Monday, October 27, 2008

عزيزي المواطن شلح وأقف مطرحك

تكملة لمواضيع التشليح وتصريحات المسؤلين ولاد الم .. محروسة وهوايتي في متابعة احوال بلدنا التي ستكون السبب في اصابتي بذبحة
واراحة الكثيرين مني اولهم الست والدتي لايمانها الراسخ اني هاكون السبب في جلب العار للاسرة بكلامي البطال وتلسيني علي اسياد البلد
فاقترح علي صديق مقرب و احد ضحايا تصريحات الحكومة السابقين و هو من حاملي السكر و الضغط والمرارة ومقدم طلب
علي انفجار شرياني في المخ ان انظر لتصريحات المسؤلين بنظرة اكثر تفتحا وانبساطا وانشكاحا وقد كان الاتي

صرح صفوت الشريف الأمين العام للحزب الوطنى الديمقراطى أنه لاصراع داخل الحزب الوطنى الذى يملك جناحان هما جناح الحكومة وجناح الهيئة البرلمانية وان كل من يراهن على خلافات داخلية أو صراع داخل الحزب فهو خاسر.

عند قرأتي للتصريح اعلاة تاكدت ان حكومتنا متخرش المية نظرا لانها تستخدم اولويز بالاجنحة والذي سيحمي الحزب من اي تسرب للسلطة مع الحماية الحكومية والبرلمانية المزدوجة

اما حبيب الكل رئيس الوزراء صاحب القرية الذكية و الطرنش الاسلكي اكد في تصريحة الاخير
ان القطاع المصرفي المصري قادر علي استيعاب الأزمة المالية العالمية
واكد كلامة وزير المالية بان القطاع المصرفي المصري لن يتأثر كثيرا من الازمة المالية العالمية
بل ازيدكم والعهدة علي الاسطي يوسف بطرس غالي ان الاقتصاد المصري يحقق نموا يفوق 7% وهو الأعلى فى منطقة اليورومتوسطى
وصدق علي كل التصريحات جريدتي المفضلة في حالات الامساك الشديدة الاهرام الوطني
يعني اقدر اقولها بالفم المليان للفشلة في كل من البورصات الاوروبية و اليابانية و الاسيوية بل و الخليجية
مصر ام الدنيا بل مصر ام اربعة اربعين بل مصر هي ام جالامبو
ودة اكبر تاكيد علي نجاح مبدأ اللمبي ان الحادثة مأثرتش فية بل هو اللي اثر في الحادثة
وان الازمة العالمية مأثرتش في مصر بل مصر هي اللي اثرت في الازمة وطول عمرنا اصحاب ريالة عفوا ريالة ,احم معلش ريادة


وقد انشرح قلبي عند قرأتي طلب الهيئة العامة للمواد البترولية بزيادة السعر الرسمي لأسطوانة البوتوجاز لــ 4 جنيهات بدلاً من 260 قرشاً

واقدر أدب صباعي في عين التخين واقول عبد الناصر مامتش فان مات عبد الناصر فكلنا عبد الناصر و بالتسعيرة القديمة
واهيب بالهيئة العامة للطرابيش بتخفيض سعر الطربوش الي عشرة مليمات رفقا بالمتطربشين
انا اخر انبوبة جبتها سنة 2001 كانت ب 12 جنية يا مؤمن


المدينة الجامعية تقوم بطرد احد الطلاب بسبب اتجاهة التدويني
كنت زمان اسمع الطرد دة بيكون لامؤاخذة طالب اتقفش بيضرب مخدرات, بيلعب كوتشينة علي السندوتشات بتاعة زمايلة,بيشخبط علي حيطة الحمام ,بيتف علي رئيس المدينة الجامعية لكن علشان بيدون جديدة دي
جايز من الباب ان الحكومة هي اللي مسكناك فلابد من تقبيل الايدي والاقدام والشكر علي نعمة البيات
فكل واحد واخد حاجة من الحكومة قبل ما يدون يسلم عهدتة الي الجهات المعنية
حتي لا نري في المستقبل طلبات باسترجاع غيارات داخلية خاصة بالمدونين ونري المدونين يجرون زلط ملط في الشوارع
وعساكر الامن المركزي خلفهم بالخراطيم وفين يوجعك

