Wednesday, March 12, 2008

احترس بلدنا بترجع لورا

إذا الدنيا أقبلت باض الحمام على الوتد وإذا أدبرت الدنيا بال الحمار على الأسد
حقيقي لا اعرف قائل هذة الحكمة لكن في كل الاحوال اعتقد ان مصر في مرحلة
تبول الحمير علي الاسود فقد ولي زمن الخيل التي في نواصيها الخير
واصبحنا في زمن الحمير المصابة بالحصر

ابن البطيخ
الحضري باشا ابن كفر البطيخ اللي معرفش الفرق بين الشراب الاديداس و الكالسون الا لما جة القاهرة
قامت الدنيا و مقعدتش لهروب المحروس لسويسرا للاحتراف مع نادي درجة تانية وطالب البعض برقبة الخائن و احلت بعض الجماعات دمة و خرج العيال ملط في الحواري يهتفو بسقوط الحضري و اصبح النداء بعد ارقص يا حضري
الطم يا حضري و عند عودتة و ذهب لحضور التدريبات هجم جماهير الاهلي علي النادي محاولين الفتك بة و ان دل علي شيء دل علي تخلف شعبنا الحبيب و ان ريالتة شبر علي صدرة و الله اللي عملوة لو اتعمل نصة علشان غزة و العراق و لبنان
او لاجل الاساءة لرسول الله لكان حالنا غير كدة ونهش و لعن و سب في الحضري كما لو انة قتل عيل من عيالهم
ومحامي من ابو بيضة و كباية شاي يطالب باسقاط الجنسية عن الحضري
كفو ايديكم عن رجل كان اقصي احلامة طرمبة مية نضيفة جنب بيتة

السيد الكبير المبجل
كبيرنا و عمنا و تاج راسنا رئيس جمهورية مصرادخل بذات نفسة شخصيا وطلب من زاهر حل مشكلة الحضري وكفاية الواد نفسيتة مش ناقصة و جمال مبارك برضة واحد من اللي اقنعو الحضري بالعودة و يابو عصام عيب انت مش بتلعب في حارة بعجر مينفعش
تكت كدة ارجع و متخافش
و انا و من موقفي هذا ادعو كل الجرابيع اللي بيقفو في طوابير العيش
او ورثتهم اذا حد فيهم فاضي وادعو اهالي موتي العبارات وشهداء العمارات وضحايا البلاعات و قتلي المستشفيات ومرضي المسرطنات
و العاطلين عن العمل و اللي مش لاقيين جواز واللي مش لاقين غيار
التوجة لسويسرا و محاولة الاحتراف هناك عسي ان تنظر اليهم الدولة بعين العطف و يتدخل الرئيس شخصيا لحل مشكلاتهم
اخوان
من حوالي عشرة ايام فتح باب الترشيح لانتخابات المحليات وحسب احصائية أصدرها مكتب الارشاد للجماعة ان هناك 720 عضو بالجماعة تم اعتقالهم و ان معظم هؤلاء من المرشحين في 20 محافظة غير طبعا عمليات غلق اي نشاطات اقتصادية و تجارية للاخوان و نقل مدرسين معروفون بتوجههم الاخواني الي اماكن اخري
الانتخابات المحلية من وجهة نظري هي اجرائات حكومية روتينية تهدف لترقية بعض الموظفين
في مثل بيعجبني اوي بيقول
طول ما انت زمار وانا طبال ياما حتجمعنا ليالي طوال
فليزمر هؤلاء و يطبل هؤلاء و المصريين يرقصو علي فحم مشتعل

نظيف
كلما قرأت او شاهدت تصريح لمسؤل حكومي شعرت انة يعيش في دولة غير التي نعرفها فمرة يخرج نظيف الرائد في مشروع القرية الذكيةو الحمار ابو بصمة الصوت و العجل البلو توث
و يؤكد ان إضرابات الموظفين الحكوميين محظورة هي اية حكاية محظورة دي اللي كل ما حد ميعجبهمش يتقال علية محظورة
علي كدة الولية ام فكري اللي فارشة في سوق الخضار اللي بتلعن سلسفيل الحكومة ليل نهار هايبقي اسمها ام فكري المحظورة
وكما شعرت من تصريحة انة محروق قوي من موظفي الضرائب العقارية و علي حد قولة الحكومة مبيتلويش دراعها و ان اي صاحب حق يستطيع أن يأخذه عن طريق قنوات التعبير القانونية
و النبي يا باشا قولنا القنوات دي فين و هل لازم نروح بالمايوهات لا يكون قناة منهم مبلولة ولا حاجة
و ايضا تكرم السيد الوزير بقولة ان الحكومة تسامحت معهم لإدراكها الظلم الواقع عليهم لعدم مساواتهم بموظفي الضرائب العامة
كما لو ان الحكومة دي امنا و احنا شوية عيال صيع محتاجين نظرة عطف
ا و ليس كل موظفي الدولة من اصغرهم الي رئيس الجمهورية يقبضو مرتباتهم للاهتمام بامور الشعب
واضح ان نظيف مقراش الدستور اللي يكفل حق الافراد فى الاضراب والاعتصام للتعبير والمطالبه بحقوقهم

