Friday, April 02, 2010

انها حقا حمرا

اليوم هو عيد ميلادي في الثاني من ابريل
وتعطي هذا اليوم زوجتي اهمية كبيرة من احتفال وتورتة وشمع وهدية ولا مانع من بعض الزغاريد
وهو ما لا اعترض علية ابدا
متبعا الحكمة القائلة اللي يلاقي دلع وميدلعش يروح النار
في الازمان السحيقة ايام الشباب الطائش كان اصدقائي يحتفلون بعيد ميلاد كل منا فاذا اتي اليوم المنشود فلابد من تورتة وشمعة وهدية للذكري ثم عام بعد عام وضغطا للنفقات ابدلت التورتة والشمع والهدية بعزومة عند احد اعمدة الكباب المشهورين في مصر والقطر العربي
وهو ما لا كنت امانعة ابدا, واستمر الحال يتدهور من تورتة الي عزومة كباب الي طبق ام علي , حتي وجدت ذات يوم شمعة ملقاة بجانب سيارتي واخبروني انها احتفالا بعيد ميلادي

علي كل حال لقد احتفلت بما فية الكفاية في طفولتي والست امي كتر خيرها تورت وجابت وشمع وولعت وحفلات في مدرستي و في البيت وعملت فا الصراحة الست ما حرمتناش من حاجة .
مر العام المنصرم بدون اي احداث تستحق الذكر فا نفس الروتين والملل حتي وان تضمنتة سفريات من ان الي اخر لدول مختلفة ولهذا حديث اخر.
اكثر ما اثر وحذ في نفسيتي هذا العام ليس تعين ابن وزير داخلية اسبق فاشل وزير للتعليم وبرنامج الكاميرا الخفية الذي يتبعة لادارة الوزارة ولا مرض كبيرنا بحصوة معتبر احتاجت للسفر الي بلاد الفرنجة وقضاء شهر بين علماء ناسا للبت في امر الحصوة
و لا حتي الحج البرادعي وصولاة وجولاتة العنترية والجمعة اللي بيصليها كل اسوع في بلد شكل وان كمنت ادعوة للصلاة في ساحة سيدي البدوي وتجربة المشبك الطنطاوي المعتبر
لكن اكثر ما ثر في بشكل غريب وترك في حلقي وعقلي اثر لا استطيع ان امحوة هو قرأتي لكتاب "حمرا"
و حمرا هذا لكاتب مغمور يدعي ايهاب طاهر هو مغمور من وجهة نظري لكن ربما من وجهة نظر اهلة الموضوع يختلف
هذا الكاتب الذي يدعي ظلما وبهتانا انة كاتب ساخر استطاع ان يؤثر في كما لم يؤثر احد من قبل
فلقد فاق في سذاجتة كتاب ساديزم الذي ظللت لعام اعالج اعراضة الجانبية بقراءة مجلة ميكي

فكاتب حمرا عفوا فهو ليس بكاتب بل عرضحالجي او محولجي نظرا لحولة يكفي الصورة التي وضعها علي الغلاف

فاذا ذكر مصطلح في كتابة اعطاك عشر معاني علي الاقل لكي يوصل اليك معني الكلمة كما لو ان من يقراء معاق ذهنيا او لسة واخد شهادة نحو الامية او من مرتادي السيدة الفاضلة سامية شرابي وبرنامجها المعروف

واذا اتي علي ذكر اسم فيلم ذكر لك الابطال واحد واحد والمخرج والمؤلف والمصور والمنتج وعامل البوفية وعامل الكلاكيت واللي عامل علي روحة اذا استلزم الامر

ومن طرائف الكاتب انة هناك من نصحة ان التريقة علي اهلة سوف تؤدي بة الي العالمية
فلم يسلم من لسانة اولادة وزوجتة واصدقاءة واصدقاء اخوة وخال اولادة واتم حسن المقال بتخصيص موضوع كام عن الست الوالدتة
التي كانت مثل الاشكيف بالنسبة لة وانها السبب في محو شخصية السيد الوالد وعند بلوغة سن المراهقة وبسبب شدة والدتة تحول الي طالب صايع ومنحرف وغشاش وغشش لجنة بحالها عندا في السيدة والدتة

والتي يشهد لها انة بسبب شدتها هذة وعند نضوجة اكتشف انة لا يستطيع ان يغش او يسرق ناسيا انة لا مؤاخذة اعترف وبعضمة لسانة انة غشش لجنة بحالها .
دة غير تخصيصة موضوع كامل للتحدث عن الدورة الشهرية لدي النساء راصص جميع المسميات لها وانواعها ومدتها واضرارها ومنافعها

