Tuesday, May 18, 2010

ياكلو حلاوة ياكلو جاتوة

لدي يقين راسخ ان نهايتي سوف تكون بسبب خبر اقرأة في جريدة

او في تلفزيون او وصلة لموقع اخباري يرسلها صديق لي املا في التخلص مني واراحة الكثيرين اولهم اولهم الست والدتي لايمانها الراسخ اني هاكون السبب في جلب العار للاسرة بكلامي البطال وتلسيني علي اسياد البلد الطويل فيها قبل القصير

وكلما حاولت ان انظر لتصريحات السادة الافاضل الوزراء "افاضل يعني اللي لسة فاضلين علي كراسيهم" من منظور اكثر انفتاحا وانفشاخا احس بكرشة نفس ورعشة وعرق غزير وابقي زي اللي رايح يجدد رخصة العربية ومستني كشف المخالفات

المهم يا اسيادنا وما سيدكم الا انا





البرنس اللي في الصورة دة المراسي بية مدير امن 6 اكتوبر وهو بيسلم المزغودة دي علبة الشوكولاتة
الحكاية ان مديرية الامن بتاعة 6 اكتوبر اللي اتقتلت فيها بنت ليلي غفران
عملت معرض للمسروقات وعزمت الاخوة المسروقين كل واحد يفتش وياخد حاجتة ويحط اللي في النصيب في صندوق اعانة مديرية الامن
وصادف ان احدي الاسر اصطحبت طفلتها للمعرض تقولش رايحين كوكي بارك
المهم البنت راحت متشعبطة في كم البدلة الميري لعمو اسامة وقالتلو عمو الحرامي اكل الشيكولاتة بتاعتي
راح الحج الدمعة فرت من عينة والريالة بقت علي صدرة شبرين جري علي وزير الداخلية
وقالة سايق عليك النبي والعدرا والست ام هاشم تشوف حل للمزغودة الصغيرة هاتفضحنا علشان علبة الشكولاتة
ولم يقصر السيد الوزير واخرج ورقة ب 20 جنية تدبح الكتكوت وكرمشها في ايد ابو اسامة
اطلع علي قويدر وهاتلها كيلو شوكولاتة بالفندام علي حسابي وقد كان
وانا ومن منفاي هذا اناشد السيد الحج اسامة والاسطي المعلم حبيب بعمل زيارة للست ام حمدي وتسليم عدد 2 سوتيان مقاس 48 سي
عوضا عما سرقة حرامي الغسيل منها الشهر اللي فات واذا امكن في جوز للبسة بتوع الواد حمدي مفقودين
وحتي لا اكون كمن يرفس النعمة اتوجة بالشكر للداخلية علي اهتمامها باحاسيس طفلة في الثامنة من عمرها
واامل ان يأتي قريبا دور الناس اللي في العشرينات والتلاتينات والخمسينات والسبعينات
وينظر اليهم بعين العطف ويتم صرف كيس ارواح وحتة بسطة ومتر ربسوس

13 comments:

  1. الحرامي سرق الشوكلاتة بتاعتي؟؟؟؟

    ايه النصب ده .. البت اللى تنقرص دي عجيبة بجد

    :0

    ReplyDelete
  2. مسروق مني والله
    N 73
    من شهر

    ومن موقعي اناشد السيد حبيب العدلي انه يصرف لي عدة
    ولو صيني و كارت شحن بعشرة

    وياحبذا لو امعن في كرمة وحط لي كول تون
    لمحمد فوزي
    تعب الهوا قلبي والحلو مش داري

    ReplyDelete
  3. طيب بالنسبة للبلد إللى إتسرق شرفها يا ترى يقدر يتصرف فى الموضوع دا ولا خارج قدراته ؟

    ReplyDelete
  4. انت فينك من زمان يا برنس كل فين و فين لما بطل علينا بطلتك البهية

    ReplyDelete
  5. ههههههههههههههه مشكله انت مشكله مصيبه لوحدك من مصايب الشعب المصرى بس بموت فيك

    ReplyDelete
  6. باسم الكربلائىWednesday, 19 May, 2010

    هههههههههههههههههههههههههه

    هى دى حقوق الانسان
    ابوه كده خلى البلد تنضف من حراميه الشكولاته ولاد الكلب اللى وكلنها والعه و بسرقوا من خزائن شوكلاته البلد


    يذكرنى باسماعيل يس و الباذ افندى

    ايه دى يا عدلى افندى تكونش شوكلاته

    ReplyDelete
  7. سوتيان مقاس 48 ؟ ياراجل ليه ده ينفع مقاس صندل لديناصور !! والا عيلبة الشكلايطة دى كمان .. هههههه روح ياشيخ ربنا يكرمك بعفريت علاء الدين يحققلك امنايتك ههههه

    ReplyDelete
  8. هههههههههههههههههههههههههههه
    ياااااااه على دي دماغ يا جدعان
    انت جيبها منين الدماغ دي

    على فكرا انا متابع المدونة من زمان جدا
    جميل اوي اللي انت بتكتبة
    ربنا يحميك يا رب ويزيدك


    وعلى فكرا انا مسرووووق مني بوكسر ازرق ابقا ناشدلي مع الست ام جمدي عشان خطري ههههه

    ReplyDelete
  9. وانا كمان ضاع مني حاجات كتير

    ممكن اروح لعمو بتاع وزارة الملابس الداخليه

    ويجيبي الحاجات دي

    ReplyDelete
  10. ايه الخبر ده أول مرة أعرفه .. شكراً هههههههه جزيلاً أخي الكريم

    ReplyDelete
  11. محاولة أخرى لتحسين صورة الداخلية
    بس جت المرة دي مسخرة بجد
    كاريكاتير

    إيييييييييييه
    كلها اشتغالات

    ReplyDelete
  12. أهلا
    أول مرة ازورك مع انى مر على الاسم "انا جعان" ده مرات وأنا اتنطط فى البلاليج ...لكنى احس وكأنك من أصدقائى ومعارفى من اسلوبك الساخر الجميل وسأضع مدونتك هذه ضمن المدونات المفضله عندى وتحياتى لأسلوبك الساخر -الشاخر - عند اللزوم لأن الأمور لاتحتمل أحيانا الا الأخيره عندما يكون القرع مزهزها والاستهبال جليا
    سعيد جدا بأن ساقتنى الأقدار لصفحات وسطور احبها

    ReplyDelete

بعبع وقول اللي في نفسك يا خويا