حاتم الجبالي
جديد وزارة الصحة بقي سيكون لزاما على آلالاف من الممرضات المصريات المنتقبات، أن يكشفن عن وجوههن وأيديهن أثناء عملهن في المستشفيات، بموجب قرار لوزارة الصحة يقضي بتوحيد زي الممرضات بغض النظر عن شرعية النقاب من عدمة مش دة موضوعي الموضوع بقي جدية الموضوع و القرارات التعسفية اللي هاتتخذ لمن تخالف القرار يعني لو كان الوزير اتشملل زي ما تشملل علي الزي كان اقر قوانين للنظافة و حسن المعاملة و توفير البنج و اساسيات الاسعاف بدل ما الغلابة بيخلعو ضرسهم من غير بنج لانة رفاهية في نظر الجبالي باشا الكوميديا بقي
ان خلعهم النقاب مش هايحل استهبال بعض المنقبات من الممرضات بانها ترفض علاج الرجال
بحجة انة لا يجوز
خلاص يا ستنا اقعدي في بيتك و خلي اللي هاتشوف شغلها تسترزق

جمال البنا
حبيب الكل اللي مفرج هم الشباب و مرجع الصبا للشيوخ و الرجال
وصاحب فتوى إباحة التدخين للصائم
بعد ان اتحفنا باخر فتوي لسيادتة بإباحة القبلات بين الشباب والفتيات في الأماكن العامة معتبرا أن القبلات بين غير المتزوجين من الشباب والفتيات من الضعف البشري وتدخل ضمن اللمم في الإسلام
، أي الذنوب الصغيرة التي تمحوها الحسنات
جايز علشان سيادتة عندة 80 سنة فموضوع البوس مش هايجيب نتيجة مع من هو في نفس العمروهو في سن جدها لا حرج يعني
يا اخوانا الشاب من دول لو تخيل واحدة بس و هو نايم يفوت في قطر نسوان ميوقفوش الا لما حد يشد جزرة الفرامل
نروح نقولة البوس حلال وربك بيلطف بعبيدة بوسها و توكل
يحضرني المثل القائل جاتنا بنت خالتنا زادتنا هباله على هبالتنا

سيد رشوان
راجل مرتبة 400 جنية زفت مصري
لبس زي امرأة منقبة علشان يقف في طابور العيش النسائي لانة اخف في الزحمة
طبعا اتقفش و اكل علقة موالد و عند حضور الشرطة بكي الرجل كما الولايا و انة اضطر لهذا الفعل
من قسوة المأساة التي يعيشها كل يوم، هو ومعظم المصريين من أجل الحصول على رغيف الخبز
ولكي يتجنب المعارك و اذكركم بعجوز الدقهلية الذي سقط في طابور العيش مغشيا علية ثم وفاتة
غير وفاة مواطن بالاقصر بعد ضربة علي ايد بلطجي في طابور العيش
غير الخناقات بالسنج والمطاوي في وسط القاهرة في طوابير العيش
غير قتيلين في حلوان و 17 جريح
انا متوقع كمان 30 سنة هايبقي في بانوراما حرب الرغيف اسوة ببانوراما حرب اكتوبر

و كفاية كدة علشان انا دمي اتحرق

49 comments:

  1. إية دا معقول انا اول واحد

    تصدق فرحان والله فرحه اول واحد يقف فى طابور العيش المدعم

    يا سلام عليك كلامك بجد فى (الجون)

    أنصجك بجد تروح سويسرا هايتعملك بجد شو جامد

    أخى العزيز حطيت ايدك على الجرح

    الناس هنا فريق بينطح فى عصام الحضرى
    وبيلعن سلسفيله

    وفريق بيلعن اسرائيل واليوم اللى جابها جمبنا
    وفريق مع التشدد وهو مش فاهم حاجة وهايودينا فى داهيه لو شم السلطه

    وفريق حاليا فى طابور العيش كل همه يأكل ولادة حتى لو لبس فستان والرجاله زنقت فيه فى الطابور

    بنقول متضامنين مع غزة واحنا اللى عايزين اللى يتضامن معانا ويدينا لقمه العيش

    فية ناس هنا منفضه ومش داريانه بالأزمه اللى حاصله فى البلد

    انا بجد بشوف كل يوم عينات من الناس دى مش فارقه معاها لا طابور عيش ولا بنزين ولا ولا ولا اهم حاجه يقولك البورصه اخبارها اية !!!

