Sunday, August 24, 2008

بتاخد فيزا شكلك هتاخد فيزا

من باب الغلاسة عليكو و علي نفسي الموضوع دة
من عاداتي الصباحية تصفح حوالي 30 او 40 موقع علي النت ما بين اخبار سياسية اجتماعية اقتصادية فنية
مدونات دة غير متابعة ال rss feed حاجة بتاعة 50 مدونة وموقع اخباري وجرائد تنشر علي النت علي الريق
فا حابب اشارككم بعض الاشياء اللي بتقع في طريقي من باب تفريج الهموم واضفاء البسمة علي خلق سيادتكم


خبر طريف لطيف رقم واحد
بيقولك اية يا سيدي وماسيدك الا انا قناة للمنتقبات فقط اسمها «ماريا»
صاحبها واحد اسمة الشيخ ابو اسلام ( لا ابويا ولا اعرفة)
كل اللي شغالين فيها منقبات مديرة القناة وصولا إلى أصغر العاملات فيها، كلهن منتقبات
صاحب القناة هو ايضا صاحب قناة الامة وهي قناة انشئت خصيصا للرد علي افتراءات قناة الحياة القبطية علي الاسلام
وهلفطة ابو قصة السكرة زكريا بطرس
وللاسف جمد نشطاها موقتا لعدم وجود تمويل ما هو فلوس الناس رايحة علي ميلودي ومزيكا يسرقو يعني
المهم مع كامل احترامي للمنتقبات اثابهم الله
قناة تلفزيونية ومنقبات ازاي يعني حد يفهمني اذا كان المتحدث عبيط ما يبقاش المستمع اهبل
طيب ما يعملوها اذاعة وخلاص المنطق بيقول كدة مادام محدش شايف حاجة
المتنبي الله يكحمة بقي مطرح ما راح قالك
أغاية الدين أن تحفوا شواربكم ...يا أمة ضحكت من جهلها الأمم


خبر طريف ظريف رقم اتنين
تعتزم مسلمة منقبة مبادلة زوجها لمدة اسبوعين مع امرأة بريطانية لديها ابنة سحاقية في السادسة عشرة من عمرها، وذلك في اطار برنامج "وايف سواب" الذي تبثه القناة الخامسة في التلفزيون البريطاني.
wife swap
الخبر هنا في جريدة
the sun
ولجهابزة اللغة الانجليزية وخريجي مدارس علمني الانجليزي والنبي يا احمد الخبر هنا بالعربي
موقع البوابة
انا مش قادر الاقي حكمة في الموضوع دة من الحلقة يعني هل المفروض ان الست المسلمة المنقبة هاتتعرف علي عادات الانجليز
في شرب الخمور ولعب البلاك جاك وشذوذ الابنة مع بنت الجيران وعمل مسقعة لحم الخنزير بالباشاميل
وهاينتهي انها تقنعهم بالتنازل عن الخنزير في المسقعة والاكتفاء بالحواوشي وفي المقابل هاتقتنع انها تقلع النقاب
علشان العيال بيخافو منها في عيد الهالوين
الهالوين دة زي طلعة المحمل عندنا



خبر اطرف واظرف من اللي فاتو رقم تلاتة
اولمبكيات بكين والبعثة المصرية وانا وانت
بتاع مية وسبعين فرد عدد البعثة المصرية منهم 99 لاعب ولاعبة
رجعنا بحتة حديد درجة تالتة
لا شوفنا دهب ولا حتي قشرتة واللي اتكسرلة ضلع واللي اغمي عليها وكسة ما بعدها وكسة
وكرم جابر اية اللي بيتصدر وماسك العلم المصري مش دة برضة اللي اتحكم علية ب 3 سنين غيابي علشان ضرب سواق تاكس
بيقولك الدول العربية كلها ملمتش غير سبع ميداليات ذهبيتين وثلاث فضيات وثلاث برونز و رغيف بلدي هدية من لجنة التحكيم
270 مليون عربي و سبع ميداليات لية شعوب مكسحة معندناش ابطال معندناش فلوس معندناش اية بالظبط حد يفهمني
الحاجة الوحيدة العدلة في الموضوع دة كلة العداءة البحرينية رقية الغسرة المحجبة التي اثبتت ان الحجاب ليس بعائق امام اي نشاط
كما يدعي بعض الحمير من مدعي التفتح والتفشخ العقلي



خبر طريف تييت تيت رقم اربعة
كادر المعلمين وكلوت المدرسين ولباس التعليم
كادر اية يا ابو كادر انت عارف قبلا معني الكادر اية
المختصر دة اشتغالة جديدة لاسكات الغلابة من المعلمين لن يدخل الكادر سوي 10 في المية من المتقدمين لامتحانات الكادر



مش عارف خبر دة ولا اشتغالة
سنترال جرجا باسيوط الموظفين تقريبا يوميا في حالات اغماء وطراش
وديوان المحافظة بذات تفسة اتحرك ولجان طبية وفرق تفتيش ومفيش سبب واضح
في اللي بيقولك يا اخويا السنترال دة مربوط ومعمولة عمل
واللي يقولك راكبة جني كان طالب نمرة ومتحولتش بقالها سبع سنين
واللي يقولك دة محسود عندة عدد وكباين مش موجودة في بر الصعيد كلة