نظرية الفرخة الاول ام البيضة قد تم حلها علي يد ابن كبيرنا الشاب المعجزة ربنا يحرسة للست والدتة
ان لولا سياسات الحزب الوطنى لما أمكننا مواجهة الأزمة الاقتصادية
وان لولا الحزب الوطني لما كان هناك ازمة اقتصادية من الاساس
وان كل شيء في طريقة للاصلاح وكما قال بواب العبقري المجنون بلال فضل الاصلاح تاعبنا اوي يا باشا



البيئة تكافح السحابة السوداء وحرق قش الرز برسائل علي المحمول وبعض الفلاحين اعتقد أنها مسابقة
وهي فكرة تساعد الفلاحين علي تشغيل امخاخهم التخينة بدل ما هم مضيعين وقتهم في رحلات الغطس في شرم والشوبنج في كارفور
وبما ان الرسالة وصلت لعدد كبير من غير الزارعين اساسا
فقد اعتقد البعض انك اذا كنت صاحب اكبر سحابة سودة بتدخل سحب علي تلفون من ابو الجيل التالت
ومن لم يجد قش رز قام بحرق ملايات السرير ولبسة العيال



ليبيا تطلب شراء جثث بشرية من مصر.. والمجلس الأعلي للجامعات يرد بان لا مانع
لكليات الطب هناك لتدريب الاطباء
ودة طبعا من باب ان المصري عايش, ميت مفيش زية حاجة كدة علي عينك يا تاجر
واكيد المدونين وصحف المعارضة مش هاتسكت لغاية ما تبوظ البيعة
فا انا انصح الاخوة الليبين بالوقوف علي سواحل المتوسط واصطياد الجثث الساقطة من مراكب الهجرة لايطاليا
اهو اوفر ومفيش حد هاينخور وراكم وطالعة من المية طازة وبتلعب ومتشمش فيها زفارة
واهي فرصة للعيال السيس بتاعة ليبيا تعرف يعني اية دكر مصري



حملة كلنا ليلي حسستني ان النسوان دول كائن فضائي وان الرجالة حيوانات ديناصورية منقرضة
تسعي للقضاء علي الجنس النسائي علشان يخلالها الجو وتلعب مع بعضها عريس وعروسة
انا مش عارف الكائن دة عايز اية تاني
كل المجالات اصبحو علي قدم سواء مع الرجل مأذونة دكتورة , محامية, مهندسة , سواقة نقل ميكروباص تاكس عمال مناجم رواد فضاء رئيسة دولة ,تجار مخدرات,قطاعين طرق وهجامة
مش ناقص غير يطلعلهم شعر في صدرهم
عزيزتي ليلي امك اصطلحت غُوري رَوحي


اذا كنت لم تقم بضرب نفسك ومن بجوارك المئة صرمة من الموضوع الماضي يمكنك الاكتفاء بلسع من هو بجوارك فقط علي قفاة
اما من قام فعلا بالمئة صرمة فيستعوض ربنا بقي

46 comments:

  1. حاسب على نفسك لسه فى امل برضه
    ممكن مصر تدخل كاس العالم
    :)

