Sunday, August 31, 2008

انت جيت --- يا رمضان

رمضان بكرة يا ولاد واسأل الله ان يكون مباركا وكلة عز و جمال و اخر انسجام
ومليء باعلانات السمن والزيت وصابون دوف اللي نص الصابونة لبن والنص التاني كريم
مش عارف انا صابونة دي ولا سنتدوتش سكلانس
واسألكم الدعاء لمهند ان ربنا يوقفة علي رجلة بعد العملية ويرجع يزنق نور في الجنينة
ويحي يستر علي البت لميس ويجوزها واحنا في شهر مفترج وربنا امر بستر الولايا
واعلانات الشحاتة والاستجداء الرمضانية التي يتحفنا بيها وزير الاعلام انص الفقي
الذي كان في الاصل كاتب روايات اطفال جايز دة السبب ان الاعلام بتاعنا مبيخاطبش غير عقول العيال
و طوابير الشحاتين التي تنتشر في ربوع المحروسة بلا تمييز شحاتين امام محلات مساكن مستشفيات ملاهي محلات عصير مساجد وكنايس سنجد شحاتين بالموبايل حولي رصيد تباركلك العدرا والمسيح
واخيرا كعادة العرب اتفقو الا يتفقو ليبيا قررت ان اول سبتمبر هو اول رمضان كدهو من غير هلال ولا اي حاجة دونا عن العرب كلهم لأنها لا تشترط رؤية الهلال، وإنما تكتفي بحدوث الاقتران قبل الفجر و السعودية السنة اللي فاتت صامت يوم زيادة
اللة يمسية بالخير الكاتب الرائع جلال عامر في جملتة الفذة
نحن لم نتفق علي الهلال يوما ومع ذلك نريد ان يتفق الهلال مع الصليب

ووجب علي الواحد انة يتوب وينوب الي رب العباد و لكل شخص متضايق مني او شايل في نفسة وحازز او قلتلة كلمة ضايقتة او حركة زعلتة او شتيمة في نفسيتة
ان اللي فات لا يقارن باللي جاي واللي جاي العن
وايامكم اسود من قرن الخروب معايا هذا وبالله التوفيق

68 comments:

  1. هههههههههههههه
    طيب اعمل ايه عنية دمعت من الضحك هههههههههههههه
    طيب انت بتهدد القوارض والزواحف ولا ايه
    هتهزر
    كل سنه وات طيب وبخير
    وموكا وفرح حلوين ومطلعين عنيك يا رب زى ما انت مبهدل المحروسه وولدها
    بس موضوع الشحاته ده اللى مسخره بجد لان فى اعتقادى دايما اللى محتاج نفسه عزيزة اوى بجد
    انما هما وصلونا لمرحله ميأوس منها من اهدار الكرامه
    وخليهم يموتوا من غيظهم اللى انت ضايقتهم لسان الحق يا صديقى مش محتاج اسف وانت لما بتتكلم بيبقى على قواعد ثابته وانا بحترم القواعد الثابته دى

    ReplyDelete
  2. كل سنه وانت طيب يا جعان يا اخويا
    احسنت يا اخى فى كل كلامك
    بالنسبه للعرب فانا اعتقد انه طول ماهيقولوا على نفسهم انهم عرب مش هايتفقوا لان كون اننا عرب فده معناه بس اننا بنتكلم لغه واحده وده مش منهج اتفاقى مش معقول ان كل من يتكلم لغه واحده يتفق مع غيره ممن يتكلمون نفس اللغه لازم يكون فيه كتالوج نقراه بنفس اللغه دى او بلغه تانيه بس نفهمه باللغه الاصليه ويتنفذ الكتالوج بحذافيره والا الفساد يظهر
    ( ولا يزالون مختلفين الا من رحم ربى)لذا فنحن محتاجين لان نستخرج الكتالوج بتاعنا من الكراتين ونتبع اللى فيه علشان نتفق
    بغير كده لا اتفاق ولا صلاح
    وسلملى على القوميه العربيه
    كل سنه وانت طيب
    وربنا يخلى لنا قلمك وعقلك

    ReplyDelete
  3. يارب
    كلما طرق هذا العبد بابك
    أفتح له كنوزك
    و سخر له عبيدك
    و ابسط له رحمتك
    اللهم اجعله من الصائمين القاثمين
    الركع السجود
    و بارك له فى شعبان و بلغه رمضان
    فى يسر و سلامة و امان
    اللهم امين