خبر بطراطير رقم خمسة
ايمن نور يرسل خطاب مفتوح يستعطف المعلم اوباما بتربة امة انة يشوفلة حل ويخرجة من الباكابورت اللي هو مسجون فية
وانة كبر وصحتة معادتش مستحملة مرمطة في كبانيهات امن الدولة وقام المعلم اوباما مشكورا بنشر نص الرسالة علي موقع حملتة الانتخابية
يحتوي الخطاب علي مسح جوخ للااسطي اوباما مع اشادة نور بفكر وعقلية اوباما الديموقراطي الفذ ابو عيون جريئة
واحتوي الخطاب علي شوية كلام عن العراق
والحوار السوري الايراني وتاكيد نور ان احمدي نجادي سوف يطيح علي ايدكم الكريمة باذن واحد احد
واننا في انتظاركم لتصحيح اوضاع الشرق الاوسط
اللي عايز يعرف بالتفصيل اللينك فوق اهي واضح ان الحج نور استوي علي الجنبين بدل ما ينادي علي شعب مصر الحقوني يا اخوانا مرسي ابن المعلم زناتي انضرب يا مينز
للعلم خطاب نور موضعة في موقع اوباما تحت عنوان ماذا يقول الاخرين



خبر بترتر رقم استغفر الله العظيم " سيكس "
الفاضلة ايناس الدغيدي AKA ايناس صديقة الطلبة
ظهرت في برنامج ضد التيار تطالب باعادة ترخيص الدعارة في مصر وان من وجهة نظر سيادتها ان هو دة الحل للقضاء علي الدعارة
فكل ممنوع مرغوب فاذا جعلناها مباحة الناس هاتقرف وتطلع تجري بعيد ياااي دعارة
ولا ناخد التجرب الايرانية حدوة لينا بتاعة بيوت العفاف وجواز الستين دقيقة واقلب
وطبعا ترخيص الدعارة هايرجع مهن انقرضت يا اخوانا برضة الست بتبص لبعيد ومستقبل الشباب الصايع اللي متخرج من علوم وهندسة وطب ومش لاقي شغلانة فستعود مهنة القواد للرجال و العايقة والمقطورة للنساء والعايقة هي القوادة والمقطورة هي التي تمارس النشاط
وترجع اسماء النجوم تلمع في عالم اللحم الرخيص كما ايام الملك
حسنية الانجليزية , سنية الطرية, شفيقة صرة ,زينب الفطاطرية وبهية الزايطة
فتحي طرطور, زينهم ديل الكلب وسكسكة بتاع العيال وكثير من نجوم عالم الدعارة


كفاية كدة ولا تاخدو كمان
الشوري اتحرق 150 مليون جنية خسائر دة غير اوراق يا عالم في نسخ ليها ولا لا
وجاري البحث عن الجناة
فاكرين الواد المجنون اللي قتل عيلة في الصعيد تقريبا هايطلع هو اللي حرق المجلس
وان لم يتم العثور علية في اوامر عليا بتلبيس عبيط المعادي او توربيني العيال القضية


ابحث مع الشرطة
طفلة خرجت لطابور العيش منذ اربع اشهر ولم تعد
ترتدي مريلة ومعاها 4 جنية بتلاتة جنية عيش وبجنية فلافل
الرجاء من يعثر علي الاربعة جنية او العيش والفلافل ابلاغنا ولة جايزة مغرية لحسة طحينة
اذا حد لقي البت من غير الفلوس ولا الغموس يخليها عندة
ابوها هايطخها

58 comments:

  1. لولولىىىىىىى انا اول مره اعلق وكمان ابقى اول تعليق دا ايه السعد والهنا دا هروح اقرا تانى انا قريت مره بس زياده توكيد بقى

    ReplyDelete
  2. هوا البوست باين من عنوانه اصلا اولا ماقريت العنوان قلت ها استر يااااااارب ياترى ناوى على ايه ياسى جعان الممره دى



    تفتكر شكل قناه المخمارت دى هيبقى ازاى ياسلام لو الخلفيه تبقى سوده والمذيعات لونهم اسود وتبقى قناه سوده ويوم منيل يوم ماتتعمل مع طبعا احترامنا للمنتقبات كلهم بس مايعملوها راديون على رايك

    بالنسبه للكادر انا ماما وبابا رايحين يمتحنو بكره ياضنايا ربنا معاهم ويجيبو مجموع يشرف ولادهم ويرفع راسهم وبلاش تتريق عشان دول بابا وماما اوك

    السنترال بقى انا بقترح انهم يعملوله زاااااااااار عشان اسيادنا يجعل كلامنا خفيف عليهم بسيبوه ويخرجو ويفضلو يقولو يازركوش ياابن عفركوش اقسمت عليك ان كنت فالعده اطلع عالسماعه وان كنت عالسماعه اطلع على ا لموظفين لحد مايخرج اشتاتا شلوت

    هوا انا اول مااعلق عندك يطلع البوست طويل كدا لييييييييه هروح اعمل شاى واجى

    ReplyDelete
  3. السلام عليكم ورحمة الله وبركاته...
    اول خبر: صحيح الاذاعه اقل تكلفه وملوش داعي يطلعوا بالتلفزيون... ويقدروا يعملوا رابط الاذاعه على التلفزيون احسن مايتكلفوا ديكورات... وكاميرات... وبلاوي...


