Thursday, October 16, 2008

عزيزي المواطن شلح واتبعني

صلو علي رسول الله
الحركة دي في لندن ب تلاتة استرليني في امريكا ب خمسة دولار
ولاجل الست ام هاشم ام العواجز بقت بربع جنية
علي راسها تنور علي بطنها تنور علي لامؤاخذة صدرها برضة تنور
وموسي نبي وعيسي نبي ولكل من لة نبي يصلي علية

كلما قرات تصريح او بيان لحكومتنا المصونة يعود لمخيلتي نباطشي السيرك قديما وهو المسؤل عن تقديم الوصلات
و الفنانين في الموالد والافراح وليالي الطهور واشعال الجو
وفي بعض الاحيان لما تكون الغزالة رايقة
يتراي امامي سيد الملاح باغنيتة الشهيرة انا انا انا ابريق الشاي ايدي كدة بوزي كدة اصب الشاي وارجع كدة
كلنا سمعنا عن انهيار البورصة العالمية وخسارة بورصة داو جونز ل 670 مليار دولار ولطمت الاسواق العالمية الخدود وشقت الثياب
الا البورصة المصرية في كل القنوات و الاذاعات والجرائد القومية بتقول ان الحالة فل وعال العال وليس في الامكان ابدع مما كان
بتفكرني بايام النكسة الدنيا كلها بتقول اننا لامؤاخذة بقينا بلبوص واحنا في مصر خرجنا
رافعين صورة جمال المدلس الاكبر وبنبوس بعض علي الانتصار

سقط المقطم علي راس الألفات وفعص المئات كما الابراص المنوفي دة غير سقوط المباني في القاهرة والاسكندرية بصورة شبة شهرية
وتسابقت الجرائد القومية لعرض اخبار من اليابان وغيرها لحوادث سقوط عمارات وان محدش احسن من حد
واللي يمشي علي تفيدة لازم ترضي بية سنية
اللي اعرفة ان الدول دي بتطلع الضحايا من تحت الارض مش بتردم عليهم وتجيب شوية عيال يقضو حاجتهم فوقيهم ويقولو بقت مقبرة جماعية

وتزيد الحكومة في استعباطنا واستهبالنا كما لم تفعل من قبل
وتلقي بالوم علي المفعوصين تحت الجبل ما هو اللي مش مصدق ينزلهم يسألهم
وقام المقدس ساويرس بالتعاون مع الحكومة بتسليم فيلات ومنتجعات اوراسكوم الي متضرري الدويقة
الشقة 30 متر يعني الحمام عندي اكبر منها

اتوجة للسيد الرئيس باسمي ايات الشكر والعرفان لقرارة الابوي بالعفو عن ابراهيم عيسي
وكفاية اللي شافو
بيفكرني لما تدخل ايام الحضري وايام صفر المونديال وايام فوازير رمضان
ونحن في انتظار تدخلة لانقاذ تامر حسني من حلق شعر جسمة بالموس و رشة بمحلول ملحي و ارسالة للتجنيد في جيش جمهورية زائير المتحدة

لا انسي قصة انقاذ قطة سقطت في طرنش مفتوح في امريكا وتم نقلها بس حي علي الديسكوفري
وتعويض لاصحاب القطة والمحافظ ارسل برقية تهنئة بسلامة المحروسة
و عندنا عبارة بها 1400 شخص تم ضرب اهالي المتوفين بالبلغ و الشوم
علشان يوسعو الطريق امام سيارة المحافظ
و لم يهز رئيس الوزرا المنطبق علية المثل القائل انا مش قصير قزعة انا طويل و اهبل طولة ليتفقد مكان الحدث
بل ذهب هو و ال مبارك جميعا الي نهائي دورة الامم
و ظهرت السيدة الاولي سوزان مبارك ماسكة علم مصر و شغالة تشويح و زمامير
و قفش في زمارة المحروس جوزها بوس و احضان لما دخل الجون ولم تترك زمارتة الا في لما جة يسلم الكاس

واخوة عرب بيبرطعو في بلدنا كما لو انها بلد ابوهم واحنا جرابيع خراسيس
مجموعة شباب انهالو علي عربجي بالشلاليت والبونيات
ولما راحو القسم تم اخلاء سبيلهم والتحفظ علي العربجي
اما اذا الوضع مختلف وقام العربجي بالشخط فيهم
فلن يمر الامر مرور الكرام فحتما ولابد سوف يتم رقع العربجي علقة محترمة
و لسعة بمعلقة سخنة في مكان حساس علشان ميعملهاش تاني وربطة مكان الحمار

