Tuesday, September 11, 2012

السياسه للجميع

السيدة الفاضلة هي السيده اللي فاضله معاك في البيت لحد دلوقت
الشريط الحدودي: الشريط الجاي لتامر حسني 
التربيه و التعليم: كان في وزاره بتقوم بيها دلوقت بيقوم بيها تجار المواشي وبيعلمو البهايم بختم احمر علشان ما تتلخبطش علي بعض 
العصيان المدني :هو ان تضرب الدولة المواطنين بالعصيان
شهاده الايزو: دي شهاده مضروبه بتشتريها الشركات زي ما الفلاحين بيشترو شهاده نحو الاميه ب10 قوالح دره 
قطاع الاعمال: ميفرقش عن قطاع الطرق 
التعمير: عمليه دقيقه تتم في الغرز والشوارع الضلمه 
صندوق النقد: ميفرقش كتير عن صندوق الزباله 
العمل بالسياسه: ده نشاط معروف يمارسه اي سايس في المواقف والجراجات 
الديماجوجيه : حاجه قالها البرادعي من شهرين ومحدش فاهمها لحد دلوقت 
التحالف الاقليمي: لما ابوك يروح يتحالف علي امك بالطلاق قدام الجيران 
قانون الطواريء: ده معمول علشان كل اللي اسمهم طارق يتلسعو بمعلقه سخنه في حته حساسه 
فاشية : قليل الحظ يلاقي العضم في الفاشيه 
الإمبريالية : دي حاجه عيب قوي ما قدرش اقولها 
المجلس التوافقي: يعني ابوك يكون بيضربك وامك تزغرد 
الاستفتاء الدستوري: بجراحه بسيطه بيلم تاني وتبقي زي الفل بس لازم تنام علي بطنك اسبوعين
جماعات الضغط .. زيها زي جماعات البطن و جماعات العقله وجماعات الوثب العالي
تداول السلطه.. يعني امك تمسك مصروف البيت شهر و ابوك شهر
الصراع الطبقى ... كل واحد عايز ياكل من طبق اللي جنبه
الشفافيه: جويا وفيكتوريا سيكرت عاملين ديسكونت علي الحاجات الشفتشي
مشروع النهضة.. قوم بينا يا خيرت ننهض ونفتح سوبرماركت
سياسة التقشف.. ودي بتكون بسبب انك ما بتحطش كريم نيفا للقشف
العدل ...شركه انتاج في وسط البلد
الكسب غير المشروع ..غير الميكروباص ..غير المترو

Friday, May 04, 2012

عامين علي رحيل شيخ منصر المضحكاتيه


"الولد الشقي"

اذا كنت لا تعلم من هو محمود السعدني


فلا تحمل نفسك مالا طاقة لها بة وتتكبد عناء قراءة التالي
اشقي ولد عرفة العالم العربي

اذا كانت الدنيا عادلة لاستحق محمود السعدني ان يتقلد ارفع الاوسمة ليس فقط في مصر  ولكن في الوطن العربي من النيل للفرات


واذا هناك من استحق نوبل عن جدارة وليس عن لامؤاخذة فكان السعدني اولي بها ممن لم يضيفو شيئا وحازوا من الجوائز و التقدير ما يكفي لبناء متحف لعرضها


ان كان للسخرية اب فالسعدني ابوها الشرعي و ان كان للادب الساخر عصابة فالسعدني هو شيخ منصرها بلا منازع


افني 60 عاما من عمرة في نقل احوال وطن عربي خليجي مغربي وشرق اوسطي


لف العالم من شرقة لغربة حرفيا نام في قصور زي ما نام في زرايب العجول

ان اغلب ممثلي الكوميديا خرجو من تحت عباءة السعدني


ومعظم رسامي الكاريكاتير في جيلة هو مكتشفهم
والعديد من الكتاب الساخرين الذين يشار اليهم بلقب استاذ يسبق اسمائهم كانو عيالا يحبو حول السعدني

فقد اعطي للسينما والمسرح والرواية والتلفزيون والااعة خبراتة وكتاباتة لا يوجد وسيلة اعلامية الا ولة بصمة