    الخبر التاني... لا اصدقه... ولو حاولت اني اصدقه... لا ألوم لا زوجها الخروف ...

    اما خبر ايناس: عيش كتير تشوف كتير...ده عايزه تخصخص شباب مصر بقه...

    الخبر الاخير: البنت طفشت
    شكرا... بس ده مش اخبار طريفه ده بلاوي...
    تقبل مروري

    ReplyDelete
  4. كنت جاي اشكرك على تعليقك الرائع في مدونتي

    واقولك انك انسان جميل ومحترم ومميز

    بس لقيت مدونتك حلوة قوي فقلت اقرا فيها شوية

    بحبك
    :)

    ReplyDelete
  5. السلام عليكم
    تدوينة جميلة أوييييييي و دمها خفيف
    أنا عايزة أحيي حضرتك على ردودك المتعقلة اللي قريتها على مدونات أخرى ربنا يفتح عليك و الله ردود كويسة جدا و متعقلة و مفيهاش تعصب و غل زي ناس كتير ما بتعمل
    جزاك الله خيرا

    ReplyDelete
  6. بجد مقدرتش امسك نفسى من الضحك
    Bravo !

    ReplyDelete
  7. هههههههههههههههة مية مية واللة بس قناةالمنقبين دى ممكن تبقى فيها برامج مسابقات زى بتاعت سترايك ويا ترى دى شكلها هيبقى عامل ازاىوالاعلانات بتاعت 0900ولااية.وبقول للست ايناس حامية حمى مصرومعيدة حضارة7000سنة هوحد عينك مصلحة اجتماعية وبعدين ايه هو الاصلاح فى عودة الدعارة ناقص تقولى ان الست ليها الحق تتجوز 4 علشان الستات ماتحسش بعقدة نفسية بقولكح يا بهيمة روحى اتلهى وهو مين اللى رباك وخلاكى فى البيطاقة مسلمة

    ReplyDelete
  8. و الله ما عارفه أضحك و لا أعيط
    مشيها ضحك ما دام العياط مفيش فايده منه (:
    بس سؤال كده
    هو انت كل يوم بتصتبح بالأخبار دى ؟؟
    حضرتك قاصد ضغطك يعلى و لا ايه ؟؟ :)
    ربنا معاك و شكرا على الأخبار ال ..........

    ReplyDelete
  9. طيب ومن بابا الخنقه عليك هرد وامرى لله انت عارف انا مسكتالمجلس ومش فاضيه

    اولا:- طيب مش يمكن هيعملوا اكلات يبقى لازم نشوف بعنينا مش تخليك مفتح كده برضه
    عموما الداعى من ورا الموضوع يعلمه الله ثم صاحب القناه اذا كانت هليله بيتاجر باسم الدين او حقيقه عموما الايام بتثبت ابقى ركز وانت تعرف وبعدين يا اخى احسن خليهم مش باينين حتى تركزوا فىالكلام بدل ما بتقعدوا تركوزا فى البنات ولا بنركزفى الاولاد ومش بنستفيد من الحاجه ابدا هههههههههههههههه
    وبعدين فيه حاجه فى التخاطب كل ما تكون قدام الانسان كل ما يكون تأثيرك عليه اقوى مش شرط السمع بس هتقولى ما هى مش باينه بس اقولك شايف حد بيتحرك لحم ودم مش خيالات
    ده راى وشكرا لكم


    الخبر التانى

    لا ده كتير شويه عليا بس بقول يا رب يهدى وتطلع هى اقوى وتاثر على البيت بالايجاب وعلى فكرة برضه الاجانب عندهم الكويس بس اساسا شرعا حرام انا مش فاهمه ازاى عموما العيب عليها مش على انها ايه ودمتم



    اكرم جاااااابر استوب وفضايحه فى الكازينوهات والمطاعم متعد شمن الاخر الستات يا خويا جابه اخره خلاص قال بطل قال
    المحجبه عمر الحجاب ولا النقاب سبب فى تأخرنا السبب بجد هو الناس اللى مش بتعرف تستخدم الحاجه صح انما بتستخدمها غلط العيب فى الشخصيات نفسها


    الكادر فضيحه
    عارف ليه انا شايفه انه كويس بس بين بلاوى متنساش ان فيه مدرسين مينفعوش يربوا نمله حتى ففضايحهم هتتكشف بجد لو مشوا الامتحانا ت اللى بتتعمل صح ويطبقوه على الكل



    الخبر الاشتغاله
    يععععععععععععععععع


    الخبر بتاع ابو طرطور
    طول عمرة ممثل وطول عمرى مش بحبه وشهادتى فيه مجروحه بس ربنا يفك سجن كل مظلووووووووووم بس
    علشان يلم الناس التانيه هههههههههههه اللى وراه



    الخبر استغفر الله
    والله انت كارثه مظبطها صح دماغ يا ربى
    الدعاره مش دى بس فيه دعاره الفكر كمان يا عمنا وبقت منتشره فى مصر كتيررررر فمن ضمن يعنى اللى بيطالبوا بالحريات يشربوا
    ويورننا عاوزين يمشوا فين وبعدين هى ناقص الرخصه يووووا عادى اتنين جنيه وبتعدى من اجدعها امين ههههههههههه


    اما البحث مع الشرطه مش عارفه يعنى هو بقى لقمه العيش احسن من الابن ولا ده حال بلدنا كل اللى يهمنا الاكل والشرب بس