فا الظلم في بلدنا درجات والعدل درجات ايضا
فاذا قام بعض مراهقي العرب بتحويل مسكنهم الدراسي في مصر الي بيت دعارة وسهرات قمار
ونسوان تحل من علي حبل المشنقة طالعة نازلة ليل نهار
فهو طيش شباب وضغط الامتحانات ماثر عليهم ودول زي ولادنا برضة
لكن لو اتمسك عيل بريالة يا دوب بيبوس واحدة في طريق المطار
ففضيحة و جرسة و اجلاسة علي خازوق و يروح القسم و يكتب علي البت
بالرغم من ان كل جريمتة بوسة حمقاء من مراهق غلبتة هرموناتة

اما عن لولبية عصرها و اللي خاربة نص رجالة العالم العربي وتسعي جاهدة للقضاء علي النص اللي فاضل
التي تلعنها الستات صباحا ويحلم الرجال بها ليلا فحدث ولا حرج
نانسي عجرم قبضت مليون دولار في اعلان حاجة ساقعة
وياكبدي علي الشاب المصري حسب تصريح حقوق الانسان مرتبة السنوي لا يتجاوز 300 دولار سنويا
فا علي كل شاب يتوسم في نفسة صفات العجرمة او النانسنة التوجة لبيبسي كولا عسي ان ترضي باعطائة غطا مخروم لسد بلاعة بيتهم الطافحة

خبر يتكرر للمرة الالف في خلال الخمس سنوات الماضية
سوف يتم الغاء قانون الطواريء
فا الي كل من اسمة طارق ... ارجع يا طارق بلدك سامحتك وارحمنا بقي


لا ادعوك عزيزي القاريء للاكتئاب و الابتأس و ضرب نفسك 100 صرمة فقط
و لكن ادعوك ان تقوم بلسع اللي جنبك ايضا علي قفاة

67 comments:

  1. طيب اعلق على فين الاول ولا فين انت ايه بتدوس على زرار بتقليب المواجع
    بس تصدق ساعات مش بيصعب عليا نفسنا
    علشان بجد بنسكت ومش معنى كده نقوم نولع فىالبلد بس ابسط حقوقنا مش بنعرف ناخدها
    وبنتشطر على بعض
    اولا الكدابين فيه واحد لسه منتحر بسب خسارته فىالبورصه بس طبعا مش مبرر لان فيه ناس من ساعه لما نزلوا الاعلان اللى ميتسماش بتاع
    صندوق المستثمار ده بيقلبوا فى جيوب الناس
    الصغيرين الشغلاه والسواق وعم عبده البواب
    طيب قولى باللهعليك ناس طفحه الدم ليل ونهار وتيجى تقوله ادينى 10جنيه وهديك 15 هيقولك لك
    خلاص يا سيزر هما عاوزين الناس تبقى متواكله
    والناس تستاهل كتير من اللى بيجرى لها
    موضوع الجرايد واللى بتعمله بص مصر مبقاش فيها حاجه يا جرايد بمبى يا جرايد سودا
    والبلد بتنهار بجد واحنا بقينا عدوانين
    وكل شويه واحد يطلع يقولك اصله عمل الشيطان بقت متاجره بكل حاجه وبقت تقرف
    احنا عاوزين تعديل من الناس لغايه الحكومه ام كدب منعكش دى
    واخيرا يا ابنى بلاش حمام بيتكم اللى 30 متر ده الناس مش لاقيه ارحم شويه
    وبعدين كده بتخلينى ارغى وتفتح البلاعات المقفوله فى قلبى

    ReplyDelete
  2. السلام عليكم ورحمة الله وبركاته

    طيب واللي مافيش حد قاعد جمبه يعمل ايه
    اضرب مين علي قفاه انا دلوقت

    :))))

    ReplyDelete
  3. حمامكو 30 متر ياراجل دا انت هاتتحاكم بسبب الموضوع دا

    هايسيبوا كل اللى قلتوا ويقفشوا فى ال30 متر دولن ويقولولك لما انت كدة متضايق وصعبانين عليك اوى بتوع الدويقة خدهم عندك