    كل سنة و انت الى الله اقرب

    ReplyDelete
  4. كل سنة و انت طيب و كل المسلمين طيبين .. تدوينة جميلة كالعادة ..
    على فكرة صابونة دوف ربع كريم مش نص .. :-)

    ReplyDelete
  5. انا ناويه والنيه لله اشترى دماغى واعصابى ومتفرجش عالتليفزيون لان بيركبنى عفاريت من الاعلانات تحس انها اعلانات وطالعلها مسلسل او انه مثلا دخيل عليهم كدا

    بالنسبه للشحاتين هقولك نصيحه انت متمشيش فالشارع احسنلك عشان متفطرش عليهم

    بص انت تنام احسن طول الشهر ماهو لاتليفزيون نافع ولا شارع نافع

    كل سنه وانت وبنوتاتك طيبين

    ReplyDelete
  6. كل سنة وانت طيب يا كبير الجعانين

    ودايما كدة معانا فى كل مناسباتنا الجميلة

    و مبارك عليكوا الشهر

    ههههههههههههه

    واتبرع ولو بجنية


    الا هو مسلسل بكار جاى السنة دى الساعة كام ؟

    تحياتى يا كبير

    ReplyDelete
  7. اسلام باشا
    كل سنه وانت طيب
    يعود عليك الايام بخير يارب وعلى اسرتك الكريمه
    متقلش قوي ساعة الفطار

    ReplyDelete
  8. كل سنة وانت طيب يا اسلام ورمضان كريم.بالنسبة لموضوع الشحاتةما البلد كلها بتشحت سواء فى رمضان اوغيرة.وبالنسبة ليبيا القذافى دة راجل رايق مش هتيجى اغرب من ملك ملوك افريقيا

    ReplyDelete
  9. ماتركز ياجعان ياأخويا الله يخليك
    الرابط اللى إنت حاطه بيقول إن ليبيا أول دوله أعلنت بداية شهر رمضان مش أول دولة هتبدأ شهر رمضان ..
    والكلام هو نفسه اللى اتقال عندنا فى الجرايد بدون أى تغيير وخلاصته إن رمضان موافق أول سبتمبر
    يعنى ليبيا هتصوم معانا بكره هى والسعوديه لأن ماحدش شاف الهلال ولاحد اشتغل نفسه وعمل إنه شايفه

    كل سنه وإنت طيب :)

    ReplyDelete
  10. كل سنه وانت طيب ياجعان...
    كل سنه وانت لله اقرب...

    ماشي ياجعان... والله وطلعت متابع اخبار نور واخواتها...
    ههههههههههههههههههه
    يله ... لزوم الاعلام... مش كده؟؟؟ ههه


    اما عن خبر الهلال... ماذا نقول غير حسبنا الله ونعم الوكيل...

    ربنا يتقبل منا... ويغفر لنا ما تقدم وما تأخر من ذنوبنا
    ويغفر لنا... ويقينا عذاب القبر ..
    اللهم امين...
    رمضان كريم...

    ReplyDelete
  11. كل سنة و انت طيب يا اسلام باشا
    و عجبني قوي التهديد اللي في الآخر ده
    و ادينا متابعين المدونة لما نشوف
    :)
    و جملة جمال عامر فذة فعلاً
    عجبتني بجد
    و في انتظار جعانياتك طوال الشهر الكريم

    ReplyDelete
  12. كل سنة وانت طيب
    احنا اتعودنا خلاص عالحاجات دي
    وبقت قدر مسلم بيه
    معلش

    وربنا يخلف ظنك في الايام الجاية
    آمين

    ReplyDelete
  13. كل سنة وأنت طيب
    سخريتك مالهاش حل

    ReplyDelete
  14. كل عام و انتم بخير بمناسبة شهر رمضان الكريم

    رمضان كريم اعاده الله عليكم بالخير و اليمن و البركات

    ليك فانوس عندي تعالى خده بسرعة يالا

    ReplyDelete
  15. This comment has been removed by the author.