حاسسني اني بقرا في احد اعداد طبيبك الخاص لكن النسخة المقززة اللي مفيهاش صور كلام بس

لا اريد ان اتدني علي الراجل اكتر من كدة لكن انا ومن موقعي هذا اقولها لايهاب طاهر وبالفم المليان حمرررررررررررررررا

ونصيحة صادقة من القلب انت تصلح لكتابة المسلسلات انسي الكتب وفكر في الدراما المصرية فهي تحتاج لمن هم علي شاكلتك

فسوف تجد فيها الخلاص والمال من العيشة الضنك اللي سيادتك اتحفتنا بوصفها لنا في كتابك
اخيرا ولست اخرا انا لم اقم بشراء الكتاب ولكن احد اصدقائي السابقين هو من اقرضني الكتاب والذي بسببة قطعت علاقتي معة
دعيت عليك يوم ميلادي يا ايهاب يا طاهر روح وانت حمرا

34 comments:

  1. :D
    أول كومنت

    عود أحمد يا جعان باشا

    http://matarmatar.net/vb/t12585/
    شل الناس
    موضوع عين الزوجة حمرا

    فى نظرى أبلغ دليل على صدق كلامك

    ReplyDelete
  2. : ))))


    كل عام وأنت الى الله أقرب وعلى الطاعة أدوم وعن النار أبعد

    ReplyDelete
  3. و لسة ياما نشوف

    حمداً لله على السلامة على الرجوع بعد غيبة طويلة

    ReplyDelete
  4. وماله سيب الناس تسترزق ماهو الكتابة الساخرة بقت سبوبة لوز دلوقت ، ولو كان الكتاب معجبكش ممكن يكون عجب ناس تانية "انا مش منهم لانى مقريتوش أساسا " بس سيبك انت مفيش أحلى من السعدنى فطسنى من الضحك

    ReplyDelete
  5. ياسيدي كل عام وانت الى الله اقرب ومن المعاص ابعد

    وان شاء الله ربنا يبعدك عن الحاجات الحمرا
    دي تاني

    هو احنا لسه شوفنا حاجه

    حمدلله على السلامه ياباشا مدونتك وحشتنا

    وياريت نتواصل مع بعض

    ربنا يوفقك

    ReplyDelete
  6. كل سنه وانت طيب الاول
    طيب دلوقتي انا عاوزه اقرا الكتاب ده
    بس استكترت تمنه وبعد كلامك ده طبعا شكلي هستخسر كمان تمنه

    ReplyDelete
  7. عندك حق انه فعلاً مغمور على الرغم من انه له أربعة كتب في الأدب الساخر على اعتبار انه يكتب ادب ساخر
    مش كلام على مصطبة الحاج حسن مرتع

    الى مزبلة التاريخ

    كل سنة وانت طيب

    ReplyDelete
  8. إيهاب طاهر معروف جدا بحشو كتبة.
    الكتاب الوحيد اللى فى حياتى جبتة و مقدرتش أكملة كان كتاب "طز فيكم" للكاتب السالف ذكرة. و حلفت مش شاريلة كتب تانى.

    على كل حال هو كاتب تعبان اوى

    ReplyDelete
  9. حمرا يابن ادريس
    مبقتش اعرف اخبارك الا من الانترنت يا@#%$%#$#
    كل سنة وانت طيب :p

    ReplyDelete
  10. عبدالرحمن نجم الدينSaturday, 03 April, 2010

    والله يا أخى لا يمكن تتخيل انا فرحت قد إيه لما لقيتك رجعت تكتب تانى
    وباحلفك بالغاليين عندك ما تقطعش كتابة

    ReplyDelete
  11. باسم الكربلائىMonday, 05 April, 2010

    هههههههههههههههههه حمرا و بتلمع كمان

    احمم احممم ... انا قصدى شريف محدش يفهمنى غلط

    و انا زيك بالظبط انصح الكاتب بكتابة مسلسلات مصرية تصيب المشاهد بانتفاخ وبواسير و حالات صرع مزمن و يهديها لسيدة النموذجيات الحمرا يسرا

    او زى مبتقول زير التعليم ابن زير الداخلية المتشرد و فرقته


    نجاااااااااااتى انفخ البلالين يا نجاااااااااتى

    ReplyDelete
  12. اسجد لله شكرا اني لقيت حد عاقل رايو في الكتاب ده كدا

    عشان الاول انا فوجئت ان كتاب بهذا القدر من الارف يطبع

    وبعدين استغربت ان الكاتب ازاي يكتب كدا على اهلو

    وبعدين استغربت من دار النشر انها مشيت وراه و طبعت


    و بعدين استغربت من انه منزل طابعة تانية
    و بعدين اللي زاهلني بقا فين الرقابه
    على الكتب