    تكلمع عن غزة يقولك ربنا معاهم لما اروح اصلى يوم الجمعه الراجل الشيخ بيدعيلهم هابقى ادعيلهم معاة


    شغال معايا واحد هندوسى يعنى كافر بالله للأسف بيعمل خير اكتر من ناس مؤمنه بالله

    بيتبرع للأيتام ولمرضى السرطان

    كفايه انة بيلف على الموظفين علشان يلم فلوس لا من ديننا ولا من بلدنا وفية خير عننا

    كفايه انا كمان اتخنقت

    لن يغير الله مابقوم حتى يغيروا ما بأنفسهم

    أنا هابدأبنفسى

    تحياتى

    ReplyDelete
  2. السلام عليكم ورحمة الله وبركاته

    لا حول ولا قوة الا بالله العلي العظيم

    ايه يا ابو ملك دانت شايل في قلب كتير وساكت ، ابقي فضفض كل فتره احسن كده مش كويس

    انصحك بكوباية كركديه ساقع عشان الضغط

    ReplyDelete
  3. - يعني انت شايف ان الناس تروح سويسرا مشاكلها تتحل ؟

    طيب انا هاروح سويسرا البلد يا فندم

    - بمناسبة طابور العيش هو لازم يعني الناس تاكل عيش ...ماياكلوا جاتوه يا كلوا كل اللي يحبوه

    - لا حول ولا قوة الا بالله والله ربنا يعين عباده ...في كل مكان

    - سلامة دمك اللي اتحرق يا فندم ...خد بالك لحسن بعدين يعملوا طابور للناس اللي دمها محروق


    بوست ممتاز

    ReplyDelete
  4. احنا ضايعين ضايعين لا محالة


    يسلم قلمك يا كبير

    ReplyDelete
  5. ""الانتخابات المحلية من وجهة نظري هي اجرائات حكومية روتينية تهدف لترقية بعض الموظفين""

    تؤ تؤ تؤ
    طبقا للدستور الجديد , أو التعديل الجديد للمادة 76 عشان حد يترشح للرئاسة لازم يكون لحزبه نسبة محددة من أعضاء المجالس التشريعية و المحلية

    يعني الحكاية مش تهريج , ولا استموات الاخوان عليها للمرة الأولى مجرد عند في الحكومة , الموضوع جد جدا

    ReplyDelete
  6. ""الانتخابات المحلية من وجهة نظري هي اجرائات حكومية روتينية تهدف لترقية بعض الموظفين""

    تؤ تؤ تؤ
    طبقا للدستور الجديد , أو التعديل الجديد للمادة 76 عشان حد يترشح للرئاسة لازم يكون لحزبه نسبة محددة من أعضاء المجالس التشريعية و المحلية

    يعني الحكاية مش تهريج , ولا استموات الاخوان عليها للمرة الأولى مجرد عند في الحكومة , الموضوع جد جدا

    ReplyDelete
  7. دي بترجع على آخرها
    ربنا يستر

    ReplyDelete
  8. بلدنا ماشية بقفاها يا عم جعااان من زماان قوي
    بس معلش يعني عندي ملاحظة صغيرة ومحتاج توضحهالي بخصوص موضوع الجبالي أفندي
    وبخصوصك لأنك عملت زي الجبالي افندي
    الجبالي عايز يقعد المنتقبات في بيوتهم أو يخلعهم النقاب وأصدر لده قانون
    انت بتتريق عليهم بحجة أنهم بيرفضو علاج الرجال وبتنصحهم يقعدو في بيوتهم يسيبو الناس تشتغل وتسترزق
    مش شايف أن موقفك وموقفه مش مختلفين عن بعض قوي ؟؟!!!!
    مش الأولى بيك تقول بدل ما يجبروهم على خلع النقاب ميحولو المنقبات للعمل في عنابر الحريم وبعدين هو خلاص نسبة الممرضات المنتقبات زادت قوي للدرجة أن رفضهم علاج الرجال بقى بياثر على سير العملية العلاجية في المستشفيات الحكومية ( ده على أساس أن في عملية علاجية في المستشفيات الحكومية )
    مش عارف أيه وجهة النظر في موقف الجبالي أفندي
    ولا عارف أفهم جملتك
    يمكن عشان محدود في كل حاجة حتى في نافوخي الرجعي
    متحرمناش من جديدك يا جعان
    وسلامي لأم الخلول وأبو الخلول والبت خلول
    :)

    ReplyDelete
  9. أنا كمان دمي أتحرق بصراحة

    ---

    ReplyDelete
  10. ايه يا صديقى ب س ما تهدى شويه انا جايه اهدى اعصابى فى الزنزانه دى الاقيك قلبتها تنظيف وخبط فى الحلل بتاعت المطبخ ههههههههههه
    اولا الحضرى بتاع البطيخ وبما انى من عشاق البطيخ مش الحضرى طبعا لانى فهمى فى الكورة زى فهمى للاتينى والعبرى ههههههه فأقوله هو وسيادة المفحل وابنه العجل النونو اتاخر شويه يا حضرى خدنى ارقص جنبك هههههههههه


    تعالى بقى اممممم للسيده القطنه مبتكدبش انت مسمعتش كمان انه بيقولك مفيش أزمه حديد ولا عيش ولا تنفس ولا غاز ولا اى زمات ...زامال الازمه فين قالك فى رباط الجزمه بتاعتنا احنا اللى غوغاء بعيد عن حضرتك ههههههههه

    الجبلى افندى كعب الغزال المتحنى واحد مساهم فى مصنع ابو زعبل للاسمده تفتكر بالله عليك هيهتم ببنجن ولا شاش ولا اى حاجه ده من اكبر الملوثين للجهواء عندى ومحدش عارف يعمل معاه حاجه رد انت على نفسك فى دى

    اما بقى سياده الفته اللى معرفش ده مين فمش مهم يعنى حد مجهول اصلا نعمله اعتبار ليه وبعدين يا عمنا عنده 80سنه يعنى زى اونكل اسمه ايه ده بتاعنا اللى بيقولوا عليه راس الحربه ههههههههه يبقى صلاحيته انتهت حتى فى عقله من بدرى
    كفايه كده الا شكلى هكتب بوست مش رد وانا مش رغايه خالص انت عارف سلام يا صديقى الذى لا يعرفنى

    ReplyDelete
  11. عيش ايه اللى بتتكلم عليه؟؟ كلوا كرواسون
    . و بعدين يعنى ايه انتخابات .. ما خدنهاش .. و ما شفتهاش قبل كده ...
    و بعدين برضه يعنى صحة اللى عملولها زير ؟؟ ما ينفعش كوز كفاية...

