Saturday, July 12, 2008

مصر يامة يا بهية وشك في الحيط وقفاكي ليا

تلاتين يوم كما ضربة علي الدماغ قضيتهم اجازة في بلدنا المحروسة هربا من نار الخليج الموقدة

املا في طراوة بلدنا وحلاوة نسوانا لا استطيع البقاء خارج مصر لفترات طويلة متصلة فقد كنت بها من منذ 6 اشهر تقريبا

فاطول مدة قضيتها خارج بنت الفاطمي لا تتعدي 7 اشهر

تلاتين يوم رمح في بلادنا كما المجنون عايز اشوف كل حاجة واقابل كل الناس لكن سعادتي الحقيقية عند رؤيتي سليلة اسرة الجعانين الجديدة فرح هانم علي سن ورمح فقد اصريت ان تلدها امها في مصر لعدم ثقتي في اطباء الخليج بوجة عام

واحمد الله انها نسخ طبق الاصل من اختها القطعية القديمة

فالبنات فضل من الله شبة امهم ولا يمتو الي بصلة فالشعر كستنائي و العيون الوان والبياض كما الجبنة القريش

نيجي للمهم بقي مصر بقت كخة يا عبلة

زحمة كما يوم الحشر

حر كدار سقر

تلوث كما لو اننا في مفاعل نووي

رطوبة كما لو انك قاعد تحت باط عامل معمار

الخلاصة بلدنا عايزة تروح الحرفيين تعمل عمرة

انا وزوجتي من هواة السينما ولنا طقوس في يوم الجمعة الا وهي الانطلاق الي السينما صباحا في سيتي ستارز نظرا لحكم الكراسي المريح بالنسبة لي وطبعا ملك ابنتنا المصون لابد وحتما تجلس في كرسي خاص بها ولا مانع من كوب فشار وبعض الماء او العصير وحاليا انضم فرح وحتما ولابد تقعد هي كمان يعني هي ملهاش نفس تتفرج

ثم بعد ذلك ملك تدخل الملاهي وتقطع نفس امها جري وراها وطبعا انا واقف متفرج فلا صحتي ولا ضهري بقو يستحملو جري ورا عيال صغيرة المهم ثم الغدا في اي مطعم في الفوود كورت وينتهي الامر بكع مرتب طبيب امتياز في شهرين في عدة ساعات المشكلة هنا فين بالرغم انك بتكع مبلغ محترم مبتعرفش تنبسط داخل القاهرة لان الزحمة غير طبيعية و المناظر اللي بتشوفها تسد النفس وسوء الخدمة يكرهك في العيشة ولاني راجل طبقي و اموت في الرفاهية ولا اطيق الزحمة و الحر

سحبت المايوة و العيال و امهم و رأسا الي جنة عامر وجنة عامر هي مارينا الساحل الشمالي وبورتو مارينا حيث الماء ازرق رقراق والرمل اصفر زهزاه وانتهي الامر بي جالس وفوقي شمسية فودافون مرتديا شورت المصايف وشبشب الرحلات المفضل وبجانبي قزازة بيبس مشبرة نافخا حلقات دخان من سجارتي

والسعادة تغمرني اعبث في الرمل باصابعي وكرشي ينام قرير العين

وملك تبني قصور الرمال حولي وانا عايم في الفريسكا

مارينا ايام عزها من عدة سنوات كان يدخلها نوعين من البشر لا ثالث لهما

يا قاطني كوكب المريخ القادرين علي دفع الزليار جنية ثمن الشالية بها او من علي اتصال باحد قاطني المريخ و يستطيع استضافتة او اعطاءة تصريح للدخول واحمد الله علاقتي مع قاطني الكواكب الاخري لا بأس بها

وعن اهل مارينا احدثكم فالنسوان زلط ملط وكلما اشتدت الحرارة كلما انحسرت الملابس

حاسس المرة الجاية هلاقيهم عملو شاطيء للعراة هي الحكاية اصلها فاضل فيها 10 سم

والشباب طالع من صالة الحديد ورازع الحقنة التمام بتاعة الحصنة

وماشي يبرطع زي الحمير البلدي
في واد هناك عامل مشروع اتوبيس مكيف و في شاشات تلفزيون الاتوبيس داخل داخل القرية نفسها لتوصيل
المارينجاوية زي الفسيخاوية كدة
الواد دة قريتلة خبر في روزا اليوسف بيقول ان سعيد بالمشروع القومي اللي عملة
وانة رحم المارينجاوية من حر المشي او قرف عربياتهم و موتسيكلاتهم
وانة اخد جايزة المارينجاوي المثالي ويا ريت نعمم التجربة دي في بلطيم, جمصة وبركة السبع