    ReplyDelete
  2. ماهو انت لو كنت قريت التعليق بتاعي علي الموضوع اللي فات
    كنت عرفتها
    حكمة مبارك
    وبعدين انت زعلان ليه
    كلنا هيجلنا السكر والضغط والبربري وبرضه حكمة مبارك هتعالجنا بالمجان في التأمين الغير صحي
    وكمان صفوت الغير شريف لازم يقول كده لأن دي الحقيقه
    انت مش شايف الجناحين تبقي دي مشكلتك
    في جناحين
    مش بس عشان همه ملايكه لا عشان عقولهم طايره ومطيرنا معاهم
    وبعدين انت بتتريق طبعا كل الانظمه الاقتصاديه في العلام فشله
    طب همه بيتسرقوا من مليون سنه زينا احنا بنتسرق عيني عينك
    ومافيش مشاكل اهو لاقيين ناكل والا لا
    شفت العبقريه بتاعت الحكام المصريين
    اما الانبوبه ماانت عارف وزير البترول مابيغيرش الانبوبه بتاعته عشان هو عنده غاز
    الانبوبه وصلت في رمضان20جنيه حضرتك
    اما الولد اللي انطرد
    وتسرب خبر طرده
    ده تفعيل لنظرية اضرب المربوط يخاف السايب
    والسحابه
    دي جميله جدا وخصوصا لمرضي الحساسيه من امثالي
    ده انا بعرف ان الرز الجديد طلع لما تجيني الازمه
    وبالمره دكاترة الحساسيه يرزقوا والصيادله معاهم
    شفت منافع السحابه
    انت مفتري صحيح
    اما موضوع الجثث
    اقريب اولي من الغريب
    واهو بدل ماالجثه تتباع قطاعي للغرب الغرباء
    اهو تتباع علي بعضها شروه اسهل
    اما موضوع ليلي وعنتر
    مابقاش في ليلي عشان يكون في عنتر
    لاليلي سابت عنتر يفضل عنتر والاعنتر لم نفسه عشان ليلي تفضل ليلي
    وبعدين انت مش خايف من ليله اللي عندك والا ايه انادي عليها تجيلك
    وبعدين انا ضد سياسة الضرب لاليه والا للغير بس ممكن نعمل رحله نروح نحدف الحكومه بالطوب
    الجروح كتير في هذا الوطن
    وكل دقبقه بتعدي فيها خنقه
    بس ياريت نعرف ولدتي علي ولدتك عشان امي لها نفس الافكار وخصوصا انها من سلالة الاقطاعيين والبشاوات بتوع زمان
    وشمتانه في
    اصل انا ابويا صعيدي

    ReplyDelete
  3. يانهار ابيض
    بعد مانشرت التعليق لاقيته كبير قوي
    ايه الرغي ده
    انا لو منك ماقراهوش فعلا
    انا اسفه
    انا نفسي اتخضيت منه
    قعدت اكتب وارد وانا مش واخده بالي
    معلش قدرك بقه

    ReplyDelete
  4. مش عارف اقولك ايك
    كل خبر انيل من التاني
    :(

    ReplyDelete
  5. وعلى راى اللى قال فى الامثال

    ادينى الحقنة بسرعة ارجوك محتاجة الجرعة

    ReplyDelete
  6. تعليق عجبنى اوى

    كيف يسخر السادة من المعارضيين زى الاستاذ الكبير ابراهيم عيسى
    ودى محاكاة للسخرية


    استجابات عثمانليات
    أضيف بواسطة جميل محمد فريجه, في 26-10-2008 15:11
    Valad إبراهيم عيسات , فلاح خرسيس , جورتالجى منوفى أدبسيس ,, رؤاسات إسرائيلات ديكورات خواجات , لوحات فنيات رسومات أحفادات قريظيات ,, الناس بتدفع فلوسات كتيرات من شان فرجات على لوحات دافنشيات وفان جوخات ,, يبقى لازم يكون فرحات كبيرات بتشريفات لوحات صهيونات وناخدها بالحضنات من تلقيحات جتات ,, فاهيم valaaad ,,,, ومصر دى valad مش مصر واحده فلاح خرسيس ,, مضر دى مصرات كثيرات من آلافات سنوات !؟ , مصر فرعونات , ومصر رمسيسات , ومصر أحمسات , وتوتات عنخات أمونات , ويوسفات , وزليخات , وحتشبسوتات , وإيزيسات , وأتبياء أمهات ,وَعِدْ valad حتى نشافات ريقات منوفيات لحد ماتوصل مصر الناصرات , ومصر المباركات ولجنات السياسات , , كل المصرات دى لازم valad خرسيس يبقى فيه إستهدافات وتربصات , وكمان لازم valad لكل مصر إستهدافات مخصوصات متفصلات على المقاسات , والتربصات valad حسب اللونات والشكلات والطعمات , فاهيييييم vaaalad ؟! ,, يبقى حقوق إنسانات ونسوانات يـــــــــوك valad , وحريات صخافات يـــــــوكِّين خرسيس , ومعملات آدميات بشريات تلات يــــــوكَّات فلاح منوفى أدبسيس ,, من شان valad رعايات وحمايات لطابورات العيشات والأنيميات والأورامات وفشلات الكليات والكبدات والموتات المفاجئات وفسادات العبارات والقطورات و إنهيارات العمارات وصخرات الهضبات ؟! , عرفت valad ليه سياسات اللجنات مستهدقات ؟؟!! , لأن مصر جمالات حققت أعلى نسبات الإستشهادات وموتات الشهداءات , سياسات عطيمات valad لإدخال كل المصريين جنات النعيمات ,, يبقى عندهم حقات valad إن قالوا إن السياسات مستهدفات من سياسات التقدمات والرفاهيات والآدميات والبشريات إللى رايحات لنارات الجهنمات الحمرات !؟ , فاهم VALAD