    أكفل منكوب فى حمامك .. هايقعدلك فى عيالك

    حمامك لو كبير ... اكفل فية حد فقير

    هههههههههههههه

    وهتلاقى حمامك علية طوابير

    سلام يا كبير

    ReplyDelete
  4. اطمئن يا عزيزي
    فكلنا تابعين

    و اللي يتلسع من الشوربة ينفخ في الزبادي
    :D

    ReplyDelete
  5. فكرتني ببياع في القطر لما كنت باركبه ايام الكلية
    بيقول ايه ؟
    صلى على رسول الله
    لا بنشحت و لا بنقول لله
    معايا اللبان و اللي ما بانش
    معايا اللباس و اللي ما باسش
    معايا أستك ياباني تمطه يرجع لك تاني
    معايا فلاية تطلع لك القملاية و تقولك دكر و لا نتاية
    معايا طبق صيني ما ينكسرش
    اللي يكسر واحد أطلع له ربع جنيه
    اللي يكسر اتنين اطلع له نص جنيه
    اللي يكسر التالت اطلع تلاتة ديك امه

    هو ده اللي بتعمله معانا الحكومة و النظام كله وعود باشياء وهمية ثم خابور كبير في الآخر
    و من كتر الخوابير الناس بقت متعودة دايماً
    :)

    ReplyDelete
  6. كلام جميل كالعاده يا برنس الليالي
    كلامك بيريحني ويحسسني ان البلد فيها لسان . بجد يعني

    احنا شعبنا خلاص اتعلم عليه يا كبير ومفيش حاجة نافعه معاه غير الهلوسة والمشي البطال

    الله يرحمه قالها " مفيش فايده "

    واللي يخاف من شبرا ينفخ في المعادي

    ReplyDelete
  7. لا أجد ماأقوله
    :(

    ReplyDelete
  8. وعليكم السلااااااااام
    ابعبع هههههههههه
    حاضر يا معلم
    بس مش هكول اللى فى قلبى انا هقول حاجه كد خفيفه

    اهم حاجه يا معلم
    فى حاجه على الموضه بس مش جديده اسمها
    االارهاب
    ااااااااااااااه
    وعمك على اللطيف اللى لابس جزمه فى ايده
    تاخد القلب من هنا"""متعرفش اذا كان قلم ولا شلوت""""وتنسى نفسك من هنا
    وانسى يا معلم

    ReplyDelete
  9. عمنا سعد قالها من زمان
    مفيش فايدة

    ReplyDelete
  10. والله قولت ادخل بدل ماانا مخنوقه

    خنقتني اكتر

    اسمها
    انا مش قصير قوزعه
    :))))))))))))))))

    ReplyDelete
  11. وبعيدن يعني

    زمايلي في الشغل وبيقولوا لمديري اني قمل الدولة هايعزمني علي فنجان شاي قريب

    اصدقائي قالولي امسحي ايملاتنا من عندك وخلينا موبيلات

    كل ما ادخل حتة الاقيها بتكلم في السوياسة وان بمصدق علشان اتفتح

    طب بطلت اعلق من الشغل شكلي هاحرم اعليق من البيت كمان وامشيها سايبرات

    علشان البرانويا ابتدت عندي تعلي

    بس بجد الحت دي جامدة بتفكرني باللي صباعه مدوحس وكل شوية بيدوس علية علشان بيستلذ بالوجع

    احنا وصلنا للمرحلة دي بقت البهدله عندنا مزاج كل كا نتبهدل نقول ادوني اكتر

    الشعب بقي مدمن اخد علي قفاه

    معلش بقي بعد إذن حضرتك لو فيها رخامه احطك علي قائمة المدونات بتاعتي علشان اعرف اتابع

    ReplyDelete
  12. تفتكر يا استاذ اسلام الكلام ده كله يخلينا نحس بالاحباط واليأس ولا نحس بالامل ان الفساد وصل لمرحله لا تحتمل وان الفساد بيسطر بداية نهايته بوصوله للقمه فى الافساد
    تحياتى

    ReplyDelete
  13. ههههههههه
    شلح و اتبعنى
    مش عارف ليه جو المقال ده بيفكرنى بصعيدى فى الجامعه الامريكيه
    سلام يا استاذ همام

    ReplyDelete
  14. انا مؤدبه ومبضربش حد انا بس بضرب فى نفسى ..وتقولى بعد كده مفيش اكتئاب انا هاخد الواد اليى حيلتى واهاجر يا عم على جزر القمر او بنى سويف...
    هيا مش جمهوريه مستقله برضه

