Monday, March 03, 2008

اوبريت البربور العربي

منذ عدة اعوام اتحفونا بالاغنية الشهيرة الحلم العربي بتاعة اجيال ورا اجيال
وسحسح الوطن العربي من المحيط للخليج وشق الصدور و هال الرمال علي راسة
وبربرت الشعوب كما لم تبربر من قبل
الظريف بقي ان في اغنية الضمير العربي واضح ان المنتج و المخرج للجزء الاول
أحمد العريان وجد ان مفيش فايدة
فقامو في الضمير العربي بغناء الاتي
"ماتت قلوب الناس ماتت فينا النخوة، يمكن نسينا في يوم إن العرب أخوة، مات الإحساس جوانا ولا قلوبنا مليانة بالحقد والإحساس"
يعني من الاخر سبو الاخضريين للشعوب
حقيقي دائما ما شغلني الهدف من الاغاني الوطنية ذات الانتاج الضخم و المكلف
ساعات بحس انها سبوبة او المنتج مزنوق في جمعية او العيال علي وش المدارس
فا يقوم لامم مغنيين مصريين علي خلايجة علي مغاربة و توانسة و يبقي انتاج مشترك
و اهو المليان يكب علي الفاضي
و شيللي كليب اشيلك اوبريت
وطبعا الاوبريت دة هايلف علي الدول العربية كالغجر في الموالد و الترحال علي النجوع و الكفور
وغازية تزن نص طن ترقص بانشكاح امام الفرقة علي امل ان يجود عليها احدهم بجنية احمر سخن كالرغيف او يديها رغيف
فلا مانع من ان يرعاة الملك الفلاني و يجود علي الفرقة بما يخرج من ذمتة
او الرئيس العلاني يصطحب المدام و الانجال في مسرح الرئاسة للفرجة علي فرقة المولد العربي
و لا مانع من اهداء الفرقة و الغازية درع الدولة ومفتاح العاصمة ودورة مية ان امكن
و الملفت الدعاية للاوبريت علي القنوات الغنائية و كل يعلن ان الاوبريت سيعرض حصريا لدية
وتسابقت المنتديات و المواقع علي وضع وصلات لتحميل الاوبريت
كما لو انه دواء لشفاء الجرب و البرص و سلس البول
و الكل يتسابق للحصول علي بركات الاوبريت

الجميل بقي ايمان البعض بان الدول ستحرر بالاوبريتات و المسلوب سوف يعود بالكليبات
واقترح في حالة نجاح التجربة و تحرير القدس و لبنان و العراق
تعميمها وتحرير السنبلاوين و مغاغة و دوران شبرا و محطة مترو روض الفرج
فبربرو يا عرب كما شئتم فلن تحرر الاراضي بالريالة و النواح و اغاني الموالد

الله يرحمك يا بيرم لما قلت
و حمار يغني, وجايب من يقول له آه
حالاً تقول الخلايق كلها ويّاه

68 comments:

  1. السلام عليكم

    أخويا الكبير .. جعان

    شوف يا سيدي ..
    شعب غلبان .. وريس فجعان
    لازم الشعب ينام ..
    عشان ما يفتحش عينه على الجرايم
    لازم نكبسه .. لازم تحبسه

    بس لو زاد الضغط ينفجر فيك يا ظالم ..
    يبقى نفس عنه بحاجة عبيطة .. تحسسه انه ليه راي .. تحسسه انه صاحب فعل

    ورجعه بعدها تاني في محبسه

    وتخليه في اللوب دي ..

    وكل شوية تطلع له .. ببربور جديد

    :)

    ReplyDelete
  2. بجد نفس من مدونتك هنا تتبنى فكرة اننا نقاطع الحكام نفسهم وكل الشعوب الاسلاميه تعتصم وتتوقف عن العمل ليجبروا الحكام على فعل اى شئ مش معقوله اللى بيحصلنا دة والحكام نايمين فى العسل
    خلاص كل الحلول فشلت لازم نقاطع حكمنا هو دة اللى فاضلنا

    ReplyDelete
  3. ازيك يا جعان؟اخباراتك؟

    بجد هو دا الي احنا فالحين فيه
    نصرف على اغاني لا تودي ولا تجيب
    وسايبين الي بيحصل في الناس في فلسطين
    حاسه ان هزيمتنا بقت اكبر من اي هزيمة اتعرضنا ليها من اول التاريخ لاخره
    ويطلع مبارك ابن ال...(مقص الرقابة)
    يقول السادات قالهم
    هو دا وقت شماته؟؟؟؟؟
    حسبنا الله ونعم الوكيل

