Monday, July 21, 2008

بلد مزلقانات صحيح


اغلبنا سمع عن حادثة قطار مطروح واصطدامة باتوبيس سياحي

وللطرش اللي مسمعوش باختصار شديد

اثناء مرور القطارمطروح -الضبعة المكون من 4 عربات بمزلقان “فوكا” او فواكه محدش عارف اية الاسم الحقيقي

المهم المزلقان كان مغلق وفجأة اصطدمت سيارة نقل مسرعه بأتوبيس رحلات وسيارتين ملاكى و ميكروباص من الخلف مما أدى إلى اندفاعهم وتخطيهم للمزلقان واصطدامهم بالقطار وانقلاب 3 عربات منه.

وحسب اخر تقرير هناك 40 قتيل و 35 مصاب وطبعا انطلقت تصريحات المسؤلين المعتادة
ان تم انتقال كل القيادات الي موقع الحادث و 40 عربية اسعاف وان رئيس الجمهورية بيتابع الموقف بنفسة

(تقريبا بيشوفة من علي قناة الجزيرة)
ولجان لتاكيد سلامة المزلقان ولجان منبثقة من اللجان لتاكيد نتيجة اللجان وان العيب كان في الجزرة او في احزمة الامان
واسم مزلقان في حد زاتة دلالة علي الانزلاق
فاطبيعي انك تحاسب لتنزلق قدامة

الباشا بقي محمد منصور وزير النقل ‏قالك اية يا واد انت و هو‏ إن حادث مطروح كان حادثا قدريا‏,‏ مؤكدا أن انحدار طريق مزلقان الفوكه مطابق تماما للمواصفات والمعايير الفنية العالمية‏.‏
من وجهة نظري اعتقد انة مطابق لمعايير القرع العسلي الدولية

الي الان و الموضوع عادي جدا بلدنا مبختة بحوادث القطارات و النقل و العبارات و الطيارات و كل وسائل المواصلات علشان احنا شعب رمة وربنا غضبان علينا علشان مبنربطش الحزام

طب يا واد يا جعان اية الجديد بقي
الجديد النهاردة الساعة 6 الصبح فاتح التلفزيون وعمال اقلب واثناء مروري علي قناة المحور كان عدو الشاشة الاول معتز الدمرداش يعاد برنامجة
في المواقف العادية اقوم بتغير المحطة مباشرة ولكن لفت انتباهي انة ساكت ومش فاشخ بقة شبرين
وعمال يستمع لرجل في حوار تلفوني و الذي كان بة القادم:


فقدت زوجتى وبنتى وشقيقة زوجتى فى الحادث ،كنت معهم فى الاتوبيس ولم اكن فى
وعيى وشفت بنتى ورايا بحالة جيدة داخل الاتوبيس وماقدرتش اشيلها وكنت حاسس انها
ميتة ، رحت مستشفى مطروح قعدت يومين ، لقيتهم خدوا الجثة ليبيا بطريق الخطأ ،وانا
معايا دلوقتى جثة بنتهم ورفضت استلمها وقلت دى مش بنتى.، ويكمل الرجل حكايته
الغريبة بدموعه : بدلوا بنتى بضحية تانية وبيغطوا على الموضوع وضغطوا عليا علشان
أوافق وأستلم حد غير بنتى وأسكت ، قالولى بنتك علشان ترجع عايزة 8 شهور


