Thursday, September 11, 2008

اركبوها بسلام امنين


انا من هواة متابعة التدوين العربي بشكل عام و المغربي و التونسي والمدون بالفرنسية في كثير من الاحيان نظرا لتعليمي بمدارس لغات وهروبي من اشتغالة التعليم المجاني
ربنا يخليكي لينا يا اما يا معلمانا في مدارس الخواجات وماكلانا ومجوزانا انا واخواتي
غير ان المدونات العربية كوم والتدوين المصري كوم تاني
فا مدونات المغرب العربي اغلبها هادي منظم راقي الحوار ولا يدون الا من يجد عندة ملكة الكتابة مش كل عبيط باتنين جنية في سايبر قارف اللي خلفونا
المهم تطايرت اخبار عن اختفاء محمد الراجي
محمد الراجي مدون مغربي صاحب مدونة هادئة منظمة منطقية محترمة لن تجد بها تعدي في اللفظ
والقول او الفعل
مما يجعلة بالنسبة للمدونين المصريين حمامة وديعة راقدة علي بيضها
ويبدو كثرة الرقود قد اثرت سلبا علي عقل ابن الراجي
فا في احدي تدويناتة سأل الملك بان يوقف عادة تقبيل الايدي
التي لا تزال عادة متـأصلة في البروتوكول المغربي
وهو مطلب الصراحة غير منطقي بالمرة فامحمد السادس راجل مبروك والناس دي بتبوس ايدة طلبا للبركة
وان ربنا يفك كربها قادر يا كريم
يجي يشوف المصريين وهم بيبوسوا جزم اللي يسوي واللي ميسواش املا في قزازة زيت وكيس سكر

لا انسي الملك عبد الله ملك السعودية عندما امر بالغاء عادة تقبيل يد الملك من البروتوكول منذ 3 اعوام وفي نفس هذا الشهر
ولانها عادة محرجة خصوصا عندما يقبل المسؤولون يد الملك في حضور الضيوف الأجانب
بل نهي حاشيتة عن مخاطبتة بلفظ مولاي


ثم زاد الراجي الطين بلة
فكتب تدوينة ينتقد فيها اغداق الملك محمد السادس الهدايا العينية علي رعاياة من الشعب المغربي الحبيب اللطيف المهاود
وكيف انة محمد السادس بافعالة يعود الشعب علي الاتكال وانتظار الهبات والعطايا الملكية لانة اعطي عسكري مرور جوز دراهم
بل ويتمني علي الملك ان لا يجامل ابناء الشعب
دة وان دل دل علي انة فقري ومش وش نعمة مما ادي الي الحكم بسجنة عامين وتغريمة خمس الاف درهم مغربي بتهمة انة فاكر نفسة بيفهم احسن من الملك
ونال من السباب والتقريع علي مدونتة ما فية الكفاية اذا كنا نعتبر الكلام اللي تحت دة سباب
يجي يشوف مدوني مصر وهم بيلعنو خاش اللي بيختلف معاهم في الراي وان اتاحت الكنولوجيا مستقبلا الشبشب الالكتروني
لوجدنا الصرم و البلغ طايحة في الفضاء الامتناهي
طب يا ريت الملك عندنا بينزل و يوزع صرر الشلينات علي الشعب ولا حتي صرر عيش بلدي وربطة لمون بنزهير
ياريت بيركب عربيتة ويلف وسط الناس هو والمحروس حفيدة ويشاور علي الغلابة ويحط جوز جنيهات في ايد عسكري
واحنا كنا نعملة تمثال مش نطلع نقبح ونطول لسانا علية في مدونة

لطالما قلت اننا كمصريين شعب رمة ويتبطر علي النعمة وميعجبوش العجب ولا الصيام في رجب
فمصر الدولة العربية الوحيدة التي يخرج مواطنيها يهتفون بسقوط رئيسها وحكومتة
وتلعن جرائد المعارضة سلسفيل ابو الوزراء ليل نهار
وترفض امة بحالها توريث الحكم مع ان دة التطور الطبيعي للتقلية
ورسوم كاريكاتير بنرسم تريقة علي الاب و الزوجة والعيال بنتريق
مظاهرات وبنطلع اعتصامات وبنعتصم اضرابات وبننضرب
عايزين اية تاني يقلع ملط يعني ويقعد وسط نافورة المطار
شكلنا كدة يجب ان يحكمنا ملك مثل محمد السادس او مثل ابوة الطاغية الراحل الحسن الثاني ووزير داخليتة ادريس البصري
الذي يجعل حبيب العادلي مقارنة بة تلميذ فاشل في مدرسة الطغاة
و الذي كان اصغر مخبر فيكي يا مغرب كف ايدة كفيل بشق رأس اعضاء حزب معارض باكمله
علي مدار 4 رؤساء جمهورية وملك لم ينجح احد في تسييس المصريين ولا اسكات اصواتهم المزعجة لكل جبار
ضرب وانضربو معتقلات واترمو نفخ واتنفخو وكل الميتات المؤدية للجنة من غرق وحريق وهدد و امراض بطن
لم تحوق في جتت المصريين المنحسة
انا اؤمن اشد الايمان بان الحل لاسكات المصريين تماما هو ملء بطونهم واشباع فروجهم
فاذا امنت للمصري قوت يومة بشكل مستمر و مرا اخر الليل يجري وراها وقبر محترم يلمة في اخر عمرة امنت شرة
واضمن للحكومة ان لن تسمع حس معارض واحد في البلد تاني
بل ان من تسول لة نفسة المعارضة سيقوم المصريين نفسهم بنفخة خوفا من زوال النعمة تاني
فيا حكومتنا الرشيدة اكلوهم وجوزهم وادفنوهم تركبوهم بسلام امنين

112 comments:

  1. طيب ما هو ده الطبيعي في بلدنا دي
    أنا أسمع ان عبد الناصر كان قبل ما يعمل حملة إعتقالات كان يرخص الاسعار للسلع الرئيسية بكام قرش صاغ و بعدها يعتقل اللي هو عايزهم و لا حد يآخد باله أصلاً و بتبقى الناس فرحانة بالأسعار اللي نزلت

    أما بالنسبة لمحمد الراجي فأنا قريت تدوينته و مش شايف فيها أي غلط في الملك
    ده بينصحه لوجه الله بدون اي تريقة

    هو البوليس اتجنن في المغرب و لا ايه ؟

    ReplyDelete
  2. الغريبه ان التعليقات علي الخبر من المغاربه كلها ادانه للولد وتعديد لافضال الملك
    باين كده بيحبوة والعطايا علي ودنه
    وعموما لو بيديهم وبيحبوه احسن من اللي ما بيديش وعاوزهم يحبوه!!تحياتي

    ReplyDelete
  3. رائع إسلوبك ... وجميل جدا تسلسل منطقك في هذة التدوينه

    تحياتي ليك

    ReplyDelete
  4. سبحان الله
    هي وجهة نظر برضة اللي وصلت لها
    بس قضاء الحاجات الإنسانية للمواطن في أصله حق له مش منحة ولا عطية من الحاكم
    مادام فيه حياة سليمة بكل جوانبها من أول سياسة لغاية اقتصاد والمواطن بيشتغل مش مبلطج يبقي ياخد حقه
    يعني أنا مع الراجي دة لأن كلامه محترم .. مش لطيف إنك تستني وظيفتك منحة و أجرك منحة ومراتك منحة
    وتبوس الإيد في الآخر

    بصراحة أنا مش عايزة أقارن لأنه ما أسخم من ستي إلا سيدي

    ReplyDelete
  5. فعلا مطالبه بتوضح انه انسان محترم، واللي حواليه هما اللي متخلفين

    ReplyDelete
  6. مستنيين ايه من بوليس دولة عربية؟؟؟؟؟؟؟؟؟


    ربنا يتولاه

    ReplyDelete
  7. tu parle francais
    ههههههههههههههههههه
    حلوه تركبوهم بسلام أمنين
    هههههههههههههههه