    ReplyDelete
  16. كل سنه وانت طيب يا اسلام باشا

    ReplyDelete
  17. كل سنه و انت طيب

    هههههههههههههههه
    انا بجيب آخري بجد لما بقرا المدونه بتاعتك

    مدونتك هي العلامه المسجلة لأن شر البلية ما فطس من الضحك

    كل سنه و انت طيب يا رب و بعوده الايام

    عليك و عليا و علي الكل :)

    ReplyDelete
  18. كل سنه وانت طيب ياراجل ياطيب
    وسلملي على الكتاكيت الصغيرين

    ReplyDelete
  19. appy
    دمعت من الضحك ولا من تقشير البصل
    وانتي طيبة يا رحاب
    وان شاء الله تصومي بقي السنة دي
    واوعدك اعملك خيمة رمضانية ملاكي

    الدفاع
    استاذ اسامة
    وانت طيب يا اخي
    عمال انت تتكلم عن الكتالوج الكتالوج
    شكلة كتالوج الغسالة البشرية
    وطلب علي جنب
    نفسي اروح محكمة واقعد جنب القاضي والعب في ودنة

    ReplyDelete
  20. قوس قزح
    امين يا رب وان شاء الله يسمع منك
    تقريبا اول مرة تنوريني وان شاء الله متكونش الاخيرة
    مفيش بخور


    ياسمين نعمان
    وانتي طيبة يا ياسمين
    وانتي ست وادري بقي بمقادير الصابون

    ReplyDelete
  21. سمر الشافعى
    يا عزيزتي انا سبت للشحاتين البلد كلها اساسا
    كل سنة وانتي طيبة


    انا من اهوى ومن اهوى انا
    حبيب هارتي
    بكار جاي ستة الا ربع من غير مقاطعة

    ReplyDelete
  22. لماضة
    وانتي طيبة يا دكترة
    انا مبتقلش ساعة الفطار
    انا بتقل في الاتناشر ساعة اللي بعدية




    the ghost
    وانت طيب يا برنس
    دة انت لسانك طلع اطول من لساني
    حرام عليك الواد
    بس راجل من ضهر راجل ولا الخليفة زناتي
    بتاع ليبيا بقي دة عايز جرنال يومي يعدد عبطاتة
    وروق كدة وافهم رحاب صح ومتكبرش الحكاية

    ReplyDelete
  23. Leonardo
    والله اكتر من حد عمال يقولي الكلمة دي يا استاذنا
    انت مالك مش مركز وماشي تخبط كدة
    لتكونش دي اعراض انفلونزا الطيور
    وشكرا للفت انتباهي وتم التعديل فعلا بنأا علي كلامك
    معلش اعذروني يا اخوانا
    وكل سنة وانت طيب




    أكون او لا أكون
    وانتي طيبة
    متابعتي لنور حكم القوي بقي
    بنتي مابتاكلش الا لما تشوف مهند بيجري قدامها في التلفزيون
    حاكم هي بتحب تشوف افلام الخيال العلمي
    سعيد بمرورك حقيقي
    ويااخونا شوفو مدونتها جميلة حقيقي بس انا لسة باخد لفة فيها

    ReplyDelete
  24. مهندس مصري
    يا باشمهندس وانت طيب
    بس مش عارف هادون بقي في رمضان ولا دة يبطل الصيام


    سها السباعي
    وانتي طيبة
    ظني بقالة حاجة وتلاتين سنة مااتخلفش
    بلدنا موكوسة

    ReplyDelete
  25. بثينــــــة
    وانتي طيبة
    لا ليها حل كيلو قطايف عصافير


    محمد الكومي
    وانت طيب يا ريس
    وتم استلام الفانوس والعيال بتدعيلك
    وبيقولولك متنساش عيدية العيد

    ReplyDelete
  26. Oss
    طول عمرك صاحب واجب كل سنة وانت طيب


    Dreamer Flower
    وانتي طيبة
    وسعيد انك جبتي اخرك شكلة في اخر فيصل
    انا يهمني راحة المواطنين
    وكما اسلفت سابقا انا بتاع الشعب

    ReplyDelete
  27. دمعاتي
    وانت طيب يا امير
    والكتاكيت بيقولوك كل سنة وانت طيب فين عدية رمضان

    ReplyDelete
  28. هههههههههههههههه كل سنه وانت طيب يا جميل وكل المصريين طيبين برضه ...

    ReplyDelete
  29. جعان انا ممكن اوديك المحكمه وممكن اقعدك جنب القاضى بس العب قى ودنه دى انت حر معرفكش متبقاش تقول انك جاى معايا
    وبعدين يا استاذنا لازم تبقى محامى علشان تلعب فى ودن القاضى من غير ماحد يقدر يكلمك
    كل سنه وانت طيب

    ReplyDelete
  30. في انتظار اللي جاي

    رمضان كريم

    ReplyDelete
  31. This comment has been removed by the author.

