Wednesday, January 18, 2012

رجاءاً احشر مناخيرك

يموت الشعب المصري ويحشر مناخيرة وشفاتيرة واي عضو مدلدل في اللي ملوش فية
جواز طلاق خلفة موت ولادة اي حاجة الشعب كلة راشق.
حتي اكابر البلد اللي البعض منهم مشرف في طرة والبعض الاخر مستني لما سرير يفضي علشان يحصل اخواتة الشعب مش عاتقهم, يا اخوانا اتقو الله ودعو الخلق للخالق وخصوصا لما يكون الموضوع عائلي يعني وحاجات علي الضيق ما يصحش نخش في كل حاجة كدة
يعني حصل اية يعني لما الواد الغلبان علاء مبارك اتجوز من هيدي ابنة رجل الأعمال مجدي راسخ اللي اشتغل مع رجل الأعمال محمد نصير صاحب "فودافون"
و هاستفيد اية يعني لما نعرف ان مرات راسخ هي ميرفت قدري وجدها هو ابن خال عثمان أحمد عثمان
واخت مرات علاء مجوزة شريف البنا ابن محمد البنا بتاع مجلس الشعب
اية اللي انت استفدو كمواطن لما عرفت يعني ان بنت الجنزوري تكون مجوزة من واحد اسمه مصطفى حيزة وشغال مدير اعمال حسين سالم.
واية يعني لما مرات سيادة الشفيق فريق نزيهة الجمال تبقي عمة خديجة الجمال مرات جمال مبارك
والهام شرشر مرات العادلي طليقة اشرف السعد بنت عم سوزان مبارك
واية اللي حصل يعني في الدنيا لما يكون زهير جرانه إبن خالة محمد منصور والمغربى وأحمد عز
منير ثابت اخو سوزان مبارك يبقي جوز خالة انس الفقي
وسري صيام رئيس محمكة النقض يبقي ابو سري صيام رئيس البورصة
ومنير فخري عبد النور وزير السياحة يبقي ابنة خالة يوسف بطرس غالي
والصدف ياما بتحصل يعني دي اكيد صدفة بحتة ان اخت رشيد اتجوزت امين رياسة الجمهورية اللي في نفس الوقت اخو قنصل مصر في امريكا.
ويشاء ربك ان احمد فاضل رئيس قناة السويس مجوز ابنة لبنت عمر سليمان.
اتقو الله بقي وسيبو الناس, انت ايش عرفك الناس دي كافحت قد اية علشان تتجوز بعض .

10 comments:

  1. الناس دي عندها طرفين واحنا عندنا طرف واحد

    فلوس ونفوذ متفهمنيش صح :)

    ReplyDelete
  2. يا لهههههههههههههههههههههوي ... ده تشكيل مافيا كااااااااااامل ........

    ReplyDelete
  3. يا لهههههههههههههههههههههوي ... ده تشكيل مافيا كااااااااااامل ........

    ReplyDelete
  4. عادي يا كبير ما انا متجوز من بنت عم احمد المهدي صاحب محلات المهدي للكراسي بس السلطة ما افسدتنيش كدة
    :)))

    ReplyDelete
  5. فعلا
    دع الخلق للخالق يارفيق
    يخرب بيوتهم
    والا بلاش
    دع الخلق للخالق

    ReplyDelete
  6. ما هو لازم الحرامية كلهم يتجوزوا من بعض عشان يبقوا ستر ولحاف على بعض أومال يجيبوا جاسوس من برة يبص لهم فى اللقمة

    ReplyDelete
  7. عيله مع بعطيهم وانتو مالكو انتو

    ReplyDelete
  8. ربنا خلصنا منهم الور على اللى لسة جاىىىىىىىىىىىىىى

    ReplyDelete

بعبع وقول اللي في نفسك يا خويا