    ReplyDelete
  8. ما شاء الله مدونة متميزة
    جزاكم الله خيرا

    و كل عام و انتم بخير
    و تقبل الله منا و منكم في رمضان

    و تحيااااتى
    رمضان كريم

    ReplyDelete
  9. لووووووووول

    بجد فظيعه

    عجبتني اوي كف أصغر مخبر كفيل بإطاحة حزب معارض بأكمله

    هههههههه

    طب و الله داحنا حكومتنا علي كده حكومه غلبانه بقي
    -وش بيهيس-
    دول بيسيبونا نشتم و نثور و نبهدل الدنيا

    و لا حياة لمن تنادي

    و لا الهوا .. لا لا

    بجد بجد ملناش حق

    شوفوا النعمه اللي انتوا فيها بقي بطلوا بطر

    و هما اه بياخدوا "حوافز و أوفر تايم"

    بس عشان ساكتير و عشان يقدروا يتعالجوا من الازعاج اللي احنا بنعمله

    ملناش حق

    =========

    معلش ده تهييس علي الماشي

    بجد شيء ممل

    بنحاول نعمل أي بتاع ف أي حاجه

    و لا فيه أي حاجه
    حد فاهم حاجه ؟؟

    أحلف براس جد أم أبويا ان ما كان حد فاهم حاجه
    و هذا هو المراد اننا منفهمش حاجه

    و برضه يركبوها بسلام آمنين

    معلش طولت

    ياسمين

    ReplyDelete
  10. فى مثل غريب بيقول
    اطعم الفم تستحي العين
    وطالما الناس شبعانة
    يبقي مافيش مانع انها تبوس الايادي
    طب خليه كده يأكلنا
    وشوف احنا هانبوس ايه

    ReplyDelete
  11. حلو السطرين الاولنين بتوع الفرنساوي والسطرين ووالتنظيم بتاعهم مس انت قولت قبل كده حتى العشوائيه منظمه هههههههه

    وش بيغمز

    المهم يا سيدى الملك مش محبوب يا عمنا ده بالذات واللى يقولك غير كده يبقى غلطان وده من الناس هناك لما كنت انا هناك
    يعنى هو بيدي للناس فلوس مقابل انهم ميعترضوش
    مش هقعد اناقش مش كل المصريين عاوزين ياكلوا والحياه بالنسبه لهم مش ست وخلاص
    فيه ناس عاوزه تعيش راقيه نظيفه
    انما اذا كنت بتتكلم على الاغلبيه مش هقدر اعارضك حتى البنات عاوزين جوازه والسلام
    بس على فكره هما سايبنا علشان نقول عندنا ديموكراتيه بس مش اكتر
    انما الحقيقه اللى بيعدي الخط بيتلسع يا ريس

    ReplyDelete
  12. بل ان من تسول لة نفسة المعارضة سيقوم المصريين نفسهم بنفخة خوفا من زوال النعمة تاني
    فيا حكومتنا الرشيدة اكلوهم وجوزهم وادفنوهم تركبوهم بسلام امنين
    --------------------------
    ->أنا قعدت اضحك عالسطرين دول نص ساعه
    بجد بجد انت مشكله

    -------------------------
    فا مدونات المغرب العربي اغلبها هادي منظم راقي الحوار ولا يدون الا من يجد عندة ملكة الكتابة مش كل عبيط باتنين جنية في سايبر قارف اللي خلفونا
    -------------------------
    ->أنا ضدك هنا
    لأنى مش عارف هما (أو يمكن إحنا) قارفينك فى إيه؟
    ياعم البلوجز اصلاً معموله علشام كل واحد يحط بلاويه فيها
    عمل النهارده
    دخل الحمام كام مره
    ولو حابب يجرب الكتابه بيجرب وبيحط
    واللى عاجبه قشطه مش عاجب عادى
    ماتروحلوش

    مع تحياتى

    ReplyDelete
  13. تصدق انت رجعت تانى بعد صيام دام حوالى اربع مدونات

    المهم ...

    هوا فيه حاجة بفكر فيها ... هوا المسؤولين في المغرب بيقروا المدونات ... ولا عندهم مخبرين الكترونيين

    طيب ... ما هو المعيار للحكم على مدون ما بانه خطر على الامن القومى
    يعني المفروض يعملولنا ليميت او بورضر " تعليم حكومي على فكرة " عشان برضو نعرف راسنا من رجلينا ونعرف امتى نكتب ما يوجب الحبس وامتى نكتب ما يوجب النفخ

    لو الاخ المغربي معترض على عادة التقبيل فانا معترض على عادة مخاطبة المسؤولين ..ز الناس بكل تلقائية مغروس في عقلهم الباطن ان المسؤول على حق وانى لابد اتكلم معاه وانا مطاطى حتى لو المواطن بيقعد على القهوة بالليل يسب ويلعن ويطلع عليه نكت ويرسم فيه كاريكاتير
    الناس الىل في الدويقة طالعين من تحت كوم تراب والراجل معفر وواقف قدام صفوت الشريف وسيادة الرئيس جمال مبارك وبيقله الحمد لله كله تمام وبنشكر سيادتك على الجهود اللى شقناها وبرغم ان الكاميرا عاملة زي القطنة كدةومبتكدبش كانت جايبة في الخلفية والراجل بيتكلم صورة عياله وهما عريانين واحد ابناؤه السبعة كما ذكر ابوهم كان طالع في الكاميرا بوتوملس

    ده انت بيتك واقع اللى هوا كان اصلا عشوائيات وبتشكره على ايه ... يا معفن

    ReplyDelete
  14. الحكومه عندنا سيبانا نتكلم ونعمل معارضه واحزاب وجرايد
    بس عشان العالم وخصوصا امريكا طبعا يعرفوا ان عندنا ديموقراطيه
    ادعوك عندي في المدونه تقرا
    اول مدونه كتبتها
    هتلاقي رد علي منطق الحكومه
    علي فكره انت ماقلتليش انت ليه جعان مدام انت من آكابر القوم كده
    والا انت جعان حريه

    ReplyDelete
  15. جعان
    الحكومه اللى مجوعه الشعب مش تعبانه منه فى شئ خالص ولا تعبانه من صياحه ومظاهراته ومعارضته واعتراضاته
    ولا ايديها تعبت من النفخ والكهربا والسحل والتعذيب
    بس لو عملت اللى انت اقترحته ده مش هاتلحق تحس بتعب ولا راحه لانها هاتتشال فورا
    لان لو كل جعان شبع وكل شاب اتجوز هايتحول الى انسان مرفه ويبتدى يتجه للفكر ولو فكر هايعرف يعمل ايه ويعرف هو عاوز ايه وشتان بين متظاهرين جعانين وبين متظاهرين شبعانين ومتجوزين وادوا واجبهم فى البيت وطالعين ياخدوا حقهم
    ويعدين حتى لو كنت انا غلطان
    مفتكرش ان الحكومه تخاطر وتشبع الشعب بعد لما جوعته
    لان ده شئ هايكون فى منتهى الخطوره هاتكون كانها اعطت كل واحد من الشعب سلاح يضربها بيه
    وانا عن نفسى باتمنى انها تعمل كده
    تحياتى

    ReplyDelete
  16. طب ما دى متطلبات البنئدمين الطبيعيه ولو اتوفرت الشعب مش هيبص لحاجه تانيه ولا انتا قصدك حرية راى والكلام اليى من عينة اثبات وجود الذات فى ملكوت البهاوات فهقلك الحاجاتدى اتنست من دماغ الناس الناس عايزه اليى يسد بقها انما لو الاسعار نزلت ومستوى المعيشه اتنفخ شويه ولا على مترين وبعد كده اعلنوا الاحكام العرفيه وحيات اليى دخلتكوا مدارس الغات مهتلاقى حد يفتح بقه وهتبقى الصحف المعارضه من الصحف المنقرضه..