    ReplyDelete
  15. بصراحة خايفة عليك من طيشك

    و صراحتك الزايدة

    أنت أزاي تتكلم عن السيد الرئيس

    و حرم السيد الرئيس بالطريقة دي

    البلد فيها حكومة مش سايبة

    خد بالك من نفسك و أعتبر من كل

    أللي شوفتة و أحمد ربنا علي النعم

    أللي أنت فيها

    ReplyDelete
  16. اقول ايه واعيد ايه ده انت خليت الكابه تطفح حرام عليك

    ReplyDelete
  17. سلام
    مش طلع محافظ البنك المركزى التونسي بسلامتو عندنا وقال لا خوف على الاقتصاد التونسي من الازمة العالمية !!!!!!!!!!واحنا لحد كتابة هاته الاسطر نبحث عن الاقتصاد التونسي :))
    وعديها بقى
    مسكين اللى جنبي قفاه اتهرى :))

    ReplyDelete
  18. عمنا وعم الكل
    اسلام باشا بص انت اللي جبته لنفسك قولي اصل انا صعيديه ودماغي على قدي ابعتلك ازاي اللي عندي (جاهين) على الايميل بتاعك يعني بيبقى كوبي وباست ولا ازاي بص من غير انبهار بذكائي انا عارفه نفسي كويس بص هم 222 ميجا
    وبالنسبه لموضوع البوست ده والله ما عارفه اقولك ايه بلاش انا اتكلم احسن انت عارف ممكن يعملوا فيه ايه صلاحيه علطول بدون كلام واليومين متوصيين بينا حبتين هو صحيح العربجي ده غير اللي اتخانق معاه حفيد الملك فهد بتاع السعوديه ما علينا والله لما بكون في مصر بشوف مهازل منهم المهم ايه حكايه قناة الجعان الاخباريه انت هتعمل قناه بجد ولا ايه

    ReplyDelete
  19. This comment has been removed by the author.

    ReplyDelete
  20. ههههههههههههه

    لا مش ممكن ...احنا مبطلناش ضحك من اولها لاخرها

    خصوصا على حكايه الشقه ال 30 متر

    هههههههههه

    يا سيدي في ناس عايشيين في عشرين وراضيين وفي ناس مش لاقيه

    وقانون الطورئ اتلغي طب لما نلحق نبلغ خالنا طارق يرجع من الكويت بقه

    سامو عليكوا

    لا مؤاخذه التعليق اللى اتمسح تبعنا برضه ...عيله وغلطت

    ReplyDelete
  21. كلما قرات تصريح او بيان لحكومتنا المصونة يعود لمخيلتي نباطشي السيرك قديما وهو المسؤل عن تقديم الوصلات



    مانت اللي غلطان

    تقرا ليه و توجع دماغك ليه :)

    ReplyDelete
  22. يا نهار
    انا دماغى لفت والله
    لدرجة انى شفت قفايا
    وبفكر اضربه بايدى بدل ما حد تانى اللى ييجى يضربنى

    ربنا يرحمنا برحمته

    ReplyDelete
  23. هههههههههههههه...أنت مالكش حل بصراحة
    لميت أحداث كتير في بوست واخد بأسلوب قمة في السخرية
    طب أفرسك شوية
    مش فيه بنسي ادم عامل مدونة مسمي نفسه ابن الوثني بالبار وعمال بيتتغني بقرار العفو الأبوي عن الأبن العاق ابراهيم عيسي
    :)
    تحياتي

    ReplyDelete
  24. This comment has been removed by the author.

    ReplyDelete
  25. انا مش حد تانىTuesday, 21 October, 2008

    ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه


    مش عارف اضحك على ايه ولا ايه و لا ابكى على ايه ولا ايه

    و احب اسمعكم القصيده دى
    http://www.youtube.com/watch?v=dMi4F9hOojM

    لقيتها صدفه على اليوتوب

    خد على قفاك يابن الكلب و ادى ميت صرمه فوق دماغى

    ReplyDelete
  26. طيب انا ما حد جنبي

    ينفع اضرب نفسي؟

    ReplyDelete
  27. عجبتنى جدا غلبته هرموناته دى
    عجبتنى جداااااااااااااااااااا

    ReplyDelete
  28. البوست طبعا جميل جدا
    ويستاهل الانتظار
    لخصت احداث كتير وعلقت عليها
    بس وبعدين
    ايه اخرتها عماليين نندب حظنا
    والدنيا حولينا بتتقدم وتتغير
    تيجي نكنس السيده عليهم
    بس شفت الخبر اللي مكتوب النهارده في الاخبار
    (حكمة الرئيس مبارك انقذت مصر من عواقب الازمات المالية)
    شفت الحلاوه ونبي انت مفتري
    ملحوظه:
    ليه موضوع شلح دي ماالمقال حلو من غيرها