لم يهادن لم يطاطي كما طاطي البعض
لم يجعل خدة مداس

والحكايات و الدلائل كثيرة
مش جعجعة فاضية وبيتين شعر مكسرين وشتيمة هنا وشخرة هناك
واطلق علي نفسة صفة الشاعر المناضل كما يحب للبعض وصف نفسهم بما ليس فيهم

كان اول من وقف في وجة ايران في اواخر السبعينات وقال ان الخليج عربي وليس فارسي واصدر مجلة من داخل ابو ظبي


بعد ان كانت ايران تعتبر الامارات من ملحقاتها وتطالب بها واسماها مجلة الخليج العربي

عمل السعدني في كل الدول الخليج بل وضع اسس الصحافة في هذة الدول وقام بتعليمهم الف باء صحافة وتتلمذ علي يدية اغلب من اصبحو اليوم من اصحاب الجرائد والمجلات
السعدني لم يكن فقط شاهد علي العصر ان السعدني قد بال علي العصر بال علي المنافقين و الثورجيين و المتحولين و الملونين
لم يترك صاحب نقيصه الا وكال له ولا ملاكم عتيد في ماتش النهائي.
وانا شخصيا ادين بالفضل للسعدني فهو السبب في حبي للقراءة منذ اكثر من 20 عاما
هو الوحيد الذي اذا قرأت لة اضحك حتي اكاد اشعر باقتراب دنو اجلي من قلة الهواء
خدمني القدر يوما بالجلوس في حضرته  في احدي جلساته الشهيره التي كان يسعي لها عليه القوم قبل صعاليكهم
ولما يسلم احد من لسانه مهما علت رتبته خاصة اذا كان محسوبين علي النظام ,اي نظام.


الوحيد الذي قرأت كل كتاب لة علي الاقل 3 مرات


الوحيد الذي لا يخونة التعبير ولا يفلت لكتبة زمام

وأبحث عن اي مقال لة او كلمة منشورة في اي مكان

فمن لم يقرأ للسعدني فهو لم يقرأ بعد الادب الساخر

اما الان فقد توفي عميد الادب الساخر ويمر اليوم عامين وتسير ذكري وفاة العم السعدني مع ميلاد مبارك المخلوع كما لو ان السعدني حتي اخر يوم في حياته يخرج لسانه لاصحاب المعالي في يوم مولدهم وفي يوم وفاته


وزادت مساحة الكأبة مرة اخري


واغلقت الصفحة الاخيرة في حياة كاتب قلما يجود الزمان بمثلة

Sunday, April 29, 2012

مشروع النهضه ينافس مترو الانفاق

‏ اول تصريح لمرسي و الشاطر بعد اجماع حزب النور علي دعم ابو الفتوح

Saturday, April 14, 2012

فتوحات حمله لازم حازم

انصار الشيخ حازم يحاصرون محل حلاق الشيخ علشان خفله السوالف اشاعه مفادها ان انصار الشيخ حازم يحاصرون اداره المرور علشان الشيخ اخد نمره لوحه عربيه معجبتوش
انصار الشيخ حازم يحاصرون منزل الشيخ حازم بعد تردد انباء ان مراته عملت له السلطة ناقصة ملح
أنصار ابو اسماعيل يحاصرون محل كشري بعد ان لم يتم اضافة دقة كفاية في الطبق الكمالة لابو اسماعيل
أنصار الشيخ حازم ابو اسماعيل يحاصرون هيئة الأرصاد الجوية... بعد تصريحه بانه حرّان شوية
هروب بواب عمارة الشيخ حازم بعد ان فشل فى انه يجيب كيلو اللحمة ب 2 جنيه كما طلب وانصاره يتجهون الى السلخانة بالمدبح لحصارها انصار الشيخ حازم يحاصرون فكهاني بوسط البلد علشان صدق الاعلام وشال بوسترات حازم
انباء عن حصار انصار الشيخ حازم لمحطة موبيل صلاح سالم .. لأن الشيخ مون منها والبنزين خلص بسرعة
انصار الشيخ حازم يحاصرون شركة المياة بعد رفع الضغط لمنزل الشيخ مما ادى الى لسعة بالماء الساخن و هو بيستحمى
انصار الشيخ حازم يتجهون لحصار سواحل البحر الأحمر لأن الشيخ حازم اكل سمك امبارح ودخلت شوكة فى زوره
أنباء عن محاصرة أنصار ابو اسماعيل لإدارة مرور القاهرة بعد انتشار شائعة عن انتهاء رخصة الشيخ حازم
وهذا وسنوافيكم تباعا بفتوحات حمله لازم حازم