ويستعطف الرجل اي شخص بان يسترجع جثة ابنتة وشهادة وفاة لكي يدفنها لكي يجد شاهد قبر يترحم عليها امامة
ويبكي كما النساء راجيا رئيس الجمهورية بان يتدخل لارجاع جثة ابنتة من ليبيا
وصوت الرجل يدل انة علي استعداد تام لتقبيل جزمة اي كلب حتي و ان كان عسكري امن مركزي اذا لمح بارقة امل في انة يستطيع ارجاع جثة ابنتة
للاسف حكومتنا اساسا مش قادرة ترجع مواطنين مصريين صاحيين و بيلعبو اتقدر ان تعود بجثة
حكومتنا غير قاردة علي حماية مراكب الصيد التي ييطلق عليها النار واغراقها و التي تخطت 16 مركب صيد من قبل خفر السواحل الليبي اتقدر ان تعود بجثة
ليبيا التي لعبت دورًا في جبهة الصمود والتحدي ضد مصر والتي انتهت بطرد مصر من جامعة الدول العربية بعد رحلة السادات للقدس،
اقادرة علي اعادة جثة
ليبيا التي في سجونها مصريين الذين قبض عليهم اثناء مرورهم إلى طرابلس ومنها إلى أوروبا اكثر من الليبيين انفسهم ولا تعلم حكومتنا عنهم شيئا او مطرمخة عليهم ما في 90 مليون غيرهم اتقدر ان تعود بجثة
نصيحتي لهذا الغلبان نط من فوق نفس المزلقان علي امل ان يلقو بجثتك في ليبيا فيلتئم شمل اسرتك اعتقد هايكون اسهل كتير

43 comments:

  1. يااخي لو لاحظت هتلاقي كل سنة لازم في مصية في البلد بطلها وسيلة مواصلات
    قطر بيولع و سفينه بتغرق و قطرين بيدخلوا في بعض و ادي مطروح والمزلقان

    و عشان الناس اللي بتخاف على عمرها انا عدي اقتراح
    انهم يركبوا ريش ويطيروا من فوق عماره عاليه بدل المواصلات

    و اهو برضوا هنحل ازمة السكان



    الانسان اللي فقد اهله ربنا يصبره و يارب منشفش اي حد في موقف زي دا



    بصراحه من كثرة اللي بنشوفه من حكايات ومأسي حاسس ان الشعب كله جسمه نحس و معدش بيتأثر بأي حاجه

    ReplyDelete
  2. اتبدلت البنت بالغلط
    والحادثة اصلا حصلت بالغلط !!

    كل حاجة عندنا نرجعها للغلط لمؤقت اللي حصل

    الله المستعان

    ReplyDelete
  3. علي فكرة لسة فية اول امبارح حادثة تصادم قطار مع ميكروباس في - مزلقان بنها الجديدة-

    و توفى فيها واحد قرينا :(

    ربنا يسامحهم

    ......................


    بالنسبة لرجوع الجثة هما أصلا تعرفوا عليها و مش عايزين يرجعوهالوا ولا متعرفوش علي الضحايا من بصماتهم
    ولا إية النظام ؟؟؟

    يعني لو متعرفيش عليها اية الفايدة انها تفضل عندهم
    انما لومتعرفوش و دة الارجح
    ماهو مفيش موارد
    ماهو مفيش امكانيات

    ربنا يسامحهم بقة

    و يصبر ابو الزوجة الابنة

    و يصبر قريبتي علي فراق ابنها
    ...........

    دمت سالم
    سلامٌ عليك

    ReplyDelete
  4. ولا عزاء فى مصريين
    مبسوط لحرقه الدم دى اصلى كنت ناقصاها
    بجد انا هسبها وامشى فى اى مصيبه اهون من القرف اللى بقى فيها
    ولا ولادها بقوا رجاله ولا بناتها بقوا جدعان ولا فيها حد بيخاف على حد اتحولت لغابه اتبسطت انا اصطدمت بالواقع اللى بهرب منه اهو وخلاص علشان الناس ترتاح
    وقال انا اللى كنت عاوزة اروح اشوف الناس اخدت التعويضات ولا لا
    يعنى ايه بنت اتغلطت ببنت هى فرده شوز ولا ايه يعنى مش فاهمه
    والله دى حرقه دم ربنا يرحم الجميع يا رب
    بس يا رب الليبين يبقى عندهم عقل ولا دم ويعرفوا ان دى مش بنتهم ساعتها هنضطر نرجعها زى الشوزات من غير اى حاجه