    ReplyDelete
  32. اى خدمة يا اسلام وفى رايك انا اهنت محمد باى طريقة علشان انامغلطش فية اصلاانا بينتلة انة غلط.وما كبرتش الموضوع مع رحاب ولا حاجة لانى اساسا بحب مدونتها.وزى مانا قولت هناك هفضل متابع مدونتهابس مش هعلق تانى لانى اتضايقت ان تانى تعليق ليا فى نفس البوستيقلب بمشكلة.على فكرة انالشبح بس غيرت اسمى علشان ابقى اعلق عند رحاب وانا روحت هناك واعتذرتلها ومفيش اى مشاكل.ورميت تعليقى هنا كمان

    ReplyDelete
  33. الرئيس الليبي يهدد بداية ونهاية شهر رمضان بدون حاجه لرؤية

    ReplyDelete
  34. الرئيس الليبي يحدد بداية ونهاية شهر رمضان بدون حاجه لرؤية

    ReplyDelete
  35. إيناس فوزىTuesday, 02 September, 2008

    كل سنه وحضرتك طيب.. جميله قوى المدونه دى, لاقيت عنوانها في مقال للرائع جلال عامر.. عجبتنى وحبيت أعلق علشان أقولك بجد بجد والله العظيم جلال عامر ده مصيبه سوده هههههههههه ياريت حضرتك تبقى تجيب لنا شويه من كتاباته, أنا عندى حاجات كتير قوى قوى له بس للأسف على جرائد مش على الكمبيوتر, بجد ده جامد قوى آخر حاجه نفسى أقابله أو أشوفه علشان اسئله بيجيب الأفكار دى منين, يعنى دماغه زينا عادى ولا مختلفه هههههههههههه أكيد مختلفه

    ReplyDelete
  36. كل سنه و انت طيب يا جعان باشا
    و كل الحاجات دى بقت من قوانين الطبيعه خلاص
    و لو صحينا فى يوم لقيناها اتغيرت مش بعيد نزعل (:
    رمضان كريم عليك

    ReplyDelete
  37. كل سنة وحضرتك طيب يا فندم

    رمضان كريم

    عبقرية مدونتك يا فندم ممكن أسميها البسيطة العبقرية أو عبقرية ببساطة

    وفلسفية عبقرية جملة الأستاذ جلال عمر


    انتظرني مقيمة هنا يا فندم

    كل سنة وانت بسعادة

    ReplyDelete
  38. kol sana wa enta tayeb ya edrisa wa ramadan kareem

    ReplyDelete
  39. جعاااان
    رمضان كريم يا جعان
    ويارب يبعت عنك الشحاتين والمفلسين والبرشوتات والمتلزققين وكل الناس اللي حكيت عنهم دول
    ويسعد ايامك زي ما بتضحكنا كده :):)

    ReplyDelete
  40. رمضان كريم
    كل عام وانتم الى الرحمن اقرب

    ReplyDelete
  41. كل رمضان وانتا بالف خير وبناتك وزوجتك صايمين وفاطرين فى عزك...ربنا يسعدكوا ويباركلكوا فى بعض ..
    اما بخصوص اعلانات الصابون كان بشير عياد الشاعر بيقول زمان فى مجلة كاريكاتير كثرت اعلانات الصابون والزيت فى التليفزيون المصرى بتدل على اننا شعب طفس ووسخ...تخيل ..
    اما الشحاته فده موسمها الرائج وطبعا لا يخفا علينا انه ياتىالشحاتين المصريين الى الوطن من البلدان العربيه المختلفه حيث ان المصرى فى الشهر الكريم ده ايده فرطه...
    اصل فى شحاتين بيسافروا يشحتوا فى الحرم واحده صاحبتى قالتى عليهم برضه الشحات لازم يتطور من نفسه..
    بس تليفزيونا الكريم مش عهقدر ااقول فيه حاجه عشان انا مبتفرجش عليه اصلا...
    كل رمضان وانتا بكل خير وفرح وملك بكل الخير اليى فى الدنيا...
    رمضان كريم..