    ReplyDelete
  29. شوف ظالم انته الساده المسؤلين افرض قامواواتحركوا فى ساعتها للنجده وطلع الكلام كله فرقعه ودعايه مغرضه للاضرار بسمعت الوطن واثاره الذعر والشغب واخد بالك انته مش كل ده هتكون اموال ومصاريف مهدره واحنا لازم نحافظ على المال العام ولا أيه؟ علاوه على تضيع وقت الناس اللى مشغوله اساسا انته عارف بقى المسئوليات الجسام والتخطيط لمستقبل البلد اللى هيبقى مشرق وزى الفل اصله مغسول بلانج وبلاش بقى كنت اتحرك طيب وشوف الكلام صح ولا غلط حاجه انهارت ولا لا وبلاش من اصاب فله اجر ومن اخطأ فله اجران وهكذاوسمعنى ما شربتش من نيلها

    ReplyDelete
  30. الله يجازيك..قتلتنى م الضحك..ماهو هم يضحك وهم يبكى..المشكله أنى قرأت البوست وأنا ف الشغل وكنت أضحك وسط دهشة الناس اللى حواليا..وحيث أنى مقيم ف بلاد التلج المقيم والبرد العظيم "كندا- المحطه" فالعاملين معى لم يفهموا على اﻷطلاق العباره العبقريه"اللي يمشي علي تفيدة لازم ترضي بية سنية"..رغم مجاولاتى الصادقه لشرحها باﻷنجليزيه والفرنسيه
    ...ولكنك جمعت وأوجزت وأضحكت
    بأقتدار شديد..تحياتى وخالص مودتى..خالد

    ReplyDelete
  31. هم يضحك وهم يبكي ..
    الدنيا خربانة اصلاً من غير حاجة ..

    عندنا فى طنطا حالتين وفاه بسبب البورصة ..
    واحد جاتله سكتة قلبية
    والتاني ضرب نفسه بالنار ..

    وعادي جداً اللى بيحصل مش مشكلة ..

    وعمو احمد عز مقضيها حملة ابني بيتك برضه مافيش مشاكل ..

    حاجة تجيب احبااااااااط ..

    انا بطلت اقرا اخبار عشان بقيت اتضايق ..

    بس الواحد يزعل نفسه ليه ؟!
    احنا حننهب ..
    الناس دي عامله معانا احلى واجب..
    خمس نجوم اللى بيعملوه معانا دا والله ..

    الـ 300 دولار فى السنة مش وحشين يعني :S

    ومعلش ياجعان بيه انا مقدرتش اضرب غير نفسي بال100 صرمة ..
    لان مافيش حد جنبي السعه على قفاه
    يجعله عامر ..

    ReplyDelete
  32. ازيك يا حاج ؟

    الحقيقه انا داخله اسلم بصراحه بدال ما تعمل اعلان في الجرايد وتقولي ( الندله زميلتي اللي مش بتسأل ) قال يعني قال هو اللي عبرنا بحتة كارت يتيم فلاش في العيد ولا في رمضان


    المهم يا حاج ابو ملك



    ليا تعليق بصيط اوي اوي اوي اوي على التدوينه دي


    هي الفاظك اللي انت بتستخدمها اتغيرت كده ليه ؟


    موش معقووووووووله

    موش مومكن


    انت اسلام اللي انا اعرفه !!


    انت الفاظك دي كلها على الحكومه ؟؟؟!!


    وكمان يا راجل بتنتقد بلدنا الحبيب (مصر)


    يارااااااااااااجل عيب


    ما يصحش يا استاذ / اسلام



    كل مره يدخل واحد يقولك عيب

    ويقولك ما يصحش

    على فكره انا واخده موقف من الالفاظ دي كلها

















































































    على كل حال يا ابني





































































    انا على فكره مش هاقولك اكتر من كلمتين وبس















































    روح يا ابني الهي الكلام ده يغير حاجه في بلدتنا وحكومتنا اللي الحمدلله زي الفل والورد الصراحه