    ReplyDelete
  5. السلام عليكم ورحمة الله وبركاته

    حسبنا الله ونعم الوكيل

    صحيح المسئولين فبلادنا ناس ماعندهاش دم

    ReplyDelete
  6. مابقاش في حاجة بتلم الشمل غير الموت
    ربنا يخليلنا المزلقانات ( لتسهيل المهمة طبعا ) ده احنا محظوظين بشكل

    ReplyDelete
  7. ياباشا محمد منصور مش فاضى
    خليه فى شيفورليه
    وبكره هنلاقى اعلان فى التلفيزيون
    حفاظاً على سلامتك لا تركب القطار واركب سياره شيفورليه
    وندعمه بحادثتين قطر
    -----------------------------------
    الكلام اللى انا كاتبه فوق ده كان قبل ما اكمل البوست
    ايه البلد دى؟؟
    هى ضاقت بينا للدرجه دى
    وليبيا بلد بنت ستين فى سبعين اصلاً
    والريس بتاعها ابو جلابيه وخيمه

    الراجل ده والله العظيم بيقطع فى قلبى
    للدرجه دى
    مش عارف يسترد جثة بنته
    جثه؟؟
    والله حرام

    وبجد انا زعلان منك
    انا بطلت اسمع العاشره مساءً
    والطبعه الأوله
    وفى الطبيعى مابسمعش معتز
    ده كله علشان النكد
    انا لسه صغير عالضغط
    آجى هنا الاقى كده بردو
    حسبى الله ونعم الوكيل

    ReplyDelete
  8. اسلام يا عزيزي
    لو تفتكر قلتلك مرة
    عندما تكثر المصائب تقل الهمم ويموت القلب وتتلاشي الاحزان سريعا

    اصبحنا في حالة من البلادة الانسانية
    سواء عندك او عندنا
    نري القتلي يوميا ولا يهتز لنا جفن
    اسأل الرحمة لهم ولاهلهم فهم في حاجة لها اكثر ممن توفوا

    انت طلعت مشكلة يا ولد

    ReplyDelete
  9. معقول فى اى بلد محترم..يكون الطريق قبل المزلقان منحد
    ينعى اصلا بالشكل العام للطريق هيخلى السيارت تنحدر
    مش محتاجه مقطوره
    وقال هيعمنلوا قانون بالحبس
    هما محبسوش ا لمسؤل ايام قطار الصعيد
    ولا دى غلطت الناس اللى اتحرقوا
    الله يحرق قلوبهم زى ما هما مخلينا مستنين ..مصيبه قد تصيبنا من جراء سياسة الاستهتار
    حسبى الله ونعم الوكيل

    ReplyDelete
  10. ketchup
    انا اعتقد ان الحوادث دي كلها مخطط مدبر
    علشان يطبقو قانون المرور الجديد
    علي الكل عربيات بقي طيارات مراكب بهايم اي حاجة بتبرطع في الاراضي و الاجواء المصرية

    ReplyDelete
  11. أبوعمر
    الواحد يا اخي خايف اصحي الصبح
    الاقيهم بدلو شارعنا بشارع في ليبيا

    ReplyDelete
  12. نعكشة
    البقاء لله
    ربنا يصبركم
    ويصبر اهلة
    للاسف دة حال بلدنا البني ادم اصبح ارخص شيء

    ReplyDelete
  13. appy
    لية التخبيط دة بقي
    ما البلد ماليانة رجالة
    بصي انتي حواليكي بس

    واية حكاية شوز دي
    هي جزمة بقت كلمة ابيحة وانا معرفش
    نزلوها جدول اباحة
    الله يرحمة بقي

    ReplyDelete
  14. خمسة فضفضة
    سيبك انتي يا دكترة من الكلام دة
    قوليلي في امل البامبرز يرخص

    ReplyDelete
  15. Unique
    علشان تبطلو بطر علي النعمة
    وتعرفو قد اية الحكومة يهمها
    ان الناس تود بعض كدة

    ReplyDelete
  16. اه بصيت حوليه ومش لاقيه رجاله هااااااااا اى خدمه ادور تانى ولا كفايه كده
    ثانيا لا مش نزلوها جدول اباحه
    بس ريحتها وحشه مش بحب اذكرها قوى
    يعنى التانيه بتحسسنى بالنظافه بتاعت الاجانب وعفانه المصريين