المهم قضيت عدة ايام في حضن بلد العم عامر

وطبعا لم يفوتني زيارة الاسكندرية الحبيبة

وارجو من اهل الاسكندرية افادتي في امر ما

هي المية مقطوعة عن البلد ولا اية؟؟

اصل طول ما انا ماشي علي الكورنيش شايف ناس طالعة من البحر المية بتشر منها وينطلقو يتمشو في الشارع عادي كدة
يعني عيلة اب و ام و عيالهم طالعين من البحر يركبو تاكس او ينطو في ميكروباص او يقعدو ياكلو كل دة و المية بتهر منهم
كما لو اننا في غابة استوائية
دة غير الشوارع كلها تقريبا بقت اتجاة واحد
يعني تروح مترجعش

ثم عودة الي القاهرة وزيارة اضرحة كل اصحاب محلات الاكل و الدعاء عندهم و التبرك بهم

وزيارات ميدانية لعدة مقاهي و تفحص احوال المعسل
وقرأة عدة اطنان من الجرائد و المجلات ومتابعة حال بلدنا اللي لا يسر عدو ولا حبيب
فالمصري اثبت بالدليل القاطع انة مواطن صاعقة قادر علي التكيف في جميع انواع البيئات و ظروف المعيشة

حمير ياكل
كلاب يمصمص
مية بالباكابورت يأربع

ولهذا حديث اخر

49 comments:

  1. ههههههه

    ايه ياباشا ده

    لففتنا الاجازة كلها و احنا بنقرا البوست

    الف مبروك على فرح و ربنا يخلى

    اما بالنسبة لحال مصر عموما

    فزى ما انت شايف كده

    الناس تقريبا فاضلهم سنة و يبتدوا يهرجوا و يمرجوا عل بعض

    بس المصرى جتته نحست خلاص و بيستحمل كل حاجة

    تحياتى يا برنس

    هش

    ReplyDelete
  2. ههههههههههههههههههههههههههههههههههههههههههههههههههههه

    المهم انك دلوقتى رجعت الخليج ولا لسه فى مصر ؟

    عموماً انا دلوقتى بقضى الأجازة فى السودان .. لو مش عاجبك الخليج ولا مصر تعالى نور السودان

    وبعد اذنك مالكش دعوه ببركة السبع

    ReplyDelete
  3. ههههههههههه حمد لله على السلامه الاول
    وبعدين او سمحت انت مالك ومال البنات عادي يعنى انت مش عارف كل ما تقل هدومك كل ما تطلع لفوق ايون فوق بتبص فين فى الطبقه العليا يعنى
    يا ابنى فيه شححان فى القماش انت مش فاهم الله وبعدين انت كنت بتبص فين فى البحر ولا فى قفا الناس ما تبص قدامك
    مصر بقت زحمه فى الصيف واللى عامل كده العرب ولاد التيييييييييت ايون يشتموا فينا ويجيوا يقعدوا هنا عند بنت ام عز
    وبعدين يا صديقي القاهريين بيشتكوا من القاهره فى الصيف والاسكندرانيه بيشتكوا من اسكندريه انا راى احنا نسافر افغانستان فى الصيف وترجع فى الشتا ههههههههههههه
    اللى انت شوفته سلوك مصريين فاكرها مفيش حد منظم مفيش حد بقى هامه شكله ايه وبيتصرف ازاى بقوا ماشين مش فاهمين
    اهى الطبقيه طفحت عندي عجبك كده اقوم اولع فيها بقى
    بطل طبقيه بقى مليتوا البلد ههههههههههههههه
    مستنيه الباقى لما اشوف باقى اللى شوفته فى مصر وشوفتها ازاى المره دي

