Wednesday, September 28, 2011

المقر الرئيسي لتويتر

انا عارف ان انتو مش متعودين علي النوعية دي من المواضيع في المدونة وخصوصا وانها اشتهرت بلسانها الزالف ,ولكن حبيت اشاركو صور مقر تويتر الرئيسي اللي ميفرقش كتير عن صور مقر مجمع التحرير او اي مركز شباب بمركز السنبلاوين




















Tuesday, August 09, 2011

العالم في عرض مصر


صدق الحجاج بن يوسف الثقفى حين قال عن المصريين فى وصيته لطارق بن عمرو حين صنف العرب فقال عن المصريين لو ولاك امير المؤمنين امر مصر فعليك بالعدل فهم
قتله الظلمة وهادمى الامم وما اتى عليهم قادم بخير إلا التقموه كما تلتقم الام رضيعها وما اتى عليهم قادم بشر إلا أكلوة كما تأكل النار اجف الحطب
وهم اهل قوة وصبر
وجلدة وحمل
و لايغرنك صبرهم ولا تستضعف قوتهم
فهم إن قاموا لنصرة رجل ما تركوه إلا والتاج على رأسه
وإن قاموا على رجل ما تركوه إلا وقد قطعوا رأسه
فأتقى غضبهم ولا تشعل نارا لا يطفئها إلا خالقهم
فأنتصر بهم فهم خير اجناد الارض وأتقى فيهم ثلاثا
نسائهم فلا تقربهم بسوء وإلا اكلوك كما تأكل الاسود فرائسها
ارضهم وإلا حاربتك صخور جبالهم
دينهم وإلا احرقوا عليك دنياك
وهم صخرة فى جبل كبرياء الله تتحطم عليها احلام اعدائهم وأعداء الله

Saturday, March 19, 2011

حرية برائحة التفاح

النهاردة يوم تاريخي

ما اعتقدش انة حصل في تاريخ الدول العربية وربما بعض الدول الغربية

ان 40 مليون تقريبا ممن لهم حق التصويت علي الاستفتاء الدستوري

خرجو ووقفو طوابير اكبر من طوابير العيش و الغاز والتامين الصحي والمعاش

من غير ما يكون حد قابض علشان يقف

مش ممكن دة احنا نطينا 100 سنة النهاردة بس

انا متهيألي ان من ساعة حكم عيد الناصر لحد مبارك فترة لازم تسقط مننا ونبتدي بعد فاروق مباشرة ليوم 25 يناير

سواء صوتك كان لنعم او لا مش مهم المهم اننا بنجرب الديموقراطية يعني اية

ناس كتير مش فاهمة هي بتقول نعم لية ولا لية

دي مشكلة هانبقي نشتم فيها الناس بعدين علي رواقة

لكن دلوقت اتركونا نستمتع برائحة الحرية

المغموسة بمعسل التفاح

Saturday, February 12, 2011

الله ...الوطن...الشعب

اليوم
الحادي عشر من فبراير من العام الحادي عشر بعد الالفية الثانية
وبعد مرور سبعة عشر يوما منذ بدأت الثورة اليوم الخامس و العشرون من يناير
اعلن محمد حسني مبارك تنحية عن السلطة وتسليم سلطاتة للمجلس الأعلي للقوات المسلحة

الله ...الوطن...الشعب

Friday, February 04, 2011

حقيقة ما حدث يوم 25 يناير

لكل المتخاذلين اللي بيطالبو بالعودة وان مبارك يجب ان يخرج خروج نضيف كريم ادعوكم لمشاهدة الفيديو دة ادعو اهاليكم يشوفو الفيديو دة دة عن اول ساعات في المظاهرة السلمية يوم 25 وكيف قام الامن بمعاملة الناس كما لو كنا في حرب لكل متخاذل مستني الدفا ولقمة عيشة وينام وتعب من الوقفة يحرس بيتة شوف دة شوف موت المصريين اللي زيك اللي كنت بتقعد جنبهم في الكافيهات والقهاوي واللي كانو بيقفو في طريق المطار
اللي كانو بيطلعو المقطم شوفهم وربك بيغفرلهم وبيلقوة شهداء
والفيديو التاني سيارة مجهولة يقال انها ديبلوماسية تابعة للخارجية تدهس فوق ال 20 انسان يوم 28 يناير