    ما قولت لك بلاش انا اليومين دول وعموما مش هرد تانى

    ReplyDelete
  17. لا حول و لا قوة إلا بلله
    هوه طبعا حضرتك بما انك جعان على طول
    و احنا كمان جعانين و عطشانين
    عاوزه اقولك
    ان الحادثه ديه مش حرمي كل غلطها على الحكومه
    لأ
    على الناس اللى زيي و زيك اللي لازم يراعوا ربنا
    ماكانش ده حصل
    بس برضه قدر الله و ما شاء فعل
    بس حكاية ان البنت اللى راحت بالغلط ديه...صاعبه شويه....
    فرستني...اكتر من اني مفروسة

    ReplyDelete
  18. حبعبع

    ةالله لا أبعبع

    منهم لله

    وحسبي الله ونعمه الوكيل

    الله يحرقهم بجاااااااااااااااز

    ReplyDelete
  19. ياجماعه سبب الحادث
    دا

    واحد مختل عقليا دخل غرفة التحكم بتاع القطر وقتل السواق واللى معاه ودمر الدنيا فى بعضها


    ياعم والله الواحد مش عارف يقولايه
    غير حسبى الله ةونعم الوكيل

    ReplyDelete
  20. Oss
    ياباشا كلهم مش فاضيين
    كل واحد مشغول في البيسبس بتاعة

    وحقك علي بعد كدة هاحط تنوية ان التدوينة دي
    للمكتئبين فقط

    ReplyDelete
  21. Noor P.G
    يااهلا يا اهلا
    ازيك يا مدام نور
    والله خطوة عزيزة
    وانا يا فندم طول عمري مشكلة بس الحظ الاغبر بقي
    وسلامي للاسرة

    ReplyDelete
  22. ام البنات
    يا ستي عفا الله عما سلف و احنا ولاد النهاردة
    واللي يموت في غيرة كتير
    متوجعيش قلبك

    ReplyDelete
  23. appy
    صديقتي اللدودة
    واضح ان الدنيا ضلمة فا الرؤية مش واضحة
    اتمني يكون مزاج سيادتك اتظبط اليومين دول
    وسلامي للوالد
    عايزين نشوف حكاياتة عن ايام الحرب

    ReplyDelete
  24. واحدة مفروسة
    اكيد كلامك مظبوط
    الخطأ لاطط الكل
    انا عن نفسي براعي ربنا
    من ساعة اخر مرة زقيت عربية قدام قطر
    توبت الي الله خلاص

    ReplyDelete
  25. يقال أن الخطة المستقبلية لوازارة النقل لتلافي مخاطر حوادث القطارات التى تنوعت أشكالها وتعددت طرقها
    هي فرض زيادة على تذاكر القطارات
    كرسوم دفن وتغسيل وتكفين الموتى

    ReplyDelete
  26. صباح الفل يا ريس
    صباح الدماغ العالية
    عجبني جدًا نظام البلوج بتاعك ما شاء الله
    واضح انك بتحب الحكومة قوي
    انا سمعت عن حادثة مطروح آه
    ومستغرب انها مخدتش ربع دعاية قطر قليوب رغم ان عدد الضحايا متماثل تقريبًا
    بس احنا الظاهر متعودين ان الكارثة اللي بتحصل مرة مفيش مشكلة تحصل علطول محنا جربناها
    بلاش حرق دم يا عم
    كفاية تقول تحيا مصر وخلاص !