    ReplyDelete
  17. بس كلامك عن ملك السعوديه شئ يشرح القلب ان لسه فيه خير فى الدنيا وانسان اتنازل عن شئ معاه اه هو مش حق بس ده كان شئ معاه الناس بتبوس ايده هو تنازل عن الشئ ده فده شئ مبشر بالخير والله...
    اصل انتا عارف اليى بيمسك فى حاجه دلوقت والله لو رقصتله سامبا ما هو سايبها..
    حاجه كمان اخونا المدون كلامه ماشى فى موضوع البوس انما موضوع العطايا بيقطع عيش الغلابه ليه ...
    يعنى انا كنت هسافر انا وابنى المغرب نسافر نعمل ايه دلوقت ؟؟؟
    بس اركبوها بسلام دماغى راحة على العباره معرفش ان العباره فيها انه واخواتها وافتكرت ان بوستك الجاى هيكون عن الدويقه بس افتكارى طلع لا نزل غلط ..
    ما علينا اسلوبك رائع وخفة الروح اكتر شئ بيحلى موضوعاتك ..ومش هقولك تانى لان انتا عارف كده ...
    رمضان كريم ..يا استاذنا وربنا يفك كرب اخونا المغربى اهه برضه مقتلش قتيل عشان يتحبس ..
    الا يكون وصل المغرب تهمة اثارة الرأى العام وحموم الجماهير ..

    ReplyDelete
  18. السلام يااسلام...

    والله محمد الراجي ده عجبني جدا ...
    هو قصده ... بلاش يا حضرة الملك الصدقه الريائيه ده... وهم فاهمين جداً هو قصده ايه... يعني اللي عاوز يساعد مش بيساعد بدراهم و قدام الكاميرات أو شهود عيان علشان ينشروا الخبر...
    و يستعلي على الفقراء والمساكين ...
    لو كان فيه نية مساعده حقيقيه ...يعني يرفعوا الرواتب شويه... ومن غير رفع الاسعار تاني يوم... لانها حتبقى حركه ريائيه تانيه ويشغلوا الشباب العاطلين عن العمل كلهم شهادات عاليه... ويشتغلوا حاجات مايرضهاش اي حد
    ...
    يعني مجرد سجودهم لملكهم وهو يمتطي
    جواده الابيض... يشعرهم بذل ومهانه وحركه بصراحه تقشعر لها الابدان... لا حول ولا قوة الا بالله...

    بدون استثناء ... الخنوع قائم على الدول العربيه كافه...
    ولكل شعب عربي نقطه ضعف ربما متشابهه وربما مختلفه لكن بكل الاحوال كل الشعوب تسير في طريق واحد الاستلام التام...
    تشكر على البوست الجميل... وبجد جه صاروخي ... هههههه

    تسلم يااسلام...

    ReplyDelete
  19. مهندس مصري
    يا باشمهندس مانا بوري الناس فرق جنة الديموقراطية اللي احنا فيها
    وقد اية احنا في ازدهار وزنهار الديموقراطية

    بنت القمر
    في الغالب دول بيكونو كلاب الحاشية
    او اي واحد فاكر انهم هايجيبوة من الاي بي بتاعة ويدولة جايزة
    المغاربة مش لاقيين ياكلو
    دة احنا عندنا تطور واكل اكتر من اللي هم يحلمو بية
    مع حبي وتقديري لكل المغاربة بس دي حقيقة معروفة

    ReplyDelete
  20. الله عليك

    انت عملت slogan اكلوهم وجوزهم وادفنوهم تركبوهم

    والله انت كدة تشتغل ولا احلى creative


    يا عم الراجل مروقهم هناك ومهننهم و مدلعهم وبيجزل لهم العطايا انا لو منه ابوس رجلة مش ايدة ما احنا كدة كدة بنبوس رجلين وببلاش يبقى مش هانبوس
    الرجلين ام فلوس يا عم الواد دا حلال فية انه يؤمر بنفية لمصر علشان يتربى

    تحياتى

    ReplyDelete
  21. وجهة نظري
    مشوفتنيش في الفوازير
    اجنن
    سعيد بمرورك حقيقي




    بثينــــــة
    عزيزتي
    الرجاء قرأة موضوعي مرة اخري
    علي انة مقال ساخر بحت
    وليس مجرد توضيح لوجهة نظر ما
    حتي تفهمي ما بين السطور
    تحياتي

    ReplyDelete
  22. Abdou Basha
    يا باشا دة حال كل صاحب دماغ


    FreeKiller
    انا كنت مستني بمب العيد
    انت مستني اية

    ReplyDelete
  23. واحدة مفروسة
    جو بارل يا مزمزيل
    لبلب


    خديجة محسن "لؤلؤة الاسلام
    ويا ستي الله اكرم
    وشاكرين المجاملة ومرورك

    ReplyDelete
  24. يا اسلام باشا عندى كم سوال ليك ليك كدة انت فاضى دلوقت

    ReplyDelete
  25. blackghost
    خير
    والسؤال هايقف عليك غالي خصوصا اذا كان اكسكلوسيف
    وانا راجل مادي والمعايش صعبة وانت فاهم
    اؤمر

    ReplyDelete
  26. عاقلة علي ارض الجنون
    ياسمين هانم
    انا هنا لاسعاد الشعب
    مش في البروفايل بقول انا بتاع الشعب
    انا مش عارف نعمل للناس اية اكتر من كدة
    ناس معندهاش دم
    مش كفاية رمضان السنة دي ديفيسيل خالص
    والجو مش جونتي
    يبقي الدماغ كمان فاتيجية


    سنـــدباد
    نفسك تبوس انت شكلك

    ReplyDelete
  27. طيب شكرا انا قررت انى اعمل مدونة ومش فاهم حاجة خالص

    انا عملت كل حاجة وجيت اعمل رسالة جت العنوان كتبتة بالعربى تحتيها كلمة رابط اكتب اية

    علشان كتبت كل حاجة فى الدميا ودة اميلى لو عاوز تخش شات وتشرحلى هناك انا منتظر

    ReplyDelete
  28. appy
    شوفي يا ست البتنجان كلة
    انا مازلت عند رأيي العشوائية في بلدنا منظمة علي اعلي مستوي
    اذا كنا 90 مليون مصري فافي 89 مليون مستعدين يرضو بالاكل والشرب و بت مقلوظة او واد حليوة
    ومتسمعلهمش حس
    وانا معاكي مفيش حاكم عربي محبوب حب مطلق
    لكن في محبوب المليجي ومحبوب ياسين
    ابقي تعالي انتي مبتجيش لية

    ReplyDelete
  29. وفى حاجة تانى التعليقات الجديدة فى اى مدونة بخشها ما بتظهرش بالرى فريش بتظهر بس لما احط تعليق علشان كدة انا بحط التعليقات اللى ملهاش لازمة

    ReplyDelete
  30. مدونة جميلة جدا وهخشها على طول

    بس ان دة ميدلش الا على مدى الحرية اللى عندنا

    ReplyDelete
  31. Oss
    انت لية اخدت الكلام كما لو اني موجهة لك
    انا عارف تماما معني التدوين
    ومعاك في اللي قلتة
    لكن التدوين الان اصبح مثل الجريدة في جرايد بير السلم



    allah-slave
    لية بس كل اللي فات دة معجبكش
    جايز الواحد دماغة ما بتشتغلش الا وهو صايم
    في يا سيدي ناس بتتفرج علي المدونات
    غير كدة الراجي بيكتب في موقع مغربي معروف بمعارضتة واتاحتة الفرصة لاي قلم يكتب مايشاء
    جايز لو مكنش كتب في الموقع دة مكنش حد سمع عنة
    الغلب وحش اعذر الناس هايعملو اية طيب

    ReplyDelete
  32. شمس النهار
    حاليا انا جعان دخان
    شوفت موضوعك الاول وعجبني تشبيهك فعلا
    دة احنا هانصدع بعض



    الدفاع
    متر
    والله وجهة نظر برضة تستحق الاحترام
    علي اي حال للاسف انا مقتنع اننا في دولة القربة المقطوعة
    تحياتي

    ReplyDelete
  33. البلوج تحفه مش لاقيه كلام الحقيقه بس اسمحلى اضيف المدونه عندى؟؟؟؟؟؟

    اكتر بوست عجبنى بصراحه بتاع ( انت جيت ....يا رمضان ) مجرد مقرات العنوان فضلت اضحك كتييير لانى تخيلت شكل وصوت اللى بيقولها زى سعيد صالح كده ف مسرحيه العيال كبرت هههههههه انت جيت ووراها شهقه وبعدين يا رمضان