Monday, January 17, 2011

علي الهامش التونسي

قالو للشعب التونسي ثور ..فثار
قالو للشعب المصري ثور... قال احلبوة
علي لسان احد المكافحين الالكترونيين المصريين: هو الشعب التونسي بيثور ف الشوارع ليه ؟؟ ما عندهمش فيس بوك
تونس اختارت التغيير و مصر اختارت شيبسي بالجمبري
الا صحيح يقال ان سبب اندلاع الثورة التونسية اشعال احد الاشخاص النار في نفسة
سؤال بقي يطرح نفسة طب احنا اتحرقلنا بدل المواطن مليون ايشي في قصر الثقافة وفي قطارات سكة حديد وفي مجلس شوري
ومستشفيات ومصانع وشركات قطاع عام ومخازن و كنايس
ويقال والعهدة علي الراوي ان حريق عمر افندي وكشري التحرير وبعض زراعات القصب كانت مدبرة لقلب نظام الحكم
انا عارف بل انا علي يقين ان المصري بخيرة وبكيسة
وان الثورة جاية جاية وان تأخرت تلات اربع عشر خمسين 7 الاف سنة
وان هناك من علامات الثورة الكثير وكلها بتقول ان الشعب المصري هايثور
اصل مش ممكن يكون كل دة بيحص ومحدش يثور او حتة يفرقع بمبة في شارع ضلمة علي الاقل
ومن الدلائل البينة علي قيام الثورة
ان مفيش حد علي الفيس بوك دلوقت الا وحاطط صورة الهلال مع الصليب
ان مرات الحضري قلعت الحجاب وطلعت بالكومبليزون في الجرايد والمجلات
"دي علشان الثورة العارية "
ان غادة عبد الرازق اتجوزت 5 في مسلسل واحد
قلة الحشيش في الاسواق المصرية
انتشار البانجو كبديل
تماثل الكثير من اصحاب الكييف للشفاء
عمرو اديب و ابراهيم عيسي ومحمود سعد اختفو من التلفزيون
مع وجود تامر امين ومعتز ابو ضحكة السكرة
هزيمة الزمالك امام اسمنت اسيوط
تامر حسني فتح اخر زرار في القميص مما اتاح مزيد من الحرية لشعر صدرة
بعد كل هذا اعزائي اي شعب عندة دم لازم يثور او علي الاقل يقوم باصدار اي حركة تدل علي ان الروح فية
يصفر يشخر لامؤاخذة يصدر هواء
اي حاجة تقول انة صاحي وبيلعب
لكي تقوم ثورة يجب ان لا تكون هناك طبقة متوسطة, فالطبقة التي تملك منزل او شقة بعد شقا 20 سنة في الخليج وسيارة هيونداي
وعيال في مدارس خاصة وقرشين في البنك لا تثور
اذا كان معاك بلاك بيري لا تثور
اذا كان معاك واحدة صاحبتك لا تثور
اذا كان معاك بلاي ستيشن لا تثور
اذا كان معاك بواسير لا تثور وروح لدكتور مسالك علطول
اذا كنت مشترك في صفحة محبي شعر صدر تامر حسني لا تثور
اذا كانت مشترك في صفحة مليون توقيع لجعل صفحة النبي اول صفحة علي الفيس بوك لا تثور" انت كدة عملت اللي عليك وزيادة" وحتة
اذا كنت زملكاوي لا تثور كفاية اللي انت فية
اذا سبت كل اللي فات ومسكت في الجملة المذكورة فوق اوي ان الزمالك انهزم قدام اسمنت اسيوط لا تثور برضة
وروح ثور علي روحك جنب اي شجرة

حكمة العدد
اللى مربى قرد عارف لعبه