    ReplyDelete
  27. مش عارف
    اه و الله
    مش عارف انطق
    خرس بجد
    لانى نفسى اعمل حاجة وم ش بإيدى
    ربنا عالظالم
    دا كل اللى اقدر اقوله
    لان احنا شتيمة فى الحكومة بنشتم
    وقفات بنقف
    اضرابات بنضرب
    مظارات بنطلع
    و مفيش جديد

    ReplyDelete
  28. انا اول مره ازور مدونتك بس بجد عاجبااااانى جدا بجد بحب اجى هنا كتير يا اسلام

    ReplyDelete
  29. ازيك يا جعان باشا
    مبروك صورة البروفيل
    مش هقولك غير ان حال البلد من سئ لاسوء وازفت
    يبقى الحل اننا نعيش واحنا ساكتين واهى ايام وبتعدى
    يا اما نستعطف اى دولة غنية تتبنانا وتصرف علينا ولها السمع والطاعة
    اقولك نفض انت وخليك عايش فى زكريات مارينا ..وسلملى على ملك وفرح ومامتهم
    ربنا يخليهملك
    على فكرة الناس مبقتش بتفرق معاهم اى نوع من الصدمات نتيجة الحوادث
    عادى يعنى الاخبار بتجيب كل الحوادث الى بتحصل والناس بتتفرج وهيا بتتعشى وتقول يا حرام وتلاقيها قلبت على ميلودى هيتس وعادى
    انا بقيت من الناس دى..
    بطل تقرا اخبار عن مصر وانت تلاقى العيشة فل
    سلام يا ورد

    ReplyDelete
  30. مضيعنا عايشين و ميتين!!0
    ربنا يصبره
    و يصبرنا


    ---
    على فكرة انا كلبوزة لكن سمباتيك

    اوروفوار

    ReplyDelete
  31. السلام عليكم ورحمة الله وبركاتة

    اول زيارة ليا تكون فى حادثة


    الله يسامحك جانى احباط على احباطى

    يا اسلام احنا عايزين نقرب من ربنا

    كتير كل الكوارت دى ابتلاء من ربنا

    وربنا يرحم موتنا وموتى المسلمين

    وبعدين يا اخى الفاضل دى نصيحة

    حرام عليك بتقولة روح موت

    الله يصبرة ويكون فى عونة

    والله المستعان

    تحياتى لك

    بنت النيل

    ReplyDelete
  32. يا دى حرقة الدم
    هو انا ماينفعش احس مرة فى يوم انى عايشة فى بلد محترمة
    للاسف لا
    معلش يا جعان هبيت فيك
    حسبى الله ونعم الوكيل

    ReplyDelete
  33. بص ياجعان يااخويا
    عشان اختك اصلا جالها شلل من الناس دي
    بس بجد
    احنا اتعودنا علي كده
    لازم تحصل مصيبه عشان الغلط يتصلح
    اما موضوع الجثه
    صحيح ربنا مع الراجل
    بس المسؤلين مش حيطلعو نفسهم غلطانين
    ابدا
    تبقي كده مصر حصل فيها انقلاب لو مسؤل قال انا غلطان
    اختك زفته هانم
    دي اول مره ازروك
    ممكن تسمحلي اجي تاني

    ReplyDelete
  34. اولا حمدلله على سلامه الرجوع للمدونة ولو انها متاخرة
    الظاهر المواطن فى البلد دى لازم يقضيها موتورجل علشان يضمن انه ميموتش محروق ولا غرقان
    حتى ابسط حقوق البشر فى مواصلة امنه مش موجودة
    وفاية عليهم لما تحصل المصيبة يتباهوا بسرعه الوصول لمكان الحادث وكانه سباق عجل
    ربنا يرحمهم برحمنه ويتولانا
    سلام

    ReplyDelete
  35. السلام عليكم
    مزلقانات ولا عبارات اقولك اللي فيها
    ارخص شيء على وجه الكرة الارضية
    المصري
    عارف انا دلوقتي عاوزة ايه؟؟؟
    عاوزة امشي انا وعيالي وزوجي من هنا
    على الرغم من حبي الشديد ليلدي لكن بقيت خايفة منها
    تعرف قعدت احاسب نفسي واقول يا ريتني ما تزوجت ولا خلفت عيال يجوا يتظلموا واخاف عليهم هنا
    استغفر الله العظيم
    بجد انا خايفة اوي مش قادرة اقولك اد ايه