    ReplyDelete
  4. هههههههههههههه
    حلو اوي سحبت المايو و العيال و امهم
    هههههههههههههههههه
    ياعم يا جعان الدنيا بقت غلاء فاحش
    يعني انا مش فاهمه و النبي الافتري بتاع البني آدم..يعني عاوز الناس تروح مارينا و بورتومارينا كمان و يفضل معاها فلوس تجيب مايو قطعه واحده
    هههههههههههههههه
    ديه بواقي اللي تقدر تستره حتستره
    واللي ماتقدرش...ربك هوه الستار
    و بعدين انت بتيجي مصر اجازه علشان تتفقد الستات و احوالهم الماديه؟؟؟؟هههههههههه
    ولا بتشوف الاحوال وصلت لغاية فين عقبال بناتك إن شاء الله لما يكبروا
    حيلبسوا مايوه شكله ايه
    ههههههههههههه
    سيبك انت من الحاجات الثانوية ديه و ركز فى الاجازه
    ههههههههههههههههه

    ReplyDelete
  5. هههههههههههههههههههه

    ايه ده مش فاهمه
    يعني خلتني عندي احساسين متضادين
    عايزة ارجع وبضحك في نفس الوقت
    ههههههههههههه


    علي فكره احنا عايزين نشوف ملوكه وفرح لو سمحت بقي مش هينفع بعد الوصف ده انك تمنع الصور عننا

    ياريت اقرب فرصه تحط الصور والا هعمل ثوووووووره وانقلاب عسكري
    ههههههههههههههههههه


    بالنسبه لحال البلد

    ده العادي


    وربنا يرحمنا


    نورت مصر

    ReplyDelete
  6. حمدالله على السلامه يا جعان باشا
    بص فى حوار الزحمه انت ماجبتش جديد
    وبعدين تعالى هنا
    روحت مارينا وفى بورتو
    ده ملك لواحده بورتو ده
    بس عامة انت علشان تنبسط فى مارينا آخر انبساط لازم تكون هابر هبره محترمه من بنك محترم
    يعنى انت كده بردو ماجبتش الانبساط الجامد فى مارينا
    وعموماً ربنا يسعدك

    ReplyDelete
  7. واضح انك استمتعت جاااااااامد

    ربنا ما يحرمك من مصر
    بنت خاله الدنيا ( امها سابقا)

    ReplyDelete
  8. هههههههههه
    عجبتني قوي حكاية بيشروا ميه دي
    انت متعرفش ان ده تقليد متعارف عليه في مصايف اسكندريه
    وبعدين عشان تعرف يا عم اسلام اننا شعب ناكل الزلط ونحلي بالرمل وربنا احنا في زمن كله عز

    ReplyDelete
  9. hesham
    ان مكنتش انا افسحكو يعني مين اللي يطري عليكو
    وسنة لية ياباشا ما الناس خلاص ماشية فوق بعض

    ReplyDelete
  10. ياسر سليم
    رجعت الخليج خلاص
    سودان مين يا يابا حرمت خلاص
    وشديد اسفي لبركة السبع الموقرة وحرمها المصون

    ReplyDelete
  11. appy
    صديقتي اللدودة و زميلتي في البرجوازية الطبقية المقعرة
    الله يسلمك
    اكدب عليكي يعني
    انا رايح ابص في قفا الناس
    هو كنا اخدنا اية من وشهم هو حد راضي يبص في خلقتنا
    خلي الغطا بقي ينفعك

    ReplyDelete
  12. حـمـــــــــرا :)
    وانت فاهم انك لما تحكى لنا يومياتك فى المصيف خلاص بقيت كاتب؟
    دا إنت إنسان تعبان صحيح
    بس تعرف؟
    ماكنتش اعرف انك بتكتب لقرايبك بس

    ReplyDelete
  13. واحدة مفروسة
    تصدقي فاتت علي
    المصايف بقت نار الناس هاتصيف ولا تلبس
    متهيالي كمان كام سنة هايكون الستات بيلبسو اكياس بلاستك
    ابقي تعالي صيفي عندنا انتي مبتجيش لية

    ReplyDelete
  14. عاشقه الفردوس
    اضحكي ماشي
    عايزة تطرشي في الفسحة برة
    موضوع الصور دة بقي
    لازم ارجع لرويتر علشان العقد معاهم
    حصريا
    ربنا يسهل

    ReplyDelete
  15. Oss
    الله يسلمك
    ويا سيدي المهم الانجال انبسطو
    انا كفاية عليا الفرجة

    ReplyDelete
  16. بطوط حبوب
    ربنا ما يحرمنا كلنا
    امها خالتها عمتها
    المهم اننا قرايب في بعض

    ReplyDelete
  17. لماضة
    اديني عرفت
    وعلي رأيك احنا في زمن العز و الجمال و يجعلة مبارك