    ههههههههههههههههههه

    بالتوفيق

    ReplyDelete
  34. انا مستنية العيد نفسه

    ReplyDelete
  35. وليه بس ا جعان يا أخويا حرقة الدم دي
    عااااااااااادي جدا..ما هي بروتوكولات حكماء العرب يا باشا
    ع العموم كويس أنه طلع وربنا يستر علينا جميعا
    :)
    يتا عم خليني في الكورة أحسن
    تحياتي

    ReplyDelete
  36. جعان القربه سليمه وبحاله ممتازه بس مفيش حد بينفخ
    تحياتى

    ReplyDelete
  37. طب كويس اوى انك بن ناس وتربية مدارس اللغات وحاسس بمشاكل الشعوب
    بس مش شايف ان موضوع ملء البطون للمصريين هو الحل لعدم المظاهرات واسكاتهم
    بصراحة مش عارفة نظريتك دى على وجة حق ولالا
    للدرجاتى المصري بيدور بس على قوت يومة
    مش مقتنعة

    ReplyDelete
  38. ملك وملكيه
    وفاكرين نفسهم احسن ناس فى الليله دى
    هما مش حسسين
    ان اليهود هناك راكبين
    وبوس تراب الجزم
    هما لاحسين
    هما فاكرين نفسهم دلوقتى بنى ادمين
    ومش شايفين انهم لابليس قريبين
    اما المصرين
    ممكن يا جعان لقمة عيش وجاوزة تتطريهم
    بس لسه فيهم
    ناس لو حبيت توزنهم
    مش هتلاقى ميزان
    يقدر على صباع واحد فيهم


    تحياتى

    ReplyDelete
  39. انت قاسي على الحكومه قوي
    عاوزها تاكلنا وتجوزنا وتدفنا
    اييييييييه الكرم دا كله
    دا ولا عيشة الملوك

    حكومتنا موفره
    شعارها
    كهربوهم وبالعصايه ادبوهم ومن غير ما تكلموهم هاتلاقوهم مركوبين وزي الفل

    ReplyDelete
  40. طب ليه صحيح الأخوه المغاربه اللى معلقين عنده كلهم مهاجمينه
    يعنى و لا واحد معاه فى اللى بيقوله ؟؟
    على الأقل اللى خايف يأيده ما يهاجموش و يكتفى بالصمت
    و بعدين ايه لازمه طوله اللسان فى تعليقات حضراتهم يعنى مش فاهمه ؟؟
    حاجه آآآآخر احترام
    أنا رايحه أشوف حالى بقه ... سلامو عليكوا (:

    ReplyDelete
  41. شكرا علي تعليقك علي المدونه
    وليه هنصدع بعض
    النقاش والحوار الموضوعي والتواصل مع الناس عمره مايكون صداع
    صدعني في اي وقت
    امال احنا عاملين المدونه ليه
    رمضان كريم

    ReplyDelete
  42. مش فاكر اسمى ايهMonday, 15 September, 2008

    ياعم خليه يجوزنى وياكلنى ويشربنى ويشحنلى الموبايل

    وانا ابوس اللى ما اتباسش فيه

    شدد اوى على حكايه يجوزهم دى

    وبحييك يا برنس من صميم معاميعى ومن ثنايا الملوخيه للراقده فى بطنى
    على مدونتك

    ReplyDelete
  43. كلام جميل بس صراحه معجبنيش اخر اربع سطور

    انت معانا ولا مع الناس التانيين

    ثم ليه كل الحق يطالب بألغاء تقبيل الايادى دى , دى مذله
    وان كان في المصريين حد بيضطر يعمل كدا فدا من غلبه مش حب فى كدا , ربنا يرحمنا وميذلناش لحد ابدا
    تحياتى ليك

    ReplyDelete
  44. امممممممممم الراجل دة راجل محترم بيدافع عن حقه الادمى....احنا بقى لنا الله

    ReplyDelete
  45. فيا حكومتنا الرشيدة اكلوهم وجوزهم وادفنوهم تركبوهم بسلام امنين
    ههههههههههههههههههه

    سيبك انت من المغرب
    لانى بفتكر انى صايم من الكلمة دى

    انا اصلا بنسى ان فى دوله عربية اسمها المغرب
    الا فحالة واحده
    لما مصر بتلعب معاها فبطولة افريقيا

    بس و الله الشعب بتاعنا رغم انه طالع عينة و مطالبة شرعية
    و مش بيطلب اكتر من اللى انت قلته فعلا
    لكن و الله احنا من اطيب الشعوب

    و حكاية اننا مش بنسكت عن حقنا دى تتمثل فالحديث ده

    "اذا فتحتم مصر فإتخذوا منها جندا كثيفا فانهم خير اجناد الارض"

    يعنى الرسول عليه الصلاة و السلام بيأكد لنا اننا احسن ناس تحارب

    و بجد بوست جامد جداااااااا
    اسيبك بقى عشان الحق الحرب

    سلام يا كبير

    ReplyDelete
  46. اييييييييهMonday, 15 September, 2008

    والله صدق الفنان المشهور اللى مش عارف اسمه لما قال دى مصر بلد الحضاره وهو ده العنوااااااااااااااان
    وايييييييييييييييييييييييه
    يالهوى على بيحصل يالهوى على بيحرى عيال بتشد كوله وشباب بيخدوا فياجرااااااااااااااااااا
    وبرده اييييييييييييييه

    ReplyDelete
  47. ان كنت ممن يتذوقون الشعر العامى والزجل ، ارجو زيارة مدونتى والتفضل بالنقد والتعليق ، فالنقد كالنصح ، والدال على الخير كفاعله

    ReplyDelete
  48. ههههههههههههه

    ضحكتينى على حالنا المقلوب
    عارف
    احنا فى المستشفى اقل واحد فينا فى المستشفى فى المرتب همه الدكاتره
    العامل بياخد اكتر منى

    دا غير حاجه جميله جدا اخر سنه الامتياز عشان يدوك البكالريوس
    لازم و حتما تمضى على ورقه تنازل على بدل انبطشيات بتاعتك تبرع للمستشفى
    و دا حوالى الف و شويه

    و لو ممضتش ملكش شهاده
    والله الهوهوه اللى احنا بنعملها دى مش ضاراهم فى حاجه يبقوا يدونا ليه

    هو كدا لا كدا عاجب و لا كدا عاجب

    احنا
    احنا
    احنا ولاد كلب
    اللهم خيرله و جزرله
    اللهم بطخه

    تحياتى

    تشاااااااااااووووووووو

    ReplyDelete
  49. علي فكرة انا اول مرة ادخل عندك بس بجد مكنتش متوقع الاقيك جامد اوي كدة


    بجد ضحكتني واقنعتني وعيطتني في تدوينة واحدة الله يباركلك يا ريس

    بالنسبة لملك المغرب كان في نكتة زمان بتقول
    ان المظاهرات طلعت في المغرب علشان البطالة فنزل الملك محمد وسأل الناس انتو عايزين ايه ؟؟ رد الناس كلنا شباب وعدينا الـ30 سنة ومفيش اي شغل خالص قالهم الصبر مهو انا قدامكم اهو قعدت 36 سنة عاطل وفي الاخر بقيت ملك

    ReplyDelete
  50. رد اخير علي عاقلة علي ارض الجنون

    الحكومة بتاعتنا ماشية بمبدأ مش بيتغير وهو

    من حقك تعترض ومن حقي اعتقلك

    زي المدير بتاعي
    من حقك تطلب علاوة ومن حقي برده ان انا ارفدك

    ReplyDelete
  51. عايزه اتطلق و
    اهو قلتش انا حاجة
    الست دي عايشة علي ارض الواقع
    وبالنسبة لبوظان سفرية المغرب
    في عندوكو فرصة شحاتين الحج
    والله المستعان علي الشقي