    http://dostor.org/ar/index.php?option=com_content&task=view&id=6346&Itemid=64

    ReplyDelete
  7. السيد"أنا جعان"

    والله انا جالي الضغط من الأخبار دي.
    نفسي اسمع مرة عن اي حاجة عدلة
    عموما
    اجمل ما عجبني هو تعليقك علي موضوع جثث المصريين علي سواحل ليبيا.

    تحياتي
    أسامة

    ReplyDelete
  8. لووووووووووووووووووووووووووووووووول
    منك لله يا شيخ
    ضحكتني على الصبح و ان اكنت ناوياها يوم كئيب على وشهم في الشغل
    بجد منك لله
    ايه الاخبار دي و ليه بس تصحينا من النوم عليها
    حرام عليك انا فطست من الضحك

    بس لعلمك انا مش مع حملة كلنا ليلى خالص و لدي اسبابي اللي ان شاء الله في يوم من الايام حتتنشر
    لكن انا مع حملة كلنا نهى رشدي
    و بما اني من حملة كلنا نهى فحقلك ليه كاتب فوق بعبع و قول اللي في نفسك يا خويا؟؟
    ليه ميكنش اختي كمان؟؟
    لا لا
    ملكش حق

    ReplyDelete
  9. This comment has been removed by the author.

    ReplyDelete
  10. انا راى الشخصى يعنى
    تسمع كلام ماما
    انت كمان بما انك بتطالب الاخت ليلى بالرجوع للبيت
    الانبوبه فى التجمع ب7جنيه ابقى تعالا اجيب لك انا اول امبارك شايلاها على قلبى ونزات غيرتها من عند واحد بس لما بغيرها من المخزن نفسه وده نادر وذلك لسبب انى كل ما اروح يقولى اصلا مفيش ومش عارفه ليه
    بتكون ب4 جنيه فعلا
    اما عن الحكومه والكلام ده فبصراحه ولا ناويه اقراه ولا اسمعه لانى محدش بيسمع لناس ميتين
    هو فيه حد بيسمعهم
    هما بيرغى مع نفسهم وخلاص
    اه بالنسبه للمدون اللى متعرفوش كمان ان التهم بتاعت الفصل علشان هو اخوان وعلشان بيشارك فى قافلات غزة
    انا كان نفسى انصحه واقوله اشترك فى القافلات بتاعت الحزب الوطن لمساندته بس ملحقتش بقى يالا خيرها فى غيرها
    وعموما انا مستنيه حد يبقى جنبى وان شاء الله هضربه بس يرجع بالسلامه

    ReplyDelete
  11. كالعادة مش لاقى سطر فى اللى كتبتة ماضحكتش منة هاعلق على اية ولا اية وكل موضوع من المواضيع دى محتاج يوم لواحدة نتكلم فية