    ReplyDelete
  18. essothe
    انا مش عارفلك ملة
    انت راجل ولا مرا

    نام علي وشك كدة اكشف عليك

    ReplyDelete
  19. كل دى قلة أدب عشان قلت كلمتين ما جوش على هواك؟

    مش باقولك تعبان؟ :)

    الألفاظ دى عيب .. دا انت حتى كاتب .. محترم

    ReplyDelete
  20. essothe
    *********

    معلش بقى يا صديقى انا مسكه نفسى ولسانى من الاول
    هرد شويه وسع كده
    يا كابتن ولا كابتنه مش عارفه
    اولا لو مضايقك مارينا هى مش بعيد يعنى لو عمرك ما رحتها ولا رحتيها ممكن اتنازل واقولك الناس النظيفه بتروح فين هناك علشان تروح تتفرج بس
    ثانيا هو مش قال على نفسه كاتب وهو ايه شروط الكاتب اللى على مزاجك يعنى
    وسبحان الله تدخل الاول تقول حمرا وبعدين تقوله عيب
    يا اخى ولا يا اختى عيب عليكى انت
    ولا تكونش تقصد حمرا دى الصلصه بس دى غليت قوى ومعتقدش انك تعرفها اصلا
    عموما عاوزين ابدعاتك يا فنان فى الكتابه
    وبعدين سبحان الله هو صاحب المدونه حرقك قوووووى كده عامله له اكونت علشان تدخل تقوله كلتين محشورين فى زورك كده
    ياااااااا والله انت واللى زيك هايلين وبعدين مين قرايبه انت داخل فى العيله قوى كده امممممممممم مأظنش لان من حوارك واضح المستوى
    الهايل اللى بتتكلم منه
    وعلى فكرة ملحوسه نونو عاجبنى قوى وعاجب ناس كتير الطريقه اللى هو بيكتب بيها
    وشكلك فاضى وقاعد بايت فى المدونه
    مش عارفه هو صاحب المدونه طلب حراسه كمان هنا ولا ايه
    على فكرة علشان اقفل كل الابواب
    هو موكلنيش ارد بس مبحبش حد يضايق الناس اللى بحبهم
    باااااى يا قطه اشوفك فى جمصه هههههههههههههههههخخخخخ

    سورى بقى يا اسلام على الكلام ده بس بضايق وانت عارف

    ReplyDelete
  21. ههههههههههههههههه

    عرفت بقى حال اسكندرية كده ليه
    انا بجد فى قمة ضيقى من الوضع ده
    لا دا انت قعدت شوية و رجعت القاهرة
    تعالى بقى شوف اللى لازق على طول فى البلد
    زى العبد لله
    بجد بشد فى شعر صوبع رجلى الصغير
    ــــــــــــــــــــــــــــ
    حاجة خارج الموضوع

    انا بجد اتبسط جداااااااااااا
    لما عرفت انك دخلت البلوج بتاعى
    و كمان لما شفت التعليق بتاعك
    بجد كنت فى حالة نشوه غامره
    لانى بجد بقدرك جدا
    و بحبك جداااااا
    نورت البلوج بزيارتك و الله

    سلامى و قبلاتى لملك و فرح
    و تحياتى لك

    اسلام

    ReplyDelete
  22. Appy
    ******
    سعيد بردك جدا والله لأنك كل ما كنتى تحاولى تغلطى ما تعرفيش ودا معناه انك إنسانة محترمة ..

    أنا اللى أقصده هو بس اللى يعرفه .. مع الوضع فى الاعتبار ان معظم كلماتى مقتبسة فى الأساس من كلامه (مش باقولك هو بس اللى فاهم؟)

    عموما يا ستى أنا باعتذر لك عن أى كلمة أساءتك من اللى كتبته (مع إن كل كلامه خادش للحياء فى الأساس بس مش مهم)

    أخيرا .. أنا مش عامل أكونت مخصوص والله .. دا حتى عمره قرب على 3 سنين دلوقتى

    أنا ماشى .. بعد ما وصلت الرسالة

    وتحياتى

    ReplyDelete
  23. essothe
    ********
    سعيده بمستوى الحوار لو كلماته خادشه للحياء زى ما بتقول يبقى متقراش ليه تانى
    واللى مقتبسه من كلامه بلاش انا اعرف لما واحد يحاول يقتبس حاجه من حد يبقى عجبه
    وعموما ممكن تنقد بس مش بالشكل ده ولو هو فاهم معنى الكلام اللى انت بتقوله (مع انى واثقه انه ولا فاهم ولا عارفك ) يبقى تقوله له شخصى
    وسعيده ان وصلتك الرساله وميرسى ليك