    كلمه اخيره على جنب
    بوست فى الجون هتعرف تصطاد بيه الدبان واللى بيصطاد فى الميه العكرة
    تلميذه على ما تفرج

    ReplyDelete
  10. السلام عليكم
    خبر القناة ما يمكن يكونوا اداريين وحضرتك قلت اهو المديرة ووووو
    المذيعة دي بصراحة ما اظنش خاااالص لاكتر من سبب اولها المصورين رجال ولا هيحكموا انهم يكونوا سيدات برضه ومنتقبات افترض ان الخبر دة اشتغالة بصراحة
    لان صاحب القناة الاخ وسام عبد الله صاحب غرفة في البال توك برضه وابو اسلام دة كونية تقريبا فمن متابعيه انا على البال توك ولو كان كانوا قالوا لنا وتزلولنا التردد ومواعيد برامج زي ما عملوا وقت قناة الامة
    موضوع المسلمة البريطانية دة اذا صح برضه يمكن يكون له هدف اظهار صورة الدين الاسلامي وربنا يعفهم بقى وما يقعوش هما في الفتنة ولو حاجة تانية بقى يبقى حسبي الله ونعم الوكيل
    هلفت نظرك لان الموضوع دة هيتملي تطاول والله لا اقصد من لفت نظرك الا الخير
    الباقي لا تعليق غير انا لله وانا اليه راجعون ولسة هنشوف
    البت الظاهر طمعت في العيش والطعمية
    كل عام وحضرتك بخير
    تحياتي

    ReplyDelete
  11. بجد انت دبحتني ضحك
    اخبار تجيب السكته الدماغيه
    تحياتي للرائع دائما

    ReplyDelete
  12. ههههههههههه
    لا حول ولا قوة الا بالله

    فعلا ما فيش غير لا حول ولا قوة الا بالله
    شر البلية ما يضحك فعلا

    بس بجد الله يكرمك على انك ضحكتنا
    وربنا يعفو عنا بقى

    ReplyDelete
  13. سمر الشافعى
    يا ستي مبروك اول تعليق وعقبال ما تعلقي دايما
    هي مش قناة للمخمرات هي للمنتقبات
    المهم مش هاتريق علي بابا وماما مقدرش طبعا
    انا بتريق علي الكادر
    وان شاء الله يشرفوكي ويجيبو مجموع وتتفشخري بيهم في كل حتة


    أكون او لا أكون
    وعليكم السلام ورحمة الله
    يا سيدي يا خبر النهاردة بفلوس
    بكرة ينزل علية الاوكازيون

    ReplyDelete
  14. مصطفى فتحي
    درش الله يكرمك ويباركلك في اسرتك
    وتشوف عيسي راجل ملو هدومة
    وسعيد باكتساب اخ اصغر


    ياسمين نعمان
    وعليكم السلام
    الحكاية مش ناقصة غل وشتيمة في بعض
    بس بصراحة انا مش كل تعليقاتي كدة الا لما بحس فعلا ان الشخص اللي بكلمة
    ذو عقل وفعلا بيفهم وبيجيد لغة الحوار
    وعندة استعداد يسمع اللي بيفهم احسن او اكتر منة او علي الاقل يسمع رأي الاخر
    مش مجرد بغبغان
    سعيد بمرورك حقيقي

    ReplyDelete
  15. ahmed_H
    يا فندم احنا يهمنا انبساط المواطنين


    the ghost
    هي اعتقد هاتكون زي غالب القنوات الدينية
    ربما اعلانات او رسايل ادعية وبرامج دعوية مش اكتر
    الست ايناس دي حكايتها حكاية
    هي من نوعية الستاتا
    يلزمها راجل يرقعها علقة الصبح وعلقة بليل
    كل ما تنسي روحها

    ReplyDelete
  16. دعاء علي
    اضحكي عيطي زي ما انتي عايزة
    المناديل كتير وكلة علي النوتة
    علي اي حال انا غاوي اصلي نكد ازلي

    appy
    المعلمة الكبيرة
    شوفي يا ستي هو الاخ ابو اسلام اعتقد انة من الناس الكويسة فعلا
    لعدة اسباب نبقي نكلم فيها بعدين علي رواقة
    باقي ردك دة يا ملكة البتنجان
    يعمل بوست لوحدة
    انتي داخلة تقطعي علي
    و الهوام والحشرات الطايرة و الزاحفة كدة كدة هاتقع لوحدها

    ReplyDelete
  17. عاشــــــ النقاب ـقــــة"نونو

    والله يا ستي انا متاكد ان دة خبر حقيقي مش اشتغالة
    وحسب كلامك ابو اسلام تعرفية من البال توك
    اسألية علي موضوع القناة
    مع اني اول مرة اعرف انة فاضي يقعد علي البال توك
    حسب معلوماتي
    انة نشاطاتة كثيرة وانة رئيس مركز ابحاث التنوير الاسلامي و الاكاديمية الاسلامية لدراسة الاديان و المذاهب
    ومشورع المليون مطوية من اجل الرسول وجريدة صوت بلدي
    علي اي حال لو تحبي ابعتلك رقم د.ادهم عبد الرحمن ودة مدير العلاقات العامة بالقناة
    تتاكدي منة
    وزي ما قلت كل العاملين بالقناة نساء منقبات
    في من خريجي كليات العلام مخرجات وفنيات صوت واضاءة وتصوير
    وعلي حسب ما فهمت الفكرة مبنية علي اتاحة دور ومجال للمنقبات و الملتزمات في مجال الاعلام
    وللعلم كل شيوخ السلفيين والوهابيين حرمو عمل المرأة في الاعلام من اساسة منقبة مش منقبة
    لانة كما يقال بة مفاسد عظيمة منها أن المرأة ستسعى لتحسين صوتها وصورتها للمشاهدين
    فمن الافضل سد الباب بالكلية