    ملحوزة : انت كمان مامتك خايفة عليك

    انا بابا شكلوا هايحلف بالطلاق على ما ادخل على النت تانى انت اية رأيك

    اسيبة يطلق الحاجة ولا اية ؟ انا اتخنقت من الراجل دا

    تحياتى يا كبير

    ReplyDelete
  12. fnan_geology
    معلوماتي بتقول كاس العالم هو اللي هايجي مصر


    شمس النهار
    يا ستي انا مش زعلان ولا حاجة
    حتي الضحكة من هنا لهنا
    اما بخصوص عمل اجتماع مصغر للامهات
    دة اقتراح غاية في الخطورة
    قد يؤثر بالسلب علي امن الوطن
    واحنا اللي هانروح في الرجلين واحنا مش وش بهدلة
    بالنسبة للتعليق هو طويل فعلا
    شكلة اخر حلقة ولا اية

    ReplyDelete
  13. مهندس مصري
    صلي علي النبي
    اشرب اللمون


    واحد مش فاهم حاجة
    دة انت خلاص بتخلص
    حد يلحقة بحقنة الاينما

    ReplyDelete
  14. mido
    ربنا معاك


    مصــــري
    السيد مصري
    مصر محتجالك يا اسامة
    عايزة باتنين جنية عيش

    ReplyDelete
  15. ^ H@fSS@^
    طيب المفروض زمايلك في الشغل يدعولي
    رحمتهم من تعسيفة الاصطباحة
    وانا مع حملة انظر حولك يا مواطن


    على عبدالله
    شوف الضغط موجود في انتظار الموافقة علي طلب السكر
    وياسيدي حق اللي جنبك علينا
    بوس قفاة وش ودقن
    ثم انا بقول شلح مش وطي

    ReplyDelete
  16. ~*§¦§ Appy §¦§*~
    اميرة كوكب الخرفان البتنجاني وضواحية
    كلام ماما ماشي ونافذ علي رقبتي
    بس الوطن ناداني تقريبا كان عايز يروح الملاهي
    طيب انتي بتشتري الانبوبة سادة
    احنا بنجيبها بالمكسرات
    ثم احنا ربنا تاب علينا والغاز الطبيعي دخل من زمان خلاص
    فا مش متابع بورصة الانابيب
    وربنا يقرب البعيد وتلاقي حد تضربية

    Che_wildwing
    والله كان بودي اسيب تعليقك يا نجم
    بس مقدرش بنتي صغيرة بتدخل تقرا في المدونة
    وميرضكش افتح عين البنية بدري اوي كدة
    وانا مش عارف انت خليت اية اباحة مقلتوش يا راجل يا ضلالي



    انا من اهوى ومن اهوى انا
    محمد باشا
    عايز رأي
    ميطلقهاش ولا حاجة انت شوفلة عروسة صغيرة كدة وملعب
    وهو يطلعك من دماغة

    ReplyDelete
  17. خبر غريب قوي ان مدينة جامعية تفصل طالب علشان بيدون أو ميوله التدوينيه زي ميوله العدوانية .. او ميوله الشاذة .. او ميوله الجهادية أو حتي الجنسية لكن ميوله التدوينية دى

    هبل فى هبل

    ReplyDelete
  18. يعنى انا بقرا تدوينتك وباين انو الموسيقى الخلفية للتدوينة اغنية كارتون " قم ضع يدك في يدي ...قم نحمي غدك وغدي (حلوة الايد على فكرة اللى حطتها في البروفايل اهى حاجة ترمز بردك ) واقلك ايه عن الباقي دمار شامل يا جدع الرحمة بقى مش قادرين نتنفس من كثر الضحك ...سؤال برىء هو الدايلي موشن واليوتوب شاغلين في مصر والا لا أصلهم من يجي سنة وشوية مقطوعين عندنا لدواعى الترميم :)) الامنى وفيه مدونات نقوم الصبح نلاقيها اتقفلت كدة بقدرة قدير واتحط بدلها الرقم السحرى 404 وفيه مدونات بقوا يعمللولها حزام ناسف تتفجر بتاتا دى حتى صاحبها يبقى مش عارف يلاقيها في اى داهية دول شاغلين شغل عالمي ولا الصين الشعبيّة الانيل من كده بقه يا عم انو احنا 10 ملايين بس ههههههههه يعنى معروفين بالاسم وبتاريخ العيلة كلو ولا حاقدر اقول حاجة على صوفتنا الشريف خالص ولا حتى ربع همسة على كلنا ليلى يا الله حيروحو من ربنا فين