    أكون او لا أكون
    بالظبط كلامك
    عطايا الملوك لا تكون جوز جنيهات في ايادي المواطنين
    بل افعال لتحسين اوضاع الشعب
    وخليكي في المصايب اللي عندوكو
    لندن مقلوبة من ساعة انهيار
    lehman bank
    شكلكو هاتحصولنا وتقفو في طوابير ال
    fish & chips

    ReplyDelete
  52. انا من اهوى ومن اهوى انا
    انا خسارتي هنا
    المفروض اشارك طارق نور ولا شريف صبري
    مش بقولك ناس مش وش نعمة


    Anonymous
    انت مين ياااض

    ReplyDelete
  53. saso
    يا ستي المدونة تحت امرك
    بس ابقي راضي الرجالة


    FreeKiller
    لحمة ولا كحك


    micheal
    ميخا والنيولوك
    بحق جاة النبي اشوفك ولا شوبير
    شغال 18 شغلانة
    ورئيس مجلس ملي كمان

    ReplyDelete
  54. والله العظيم فنان يا اسلام

    تحفة
    فعلا
    كل عبيط باتنين جنيه قارف اللي خلفونا
    بصراحة
    الموضوع دا خلاني اهضم الفطار المفخخ اللي فطرته النهاردة

    تسلم ايديدياحبيبك والديك

    وكمان قريت الموضوع دا للجماعة..انت عارف اني مناسب المغاربة\
    ضحكنا ضوحك مش طبيعي

    ReplyDelete
  55. ازيك يا جعان باشا وكل سنة وانت طيب ورمضان كريم
    الاخ ده شكله مش وش نعمه وصعبان عليه عطايا الملك لشعبه
    هو جايز يكون عنده حق فى حكاية تقبيل الايد لكن بالله عليك كام واحد هنا عنده استعداد يبوس حتى الجزمة اللى تاكله وتشربه وتوفرله ادنى احتياجات الحياه
    وعندك حق فعلا طموحات المصرى دلوقتى بقت انه ياكل ويشرب ويموت موته كويسة
    ربنا يرحمنا برحمته

    ReplyDelete
  56. و الله موضوع محمد الراجي دة شاغل بالي بجد يعني هي فين حرية الراي الي قاعدين يتكلموا عليها انا كنت اعرف انه حرية الراي في المغرب مش اوي يعني
    بس مكنتش اعرف انها لدرجة دي انا بكتب دلوقتي و خايفة يجو يخذوني انا التانية
    بس يا ترى حيعرفو منين اننا مغربية ههههههههههه
    الله المستعان
    فلو غبت عارفوني اني اتسجنت و ادعولي
    بجد بارك الله فيك اخي و شكرا على اثارتك لموضوع محمد الراجي ربنا يفرج عنه

    ReplyDelete
  57. رائع بجد حلوه اوى
    والعطايا الملكية
    وايدين ايه بس الناس دى اكيد بتهزر
    ربنا معانا

    ReplyDelete
  58. مالها يا عمونا الاشتغالة اللي اسمها المدارس الحكومية

    اهي زبطتنا كلنا على مود واحد و مشفرانا عليه كمان

    اننا اجدع خلق الله و اذكاهم و احلاهم

    في حاجة مهمة انت كتبتها ان مش كل عبيط معاه جوز جنيهات يترمي بيهم في سيبر و يقعد ينقح علينا

    و برضه ده بيتفق معاه في ان مش كل عبيط معاه قرشين يشترك في دي اس ال يقعد يتحفنا بنظرياته و ابداعاته

    و رمضان كريم

    ReplyDelete
  59. ابن ذوات يا عم
    وعامل نفسك نصير الغلابة
    اية الوطنية دي
    وصورة العالم ببواطن الامور
    مش كفاية حركات قارعة
    وزي ما محمد الكومي قال
    مش كل اهبل بوصلة دي اس ال هايقرفنا
    الله عليك يا محمد هو دة الكلام

    ReplyDelete
  60. اسلام معلش
    هرد على قرينى اللى بدأ يتحرق
    اسمع يا قرينى انا بقى قاعده ليك وصدقنى عجبتنى اللعبه وبعدين هو عالم والناس عارفاه وبيدخل باسمه وبكيانه مش حرامي سارق اسم بنت يعنى انت مش راجل ولو انت بنت تبقى مش محترمه واخرك الشارع برضه
    وعموما مبسوطه انى وكل الناس حرقينك انت شكلك كده بتشتغل فى سيبر ولا حاجه طيب قوم نضف بقى علشان ميتقطعش عيشك

    ReplyDelete
  61. بعد اذنك يا سلم

    اصلى انا عاوز ارد على اللى حرقاهم كلمة اشتغالة مدرسة حكومية

    لا اشتغالة كبيرة كمان
    و عندك حق و الله
    و انا اتعلمت فمدارس حكومى
    و الله عمرى ما استفدت من المدرسة ابدا

    appy اما بقى الخبؤ اللى واخد اسم

    بعد اذنك يا ابى حرد انا كمان
    احب اقول ان كلنا عارفين اسلوب ابى
    و عارفين الطريقة بتاعتها فالكلام
    و كمان البروفايل بتاعك

    منذ 2008 سبتمبر
    عدد مرات العرض 28

    appy اما بقى
    فالبروفايل بتاعها قديم يا خبؤ
    و عدد مرات العرض كتير يا خبؤ

    منذ 2007 ديسمبر
    عدد مرات العرض 14,097

    ابقى استغطى كويس قبل ما تنام
    على فكرة احنا مبسوطين ان حد خبؤ زيك متغاظ مننا كلنا و ده دليل على نجاح حد زى ابى
    و بقولك

    حمرا

    الطاحونة على فكرة
    (فيلم ظرف طارق)
    واخد بالك من اسم الفيلم

    ReplyDelete
  62. ان جيت للحق انته معندكش حق لا انته ولا الراجى .... يااخى الملك فى الحيوانات محدش يقدر يكح معاه وكمان فى الطيور .... وفى اى كائن على الارض الملك هو الملك ..... بس ارجع وأأووول ان احنا مش حيوانات احنا مصرينانيون يعنى منقدرش نحس المعده فاضيه والبؤ يسكت وكمان القلم لازم يطرش شتيمه على اللى بيأصُفه بس بجد انت عجبتنى فى وصفك لحاجة المصريين ..... بس ادعى ربنا يخلى مولانا المبارك يقرا كلامك عشان يعمل بنصيحتك ويوفر لنا اكلنا وشربنا ومايحرقش دمناويورثنا زى المجوهرات والعقارات اللى معاهم

    ReplyDelete
  63. الغير محترم اللي منتحل اسم ابي

    ماتردش لوسمحت على تعليقاتي و مالكش دعوة بيها

    و خللي عندك ذوق الرد ده حق اصيل لصاحب البلوج

    و انا اسف جدا يا استاذ اسلام اني رديت عليه

    ReplyDelete
  64. عشان تعرفوا ان شعب عربي ده شعب خرسيس
    فالاد زي ده مفروض يشنقوه يعدموه
    بس هما كانوا طيبين كتير وبس حبسوه
    مش تحمدوا ربنا فالاد خلبوس منك له
    مصر فيه بوليس وسايبكو تقولوا وتتكلموا
    والله مصر دي بلد عزييييم
    وسمعني سلام عزيمة يا مصر
    والله حاجه تفرس
    ولا ابلغ من وصف الحكام العرب من وصف الشاعر الرائع
    أحمد مطر
    القمع والحرية الزائفه والديموطاطورية هما المسيطرين
    وفعلا كتير بيرضوا بالأمر الواقع ويقولك خلينا نعيش
    ولا عاشوا ولا هيعيشوا
    الحمد لله على نعمه التعليم المجاني
    خلاني اكتفي ببلوتي وماشوفش بلاوي غيري
    :))

    ReplyDelete
  65. لا اكيد في حاجه فيرس مثلا
    كل ماادخل مدونه مالاقيش حد كاتب موضوع جديد
    في كسل مستشري في مدينة المدونين
    الحمد لله مش انا بس اللي كسلانه