    ReplyDelete
  42. كل سنة وانت طيب
    وتكون ايام مباركة ان شاء الله
    عجبني كلامك على العرب
    دي حقيقة
    لقد غاب كل شئ وبقيت مسمياته

    وكل عام وانت بخير
    سمراء

    ReplyDelete
  43. Anonymous
    انت مين يااااض
    لتكون الواد جهاد
    انت خرجت من الكلوب امتي


    الدفاع
    يا سيدي قعدني جنبة وانا هاتصرف
    رمضان كريم يا متر

    ReplyDelete
  44. كلبوزة لكن سمباتيك
    مدام عبير و انتي طيبة و الحج طهقان بخير وطهقان


    blackghost
    روق يا معلم
    جبت فانوس

    ReplyDelete
  45. د\سيد مختار
    بيهدد بيحدد الاتنين انيل من بعض
    نورت يا دكتور


    إيناس فوزى
    وانتي طيبة
    ويا ستي جلال عامر معرفش اية اخبارة دلوقت
    بعد ما كان مرشح نفسة في انتخابات المجلس عن دايرة المنشية

    ReplyDelete
  46. دعاء على
    يا انسة دعدع
    دوام الحال من المحال ونتمني نزعل قريب ونسمع قران في الراديو و مارشات عسكرية


    هبة النيــل
    وانتي طيبة ورمضان كريم
    ويا ستي متشكرين علي المجاملة الجميلة دي
    والمدونة عندك اهية اعملي اللي انتي عايزا
    بس ابقي راضي الرجالة

    ReplyDelete
  47. Anonymous
    شوربة ازيك وازاي مراتك
    لسة مستحملاك والله الست دي ليها الجنة


    بنت الماضي
    اية جعاااااان حاف كدة
    مفيش كنافة قطايف صوباع محشي

    ReplyDelete
  48. عاشــــــ النقاب ـقــــة"نونو
    الله اكرم
    وكل سنة وانتي طيبة


    Che_wildwing
    وانت طيب يا باشا
    وحقيقي مدونتك رائعة واسم علي مسمي

    ReplyDelete
  49. عايزه اتطلق و
    وانتي طيبة ورمضان كريم علي اسرتك الصغيرة
    وبما انك من هواة بشير عياد دة عنوان مدونتة
    http://basheerayyad.maktoobblog.com/
    اما عن شحاتة الحرم دي لا يقدر عليها غير الشحاتين الخمس نجوم
    القادرين علي الحصول علي تاشيرة في موسم الحج



    سمراء
    سعيد بتهنئتك ومتفاجيء بزيارتك
    فاكرة تدوينتك
    الحب هو تلك الطاقة



    Christa
    الله دة انت بتعرفي عربي
    وانتي طيبة

    ReplyDelete
  50. فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
    هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

    1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
    2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
    3- مشكلة تعمير مصر والتى يعيش سكانها على 4% من مساحتها.
    4 - العدالة الاجتماعية .. وأطفال الشوارع والذين يملكون كل شىء .
    5 - ضرورة الاتحاد مع السودان لتوفير الغذاء وحماية الأمن القومى المصرى.
    6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
    ارجو من كل من يقراء هذا ان يزور ( مقالات ثقافة الهزيمة) فى هذا الرابط:

    http://www.ouregypt.us/culture/main.html

    ReplyDelete
  51. الاخ الفاضل
    كل عام ونحن جميعا بكل خير
    هل هلال شهر رمضان ومن اجل ذلك حبيت افكرك بتعليق لك عندنا اتمنى ان تراعى ادب الحوار كما امرنا الاسلام
    ----------------------------------


    في21,آب,2008 - 08:45 صباحاً, ana ga3an كتبها ... (غير موثّق)

    مصلحة حكومية دي ولا اية؟؟؟
    اية التهجيص دة
    بقي العالم المتقدم كلة بلا استثناء
    يعلم ان التدوين هو الصحافة الشخصية الغير مقيدة الغيرة محكومة
    والكتابة بة لا تقنن ولو تعنون
    ونيجي احنا جهابزة العالم التالت نعملة اتحاد ورابطة
    من عاطلي العمل وارباب المعاشات وربات البيوت
    اية الوكسة دي والله ما حد عرنا الا العقول الزنخة
    ----------------------------

    شكرا لك ادبك الجم وحوارك الراق الذى يدل على تربية صحيحة وعلى تدين واضح
    ناسف لو كنا تجاوزنا فى الحوار
    عن الاتحاد
    حسن محمد توفيق