    ReplyDelete
  19. ده انت مستغني عني بقي ياسمسم
    واسمح لي يعني اقول سمسم

    طابور عيش
    يعني حرب وضحايا
    وسيبك بقي من شغل رأفت الهجان ده
    ومصر محتجاك يارأفت

    اتشرفت جدا بمعرفة مدونتك
    واسمح لي بأكل أم الخلول دائما عندك

    تحياتي
    أسامة

    ReplyDelete
  20. مش بقولك عايز تطفشني من المدونه اهو عقلك البطن اوحي لك ان دي اخر حلقه
    بس بيني وبينك
    انا نفسي اتخضيت لما شفته
    تقولش مدونةت والدي الباشا
    اصل انا بقعد اكتب هوب بروح ناشره اللي كتبته
    المهم
    اوعي تكون عملت بالنصيحه وماقريتوش

    ReplyDelete
  21. انا بس معديه بالصدفه

    ولقيت


    ايخخخخ

    يععععععععععععع


    ايييييييييييييه الصوره الرمزيه المقرفه دي بتاعتة البروفايل


    يا ساااااااااتر يارب



    انت مين يا ابني ؟؟؟؟



    فين صورتك ؟؟؟!!!


    لاول مره في التاريخ هاتخليني ااقولك يا اسلااااااااام

    ايه الصوره المقرفه المنيله بستين نيله دي


    صورتك اجمل واشيك وفوتوجونيك


    او تحط صورة حنظله وهو مسجون ومضروب على قفاه


    مش تحط لي صوره عبيطه



    اعمل تصويت كده وشوف جماهير المدونه عندك ها يختاروا ايه



    يللا يا راجل رجع صورتك القديمه احسن


    على الاقل اما تدخل السجن تلاقيهم حاطين صوره فوتوجونيك ليك


    __________________________________


    سبت انا كل الكلام اللي انت كاتبه ووقفت لك على موضوع الصوره الرمزيه في البروفايل ...هههههههههه تخيل !!



    انا اصلي بصراحه مقاطعه الكلام الخارج والداخل اللي انت كاتبه عن بلدنا



    وغطيني وصوتي يا صفيه !



    انا ايه اللي دخلني المدونه هنا !!



    اتمسى بالخير يا ابيه جعان !

    ReplyDelete
  22. ده اللى ناقص نبيع جثث , ع العموم ماجتش عليها
    و الحمد لله أن سياسات الحزب الوطنى خلتنا نواجه الأزمة الاقتصادية , انما لا مؤاخذة , من غير سياساته كنا عملنا بقه ايه ؟
    أما عن حملة كلنا ليلى , فليها أبعاد تانية يا سيدى , أنا متفقة جزئيا معاها , لكن أنا بفكر نطلق حملة لوحدها تانية عشان كلمة " نسوان " دى , (على فكرة خطاب الواحد بيدل على أفكاره ).و كمان " غورى و روحى " , أنا بقه ح أبعتلك كام بنت من عندنا يعملولك قلق اسكندرانى من اللى على أصله .
    هههههههههه

    مدونتك متميزة

    تحياتى

    ReplyDelete
  23. اولا كلام والدتك يستحق التفكير وهي قلبها عليك مش علي حد تاني ولا علي اسياد البلد بس صحتك اهم
    اما بالنسبة للاقتصاد اكيد احنا معندناش ازمات .. وانت عايز تقارنا بالدول الاخري اللي اقتصادها خرب زي امريكا ولا بعض الدول الاوربية
    ما علينا
    سلام

    ReplyDelete
  24. :))))

    هو احنا لسه شوفنا حاجه

    ادي اخره اللي ميسمعش كلام ماما

    :))))

    ReplyDelete
  25. كل ما دمك يتحرق

    انصحك تخش هنا

    هتتبسط اوي صدقني .. الدنيا ورديييي والمواصلات فاضيييييه

    http://alsiasy.blogspot.com/

    ReplyDelete
  26. انت عبقري يا ولد
    بس مجنون
    وبجد لازم تسمع كلام الدكتورة علشان فرح وملك