    ناس زوووووووق زوووووووووق صراحه




    اسلام ...انت بتعمل ااقل واجب



    ان شاء الله ههههههههههههههههه احنا معاك يا راجل في ابو زعبل

    بس وصي المدام ما تنساناش في الحلاوه والبيض بالبسطرمه

    وتجيب لي عصير برتقال فريش

    لاني من حقي سجن 5 نجوم

    ReplyDelete
  33. ~*§¦§ Appy §¦§*~

    دة انتي شكلك شايلة ومعبية في قلبك
    اية دة كلة
    يا بنتي العيب مش في الناس
    ولا في الحكومة
    ولا في الجرايد
    العيب في الشطافة
    احنا لازم نغير الحمامات كلنا
    وحدي الله في قلبك يا شيخة


    خمسة فضفضة
    ممكن تتضربي نفسك بدلا عن اللي جنبك
    منورة يا دكترة

    ReplyDelete
  34. انا من اهوى ومن اهوى انا
    يا محمد انا كمان مبقولش ارقام حقيقية
    علشان جماعة من اين لك هذا وبتوع الصرف الصحي
    احنا في الصيف بنأجرة للمغتربين


    Ehab Emaddin
    انا مبحبش الشوربة
    لو في مكرونة باشامل
    اجي انفخ معاك

    ReplyDelete
  35. مهندس مصري
    شوف يا هندزة
    ذاكرتك القوية دي لحفظ ندأ الباعة ىالسريحة
    تؤهلك انك تكون عضو مجلس شعب
    ابقي عدي علي في الحمام



    مخنوق كيك
    انت شكلك محصل اتوبيس
    يا منادي مكروباصات
    يعني راجل كسيب والقرش معاك ابيض
    متجيش تتمحك في الغلابة

    ReplyDelete
  36. mido
    دور طيب في جيوبك كدة


    صابر وراضى
    دة انت حالتك متدهورة
    انت لازم تشرب مخدرات علشان تنسي
    ولفلي معاك جوينت

    ReplyDelete
  37. زهرة الياسمين
    سعد دة تعب معانا اوي


    عاشقه الفردوس
    قوزعة
    مادام انتي متاكدة خلاص



    وومن
    مهو يا فندم لازم من وقت للتاني تروحي تكشفي عند قمل الدولة
    الحاجات دي معدية ولازم متابعة مستمرة
    كلنا من هواة تعذيب وجلد الذات ربنا يشفينا جميعا قادر يا كريم

    ReplyDelete
  38. فخامه عظامه الرئيس تامر حسنى مباركWednesday, 22 October, 2008

    يا حبيبيتى يا مصر يامصر يا حبيبتى يا مصر


    الله يرحمك يا حاجه محاسن كانت بتحب مصر الله يرحمها و يحسن اليها

    والنبى دعوه لمصر يا اخوانا عشان ربنا غفرلها


    و عجبنى اوى
    انا مش حد تانى

    جبت منين المقطع ده يا عم

    http://www.youtube.com/watch?v=dMi4F9hOojM


    الاسم التجارى

    ReplyDelete
  39. اللهم صلي وسلم على سيدنا محمد وعلى اله وصحبه...
    إسلوبك هذه المره محبط للغايه... يبدو أن عدوى الإحباط وصلت لك يا إسلام... اعتدنا على اسلوبك الساخر القوي...المتحدي...الغير منكسر...

    إن شاء الله تتغير الأحوال للأفضل...

    ReplyDelete
  40. و الله موضوع انك جعان ده مخليك صعبان عليا , طب يا عم كل أى لقمة و لا أنت متشرط شىء معين؟؟؟ ههههههه .
    يا عم انا مش عارفة ايه نانسى اللى تاخد مليون عشان فى شوية كولا , و مهند يقعد نايم على سيراميك و ياخذ كام , أعرف ناس كتير ما عندهاش مانع تشرب 50 كرتونة كولا , أو يناموا على البلاط سنتين و ياخدوا نص المبالغ دى , بس طبعا مش شبه نانسى أو مهند .
    أما بخصوص القفه , و لا يكون عندك فكرة.