Tuesday, March 20, 2012

لا يأس مع الحياة ولا حياة مع الاخوان

يتباهى الاسلامجيه باقتراب الإخوان من السلطة في مصر، وتعبيرهم عن هذا الامر في مصر و الخليج ملحوظ،

الذين تعلمو السكوت والتقية طويلا، فهم يعتقدو ان مصر علي ابواب خلافه جديده تحكمها دوله دينيه جايز مصر الان علي ابواب حكمها الاخوان و السلفيين لكن هي مرحله المخاض والتي تسبق الولاده فربما يأتي الجنين من فصيل اخر،

وقد يأتي مولود مرتبك مفضوح فالاخوان يعانو من صدمه وصول السلطه لايديهم بهذه الطريقه و السرعه.

المعارضة فن و هندسه والسلطة علم وفن مختلف تماما، ولاعبي المعارضة في الاغلب لا يجيدو فن السلطه حينما تهبط علي الرؤوس فجأة

كما نكتشف دائما أن قوه وحرفه المعارضة قد لا تجيء بسلطة بديلة قادره علي الحكم،

والادله و النماذج كثيره كما الشيوعية والثورة السورية فالمعارضه محترفه خطابه لا فعل. في حالات قليله جدا قد يمكن ان يصبح الناقد فنان مبدع رغم حرفيه نقده وملاحظاته الفنية، وينعدم نجاح المعارضه الداجنه تحت الحكم الديكتاتوري مهما كان خطابها مشبع بالخطب و التصريحات العنتريه المثيره، لأنها مؤسسه على هدم ما هو قائم وليس بناء بديل. حركة الإخوان صوت معارض له وزنه وتصريحات ومواقف مبهرجه مثيره ، واجتذبت تابعين ومحبين علي مستوي العالم العربي وحصرت العضويه بشروط مدققه ، إلا أن الصدمه كانت في اقتراب السلطة من ايديهم بدون سابق انذار، مما وكشف عوراتهم و تخطبهم، فهم لم يتخيلو او يستعدو يوماً لوضعية مشابهه، وكانايمانهم العميق أن السلطة ستكون لهم عبر اختراق قوائم الدوله والنمو من خلالها وليس سقوط النظام المفاجئ واختفائه الكامل , الجماعه لاعب محترف في المعارضه، بينما كل الدلائل تقول علي انهم فاشلون في لعب دور النظام وهو ما نراه يوميا بشكل مستمر فلا خدمات الدوله تحسنت ولا شرعت قوانين تعيد قدر يسير يجعل المواطن يشعر ان هناك ثوره قامت بل العكس تماما . حاله من التراخي و المهاترات تلقي بظلالها علي مجلس

اغلب اعضائه كانو معتقلين او مهمشين او في حاجه لعمليه تجميل.

اغلب الظن انهم لن يستمرو في الحكم وسيتم انزالهم من سدتة  سواء بانقلاب او اغتيال  واعادتهم للسجون فالدوله العميقة مازالت في قوتها و عنفوانها وليست رخوة كما  في السيناريو الايراني او التركي

فانهم في حال استمرو في الحكم فلن يتركوه بشتى الطرق وسيكون شغلهم الشاغل البقاء في الحكم وليس تنمية الدولة