    ReplyDelete
  52. كل سنه و انت طيب

    و ربنا يوفق الجميع

    و يهدي بتوع المسلسلات

    و يهدي اللي بيتفرجوا عليها

    و يهدي القذافي

    و يهديني

    ReplyDelete
  53. وايامكم اسود من قرن الخروب..ضرورى تختم بيها البوست انتا بتقرا الطالع والنازل ولا ايه شوفت الدويقه ..بركاتك ماتشوفيلى هعمل ايه فى القضيه الجايه..
    لا حول ولا قوة الا بالله ..انا حزينه على البشر اليى تحت الانقاض دول مش المفروض البنئادم ده اغلى شئ فى الدنيا وخليفة ربنا فى الرض وربنا مكرمه ..امال احنا بنبهدله كده ليه..
    صبرنى يا رب..

    ReplyDelete
  54. *
    نحن لم نتفق علي الهلال يوما ومع ذلك نريد ان يتفق الهلال مع الصليب
    *

    بجد بجد عماله بضحك بقالي ربع ساعه

    نفسي هيتقطع بجد

    بجد بجد متميز كالعاده أكيد و رمضان كريم ..

    علي فكره إسمك علي الصيام مش لطيف بتفكرني اني جعانه .. إسم شعبي يعني

    كلنا جعانين :)

    بلاد جعانكونيا

    أقولك كفايه عشان انا من كتر الضحك بخرف

    تحياتي

    ياسمين

    ReplyDelete
  55. معلش يا جعان يا خويا هرد على اتحاد المدنونين


    بعد اذنك طبعا لانى اخدت معاهم شوط



    شكرا لك ادبك الجم وحوارك الراق الذى يدل على تربية صحيحة وعلى تدين واضح



    ده كلامهم يا استاذ حسن مع احترامي ليك انت تعرفه منين علشان تقول تربيه ومش تربيه عيب لما حد كبير يرد على حد من غير ما يعرفه
    يعنى اعرف انت بتكلم مين الاول وبعدين رد
    غير كده معلش متفرضش حاجه على حد ولا برضه هتقولواغدا لناظره قريب
    هو مش وجهه كلام لشخص معين علشان اهاجم شخصه وتربيته
    اعرف الاول بتتكلم مع مين وازاي واقري له كويس وبعدين احكم
    وانا قولت لحضرتك قبل كده الكلام ده


    معلش يا ابو ملك بس انت عارف الضغط لما بيرتفع عندي
    لو عاوز تمسح التعليق امسحه بس مش هسامحك هههههههههه رمضان كريم

    ReplyDelete
  56. اتحاد المدونين المصريين

    مش عارف حقيقي اية اللي في كلامي يدل علي تربية صحيحة وعلى تدين واضح
    الا صحيح اتحاد المدودين المصريين بتاعكو دة ناقصه صورة مبارك في صدر الصالون وشعار الحزب الوطني



    Dexter
    ابو الكارتون كلة
    ربنا يهديك يا شيخ

    ReplyDelete
  57. عايزه اتطلق و
    يا ستنا روحي لمحامي يخلعهولك
    علي اي حال متزعليش علي اللي ماتو
    دول ماتو في ايام مفترجة وصيامين وفي هدد
    يعني علي الجنة حدف
    الدور والباقي علي اللي قاعدين في جهنم الدنيا


    عاقلة علي ارض الجنون
    ياسمين هانم
    واضح ان صحتك مش بتيجي علي الصيام
    تعالي بعد الفطار نتفاهم

    ReplyDelete
  58. appy
    يا مدلعاهم
    ارجع واسألك برضة نفس السؤال
    الجدع دة جاب منين ان كلامي يدل على تربية صحيحة وعلى تدين واضح
    بيخالف ضميرة وهو صايم

    ReplyDelete
  59. الاستاذ جعان... ليه بس الكسل ده...
    فين البوست الجديد... مايصحش كده... كل يوم نصبح على مدونتك... بس نرجع فاضيين... هههههههههههههه
    شد حيلك كده وارقعنا ببوست صاروخي...

    في الانتظاااااااااااااااااار...