    ReplyDelete
  12. ما الناس هيا اللى هبلة

    اا لو منهم اروح اقعد جنب ام فكرى وخلاص

    بس تعمل ايه بقى

    انا من رايي يا عمنا تمشيى على المثل اللى بيقول اللى بيته من قزاز ميغيرش في الصالون
    ولا ايه ؟

    ReplyDelete
  13. والله مش لاقي حاجة أقولها
    غير إنك بتثبت لي إن
    "شر البلية ما يضحك"
    خلينا نضحك شوية

    ReplyDelete
  14. الله عليك يا أبو ملك .. فعلا البلد دي رايحة على فين .. ربنا يستر أنا كل ما اشوف ملك و اللي في سنها بسأل نفسي لما يكبرو و يلاقو البلد كدة حيبصو لينا ازاي اننا عملنا فيهم كدة .. ربنا يكرمك و يعينك .. أحب أعزمك ع ابلوجات بتاعتي .. هي على قدها بس يسعدني أعرف رأيك فيها
    http://www.kahwtmatatia.blogspot.com
    http://www.w3amaryaiskndria.blogspot.com

    ReplyDelete
  15. الاخ جعان
    الموضوع هايل بس ناخدهم كده واحدة واحده
    الحضرى:مش ده اللى كان ارفص يا حضرى يرقص الحضرى ولا زكى بشكها فى زمانه ، المصيبة ان لما واحد زى ده الهزة منه بالشئ الفلانى مش مرتاح هنا وهرب على سويسرا احنا نقول ايه، اما بالنسبة لموضوع الوساطة فعلى راى المثل ييجى فى الهايفة ويتصدر


    نظيف: بصراحة هو غلب الاومو الذى يغسل اكثر بياضا، وبعدين هو اتبع فى موضوع الاضرابات دى طريقه العامية اللى بتملى طارشة، لا العامية شايفة تغيير فى حالها ولا الطارشة سمعتلها

    الجبالى:الباشحكيم الظاهر حس ان الممرضات مبقوش حلوين ونغشين زى الاول قال يخلى العيان من دول يفرفش وساعتها لا حيحتاج بنج ولا قطن، كفاية يبص فى وش الامورة يخف على طول

    البنا:يا سيدى الفاضل الكرسى الاخرانى فى اى مواصلة مش مستنى فتوى حضرتك باباحه القبلات

    العيش : لما هو يعمل ست علشان يعرف ياخد عيش ، انا بقى اعمل عيشة

    بلدنا عربية مش بس بترجع لورا ، لا واللى بيركنها سايس حمار

    ReplyDelete
  16. إمبارح يا جماعة ..كانت الساعة حوالى 3.20 صباحاً و كنت سهران على اساس ان مفيش شغل الصبح .. و نزلت قعدت معا واحد جارى فى العمارة وقعدنا واقفين فى البلكونة لحد الساعة 4.30 و حوالى الساعة 3.20 لقيت الراجل البواب اللى فى العمارة اللى جنبنا بيعدى على العمارة بتاعتنا و بينده على البواب فى عمارتنا .. ابو حماده ابو حماده ..
    فرديت انا عليه قولتلوا فى حاجة يا عم سليمان خير ؟ حد من عيالك تعبان ولا حاجه .. قالى لا انا بس بنادى على ابوحماده علشان نروح الفرن
    علشان نلحق نحجز دورنا فى الطابور .. و قبل ان اكمل كلامى لقيت ابو حماده بيفتح البوابة و واخد معاه قفصين العيش و رايح مع عم سليمان علشان يجيبولنا العيش الصبح على الساعة 7 كده ..
    ***************
    ساعتها وقفت و قولت يا نهار
    يارب أرحمنا .. للدرجة دى وصلنا للغلب ده و المعاناة و المذلة علشان أبسط حاجة فى الدنيا .. رغيف العيش ..

    كفاية كده علشان أتخنقنت بزيادة ..

    ربنا يخدنا برحمته من الدنيا الدى .. من مصر العظيمة ..
    ام الدنيا سابقاً
    مرات أبو الدنيا حالياً ..