    Misrdream
    دبح اية لسة بدري علي العيد
    منورني يا باشمهندس دايما



    aya
    ربنا يعفو عنا جميعا
    وزي ما نوهت سابقا انا يهمني سعادة المواطنين
    انا بتاع الشعب

    ReplyDelete
  18. ازيك يا كبييييييييير

    اولا من ناحية قناة المنتقبات انا معاك انها من الافضل تكون إذاعة لانها مش فارقة كتير لان محدش هايشوفهم فمالهاش لازمة من الاساس ، بس يمكن الفكرة عجبتهم وحبوا ينفذوها للفرقعة الاعلامية مش أكتر

    اما بالنسبة للكادر لا كادر نافع ولا اى شىء نافع ومازال النيل يجرى والدروس الخصوصية شغالة وربنا معانا

    اما السنترال فأنا اقترح انهم يجيبوا baffy او يجيبوا الواد دارك انجيل من امريكا وهايطلع الجن فى لحظة ، ناس مابتضيعش وقت اذا كانوا فى امريكا بيحاربوا الzompies الموتى الاحياء

    والفامبايرز هايستعصى عليهم شوية جووووووووست

    اما ايمن نور فعمل بمبدأ انا فى حماك يا كبير يا سيد المعلمين

    فتوة حارتنا منطهدنى وانت فتوة المنطقة كلها خدلى منه حقى

    وهانشوف انشاء الله المعلمين الكبار هايعملوا اية سوا

    تحياتى يا معلم

    محمد فوزى

    ReplyDelete
  19. عثل و النبي عثل

    ياريت يجيبوك في نشرة الأخبار عشان بدل ما الواحد يجيله ضغط لما يسمعها يحس كدة بشوية طرواة

    ReplyDelete
  20. انا هاجيبلك من الاخر
    والمختصر المفيد


    انا كمان جعانة

    سلام
    اختك خيخة

    ReplyDelete
  21. والله انت قوى جدا
    وتحليلك وسخريتك اقوى من الخبر نفسه
    ..
    وبالنسبة للدعار المرخصة فهى موجودة وبالنسبة لبنت التايههة مظنش انها هاترجع
    بالفعل
    ...
    فعلا لم ارى مدونة تجمع بين الظرف العالى جدا والثقافة العالية جدا الا عندك
    برافوووووووووو
    تحياتى
    نور الدين محمود

    ReplyDelete
  22. السلام عليكم
    اخ جعان
    الاخ وسام من نشاطاته دعوة النصارى في غرفة مسلم كريستيان ديالوج ودي الغرفة اللي باقولك هو صاحبها وبيجي يعمل فيها مناظرات مع قساوسة وافراد نصارى واحيانا يهود واوعدك اني هساله ولو ان الموضوع مش وحش يعني
    ولا اشمعنى في قنوات لهيفا وميلودي ووووو
    اهو نترحم حبتين برضه :)))) ولا ايه رأيك:D

    اقصد الفضى اللي حضرتك بتعتقده دة عمل في الدعوة برضه مش شات يعني
    والغرفة والمنتدى ماشاء الله عليهم ياريت تيقى تزورهم
    موضوع السلفيين حرموا او حللوا
    ما اعرفش غير ربنا قال ورسولع بلغ
    مش سلفي حرم وغيره حلل
    دمت بخير
    واتمنى ما تكونش اتضايقت فلم اقصد الا الخير والله وكيلي
    تحياتي

    ReplyDelete
  23. ايه الاخبار دي
    هي اخبار بس لما تفكر فيها تلاقيها حاجة تانية
    يعني مش معقول اخبار وخلاص

    قناة منقبات
    تبديل زوجات في البرناج اياه ده
    والكادر .. وايناس

    اخبارك حلوة اوي وتظبط الضغط
    اصل انا ضغطي واطي طبيعي

    هبقي اتابعها بقي بدل ما يجيلي صداع

    تحياتي

    ReplyDelete
  24. يا نهار ابيض غير لون الاخبار اليى انتى قولتها خالص ايه ده هو ده اليى بيسموه الجامع المفيد فى اخبار العباد ومصايب البلاد والنكد الغزير بس بخفة دم ايه ده داانتا افضت واستفضت بعدين انتابتحض على البطاله ولا ايه خليها ترخص الدعاره اصل البلد ناقصه وبعدين قدام ينادوا بحملة بيت دعاره لكل مواطن..اما بكين احنا لوعمالنا اعداد للاعيبه تانى يبقى عمالنا زى اليى معاه قرش محيره ..اما البنت فاانا ارجح انها اتخطفت بعد ما اخدت العيش من الفرن حيث انه اصبح من الاكلات النادره..وكادر المعلمين دىغلطة لسان غلطها مسئول فحبب يصححها يصحهها ازاى غير بانه يطلع عنيهم عشان محدش يدخله من اصله ويبقى صلح غلطته ومخصرش الدوله فلوس على الفقرانيين اليى اسمهم الشعب..وانا كل ما احب اعرف الاخبار هجيلك والنبى احنا بنعيش ازهى عصور الفشل الكلوى..