    ReplyDelete
  66. نورتني بزيارتك لمدونتي المتواضعة
    وبجد مدونتك رائعة
    أما موضوع تقبيل الأيدي ده أنا مش عارفة إزاي حد يقبله ده فيه إحراج غير عادي واللي في نفوسهم مرض بيزودهم غرور وتعالي على الناس هو صحيح هنا الناس بالفعل ممكن يذلوا نفسهم للي يسوى واللي ما يسواش بس مين يحس بيهم وبضعفم وحاجتهم الإنسانية والله جت لي واحده النيابه جوزها ميت ومش عارفة تاخد معاشه ومش لاقيه تاكل قامت وطت على إيدي تبوسها علشان أرجع لها حقها طبعاً أنا كنت متفاجأه وقلتلها متبوسيش إيد حد ومتتذليش لحد ولو ليكي حق هيرجعلك بجد أنا حسيت ساعتها اللي أنا اللي إتذليت وإن مين أنا علشان واحده بجد ممكن تكون أحسن مني عند ربنا تتذللي بالصورة دي وعشان
    إيه علشان حق وبجد حسيت إني في رقبتي حمل كبير كل يوم بيعدي والست دي مش لاقيه تاكل هي وعيالها والحمد لله بعدها بكام يوم ربنا ساعدني أرجعلها حقهاو حق عيالها، وعدى عليا كتير زي كده وأصعب أما في موضوع الملك ففي شرع مين ده بجد دي حاجه تكسف إحمد ربنا إن الريس بتاعنا ما بيعملش كده أما موضوع العطايا بتاعة الملك فوالله راجل كريم بس لوكان بيعمل ده لوجه الله إيه اللي عرف الناس بيه المفروض الحاجات دي تبقى في السر يعني يدي الفلوس دي لأعوانه مثلا يوزعوها على الناس من غير ما يعرفوا هي منين والا يمكن عايز الناس يدعوله وبالمرة يعرف كل الناس إنه راجل بر وإحسان
    ويعيني على المدون المسكين اللي إفتكر إنه بيعبر عن رأيه بحريه ده إحنا كده عندنا أرحم بكتير
    معلش طولت عليك
    تحياتي

    ReplyDelete
  67. وحتي لو تكرمت الحكومة وأكلتنا وشربتنا وجوزتنا ودفنتنا ، أكيد ح تلاقي ناس تنط وتقول يا حكومة ركبينا عربيات ملاكي ، ولو حصل وركبتهم ح تلاقي ناس تعمل مظاهرات وتقول يا حكومة سكنينا في شاليهات في بورتومارينا ، ولو سكنتهم ح تلاقي ناس تتظاهر وتقول يا حكومة نيمينا مع هيفاء وهبي !!
    والعملية كدة مش هتخلص واصل ، حاكم احنا ميملاش عينا غير التراب واسأل علينا في العالم كله ولما يجاوبوك ح تقوللي "فعلا يا واد يا هتلر كلامك مظبوط"!!

    بعد إذنك بقي لازم أستأذن ورايا صفقة بمليار دولار وبعدها ح أطلع ع الشاليه في بورتو مارينا علشان هيفاء مستنياني هناك

    وكل سنة وحضرتك طيب وشعبان عبد النعيم يووووه قصدي"رمضان كريم"

    ReplyDelete
  68. فعلا

    اسلوبك رائع فى سرد الامور رغم انها امور انتقادية للمجتمع


    بس بجد كل ما ذكرتة صحيح تماما
    أما بخصوص تعليقك فى مدونتى
    فاسمح لى ان اوضح لك بعض امور..قد لا تقابلك ولكنها تقابل غيرك..والموضوع كبير لا يقبل النقاش هنا..

    ReplyDelete
  69. بنوتة مصرية
    هاتعملي اية بقي واحد غاوي وجع دماغ
    وغاوي غلابة
    ناس مش وش نعمة
    بالنسبة لنظرية اطعم الفم تستحي العين
    انا مقتنع بيها تماما
    الشبعان بيبقي عايز ينام مش يروح يقف في الحر


    ABOALI
    عجبتني
    تحياتي

    ReplyDelete
  70. دمعاتي
    انت عارف بقي البني ادم ميملاش عينة الا التراب


    دعاء على
    مش كلهم بيهاجمو دة واحد نفسة يشغل ابنة في الديوان الملكي
    فا بيمسح جوخ علي الله تصيب وحد يشغلة ابنة

    ReplyDelete
  71. شمس النهار
    انا عن نفسي عامل المدونة علشان اصدع نفسي واللي معايا



    مش فاكر اسمى ايه
    دة انت حالتك متدهورة علي الاخر
    حد يجي يبوسة يا جدعان

    ReplyDelete
  72. nour shahen
    يا ستي معاكم بس لازم تقري اللي بين السطور



    enjy
    لو قريتي تدوينة لي فاتت من كام اسبوع
    كنتي عرفتي اننا لينا صباع الدكتور

    ReplyDelete
  73. مواطن مصرى نايم
    انت راجل خلبوص
    وهاتعلمني البوظان شكلك
    واحنا فعلا احسن ناس نحارب
    بننقاد يعني


    اييييييييه
    انت مين ياااض

    ReplyDelete
  74. Beram ElMasry
    يا باشا في الوضع اللي انا في اتذوق اي حاجة
    انشالله زجل بالباشاميل



    د/مروة المعداوى .....قباحة سابقا
    يا قباحة هانم
    ودي اشارة ليكي انك تسيبك من الطب وتدخلي معهد تمريض
    وبكرة الاشية تبقي معدن

    ReplyDelete
  75. tamer.sala7
    يا سيدي ربنا يخليني
    وسعيد ان التدوينة عجبتك
    لو جيت بعد الفطار في قطايف للسادة المدونين


    أُكتب بالرصاص
    انت فين يا عمنا
    تحياتي ليك وللاسرة

    ReplyDelete
  76. اهو ده عيبة
    الله اكرم
    زي ما قلتي هو مش وش نعمة
    عالم غاوية فقر
    مايبوس اية يعني هي البوسة هاتلزق



    zizi
    متقلقيش اتسجني انتي بس
    واحنا نعملك حملة علي الفيس بوء

    ReplyDelete
  77. engy
    ربنا معانا كلنا



    محمد الكومي
    عارف يا باشا
    انا كنت لما اشوف واحد خارج من مدرسة حكومية
    اقول في سري
    الحمدلله الذي شافانا وعافانا وفضلنا علي كثير من خلقة تفضيلا كثيرا
    الا صحيح طيب اللي قاعد علي
    Fiber Optic
    وضعة اية

    ReplyDelete
  78. appy التايواني
    حمرا


    Appyplanet
    معلش علي اية يا رحاب
    دة لو راضع لا مؤاخذة من صدر امة مكنش عمل اللي عملة
    متشغليش بالك

    ReplyDelete
  79. مواطن مصرى نايم
    نفسك انت في خناقة وتقلع حزامك وتجري ورا اي حد
    بس برضة احقاقا للحق في ناس طلعت من المدارس الحكومية حاجة تشرف
    وكتير من نوابغ مصر خريجي مدارس حكومة


    تلميحاتى - يوسف الشافعى
    ادينا بندعي وربك يسهل
    والملك يبصلنا بعين العطف
    تحياتي

    ReplyDelete
  80. محمد الكومي
    اسف علي اية يا محمد
    دي عالم بتصطاد في المية العكرة
    فكك


    ojg
    واضح العرق التركي نقح عليكي
    حد يلحقها بطبق خبيزة

    ReplyDelete
  81. شمس النهار
    بيني وبينك انا ارزع الفطار من هنا
    وعينك ما تشوف الا النور
    باروح الجامع زحف علشان التراويح
    هاندون كمان



    نيجار
    سيادة الهانم الوكيل
    الا صحيح اية حكاية وكيل النيابة دي

    بوس الايادي للاسف عادة متأصلة في العرب
    مش فاهم اية اصلها الصراحة
    علي اي حال العرب يموتو في البوس

    ReplyDelete
  82. The Führer
    كبير النازية واللي مخلص علي اليهود
    احنا شعب ياكل وينكر وميتمرش فية اللقمة
    متوجعش قلبك


    بنت سيناء
    انا اللي اقصدة ان يجب اننا نخرج شوية من حيز الغيبيات ونعيش علي ارض الواقع
    العالم الاوروبي ماسمعناش ان حد شاف تربة بتطلع دخان
    او عفريت عايز يشرب
    ارجو ان لا يفسد اختلاف وجهات النظر
    ود الحوار
    وتحياتي لك

    ReplyDelete
  83. هههههههههههههههه

    ربنا يهديك يابني قول امين

    ReplyDelete
  84. ما هو كلامى ميمنعش ان يطلع نوابغ او اى علماء او عوالم
    المهم النسبة كام يعنى
    واحد فالمية
    بلاش كده
    25
    فالميه
    طب و الباقى ولاد البطه السودا يعنى
    ;)

    ReplyDelete
  85. This comment has been removed by the author.