    ReplyDelete
  4. فكرتني بالمثل
    القائل
    كل برغوت على أد بربوره

    ReplyDelete
  5. واضح أننا كشعوب غربيه معندناش غير الغناء اللي عاده بنكون بنغني علي روحنا فيه و ده من أيام عبد الناصر حتي الان
    الله يرحمك يا بيرم
    و يرحم اللي قال
    إن خسرنا الحرب فلا غرابه لاننا ندخلها بكل ما يملك العربي من خطابه.... بالعنتريات التي ما قتلت ذبابه...ندخلها بمنطق الطبله و الربابه
    مش ده كان نزار برضه
    :)
    بقولك أنت صحيح ناوي تقاطع مدونتي عشان اللون و صحيح عاوز اللون بمبي مسخسخ
    في إنتظار الاجابه لاني حتي الان مش عاوز أديها أي لون الا لما أتأكد من موقفك
    تحياتي

    ReplyDelete
  6. السلام عليكم
    استاذ جعان


    تصدق انا كنت نسيت البتاع ده

    هو لسه حد فاكره


    اول ماعملوه كنت عماله اعيط
    اعيط اعيط واسحسح زي ماحضرتك قولت

    منا كنت صغيره بقي
    :))

    بس كبرنا وعرفنا وفهمنا
    ومبقناش نرضي بالاخبار اللي بس هما عايزين يوصلوهالنا

    اقرا اي جريده محليه

    وقد تم افتتتاح

    انجازات السيد........... ومن ده بقي كتييير


    يحسسك ان الدنيا عمرانه واحنا اللي خرباننيين




    لنا الله
    فعلا كما تفضلت لن تتحرر اراضينا بالنواح والعويل والحاجات دي



    حسبنا الله ونعم الوكيل

    علي فكره رفقه رايها حلو والله :))

    ReplyDelete
  7. الديب
    حبيبي اولا مبروك علي الخطوبة و عقبال القفص
    ويرزقك الله الزرية الصالحة

    و اية الشعر دة يا ابو طارق
    دة انت راجل متعدد المواهب
    لا انا بهزر خليك في البرمجة

    ReplyDelete
  8. رفقة عمر
    طب اهدي كدة و صلي علي النبي
    لما كلنا نتوقف عن العمل تخيل حالنا
    اذا كان احنا دلوقتي تلات اربع الناس عاطلة تخيلي لما كلة يبطل بقي
    يعني لا طب ولا علاج ولا كنتاكي ولا ماك
    احنا كدة هانقطع خلفنا

    ReplyDelete
  9. كتكوتة
    يا فندم منورانا
    انا كويس لازلت علي قيد الحياة
    شوفي الوقت اللي احنا في دة
    محتاج واحدة معددة من ترب الغفير
    تلطم علي وشها ببرطوشة
    تنعي حال العرب

    ReplyDelete
  10. عصفور المدينة
    يا استاذنا
    الخوف اننا غرقنا في برابيرنا

    ReplyDelete
  11. micheal
    مظبوط يا باشا نزار قباني

    بالنسبة للون
    شوف يا كوتش
    ادخل علي البلوج سبوت نفسة و اختار اي قالب من بتوعهم
    و انا ابقي اعملك البانر علي حسابي
    ارحم عزيز قوم ذل

    ReplyDelete
  12. عاشقه الفردوس
    اصل خلي بالك العرب ستات ورجالة يموتو في النكد
    ومصمصة الشفايف و الشيشة في ايدهم
    ربنا يتوب علي الجميع

    ReplyDelete
  13. مش عيب كلامك زى كلامه هو بيخاف على وطنه وما بايده شىء الا الغنى والكلام الجميل زى ما انت مدونتك عشان بلدك وعشان اهلك وناسك ؟

    ReplyDelete
  14. معلش يا باشا...دوشتك
    ممكن تشرحلي التفصيل اعمل ايه بالضبط في موضوع اللون
    :)
    تحياتي

    ReplyDelete
  15. مش عارف انا من سعداء الحظ ولا لا اني ماسمعتش الاغنية دي

    بس شكلها ولا الطراوة
    مش هتأثر خالص

    انا فاكر انه في المدرسة كنا بنتفرج على الحلم العربي عشان نربي فينا روح الوحدة

    تحياتي
    ادم

    ReplyDelete
  16. السلام عليم ورحمة الله وبركاته

    رزق الهبل

    ReplyDelete
  17. بدل ما العرب يعملوا شئ مفيد ويقفوا موقف مشرف أو علي الاقل يسيبوا الناس العادية تعمل ... بدل كده تلاقي في كل مجزرة الاستديوهات فتحت أبوابها لعمل أغنية المجزرة الجديدة