    ReplyDelete
  25. تحياتي يا باشا


    مدونة رقيقة وساخرة ولها اسلوب متميز بجد


    تسلم الأيادي


    تحياتي مرة أخرى ورمضان كريم

    ReplyDelete
  26. وعاوزني أرسم كاريكاتير ؟؟؟؟
    كاريكاتير ايه وبتاع ايه ؟

    وما الدنيا إلا كاريكاتير كبير
    ياللهول

    ReplyDelete
  27. ممممممممم

    أولا كالعاده بوست متميز

    أولا : موضوع المنقبات و قناتهم .. انا مع احترامس الشديد للمنقبات و حريتهم في ده بس يعني ايه قناه للمنقبات ؟
    معتقدش ان المناهج الدينيه ايا كانت تنفع تبقي وسيلة جذب في قناه ..
    :
    و الست المنقبه اللي هتبادل جوزها لامرأه إنجليزيه بنتها سحاقيه .. ايه ده ان شاء الله بعني ؟!

    :
    اما خبر ايناس الدغيدي .. مش جديد هي محتاجه حاجه من اتنين
    يا إما حد يلمها .. يا اما التجاهل التام .. آل ترخيص آل
    يالهوي ؟!

    حسبي الله و نعم الوكيل بجد
    و لا عزاء بقي لأي حاجه

    ياسمين

    ReplyDelete
  28. السلام عليكم انا متابع مدونتك من وقت قصير وقلت بلاش اشترك بالتعليقات لحد لما اقرا اكبر قدر ممكن لان المدونه دسمه جدا وفيها مجهود اكثر من رائع لكن لانك زرتنى وعلقت عندى فقلت مابدهاش بقى الراجل سبقنى
    مجهود رائع اشكرك عليه وربنا يتوب علينا وعليكم من قراءة الاخبار خصوصا الطريفه اصل الواحد خلاص هايموت من الضحك
    بالنسبه بقى لتعليقك عندى فالكلمه كان ليها هدف ان شاء الله ربنا يجمعنا واقدر اوضحه لك
    تحياتى

    ReplyDelete
  29. هيهيههيهيه

    ايه الاخبار الجامده دي والنعمه حاجه تفرح و الله حاجه تبسط و الاخوه حاجه تزقطيط اه يا كتكوت لما بيبقي مزاججك رايج بتمشي في الكفر بيومبروبم بيك المثل بس علي فكره انا مش مقتنع بحوار ايمن نور ده اي نعم انا دخلت وشوفته و علي موقع اوباما بس ده ممكن يكون كومينت بس مش شرط من ايمن شخصا فاكس اوي الحوار في نظري وخصوصا ان اوباما بدائت تبان حقيقته العن من بوش و ربنا يستر بس يارب اهم حاجه انه يعدل الاقتصاد بتاعهم لحسن من ساعة ما بوش مسكها خربها علي العالم كله

    ReplyDelete
  30. ههههههههههههه..مسخرة يا جعان..بجد الواحد مش عارف يعلق علي حدوتة المنقبة ولا وكسة الأوليمبكياد اللي منت متأكد منها مليون المية ولا أعلق علي الحريق ولا أعلق ع الأخ كادر اللي بيطلع زي عفريت العلبة كل شوية
    يا عمي..بس والله ضحكتنا يا عم الجعان
    تحياتي

    ReplyDelete
  31. كلمة احسن من موضوع
    هو حلال عليكم حرام على ناس تانية

    ReplyDelete
  32. سيف الإسلامFriday, 29 August, 2008

    السلام عليكم ورحمةالله وبركاته

    لماذا تستنكر ياأخى قناة يعمل بها المنقبات وأنت الذى تدعى الغيرة على الإسلام والله أعلم إن كانت الغيرة صادقة أم كاذبة

    حيث يبدو أنك مع المهللين المطبلين الذين يتاجرون بما شرعه الله للفضليات من المسلمات فحينما ترى من يهاجم الزى الإسلامى تثور وبعدها تسخر أنت من قناة زيها الأساسى هو الزى الذى شرعه المولى عز وجل للأتقياء الفضليات.

    وماله ياأخى لما تبقى قناة كل العاملات فيها منقبات ودون أن تكون إذاعة كما تريدها فالله يزيدنا من فضله كل يوم أرضا فاليوم قناة فضائية وغدا محطة إذاعية ويبارك الله لنا فيما نوع لنا من أنواع وأصناف طرق الدعوة

    لم أجد من المعلقين لديك من ينهرك عن تلك الإساءة حتى الذين يدعون إخلاصا للإسلام كما يبدو من أسماءهم

    هداك الله وأنار بصيرتك

    ReplyDelete
  33. جمعاوى روش طحن
    :0)

    انا من اهوى ومن اهوى انا
    ازيك يا فنان
    بالنسبة للقناة لا اظن ان الغرض فرقعة اعلامية في المقام الاول
    فانا احسب ابو اسلام علي خير
    هي محاولة لتاكيد علي فعالية المرأة في المجتمع حتي وان كانت منقب
    بس خلافي معة ان القناة هاتتعرض لهجوم كبير
    وسوف تكون تحت المجهر واي غلطة ولو طفيفة
    سيتم تضخيمها اعلاميا و اعتقد اننا حاليا في غني
    عن جرابيع الاقلام ان تشهر بالاسلام واي رمز يمثلة