Sunday, March 11, 2012

وكان في العرب يوما ابن الهيثم واصبح اليوم لدينا هيثم


للاسف اختلط مفهوم العالم مع الداعي فاصبح من يتنطع علي الناس بدينه ويحلل ويحرم كيفما ترأي له عالم جليل
العيب مش عليهم العيب علي النفوس الرخوه اللي بتعتقد ان باتباعها للحيه وتوب وغطاء للرأس ودمعه تفر مع كل ذكر لله
هو ده مفتاح الجنه
الجهل هو عدو الدين وهو مدخل كل البدع و المفسدات و المحدثات فلم يكن هناك عالم الا وله حرفه وله اثر في وجه البشريه
اقرأوا عن ابن الهيثم فهذا الجبل كان عالم متبحر في 5 علوم علي الاقل في الجيولوجيا و البصريات و الهندسه و الطب و الحساب وله كتب يتصاغر امامها اعاظم علماء الغرب.
ابحثوا عن الرازي عالم الرياضيات العراقي ومن مؤسسي نظريات جديده في لأعداد، والجبر، والمقابلة , قسمة التركات والهيئة.

هل علمتم من هو الزهراوي الجراح العربي الاندلسي و اعظم طبيب عاش في القرن الرابع من الهجره الرجل كان علامه وله مؤلفات حرقت في حرائق الاندلس المتعدده لطمس تاريخ العرب في امراض العيون و الاذن و الحنجره و الاسنان

عارف مين أبو جعفر الخازن الذي لا يوجد من مسيره 80 عاما تقريبا الا كتابين بعد طمس وسرقه كل كتبه ومؤلفاته من قبل الاوروبيين من اول القرن الخامس للهجره وحتي الثامن

ويقال انه الوحيد في عصره والاول اللي حل معادلات التكعيبيه الهندسيه اللي انا نفسي معرفش هيا ايه اساسا..

ابحثو عن ابن النفيس الدمشقي وسمي بلقب ابن النفيس لنفاسة عقله وعمله واقل اكتشافاته واكثرها شهره هو اكتشاف الدوره الدمويه الذي بني عليه طب وجراحات القلب و الشرايين.
ان كتب الطبري هي الاشمل و الاعم في علم النباتات و السموم و امراض الجلد وصاحب اشهر كتاب سياسي في التاريخ القديم العربي "الدين والدولة"
حد اسم يعقوب بن إسحاق الكندي يمثله شيء؟؟
مادرس احد منكم علم الفيزياء الا و الكندي له في ما تعلمته اياد بيضاء

عارفين ان علم الاورام مؤسسه والرائد فيه عربي هو عبد الملك بن زهر او ابن زهر
ولا ننسي ابن سينا شيخ الاطباء وكانت كنيته في اوساط الناس " الرئيس" ابن سينا ألف اكتر من 270 كتاب.

وبعد ده كله يأتي من يدعي زورا وبهتانا ان شيوخ القنوات التلفزيونيه الذين لا هم لهم الا الحديث عن تغطيه المرأه لوجهها فضل ام عدل وان طول اللحيه وقصر الثوب من اللباس النبوي
والاحتفال بعيد الام حرام والخروج علي الحاكم حرام والتظاهر فتن و التجمهر فسوق..
ايا تنابله السلطان يا اكلي السحت ياايات الرياء اين انتم من علماء كانو مثالا للدين ومتبعين لسنه النبي الصحيحه.
حرمتم التشبه بالكفار واكلت اكلهم وعولجتم في بلادهم وركبتم سياراتهم اه يا رؤوس النفاق يا نوائح الملوك
يتفاخر اتباعكم ان منكم من هو خريج طب و اداب و اعلام وهندسه
ولم نسمع عن كتاب واحد او كشف او حتي جريده نخل بها علم افاد المسلمين
تبكم كل نقيصه وكل زلل ويتغاضي عنكم اتباعكم ومريدكم املا في ان تكونو طريقهم للجنه ولا يعرفو ان الجنه سفر شاق
ليس بجلسه وقصه ودمعه
ربما دخلتوها ولكن الله عدل لا يكون الراوي كالكاتب ولا الكاتب كالمعايش ولا العايش كالفاعل المؤثر
قال الإمام الشافعي : لأن أتكسب بالرقص خير لي من أن أتكسب بالدين ..
اتقو الله و كونوا مع الصادقين

Sunday, March 04, 2012

مصر فرشحت في الارض

هل كره الاحزاب جريمه, او يغضب الله؟؟ هل مشكلتي ان الاحزاب دي ربطت اسمها بالدين ؟؟؟