    سلام

    ReplyDelete
  41. مش فاهم
    وضح افصح أبن
    ايه عاوز تغير السباكة و لا السيراميك
    أي خدمة و احنا في الخدمة
    بس تشوف الصنايعية
    :)
    ثم عضو مجلس شعب دي انا عملتها قبل كده
    في البوست ده


    تاج مجلس الشعب


    سلام يا كبير :)

    ReplyDelete
  42. الدفاع
    يا متر
    الكلام دة علشان يخليك تعمل دماغ فساد معتبرة
    ارخص من الحشيش يعني حاجة ببلاش كدة



    ROITER
    انت حاسس بطراوة وانت واقف ولا ايةالنظام

    ReplyDelete
  43. mahasen saber
    بني سويف مفيش فيها تأشيرات دلوقت
    جربي تطلعي علي فاقوس


    Anonymous
    حامد وشاكر وبايس ايدي شعر ودقن

    ReplyDelete
  44. العجوز
    انت لسة فيك نفس تكتئب


    أرابيـكا
    متهيألي محافظ البنك بتاعكو
    كان خريج جامعات القاهرة
    حقيقي راجل اصيل صان العشرة
    وتمر فية العلام المصري

    ReplyDelete
  45. نيجار
    ياباشا 222 ميجا دول
    اجي انا اخدهم في كيس
    بالنوسبة للقناة
    دة مشروع مؤجل لحد ما يدوني تصريح من امن الدولة
    وتحديد ضريبة الملاهي المستحقة


    اهالينا زهقوا يربونا
    انتو بتدخلو علي النت جماعة
    محرم يعني ولا اية نظامكو
    وادينا مستحملين لعب العيال اهو

    ReplyDelete
  46. Dexter!
    واحد غاوي وجع دماغ
    تعمل اية بقي طبع منيل
    اجيبلك سندوتش


    اهو ده عيبه
    ربنا يقويكي ويعينك علي قفاكي

    ReplyDelete
  47. micheal
    شوفتة يا ميخا
    بتاع الوطني ودخلت فعصت فية شوية
    مش بطال يجي منة كمان كام سنة ينفع شراب كولون


    على عبدالله
    تصدق انت اخر جملة قلتها انا قعدت اضحك قد اية
    بجد انا ضحكت من قلبي
    الله يكرمك يا شيخ والله

    ReplyDelete
  48. انا مش حد تانى
    دة انت محروق اوي شكلك
    ربنا يصبرك وتفرج عليك


    اقصوصه
    ينفع طبعا بس يبقي الضرب الدوبل

    ReplyDelete
  49. مستغرب ليه بس ان احنا بورصتنا زي الفل .. نحن نختلف عن الاخرين عادى بقى زي الرغيف بتاع الاخ نظيف .. اصل الاعمال بالنيات وهو نيته زي الفل علشان كده رغيبه فل الفل لكن احنا شعب ابن ستين في تسعين .. وبعدين يعنى طبيعى جدا جدا تبقى بورصة العالم واقعة واحنا بورصتنا زي الفل اصل احنا قيادتنا حكيمة ايوة اومال لكن هم قيادتهم مش حكيمة .. بقولك تيجى نسلف لهم قيادتنا اصلي من كتر الفلوس والعيشة الهنية وحشنى الفقر

    ReplyDelete
  50. يعني نفضل نقول الشباب سلبي بيتكلم وبس
    ونهري في فروتهم ولما يجوا يعملوا حاجه نصدهم
    الشباب دول لاقوا اصحبهم عماليين يقفلوا المدونات بتاعتهم من كتر العك اللي بيحصلهم والكلام الغير لائق اللي بيتكتب لهم حبوا يعملوا جبهة في وش الناس البايظه دي
    نساندهم
    نجحوا مانجحوش يكفيهم شرف المحاوله

    ReplyDelete
  51. يعني حضرتك رأيك اني اسلم نفسي مش استناهم

    ممكن برضة اعمل زي الحرامي اللي راح استخبي في قسم البوليس

    ReplyDelete
  52. هالووووووووووووووووو

    جايين نعزمك على عيد ميلاد سمكه

    التفاصيل موجوده والحفله قريب

    ومتنساش الهديه

    واى حد يقرا الدعوه يعتبر نفسه معزوم

    هتنورنا

    سلاموز

    ReplyDelete
  53. انت مسحت التعليق عندي ماشي
    زي ماتحب
    انا كنت قريته وعجبني وحسيتك كاتبه بدون تكلف وبتلقائيه شديده
    كأنك بتفضفض
    والاتنين مع بعض وضحوا لي فكرتك عن
    كلمة وطن وبالعكس ماكنش مطول والاحاجه بس زي ماتحب برضه انت حر
    علي فكره كتير انت مابتردش علي تعليقاتي عندك هل ده انها مش عجباك والا ما بتشفهاش
    والا مابتخدش بالك منها
    والا بتقول الست دي رغايه مش هرد عليها يمكن تمشي وتريحني
    بتفعل نظرية اصبر علي جار ....الخ
    بس احيطك علما اني مش هعزل عشان المدونه من المدونات اللي بفضلهاوعجباني