    ReplyDelete
  34. قلب يحترق
    انت مبتجيش لية ابقي تعالي



    بت خيخة وأى كلام
    اهلا اهلا
    سنتدوتش للمدام هنا ياااض

    ReplyDelete
  35. نور الدين
    يا اخي والله انت التواضع لا يتناسب معك
    وما رأيتة فيك من علم ومعرفة
    وسعيد بمعرفتك


    عاشــــــ النقاب ـقــــة"نونو
    وعليكم السلام
    علي فكرة تابعت البال توك فترة منذ 9 اعوام ربما
    وحضرت كثير من المناظرات وليس المجال الان لسردها
    وعارف تماما ان فعلا في ناس اسلمت عن طريقة
    وفي ناس كفرت برضة عن طريقة
    ولا اقلل من مجهود ابو اسلام ابدا علي البال توك
    بس الفكرة ان البال توك مبقاش زي الاول
    لاسباب كثيرة اهمها اسباب امنية وسياسية ربما اذكرها في موضع اخر
    وعلي العكس اشجع دائما وجود قنوات اسلامية معتدلة
    ويمكنك ايضا مراجعة ردي علي انا من اهوي ومن اهوي انا
    وعلي العكس انا مش شايف في كلامك حاجة تضايق
    انا من الاول وانا بقول الناس بعبعو زي ما انتو عايزين
    مادام انتو فاهمين بتبعبعو في اية

    ReplyDelete
  36. kochia
    في خدمة رسايل
    sms
    والساعة بخمسة جنية والحسابة بتحسب


    عايزه اتطلق و
    مدام محاسن تنفعي في التحليل السياسي
    ابقي سيبي السي في بتاعتك

    ReplyDelete
  37. صاحب المضيفة
    اهلا يا ريس
    سعيد بمرورك
    والمرة الجاية تيجي وفي ايدك قطايف


    أشرف حمدي
    اية يا نجم
    شكلك كدة كان لازم تروح الخليج ترسم جمال راكبة علي بني ادمين

    ReplyDelete
  38. عاقلة علي ارض الجنون
    ياسمين هانم
    انتي حرقة دمك لية
    انا جاي اطري عليكو مش كدة


    الدفاع
    يا استاذنا نورت المدونة حقيقي
    ومعلش انا مكنتش اعرف ان عندك هدف بخصوص تعليقي عندك
    ابقي ادي اشارة ولا امارة بعد كدة
    وتوقع صداع مني بقي كتير
    انا مصايبي كتيرة ومحتاج دماغ قانونية ذرية

    ReplyDelete
  39. Copa Zaki
    هو اية اللي كومنت و مش شرط ايمن نور يا كتكوت
    انت مبتقراش جرايد ولا اية

    micheal
    ميخا حبيب الملايين واللي ضارب نص في البلد في الشغل
    كويس انك ضحكت شكلك مش في المود اليومين دول
    روق هاتكون اجدع من خريجي الطب يعني

    ReplyDelete
  40. مصرى وبدرجة مواطن
    هو اية اللي حلال علينا
    شكلك عايز تاخد فيزا بس مكسوف


    سيف الإسلام
    روستوخ يا زكي يا روستوخ

    ReplyDelete
  41. مكن اقولك حاجة ياباشا

    هو حضرتك مفيش حاجة عجباك خالص

    انت ممكن تعترض على الحاجة اللى تسبب مفسدة للناس وليك ...ودى حاجة عادية

    اما لو قعدنا نعترض على كل حاجة..اكيد هنشوف كل حاجة زى الزفت والحياة هتبقى ضنك

    وشكرا جد ليك

    ReplyDelete
  42. يا باشا تنور
    احنا فى الخدمه صدعنا انت بس ولا يهمك

    ReplyDelete
  43. :)بوست فريج من نوعه

    والاخبار لذيذة

    :)

    ReplyDelete
  44. سيف الإسلامFriday, 29 August, 2008

    ربنا يهديك

    لم تخلف ظنى
    السلام على من اتبع الهدى

    ReplyDelete
  45. ههههههههههههههههههههه

    صحيح هم يبكى..

    بس اطرف حجاة بتاع البت اللى خرجت من اربع شهور تجيب عيش

    بس هى نكتة ولا واقع

    طبعا لو واقع لا استبعدها ابدا

    الاخبار كلها دسمة وكل واحد عاوز تعليق لوحدة

    تحياتى ليك

    كل عام اونت بخير

    كل عام اونت من الله اقرب

    ReplyDelete
  46. عجبك كده
    مش انا قولت لك البوست ده هيلم اللى بيصطادوا فى الميه العكرة واللى دماغهم مزنوقه فى مكان وحش جدا جدا اقولك فين فى الشوز بتاعهم
    يا ابنى دول بيقفوا عند الكلام الظاهر تفتكر بقى هتعمل ايه ابعت لك صابون تنظف السلطنه ولا ابعت لك علبتين ارجون
    اشرب بقى

    ReplyDelete
  47. نسيت اقولك اتحداه اذا كان فاهم انت قصدك ايه
    شوفت والله فرحانه فيك
    بجد تستاهل

    ReplyDelete
  48. المشكلة فى حريق الشورى مش فى الورق اللى يا عالم فى منه نسخ ولا لأ ، المصيبة فى التاريخ اللى مالوش قيمة فى البلد دى و كان متشال فى بدروم و ولع . مستندات لا يمكن يكون فى منها نسخ ، مش عارفة كانت بتعمل إيه فى مجلس الشورى .