    ReplyDelete
  24. باعتذر لإزعاجكم مرة أخيرة

    وباشكرك لذوقك

    ReplyDelete
  25. essothe

    بص انا كنت كاتب رد فى تظبيط
    بس لما لقيتك رديت على ايبى باسلوب محترم
    يبقى اوك
    بس بلاش تدخل تعلق بالاسلوب ده تانى
    و لو عاوز تقوله حاجة
    يبقى تعمل زى ما قالت لك ايبى
    و لو مش عاجبك اسلوبة
    بلاش تدخل تانى
    و مش حقول اكتر من اللى ايبى قالته

    ReplyDelete
  26. و انا اقول مصر مزأططه ليه
    اتاري العائلة الجعانية في مصر

    منور يا عمنا و صيف لا يهمك

    ما انتوا بتروحوا مارينا ياعم و يتشوفوا القطعة الواحده و القطعتين
    .. اهو دا الحقد الطبقي
    انما الغلابة اللي زينا ملهمش الا بلطيم و بين شطين و ميه


    و سينما كمان
    و فشار

    و سجاير مش بعيد تلاقيها مرلبورو

    خيييييانه

    ReplyDelete
  27. فسحة سعيدة
    بس مشكنت تجيب صور من هناك
    تورينا مارينا دي عاملة ايه
    وبناتها شكلهم ايه عشان اشوف ان كنت انفع اروحها ولا لما اروحها هاابقي غفير بالنسبالهم
    يبقي خليني في بيتي احسن بدال مالراجل يقول
    جاتنا نيلة في حظنا الهوباب

    ReplyDelete
  28. yarab tkon nice vacation isa

    شفت بقي اسكندريه اتبهدلت ازاى اهو خلا كل سطر البحر مجاني والدنيا اتبهدلت خالص انا خلاص مبقتش بانزل اجازاتى غير فى الشتا عشان استمتع بمدينتى الجميله من غير زحمه وقرف

    مبروك النونو الجديد يتربي فى عزك
    :))

    ReplyDelete
  29. زميلنا العزيز

    انا مش عارفه اافولك ايه والله

    احلى حاجه الجمله اللي انت كاتباه فوق اي حد بيعلق (بعبع وقول اللي في نفسك يا اخويا)

    ده انا من ساعة ما وصلت مصر وانا مبقوقه بقه !


    اجمل حاجه انك قضيت 30 يوم وبس

    والاجمل انكم رجعتوا تاني الخليج

    يا بختك بصراحه ...غيرك بيعيط دلوقتي ونفسه ياكل شبشب دلوقتي من حرقة الدم !

    والبوست بتاعك ده كله مش قادره ااعلق عليه بأي كلمه ...انا من ساعة ما قرأته وانا عماله اضحك والله

    وباضحك على الخيبه القويه ...لا حول ولا قوة الا بالله

    (معلش بس مرارتي مفقوعه شويه)


    سلم لنا على كوكو وفرح وماماتهم

    -----------------------------------

    كلمه على جنب للشخص اللي بيعلق

    ومسمي نفسه مش عارف ايه ولو ان الزميله العزيزه (آبي)

    قالت بما فيه الكفايه ...


    الا اني احب بس اضيف تعليق صغنن


    الانسان لما يبدأ بالغلط والشتيمه يا ترى الناس اللي قرأت الالفاظ الغير لائقه دي هاتكون فكره شكلها ايه عن الشخص ده ؟

    احنا قرأنا مقاله ...دورنا اننا نناقشها

    ده نظام المدونات

    وان كان الكاتب بمرحه وخفة ظله لم تعجبك كقارئ

    وتتهمه انه ليس بالكاتب !!!


    فاعفوا انت لست بالقارئ ولست بالمناقش الفاهم المدرك الواعي لما يقول ...عفوا يعني انت غير كده اصلا!

    اسمح لي انت نزلت بمستواك الفكري كقارئ اوي !


    دور القارئ هنا في المدونه انه يتلقى فكر الكاتب ويناقشه في افكاره


    اما حضرتك بعدت عن المبدأ ده يبقى انت مش قارئ ...انت داخل تشتم الكاتب باي طريقه وخلاص


    - زي بالظبط اللي بيحدف طوب ...وبالتالي مش مشكله الطوبه تيجي في مين تيجي فيه او فينا القراء ! مش مشكلة المهم انك تحدف الطوب ...هو ده الهدف !!!!