    انا ممكن اكون كاتب ساخر اه كاتب معترض كاتب كتابي كاتب على ورق الشجر
    لكن كاتب سافل و مقرف و مبتذل و معاق و معقد واهطل وبرياله فنفس الوقت دة كتيررررررررر قوي قوي
    ومن مكاني هذا انا ائويد واناشد صوتك واضم صوتي
    توب علينا يا رب

    ReplyDelete
  13. طب كويس انك عرفتني بقا عشان مقرالوش حاجة !! :)

    ReplyDelete
  14. عودة مبروكة يا ريس الجعانين
    عودة مبروكة و ان شاء الله منشوفلهاش رجعه ولا بعد عننا تانى
    يا ريت بقى تبحبحها شوية فى عدد المواضيع للناس الجعانة
    و سنة بيضة عليك ان شاء الله كلها سلام و امان و راحة بال

    ReplyDelete
  15. Oss
    هو احمد رجع امتي يا اوس


    عاشقة الفردوس

    وانتي كمان


    WINNER
    الله يسلمك

    محمد ناصر الدين الهلالى
    انت بتحط السعدني في نفس الجملة مع الكائن دة ازاي
    حرام عليك يا شيخ


    ماجد العياطي
    الله يسلمك
    تواصل يا سيدي زي ما يعجبك
    سعيد بوجودك دايما في المدونة


    لماضة
    يا دكترة اشترية و اعملية مسند لتاربيزة السفرة

    ReplyDelete
  16. Muhammad Saber Abdou
    مزبلة التاريخ كتير علية كمان جايز بلاعة التاريخ او طرنش التاريخ هايبقي مناسب اكتر
    وانت طيب يا باشا


    Mahmoud Ghoz
    انا مش عارف هيءة حقوق الانسان سايبة الراجل دة يطبع كتب ازاي


    Tamer Abdel Aziz
    روح العب بعيد يالا
    الا ما رفعت سماعة وقلتلي كل سنة وانت طيب
    ولا حتي بعتيلي صباع زينيب


    عبدالرحمن نجم الدين
    الله يخليك وشكرا علي ذوقك
    ومش هاقطع بعد كدة ان شاء الله


    باسم الكربلائى
    انت تعرف نجاتي كمان
    دة واضح عليك راجل متصيط



    Memo
    وحدي الله يا شيخة
    متحرقيش دمك انتي صاحبة عيا
    خلاص امشي يا ايهاب روح بعيد يا وحش


    واحـــد مـــــن الـنـــاس
    اي خدمة



    ahmedtaw
    قاعد علي قلبكم لطالوت يا ابو حميد

    ReplyDelete
  17. لا استطيع ان اصف لك مدي السعاده التى تتركها فى نفسي عندما اتصفح مدونتك
    حتي فى احلك الظروف سواد ابتسم
    حبيبي دائما

    ReplyDelete
  18. والله وحشتنا
    متبقاش تروح وتول عدولى تانى مفهوم؟:((
    بالنسبة للموضوع فبهاء طاهر حاليا بيكتب افلام معينة وبيدخلنا كوميديا جديدة من نفس كوميديا الافلام الامريكانى
    اللى دمها يلطش بالمناسبة
    بس هو بعيدا عن الكوميديا رائع
    واحة الغروب حلوة جدا
    انا قريتها واستمتعت بقرايتها رغم انى كنت مقاطعة الادب المصرى كله من يوم شيكاغو
    بس اول صفحتين خلونى اسيب باولو كويلو واكمل واحة الغروب

    ReplyDelete
  19. حمد الله ع السلامة يا عمنا وكل سنة وانت بألف خير يارب

    بجد ألف شكر لأن كان عندي فضول رهيب أقرا الكتاب ده بس الحمد لله ما اشترتهوش ومش حشتريه ، وللأسف مش عارفة ليه معظم الكتب الجديدة بقت أونطة ، تحس كدة إن حد بيعمل فيك مقلب أو بيضحك عليك عشان تشتري الكتاب وتضيع وقتك فيه

    مش الكل طبعا بس الغالب

    يلا الله يسامحهم بقى حيروحوا من ربنا فين بس

    :D

    أوعي تغيب بالسنتين عقبال اما تكتب بوست جديد .. هه بس

    ReplyDelete
  20. ربنا يزيدها حمار والله كنت هاشتري الكتاب دا هو وكتاب تاني اسمه مصر المخروسة