    مش عارفة أنا بقيت نكدية ولا إيه بس مش عارفة أضحك

    ReplyDelete
  49. اللهم بلغنا رمضان و اعنا على صيامه و قيامه و اجعلنا من عتقائك من النار في هذا الشهر الفضيل
    امين
    أختكم
    عبير عبد الشافي صاحبة مدونة طهقانة و كلبوزة لكن سمباتيك

    ReplyDelete
  50. mashy
    عايز تقرا اخبار مفرحة وتمجيد في ايادي حكومتنا البيضا اقرا جرنال الاهرام
    انا هنا صفحة حوادث في جرنال معارضة


    الدفاع
    لا تكلك هاتتصدع الي ان يأتيك قرار ازالة

    ReplyDelete
  51. رضوى
    "بوست فريج"
    حاسس انها مش غلطة مطبعية
    شايفة الريشة ولا اية


    دعاء مواجهات
    دعاء خناقات
    وانتي طيبة ورمضان كريم
    واوعدك بعد كدة المواضيع هتبقي بزيت عباد الشمس اوصيامي

    ReplyDelete
  52. appy
    هي دي ضريبة الكفاح الالكتروني
    هانعمل اية بقي
    علشان تنبسطي فيا براحتك




    Shimaa Gamal

    تاريخ اية يا فندم
    دة عمرة ما يعديش 120 سنة
    امال الاثار اللي عمرها بالالفات وبتتنهب وتترمي في المخازن وياكلها الفران
    ولا البيوت الاثرية اللي مفترض بتدر دخل سياحي علي مصر
    وحالتة اللي تعر
    شوفي بيت السحيمي حصل فية اية ولا الكنيسة المعلقة اللي بيهددها الصرف الصحي
    ولا قصر محمد علي اللي في شبرا الخيمة اللي بيربو في خنازير دلوقت
    بلاش في الاقصر قرية القرنة ودي من اقدم القري الكاملة في العالم وتعود لعصر الاسرة الثامنة الفرعونية
    اللي اتكتب عنها في كتب التاريخ الاوروبي في القرن ال 17 وماتلاة
    اصبحت عبارة عن حظيرة كبيرة للوز و البط




    bastokka طهقانة

    مدام عبير انتي بتعتي سبام دلوقت
    هو طهقان طهقك خلاص
    بوند
    جيمس بوند

    ReplyDelete
  53. حبيب هارتي
    كالعاده توبيك رائع وقمة في الضحك المخلوط بالواقع الاليم
    علي الاقل احسن من الهابطة اللي بنشوفها
    وعلي فكرة انا اؤيد الدعارة في مصر عشان الشباب لو مسكوا ايناس الدغيدي هيدغدهوها

    وبعد كده نبقي نشيلها
    وسلامي لحضرتك ولمواضيعك الجامده كيييييك

    ReplyDelete
  54. السلام عليكم ورحمة الله وبركاته

    الساخر الرائع جعان أفندي

    بصراحة انت مشكلة .... يعني على جملة خبر بترتر استغفر الله العظيم رقم سيكس دي فضلت اضحك ييجي 5 دقايق لما عنيا دمعت وكل صحابي في السكن ظنوا اني اتهبلت لما اكون قاعد في اوضتي لوحدي باضحك

    وكل واحد يتسحب ييجي يشوف الحكاية ايه اوريه الجملة يضحك وياخد اللينك ويروح يكمل ضحك زي العبيط في اوضته

    المهم بالنسبة لقناة المنقبات ويمكن هو دا اكتر خبر شد الانتباه انا معاك ان الفكرة غريبة جدا جدا جدا

    وخصوصا ان كل اللي هاتشوفه ناس لابسين اسود وبيتحركوا .... ولكن ايهما اكثر غرابة

    قناه للمنقبات عشان يتكلموا فيما يفيد المجتمع ويمنحه نفحة صلاح واصلاح

    ولا قناة للعريانين تمنحه ملايين اللحظات من اثارة الغرائز وتقليب المواجع على كل عازب وكل بنت نفسها تتجوز

    لو دققت نظرك الثاقب هتلاقي ان الاحق بالتعجب قنوات مالطي مالط اللي ملت الفضائيات

    تحياتي لروعة كتاباتك

    أحمد ( كله كلام )

    ReplyDelete
  55. هل قرأت تعليق سيف الاسلام وماله لما يكون هناك 100 قناه للمنتقبات هو عايز منبر وصدق انه سيف فعلا.....

    ReplyDelete
  56. كل مره اقول مش هعلق على الجدع ده وبرضه مفيش فايده
    بس اقولك ايه ولا ايه ولا ايه
    روح منك لله دانتا مفترى

    ReplyDelete
  57. مش يمكن يطلع المختل ده برضو اللي قتل بنت ليلي غفران و صاحبتها

    ReplyDelete

بعبع وقول اللي في نفسك يا خويا