    - كان ممكن تنتقده بطريقه لبقه جدا وتكسب كمان معاك الناس التانيه اللي هاتقرأ تعليقك


    لكن للاسف دايما خسرانيين ! لانه مافيش شياكه في الكلام او توجيه النقد او براعه في ادارة حوار او نقاش ...



    للاسف اصبحت السمه والصفه السائده هي بعض السلوكيات الغير حضاريه واللي بتعكس تفكير واسلوب كل فرد


    لكن كل انسان لو بدأ بنفسه وبسلوكه اكيد هايبقى في فرق للافضل


    ونقول ياربي الناس بتتحضر ازاي !!!


    لا حول ولا قوة الا بالله

    ReplyDelete
  30. هههههههههههههههه

    الححمدلله الذى عافانا

    اسكندريه فعلا بقت طرقها اتجاه واحد

    كنت هناك من اسبوعين

    شوفت كوووول اللى حضرتك قلته ده

    وخصوصا اللى بيطلعوا من الميه ينطوا فى تاكسي

    بس انا بقى شوفت واحد ولد كبير شويه فى بداية العشرين او اقل شويه

    خارج من الميه

    شورت وفقط

    حتى مافيش شبشب فى رجله

    وماشي عااااااااادي

    ماشي فى الشارع عادي

    شارع قدام الكورنيش

    مش الكورنيش حتى

    ReplyDelete
  31. ههههههههههههه...مسخرة يا جعان زي ما اتعودنا نتك
    أجازة سعيدة يا باشا
    وعمار يا مصر
    وسمعني أحلي سلام عظيمة يا مصر يا أرض اللوا
    تحياتي

    ReplyDelete
  32. سيبك انت ..
    حمدالله عالسلامة
    و ربنا يخلي ام ملك و فرح .. اللي قادرة تجري وراهم
    :)

    ReplyDelete
  33. عموما مبروك لبنتك
    دمك ما شاء الله
    خروجاتك جمدة
    ويا رب تكون استمتعت عندنا فى بلدنا الحرانة الملزقة
    ارجع يا عم منين ما جيت
    مش المدام ولدت
    ايه مقعدك؟
    تحياتي
    ومبسوطة اوى انى دخلت عندك
    طب ايه طيب
    مش هتزور مدونة الضاحكون
    يعني احلي من السيما بردو وبخمسين جنيه الدخول فقط
    ومتنساش بردو تحجز لفرح كرسي للأطفال ب100
    بس
    تحياتي ليك

    ReplyDelete
  34. بصراحة شديدة جدا وبدون اى مجاملة
    تحياتى لبنات افكارك
    بوست هايل واسلوب شيق جدا
    شدنى انى اقرا من اول حرف لاخر حرف
    الف مبروك على البونية الملونة فرح وربنا يفرحك بيها هى واختها
    تحياتى ليك
    وسلامون عليك

    ReplyDelete
  35. appy
    وسوري لية
    خدي راحتك
    انا سايب تعليقة مخصوص
    علشان اللي رايح واللي جاي يلسعة علي قفاة



    مواطن مصرى نايم
    عرفت يا باشا
    وحقيقي انا اللي سعيد اني اتعرفت علي مدونتك
    وكفاية ان اسمك اسلام يا ابني
    دة من اسماء العظماء
    والف سلامة علي صباع رجلك
    ترامايسين للاستاذ هنا يا جاااابر

    ReplyDelete
  36. ketchup
    ياباشا منورة بيكو
    وكفاية حقد بقي
    مليتو البلد
    واحب اطمنك ان ساعات بشرب سجاير دافيدوف




    المـــفـــــــقــــــــوعـــــة مــرارتـهــا
    هو الصراحة لدخول الحريم في مارينا عاملين لستة بالمطلوب
    الا تزيد عن 60كيلو
    مع السماح ببروز
    الا يقل الطول عن 160 بدون كعب
    لا مانع لديها من خلع اي حتة من هدومها
    فعلي من تتوافر بها المواصفات السابقة التقدم بصورة وش وقفا
    علي ان يتم البت في طلبها