    ReplyDelete
  17. انا من اهوى ومن اهوى انا
    و انا سعيد يا ابو حميد انك نورتني بعد الغيبة الطويلة
    و حقيقي اذا الناس فكرت زيك
    وكل واحد بدأ بنفسة
    يبقي في امل
    بس للاسف الغالبية بتستني اللي جنبة ان يبدأ
    رينا يعين الجميع

    ReplyDelete
  18. خمسة فضفضة
    و عليكم السلام
    ازيك يا دكترة
    دة انا اللي شايلة يكفي بلد
    كركرية مين
    انا شغال علي مجموعة
    ACEi أو ARBs
    لخفض ضغط الدم

    ReplyDelete
  19. nada_adly
    انا شايف ان اقتراح الجاتوة دة رائع
    ولازم جنب كل فرن يكون في محل حلويات

    ReplyDelete
  20. واحد مش فاهم حاجة
    يا استاذنا
    انت نظرتك تشاؤمية انا عايزك منفتح علي الحياة زيي كدة

    ReplyDelete
  21. bluerose
    يا دكتور يا ريت الموضوع بالجمال و التشريع و تطبيق القانون الجميل اللي
    انتي بتقولية دة
    يا ريت فعلا

    ReplyDelete
  22. مهندس مصري
    حاسب رجلك بقي يا باشمهندس

    ReplyDelete
  23. السلام عليكم ورحمة الله وبركاته
    بصراحة العنوان جميل ورائع
    والرد المبدئي : قديمة

    الرد التفصيلي :
    قصة الحضري دي كلها من أولها لآخرها قصة تافهة وتعبر عن حقيقة وضع وتفكير الشعب المصري

    موضوع الإخوان والمحليات والحاجات المحظورة :
    أنا أخشى أنه في ظل حكم سيادته سيصل الأمر إلى الوزارة المحظورة
    يعني مثلا وزارة الداخلية تحظر المشاركة والعمل في وزارة القوى العاملة لأن العمال يقومون بالإضراب
    ووزارة الصحة تحظر معالجة موظفين وزارة المالية لأن الوزارة تاخد منهم ضرائب بزيادة شويتين
    وهكذا ...

    الممرضات المنقبات :
    بصراحة أنا لا أرى في النقاب ما يمنع الممرضة من أداء عملها
    معلش يعني هي مش هتقيس حرارة المريض بمناخيرها ولا هتقيس النبض ببقها
    وبالنسبة للأخت اللى مش عايزة تعاج رجالة :
    حاجة من اتنين
    يا تعمل change مع واحدة زميلتها منحلة ومفرطة في الدين وتقبل أن تعالج الرجال
    يا إما تروح بيت جوزها وتسيب الناس في حالها وكل واحد فيه اللى مكفيه ومش ناقصة تفاهات

    عم الحاج جمال البنا :
    أنا مش عارف الناس ليه مصرين يصفوه بإنه مفكر إسلامي وإنه شقيق الأستاذ البنا
    يا جماعة مش كل من قال كلمتين يبقى مفكر إسلامي وبعدين ما كلنا بنفكر إشمعنى ده بقى اللى قلتو عليه إسلامي
    أنا أفهم فقيه إسلامي
    أو عالم شريعة إسلامي
    إنما مفكر إسلامي
    أعتقد وسعت قوي دي يا عليوه

    وبعدين الراجل شكله كبر وخرف فطبيعي يطلع منه كلام زي ده ملوش أي معنى والشباب نفسه - حتى وإن كان واقع وعلى آخره - لا يقبل مثل هذه الكلمات

    في النهاية
    أنا كمان دمي اتحرق من كلامك اللى زي العسل
    والسلامو عليكو

    ReplyDelete
  24. ههههههههههه

    اية التشريد دة

    والله هيا كدة كدة سلطة

    عادى بقى

    ReplyDelete
  25. أولا...المقولة دي فعلا بتلخص الحالة المزرية اللي عايشين فيها
    ثانيا...سيادتك انا مش عارفة ايه الحقد دع على الحضري..يا ناس ده الراجل جابلنا الكاس(ولا ايه)...لكن الناس اللي بتموت والعاطلين واللي مش لاقيين يتجوزا...دول جابولنا ايه...وبعدين الريس بيحب يهدي النفوس ولا ايه؟؟
    ثالثا...أهي كلمة محظورة دي اللي انا مش فاهاماها
    رابعا..نظافة وبنج وحسن معاملة...حضرتك بتتكلم عن ايه بالضبط؟؟؟انا اول مرة اسمع الحجات دي..
    خامسا...بصراحة اول مرة اسمع عن فتوى البنا دي...بس يعني عادي...ماهي الحكاية خربت...وبعدين الراجل شكله صعبان عليه الشباب اللي مش لاقي يتجوز اللي حضرتك قلت عليهم
    سادسا..انا اعرف سيد رشوان اخر...عندنا في البلد في تلاتة اتخانقوا على طابور العيش..اتنين ربنا يرحمهم...والتاني بين الحياة والموت...مش بيقولوا اكل العيش مر...بس المشكلةهنا ان الناس بتدوق المر س...ومش بتدوق العيش..
    وسابعا....حرام عليك يا أخي دمك اتحرق...طب وليه تحرق دم حضاراتنا..
    ....زومعلش على الاطالة