يعني انا لما انتقد حزب يبقي بنتقد الدين؟؟ اعملهم ايه اذا كان افعالهم دنيئه ورخيصه.
واحمد الله اني قاطعت مهزله انتخابات مجلس الشعب اللي ادت بناس عوضا عن اعاده المنهوب و المسلوب و حق المقتول بتدور ورا مواقع السكس و حق الظابط في تربيه لحيته و الانجليزي يتدرس من 2 ابتدائي ولا اولي حضانه.
السخريه منهم هي طريقتي الوحيده وربما اخر حقوقي المتاحه ضد كل من لا يعحبني مواقفه مستكترين علي حتي دي مستكترين علي اني شايف الحقيقه وعارف ان دخول التيارات الحاليه هو نتيجه اتفاقيه مع المجلس العسكري وان غض البصر عن كل ما هو جلي وواضح للعيان و الميت كمان مستكتر علي اسخر من مجلس لم يقف فيهم رجل ويقول نعم المجلس العسكري من النظام البائد ويجب ان يرحل ويحاكم لم يقف رجل يقول لماذا لا يعامل من في طره كما كان يعامل الاخوان في محبسهم امام القضاء العسكري مكبلين كل اتنين في كلبش؟؟ متستكترين علي اقل حقوقي الادميه من الصراخ,
مستكترين علي اكره كل ظالم منافق وحصرتني اني بكرهم لكونهم اسلاميين وكاني يا اخي من مله تانيه.راجعوا نظرتكم للاخرين ولا ترفعو احد لمصاف اعلي من حقه وابحثوا عن الحقيقه ولا تاخذوها علي طبق من دهب اذا كنت معتقد ان وجودك وسط من يتبعو نفس فكرك ان كده هي دي الصحبه الصالحه فانصحك تنغلق وتتعامل مع فقط من يوافقو تفكيرك وتريح نفسك من عناء سماع اراء تخالف ما تؤمن به

الانصاف انك تحاسب من معه المسؤليه ان التيارات التي جلست علي الكراسي المفترض هم دلوقت اللي معاهم السلطه فين بقي الفعل. مفيش مفيش, قرارات تمرر وقوانين تغير وهم كما خيالات المأته.

خرج علينا اشاوس المجلس بان مصر لن تركع ولن تنحني وفي الاخر خرج امريكان قضايا التمويل من صاله كبار الزوار وشربو قصب وتمر هندي ومصر ركعت بل مصر فرشحت في الارض ده حتي اعضاء حزب كنبه بلا حدود معجبهومش اللي حصل ده العيل حماده زبايدر نفسه اتنحرر وقالك احنا اتوكسنا. .

انا رفضت امشي ورا شيخ مريديه بالملايين عايز يلم فلوس من الشعب علشان يديها للجيش يلم فلوس من العرايا والجهله واللي بيكملو عشاهم نوم علشان يديها للعسكر بياخد من المحتاج ويدي للشبعان اراجوزات السلطان مسلحين بعده النصب حجاب رجالي وجلبيه قصيره ودقن للصره وورع كاذب وتقوي مسمومه وكله مباح حتي نريح ونستراح.

انا مااخترتش اقعد في جامع احضر دروس بس انا اخترت ادور في كل مكان مش اقعد واربع واللي يتقالي يبقي هو ده الصحوده اللي اتعلمناه من النبي عليه الصلاه و السلام وده اللي اتعلمته من شيوخي و اللي رفضو يطلعو في التلفزيون ورفضو يدخلو البرطمان ورفضو عروض بمئات الالاف علشان بس يطلعو في برنامج علي القنوات اللي بتبيع دين وسن الخرتيت في بروجرام واحد.وشلح وصلي علي رسول الله يا مؤمن لزقه البركه تشقلب الحال وتزود الحركه