    ReplyDelete
  37. Nsreen Bsunee
    اها الاجازة كانت نايس و الحمدلله
    وشفت اسكندرية بقت زي نجع حمادي
    احنا نصيف بعد كدة في بحيرة البجع





    nada_adly
    اهلا يا فندم
    وترجعي بالسلامة من مصر
    واتمني للجميع وجبة شباشب وقبايب سعيدة
    واديلة مترحموش

    ReplyDelete
  38. radwa
    اهو يعني شوفتيهم مش انا لوحدي
    مكنتش تهيؤات




    micheal
    باشا زعيم المحللين الكرويين في بر مصر
    وسمع البرنس النشيد الوطني





    قهوة بالفانيليا - شيماء علي
    سايبني علي الاخر
    الله يسلمك

    ReplyDelete
  39. maha zein
    ياستي الله يخليكي
    وانا احب اطمن الجميع اني رجعت خلاص
    والسنة الجاية هاصيف في ايطاليا مع بتوع الحزب الاشتراكي
    نصهم هناك علي فكرة
    سعدت بمرورك





    سبهللة
    يا ستي وبنات افكاري بيشكروكي
    وبيقولولك يا ريت حاجة من طبيخ امبارح
    وسلامون وتونة وسردين عليكي

    ReplyDelete
  40. يا ابني انا اللي باكل في شبشب البيت دلوقتي من حرقة دمي


    هههههه

    بتتمنى لي وجبة شباشب وقباقيب حلوه !

    ههههه


    بس مع السلطات والمخللات !
    ههههه



    يا ابني احمد ربنا انك رجعت الخليج بألف سلامه

    عقبالي يارب !

    ReplyDelete
  41. ravie que notre blog "cent poème d'amour" vous a plu ! mais il faut savoir que il y a trop de gens qui s'expriment en français dans la blogsphere tunisienne
    félicitation pour ton bébé et porte toi bien avec toute la famille

    ReplyDelete
  42. ان من دواعي سرور لنا بلوق "مئة قصيدة حب" لكم نود! ولكن يجب ان نعرف ان هناك عدد كبير جدا من الناس من يتكلمون الفرنسية في تونس Blogosphere
    تهانينا لطفلك وتنقل اليكم جيدة مع جميع افراد الاسرة

    ReplyDelete
  43. وكمان للاسف فى مصر بيعرفوا فرنساوي شوفت ازاي
    ما بلاش الحركات القرعه دي يا ابني بقى انت وهى ما بتحبك ما تقولهاوخلاص

    ReplyDelete
  44. nada_adly
    يا ستي شبشب الهنا ومطرح ما يسري يمري

    ReplyDelete
  45. أرابيـكا

    Je vous remercie de vos félicitations.
    Je n'ai pas reconnaître votre nationalité jusqu'à ce que vous m'avez dit
    Mais je sais que le français est la langue plus populaire en Tunisie, le Maroc et l'Algérie
    Et j'espère que vous avez aimé mon blog

    ReplyDelete
  46. الجندي المجهول
    Anonymous

    ما هو مش كل خرونف عندة برنامج ترجمة زي سيادتك
    فاكر نفسة بيكلم لغات
    وهو خريج مدارس قفا القرد
    وياريتك مترجم صح
    الا صحيح بعقلك الفذ دة انهو جملة لقيت انها بتحبني فيها
    اصل المدام عندي محتارة نفس حيرتي

    ReplyDelete
  47. ترجمة
    سعيدة لانّ مدونتنا الجماعيّة "مائة قصيدة للحبّ" نالت رضاكم ومن المهم الاشارة الى انّه هناك العديد من الاقلام الناطقة بالفرنسية في مجمع المدونات التونسيّة
    أهنيك بالطفل الجديد وكن بخير أنت وجميع أفراد عائلتك

    :))

    ReplyDelete
  48. ياااه انت كنت معانا و لا اية؟

    نفس اللي عملته لما نزلت مصر
    حتى مشوار مرينا


    اجازة بنكع فيها عشة خماشر الف و نرجع زي الشاطرين

    يلا كل اجازة و انت طيب

    طهقانة- سمباتيك

    ReplyDelete
  49. هههههههههههههههههههه
    لا يا عم اصل البحر بيبقى حر اوى على الشط
    فعلى شان توصل البيت لو انت نشفت نفسك عقبال ما حتوصل للبيت حتكون انسلقت من الشمس
    مدونتك جميلة اوى

    ReplyDelete

بعبع وقول اللي في نفسك يا خويا