    ReplyDelete
  26. استغفر الله العظيم
    طيب والله ماعارفه اقول ايه

    حسبنا الله ونعم الوكيل واحنا برده اللي نستاهل

    ReplyDelete
  27. يا جعان باشا

    طبعا في البداية شكرا على اسلوبك إللي يخلي الواحد يضحك على نفسه وعلى بلاويه

    وشر البلية ما يضحك

    وصحيح البلد بتتحرك ،

    ودي المصيبة اللي اكشفناها
    لما جينا نركب القطر
    القطر اتاريه واقف
    والبلد هي اللي بتتحرك ، وبكدا الحكومة ضحكت على الشباب
    ركبتهم القطر وأخدت البلد ومشيت
    ويارتها مشيت بيها صح
    إنما
    رجعت بيها لورا

    تحياتي من كفر البطيخ

    ReplyDelete
  28. يبقى انت اكيد اكيد فى مصر

    عم جرجس وعم نصر بيسلمو عليك وبيقلولك الكل بخير ومتقلقش الجاى احلى واحلى
    =================
    سيبك انت ..المهم انت عامل واخبارك ايه
    لعلمك انا جتلى حالة اكتئاب فترة بسبب الى بيحصل وزيد عليه موت الناس فى غزة وطبعا موضوع الاساءة للرسول الكريم تعبنا كلنا...انا حاسة انى حثالة مقدرش اقول غير كده
    باكل وبنام وبخرج وبصرف..ده كل الى بعمله
    حاسة انى مخلقوة عشان هدف اسمى من كده
    لكن اعمل ايه مش عارفة بجد
    =================
    سمعت اغنية فكك بتاعت arabian nights?
    جامدة اسمعها عشان تفك
    ليك وحشة كبيرة

    ReplyDelete
  29. بنت المنصورهTuesday, 18 March, 2008

    السلام عليكم ورحمه الله وبركاته
    دى اول زياره ليه لمدونتك ولا اعتقد انها سوف تكون الاخيره
    المدونه اكتر من رائعه
    لن ابخسك حقك مثلما فعلت انت معى
    افكارك هايله

    ReplyDelete
  30. المدونه تصميمها حلو بتدل انك بتحب مصر بس انت تحاملت على شخص كان ليه نصيب انه يفرح كل مصر الحضرى طبعا نسينا كل اللى عمله حلو وما افتكرناش حاج غير الغلطه الوحيده اللى عملها احنا ما بنعصموش من الخطا طبعا بس هوه هيفضل الحضرى زى النيل ما هيفضل النيل وابو الهول والاهرامات ما هيفضلوا فى الجيزه

    ReplyDelete
  31. الحضري ذي اي واحد مصري شايف كل حاجة سعرها بيولع في بلده وخايف خوف غريزي علي ولاده ففكر في الأحتراف
    انا كنت بهاجم تصرفه ذيك
    لكن لاقيت ان المصريين كلهم ذيه عاوزين يطفشوا ... العيب اللي عمله الحضري بس هو اختيار التوقيت


    سيد رشوان

    بجد حصل الموقف ده ؟
    انت عارف ان الريس عمل جلسة مع من يهمه الأمر عشان يلغوا موضوع الطوابير دي ... اكيد مش رأفة بينا لكن خايف احسن طابور من الطوابير يقلب مظاهرة ولا حاجة وتروح له علي بيته


    نقطة أخيرة وهاتكلم انا عنها ... واحدة أسمها المفقوعة مرارتها أتظلمت معاك .. وحبت تعاتبك علي خفيف
    البوست اللي فات عديت عليك .. مش أول مرة أنا من أوائل المتابعين لمدونتك جايز بأسم تاني بس نفس الشخص ... يعني مش زيارة طياري ولا حاجة أدور علي ردك علي تعليقي ... ألاقيك رادد علي الكل وناسيني ... حسيت اني عاملة ذي بنت البطة السودةطب قول حاجة أي حاجة أن شالله مضلمة المطرح يافوفو
    عتابي من عشمي ياجعان

    ReplyDelete
  32. ده غير المية اللى بتنقطع بالشهور من قرى بحالها فى حين إن لاوزارة كلها بتطلع تصيف فى وقت واحدة عشان ياخدوا ثواب المصيف جماعة... وغير لما شوارع جزيرة الزمالك كلها يتغير مسارها عشان "ساكن جديد" وياريته مرغوب فيه أصلا...

    ولما رئيس الجمهورية يصدر أمر جمهورى للوزارة بحل أزمة رغيف العيش ده يبقى أكيد فاضى ماوراهوش حاجة بقى...