    ReplyDelete
  86. مواطن مصرى نايم
    اة طبعا الباقي ولاد البطة السودة
    وفي مقولة اخري ولاد كلب
    انا فاهم قصدك

    بنت سيناء
    اعتقد الحوار دة المفترض مكانة في مدونتك مش عندي هنا

    ReplyDelete
  87. معلش ياسلام لو اتدخلت بس فى واحد برضة عامل بروفايل مزيف لقطة الصحراء وهى عاملة بروفايل بكدة

    http://catofdesert.blogspot.com/

    ReplyDelete
  88. ههههههههههههه
    المصري مصري برده
    بس الظاهر ان المدونين في المغرب دول صغنين جدا
    بس كلامك الاخير عن المصري وبطنة وكده
    مالوش لازمة
    همه حيوانات ولا ايه
    دول اكتر ناس عندها كرامه
    ...................
    انا بتكلم عن الشعب المصري من 500 سنه يعني
    احسن تفهم غلط
    :)

    ReplyDelete
  89. على فكرة انا قطة الصحراء الحقيقة واللى علق قبلى ده حد غبى عامل بروفايل زى بتاعى فيه نفس الصورة والاسم
    انا فى العادى مش بدخل مدونتك اصلا يبقى هعلق ازاى .. لكن فى حد جه قالى ان الحيوان اللى عامل كدا جه رد عندك
    انا مش شوفت رده بس شوفت ردك
    وميرسى جدا لزوقك اللى هو الكلام اللى كان متوجه لى والحمد لله انها جت فيه هو
    على الله يحس بقى
    وباكد لسيادتك انا مبردش عندك يعنى لما يجى لك المرة اللى جاية ابقى ادخل البروفايل واتاكد بنفسك
    وابقى قول اللى انت عايزه
    تشاااو

    ReplyDelete
  90. desert cat

    والله انا معرفش العادي بتاعك من المش عادي
    علشان اعرف بتعلقي ولا لا
    تدخلي او لا دي حاجة متهمنيش
    هو انا موعود بالناس المريضة دي دايما
    انتي مش داخلة تنوهي ان في حد سارق الاكونت بتاعك انتي داخلة تقولي شكل للبيع
    وانا في المعتاد اللي بيغلط بامسح باهلة الارض
    اعتقد كدة مش انتي اللي تشكريني علي ذوقي دة واجب اللي اتشتم
    كل واحد وتحملة انا مش فاضي اتابع بروفايلات الخلق

    ReplyDelete
  91. مالكش دعوه باسمى عشان معوركشMonday, 22 September, 2008

    ايييييييه
    انت مين يااد

    انا اللهو الخفى وكلمه زياده هتلاقينى ناطط فى بنطلونك

    وانت كنت مدون مدون على نفسك بره النت يا ......
    جعان

    هع هع هع

    عل الزراعييه يارب .......

    ReplyDelete
  92. ابو الطيب المتنبىMonday, 22 September, 2008

    ابغيه الدين حف الشوارب
    يا امه ضحكت من جهلها الامم




    الصلاة على النبى على الكلام الكبير......

    ReplyDelete
  93. وانا اعتقد اننى قلت لك ذلك فى التعليق الاول لديك وانت الذى فتحت الموضوع وتتطرقت له وفصلت ايضا ..اعد قراءة تعليقى الاول ذكرت فيه (الموضوع كبير ولا يقبل النقاش هنا)أما التعليق الثانى فقد حذفتة وأأسف على ازعاجك
    تحياتى

    ReplyDelete
  94. والله ما فاهمه الحكايه من ناحية إيه بالظبط
    بس هو أنا لاقيت كل واحد أواحده من المدونين كاتبين وظيفتهم وأنا عايزه أتكلم عن نفسي مش حد تاني فقمت أنا يا مسكينه يا غلبانه ياني بكتابة وظيفتي على فكره في أي مكان محدش بيصدقني لما بقول شغلي وما بصدقونيش إلا لما بوريهم الكارنيه حتى كمسري القطر لازم مع التذكره أطلعله الكارنيه رغم إني كمان وكيل نيابه إداريه مش عامه يلا ربنا يعديها على خير
    بس ياريت توضحلي قصدك إيه بسؤالك وأنا تحت أمرك
    وياريت تكتب حاجه جديده بجد مواضيعك جميله
    تحياتي

    ReplyDelete
  95. طالب ثانوى
    شكرا يا فاروق علي التنبية

    أنا إنسان
    انا فاهمك صح
    لا تكلك

    ReplyDelete
  96. نيجار
    ياباشا
    هو دة اللي كنت عايز اعرفة عامة ولا ادارية
    مادام ادارية ربنا يقويك فعلا
    انا من وجهة نظري دوركم اهم من العامة
    لان للاسف بالرغم من ان سلطات النيابة الادارية محاسبة الفاسدين في الجهات الحكومية
    الا ان الفساد قد بدا في الانتشار بها والخلل طال القضاء
    ودة كلام اصدقاء من داخل السلك القضائي نفسة
    بل ان بعضهم عندما لم يستطع ان يقاوم اعتزل
    ربنا يعينك
    وحقيقي تشرفت بمعرفتك




    بنت سيناء
    انا فعلا ربنا بيختبرني بالتعبانين في دماغهم
    انا تعليقي عندك اساسا منزلش متوقعة نعمل حوار ازاي

    ReplyDelete
  97. ا/إسلام

    انا قريت مقالة محمد الراجحي وفعلا مفيهاش اي حاجة دي وجهه نظرة وجانبة الصواب فيها

    وكلامة منطقي جدا خصوصا ان عطايا الملك بتعطي لمن لا يستحق

    من حقة انه يعترض علي اي ظلم ويطالب بتكافؤ الفرص

    لو النظام بقي شايف ان ده عيب وميصحش فدول بيدورا علي مصالحهم الشخصية ومن مصلحتهم يحسسوا الملك انهم بيخافوا علية وعلي عرشة

    زي بالظبط الناس اللي مش عارفين بتطلع منين وتلاقيها رفعت قضية علي فلان ولا علان علشان كتب مقال انتقد فية الحكومة او الحاكم

    وتلاقي الواحد فيهم كل صفتة في الحياة انه حزن وطني

    بخصوص نصيحتك للحكومة بقي مش معاك فيها خالص ايام الملك كانو بياكلوا وبيتجوزا ومع ذلك انقلبوا علية

    علشان طمعانين في عيشة احسن املي بطونهم واشبع فروجهم تشغل عقولهم وتذيد تطلعاتهم ده مش كلامي دة كلام سلم الحاجات بتاع ماسلو

    اسفة علي التطويل بجد استمتعت جدا بزيارة مدونتك

    ReplyDelete
  98. تعبانين؟؟الله عليك
    دة من ذوقك

    انت صايم؟؟

    ReplyDelete
  99. انا كنت فى زياره عشان ااقولك مستنيه الجديد
    كتاباتك رائعه رائعه..
    وربنا يوفقك.