    ولا حول ولا قوة الا بالله

    ReplyDelete
  18. طيب مهى ليها تأثيرها اهوه
    يبقى ازاى معملوهاش ازاى يعنى
    عيب عليهم
    سبوبه و جت من عند ربنا
    بس و اللهى ساعات الاغانى دى بتحرك فيا المشاعر الوطنيه
    و هى واحدة بس
    اغنيه فيروز بتاعه القدس
    بس
    و دمـــــــــــــــــــتم

    ReplyDelete
  19. معاك حق
    بس أنا أول مرة اسمع على الأوبريت ده منك
    أصل أنا ما بأشوفش قنوات للأغاني خالص
    أهي سبوبة زي ما إنت قولت

    ReplyDelete
  20. جزاك الله خيرا على هذا البوست الحقيقة كنت مضايق ومخنوق وما أخرجني من هذا الشعور غير قرأت (اوبريت البربور العربي) ولقد أتصلت بأخ مصري لأعرف معنى بربور .... عموما ضحكت بمراره ولكن على الأقل ضحكت . لقد قرأت مره تعليق عن كتابات محمود السعدني أن كتاباته بطعم الملح والسكر . وأظن أنك عندك نفس القدرة على خلط الملح بالسكر

    ReplyDelete
  21. ههههههههههههه
    البوست جده حلو اوى
    وصدق بيرم

    والنبى تبعتهم يحرروا المنصورة
    بالمرة

    ReplyDelete
  22. صباح الهنا يا سمسم
    فى مثل شعبي بيقول..
    ياللي ابوك مات من الجوع
    ..قاله..هو لقى ياكل ..
    و ما كلش..؟؟؟
    يعنى ما متش من البخل..
    ده قصر ديل يا أزعر
    و بما أن الدموع و ملحاقتها بلاش
    اديها يا عرب بكى و نواح..
    صباح الكلينكس يا باشا..
    منى الصاوي

    ReplyDelete
  23. السلام عليكم
    استاذ جعان
    مش بس في حكاية الاغاني دي بتطلع وقت السياسة بس حتى لسة كنت بقول لحد عارفين في موضوع الدانمارك طلعنا بيه برضه بشوية اغاني كويسين
    وفعلا زي فضفضة ما قالت هو رزق الهبل على المجانين ومعلش ارتفاع الاسعار له دور همة ليه نسينه ومش بيطلعوله بربور هوة كمان
    فالحين في البرابير اوي يعععععع
    دمت بخير

    ReplyDelete
  24. اللع عليك

    كلامك جه في الصميم

    ReplyDelete
  25. مش عارفة لية انتم بتهاجموا الكليب اى نعم انا ما شفتوش ولا سمعت عنة بس فى رائ ان الاغانى والزطنية شئ جميل مش وحش يعنى ولا عيب علشان كل الهجوم دة علية

    ReplyDelete
  26. يععععععععععع ايه بربور دى دى وحش قوى دى حاجه بيضحكوا بيها علينا هو ده من ضمن الخيابه بتاعت التلفنيون بتاعنا
    معلش بقى حاسب على مرارتك يا صديقى

    ReplyDelete
  27. والله انا لسه ماسمعتوش لغاية دلوقتى
    ولا عايز اسمعه
    وعقبال ما يحرروا الشرقيه

    ReplyDelete
  28. يااااااع يع يع

    ايه العنوان اللي مش ولابد ده

    عنوان مقرف ...حد يجيب علبة كلينيكس بسرعة يا جمااااااعة هنا في البوست ده

    ههههههههه

    على فكرة تصدق اني اول ما شفت الاغنية دي ولاااااااا حسيت باي حاجة

    - بجد المشاهد اللي اثرت فيا كان مشهدين تحديداً ( مشاهد الحروب ومشاهد التعذيب في سجن بو غريب ...فعلا كانت جامدة اوي المشاهد دي وقشعرت جدا منها )

    - البنت الصغيرة اللي بتتكلم بأسلوب وبطريقة كلها حزن وشجن كأنها اكبر من سنها بكتير ...ونبرة الحزن المشوبة ببعض من السخرية وشبح الابتسامة الساخرة في الاخر وهي بتقول ( ياريت...) لما بتتمنى انه يكون ليها وطن مستقل ...وبيت ترجع له ..