    مصر أصبحت تدار بنفس الأسلوب الذى تدار به قرية منسية فى عمق الريف فحشرة العمدة قاعد مقرفص على المصطبة وماسك العصاية فى إيد والشيشة فى إيد واشرب من قلة دى ما تشربش من قلة دى يا وله

    ReplyDelete
  33. ياااااااااااااااااااااه
    يااااااااه

    تصدق
    تجيبها كده تجيلها كده كده كده اهى خربانة كده

    بص يا ابنى

    ربنا يسامحنا ويسامح اللى كان السبب
    ويعدينا من اللى احنا فيه ده

    بوست حلو اوى اوى اوى
    يحرق الدم

    ReplyDelete
  34. محدود الدخل
    ماشية بقفاها بوشها
    المهم انها ماشية في حارة ضلمة وسد

    بالنسبة لموضوع الممرضات المنتقبات
    حضرتك علشان تعرف معني كلامي
    محتاج تروح مستشفي وتقابل شوية دكاترة
    علي كام مريض
    علشان تعرف حقيقة المهزلة
    ايام الرسول كانت الصحابيات يمرضو جرحي الحرب ووجوههم مكشوفة لو كان
    مكروة لكانو اولي بتركة
    ولا اية
    وسلامك وصل لال خلول كلهم

    ReplyDelete
  35. عليا النعمه يا سمسم انت مسخره..و دي مش شتيمه طبعاً و أي مثقف عارف معناها الصحيح..
    ..بس أنا معجبه جداً بعمنا البنا..الراجل اتهد و بيلعب فى الوقت الضايع..و طبعاً عمر ما حد حيرشحه لضربات الجزاء..قالك اكسب لي دعوه من العيال أبرك من المرواح ايدي فاضيه
    منى الصاوي

    ReplyDelete
  36. تسلم يا جعان على توضيح وجهة نظرك
    وأكيد أختلاف الأراء يفسد للود قضايا مش قضية واحدة
    أبقى شرفنا بالزيارة
    http://no4israel.blogspot.com/

    ReplyDelete
  37. و الله يا جعان كل ما بقرأ أيس فقره في هذا البوست ببقي مش عارف أضحك ولا أبكي علي حالنا
    حقيقي
    شر البليه ما يضحك
    حستني رأيك علي اخر بوست عمدي بخصوص غزه
    اطمئن أنا بستخدم ألوان صحيه جدا
    تحياتي
    :)

    ReplyDelete
  38. طب وربنا انت بتكتب حلو اوى وومتاز وكل حاجه بس فى الاخر يا انت يا احنا هتجيلنا نقطه عشان محدش معبرنا بقالى اكتر من سنه بستقبل كتاباتك على الايميل بتاعى لكن بجد اول مرة ادخل مدونتك واحب اسيب رد الكيل طفح والحال قرب يبقى كفر وربك يستر تصدق بالله انا ابويا بيخرج يروح المخبز الساعه 4.30الفجر عشان يقدر يجيب لنا عيش نفطر مع ان المخبز مش بيفتح قبل 6 الصبح والله باكل وانا مكسوفه اوى من بهدله ابويا فى المخبز بس قولى هعمل ايه؟ دة طبعا غير الاخبار جوة وبرة انا هدوشك ليه ما انت عارف بقى عموما الف شكر على كلامك الجميل دة وربنا يوفقك ومتبقاش اخرتك عيش وحلاوة سلام

    ReplyDelete
  39. مع تحياتي

    khawater-mawakef.blogspot.com

    ReplyDelete
  40. أنت
    نعم اعنيك انت
    لماذا لم تأت بعد .. ؟
    هذا طريق لا يعرفه الساسة
    و لا الحكام
    و لا الاصدقاء و لا الاعداء
    هذا طريق لا يعرفه أحد
    ولا يعرف أحد
    طريق لم تعرفه أقدام المارّة ،
    ولم تدنّسه من قبل عجلات سيارة فارهة تملاء خزان وقودها من عرقي ، وعرق الأغبياء
    الذين يقفون في طابور طويل
    يريدون خبزاً قبل أن ترتفع أسعار القمح
    تعال .. لماذا انت مرتبك ؟
    و لماذا ارتضيت ان تتدثر في حزن مغشوش ؟
    دع العالم يسمع صوتك
    و إن لم يفعل .. !
    فتأكد انني انتظرك لتشترك معنا في اسرار اون لاين
    على الرابط ادناه
    حتى اسمعك
    http://asraronline.com/vb/register.php?referrerid=2

    ReplyDelete
  41. أنت
    نعم اعنيك انت
    لماذا لم تأت بعد .. ؟
    هذا طريق لا يعرفه الساسة
    و لا الحكام
    و لا الاصدقاء و لا الاعداء
    هذا طريق لا يعرفه أحد
    ولا يعرف أحد
    طريق لم تعرفه أقدام المارّة ،
    ولم تدنّسه من قبل عجلات سيارة فارهة تملاء خزان وقودها من عرقي ، وعرق الأغبياء
    الذين يقفون في طابور طويل
    يريدون خبزاً قبل أن ترتفع أسعار القمح
    تعال .. لماذا انت مرتبك ؟
    و لماذا ارتضيت ان تتدثر في حزن مغشوش ؟
    دع العالم يسمع صوتك
    و إن لم يفعل .. !
    فتأكد انني انتظرك لتشترك معنا في اسرار اون لاين
    على الرابط ادناه
    حتى اسمعك
    http://asraronline.com/vb/register.php?referrerid=2