    ReplyDelete
  60. مدونتك بجد ملهاش حل

    تسلم ايدك

    ReplyDelete
  61. فضيحة كبرى...الأمن يسرق قوافل الإغاثة
    الأمن يتفق مع ساقين الحافلة الأولى والثانية في القافلة الإغاثية المتجة لغزة
    وتسير الحافلتان بدون الركاب الذين كانوا على الأرض إلى وجهة غير معلومة
    والجدير بالذكر أن هاتان الحافلتان همه المحملتان بالطعام والشراب للمسافرين الصائمين النتجين لغزة
    كما أنهما يحملان البضائع الإغاثية للفلسطينيين
    وبالإتصال بأصحاب الشركات التي تملك الأتوبيسات
    وجد أنهم قد أغلقوا موبايلاتهم
    ولا يردوا على الأرضي
    أي أن الأمن سرق البضائع الإغاثية
    وترك الركاب على الأرض
    أمن مصر القذر
    >>>>>>>>>>>>>>>>>>
    تابعونا
    تغطية شاملة للقافلة المتوجهة لغزة

    ReplyDelete
  62. كل سنه وانت طيب

    العقيد معمر القذافى اصبح الآن ملك ملوك القبائل الافريقيه
    يفل ما يريد

    وبخصوص التهديد
    طيب

    ReplyDelete
  63. أكون او لا أكون
    نزل البوست يا فندم انتي اللي فينك


    FreeKiller
    الله يخليك
    ابقي تهال انت مبتجيش لية


    الفقيرة إلى الله أم البنات
    وانتي طيبة
    عقبالي كدة

    ReplyDelete
  64. appy
    و
    ana ga3an
    اولا انت دخلت على مدونة الاتحاد وتركت تعليق افكرك به
    -----------------------------------
    مصلحة حكومية دي ولا اية؟؟؟
    اية التهجيص دة
    بقي العالم المتقدم كلة بلا استثناء
    يعلم ان التدوين هو الصحافة الشخصية الغير مقيدة الغيرة محكومة
    والكتابة بة لا تقنن ولو تعنون
    ونيجي احنا جهابزة العالم التالت نعملة اتحاد ورابطة
    من عاطلي العمل وارباب المعاشات وربات البيوت
    اية الوكسة دي والله ما حد عرنا الا العقول الزنخة
    -----------------------------

    عيب يا محترمين تشتموا ناس متعرفهومش ولا حتى تعرفوهم عيب التعامل بهذا الاسلوب ولما رديت عليك لم انزل للمستوى الذى تتعامل به لان هذا ليس من تربيتى وكلا ادرى بنفسه والكلام يدل على صاحبه ولو مش فالهم انا كنت باسخر من كلامك بدون خطا ربمال تحس بما قلت

    ثانيا
    انت راجل عارف ربنا كويس بدليل العنوان
    حد مسلم يعرف الحلال والحرام يضع هذا العنوان

    الله .. الوطن ...ام الخلول

    يا راجل حرام

    تضع لفظ الحلاله بجوار هذه الكلمة
    هل الهزار او السخرية فى اسم الله
    ---------------------------

    يا ريت تكون رسالتى وصلتك
    وطبعا ردا على المحامى بتاعك
    لم يطلب منك احد او منها او غيرها الانضمام الينا
    نحن طرحنا فكرتنا ومن يريد ان ينضمك الينا فاهلا به ومن لا يريد فاهلا به ايضا دون اسفاف او تطاول

    من مؤسسى الاتحاد
    حسن محمد توفيق

    ReplyDelete
  65. هههههههههههههههه
    هى الناس دى بجد بقت صعبانه عليا
    وبعدين انا ح الظابط مش المحامى ولا يكونش انا بقيت محامى ومش واخد بالى
    يالا عيب بابا قالى مترديش على ناس فى سن جدك علشان عيب انتى متربيه ومحترمه واللى ميعرفش البلد مش بعيده عليه لو جت له الجرأه يسال عن اسمى يعنى
    معلش يا اسلام بيه
    ابقى بخر المدونه
    وابقى فهم الناس المدرسين انك مش كاتب حرف عطف على الله .زالوطن ....... ام الخلول
    ولا اللى متعودين يصطادوا فى الترع مش هيبطلوا بقى
    وشكرا لكم

    ReplyDelete
  66. والله يا رحاب انا عايز ارد علية بادب واحترام بس مش عارف
    كلامة نفسة مش عارف الاقيلة رد مؤدب
    انا كنت متوقع بما انة راجل كبير
    سنا يعني
    يقول كلام مقنع وذو خلفية دينية او ثقافية
    لكن الرد يكون اية
    روح يا مولانا مجمع اللغة العربية
    وهم يفهموك انها عادي مش مشكلة

    ReplyDelete

بعبع وقول اللي في نفسك يا خويا