    وزعلانة اني مشوفتكش لما كنت في مصر المرة دي
    لازم تيجو عندنا انتو مرة

    ReplyDelete
  27. جعان :

    تصدق فكرتك يا مان جامدة دا حتى تعدد الزيجات فى عيليتنا كتير انا مش عارف ابويا ماغيرش لية من زمان برغم ان اعمامى شغالين الله ينور جواز بالجوز

    انا هاسخنها فى دماغة ، ولكى الله ياامى لازم تضحى علشان إبنك الحيلة اللى هو انا :( نيهاهاهاها


    شرير إنت يا مان

    ReplyDelete
  28. عمدة المدونين
    طيب إنت بتحرق دمك ليه أنا مش فاهمه
    حد يجيب وجع القلب لنفسه كده
    حرام عليك كده ده صحتك بالدنيا
    بس قولي صحيح مش لو ليبيا خدتهم صاحيين
    هيقعوا أرخص من الميتين
    مش كده ولا إيه
    خليك فريش إحنا في رحله
    :)

    ReplyDelete
  29. ههههههههههه
    ملعوبة
    بس قولى هو كان يقصد بالقطاع المصرفى بلاعه رقم كام؟
    ماهى كلها مصارف

    احنا جالنا فعلا رسالة حرق القش بس هو احنا بنشوف الرز علشان نشوف قشه

    بص انا ضربت نفسى المرة اللى فاتت بس بفكر اضرب تانى الظاهر بقى ادمان

    وان شاء الله اسلم عهدتى للحكومة احنا مش ناقصين

    ReplyDelete
  30. ولا يهمك يا ابوالبنوتة
    خليها كويسة واحسن مننا
    سامحنى ياعمونا والله الكلام بيخرج مني دبش
    تلقائية بنى آدم أحف

    ReplyDelete
  31. يا عم كفايه بقى
    اكتب بطريقثه مش مضحكه شويه
    و الله العظيم انا كل مااقرا النمدونه المخروبه دى اموت من الضحك
    و العياط فى نفس الوقت
    ههههههههههههههههههههه
    اهئئئئئئئئئ اهئئئئئئئئ


    بس جامده كيك نظريه اللمبى دى
    انا اللى اثرت فى الحدثه مش هى اللى اثرت فيا

    و بقولك فاكر فيلم وش اجرام لما كانوا بيستجوبوه عن الشباب


    ياعم حرام متظلمش الدوله داحنا مدلعين و مبسوطين ومجوزين وراكبين عربيات هامر اتش 3 و كل يوم و التانى فى كارفور بنعمل شوبينج
    و برفاناتنا مقولش عليها و الحياه سهله و العيشه زى الفل


    و تحيا مصر يا عم
    و يحيا تامر حسنى مبارك
    و مننساش النضيف صاحب العفه والشرف سليله اكبر عائلات بدرشين نظيف
    و صاحب النهضه التعلميه حاج يسرى الجمل

    و بكرر التحيه للحاج
    تامر حسنى مبارك

    طويل العمر يطول عمره ويوسع رزقه و ينصره على الشعب المصرى ابن الكلب اللى معاديه

    هاااااااااااااى هئئئئئئئئئ

    ReplyDelete
  32. شارك في الحملة الشعبية للقيد بالجداول الانتخابية وادعو غيرك
    ضع بنر الحملة علي مدونك والبنر موجود علي مدونتي

    ReplyDelete
  33. ايه ده اتاخرت برضة بس بما اني ليلي واحده من اهم علامات ليلي انها تتأخر علي عنتر وتسيبة ملطوع شوية قال يعني تقل

    هههههههههههههههههههههه

    بهنزر نتكلم جد بقي

    واهي فرصة كل اللي في البيت نايم والجو يسمح بالتعليق

    بس الواحد هايعلق علي ايه ولا ايه كل خبر انيل من اللي قبله

    وبعدين كده عاوز تبص للحكومة في البيعة وبتقول لبتوع ليبيا علي -مخزن تاني يجيبوا منه