    ReplyDelete
  42. عارف يا ابو الجوع
    يا عسل
    انا بدخل هنا على طول لكن اول مرة اعلق
    لان البوست عاجبنى مووووووووووووت
    كلامك مووووووووووز مقشر
    دماغك عاليا
    خد بقى الحته دى منى
    -------------------
    نام يا مصرى مصر مش عايزة تناديك
    ياللى فقر الدنيا أصبح لك شريك
    ياللى كان دائك وفائك والكرامة وكبريائك
    الحشيش والبانجو ساقك.كبريائك مات خلاص البركة فيك
    نام يا مصرى مصر مش عايزة تناديك
    ياللى دايما كنت رافع بالسلاح أيدك لفوق
    بالبنادق والمدافع خليت العالم يفوق
    النهاردة سهل جدا تحكمك حتة حشيش
    الشيوخ فوق مالطة تدن والشباب مابيختشيش
    رقصة بلدى ورقصة تانجو
    مرة خمرة ومرة بانجو
    واللى م الدوامة ينجو يربى دقنه ويعاديك
    نام يا مصرى مصر مش عايزة تناديك
    فصلوا دستور مقاسهم يلبسوه بس الكبار
    وأنت تحت نعال مداسهم قلت أه زى الحمار
    قلت أه ولا حد همك مين يدوس فوق وش مين
    هما يقروا الفاتحة وأنت كل حرف تقول أمين
    أنت عارف بس صامت
    حتى بطنك لما صامت
    كان حزامك فوقها قامط للزراير يشتكيك
    نام يا مصرى مصر مش عايزة تناديك
    مين بيفهم فى السياسة؟لا الافندى ولا المدام
    المهم الماتش إمتى؟والنتيجة كام لكام؟
    والعشا فين النهاردة وفى المسلسل عملوا إيه
    ولعيب الكورة الفلانى ساب ناديه فى الدورى ليه؟
    كله بيهلوس وهايص
    وإنت يا أبن المصرى لايص
    جوه مسرح العرايس
    والخيوط رابطة فى إيديك
    نام يا مصرى مصر مش عايزة تناديك
    كنت لما تقول معارض ألف واحد كان يخاف
    بعت صوتك فى المعارض وأستغطيت باللحاف
    قول نعم.حط العلامة .وأوعى تقرا فى يوم كتاب
    هما عايزينك نعامة دافنة راسها فى التراب
    والطاووس جنبك يخطى
    بصمجى.ويقول دا خطى
    وإنت لما رضيت توطى
    شوف بقى اللى ح يجرا فيك
    نام يا مصرى مصر مش عايزة تناديك

    ReplyDelete
  43. أنا كمان دمي اتحرق


    تحياتي

    ReplyDelete
  44. وانا كمان دمى اتحرق .. بس دا بقى المعتاد والنبى ياجماعة لا تقولولنا حاجة جديدة النكت دى قدمت اوى وبقت محروقة ...

    ReplyDelete
  45. جمال البنا دة مش عارف ليه الازهر ساكت عليه
    دة طابور خامس
    ربنا يرحمنا منه

    ReplyDelete
  46. مع كامل تقديرى بتألقك

    لكن اكتر حاجه عجبتنى موضوع سيد رشوان ده

    يعنى انته مابتنساش الناس الغلابة

    ReplyDelete
  47. مذكرات كشكول المورقTuesday, 08 April, 2008

    صباح الخير أو مساء الخير حسب التوقيت المحلى ولا أقولك الأحسن نخليها السلام عليكم ورحمة الله وبركاته.
    ممكن بعد اذنك أقول تعليق. والله كلك ذوق طب هاقول بقى
    ماهو محروق محروق من غير شك محروق.
    بس ممكن ياأستاذ جعان نغير الشعار
    ونقول (سويسرا هى الحل)ونسيبنا من الاشتراكية هى الحل والاسلام هو الحل والماركسية هى الحل والسبانخ هى الحل نسبة الى حسن سبانخ.
    تصدق هايبقى مشروع قومى جامد منها ننشط السياحة الخارجية أهو 80مليون مواطن يسافروا على سويسرا مرة واحدة وشوف بقى كم تذكرة وجواز سفر وهاندخل للبلد مكسب كبير وفى نفس ذات الوقت حضرتك هانخلى اللى مايسموا يدوروا علينا ويجيبونا ويناشدوا فينا واحنا نتجعص ونتأمر كده ونقول أبدا وطبعا لأننا شعب طيب هانوافق على طول .يااااااااااه اذن فليلا بينا على سويسرا.
    لنا الله
    لما كل واحد فى ناحية الشعب طلعان عينه على لقمة العيش والرئيس بيدور على واحد مالوش لازمة وسايب 80مليون فى أزمة .
    ولا التانى بتاع البوس خلى الواحد بقى بلبوص.
    أما عم نظيف بقى نسبة لأبن عروس حين قال وأوعى تقول للندل ياعم.
    فلقد ساهم بالفعل فى تنظيف جيوب المصريين.
    خالص تحياتى؛

    ReplyDelete
  48. ازيك يا جعان
    بوست ميه ميه
    ولا فراخ الجمعيه ههههههه
    لا بجد عسل موووت وعجبني جدا
    هبقا ارجع تاني ارد بالتفسيل :)

    مايا الكتكوته

    ReplyDelete
  49. انت م الواجب بعد البؤين دول تعززمنا كلنا على كركدية عشان الضغط
    البلد بترجع لورا لحد مابقاش فى ورا تانى ترجع فية

    ReplyDelete

بعبع وقول اللي في نفسك يا خويا