    ReplyDelete
  54. Monzer
    وانا كمان عجبتني جدا برضة

    شمس النهار
    يا ست الكل
    يعني عايزاني اكون احسن من جرايد المعارضة واحزاب المعارضة
    اللي قلتها احسن
    كدة رضا اوي
    اما عن حكمة السيد الرئيس
    فا دي حاجة باينة علي الاخر
    حتي شوفي كدة

    ReplyDelete
  55. واما عن التشليح دة بقي انا ابقي اعمل بوست مخصوص
    اشرح في فوايد التشليح
    وخصوصا في الصيف


    Anonymous
    انت مين يااااض

    ReplyDelete
  56. أبوفارس
    يا استاذنا سعيد انك ضحكت
    وسعيد بمحاولاتك الفاشلة لايصال مشكلة تفيدة وسنية الي بلاد الخواجات
    عسي ان يوفقك الله في مسعاك
    بخصوص الترجمة بالفرنسية اعتقد دي هاتؤدي الغرض
    Approuvé par tafida doivent satisfaire à saneya
    او هاتؤدي بك الي محاكمة علنية


    شاب مصري
    سمعت فعلا عن حالات الوفاة بسبب البورصة
    ربنا يرحم الجميع حقيقي
    وانت صعبت علي بلاش تضرب نفسك 100 خليهم 50 بس

    ReplyDelete
  57. nada_adly
    اهلا ست الناظرة
    خلاص بقي اعتزلنا شغل الفلاش
    شغالين في بلالين العيد


    فخامه عظامه الرئيس تامر حسنى مبارك
    انت تاني
    مفيش فايدة فيك لازم اقصقص حتة من لسانك

    ReplyDelete
  58. أكون أو لا أكون
    انا لقيت طول مانا مبسوط الناس عمالة تقر علي
    قلت اديها شوية اكتئاب علشان الناس تخف


    سارة نجاتى
    اي حاجة من طبيخ امبارح تفي بالغرض
    بخصوص الاعلانات والفلوس
    انا عندي واحد ب 100 جنية ممكن يطلع الهرم علي ايدية

    ReplyDelete
  59. مهندس مصري
    لما حاجة تطفح هانتصل بيك شايلينك لعوزة


    سمو الأميرة سارة
    انتي شكلك في المجلس من زمان وفاهمة كل حاجة
    طب ابقي اديني كرت كدة ولا حاجة

    ReplyDelete
  60. شمس النهار
    احنا بنكمل الخناقة عندك


    وومن
    لا تستني مين
    انتي تتقملي بمزاجك
    احسن ما حد يقملك غصب عنك

    ReplyDelete
  61. اهالينا زهقوا يربونا
    بوري ولا بطلي العيد ميلاد دة
    انا اساسا شامم ريحة زفارة ومش مطمن


    شمس النهار
    رديت عليكي في الايميل علشان الشرد

    ReplyDelete
  62. شكرا للنظاره يا حاج اسلام

    هههههههههههههههههههههههههه


    ربنا يعلي مراتبك كمان وكمان


    بس هاتوصل لحد فين يا حاج اكتر من كده ما شاء الله


    بس كفايه بقى يا اخي عقدتنا من الناس الطويله


    ربنا يكرمك يارب يا ابو ملك



    زميلتك ( نضدا

    ReplyDelete
  63. هل تريد من تعرف من وراء اسقاط الطائرة المصرية فوق المحيط؟
    هل تريد ان تعرف الجهة وراء محاولة اغتيال حسنى مبارك؟ هل تريد ان تعرف من وراء مقتل سعاد حسنى و أشرف مروان؟ هل تريد معرفة القصة الحقيقية وراء مقتل ضابطة المخابرات الأمريكية فى أحد فنادق القاهرة؟ اذا أردت معرفة كل الأسرار والملابسات الخاصة بكل القضايا السابقة وغيرها من الملفات السرية فتابعنا اسبوعيا لتكتشف كنز من المعلومات الصادمة والغير متاحة الا فى ملفات اجهزة المخابرات

    سري للغاية
    http://toptop-secret.blogspot.com

    ReplyDelete
  64. بص من الأخر احنا اللي نستاهل اللي بيحصل فينا

    ReplyDelete
  65. سعد زغلول قال مافيش فايده
    سعد بهلول قال ايه؟ قال مافيش هايدا

    ReplyDelete

بعبع وقول اللي في نفسك يا خويا