    ReplyDelete
  100. وومن
    أ\ميرا
    حال الدول الناطقة بالضاد عموما واحد
    وذوات الحكم الديكتاتوري بشكل خاص
    نفس التدليس و الموالسة

    تصحيح بسيط ايام الملك اللي انقلبو كانو مجموعة ظباط من الجيش
    الشعب كان نايم في مية الطرشي
    لولا بس قرف الاحتلا الانجليزي والله ما حد كان فتح بقة
    واضافة من بق اهالينا ان ايام الانقلاب دة الناس كانت متوقعة انة لعب عيال
    وشوية والملك يرجع وينفخ العيال دي
    وان مجلس قيادة الثورة قام بحملة اعتقالات واسعة لقمع اي راي معارض حتي ولو كان سلمي ضد الانقلاب العسكري دي

    المهم الحج ابراهيم ماسلو
    وسلم تدرج الاحتياجات قمتة لا تؤدي بالنهاية لاي تطلع سياسي شوفي كدة معايا
    نقلا عن السيرة الذاتية لابراهيم ماسلو
    اولا
    الـحـاجــات الـفـسـيـولـوجــيـــة
    اكل شرب هوا لبس راحة الجنس

    ثانيا حاجات الامان
    مادية معنوية صحية ووجود مصدر مشبع للحاجات في القائمة الاولي

    ثالثا حاجات اجتماعية
    حب اسرة مجتمع نوادي اعمال جماعية

    رابعا حاجات التقدير واحترام الذات
    تقدير في العمل في المحيط الاسري
    والاعتراف من الاخريين بمهارات الفرد

    اخيرا تقدير الذات
    وهي تطوير الفرد لنفسة وتحقيق ما هو اكثر من الحالي

    لحد دلوقت كل دة لا يؤدي بالضرورة لاي اعتراض علي نظام حاكم
    اساسا للاسف مفيش مجتمع عربي وصل للمرحلة التالتة حتي في سلم الاحتياجات

    مصر لسة في بير السلم
    انا اللي سعيد بزيارتك ونقاشك

    ReplyDelete
  101. mahasen saber
    يا فندم الله يخليكي
    افوق بس من القطايف وانا انزل بالجديد

    ReplyDelete
  102. السلام عليكم ورحمة الله وبركاته

    الاخ الكريم اسلام ( جعان )

    امتى هاتنزل تدوينتك الجديدة الاحداث الحالية تستلزم منك كتابه

    انا مستني وكل يوم بدخل اطل طله عندك

    ولما فكرت ارد لاقيت الكل كفى واستوفى الردود

    غير نقطة واحده بس الكل وافقك فيها واستئذنك ان اختلف معك فيها

    نقطة ان اي عبيط ب 2 جنية في سايبر بيعمل مدونة

    للاسف اي سايبر دلوقتي شغال على الجيمز

    وياريت العبط اللي بيعملوا مدونات ب 2 جنية دول يكتروا على الاقل هايفكروا يتكلموا صح

    لكن احنا شعب لا يتكلم الا في 3 حاجات ولكن لا يتحدث بمصداقية بل بتفاهه وسفاهه

    الجنس والكرة والسياسه

    اما في الجنس فنحن نتحدث من باب اثبات اننا خبراء في اصناف وانواع كل حاجه في اي حاجه ( على راي عمر طاهر في شكلها باظت )

    اما في الكرة فالحال واضح عندنا فريق يتيم وبيكسب بس لان الريس بيشجعه

    وفي السياسه اظن الوضع مش محتاج كلام

    اللي خلى رجاله بشنبات يعملوا منتقبات عشان بربع جنيه عيش

    وشباب زي الورد متلطم في بلاد الله وبلده مشاع لكل من هب ودب

    فخلي الغلابة يتكلموا يمكن لما يتكلموا يفوقوا ويمكن لما يفوقوا يقدروا ولو لمرة في تاريخهم الاسود الممتد من 7 آلاف سنه يقولوا كلمة صح

    تحياتي

    أحمد (كله كلام)

    ReplyDelete
  103. دى اول مره ادخل مدونتك وان شاء الله لن تكون الاخيره
    بالنسبه للناس ايام فاروق والاحتلال الانجليزى وعبد الناصر وانور كانوا رجاله بيتقنوا عملهم وبينقضوا الحكومه على اساس لكن للاسف حاليا احنا اصبحنا الحكومه بل واسوا من الحكومه مفيش اتقان للعمل مفيش اخلاق مفيش رحمه ولا تراحم مفيش قدوه صحيحه وانا اعرف مقوله لسيدنا على ابن ابى طالب رضى الله عنه وارضاه يقول
    "كما كنتم يولى عليكم"
    وربنا سبحانه وتعالى يقول
    "من اعمالكم سلط عليكم"
    يعنى كل اخطائنا دى احنا مشتركين فيها اما بسكوتنا او بافعالنا
    المدونين زى اللقمه اللى فى الظور نظام العيار اللى ميصيبش يدوش ودا اللى الناس عملته
    تقريبا البوليس المغربى عمل زى حكومتنا لما عملت مع اسراء نظام اضرب المربوط يخاف السايب وان كان دا مشتمش فعشان محدش غيره يشتم قرصوا ودانه
    احنا هنا بقى ودن من طين وودن من عجين
    تحياتى لحضرتك سومه_87

    ReplyDelete
  104. اسلام باشا

    والله الامة العربية دي ما عجبها العجب ولا الصيام في ذو القعدة حتى

    سيبك انت
    رمضانك كريم

    ReplyDelete
  105. والله شكلنا كلنا هنجوع بجد قريب

    ReplyDelete
  106. هى القطايف كبسه على نفسك كده
    يا باشا فين الجديد

    رمضان خلص خلاص

    ReplyDelete
  107. بعد ما كتبت التعليق اتمسح
    طيب شكلي كده لا زم اعمل ماج كاكاو سخن واعقد اعلق برواقه
    وما حدش يسألني امته
    طب اهرتل شوية عبان ما حد يعملي اي
    اخض ر
    التعليم الحومي تابع رد الكومي شديد وفي محله
    ربنا يخلي الست الوالده وعقبال ما تجوز ولا د ولادها
    تكسبش فيا ثواب وتجوزني

    التدوين المغربي كدا فعلا هاديء ومنظم ومحترم
    وبالذات مدونة الراجي
    ومحمد سعيد احجيوج
    صاحب مدونة بلا فرنسية كلمني بلغتي يا بن بلدي
    عموما انا بحاولدلوقتي اقرأ قصة اعتقالة هو حطها بالمدونة
    اما عن الشعب المصري فهو لا يفكر الا فيما ذكرت ولأمر في المغرب
    طينة وزفت وقطران
    في كل المغرب العربي

    بس اللي لفت نظري قوي فعلا ان المصري كده
    ولو حد فاكر كلام جدودنا ايام الملك كان بيديهم عطايا و اعتقد ايام السادات كان في حاجة اسمها الكساء الشعبي
    والكاستور واللذي منه
    وكان الناس بتحب الملك لولاش ابن ....عبد الناصر
    والناس كان كافيه خيرها شرها والأشية كانت معدن
    قوم ايه الكلام د برضك كان ايام السادات

    بس دلوقتي
    الحكوة الراشدة الحكيمة بتاعت طعمواولادكوا وريحوا خالكوا
    لقت ان احنا شعب م بيطمرش فيه وانه كده كده حيطلع فئة مخدتش او زي القطط خدت وكلت وبتنكر
    وتتنطط على الهشا بتاعت حظرتنا
    وتتهكم على الذات المباركة فقررت ان تعمل ودن من طين والتانية من عجين
    وبما ان الشعب المصري زي ما احنا عارفين زي الهم ع القلب
    فكل سنة وانتم طيبين
    والحل في تنظيم الأشرة حضرتك ولا عزاء للصين
    بقولك ايه انا مفقوع مرارتي لوحدي
    اخبار الدراسات العليا اللي في البيت ايه
    ربنا يوفق
    دمت بحفظ الرحمن

    ReplyDelete
  108. ايه يا عم الحج الكلام ده ؟؟؟؟ ينفع كده ؟؟والله انتا شكلك كده هتفضل جعان طول عمرك وكمان هتجوعنا معاك

    ReplyDelete
  109. very interesting blog, I liked it, the information is very clear and chronologically ordered as in the site buy viagra

    ReplyDelete

بعبع وقول اللي في نفسك يا خويا