    من اولها بتضرب من تحت الحزام

    الا هو يعني ايه ميولة التدوينية علي فكرة انا شوفتهم بيوزعوا في الجامعه برشور بيطلعه الطلاب الإخوان وبينشروة علي مدونة اسمها حقي
    http://haaee.blogspot.com/
    ده لينك المدونة

    كفاية رغي بقي سلام

    ReplyDelete
  34. مش شايف ان خبر واحد من دول كفيل انه ينكد علينا ويجيب لنا كل حاجه وحشه
    ياريت بعد كده تكتفى بخبر واحد فى البوست لظروف القراء النفسيه والعصبيه
    علشان مصر محتاجانا كلنا
    علشان تبيع جثثنا سليمه خاليه من الامراض
    تحياتى

    ReplyDelete
  35. Monzer
    كل واحد يخلي بالة من ميولة بقي
    محدش ضامن بكرة


    أرابيـكا
    شوفي ياستي وما سيدك الا انا
    المواقع المنحرفة اللي ذكرتيها زي اليوتيوب والدايلي موشين
    دول لم تطلهم ايدي القانون بعد
    لكن في طلب في مجلس الشعل
    بحجبهم لافسادهم اخلاق شعبنا المتربي تربية عالية

    ReplyDelete
  36. مصــــري
    يا اسامة باشا
    احلي سندوتش ام الخلول
    وشوب مفتقة ساقع



    شمس النهار
    انتي علطول ظالماني كدة

    ReplyDelete
  37. nada_adly
    يا سيادة الابلة صوري منورة علي الفيس بوك
    بتقفي انتي عند حاجات صغيرة الصراحة
    علية العوض في التعليم الكويتي خلاص


    سارة نجاتى
    يا فندم نسوان لغة عربية فصحي وعدة دول منها سوريا لا يقولون الا نسوان
    انت بس اللي بتقفو عند الشكليات

    ReplyDelete
  38. kochia
    الست الوالدة نفسها لما تكون الغزالة رايقة
    بتسب سلسفيل ابوهم واحد واحد



    عاشقه الفردوس
    احنا لازم كلنا نشرب اللبن بليل ونغسل رجلينا وش وضهر

    ReplyDelete
  39. Anonymous
    لولا اني عارف انت مين
    كنت رديت عليك ردي التقليدي علي المجاهيل
    بس انت حبيبي
    شوفتة وعارفة من زمان

    Noor
    اخجلتم تواضعنا
    والجايات اكتر من الرايحات

    ReplyDelete
  40. انا من اهوى ومن اهوى انا
    علي البركة وخلي الحاجة تدعيلي



    نيجار
    انا مش حارق دمي
    بس بحاول اهو
    ادعيلي انتي بس
    بالنسة للميتين الصاحي زي الميت
    لانهم بياخدو الصاحي ويموتو هم بمعرفتهم

    ReplyDelete
  41. شارك في الحملة الشعبية للقيد بالجداول الانتخابية وادعو غيرك
    ضع بنر الحملة علي مدونتك
    البنر موجود علي مدونتي

    ReplyDelete
  42. ماشاء الله
    مصر مالقتش اوفر من جثث ولادها علشان تصدرها
    عمار يامصر
    دكاتره جامعه عين شمس والقصر العيني بيتبرعوا بجثثهم علشان الطلبه واحنا بنصدر
    ارحني يالللي بترحم
    ياتحده ياتخدنا

    ReplyDelete
  43. علي رأي اول تعليق
    خلي املك في حسن شحاتة
    باذن الله هو الي هيعدل المايلة
    و علي فكرة
    الرجالة اليومين دول ميقدروش يعملوها الا في الملعب
    تخيل ؟!!!!
    تحياتي
    محمد

    ReplyDelete
  44. هههههه

    الله يخرم جيبك

    افقدتني وقاري

    ReplyDelete
  45. بوست قديم معتق يجنن زي الجبنة الريكفور بيلسع في اللسان
    كانوا عايزين يصدروا جتتنا ولاد الست الكذا؟ طيب اديهم اتصدروا على طرة
    بالشفا

    ReplyDelete

بعبع وقول اللي في نفسك يا خويا