    وبعدين فكرت شوية وقولت هلاقي في الكتابين دول ايه زيادة عن اللي في النت

    وزيادة عن اللي بقراه في المدونات ؟؟؟

    فكرت شوية وقلت العملية مش ناقصة الواحد يخنق على نفسه ان كان باللي بيقراه ولا اللي بيكتبه

    فقلت بلاها يا واد قرشي في جيبي اولى

    انت حسستني اني خدت القرار الصح الحمد لله

    واحشني يا اسلام والله وماتغيبش تاني

    ReplyDelete
  21. هي ايه دي اللى حمرا بس انا مش فاهمه انت برضه مبتحرمش طيب اسال الاول

    ReplyDelete
  22. حمدلله عالسلامة

    ReplyDelete
  23. اولا كل سنة وانت طيب

    ثانيا.. اول حد يوافقني الرأي.. يعني حاسة بانشكاح غريب بصراحة :)))

    ثالثا.. هاضيف مدونتك عندي.. لانها عجبتني.. ده بعد اذنك طبعا

    اه نسيت اقولك.. انا اول مرة اجي هنا
    يارب اكون ضيفة خفيفة.. على مدونتك :)

    ReplyDelete
  24. الف حمدا لله على سلامتك

    الدنيا نورت
    اينعم انا بقالي كتير مادخلتش المدونات
    بس
    فرحت بعودتك

    بالنسبة للكتاب
    انا لم اقرأه ، ولن أقرأه ثقةً في كلامك

    ReplyDelete
  25. هي الابتسامة التي تبقينا على قيد الحياة بين تلك الهموم

    ReplyDelete
  26. دا انت شكلك جبت أخرك من الكتاب .. طيب وايه اللى غصبك انك تكمله للآخر ؟

    ReplyDelete
  27. ينهار أبيض

    دا ربنا يكون في عون اللى يقراله حاجة ..

    انا أول مرة أسمع عنه منك لكن فضولى خلاني أبحث عنه

    قريتله عين الزوجة حمرا .. دي فعلاً حاجة تجيب شلل أطفال

    ReplyDelete
  28. شكراً علي النصيحة :)

    عمر طاهر والسعدني كتبهم افضل بكتير :D
    علي الاقل فعلاً بيكون ادب ساخر :)

    ReplyDelete
  29. على فكرة أنا في الرياض

    ياريت أشوفك

    ReplyDelete
  30. هههههههههههههههههههههههه
    انت شيلت البوست الاخراني ليا يا ابو ملكككككككككككككك
    هههههههههههههههههههههه
    هموت من الضحك واللهي

    ReplyDelete
  31. ايه ده !!!!!
    مش ممكن

    بجد انا مبسوطة بعودتك للمدونة والتدوين تاااااااني
    ________________________

    باين جيت متأخر لاني كنت بافتح المدونة بالصدفة ولقيتك رجعت

    بس يا راجل بالذمة مراتك هاتزغرط يوم عيد ميلادك
    هههههههههههههههه

    كل سنة وانت طيب
    وخليك في النقد السياسي افضل
    __________________________________

    نورت تاني عالم التدوين
    مع انه اصلا بتاعك انت

    ReplyDelete
  32. اولا : واحشنا جدا ياعم جعان ...
    ادام الله طلتك البهية علينا ...
    و كل عام و انت طيب يا كبير ...

    ثانيا: فانا ادعوك لضبط النفس مع هذه الاشكال من انصاف المدعين ....

    سيبك ... علشان لو هتتعصب علشان واحد بيهس و عايز يحشر نفسه في اي حته و السلام ... علشان نفسه يتشهر وخلاص .... يبقى بصراحه مش هتخلص ...!!

    و اوعدك ان ساعتها هيتحرق دمك كتيير ...

    على كل حال عود احمد ...
    ;P

    ReplyDelete
  33. جعان أفندي سلطان دولة بني جعان
    تحياتي أطيب تحياتي من موسكو
    قصدي م مصر
    عود أحمد للتدوين
    والله الواحد مبسوط حترجع تتحفنا تاني يا جعان أفندي
    السعدني فعلا حدوتة مصرية
    الواد الشقي اللي ملهوش حل خفة دم منقطة النظير
    كتب في كل كبيرة وصغيرة
    اتبهدل على كل لون يا معتقلات
    فلم يتغير

    ReplyDelete

بعبع وقول اللي في نفسك يا خويا