    *. لكن الاساتذة اللي طالعين بيغنوا واللي بيشجعوهم من كل دولة ...ولااااااا حسيت بصدق في المشاعر ولا حسيت باي حاجة نهائي ...مجرد اصوات فقط لا غير ...حتى مشاعرهم متجمدة تعبيرات وشوشهم ..ولا فيها اي حزن او تأثر ...مافيش تعبير وصلني


    - على فكرة انت حللت الموقف صح اغنية فعلا وعاوزين زي ما قلت (يلفوا بيها البلاد وخلاص )

    - على فكرة بردو الاغنية دي انا حاساها كمان ااقل في التأثير من اغنية الحلم العربي اللي كان صداها اقوى نوعا ما من الاغنية دي

    - هو انت صحيح ما قولتش ...انت سميت ليه البوست ده بال ( مش عارف ايه ...) ليه ؟ عندك مليون حاجة تسميها بيه ...

    انت حسيت يعني ان العرب محتاجين مناديل ولا ايه ؟

    ولا انت كتبت وعبرت بأهون وابسط الكلمات ....( ال مش عارف ايه الخاص بالمناخير )...يع يع يع


    - بالمناسبة صحيح بردو انا نسيت اسألك ...انت ليه سميت البوست اللي فات (نجاد وال 200 اسبرطي ) ليه يعني ممكن تفك لنا رموز العناوين لو سمحت ؟؟؟؟

    ههههههههههه

    يللا مستنين البوست اللي جاي وان كنت اتمنى انه يكون عن موضوع الساعة

    ما تقوليش بقى ايه هو موضوع الساعة ...لان كل موضوعاتك مواضيع الساعة. لكن يا ترى ساعة رقمية ولا ساعة بعقارب ولا ساعة ديجيتال ؟؟؟

    ههههههههه

    ما تغيبش علينا يا حاج وابقى خد الباب في ايدك وانت خارج


    واوعى تقولي يا (ابله) هاجيب لك العيال اللي عندي في الفصل يتصرفوا معاك ...احنا ورانا عيال تجن بصراحة


    ههههههههههههههههه

    بجد عاوزين بوست اجتماعي بحت المرة الجاية ان شاء الله ...اجتماعياتك قلت يا جعان ...هو انت بقيت منطوي و خجول ولا حاجة ؟؟؟

    هههههههههههه

    بجد عاوزين بوست اجتماعي المرة الجاية ان شاء الله يا فندم

    خالص تقديري ليك يا زميلي العزيز

    ReplyDelete
  29. ااه ...ايوة نسيت ااقول

    تحياتي ليك وتقديري على الكلمات الجميلة ل ( بيرم ) اللي انت كتبتها

    حمار يغني, وجايب من يقول له آه
    حالاً تقول الخلايق كلها ويّاه


    جميلة اوي اوي وكلمات في الصميم

    بجد عجبني انك ختمت بيها البوست
    حركة محترفين اوي اوي

    وحضرتك يا فندم متميز طبعا مافيش كلام بس لفتت نظري وقلت احييك عليها فعلا

    تسلم لنا يا فندم ويسلم لنا العقل المفكر والكي بورد
    ولا يحرمنا من كي بوردك يا فندم ...

    ReplyDelete
  30. صوت من مصر
    عزيزي
    شتان بين الامرين
    للاسف تشبيهك هنا ليس لة اي معني
    اقرا ما كتبت جيدا

    ReplyDelete
  31. micheal
    مفيش ادخل جوة البلوجر في حسابك
    هتلاقي templates
    اختار اي واحدة تعجبك و هي اتوماتيك هاتظبطلك اللون و الخلفية بس خلي عندك نسخة من مدونتك القديمة
    علشان تضيف المفضلين او اي اعدادات تانية

    ReplyDelete
  32. Vague
    اكيد انت من سعداء الحظ
    تحياتي

    ReplyDelete
  33. خمسة فضفضة
    دكترة
    جبتي الخلاصة

    ReplyDelete
  34. قليل من التفكير
    ياباشا سبوبة لا تنقطع
    اهو خلي الناس تسترزق

    ReplyDelete
  35. samourai 4 ever
    طب و بعد ما تحرك المشاعر الوطنية
    هانعمل اية
    انا عن نفسي اول ما مشاعري تتحرك
    انزل اقعد علي القهوة