Tuesday, February 14, 2012

ومات ساحر الكلمه

لم يعد هناك احد يضحكني بعد رحيل عمي محمود السعدني وخالي جلال عامر

Thursday, February 02, 2012

عضم ولادنا نلمه نسنه

عندما يستقر رئيس علي هوي وتحت طوع العسكر زي موسي او شفيق ستتوقف كل هذه الاحداث في لحظه بضغطه زر ويستتب
الامن وتدور العجله ويستكمل نظام مبارك حياته.
رئيس ثوري ، تغير للقيادات الداخليه و العسكريه و الاعلاميه تغير الفاسدين في القضاء ،نائب عام شريف هو الحل الوحيد لعدم الرجوع لزمن مبارك .
اصبح لا يهمني البرنامج الانتخابي لاي مرشح ف اربع او ثمان سنوات هي فتره كافيه فقط للتطهر من الراكبين علي مناكب الشعب فاذا كان ابو الفتوح او الصباحي او حازم صلاح فليكن احدهم يد الفأس التي تقتلع ما تغلغل في ارض مصر من رجال اكل وشرب منهم الفساد
اذا كنت تعتقد ان كل الاحداث السابقه وليده الصدفه فانت مخطيء فلا صدفه تتكر عشر مرات متتاليه بعد الغاء قانون واحد حكمت به مصر ٣٠ عاما متصله فقانون الطواري وضع لكي تسيطر الشرطه علي اي شخص سواء بقضيه جنائيه سياسيه او غيرها
فلما رفع القانون اراد العسكر و الداخليه اظهار للشعب انه لا يصح لشعب مثل المصريين الا ان يحكم بالحديد والنار
حتي يقر الناس في بيوتهم خوفا من جرائم مفتعله وامن مزعوم مزعزع .
من سخريات القدر ان يكون حواري مع صديق رأيه ان مصر يجب ان يكون رئيسها القادم رجل عسكري علشان يرجع الامان للبلد والهيبه، طيب يابن الوارمه ماحنا بقالنا سنه تحت حكم عسكري وبتخاف تنزل تجيب شريط لبوس لبنتك بعد الساعه ١٢ بليل
اذا كنت تعبت من الثوره فاعلم ان الثوره مخلصتش فادور علي حاجه تسلي نفسك فيها لحد ما نخلص ثورتنا

Wednesday, January 18, 2012

رجاءاً احشر مناخيرك

يموت الشعب المصري ويحشر مناخيرة وشفاتيرة واي عضو مدلدل في اللي ملوش فية
جواز طلاق خلفة موت ولادة اي حاجة الشعب كلة راشق.
حتي اكابر البلد اللي البعض منهم مشرف في طرة والبعض الاخر مستني لما سرير يفضي علشان يحصل اخواتة الشعب مش عاتقهم, يا اخوانا اتقو الله ودعو الخلق للخالق وخصوصا لما يكون الموضوع عائلي يعني وحاجات علي الضيق ما يصحش نخش في كل حاجة كدة
يعني حصل اية يعني لما الواد الغلبان علاء مبارك اتجوز من هيدي ابنة رجل الأعمال مجدي راسخ اللي اشتغل مع رجل الأعمال محمد نصير صاحب "فودافون"
و هاستفيد اية يعني لما نعرف ان مرات راسخ هي ميرفت قدري وجدها هو ابن خال عثمان أحمد عثمان
واخت مرات علاء مجوزة شريف البنا ابن محمد البنا بتاع مجلس الشعب
اية اللي انت استفدو كمواطن لما عرفت يعني ان بنت الجنزوري تكون مجوزة من واحد اسمه مصطفى حيزة وشغال مدير اعمال حسين سالم.
واية يعني لما مرات سيادة الشفيق فريق نزيهة الجمال تبقي عمة خديجة الجمال مرات جمال مبارك
والهام شرشر مرات العادلي طليقة اشرف السعد بنت عم سوزان مبارك
واية اللي حصل يعني في الدنيا لما يكون زهير جرانه إبن خالة محمد منصور والمغربى وأحمد عز
منير ثابت اخو سوزان مبارك يبقي جوز خالة انس الفقي
وسري صيام رئيس محمكة النقض يبقي ابو سري صيام رئيس البورصة
ومنير فخري عبد النور وزير السياحة يبقي ابنة خالة يوسف بطرس غالي
والصدف ياما بتحصل يعني دي اكيد صدفة بحتة ان اخت رشيد اتجوزت امين رياسة الجمهورية اللي في نفس الوقت اخو قنصل مصر في امريكا.
ويشاء ربك ان احمد فاضل رئيس قناة السويس مجوز ابنة لبنت عمر سليمان.
اتقو الله بقي وسيبو الناس, انت ايش عرفك الناس دي كافحت قد اية علشان تتجوز بعض .