    ReplyDelete
  36. لولا
    بعبعي لايطقلك عرق
    وانتي صاحبة عيا


    مواطن زهقان
    هي فعلا بلاوينا كلها سببها ناس مختلة عقليا
    في الوزارات و المجالس و الاحزاب

    ReplyDelete
  37. Che_wildwing
    اقتراح مش بطال
    واهو الواحد يبقي مغسل و ضامن كفنة و الجنة


    كوارث
    صباحة يا عم المصايب كلها
    وسعيد باكتشافك للمدونة
    وسعيد بظهور حبي لحكومتنا المبجلة
    وتحيا مصر وتحيا كاريوكا

    ReplyDelete
  38. مواطن مصرى نايم
    مش كفاية نوم بقي ولا اية
    للعلم كل ما يقوم بة الناس مظاهارات اضرابات وغيرها
    كلها مسموح بها من قبل الحكومة علشان الناس يتهيالها انها بتعمل حاجة و ان في امل في التغير


    مدرسة الفشله بنات
    ست الفشلة كلهم
    اول مرة اية بس ما انتي كنتي لسة في الفصل اللي ورانا.

    ReplyDelete
  39. البنت الشلبية
    انتي شوفتيها الله يجبر بخاطرك
    بس اية رأيك مش انفع اعمل الفوازير السنة دي
    المهم كلنا هذا الرجل
    لكن في ناس بعد ما بتشوف مابيجلهاش نوم
    ربنا يشفينا كلنا من حرقة الدم


    bastokka طهقانة
    لا افهم بقي
    انتي مين بالظبط
    ولا دة كان كلة تموية
    وانتي واحد

    ReplyDelete
  40. علشان احنا شعب بينسى وبيطرمخ عليه كتير محدش فاكر انى وقت ما اتباعت الرخصه الثالثه لشبكة المحمول الجديده " اشتغالات" محمد منصور لهف منهم 5 مليار جنيه مع توفير 3.5 مليار جنيه لتطوير السكة الحديد والمزلقنات والنتيجه صفر 8.5 مليار جنيه علشان الحوادث تتكرر تانى
    قال فى تصريح عقب حادثه برضه انى خلال 24 شهر حيشعر المواطن فى تحسن وواضح انى التحسن انى الجثث تتبعت غلط على ليبيا حسبى الله ونعمة الوكيل

    ReplyDelete
  41. لو سمحت ياريت حضرتك تتفضل عندى فى المدونة وترد على سؤالى لانى مش فاهمه قصد حضرتك بالظبط
    وميرسي جدا

    ReplyDelete
  42. فى اوروبا والدول المتقدمة بيقدمو مع المزلقان طحينة

    لا بجد والله ليه مافيش تخطيط سليم لكل الطرق مهما كانت فين

    من اصغر شارع لاكبر شارع التخطيط غلط

    يبقى عايزين الطريق السريع يتعمل صح عيب علينا والله بنطمع اوى

    مانتو شايفين فى شوارعنا الحارات موجودة ومرسومة سليم وتخطيط الرصيف سليم والشوارع مساحات واحدة يعنى مش الكل ملاحظ ان الشارع من اوله لاخره متساوى فى نفس عدد الحارات
    لا اللى يجنن اوى بقى انك تلاقى رصيف واكل ربع الشارع مع انى ماسك الحارة الشمال جت منين الطوبة اقصد بداية الرصيف دة
    وبدون اى علامة مسبقة

    ولا نتكلم على ان مافيش علامات ويفط صح وكفاية

    بصراحة يا جماعة انا كنت بعد الحادثة بكام يوم على نفس الطريق وشوفت الشكل وسبحان الله كان صعب وهو كدة الله يعين اللى شافه وقت الحادثة

    الله يرحم امواتنا اجميعين ويصبر اهاليهم
    ومانجلكمش فى حاجة وحشة يارب

    ReplyDelete
  43. واحد مختل عقليا دخل غرفة التحكم بتاع القطر وقتل

    ReplyDelete

بعبع وقول اللي في نفسك يا خويا