    ReplyDelete
  36. مهندس مصري
    هتلاقية علي يوتيوب
    ربنا يعافي الجميع

    ReplyDelete
  37. برابير ورا برابير حتعيش على عجزنا

    البقاء لله

    ROMIL

    ReplyDelete
  38. يا ساتر يا رب
    يا جعجع

    دا انت قلبك اسود اوي انت شايل اوي كدا ليه من الكابوس العربي قصدي الحلم العربي

    انا صراحة ما سمعتش البتاع العربي التاني الي انت بتقول عليه لما اسمعه هبقى اجي اتكلم بقلب جامد

    اهي تلاقي الراجل واخد اوامر عليا بالهاء الشعب اكتر ما هو متلهي بالغلاء الاسعار والبلاوي التانيه

    فقام الراجل مدينا كابوس تاني في العضل وربنا يشفينا يا خويا

    تحياتي يا جعجع

    وبلاش تزعل نفسك يا خويا

    ReplyDelete
  39. ياترى وهما بيغنوا عن الحلم العربى كانوا عايزين يحققوا ولا كان مجرد حلم زارهم فى النوم وبس؟
    أو يمكن دى اكتر حاجة بقينا بارعين فيها اننا نغنى فى كل المناسبات سواء فرح او حزن وباى اسلوب سواء شعبى او اوبريت او موال او حتى على واحدة ونص
    الخلاصة احنا بقينا خبرة فى الغناء
    اللهم ارفع غضبك ومقتك عنا

    ReplyDelete
  40. انت شبعت ولا ايه يا سمسم..؟؟
    فين جديدك..؟؟؟؟؟
    منى الصاوى
    http://msawy.maktoobblog.com

    ReplyDelete
  41. انا شايفة ما شاء الله سحن جديدة، واضح ان العملية مربحة من كل النواحى
    يعنى اهى سبوبة وفى نفس الوقت يبان المطرب من دول انه وطنى وحنين ومسهوك ودمعته اقرب من حواجبه
    ..
    اللى محيرنى دايما احنا ليه اكتر شعوب الارض حبا للاغانى الوطنية، يعنى مسمعتش ان عملوا اوبريت لما اتكون الاتحاد الاوروبى مثلا
    ...
    الحمد لله انى مشفتوش ولا عايزة اشوفه ، انا واحدة صاحبه عيا ومرارتى فاضلها زلطة وتطلع بره

    ReplyDelete
  42. العراق صوت الحق
    وتتصل بحد لية يا استاذنا اسألني و انا اقولك اية البربور علطول
    سعيد اني فرجت عنك و لو قدر يسير
    وروق كدة و متشلش هم

    ReplyDelete
  43. سيكولوبيا *حكايات من العيادة النفسية
    المنصور موجودة في الخطة الجاية هي و عدد من النجوع و الكفور لا تكلك

    ReplyDelete
  44. مني الصاوي
    الجميلة مني
    انا متهيألي هو كان مات مرفص
    فينك مختفية

    ReplyDelete
  45. nonoymm
    علي رأيك
    بس المفروض يبقي في كمان اوبريت للعبارات اللي بتغرق و العمارات اللي بتقع
    و هلم جرة
    سعدت بمرورك

    ReplyDelete
  46. على باب الله
    نورت يا باشا
    اهم حاجة يكون الصميم مبسوط

    ReplyDelete
  47. jehan
    مين اللي هاجم الكليب
    محدش هاجة لا سمح الله
    انتي بس اللي مش واخدة بالك
    نامي شدي اللحاف
    احنا في امشير

    ReplyDelete
  48. appy
    المتألقة دائما وصاحبتي اللي مش فاكرها
    و بربور اية اللي جاية تقولي علية
    انتي عارفة قابلا معني البربور دة اية

    ReplyDelete
  49. أسامه يوسف
    الشرقية برضة في نفس خطة المنصورة
    حضر انت الغدا
    احنا جايين اهو

    ReplyDelete
  50. جامد قووووي البربور العربي ده
    المفروض نعمل عيد البرابير ونوزع فيه مناديل ونحل بيه مشاكلنا
    **أيه جكاية السنبلاوين معاكو يا جدعان
    أنتو فضحتونا في كل حته
    محدش يجيب سيرة مدينة العقلاء مرة تانيه
    وقد اعذر من هزر ^ــ^

    ReplyDelete
  51. أستغفر الله العظيم

    سامحة يارب ميعرفش

    (بضرب كف على كف)

    روح يابنى أسمعلك بقين من الأوبريت خلى ربنا يهديك

    !!!!!!!!!!