لميس بية جابر

بعد التصريحات اللوزعية لفاتنة عصرها ساحرة قلوب الرجال
لميس بية جابر
ان الكتب اللي اتحرقت في المجمع العلمي اهم من شرف بنات مصر كلهم
انا شايف انها تركز جوة بعد ما انتشرت اشاعات ان الفخراني شاذ وكيف سمح القضاء المصري بزواج ابناء الجنس الواحد
اكد بعض الخبثاء ان
يحي الفخراني كل يوم خميس و كل ما لميس تبصله يقولها يا لميس اللي بتطلبيه دة عيب و حرام وتتهزله سبع سماوت

Monday, January 09, 2012

اللهم اضرب المهابيل بالمعاتية و اخرجنا من بينهم سالمين

الظاهر كدة اننا مكناش مقدرين حسني مبارك كفاية, انا مكنتش اتخيل و اتصور ان الراجل بالصحة دي كلها علشان لا مؤاخذة ذرب كل العيال دي دة ابناء مبارك يعملو بتاع 10 الاف ابن كلب
العبيط اللي فيهم اطول مني بشبر, المهم بيقولك يا سيدي وما سيدك الا انا خبر في الدستور بيقولك
ابناء مبارك نزلو دعك و طحن في جماعة احنا حمير يا ريس,, عفوا احنا قابضين يا ريس,,, لا احنا اسفين يا ريس.
امام باب اكاديمية الشرطة اللي بتم فيها محاكمة مبارك هو وجوز الخيل اللي مخلفهم .
الظاهر ان في حد كان بيوزع حواوشي قدام الباب فا بتوع احنا حمير يا ريس و بتوع بابا حسني اتخانقو علي الطرشي اللي كان قليل و هاتك يا ضرب و رفس بل اشتد بالبعض الحماس وقامو بحشو الاخرين بالفلفل و الخيار المخلل و فين يوجعك.
وانا ومن هذا المزنق ادعو من يدعون ان حسني بابي, اسأل امك كانت بتلعب بديلها ليه, و مع الريس يا ابن الوارمه وابوك بياكل زلابية في بيتهم.
واما بتوع احنا حمير يا ريس, عفوا بتوع احنا اسفين يا ريس
احب اقولك الريس بتاعكو بيقولك اتفو عليك وعلي اللي نفضتكو , عمال تطبل و تصقف للمشير اللي رماني الرمية السودة دي في الحبس يا ابن الهابلة.

Sunday, January 08, 2012

انا رجعت يا بني ادمين

انا رجعت يا بني ادمين الجعان التلاتين عشر رجع بعد صد محاولة العدوان الغاشمة من المأجورين والعملاء و الفلول و اللجان الاكترونية وبتوع احنا اسفين يا ريس و احنا قابضين يا ريس و احنا حمير يا ريس .


من 60 يوم احدي المنظمات بنت ستين جزمة عملت هاك علي المدونة و الفيس بوك فان بيج و التويتر , ظبطني الصراحة, لدرجة من كتر ما انا مش لاقي حاجة اكتب فيها كنت بشخبط لمراتي علي الحيطة.
عايز اتوجة بالشكر لواحد صديقي هو السبب في رجوع المدونة و التويتر و الفيس بوك فان بيج.
وان كنت اشك شك يكاد يقترب لليقين انة هو اللي وقعهم علشان يجرب فيا حاجة جديدة:((
زي ما وقع سيرفر "..." بنك قبل كدة :))) علشان اسمة علي الفيزا كان مكتوب غلط


وربنا معاكو بقي في الايام اللي جاية دة انا ناوي علي افترا :)))) الواحد اتربي بين تويتر و الفيس بوك برضة الواحد ميعرفش يأبح غير في مدونتة.وخصوصا ان الاحداث كلها تدعو للاباحة وزفارة اللسان واشارات بالصوابع و اصوات انفية ولحمية , والله المستعان و الموفق