتفال دبى كانت فيها ايه؟ ممكن تكون علب حلاوة مولد النبى

    ReplyDelete
  30. Osama
    والله البطوله دى كان ليها روح تانيه وكان فيها امثله وقدوه ودروس مستفاده كتير والموضوع مكنش كووره بس له خلفيات كتيره يارب نكون استفادنا منها ونقدر نستغل الايجابيات فى حاجات تانيه

    خللى الناس تعيش ياعم اسلام

    ReplyDelete
  31. ايه يا جعان مالك؟
    انا معاك يا سيدي ان الناس زودوها في تعبيرهم عن الفرحة تلت شويات ونص
    بس منتظر ايه من ناس عندهم فشل صميم مقيم في كل حاجة..وإذ فجأتن تنبثق الأرض عن نصر فوز..في اي حاجه مش مهم
    الحمد لله اخيرااا فلحنا..دا لسان حالهم الي بيقول..صلي عالنبي في قلبك كدا وابعت برقية تهنئة لاستاذ جمال واستاذ علاء..اصل عقبال عندك كدا كانو هما السبب في النصر
    سلامي

    ReplyDelete
  32. السلام عليكم ورحمة الله وبركاته
    ازيك يا جعان
    بجد كتاباتك جميلة جدا
    ياريت لو تشاركنا بيها في المدونات المرشحة للنشر في كتاب مدونات مصرية للجيب
    ادخل على اللينكات دي عشان تلاقي الشروط المطلوبة وتبعت على الايميل التالي dwen_fun@yahoo.com
    لقراءة شروط الاشتراك من هنا
    http://www.facebook.com/group.php?gid=13820826455
    أو ده
    http://sneen.blogspot.com/

    ReplyDelete

بعبع وقول اللي في نفسك يا خويا