    :))

    ReplyDelete
  52. الاخ العزيز/ جعان
    اولا اشكرك على تشريفك ورايك فى شخص المدونة المتواضع وبالنسبة ل500 جنيه فاصبر لغاية ما اعملك بيهم جمعية تقبضها الاول ، ويشرفنى اضافتك ليا
    ثانيا انا عملت بالنصيحة وشلت الحروف بتاعه التعليق علشان محدش يبقاله حجة

    واللى نفسى اعرفه ماذا تمثل ام الخلول فى حياتك علشان تحطها طرف ثالث فى القسم؟؟

    ReplyDelete
  53. أتأخرت علينا ياعم جعان أفندي
    ياااالا سماح المرة دي
    عندك حق الاوبريت أخد أكتر من حقه
    طب مايعملوا اوبريت بالعانجليزي كدة ويبعتوه برة عشان يبربروا معانا

    ReplyDelete
  54. nada_adly
    انا مش عارف انتي قارفانة من البربور لية
    دة حتي حاجة رومانصية خالص
    انا الصراحة لقين البروبر في اسقاط جامد اوي
    وكان مهم للحبكة الدرامية
    المهم قدمي انتي طلب بخصوص بوست موضوع الساعة
    و نبقي ننظر في طلبك
    نورتيني يا فندم

    ReplyDelete
  55. ROMIL
    طب م انت حافظ الاغنية اهو

    ReplyDelete
  56. قبلة الحياة
    ولا شايل ولا حاجة
    اهو الواحد بفك معاكو بكلمتين
    ابقي تعالي صيفي عندنا

    ReplyDelete
  57. monaliza
    يا فندم احنا
    بعون الله نقدر نطلع اغنية كل 20 ثانية
    اسوة بمولود كل 30 ثانية

    ReplyDelete
  58. مني الصاوي
    يا عزيزتي انا نفسي اتسدت من زمان
    اهو حسن الختام بقي

    ReplyDelete
  59. اهو ده عيبه
    سلامة مرارتك
    هو البني ادم اية غير مرارة

    ReplyDelete
  60. محدود الدخل
    شكلك من السنبلاوين
    يا فندم فوق راسنا

    ReplyDelete
  61. مروة الزارع
    فينك يا ميرو
    متجيش غير علي سيرة البرابير

    ReplyDelete
  62. مروة الزارع
    فينك يا ميرو
    متجيش غير علي سيرة البرابير

    ReplyDelete
  63. اهو ده عيبه
    انتي بتسأليني علي ام الخلول
    يعجز اللسان عن الوصف و القلب عن الفصل
    ام الخلول دي
    دي
    روحي يا بنتي انتي مش عارفة بتكلمي عن اية

    ReplyDelete
  64. المفقوعة مرارتها
    انا اسف يا فندم علي التاخير
    و اوعدك التزم بالخطة
    و حسب توجيهات السيد الرئيس الاوبريت هايترجم ل 15 لغة حية و 9 ميتة

    ReplyDelete
  65. تعرف ان ناس كتير قالولى اتفرجى على الكليب دا جامد اوى وبتاع قلتلهم يعنى هو كان اوبريت الحلم العربى عمل ايه لما يعمل اوبريت الضمير العربى .. بلا هجايص بقى .. والنبى اتفرجوا على اللى بيغنوا اللى رافعة جيبيتها لحد وسطها واللى لابسة بادى واللى حاطة فول ميك اب ياعم بلا قرف بقى دوشونا بكلام فارغ !!

    ReplyDelete
  66. هل تعلم أن هناك من يسرقك؟
    انظر هنا:
    http://3crazygril.blogspot.com/2008/03/blog-post_13.html

    ReplyDelete
  67. والله يا حج انتا عندك حق انا حبيت الكليب لكن اول مشفت المدعوة نانسى زعبلاوى طفيت التلفزيون على طول

    معقولة !!!!
    نانسى زعبلاوى اللى لسه شايفها بقميص نوم من شوية تقول ماتت قلوب الناس هى ممكن تكون حاجات تانى ماتت فعلشان كدة زعلانة نانسى زعبلاوى ياخى بلا بلاوى

    ReplyDelete
  68. عمرالقدس ماهترجع بالأغاني

    ReplyDelete

بعبع وقول اللي في نفسك يا خويا